TA 39

Mawu Ðo Ŋku Via Dzi

YESU fa avi esi exɔlɔ̃ Lazaro ku. Èsusu be ate ɖe Yehowa dzi esime Yesu se veve helĩhelĩ eye wòkua?— Biblia gblɔ be nusiwo dzɔna ate ŋu ‘ate ɖe Mawu dzi’ eye kura gɔ̃ hã ‘wòase veve.’—Psalmo 78:40, 41; Yohanes 11:35.

Àte ŋu akpɔ veve si gbegbe Yehowa se esime wònɔ ekpɔm Via lɔlɔ̃a nɔ kukum la le susu mea?— Yesu ka ɖe edzi be Mawu maŋlɔ ye be o. Ema tae wògblɔ nya mamlɛ siawo hafi ku, be: ‘Fofo, asiwò mee metsɔ nye agbe dee.’—Luka 23:46.

Yesu ka ɖe edzi bliboe be woafɔ ye ɖe tsitre, eye be womagblẽ ye ɖe “tsiẽƒe,” alo yɔdo me o. Esi wofɔ Yesu ɖe tsitre vɔ megbe la, apostolo Petro ƒo nu tso nya si woŋlɔ ɖi le Yesu ŋu le Biblia me ŋu be: “Womegblẽe ɖe tsiẽƒe o, eye eƒe ŋutilã hã mekpɔ nyunyɔ o.” (Dɔwɔwɔwo 2:31; Psalmo 16:10) Kura o, Yesu ƒe ŋutilã metsi yɔdo me nyunyɔ o, si fia be mevo nɔ ʋeʋẽm o.

Esime Yesu nɔ anyigba dzi la, egblɔe na eƒe nusrɔ̃lawo gɔ̃ hã be yemaku wòaxɔ ɣeyiɣi didi o. Eɖe eme na wo be ‘woawu ye, eye le ŋkeke etɔ̃agbe woagafɔ ye ɖe tsitre.’ (Luka 9:22) Eyata le nyateƒe me, esi wofɔ Yesu ɖe tsitre la, mele be wòawɔ nuku na nusrɔ̃lawo hafi o. Gake ɖe wòwɔ nuku na woa?— Na míakpɔe ɖa.

Anɔ ɣetrɔ ga etɔ̃ me le Fiɖagbe esime Nufiala Gã la ku le fuwɔametia ŋu. Yosef nye ŋutsu kesinɔtɔ aɖe si nye Sanhedrin la me tɔ eye wòganye amesi xɔ Yesu dzi se le adzame. Esi wòse be Yesu ku la, eyi ɖe Roma mɔmefia Pilato gbɔ. Eva bia be wòaɖe mɔ na ye yeaɖe Yesu ƒe kukua le atia ŋu ava ɖi. Emegbe Yosef tsɔ Yesu ƒe kukua yi abɔ aɖe me afisi woɖe yɔdo ɖo, si nye afisi wodaa ame kukuwo ɖo.

Esi wotsɔ eƒe kukua mlɔ yɔdoa me vɔ la, womli kpe gã aɖe tsɔ xe yɔdoa nu. Eyata yɔdoa tu. Azɔ ŋkeke etɔ̃agbe ɖo, si nye Kwasiɖagbe. Fɔŋli mee, eyata viviti ganɔ xexeme. Ŋutsu aɖewo nɔ yɔdoa ŋu dzɔm. Nunɔlagãwoe dɔ wo be woava dzɔ eŋu. Ènya nusitaea?—

Nunɔlawo hã see be Yesu gblɔ be woafɔ ye ɖe tsitre. Eyata be nunɔlawo naxe mɔ na Yesu ƒe nusrɔ̃lawo be woagava fi eƒe kukua ahagblɔ be ɖe wòfɔ ɖe tsitre o ta la, woɖo dzɔlawo yɔdoa ŋu. Gake kasia, anyigba ʋuʋu. Kekeli aɖe klẽ le vivitia me. Yehowa ƒe dɔlae! Vɔvɔ̃ ɖo asrafoawo ale gbegbe be womete ŋu ʋã o. Mawudɔla la yi ɖe yɔdoa nu va mli kpea ɖa. Yɔdoa enye ma tsi ƒuƒlu!

