Aglãdzedze Le Dziƒonutowo Me
Esi Satana to da dzi ƒo nu kple Xawa la, Xawa va wɔ ɖeka kplii le aglã si wòdze ɖe Mawu ŋu me
Gbɔgbɔmeme siwo katã Yehowa wɔ la nye ame nyuiwo. Emegbe mawudɔla ɖeka trɔ zu ame baɖa. Eyae nye Satana Abosam. Satana di be amesiwo le anyigba dzi nade ta agu na ye ɖe Yehowa teƒe. Nusi dzɔe nye si:
Ati geɖe siwo tsea ku viviwo nɔ Eden-bɔa me. Yehowa gblɔ na Adam kple srɔ̃a Xawa be woate ŋu aɖu wo dometɔ ɖesiaɖe ƒe tsetse faa. Gake Mawu gblɔ be womegaɖu ati ɖeka aɖe ya ƒe tsetse o. Egblɔ be ne woɖu eƒe tsetse la, ku ke woaku.—Mose I, 2:9, 16, 17.
Gbeɖeka esi Xawa ɖeɖe li la, da aɖe va ƒo nu kplii. Gake menye da la ŋutɔŋutɔe ƒo nu o; Satana Abosam ye na wòdze abe da lae nɔ nu ƒom ene. Satana gblɔ na Xawa be ne eɖu atikutsetse si ŋu wode se ɖo la, anya nu abe Mawu ene. Egblɔ hã be maku o. Aʋatsoe nyagbɔgblɔ eve siawo siaa nye. Gake Xawa xɔ Satana dzi se eye wòɖu atikutsetsea. Emegbe la, etsɔ ɖe na Adam, eye eya hã ɖui.—Mose I, 3:1-6.
Míekpɔe le ŋutinya sia si nye nyateƒe la me be aglãdzela kple aʋatsokalae Satana nye. Egblɔ na Xawa be ne meɖo to Mawu o la, maku o. Nya ma nye aʋatso. Eku eye Adam hã ku. Satana meku ɣemaɣi o, gake ava ku mlɔeba elabena ewɔ nuvɔ̃. Ke fifia la, ele agbe eye wòyi edzi le ameƒomea blem. Ekpɔtɔ nye alakpatɔ, eye wòdzea agbagba be yeana amewo nada le Mawu ƒe sewo dzi.—Yohanes 8:44.
Mawudɔla Bubuwo Dze Aglã
Emegbe la, mawudɔla bubuwo trɔ zu ame vɔ̃ɖiwo. Mawudɔla siawo kpɔ nyɔnu dzetugbe siwo le anyigba dzi la eye wodi be yewoadɔ kpli wo. Eyata wova anyigba dzi va do amegbetɔ ŋutsu ƒe ŋutilã. Emegbe woɖe nyɔnuawo na wo ɖokui. Esia tsi tre ɖe Mawu ƒe tameɖoɖo ŋu.—Mose I, 6:1, 2; Yuda 6.
Mawudɔla vɔ̃ɖiwo va anyigba dzi va nɔ agbe gbegblẽ kple nyɔnuwo
Esia he fukpekpe geɖe hã va ameƒomea dzi. Mawudɔla siawo srɔ̃wo dzi viwo, gake womele abe ɖevi bubuawo ene o. Wotsi va zu ame dzɔtsu siwo wɔa adã hesẽa tame. Mlɔeba la, anyigba dzi va yɔ kple nuvlowɔwɔ ale gbegbe be Yehowa tso nya me be yeatsɔ tsiɖɔɖɔ gã aɖe atsrɔ̃ ame vɔ̃ɖiawoe. Amegbetɔ siwo tsi agbe le Tsiɖɔɖɔ la me koe nye ame dzɔdzɔe Noa kple eƒe ƒomea.—Mose I, 6:4, 11; 7:23.
Gake mawudɔla vɔ̃ɖiawo trɔ yi gbɔgbɔmenutowo me; womeku o. Gake wohe to na wo. Womegaɖe mɔ na wo be woage ɖe Mawu ƒe ƒome si nye mawudɔla kɔkɔewo la me o. Hekpe ɖe eŋu la, Yehowa megaɖe mɔ na wo be woado amegbetɔ ƒe ŋutilã o. Eye mlɔeba la, woaku le ʋɔnudɔdrɔ̃ gã la me.—Petro II, 2:4; Yuda 6.
Wotsɔ Satana Ƒu Gbe tso Dziƒo
Wotsɔ Satana kple eƒe dɔla vɔ̃ɖiwo ƒu gbe tso dziƒo
Le míaƒe ƒe alafa sia ƒe gɔmedzedze lɔƒo la, aʋa aɖe dzɔ le dziƒo. Biblia ƒe agbalẽ si nye Nyaɖeɖefia la ɖɔ nusi dzɔ la be: “Eye aʋa dzɔ le dziƒo: Mixael [ Yesu Kristo si wofɔ ɖe tsitre la] kple eƒe [dɔla nyuiwo] yi aʋa wɔ ge kple ʋɔ driba [Satana]. Eye ʋɔ driba kple eƒe [dɔla vɔ̃ɖiwo] wɔ aʋa la, eye womeɖu dzi o, eye womegakpɔ woƒe teƒe hã le dziƒo o. Eye wotsɔ ʋɔ driba gã, si nye da xoxo la, esi woyɔna be: Abosam kple Satana, amesi nye xexeame katã blela la, ƒu gbe, eye wotsɔe ƒu gbe ɖe anyigba, eye wotsɔ eƒe [dɔla vɔ̃ɖiawo] hã ƒu gbe ɖe anyi hekpe ɖe eŋuti.”
Nukae do tso eme? Nuŋlɔɖia yi edzi be: “Eyata dzi nedzɔ mi, mi dziƒowo kple amesiwo nɔ wo me la!” Mawudɔla nyuiawo ate ŋu akpɔ dzidzɔ elabena Satana kple mawudɔla alo gbɔgbɔ vɔ̃ɖiawo megale dziƒo o. Ke amesiwo le anyigba dzi ya ɖe? Biblia gblɔ be: “Baba na anyigba kple atsiaƒu; elabena Abosam ɖi va mia gbɔ, eye dzi le ekum ŋutɔ; elabena enyae be, vovoɣi vi aɖe ko yekpɔ.”—Nyaɖeɖefia 12:7-9, 12.
Ẽ, Satana kple eƒe zɔhɛ vɔ̃ɖiawo blea amesiwo le anyigba dzi la eye wonana wokpea fu geɖe. Woyɔ mawudɔla vɔ̃ɖi siawo be gbɔgbɔ vɔ̃wo. Wonye Mawu ƒe futɔwo. Wo katã wonye ame vɔ̃ɖiwo.