Dziɖula Siwo Le Gbɔgbɔmenutowo Me
AMEKAE le xexeame dzi ɖum? Ðe ŋusẽ aɖewo siwo de ŋgɔ wu amegbetɔ tɔ li le edzi ɖuma? Alo ɖe Mawu gblẽ amegbetɔwo ɖi be woakplɔ wo ɖokuia? Le nya mawo ƒe ŋuɖoɖo didi me la, gbã mina míasusu nane si dzɔ le Yesu Kristo ƒe anyigba dzi subɔsubɔdɔa wɔɣi la ŋu kpɔ.
Esi Yesu xɔ nyɔnyrɔ̃ vɔ megbe teti la, gbɔgbɔmenuwɔwɔ makpɔmakpɔ aɖe si woyɔna be Satana Abosam va tee kpɔ. Biblia gblɔ le tetekpɔawo dometɔ ɖeka ŋu be: “Abosam [gakplɔ Yesu yi] ɖe to kɔkɔ ŋutɔ aɖe dzi, eye wòɖe xexeame fiaɖuƒewo katã kple woƒe ŋutikɔkɔe la fiae.” (Mateo 4:8) Satana gblɔ na Yesu le afima be: “Wòe matsɔ ŋusẽ sia katã kple woƒe ŋutikɔkɔe ana; elabena nyee wotsɔe de asi na, eye matsɔe ana amesi ke melɔ̃. Azɔ wò la, ne ède ta agu nam la, wo katã lazu tɔwò.”—Luka 4:6, 7.
Satana gblɔ be yekpɔ ŋusẽ ɖe xexe sia me fiaɖuƒewo, alo dziɖuɖuwo, katã dzi. Ðe Yesu gbe nya siawoa? Ao. Le nyateƒe me la, eɖo kpe edzi ɣebubuɣi esi wòyɔ Satana be “xexeamefia.”—Yohanes 14:30.
Biblia fia be Satana nye mawudɔla vɔ̃ɖi aɖe si si ŋusẽ triakɔ le. Kristotɔ apostolo Paulo yɔ Satana kpe ɖe ‘vɔ̃ɖinyenye ƒe gbɔgbɔwo’ ŋu eye wògblɔ be wonye “xexe sia me fia, siwo le fifi viviti sia me.” (Efesotɔwo 6:11, 12) Gakpe ɖe eŋu la, apostolo Yohanes gblɔ be “xexeme blibo la katã le vɔ̃ɖitɔ la me.” (Yohanes I, 5:19) Biblia ƒe agbalẽ si nye Nyaɖeɖefia gblɔ be Satana nye “xexeame katã blela.” (Nyaɖeɖefia 12:9) Le kpɔɖeŋunyagbɔgblɔ me la, Nyaɖeɖefia yɔ Satana be enye ʋɔ driba aɖe si tsɔ eƒe “ŋutete kple eƒe fiazikpui kpakple eƒe ŋusẽ gã” na xexeame dunyahenuɖoanyiwo.—Nyaɖeɖefia 13:2.
Xexemenudzɔdzɔwo hã ɖo kpe edzi be ŋusẽ vɔ̃ɖi aɖe le dɔ wɔm le amegbetɔwo kplɔm de dzɔgbevɔ̃e me. Ne menye nenema o la, susu bubu ka tae amegbetɔwo ƒe dziɖuɖuwo ado kpo ŋutifafa hehe vɛ? Nu bubu ka gbɔe amewo ƒe fuléle kple wo nɔewo wuwu atso? Nyɔnu aɖe si dukɔmeviʋa ƒe hlɔ̃nu kple amewuwu teƒe kpɔkpɔ do ŋɔdzi na la gblɔ be: “Nyemenya alesi nusia wɔ te ŋu dzɔ o. Ewu fuléle dzro ko. Gbɔgbɔ vɔ̃ɖi aɖee le amesiawo siwo ɖoe be yewoatsrɔ̃ yewo nɔewo la zãm.”
