“Kristo Nye Mawu Ƒe Ŋusẽ”

1-3. (a) Ŋɔdzinu kae dzɔ ɖe nusrɔ̃lawo dzi le Galilea-ƒua dzi, eye nu kae Yesu wɔ? (b) Nu ka tae nya si apostolo Paulo gblɔ be “Kristo nye Mawu ƒe ŋusẽ” la sɔ nyuie ŋutɔ?

ŊƆDZI lé nusrɔ̃lawo. Wonɔ Galilea-ƒua tsom, kasia ya sesẽ aɖe de asi ƒoƒo me. Ðikeke mele eme o be menye esia nye zi gbãtɔ si wole nu sia teƒe kpɔm o—elabena ŋutsu siawo dometɔ aɖewo nye tɔƒodela bibiwo.a (Mateo 4:18, 19) Gake esia ya nye “ya sesẽ aɖe” si nyama ƒua enumake wòdze agbo. Ŋutsuawo dze agbagba kutrikukutɔe be yewoaku ʋua, gake yaa nu sẽ wu wo. Ƒutsotsoeawo nɔ “ŋeŋem ɖe tɔdziʋua me,” eye tsia nɔ kɔkɔm ɖe eme wònɔ ʋua yɔm. Togbɔ be nu mawo nɔ dzɔdzɔm hã la, Yesu ya yi alɔ̃ me ʋĩi le ʋua gɔme esi nufiafia amehawo le ŋkekea me te ɖeɖi eŋu ta. Nusrɔ̃laawo kpɔ be yewoƒe agbe ɖo afɔku me, eye wonyɔe heɖe kuku nɛ be: “Aƒetɔ, ɖe mí, míeku vɔ!”—Marko 4:35-38; Mateo 8:23-25.

² Yesu mevɔ̃ o. Etsɔ kakaɖedzi blibo blu ɖe yaƒoƒoa kple atsiaƒua ta be: “Zi ɖoɖoe! Dze akɔ anyi!” Enumake la, yaƒoƒoa kple atsiaƒua se eƒe gbe—yaa dzudzɔ ƒoƒo, atsiaƒua dze akɔ anyi, eye “ɖoɖoe zi toŋtoŋtoŋ.” Vɔvɔ̃ ƒomevi aɖe ɖo nusrɔ̃lawo azɔ. Wodo dalĩ na wo nɔewo be: “Ame ka gɔ̃e nye esia?” Ɛ̃, ame ka gɔ̃e ate ŋu ablu ɖe ya kple atsiaƒu ta abe ale si wonyrana ɖe ɖevi masetonu dzi ene?—Marko 4:39-41; Mateo 8:26, 27.

³ Gake menye amegbetɔ dzro koe Yesu nye o. Yehowa zã eƒe ŋusẽ tsɔ kpe ɖe eŋu eye wògaɖee fia to eyama dzi hã le mɔ wɔnukuwo nu. Esɔ be gbɔgbɔ ʋã apostolo Paulo wògblɔ be: “Kristo nye Mawu ƒe ŋusẽ.” (1 Korintotɔwo 1:24) Mɔ kawo nue Mawu ƒe ŋusẽ dze le Yesu me le? Eye dɔ kae ale si Yesu zãa ŋusẽe awɔ ɖe míaƒe agbenɔnɔ dzi?

4, 5. (a) Ŋusẽ kple aƒetɔnyenye ka gbegbee Yehowa na eƒe Tenuvi la? (b) Ŋusẽ si hiã kae wona Vi sia be wòakpɔ egbɔ be Fofoa ƒe tameɖoɖo ku ɖe nuwo wɔwɔ ŋu va eme?

