Ta 129

Egaɖe Eɖokui Fia Ɣebubuɣiwo

DZI ɖe le nusrɔ̃lawo ƒo vaseɖe fifia. Womese nusitae yɔdoa tsi ƒuƒlu gɔme o, eye womexɔ nyɔnuawo ƒe nyatakakawo hã dzi se o. Eyata emegbe le Kwasiɖagbe la, Kleopa kple nusrɔ̃la bubu aɖe tso Yerusalem yina Emaus, esi ƒe didime anye agbadroƒe 7 [11 km].

Esi wole dze ɖom le ŋkekea me nudzɔdzɔwo ŋu le mɔa dzi la, amedzro aɖe va tu wo. Ebia be: ‘Nya ka ƒomeviwo nye esia siwo ŋuti miele nya hem le le mia nɔewo dome le miaƒe azɔlizɔzɔa me?’

Nusrɔ̃lawo tɔ eye woƒe mo wɔ yaa, eye Kleopa ɖo eŋu be: “Alo wò ɖeka koe dze Yerusalem, eye mènya nusiwo va dzɔ le eme le ŋkeke siawo me o mahã?” Ebia be: “Kawoe?”

Woɖo eŋu be: “Yesu, Nazaretetɔ la, ŋutinyae, . . . míaƒe nunɔlagãwo kple dumegãwo dee asi, be woatso kufia nɛ, eye woaklãe ɖe ati ŋuti. Ke míawo la míekpɔ mɔ bena, eyae nye amesi le Israel ɖe ge.”

Kleopa kple eƒe zɔhɛwo ɖe ŋkekea me nudzɔdzɔ ɖedzesiwo—mawudɔlawo ƒe wo ɖokui ɖeɖefia nukutɔe kple alesi yɔdoa tsi ƒuƒlu ŋuti nyatakaka—me gake emegbe woɖe alesi woƒe mo yaa le nusi nusiawo fia ŋu la fiae. Amedzroa ka mo na wo be: “O, ame masenugɔmewo kple amesiwo ƒe dzi le blewu be woaxɔ nusiwo katã nyagblɔɖilawo gblɔ ɖi la, dzi ase. Alo mele na Kristo be, wòakpe nusiawo ƒe fu, eye wòayi ɖe eƒe ŋutikɔkɔe la me o mahã?” Emegbe eɖe ŋɔŋlɔ kɔkɔeawo me nya siwo ku ɖe Kristo ŋu la me na wo.

Mlɔeba la, wogogo Emaus, eye amedzro la wɔ abe ɖe wòle eme tsom ene. Esi nusrɔ̃lawo di be yewoagase nya geɖe ta la, woƒoe ɖe enu be: “Nɔ anyi kpli mí, elabena zã le dodom.” Eyata enɔ anyi kpli wo be woaɖu nu. Esi wòdo gbe ɖa eye wòŋe aboloa me hetsɔe na wo la, wokpɔe dze sii be eya tututue nye Yesu si do amegbetɔ ƒe ŋutilã. Gake ebu vĩ le ɣeyiɣi ma me.

Azɔ wose nusitae amedzroa nya nu geɖe nenema la gɔme! Wobia be: “Alo míaƒe dzi melé dzo le mía me, esi wòle nu ƒom na mí le mɔa dzi, eye wòle ŋɔŋlɔawo me ɖem na mí la o mahã?” Wotso kpla enumake eye woɖe abla trɔ yi Yerusalem, afisi wokpɔ apostoloawo kple amesiwo ƒo ƒu kpli wo la le. Hafi Kleopa kple eƒe zɔhɛwo nagblɔ nya aɖe la, nusrɔ̃la bubuawo ka nya ta dzidzɔtɔe be: “Aƒetɔ la tsi tre vavã, eye wòɖe eɖokui fia Simon.” Eye wo ame evea gblɔ alesi Yesu ɖe eɖokui fia wo hãe la na wo. Esia nye zi enelia le ŋkeke si dzi wòɖe eɖokui fia eƒe nusrɔ̃la vovovowo.