Ame Ŋutɔŋutɔ aɖe Tsi Tre Ðe Mawu Ŋu
Egbea ame geɖe mexɔe se be Satana Abosam li o. Gake menye nuvɔ̃ si le ameƒomea mee wònye abe alesi ame geɖewo xɔe se ene o. Biblia kple xexeame nudzɔdzɔwo siaa ɖee fia be ame ŋutɔŋutɔe wònye. Gawu la, Satana tsi tre ɖe Yehowa Mawu ŋu le nusianu me. Nyateƒee, Satana mesɔ kple Mawu o. Esi wònye be Yehowa ye nye Wɔla ŋusẽkatãtɔ ta la, eyae nye nuwɔwɔwo katã ƒe Dziɖula si dze.—Nyaɖeɖefia 4:11.
Mawu mewɔ nuwɔwɔ vɔ̃ɖi aɖe si atsi tre ɖe eya Mawu ŋutɔ ŋu o. Ke boŋ ‘Mawu ƒe vi mawudɔlawo’ dometɔ ɖekae tsɔ ɖokuitɔdidi dii be yeaxɔ subɔsubɔ si dze na Yehowa la. (Hiob 38:7; Yakobo 1:14, 15) Didi ma na wòtsi tre ɖe Mawu ŋuti. Gbɔgbɔmenuwɔwɔ sia to aglãdzedze sia me wɔ eɖokui Satana (si gɔmee nye “tsitretsiɖeŋula”) kple Abosam (si gɔmee nye “ameŋugblẽla”). Ne èbu esiawo katã ŋu la, àbia be nukatae woɖe mɔ na Satana be wòaɖu xexeame dzi hã.
Nusitae Woɖe Mɔ na Satana be Wòaɖu Dzi
Èɖo ŋku nya si Satana gblɔ tso xexeame dziɖuɖu ŋu na Yesu la dzia? Satana gblɔ be: “Wòe matsɔ ŋusẽ sia katã . . . ana; elabena nyee wotsɔe de asi na.” (Luka 4:6) Nyagbɔgblɔ ma fia be esi Mawu ɖe mɔ ta koe Satana Abosam le dzi ɖum ɖo. Gake nukatae Mawu ɖe mɔ na Satana?
Nyabiabia ma ŋuɖoɖo ku ɖe nane si dzɔ le Eden-bɔ me, afisi Satana dze eƒe xexeame dziɖuɖudɔ gɔme le ŋu. Afima Satana gblɔ nya si fia be Mawu le dzi ɖum le mɔ gbegblẽ nu eye wòte nu nyui aɖe ŋutsu kple nyɔnu gbãtɔ Adam kple Xawa. Satana gblɔ be ne woɖu ati si ŋuti Mawu de se ɖo la woavo. Adam kple Xawa avo eye womaganɔ Yehowa ƒe kpɔkplɔ te o. Woanɔ abe Mawu ŋutɔ ene!—Mose I, 2:16, 17; 3:1-5.
Esi Satana to aʋatsokaka ma me ble Xawa eye to eyama dzi wòhe Adam wòda Mawu ƒe se dzi la, ehe ŋutsu kple nyɔnu gbãtɔ va eƒe ŋusẽkpɔɖeamedzi te. Esia na Abosam va zu mawu na wo, ezu mawu si tsi tre ɖe Yehowa ŋu. Gake le esi woavo teƒe la, Adam kple Xawa va zu Satana, nuvɔ̃ kple ku ƒe kluviwo.—Romatɔwo 6:16; Hebritɔwo 2:14, 15.
Le Yehowa ƒe dzɔdzɔenyenye si de blibo nu la, ate ŋu atsrɔ̃ Satana kple eyomedzela yeye eveawo enumake hafi. (Mose V, 32:4) Gake nudzɔdzɔewɔwɔ ŋuti nya aɖe fɔ ɖe te. Satana tɔ gbe Yehowa ƒe dziɖuɖu ƒe dzɔdzɔenyenye. Le Mawu ƒe nunya me la, eɖe mɔ be ɣeyiɣiwo nava yi ne woaɖo kpe edzi be ɖokuiɖeɖeɖa tso yeƒe kpɔkplɔ te hea afɔku vɛ. Esi Yehowa ɖe mɔ be aglãdzelawo nayi edzi anɔ agbe ɣeyiɣi aɖe la, ena Adam kple Xawa dzi viwo.—Mose I, 3:14-19.
