Dada—Aleke Gbegbe Wògblẽa Nui?

ÈNƆ anyi kple ame aɖe si ɖoe koŋ be yeana nàse le ɖokuiwò me be mèle ɖeke me o la kpɔa? Ðewohĩ dɔnunɔla, dɔmegã, dɔdzikpɔla, alo kura gɔ̃ hã ƒometɔ aɖe ɖi gbɔ wò eye mebu wò ɖe nemi gɔ̃ hã me o kpɔa? Aleke nèse le ɖokuiwò me le ame ma ŋu? Ðe eƒe nɔnɔme nyo ŋuwò nète ɖe eŋua? Gbeɖe! Nukatae? Elabena dada gblẽa amewo dome eye wòxea mɔ na dzeɖoɖo.

Dada wɔnɛ be amea mekpɔa ame aɖeke ɖe naneke me o, ale be eya dzena amesi kɔkɔ wu amesiame ɣesiaɣi. Ƒã hafi amesi ƒe nɔnɔme le alea nagblɔ nya nyui aɖe le ame bubuwo ŋu. Ɣesiaɣi la egblɔa nya manyomanyo aɖe le ame bubu ŋu—“ẽ, anye nyateƒe ya, gake kuxi sia alo gbɔdzɔgbɔdzɔ kemɛ le eŋu.”

Woɖɔ dada le agbalẽ si nye Thoughts of Gold in Words of Silver, me be enye “nuvɔ̃ si daa ame ɖe anyi ɣesiaɣi. Egblẽa ame ŋu keŋkeŋ, eye naneke mesusɔna le eŋu si dzea ame ŋu o.” Ðe wòwɔ nuku be ame aɖeke mevona le eɖokui me ne wo kple dadala woli oa? Le nyeteƒe me la, zi geɖe nusi dada gblẽna nyea xɔlɔ̃ vavãwo ƒe amesimanɔmanɔ. Agbalẽ ma ke yi edzi gblɔ nusi to vovo na ema be, “xexeame lɔ̃a ɖokuibɔbɔlawo—menye ɖokuibɔbɔla siwo dana be yewobɔbɔ yewo ɖokui o, ke ɖokuibɔbɔla siwo bɔbɔ wo ɖokui ŋutɔŋutɔ.” Biblia gblɔe wòsɔ nyuie be: “Amegbetɔ ƒe dàda abɔbɔe ɖe anyi, ke amesi bɔbɔ eɖokui ɖe anyi la ƒe asi asu bubu dzi.”—Lododowo 29:23.

Gake nya si le vevie wu nusi wòagblẽ le xɔlɔ̃wɔwɔ ŋu kple bubu si amewo magade ame ŋu o enye be, aleke wòagblẽ nu le ƒomedodo si le ame kple Mawu dome ŋui? Aleke Mawu bua dadala, ɖokuidoɖedzila, kple ɖokuiŋudzelae? Dada alo ɖokuibɔbɔ—ŋkubiãnyae wònye le egbɔa?

Ðokuibɔbɔ Ŋuti Nusɔsrɔ̃ Aɖe

Lododowo ƒe agbalẽa ŋlɔla si gbɔgbɔ ʋã gblɔ be: “Dàda doa ŋgɔ na gbegblẽ, eye ɖokuidodoɖedzi na anyidzedze. Ðokuibɔbɔɖeanyi le hiãtɔwo dome nyo wu ne woamã aboyonu kple dadalawo.” (Lododowo 16:18, 19) Siria-ʋafia Naeman si nɔ anyi le Israel nyagblɔɖila Elisa ŋɔli ƒe nya la ɖo kpe nunya si le nya siawo me dzi kɔtee.

Naeman dze anyi. Esi wònɔ afisi wòakpɔ dɔyɔyɔ le dim la, ezɔ mɔ yi Samaria kple susu be yeado go Elisa ŋutɔ. Gake nyagblɔɖila la dɔ eƒe subɔvi ɖa be wòagblɔ na Naeman be wòaɖale tsi le Yordan Tɔsisia me zi adre. Dɔdamɔnu si wofia Naeman kple aɖaŋu si woɖo nɛ na wòbi dzi kple susu be womede bubu ye ŋu o. Nukatae nyagblɔɖila la ŋutɔ medo go va ƒo nu na ye o wònye eƒe subɔvie wòdɔ ɖa? Eye vavãe, tɔsisi ɖesiaɖe si le Siria nyo abe Yordan tɔsisia ene! Dadae nɔ fu ɖem nɛ. Nukae do tso eme? Etɔ nyo be wogana nuxlɔ̃ame nyui aɖee eye wòsee. “Tete wòɖi abu yi ɖado ɖi ɖe Yordan me zi adre le Mawu ƒe ame ƒe nya la nu, eye eƒe ŋutigbalẽ zu abe ŋutsuvi dzaa aɖe ƒe ŋutigbalẽ ene, eye eŋuti kɔ.”—Fiawo II, 5:14.