⁴ Bu ŋusẽ si nɔ Yesu si hafi wòva zu amegbetɔ ŋu kpɔ. Yehowa zã eya ŋutɔ ƒe “ŋusẽ mavɔmavɔ” la esime wòwɔ eƒe Tenuvi la, ame si wova yɔ be Yesu Kristo. (Romatɔwo 1:20; Kolosetɔwo 1:15) Le ema megbe la, Yehowa tsɔ ŋusẽ triakɔ kple aƒetɔnyenye gã na Via, eye wòde dɔ asi nɛ be wòatsɔ akpɔ egbɔe be Yeƒe tameɖoɖo ku ɖe nuwo wɔwɔ ŋu nava eme. Biblia gblɔ le Vi la ŋu be: “Eya dzi wowɔ nuwo katã toe, eye eya manɔmee la, womewɔ nu ɖeka pɛ hã o.”—Yohanes 1:3.

⁵ Ale si gbegbe dɔ si wode asi nɛ la loloe ƒe akpa sue aɖe ŋutɔ koe míate ŋu akpɔ le susu me. Wò ya bu ŋusẽ si gbegbe hiã be woawɔ mawudɔla sẽŋu miliɔn geɖe, dziƒonutome si ŋku kpɔna kple eme ɣletivihatsotso biliɔn nanewo kpakple anyigba kple edzi nu gbagbe hamehame gbogboawo ŋu kpɔ. Be Tenuvi la nate ŋu awɔ dɔ siawo la, wona ŋusẽ si tri akɔ wu ɖe sia ɖe le xexea me lae—eyae nye Mawu ƒe gbɔgbɔ kɔkɔea. Vi sia kpɔ dzidzɔ ŋutɔ be yenye Dɔwɔla Bibi, si Yehowa zã le nu bubuwo katã wɔwɔ me.—Lododowo 8:22-31.

 6. Le Yesu ƒe ku le anyigba dzi kple eƒe tsitretsitsi megbe la, ŋusẽ kple aƒetɔnyenye kawoe wonae?

⁶ Ðe woagate ŋu ana ŋusẽ kple aƒetɔnyenye siwo lolo wu ema Tenuvi la? Le Yesu ƒe ku le anyigba dzi kple eƒe tsitretsitsi megbe la, egblɔ be: “Wotsɔ ŋusẽ si le dziƒo kple anyigba dzi la katã de asi nam.” (Mateo 28:18) Ɛ̃, wotsɔ ŋutete kple gomenɔamesi na Yesu be wòazã ŋusẽ le xexea me katã. Esi wònye “fiawo dzi Fia kple aƒetɔwo dzi Aƒetɔ” ta la, wona ŋusẽe be wòaɖe “dziɖuɖu katã kple amegãnyenye katã kpakple ŋusẽ katã” siwo tsia tre ɖe Fofoa ƒe dziɖuɖu ŋu—esiwo ŋku kpɔna kple esiwo ŋku mekpɔna o siaa—ɖa. (Nyaɖeɖefia 19:16; 1 Korintotɔwo 15:24-26) Mawu ‘megblẽ naneke ɖi, si metsɔ de Yesu te o’—negbe Yehowa ŋutɔ koe mele eme o.—Hebritɔwo 2:8; 1 Korintotɔwo 15:27.

 7. Nu ka tae míate ŋu aka ɖe edzi be Yesu mazã ŋusẽ si Yehowa nae la le mɔ gbegblẽ nu gbeɖe o?

⁷ Ðe wòle be míatsi dzi be ɖewohĩ Yesu azã eƒe ŋusẽa madzemadzea? Kura o! Yesu lɔ̃ Fofoa ŋutɔ eye mawɔ naneke gbeɖe si madze eŋu o. (Yohanes 8:29; 14:31) Yesu nya nyuie be Yehowa mezãa eƒe ŋusẽ si ƒo ɖe sia ɖe ta le mɔ gbegblẽ nu gbeɖe o. Yesu ŋutɔ kpɔ ale si Yehowa dia mɔnukpɔkpɔwo be “wòazã eƒe ŋusẽ atsɔ axɔ na ame siwo ku ɖe eŋu kple woƒe dzi blibo.” (2 Kronika 16:9) Le nyateƒe me la, ale si Yesu Fofo lɔ̃ ameƒomeae la, nenema ke Yesu hã lɔ̃ ameƒomeae, eya ta míate ŋu aka ɖe edzi be Yesu azã eƒe ŋusẽ ɣesiaɣi atsɔ awɔ nyui na amewo. (Yohanes 13:1) Yesu ɖo kpɔɖeŋu si ŋu kpɔtsɔtsɔ mele o ɖi le go sia me. Mina míade ŋugble le ŋusẽ si nɔ esi esime wònɔ anyigba dzi kple ale si eƒe dzi ʋãe wòzãe ŋu kpɔ.