Togbɔ be Adam ƒe dzidzimevi akpa gãtɔ mebɔbɔ ɖe Yehowa ƒe dziɖulanyenye te o hã la, Mawu ƒe nuwɔwɔ ɖe Esubɔlawo ŋu ɖe eƒe dziɖulanyenye ƒe nyonyo wu fia. Lɔlɔ̃ ɖe Yehowa ƒe dziɖuŋusẽ si sɔ dzi la hea dzidzɔ kple dedienɔnɔ vavãtɔ vɛ. Gake nusi do tso amegbetɔwo ƒe dziɖuɖu si dzi Satana kpɔ ŋusẽ ɖo mee nye fuléle kple dediemanɔmanɔ. Nyateƒee, “amegbetɔ ɖua fia ɖe ame bubuwo dzi hena woƒe dzɔgbevɔ̃e.” (Nyagblɔla 8:9) Amegbetɔwo meke ɖe dedienɔnɔ vavãtɔ kple dzidzɔ si nɔa anyi ɖaa la ŋu le woƒe dziɖuɖuwo te le xexe sia si le Satana ƒe ŋusẽkpɔɖeamedzi te me o. Gake susu nyuiwo li si tae kakaɖedzi anɔ mía si.
Satana ƒe Ɣeyiɣi la Le Kpuie!
Ɣeyiɣi kpui aɖe koe Satana ƒe ŋusẽkpɔkpɔ ɖe anyigba dzi anɔ anyi ase ɖo. Yehowa maɖe mɔ be Satana ƒe dziɖuɖu naganɔ anyi adidi o! Eteƒe madidi o, woatsi Abosam ƒe wɔnawo nu. Anyigba la ayi ɖe dziɖula yeye, fia dzɔdzɔe aɖe si Mawu ŋutɔ tia la ƒe kpɔkplɔ te. Fia mae nye Yesu Kristo. Nyaɖeɖefia gblɔ tso eɖoɖo zi dzi le dziƒo ŋuti be: “Xexemefiaɖuƒe la trɔ zu mía Aƒetɔ [Yehowa] kple eƒe Kristo la tɔ.” (Nyaɖeɖefia 11:15) Biblia ƒe ɣeyiɣikɔntabubu kple Ŋɔŋlɔawo me nyagblɔɖiwo ƒe emevava siaa ɖo kpe edzi be nusia dzɔ le ƒe 1914 me.—Mateo 24:3, 6, 7.
Biblia gaɖɔ nusi dzɔ le Yesu ɖoɖo zi dzi vɔ megbe teti. Egblɔ be: “Aʋa dzɔ le dziƒo: Mixael [Yesu Kristo] kple eƒe dɔlawo yi aʋa wɔ ge kple ʋɔ driba la [Satana Abosam]. Eye ʋɔ driba kple eƒe dɔlawo wɔ aʋa la, eye womeɖu dzi o, eye womegakpɔ woƒe teƒe hã le dziƒo o. Eye wotsɔ ʋɔ driba gã, si nye da xoxo la, esi woyɔna be: Abosam kple Satana, amesi nye xexeame katã blela la, ƒu gbe, eye wotsɔe ƒu gbe ɖe anyigba, eye wotsɔ eƒe dɔlawo hã ƒu gbe ɖe anyi hekpe ɖe eŋuti.”—Nyaɖeɖefia 12:7-9.
