Ta 83

Farisitɔ aɖe Ðo Kplɔ̃ Nɛ

YESU kpɔtɔ le Farisitɔwo ƒe amegã aɖe ƒe aƒeme eye fifi laa ko wòda gbe le ŋutsu aɖe si le tetedɔ lém la ŋu. Esi wòkpɔ alesi ame bubu siwo wokpe la le nɔƒe vevitɔwo tiam le kplɔ̃a ɖoƒe la, efia nu ku ɖe ɖokuibɔbɔ ŋu.

Yesu ɖe eme azɔ be: “Ne ame aɖe kpe wò va srɔ̃ɖeƒe la, meganɔ nɔƒe gbãtɔ o; ɖewohĩ wokpe ame ŋkuta wu wò vɛ; eye amesi kpe mia kple ame ma la, ava gblɔ na wò bena: Tsɔ nɔwòƒe na amesia, eye ekema àde asi nɔƒe mlɔetɔ tsɔtsɔ me kple ŋukpe.”

Eyata Yesu ɖo aɖaŋu be: “Ne wokpe wò la, yi ɖanɔ nɔƒe mlɔetɔ bena, ne amesi kpe wò va la, agblɔ na wò bena: Xɔ̃, te yi kplɔ̃ ta; ekema anye bubu na wò le amesiwo katã le kplɔ̃a ŋuti la, ƒe ŋku me.” Le etaƒoƒo me la, Yesu gblɔ bena: “Elabena amesiame, si ado eɖokui ɖe dzi la, woabɔbɔe ɖe anyi, eye amesi abɔbɔ eɖokui ɖe anyi la, woadoe ɖe dzi.”

Azɔ Yesu ƒo nu na Farisitɔ si kpee la eye wòɖɔ alesi woawɔ kplɔ̃ɖoɖo si ŋu viɖe ŋutɔŋutɔ le le Mawu ŋkume lae. “Ne èɖo ŋdɔ- alo fiẽkplɔ̃ la, megayɔ xɔ̃wòwo alo nɔviwòwo, alo wò ƒometɔwo, alo hawòvi kesinɔtɔwo o, bena woawo hã nagakpe wò, eye woaɖo eteƒe na wò o. Ke boŋ, ne èɖo kplɔ̃ la, yɔ ame dahewo, nuwɔametɔwo, bunɔwo, ŋkuagbãtɔwo, eye nazu [dzidzɔme], esi naneke mele wo si be, woaɖo eteƒe na wò o ŋuti.”

Kplɔ̃ ma tɔgbe ɖoɖo na amesiwo dzi nɔnɔmea mede o la ana eɖola nakpɔ dzidzɔ elabena, abe alesi Yesu ɖe eme na amesi kpee la ene la, “Woaɖo eteƒe na wò le ame dzɔdzɔewo ƒe tsitretsitsi la me.” Alesi Yesu ɖɔ kplɔ̃ɖoɖo nyuitɔ siae la ɖo ŋku kplɔ̃ɖoɖo bubu ƒomevi dzi na amesiwo nɔ kplɔ̃ ŋu kplii la dometɔ ɖeka. Amesia gblɔ be: “[Dzidzɔtɔe nye] amesi aɖu abolo le mawufiaɖuƒe la me!” Gake menye amesiamee dea asixɔxɔ si sɔ mɔkpɔkpɔ dodzidzɔname ma ŋu o, abe alesi Yesu yi edzi tsɔ kpɔɖeŋu aɖe ɖee fia ene.

“Ame aɖe ɖo fiẽkplɔ̃ gã aɖe, eye wòkpe ame geɖewo; eye esi fiẽnuɖuɣi la ɖo la, edɔ eƒe dɔla la be, woagblɔ na amesiwo wokpe la bena: Miva, elabena nuawo sɔ gbe vɔ. Eye ameawo katã de asi taflatsedodo me kple tame ɖeka. Gbãtɔ gblɔ nɛ bena: Meƒle anyigba, eye wòle vevie nam be, mayi aɖakpɔe ɖa; meɖe kuku na wò, bui taflatse nam. Bubu gblɔ bena: Meƒle nyi eveveve teƒe atɔ̃, eye meyina be, mado wo akpɔ; meɖe kuku na wò, bui taflatse nam. Eye bubu gblɔ bena: Meɖe srɔ̃; eyata nyemate ŋu ava o.”

Taflatsedodo manyatanu kawoe nye si! Ðe woléa ŋku ɖe agble kple lãwo ŋu hafi ƒlea wo, eyata mehiã kpata be woakpɔ wo ɖa emegbe o. Nenema kee mele be srɔ̃ɖeɖe naxe mɔ na ame be mawɔ ɖe amekpekpe vevi ma dzi o. Eyata esi aƒetɔa se taflatsedodo siawo la, dɔme vee ŋutɔ eye wòɖe gbe na eƒe dɔla la bena:

“Do go kaba yi ɖe du la ƒe ablɔwo me kple kpɔdomiwo, eye nakplɔ ame dahewo kple nuwɔametɔwo kple ŋkuagbãtɔwo kple bunɔwo va afii. Eye [emegbe] dɔla la gblɔ bena: Aƒetɔ, wowɔ se, si nède la dzi, eye gake nɔƒe gali. Eye aƒetɔ la gblɔ na dɔla la bena: Do go yi mɔ gãwo dzi kple kpɔwo godo, eye nazi wo dzi be, woava me, bena nye aƒe la nayɔ fũ. . . . Ŋutsu mawo, siwo wokpe la, dometɔ aɖeke maɖɔ nye fiẽnuɖuɖu la akpɔ o.”

Nɔnɔme ka ɖɔmee kpɔɖeŋua le? Enyo, “aƒetɔ” si le kplɔ̃a ɖom la tsi tre ɖi na Yehowa Mawu; “dɔla” si le amekpekpea tsɔm le yiyim na amewoe nye Yesu Kristo; eye “fiẽkplɔ̃ gã” lae nye mɔnukpɔkpɔ siwo li be woava nɔ Dziƒofiaɖuƒea me.

Amesiwo wokpe gbã wu amesiame be woava nɔ Fiaɖuƒe la mee nye Yesu ƒe ŋkekea me subɔsubɔhakplɔla Yudatɔwo. Gake wogbe amekpekpea. Eyata vevietɔ tso ƒe 33 M.Ŋ. ƒe Pentekoste dzi la, woɖo amekpekpe evelia ɖe Yuda-dukɔa me tɔ tsɛ siwo wodoa vloe la. Gake wo dometɔ siwo wɔ ɖe edzi la mesɔ gbɔ be woayɔ teƒe 144,000 siwo le Mawu ƒe Dziƒofiaɖuƒea me la o. Eyata le ƒe 36 M.Ŋ. me, si nye le ƒe etɔ̃ kple afã megbe la, woɖo amekpekpe etɔ̃lia si nye mamlea ɖe aʋamatsomatsotɔ siwo menye Yudatɔwo o, eye ame mawo nu ƒoƒo ƒu yi edzi va ɖo míaƒe ŋkekea me. Luka 14:1-24.

▪ Nukae Yesu fia ku ɖe ɖokuibɔbɔ ŋuti?

▪ Aleke amesi kpea amewo ate ŋu aɖo kplɔ̃ si dzea Mawu ŋue, eye nukatae wòahe dzidzɔkpɔkpɔ vɛ nɛ?

▪ Nukatae womate ŋu ase amesiwo wokpe la ƒe taflatsedodoawo gɔme na wo o?

▪ Nukae “fiẽkplɔ̃ gã” si Yesu tsɔ wɔ kpɔɖeŋue la tsi tre ɖi na?