Ɣeaɖewoɣi la, ɖokuibɔbɔ vi aɖe naa wokpɔa viɖe gãwo.

Ðokuidodoɖedzi Me Tsonu

Gake nusi dada gblẽna ate ŋu alolo sãa wu mɔnukpɔkpɔ nyui aɖe alo nu vevi aɖe si abu ɖe mí ko. Dada ƒomevi bubu li si ƒe gɔmesese dze le nya “ɖokuiŋudzedze” me, eye woɖe egɔme be enye “dada gbɔlo alo kakaɖeameɖokuidzi si me wɔɖenui nɔna zi geɖe.” (Webster’s Ninth New Collegiate Dictionary) Nya sia de nu Helagbe me nya me tẽ, eye le Helagbenyala William Barclay ƒe nya nu la, “ɖokuiŋudzedze” nye dada kple ŋutasesẽ siaa . . . , enye ɖokuidodoɖedzi vlodoametɔe si naa [ame] ɖia gbɔ ehaviwo.”

Dada gbɔlo sia tɔgbe tututu ƒe kpɔɖeŋu aɖe dze le Biblia me. Edze le Amon-viwo ƒe fia Xanun gome. Insight on the Scriptures ɖe eme be: “Le dɔmenyo si Naxas wɔ na Dawid ta la, edɔ dɔlawo be woaɖafa akɔ na Xanun le fofoa ƒe ku ta. Gake le nya si Xanun ƒe amegãwo gblɔ nɛ be Dawid ɖe wòdɔ ameawo ɖa ko be woava tsa ŋku le dua me ta la, edo ŋukpe Dawid ƒe dɔlawo ale be wòlũ ge afãafã na wo, eye wòlã woƒe awu ɖe domedomee ɖe agɔnu hedo mɔ wo be woadzo.”a Barclay gblɔ le nudzɔdzɔ sia ŋu be: “Ðokuiŋudzedzee nuwɔna ma nye. Dzudzu, anyrawɔwɔ, kple ŋukpedodoame le dutoƒo katã dze le eme.”—Samuel II, 10:1-5.

Ẽ, dadala dzea eɖokui ŋu, mebua ame o, eye edoa ŋukpe ame bubuwo. Edzɔa dzi nɛ be yeawɔ nu wòave ame, gake metsɔ ɖeke le eme o eye evivia enu ne ŋu kpe amea wòde vovo ge do kpoe. Gake amedadaɖeanyi alo vlododoame le abe yi nuevee ƒe nugbegblẽ ene. Egblẽa xɔlɔ̃wɔwɔ me, eye woate ŋu ava zu futɔwo bɔbɔe.

Aleke amesi nye nyateƒe Kristotɔ aɖe dada vɔ̃ɖi ma tɔgbe afia evɔ eƒe Aƒetɔ de se be ‘wòalɔ̃ ehavi abe eɖokui ene’? (Mateo 7:12; 22:39) Nuwɔna ma mesɔ kple Mawu kple Kristo ƒe nɔnɔme le mɔ aɖeke nu o. Esia ta Barclay gblɔ nya vevi sia be: “Ðokuiŋudzedze nye dada si naa ame dzea aglã ɖe Mawu ŋu.” Enye dada si naa wogblɔna be: “Mawu aɖeke meli o.” (Psalmo 14:1) Alo abe alesi wogblɔe ene le Psalmo 10:4 (NW) be: “Ame vɔ̃ɖi la mebiaa Mawu ta se o le eƒe dada ta; eƒe tamesusu katãe nye be: ‘Mawu aɖeke meli o.’ ” Dada alo ɖokuidodoɖedzi sia menyãa xɔlɔ̃ kple ƒometɔwo ɖeɖeko ɖa le ame ŋu o, ke eɖea ame ɖa le Mawu hã ŋu. Mɔnukpɔkpɔ ka gbegbe enye esia ame nabu!

Mègana Dada Nagblẽ Dowòme O

Nu vovovowo ate ŋu ana ame nada—dada si tsoa dulɔlɔ̃, ameƒomevinyenye, ɖoƒe kple hadomeɖoƒe ƒe vovototowo, agbalẽnyanya, kesinɔnu, ŋkɔxɔxɔ, kple ŋusẽ gbɔ. Dada ate ŋu axɔ mewò agblẽ wò nɔnɔme bɔbɔe le mɔ vovovowo nu.