 8. Esi Mawu si ami na Yesu megbe la, nu kae wòna ŋusẽe be wòawɔ, eye aleke wòzã eƒe ŋusẽ lae?

⁸ Edze ƒãa be Yesu mewɔ nukunu aɖeke esime wònye ŋutsuvi dzaa si nɔ tsitsim le Nazaret o. Gake nuwo trɔ esi wonyrɔe ɖe tsi me le ƒe 29 K.Ŋ. me, esime wòxɔ abe ƒe 30 ene. (Luka 3:21-23) Biblia gblɔ na mí be: “Mawu tsɔ gbɔgbɔ kɔkɔe kple ŋusẽ si ami nɛ, eye wòyi ɖato anyigba blibo la dzi nɔ nyui wɔm henɔ dɔ dam na ame siwo katã Abosam te ɖe anyi.” (Dɔwɔwɔwo 10:38) “Nɔ nyui wɔm”—ɖe nyagbɔgblɔ sia mefia be Yesu zã eƒe ŋusẽ ɖe mɔ nyuitɔ nu oa? Esi wosi ami nɛ vɔ la, eva “zu nyagblɔɖila sẽŋu le nya kple nuwɔna me.”—Luka 24:19.

9-11. (a) Afi kae Yesu fia nu le zi geɖe, eye kuxi kae dze ŋgɔe? (b) Nu ka tae ale si Yesu fiaa nui la wɔ nuku na amehawo?

⁹ Mɔ ka nue Yesu sẽ ŋu le nya me le? Gaglãgbe ye wòfia nu le zi geɖe—le tawo to kple towo dzi, le ablɔwo kple asiwo me. (Marko 6:53-56; Luka 5:1-3; 13:26) Eƒe nyaselawo ate ŋu atrɔ adzo faa ne eƒe nyawo melé dzi na wo o. Ɣemaɣi si wometo agbalẽtata vɛ haɖe o la, ele be nyasela siwo tsɔ ɖe le eƒe nyawo me nalé nyaawo ɖe woƒe susu kple dzi me. Eya ta ele be Yesu ƒe nufiafia nalé dzi na ame le go sia go me, egɔme nanya se keŋ, eye woate ŋu aɖo ŋku wo dzi bɔbɔe. Gake kuxi sia medo kplamatsɛ Yesu o. Le kpɔɖeŋu me, bu eƒe Todzimawunyaa ŋu kpɔ.

¹⁰ Gbe ɖeka ŋdi le ƒe 31 K.Ŋ. ƒe gɔmedzedze lɔƒo la, ameha aɖe va ƒo ƒu ɖe togbɛ aɖe dzi le Galilea-ƒua gbɔ. Wo dometɔ aɖewo tso Yudea kple Yerusalem, si gbɔ didi anye kilometa 100 va ɖo 110. Wo dometɔ bubuwo tso Tiro kple Sidon siwo le dziehe gome la ƒe ƒuta nutowo me. Dɔnɔ geɖe te ɖe Yesu ŋu be yewoaka asi eŋu, eye wòda gbe le wo ŋu. Esi ame aɖeke meganɔ wo dome si nɔ dɔ sesẽ aɖeke lém o la, ete nufiafia wo. (Luka 6:17-19) Ɣeyiɣi aɖe megbe esi wòwu eƒe nyawo nu la, nya siwo ameawo se na woƒe nu ku ale gbegbe. Nu ka tae?