Ẽ, ele abe alesi apostolo Petro gblɔe emegbe ene be: “Nenem Yesu sia la Mawu fɔe ɖe tsitre.” (Dɔwɔwɔwo 2:32) Mawu gbɔ agbe Yesu hetsɔ ŋutilã si ƒomevi nɔ esi do ŋgɔ na eƒe anyigba dzi vava la nɛ. Wotsɔ gbɔgbɔŋutilã, esi tɔgbe le mawudɔlawo si, fɔe ɖe tsitree. (Petro I, 3:18) Eyata hafi amewo nate ŋu akpɔ Yesu la, ele be wòatsɔ amegbetɔ ŋutilã ado. Ðe wòwɔe nenema?— Na míakpɔe ɖa.

Azɔ ɣe dze. Asrafoawo dzo. Maria Magdalatɔ la kple nyɔnu bubu siwo nye Yesu ƒe nusrɔ̃lawo le mɔ dzi gbɔna yɔdoa gbɔ. Wole wo nɔewo biam be: ‘Amekae míakpɔ wòamli kpe gã ma ɖa na mí?’ (Marko 16:3) Gake esi woɖo yɔdoa gbɔ la, wokpɔ be womli kpea ɖa xoxo. Eye yɔdoa enye ma tsi ƒuƒlu! Yesu ƒe amegbetɔ ŋutilã kukua megale eme o! Enumake Maria Magdalatɔ la ƒu du yi Yesu ƒe apostoloawo dometɔ aɖewo gbɔ.

Nyɔnu mamlɛawo ya tsi yɔdoa to. Wole biabiam be: ‘Anye afika koŋ ye Yesu ƒe kukua le?’ Enumake ŋutsu eve siwo ƒe awu le dzo dam la do ɖe wo dzi. Mawudɔlawoe! Wogblɔ na nyɔnuawo be: ‘Nukaŋuti miele Yesu dim le afisia? Wofɔe ɖe tsitre. Miyi kaba miava gblɔe na eƒe nusrɔ̃lawo.’ Bu alesi nyɔnuawo aƒu du sesĩe la ŋu kpɔ! Esi wole mɔa dzi yina la, ŋutsu aɖe va do go wo. Ènya amesi wònyea?—

Yesu si do amegbetɔ ŋutilã ye! Eya hã gblɔe na nyɔnuawo be: ‘Miyi ɖaka eta na nye nusrɔ̃lawo.’ Dzi dzɔ nyɔnuawo. Wova kpɔ nusrɔ̃lawo eye wogblɔ na wo be: ‘Yesu le agbe! Míekpɔe!’ Maria gblɔ alesi yɔdoa tsi ƒuƒlui la na Petro kple Yohanes do ŋgɔ xoxo. Fifia woawo hã wova ɖo yɔdoa gbɔ abe alesi nèle ekpɔm le afisia ene. Wokpɔ be aklala siwo woxatsa ɖe Yesu ŋu koe li, gake womete ŋu le nusi tututu le dzɔdzɔm la dzi xɔm se o. Wodi be yewoaxɔe ase ŋutɔŋutɔ be Yesu gale agbe, gake nu bliboa katã le nuku wɔm na wo ale gbegbe.

Emegbe le Kwasiɖa ma gbe la, Yesu ɖe eɖokui fia nusrɔ̃lawo dometɔ eve esi wonɔ mɔ dzi yina ɖe Emaus. Yesu va kpe ɖe wo ŋu le mɔa dzi wole mɔa zɔm le dze ɖom, gake womekpɔe dze sii o elabena menye amegbetɔ ŋutilã si nɔ esi tsã la kee wòdo o. Esime woa kple Yesu wobe yewoaɖu nu eye wòdo gbe ɖa hafi wokpɔe dze sii be eyae. Dzi dzɔ nusrɔ̃lawo ale gbegbe be wotsɔ afɔtsɔtsɔe zɔ kilometa geɖe gbugbɔ trɔ yi Yerusalem! Ðewohĩ ɣeyiɣi kpui aɖe le esia megbee Yesu ɖe eɖokui fia Petro be yeafiae be Yele agbe.