Nukae ado tso Satana nyanyã tso dziƒo la me? Dziƒotɔwo ate ŋu akpɔ dzidzɔ, gake anyigbadzitɔwo ya ɖe? Nyaɖeɖefia 12:12 gblɔ be: “Baba na anyigba kple atsiaƒu; elabena Abosam ɖi va mia gbɔ, eye dzi le ekum ŋutɔ; elabena enyae be, vovoɣi vi aɖe ko yekpɔ.” Le nyateƒe me la, Satana nyanyã le dziƒo he dzɔgbevɔ̃e vɛ na anyigbadzitɔwo. The Columbia History of the World gblɔ be: “Ƒe Ene Ʋa si wowɔ le 1914-1918 me ƒe afɔku gã la . . . ɖee fia Ɣetoɖoƒetɔwo be womate ŋu akpɔ ŋkuʋuʋu ta tso eya ŋutɔ ƒe bometsitsi alo ŋusẽkpɔɖeamedzi vɔ̃ɖi si me o. Tso aʋa ma wɔwɔ dzi la, Ɣetoɖoƒetɔwo ƒe gbɔgbɔ megaɖo eƒe nɔnɔ kpɔ o.”
Nusi gbɔe dzidzime sia ƒe afɔkuwo tso la de ŋgɔ wu susu gbegblẽ aɖe ko. Yesu gblɔ ɖi be: “Dukɔ latsi tre ɖe dukɔ ŋuti, eye fiaɖuƒe ɖe fiaɖuƒe ŋuti, dɔwuame, dɔléame, kple anyigbaʋuʋu ava teƒeteƒewo.” Egblɔ hã be dɔvɔ̃wo ava. (Mateo 24:7, 8; Luka 21:11) Hekpe ɖe eŋu, Biblia gblɔ be le Satana ƒe nuɖoanyiawo ƒe “ŋkeke mamleawo” me la, ame geɖewo anye ‘ɖokuilɔ̃lawo, galɔ̃lawo, . . . ame maɖoto dzilawo, . . . amesiwo gbea avuléle.” Woanye “amesiwo lɔ̃a hadzedze wu esi woalɔ̃ Mawu.”—Timoteo II, 3:1-5.
Aʋawɔwɔwo, dɔvɔ̃wo, dɔwuame, anyigbaʋuʋuwo, kple agbenyuinɔnɔ ƒe gbegblẽ ɖe edzi—nusiawo katã va eme le mɔ si tɔgbe medzɔ kpɔ o nu tso keke ƒe 1914 me ke abe alesi Biblia gblɔe ɖi ene. Woɖo kpe edzi be wotsɔ Mawu kple amegbetɔ ƒe futɔ si do dɔmedzoe vevie—Satana Abosam—ƒu gbe tso dziƒo eye azɔ anyigba dzi koe wòate ŋu aɖe eƒe dziku la afia le. Gake Biblia fia hã be womaɖe mɔ na Satana wòagaɖu dzi ɣeyiɣi didi o. ‘Ɣeyiɣi kpui’ aɖe koe susɔ nɛ vaseɖe Harmagedon me, esime Mawu atsrɔ̃ xexemenuɖoanyi si dzi Satana kpɔ ŋusẽ ɖo.
Nukae adzɔ ɖe Satana dzi ɣemaɣi ne ɣeyiɣi kpui ma wu enu? Apostolo Yohanes ŋlɔe bena: “Mekpɔ mawudɔla aɖe le ɖiɖim tso dziƒo, eye aʋli me safui kple kɔsɔkɔsɔ gã aɖe le esi. Eye wòlé ʋɔ driba, da xoxo, si nye Abosam kple Satana la, eye wòblae ƒe akpe ɖeka. Eye wotsɔe ƒu gbe ɖe aʋli me, eye wotu nu ɖe enu eye wotre enu.” (Nyaɖeɖefia 20:1-3) Gbɔdzɔe kae nye esi ameƒome si le fu kpem la akpɔ!