¹¹ Le ƒe aɖewo megbe la, ame aɖe si ɖo to se mawunya ma ŋlɔ bena: “Amehawo ƒe nu ku le eƒe nufiafia la ta, elabena efia nu wo abe ame si si ŋusẽ le ene.” (Mateo 7:28, 29) Yesu ƒo nu kple ŋusẽ, eye wote ŋu see le wo ɖokui me. Eƒo nu ɖe Mawu nu eye Mawu ƒe Nya la nye ŋusẽ si wòtsɔ ɖo kpe eƒe nufiafia dzi. (Yohanes 7:16) Yesu ƒe nyawo me kɔ, eƒe nuxlɔ̃amewo wɔa dɔ ɖe ame dzi, eye womate ŋu ake ɖi le eƒe numeɖeɖewo ŋu o. Eƒe nyawo ɖoa nu si ŋu wòle nu ƒom le la ƒe ke gbɔ eye wòdea dzi gbɔ na nyaselawo. Efia ale si woawɔ ake ɖe dzidzɔkpɔkpɔ ŋu, ale si woado gbe ɖa, ale si woadi Mawu Fiaɖuƒea, kple ale si woawɔ ɖoɖo ɖe etsɔme si li ke ŋu la wo. (Mateo 5:3–7:27) Eƒe nyawo ʋã dzi na ame siwo nyateƒe kple dzɔdzɔenyenye ƒe dɔ nɔ wuwum. Ame siawo lɔ̃ faa be ‘yewoagbe nu le yewo ɖokui gbɔ’ ahagblẽ nu sia nu ɖi ava dze eyome. (Mateo 16:24; Luka 5:10, 11) Ŋusẽ si le Yesu ƒe nyawo ŋu la ŋuti ɖaseɖiɖi nyui kae nye esi!

12, 13. Gɔmesese ka nue Yesu “sẽ ŋu le nuwɔna me” le, eye nukunu hamehame kawoe wòwɔ?

¹² Yesu ‘sẽ ŋu le nuwɔna me’ hã. (Luka 24:19) Nyanyuigbalẽawo ka nya ta tso nukunu siwo wòwɔ la dometɔ siwo wu 30 koŋ ŋu—‘Yehowae na ŋusẽe’ wòwɔ nukunu siawo katã.b (Luka 5:17) Yesu ƒe nukunuawo kpɔ ŋusẽ ɖe ame akpe geɖe ƒe agbe dzi. Bu nukunuawo dometɔ eve pɛ ko ŋu kpɔ—esi me wòna nuɖuɖu ŋutsu 5,000 kple emegbe ŋutsu 4,000. Ne wotsɔ nyɔnuwo kple ɖeviwo kpee la, ameha ma ade akpe geɖe!—Mateo 14:13-21; 15:32-38.

¹³ Yesu wɔ nukunu hamehamewo. Ekpɔ ŋusẽ ɖe gbɔgbɔ vɔ̃wo dzi henya wo do goe bɔbɔe. (Luka 9:37-43) Ekpɔ ŋusẽ ɖe dzɔdzɔmenuwo hã dzi, hetrɔ tsi wòzu wain. (Yohanes 2:1-11) Kpɔ ale si gbegbe wòanya wɔ nuku na Yesu ƒe nusrɔ̃lawo ɖa esi ‘wokpɔe wònɔ ƒua dzi zɔm gbɔna.’ (Yohanes 6:18, 19) Ekpɔ ŋusẽ ɖe dɔléle dzi, eye wòda nuwɔamewo, dɔlémafɔewo kple dɔ vɔ̃ɖi wuamewo hã. (Marko 3:1-5; Yohanes 4:46-54) Eda dɔ siawo le mɔ vovovowo nu. Yesu nɔ adzɔge da gbe le ame aɖewo ŋu, eye wòka asi ame bubuwo ya ŋu ŋutɔŋutɔ. (Mateo 8:2, 3, 5-13) Eda dɔ na ame aɖewo enumake, eye wòdae na ame bubuwo vivivi.—Marko 8:22-25; Luka 8:43, 44.