Emegbe le Kwasiɖa ma gbe ƒe fiẽ me la, nusrɔ̃la geɖewo va kpe ta ɖe xɔ aɖe me. Wodo ʋɔa ɖe wo ɖokui nu. Kasia, Yesu do ɖe wo dzi le xɔa me! Azɔ wokpɔe dze sii be Nufiala Gã la gale agbe nyateƒe. Bu alesi gbegbe dzi dzɔ woe ŋu kpɔ!—Mateo 28:1-15; Luka 24:1-49; Yohanes 19:38–20:21.

Ŋkeke 40 sɔŋ Yesu ɖe eɖokui fia eƒe nusrɔ̃lawo le amegbetɔ ŋutilã vovovowo me tsɔ fia wo be yele agbe. Emegbe edzo le anyigba dzi gbugbɔ trɔ yi ɖe Fofoa gbɔ le dziƒo. (Dɔwɔwɔwo 1:9-11) Eteƒe medidi o nusrɔ̃lawo te egbɔgblɔ na amesiame be Mawu fɔ Yesu ɖe tsitre tso ame kukuwo dome. Eye togbɔ be nunɔlawo ƒo wo eye wona wowu wo dometɔ aɖewo gɔ̃ hã la, woyi gbeƒãɖeɖea dzi. Wonyae be ne yewoku hã la, Mawu aɖo ŋku yewo dzi abe alesi eƒe ŋku nɔ Via dzii ene.

Aleke gbegbe Yesu yomedzela gbãtɔ mawo to vovo na amesiwo li egbea dometɔ geɖee nye si! Nusi ŋu amesiawo buna egbea le ƒea ƒe ɣeyiɣi si me wofɔ Yesu ɖe tsitre koe nye Easter fɔmizi kple Easter koklozi siwo wode amae tsɔ ɖo atsyɔ̃e. Gake Biblia megblɔ nya aɖeke tso Easter fɔmizi kple koklozi ŋu o. Nusi wògblɔ na mí enye be míasubɔ Mawu.

Míate ŋu awɔ nu abe Yesu ƒe nusrɔ̃lawo ene nenye be míegblɔnɛ na amewo be nu wɔnuku dodzidzɔnamee wònye Mawu wɔ esi wòfɔ Via ɖe tsitre. Ne amewo be yewoawu mí ɖe nya siawo gbɔgblɔ ta gɔ̃ hã la, mele be míavɔ̃ gbeɖe o. Ne wòdzɔ be míeku gɔ̃ hã la, Yehowa aɖo ŋku mía dzi afɔ mí ɖe tsitre abe alesi wòfɔ Yesu ɖe tsitre ene.

Ðe medo dzidzɔ na mí be míanyae be Mawu ɖoa ŋku amesiwo subɔnɛ dzi eye be afɔ wo ɖe tsitre gɔ̃ hã tso ame kukuwo dome oa?— Ele be nusiawo nyanya naʋã mí be wòanye míaƒe didi be míanya alesi míawɔ ado dzidzɔ na Mawu. Ènya be le nyateƒe me, míate ŋu ado dzidzɔ nɛ ŋutɔŋutɔa?— Míaƒo nu tso ema ŋu ɖe esia yome.

Ele be Yesu ƒe tsitretsitsia dzixɔxɔse nawɔe be mɔkpɔkpɔ sẽŋu kple xɔse sẽŋu nasu mía si. Taflatse xlẽ Dɔwɔwɔwo 2:22-36; 4:18-20; kple Korintotɔwo I, 15:3-8, 20-23.

[Nɔnɔmetata si le axa 202]

Nukatae yɔdoa tsi ƒuƒlu? Nukae dzɔ?

[Nɔnɔmetata si le axa 205]

Anye nuka ŋu bumee Petro kple Yohanes le?

[Nɔnɔmetata si le axa 206]

Nuka ŋue ame geɖe buna egbea le ƒea ƒe ɣeyiɣi si me wofɔ Yesu ɖe tsitre? Ke nuka ŋue wò ya nèbuna?