TA 20

Ðe Nèdina Be Yeanɔ Nɔƒe Gbãtɔ Ɣesiaɣia?

ÈNYA ame aɖe si dina ɣesiaɣi be yeanɔ nɔƒe gbãtɔa?— Ate ŋu atutu ame ale be eya nava yi ŋgɔ le fli me. Èkpɔ nusia teƒe kpɔa?— Nufiala Gã la kpɔ ame tsitsiwo gɔ̃ hã siwo di be yewoanɔ nɔƒe gbãtɔ, alo nɔƒe nyuitɔ kekeake. Eye medzɔ dzi nɛ o. Na míakpɔ nusi dzɔ ɖa.

Biblia gblɔ na mí be wokpe Yesu yi kplɔ̃ɖoƒe gã aɖe le Farisitɔ aɖe, si nye subɔsubɔhakplɔla vevi aɖe, ƒe aƒeme. Esi Yesu va ɖo la, enɔ ŋku lém ɖe ame bubu siwo hã wokpe va kplɔ̃ɖoƒea ŋu be wonɔ nɔƒe nyuitɔwo tiam na wo ɖokui. Le esia ta egblɔ nya aɖe na amekpekpeawo. Àdi be yeaseea?—

Yesu gblɔ be: ‘Ne ame aɖe kpe wò va srɔ̃ɖekplɔ̃ɖoƒee la, mègatia nɔƒe nyuitɔ alo nɔƒe vevitɔ o.’ Ènya nusita Yesu gblɔ nya sia?— Eɖe eme be ɖewohĩ wokpe bubume aɖe si nye ame ŋkuta wu wò. Eyata abe alesi nàte ŋu akpɔe le fotoa me ene la, amesi kpe mi va kplɔ̃ɖoƒea ava eye wòagblɔ be: ‘Tsɔ nɔwòƒe na amesia, eye nàyi aɖanɔ afimɛ.’ Ekema aleke amekpekpea ase le eɖokui me?— Anye ŋukpe nɛ elabena amekpekpe bubuawo anɔ ekpɔm be etso yina teƒe si bɔbɔ ɖe anyi wu.

Yesu nɔ eɖem fia be menyo be woatia nɔƒe kɔkɔtɔ o. Eyata egblɔ be: ‘Ne wokpe wò va srɔ̃ɖekplɔ̃ɖoƒe la, yi nàɖanɔ teƒe si le tsɛ wu. Ekema amesi kpe wò la, ava eye wòagblɔ be, “Xɔ̃nye, tso nàva nɔ kplɔ̃a ta.” Esia anye bubu na wò le amekpekpe bubuawo ŋkume be nàte yi aɖanɔ teƒe si nyo wu.’—Luka 14:1, 7-11.

Èkpɔ nufiame si le Yesu ƒe nyaawo mea?— Na míawɔ kpɔɖeŋu aɖe akpɔe ɖa be èse egɔme hã. Tsɔe be miele ʋu ɖom eye ame gbogbo aɖewo hã di be yewoaɖoe. Ðe wòle be nàwɔ kaba akpɔ zikpui anɔ anyi eye nàna be ame tsitsi aɖe nanɔ tsitrea?— Ne èwɔ esia la, ɖe wòadze Yesu ŋua?—

Ame aɖe agblɔ be nusi míewɔna la meka Yesu o. Gake ɖe nèxɔ nya ma dzi sea?— Esime Yesu nɔ kplɔ̃ɖoƒea le Farisitɔa ƒe aƒeme la, enɔ ŋku lém ɖe amewo ŋu esi wonɔ afisi woanɔ la tiam. Mèsusu be egatsɔa ɖe le nusiwo míewɔna egbea la hã me nenema ke oa?— Fifia si Yesu le dziƒo la, teƒe nyuitɔ enye ma wòle be wòakpɔ nusiwo wɔm míele.

Ne ame aɖe dina be yeanɔ nɔƒe gbãtɔ la, ate ŋu ahe kuxiwo vɛ. Zi geɖe la, amewo hea nya le esia ŋu, eye wodoa dziku. Ɣeaɖewoɣi esia dzɔna ne ɖeviwo yina bɔs ɖo ge be yewoaɖi tsa ayi teƒe aɖe. Kaka ʋua nava ɖo woaʋu ʋɔa teti ko ɖeviwo nɔa du dzi be yewoage ɖe eme gbã. Wodina be yewoanɔ zikpui nyuitɔwo, esiwo te ɖe fesre nu, la dzi. Ekema nukae wòate ŋu ahe vɛ?— Ẽ, ate ŋu ana woado dziku ɖe wo nɔewo ŋu.

Didi be woanɔ nɔƒe gbãtɔ ate ŋu ahe kuxi geɖe vɛ. Ehe kuxi vɛ le Yesu ƒe apostoloawo gɔ̃ hã dome. Abe alesi míesrɔ̃e le agbalẽ sia ƒe Ta 6 lia me ene la, wohe nya le wo nɔewo dome le amesi nye gãtɔ ŋu. Eyata nukae Yesu wɔ?— Nyateƒee, eɖɔ wo ɖo. Gake emegbe la, wogahe nya ake. Na míakpɔ nusi gbɔ wòtso ɖa.