14. Nɔnɔme kawo mee Yesu ɖee fia le be yekpɔ ŋusẽ axɔ ame tso ku me?

¹⁴ Eɖe dzesi ŋutɔ be ŋusẽ le Yesu si be wòaxɔ ame tso ku me. Le nudzɔdzɔ etɔ̃ siwo woŋlɔ ɖi me la, efɔ ame kukuwo ɖe tsitre, esime wògbɔ agbe nyɔnuvi ƒe 12 vi aɖe na edzilawo, egbɔ agbe vi ɖekɛ aɖe na dadaa si nye ahosi, eye wògbɔ agbe ŋutsu aɖe si nɔvianyɔnuwo lɔ̃ vevie la na wo. (Luka 7:11-15; 8:49-56; Yohanes 11:38-44) Naneke mesẽ nɛ akpa o. Efɔ nyɔnuvi ƒe 12 vi la tso kuba dzi, esi wòku eteƒe medidi o. Efɔ ahosia ƒe viŋutsuvia esime wònɔ nu si dzi wokɔe ɖo yina ɖiɖi ge la dzi, eye ɖikeke mele eme o be gbe si gbe wòku lae wòfɔe. Eye efɔ Lazaro tso yɔdo si me woɖii ɖo me le eƒe ku ŋkeke ene megbe.

15, 16. Kpeɖodzi kae li si fia be Yesu zã eƒe ŋusẽ ɖokuitɔmadimaditɔe?

¹⁵ Àte ŋu akpɔ ale si woate ŋu azã ŋusẽ si wona Yesu la le mɔ gbegblẽ nu ne ɖe wòanye dziɖula madeblibo aɖe sie wotsɔe de la le susu mea? Gake nu vɔ̃ menɔ Yesu ya ŋu o. (1 Petro 2:22) Egbe be yemalɔ̃ be ɖokuitɔdidi, ɖoƒegãdidi kple ŋukeklẽ si ʋãa amegbetɔ madeblibowo wozãa woƒe ŋusẽ tsɔ tafaa ame bubuwo la nage ɖe ye me o.

¹⁶ Yesu zã eƒe ŋusẽ ɖokuitɔmadimaditɔe, mezãe na eya ŋutɔ ƒe viɖe gbeɖe o. Esi dɔ wui la, egbe kpewo tɔtrɔ wòazu abolo na eɖokui. (Mateo 4:1-4) Nu ʋɛ siwo nɔ esi la ɖo kpe edzi be mezã eƒe ŋusẽ tsɔ kpɔ ŋutilãmenuwoe o. (Mateo 8:20) Kpeɖodzi bubuwo gali siwo fia be ɖokuitɔmadimadie ʋãe wòwɔ eƒe ŋusẽdɔwo. Etsɔa nanewo saa vɔe le nukunuwo wɔwɔ me. Ne eda gbe le dɔnɔwo ŋu la, ŋusẽ dona le eme. Enyana ne ŋusẽ do le eme alea, nenye be ame ɖeka ko ŋue wòda gbe le gɔ̃ hã. (Marko 5:25-34) Ke hã eɖe mɔ amehawo ka asi eŋu, eye wohaya. (Luka 6:19) Ðokuitɔmadimadi ka gbegbee nye esi!

17. Aleke Yesu ɖee fia be yeɖɔa ŋu ɖo le ŋusẽ zazã me?

¹⁷ Yesu ɖɔa ŋu ɖo le ŋusẽ zazã me. Medzɔ kpɔ gbeɖe be ewɔ ŋusẽdɔwo be amewo nakpɔ dzro ko alo wòazu nukpɔkpɔ hoo ta ko o. (Mateo 4:5-7) Melɔ̃ be yeawɔ dzesiwo be yeana Herodes nakpɔ nu siwo dim wòle be yeanya ɖe susu gbegblẽwo ta la o. (Luka 23:8, 9) Le esi teƒe be Yesu nawɔ nu amewo nanya ŋusẽ si gbegbe le esi la, egblɔnɛ na ame siwo wòda dɔ na be woagagblɔe na ame aɖeke o. (Marko 5:43; 7:36) Medi be amewo nanɔ te ɖe nyatakaka siwo ŋu woɖe ami ɖo gblɔ na wo dzi aƒo nya ta le ye ŋu o.—Mateo 12:15-19.