Zi geɖe la, ame dzena ɖokuibɔbɔla ne ele nu wɔm kple tatɔwo alo ehatiwo kura gɔ̃ hã. Gake nukae dzɔna ne nɔƒe kɔkɔ aɖe va su ame ma si ɖi ɖokuibɔbɔla la si? Enumake eva zua ŋutasẽdziɖula si menaa agbe vivina na amesiwo wòsusu be wole tsɛ wu ye o! Nɔnɔme sia ate ŋu age ɖe ame aɖewo me ne wodo awu alo kpla akɔtadzesi aɖe si fia be ŋusẽ le wo si. Dada ate ŋu age ɖe dziɖuɖudɔwɔlawo gɔ̃ hã me ne wole nu wɔm kple amewo, anɔ susum be ameawo ƒe dɔe wònye be woasubɔ yewo menye be yewoe asubɔ wo o. Dada ate ŋu awɔ wò dzimagbɔɖila, vevemaseɖeamenula; ɖokuibɔbɔ ate ŋu awɔ wò dɔmenyotɔ.

Yesu ate ŋu ada eye magbɔ dzi ɖi na eƒe nusrɔ̃lawo o hafi. Enye ame deblibo, Mawu ƒe Vi, si nɔ nu wɔm kple eyomedzela madeblibo siwo wɔa nu klokloklo nuŋumabumabutɔe. Gake aleke wòkpe amesiwo ɖo toe? “Mite va gbɔnye, mi amesiwo katã le agbagba dzem, eye agba le mia wum la, eye nye la mana dzudzɔ mi. Mitsɔ nye kɔkuti la ɖo mia ɖokui dzi, eye miasrɔ̃ nu tso gbɔnye, elabena nye dɔme fa, eye mebɔbɔ ɖokuinye ɖe anyi le dzi me, eye miakpɔ dzudzɔ na miaƒe luʋɔwo. Elabena nye kɔkuti la le bɔbɔe, eye nye agba la le wodzoe.”—Mateo 11:28-30.

Ðe míedzea agbagba ɣesiaɣi be míasrɔ̃ Yesu ƒe kpɔɖeŋua? Alo ɖe míewɔa nu dzimagbɔɖitɔe, nugɔmemasenametɔe, ŋutasesẽtɔe, nublanuimakpɔmakpɔtɔe, dadatɔea? Abe Yesu ene la, dze agbagba nànye akɔfanamela, menye dzigbãnamela o. Tsi tre ɖe dada ƒe ŋusẽkpɔɖeamedzi ŋu.

Ke ɖe wòfia be dada ɖesiaɖe ƒomevi menyo o le nusi míegblɔ va yi taa?

Bubudede Ameɖokui Ŋu Kple Ðokuiŋudzedze

“Bubudede ameɖokui ŋu si sɔ alo dze” hã nye dada. (Webster’s Ninth New Collegiate Dictionary) Bubudede ameɖokui ŋu fia bubudede ɖokuiwò ŋu. Efia be mèdi be ame bubuwo ƒe nya siwo wogblɔna le ŋuwò naƒo ɖi wò o. Wò dzedzeme kple bubu si le ŋuwò le vevie na wò. Spaintɔwo do lo wòle eteƒe be, “Fia amesi mia kplii miezɔna lam, eye magblɔ amesi nènye na wò.” Ne edze ŋuwò be yeazɔ kple amesiwo meléa be na wo ɖokui o, wonye kuviatɔwo, dzimakplawo, kple nyamadzetogblɔlawo la, ekema àva nɔ abe woawo ke ene. Woƒe agbenɔnɔ akpɔ ŋusẽ ɖe dziwò, eye bubu manɔ ŋuwò o, abe woawo ke ene.

Gake esi gbɔ eme hã li—dada si na wodzea ameɖokui ŋu alo na wokpɔa ameɖokui. Yesu ŋɔli me agbalẽfiala kple Farisitɔwo ƒe kɔnuwo kple subɔsubɔ nuwɔna vivivoa nye dada na wo. Yesu xlɔ̃ nu tso wo ŋu be: “Wowɔa woƒe nuwo katã, bena amewo nakpɔ wo; elabena wowɔa woƒe ŋkuɖodzinuwo wokekena, eye wowɔa woƒe awutogbowo wololona [bene woadze abe ɖe wovɔ̃a Mawu wu ene]; eye wolɔ̃a kplɔ̃tanɔnɔ le nuɖuƒewo kple nɔƒe gbãtɔwo nɔnɔ le woƒe ƒuƒoƒewo, kpakple gbedoname le ablɔawo me, eye bena, amewo nayɔ wo be Rabi.”—Mateo 23:5-7.

Eyata dada nyuitɔ nye nuwɔna si da sɔ. Ðo ŋku edzi hã be dzimee Yehowa kpɔna, ke menye gotagome ƒe nuwɔna dzro ko o. (Samuel I, 16:7; Yeremya 17:10) Ðokuiŋudzedze menye Mawu ŋu dzedze o. Gake míabia azɔ be, Aleke míate ŋu atu ɖokuibɔbɔ vavãtɔ ɖo ahaƒo asa na dada ƒe nu gã si wògblẽna le ame ŋu?

[Etenuŋɔŋlɔ]

[Nɔnɔmetata si le axa 4]

Ðokuibɔbɔ vi aɖe si Naeman ɖe fia la ɖe vi nɛ geɖe