Enumake Yesu ɖe eɖokui fia zi atɔ̃lia. Togbɔ be wotu ʋɔawo le esi nusrɔ̃lawo nɔ vɔvɔ̃m na Yudatɔwo ta hã la, ege ɖe xɔa me eye wòtsi tre ɖe wo titina hegblɔ be: “Ŋutifafa nanɔ anyi kpli mi!” Ŋɔdzi lé wo, eye wosusu be nu kpem yewole. Eyata esi Yesu ɖe eme be yemenye nukpekpe o la, egblɔ be: “Nuka wɔ mieʋuʋu, eye nukaŋuti ɖikeke ɖo miaƒe dzi me mahã? Mikpɔ nye asiwo kple nye afɔwo ɖa bena, nye ŋutɔe nye esi; miƒo asi ŋunye, eye miakpɔe; elabena lã kple ƒu meli na gbɔgbɔ, abe alesi miekpɔ le ŋunye la ene o.” Gake vaseɖe fifia la, womele lɔlɔ̃m tututu be yewoaxɔ edzi ase o.

Be Yesu nana woase egɔme be ye tututue la, ebia be: “Nuɖuɖu aɖe le mia si le afisia mahã?” Esi wòxɔ kalãmi kakɛ aɖe ɖu vɔ la, ede asi nu fiafia wo me gblɔ be: “Esiawo nye nye nya, siwo megblɔ na mi, esi megali kpli mi, [do ŋgɔ na nye ku], la bena: Ele be, woawu nusiwo katã woŋlɔ ɖe Mose ƒe se la kple nyagblɔɖilawo kpakple Psalmowo me le ŋutinye la nu.”

Esi Yesu nɔ nusi sɔ kple Biblia nusɔsrɔ̃ ŋutɔŋutɔ wɔwɔ kpli wo dzi yim la, efia nu be: “Nenema woŋlɔ ɖi bena: Kristo lakpe fu, eye wòatsi tre tso ame kukuwo dome le ŋkeke etɔ̃agbe; eye bena, woaɖe gbe ƒã dzimetɔtrɔ hena nuvɔ̃wo ƒe keke le eƒe ŋkɔa dzi na dukɔwo katã la, adze egɔme atso Yerusalem. Miawoe nye nusiawo ƒe ɖaseɖilawo.”

Le susu aɖe ta Toma menɔ anyi le Kwasiɖagbe fiẽ ƒe kpekpe vevi sia me o. Eyata ŋkeke siwo kplɔe ɖo la, nusrɔ̃la bubuawo gblɔ nɛ dzidzɔtɔe be: “Míekpɔ Aƒetɔ la.”

Toma gbe nya la hegblɔ be: “Ne nyemekpɔ gatagbadzɛawo teƒe le eƒe asi me, eye metsɔ nye asibide ƒo ɖe gatagbadzɛawo teƒe, eye metsɔ nye asi ƒo ɖe eƒe axada me o la, nyemele exɔ ge ase o.”

Gake le ŋkeke enyi megbe la, nusrɔ̃lawo gakpe ta ɖe xɔ me ake. Le ɣeyiɣi sia me ya la, Toma nɔ wo dome. Togbɔ be wotu ʋɔawo hã la, Yesu gatsi tre ɖe wo titina ake hegblɔ be: “Ŋutifafa na mi!” Emegbe esi wòtrɔ ɖe Toma ŋu la, egblɔ nɛ be: “Do wò asibide ɖe afii, eye nakpɔ nye asiwo ɖa, eye do wò asi ɖa, eye naƒoe ɖe nye axada me, eye megazu maxɔsetɔ o, ke boŋ xɔsetɔ.”

Toma do ɣli be: “Nye Aƒetɔ kple nye Mawu!”

Yesu biae be: ‘Esi nèkpɔm la, èxɔe sea? Dzidzɔtɔwoe nye amesiwo mekpɔa nu o, eye gake woxɔnɛ sena.’ Luka 24:11, 13-48; Yohanes 20:19-29.

▪ Nya kawoe amedzro aɖe bia nusrɔ̃la eve le Emaus-mɔ dzi?

▪ Nukae amedzroa gblɔ si na nusrɔ̃lawo ƒe dzi lé dzo le wo me?

▪ Aleke nusrɔ̃lawo wɔ nya amesi amedzroa nye?

▪ Esime Kleopa kple eƒe zɔhɛ trɔ yi Yerusalem la, nya dodzidzɔname kae wose?

▪ Aleke Yesu ɖe eɖokui fia eƒe nusrɔ̃lawo zi atɔ̃liae, eye nukae dzɔ esi wòɖe eɖokui fia wo?

▪ Nukae dzɔ le ŋkeke enyiagbe esi Yesu ɖe eɖokui fia zi atɔ̃lia megbe, eye aleke Toma xɔe se mlɔeba be Yesu le agbe?