18-20. (a) Nu kae kpɔ ŋusẽ ɖe ale si Yesu zãa eƒe ŋusẽe dzi? (b) Aleke nèse le ɖokuiwò me le mɔ si dzi Yesu to da gbe le tokunɔ aɖe ŋui la ŋu?

¹⁸ Yesu, ŋusẽtɔ sia, to vovo kura na dziɖula siwo zãa woƒe ŋusẽ dzimesesẽtɔe amewo ƒe nuhiahiãwo kple fukpekpewo ŋu mabumabui. Yesu tsɔ ɖe le eme na amewo. Fukpelawo kpɔkpɔ ɖeɖe dzaa wɔa dɔ ɖe edzi ale gbegbe be wòdina vevie be yeana gbɔdzɔe wo tso woƒe fukpekpewo me. (Mateo 14:14) Ebua woƒe seselelãme kple nuhiahiãwo ŋu, eye eƒe ɖetsɔtsɔ le amewo me dɔmenyotɔe alea kpɔ ŋusẽ ɖe ale si wòzã eƒe ŋusẽe dzi. Míate ŋu akpɔ esia ƒe kpɔɖeŋu wɔdɔɖeamedzi aɖe le Marko 7:31-37.

¹⁹ Le nudzɔdzɔ sia me la, ameha gbogbo aɖe va Yesu gbɔ eye wokplɔ ame geɖe siwo ƒe lãme gblẽ vɛ wòda gbe le wo katã ŋu. (Mateo 15:29, 30) Gake Yesu tia ŋutsu aɖe le wo dome heɖe ameŋububu fiae etɔxɛe. Ŋutsu sia nye tokunɔ eye mete ŋu ƒoa nu nyuie hã o. Anɔ eme be Yesu kpɔ ale si gbegbe ŋutsu sia tsi dzi alo ale si gbegbe ŋu nɔ ekpemee. Yesu bu ŋutsua ƒe nɔnɔmea ŋu eye wòɖee ɖe aga—tso amehawo gbɔ—yi afi si womakpɔe o. Eyome Yesu wɔ dzesi aɖewo tsɔ ɖe nu si wɔ ge wògbɔna la fia ŋutsua. ‘Etsɔ eƒe asibidɛwo de ŋutsua ƒe to me, eɖe ta, eye wòka asi eƒe aɖe ŋu.’c (Marko 7:33) Le ema megbe la, Yesu fɔ ta dzi kpɔ dziƒo eye wòɖe hũ si fia gbedodoɖa. Nuwɔna siawo afia ŋutsua be, ‘Nu si wɔ ge megbɔna na wò la tso Mawu ƒe ŋusẽ me.’ Mlɔeba la, Yesu gblɔ be: “Ʋu.” (Marko 7:34) Enumake ŋutsua ƒe to ʋu, eye wòte ŋu ƒo nu nyuie.

²⁰ Aleke gbegbe wòwɔa dɔ ɖe ame dzie nye esi be ne Yesu le ŋusẽ si Mawu nae zãm tsɔ le dɔ dam na ame siwo le fu kpem hã la, ebua woƒe seselelãme ŋu dɔmenyotɔe! Ðe esia mede dzi ƒo na mí be míanya be Yehowa tsɔ Mesia Fiaɖuƒea de asi na Dziɖula sia si tsɔa ɖe le eme na ame hebua ame ŋu alea gbegbe oa?

21, 22. (a) Nu ka ƒe dzesie Yesu ƒe nukunuwo nye? (b) Le esi Yesu kpɔ ŋusẽ ɖe dzɔdzɔmeŋusẽwo dzi ta la, nu kae míate ŋu akpɔ mɔ na le eƒe Fiaɖuƒedziɖuɖua te?

²¹ Ŋusẽdɔ siwo Yesu wɔ le anyigba dzi la nye yayra siwo gawɔ nuku wu kura, siwo gbɔna le eƒe fiaɖuɖua te la ƒe vɔvɔli ko. Le Mawu ƒe xexe yeyea me la, Yesu agawɔ nukunuwo ake—gake ɣemaɣi la, awɔe le anyigba bliboa dzi! Bu nu dodzidzɔname siwo le ŋgɔ gbɔna la dometɔ aɖewo ŋu kpɔ.

