Yesu Dzidzi—Afi Kae Eye Ɣekaɣie?

Roma Fiaɖuƒea ƒe fiagã Kaisaro Augusto de se be ame sia ame naŋlɔ ŋkɔ. Eya ta ele be Yosef kple Maria nayi Betlehem, si le Yerusalem ƒe anyiehe, afi si wodzi Yosef le.

Ame geɖe va ŋkɔ ŋlɔ ge le Betlehem. Lãkpo, si nye tedziwo kple lã bubuwo nɔƒe, koe Yosef kple Maria te ŋu kpɔ dze. Afi mae wodzi Yesu le. Maria xatsa avɔ ɖe eŋu eye wòtsɔe mlɔ lãnuɖunu me.

Anye Mawue na Kaisaro Augusto de se be amewo naŋlɔ ŋkɔ. Nu ka tae? Elabena esia na wote ŋu dzi Yesu le Betlehem, si nye tɔgbuia Fia David wo de. Ŋɔŋlɔawo gblɔe ɖi xoxoxo be afi mae woadzi Dziɖula si ŋugbe wodo la le.—Mika 5:2.

Zã vevi kae nye esi! Kekeli aɖe klẽ ƒo xlã alẽkplɔlawo ƒe ha aɖe le gbedzi. Yehowa ƒe ŋutikɔkɔe ye! Mawudɔla aɖe gblɔ na alẽkplɔlaawo be: “Migavɔ̃ o, elabena kpɔ ɖa, meva nya nyui si ahe dzidzɔ gã avɛ na amewo katã la gblɔ ge na mi. Elabena wodzi ɖela, si nye Kristo Aƒetɔ la, na mi egbea le David ƒe du la me. Eye esia anye dzesi na mi: Miakpɔ vidzĩ si ŋu woxatsa avɔ ɖo, eye wotsɔe mlɔ lãnuɖunu me.” Kasia, mawudɔla bubu geɖewo do eye wodzi ha be: “Ŋutikɔkɔe na Mawu le dziƒo boo, eye ŋutifafa nanɔ anyi kple ame siwo ŋu wòkpɔa ŋudzedze ɖo le anyigba dzi.”—Luka 2:10-14.

Esi mawudɔlaawo dzo la, alẽkplɔlaawo gblɔ na wo nɔewo be: “Mina míayi Betlehem, ne míakpɔ nu si dzɔ, si Yehowa ɖe fia mí la ɖa.” (Luka 2:15) Woɖe abla yi eye wokpɔ Yesu le afi si tututu mawudɔlaa gblɔ be woakpɔe le. Esi alẽkplɔlaawo gblɔ nu si mawudɔlaa gblɔ na wo la, ewɔ moyaa na ame siwo katã see. Maria dzra nya siawo katã ɖo ɖe eƒe tame, eye wòbu wo ŋu le eƒe dzi me.

Egbea, ame geɖe xɔe se be wodzi Yesu le December 25 lia dzi. Gake December nyea tsidzaɣi kple vuvɔŋɔli le Betlehem nutoa me. Ɣeaɖewoɣi la, sno dzana gɔ̃ hã. Alẽkplɔlawo manɔ gbedzi kple woƒe alẽwo le zã me le ƒea ƒe ɣeyiɣi ma me o. Azɔ hã, Roma fiagã la mabia tso dukɔ si le didim be yeadze aglã ɖe eŋu xoxo la si be woazɔ mɔ ŋkeke geɖe aɖaŋlɔ ŋkɔ le vuvɔŋɔli ƒe ɣeyiɣi si me vuvɔa nu le sesẽm wu la o. Edze ƒãa be ɣeaɖeɣi le October mee wodzi Yesu.