Apostoloawo kple ame bubu aɖewo nɔ mɔ zɔm kple Yesu zi mamlɛtɔ yina ɖe Yerusalem. Do ŋgɔ la, Yesu nɔ nu ƒom na wo tso eƒe Fiaɖuƒea ŋu, eyata Yakobo kple Yohanes wonɔ eŋu bum be yewoava nye fiawo aɖu dzi kplii. Woyi va ƒo nu tso eŋu gɔ̃ hã na wo dada, Salome. (Mateo 27:56; Marko 15:40) Eyata esime wonɔ mɔa dzi yina ɖe Yerusalem la, Salome va Yesu gbɔ, dze klo ɖe eŋkume, eye wòbia be wòawɔ nane na ye.

Yesu biae be: “Nuka dim nèle?” Nyɔnua ɖo eŋu be yedi be Yesu nana ye viŋutsuawo nanɔ eya Yesu xa tututu le eƒe Fiaɖuƒea me, ɖeka nanɔ eƒe ɖusime eye evelia nanɔ eƒe miame. Esi apostolo ewo mamlɛawo se nusi Yakobo kple Yohanes na wo dada va bia la, èsusu be aleke wose le wo ɖokui me?—

Nyateƒee, wodo dziku ɖe Yakobo kple Yohanes ŋu vevie. Eyata Yesu ɖo aɖaŋu nyui aɖewo na eƒe apostoloawo katã. Yesu gblɔ na wo be dukɔwo ƒe dziɖulawoe dina be yewoanye amegã kple ame vevitɔwo. Wodina be yewoanɔ nɔƒe kɔkɔ si ana amesiame nawɔ ɖe yewoƒe gbe dzi. Gake Yesu gblɔ na eyomedzelawo be mele be woawo ya woanɔ nenema o. Ke Yesu gblɔ boŋ be: “Amesi ke di bena, yeanye gbãtɔ le mia dome la, nanye miaƒe dɔla.” Wò ya bu nya mawo ŋu kpɔ ko!—Mateo 20:20-28.

Enyo, èsusu be nukae nya mawo fia na mí?— Ðe dɔla aʋli nya kple eƒe aƒetɔ le wo dometɔ si wòle be wòanɔ zikpui nyuitɔ dzi ŋua? Alo ɖe wòahe nya kplii le wo dometɔ si aɖu nu gbã ŋua? Nukae nye wò susu?— Yesu ɖe nu me be dɔla daa eƒe aƒetɔ ɖe nɔƒe gbãtɔ na eɖokui ɣesiaɣi.—Luka 17:7-10.

Ènya nusi dɔla wɔna?— Esubɔa amewo, eye mekpɔa mɔ be ame bubuwoe wòle be woasubɔ ye o. Enɔa nɔƒe si nye mlɔetɔ, ke menye nɔƒe gbãtɔ o. Ewɔa nu abe ame tsɛ ene, ke menye abe ame vevitɔ ene o. Eye ɖo ŋku edzi be Yesu gblɔ be amesi di be yeanye gbãtɔ la, ele be wòasubɔ ame bubuwo.

Eyata le esi míanɔ ʋiʋlim be míanɔ nɔƒe gbãtɔ teƒe la, nuka boŋue wòle be míawɔ?— Ẽ, ele be míasubɔ amewo. Eye esia fia be míatsɔ ame bubuwo aɖo ŋgɔ na mía ŋutɔwo mía ɖokui. Efia be míabui be ame bubuwo nye gã na mí. Wò susu ate ŋu adze nuwɔna bubu siwo me nàte ŋu atsɔ ame bubuwo aɖo ŋgɔ na ɖokuiwò le dzia?— Anyo be nàtrɔ aʋu axa 40 kple 41 be nàgakpɔ mɔ siwo nu nàte ŋu ana ame bubuwo naxɔ ŋgɔ na wò to wo subɔsubɔ me la dometɔ aɖewo ɖa.

Àɖo ŋku edzi be Nufiala Gã la tsɔ ame bubuwo ɖo ŋgɔ na eya ŋutɔ esi wòsubɔ wo. Le zã mamlɛtɔ si wònɔ anyi kple eƒe apostoloawo me la, ebɔbɔ klɔ afɔ na wo gɔ̃ hã. Ne míawo hã míetsɔ ame bubuwo ɖo nɔƒe gbãtɔ to wo subɔsubɔ me la, míaƒe nu adze Nufiala Gã la kpakple Fofoa, Yehowa Mawu, siaa ŋu.

Na míaxlẽ Biblia ƒe kpukpui bubu siwo de dzi ƒo na mí be míatsɔ ame bubuwo aɖo ŋgɔ na mía ŋutɔwo mía ɖokui: Luka 9:48; Romatɔwo 12:3; kple Filipitɔwo 2:3, 4.

[Nɔnɔmetata si le axa 107]

Èkpɔ amewo wonɔ ʋiʋlim be yewoanɔ nɔƒe gbãtɔ kpɔa?

[Nɔnɔmetata si le axa 108, 109]

Nukae nye nufiame si Yesu nɔ fiafiam esi wògblɔ amesiwo nɔ nɔƒe nyuitɔwo, alo gbãtɔwo, tiam la ƒe ŋutinya?

[Nɔnɔmetata si le axa 110]

Nukae Salome bia Yesu be wòawɔ, eye nukae esia he vɛ?