²² Yesu aɖɔ anyigba dzi nu gbagbewo kple wo nɔƒewo ɖo be nuwo nada asɔ pɛpɛpɛ. Ðo ŋku edzi be etsi ya sesẽ aɖe si nɔ ƒoƒom la nu tsɔ ɖee fia be yekpɔ ŋusẽ ɖe dzɔdzɔmeŋusẽwo dzi. Ekema kakaɖedzi li be le Kristo ƒe Fiaɖuƒedziɖuɖua te la, magahiã be ameƒomea navɔ̃ be ya sesẽ ʋuduʋuduwo, anyigbaʋuʋuwo, dzotowo ƒe wówo, alo dzɔdzɔmefɔku bubu aɖeke agblẽ nu le yewo ŋu o. Esi Yesue nye Dɔwɔla Bibi si Yehowa zã le anyigbaa kple edzi nu gbagbewo katã wɔwɔ me ta la, ese anyigba la ƒe wɔwɔme gɔme bliboe. Enya ale si wòatrɔ asi le anyigbadzinuwo ŋu wòasɔ nyuie. Le eƒe dziɖuɖu te la, woatrɔ anyigba blibo sia katã wòazu Paradiso.—Luka 23:43.

23. Aleke Yesu si nye Fia akpɔ ameƒomea ƒe nuhiahiãwo gbɔe?

²³ Ke ameƒomea ƒe nuhiahiãwo ya ɖe? Ale si Yesu te ŋu zã nuɖuɖu sue aɖe ko tsɔ nyi ame akpe geɖe woɖu ɖi ƒo nyuie la na kakaɖedzi mí be dɔwuame manɔ eƒe dziɖuɖua te o. Nyateƒee, ne nuɖuɖu bɔ eye womae nyuie la, dɔwuame nu ayi tegbee. (Psalmo 72:16) Ŋusẽ si wòkpɔ ɖe lãmegbegblẽ kple dɔlélewo dzi fia be ada dɔ na dɔnɔwo, ŋkuagbãtɔwo, tokunɔwo, ame siwo ƒe ŋutinuwo lã, nuwɔametɔwo kple bunɔwo—ada dɔ na wo bliboe eye dɔléleawo nu ayi tegbee. (Yesaya 33:24; 35:5, 6) Ŋutete si le esi be wòafɔ ame kukuwo ɖe tsitre la nye kpeɖodzi be Dziƒofia sia kpɔ ŋusẽ be wòafɔ ame miliɔn gbogbo manyaxlẽ siwo wònye dzidzɔ na Fofoa be yeaɖo ŋku wo dzi la ɖe tsitre.—Yohanes 5:28, 29.

24. Ne míede ŋugble le Yesu ƒe ŋusẽ ŋu la, nu kae wòle be wòanɔ susu me na mí, eye nu ka tae?

²⁴ Esi míele ŋugble dem le Yesu ƒe ŋusẽ ŋu la, mina wòanɔ susu me na mí be Vi la srɔ̃a Fofoa bliboe. (Yohanes 14:9) Ale si Yesu zã eƒe ŋusẽe na míekpɔ ale si Yehowa zãa eƒe ŋusẽe la nyuie. Le kpɔɖeŋu me, bu ameŋububumɔ si nu Yesu da gbe le anyidzela aɖe ŋu la ŋu kpɔ. Yesu ƒe dɔme trɔ ɖe ŋutsua ŋu eye wòka asi eŋu hegblɔ be: “Melɔ̃!” (Marko 1:40-42) To nudzɔdzɔwo abe esia ene dzi la, Yehowa le egblɔm be, ‘Aleae mezãa nye ŋusẽe nye esi!’ Ðe meʋã wò be nàkafu mía Mawu Ŋusẽkatãtɔ la ahada akpe be ezãa eƒe ŋusẽ lɔlɔ̃tɔe alea oa?