Dzidzɔkpɔkpɔ le Fiaɖuƒedziɖuɖua Te
Ne woɖe Satana ɖa la, Mawu ƒe Fiaɖuƒea si le Yesu Kristo si me la akpɔ ameƒomea ƒe nyawo gbɔ bliboe. Le dziɖuɖu geɖewo ƒe anyigba dzi nɔnɔ teƒe la, dziƒodziɖuɖu ɖeka koe asusɔ aɖu anyigba bliboa katã dzi. Aʋawɔwɔ nu ayi, eye ŋutifafa axɔ aƒe ɖe afisiafi. Ne Mawu ƒe Fiaɖuƒea le dzi ɖum la, amesiame anɔ anyi ɖekae le nɔvilɔlɔ̃ me.—Psalmo 72:7, 8; 133:1; Daniel 2:44.
Dziɖula ka ƒomevie Yesu anye? Esime wònɔ anyigba dzi la, lɔlɔ̃ deto nɔ eme na amewo. Yesu na nuɖuɖu dɔwuitɔwo nublanuikpɔkpɔtɔe. Eda dɔ na dɔnɔwo eye wòʋu ŋku na ŋkuagbãtɔwo, ena aɖetututɔwo te ŋu ƒo nu, eye wòda gbe le nuwɔametɔwo ŋu. Yesu fɔ ame kukuwo kura gɔ̃ hã ɖe tsitre! (Mateo 15:30-38; Marko 1:34; Luka 7:11-17) Nukunu mawo nye vɔvɔli na nu wɔnuku siwo wòagawɔ le esi wònye Fia ta. Aleke wòawɔ nukui enye si be dziɖula dɔmenyotɔ sia nanɔ mía si!
Amesiwo bɔbɔ ɖe Yehowa ƒe dziɖulanyenye te la akpɔ yayra siwo nuwuwu meli na o. Ŋɔŋlɔawo do ŋugbe be: “Ekema ŋkuagbãtɔwo ƒe ŋku aʋu, eye tokunɔwo ƒe to aʋu; ekema xɔdrɔ̃wo ati kpo abe zi ene, eye aɖetututɔwo ƒe aɖe atso aseye.” (Yesaya 35:5, 6) Esi apostolo Yohanes nɔ nu ƒom tso yayraŋkeke ma ŋu la, eŋlɔ be: “Mese gbe gã aɖe tso fiazikpui la gbɔ le gbɔgblɔm bena: Kpɔ ɖa, Mawu ƒe agbadɔ la le amewo gbɔ, eye wòanɔ anyi kpli wo, eye woawo hã woanye eƒe dukɔ, eye Mawu ŋutɔ anɔ anyi kpli wo, wòanye woƒe Mawu. Eye Mawu latutu aɖatsi sia aɖatsi ɖa le woƒe ŋku me, eye ku maganɔ anyi akpɔ o, eye konyifafa kple ɣlidodo kple veve aɖeke maganɔ anyi o; elabena nu gbãtɔwo nu va yi.”—Nyaɖeɖefia 21:3, 4.
Dzidzɔkpɔkpɔ siwo Yehowa Mawu ƒe dziɖuɖu si to Via Yesu Kristo dzi ahe vɛ la agbɔ fu sia fu si míekpe le nuɖoanyi vɔ̃ɖi sia si dzi ɖum Satana Abosam le la ŋu sasasã. Le Mawu ƒe xexe yeye si ƒe ŋugbe wòdo me la, womagabia se be, ‘Ameka tututue le dzi ɖum?’ o. (Petro II, 3:13) Ameƒomea me tɔ ɖokuibɔbɔlawo akpɔ dzidzɔ eye woanɔ dedie le anyigba si dzi gbɔgbɔmenutome Dziɖula lɔlɔ̃tɔ Yehowa kple Kristo aɖu la dzi. Ðe nèle mɔ kpɔm be yeanye woƒe dziɖuɖua tevia?
[Nɔnɔmetata si le axa 7]
Ameƒomea anɔ dedie le Mawu ƒe Fiaɖuƒea ƒe dziɖuɖu te le anyigba dzi
[Nɔnɔmetata Tsoƒe si le axa 4]
NASA foto