Ta 5
Yesu Dzidzi—Afikae eye Ɣekaɣie?
ROMA Fiaɖuƒea ƒe fia Kaisaro Augusto de se be amesiame natrɔ ayi du si me wodzii le me be woaŋlɔ eŋkɔ. Eyata Yosef yina Betlexem, afisi wodzii le.
Ame geɖe va ŋkɔ ŋlɔ ge le Betlexem, eyata lãxɔ me koe Yosef kple Maria te ŋu kpɔ dze. Tedziwo kple lã bubuwo nɔƒe afisiae wodzi Yesu ɖo. Maria xatsa avɔ ɖe eŋu eye wòtsɔe mlɔ lãnuɖunu si me lãwo ƒe nuɖuɖu nɔna la me.
Kakaɖedzitɔe la, Mawu ƒe mɔfiafiae na Kaisaro Augusto de eƒe ŋkɔŋɔŋlɔsea. Esia na wote ŋu dzi Yesu le Betlexem, du si Ŋɔŋlɔawo gblɔ ɖi xoxo be afimae woadzi dziɖula si ŋugbe wodo la le.
Fiẽsi vevi kae nye si! Kekeli aɖe ƒo xlã alẽkplɔlawo ƒe ha aɖe le gbedzi. Yehowa ƒe ŋutikɔkɔe ye! Eye Yehowa ƒe dɔla la gblɔ na wo bena: “Migavɔ̃ o! Elabena kpɔ ɖa, meva dzidzɔ gã ŋutinya gblɔ ge fia mi, esi lanye na dukɔ blibo la katã, elabena wodzi xɔla, si nye Kristo, Aƒetɔ la, na mi egbe le Dawid dua me. Eye esia anye dzesi na mi: Miakpɔ vidzĩe, si woxatsa avɔ ɖe eŋu, eye wòmlɔ lãnuɖunu me.” Kasia mawudɔla bubu geɖewo do eye wodzi ha be: “Ŋutikɔkɔe woana Mawu le dziƒo boo, eye ŋutifafa ava anyigba dzi; [amegbetɔ lɔlɔ̃nu nyui tɔwo] ŋu woakpɔ ŋudzedze nyui le.”
Esi mawudɔlawo dzo la, alẽkplɔlawo gblɔ na wo nɔewo bena: “Mina ne míayi Betlexem, aɖakpɔ nusia, si va dzɔ, esi [Yehowa] na míenya.” Woɖe abla yi eye wokpɔ Yesu le afisi tututu mawudɔla la gblɔ be woakpɔe le. Esi alẽkplɔlawo gblɔ nusi mawudɔla la gblɔ na wo la, ewɔ mo yaa na amesiwo katã see. Maria lé nya siawo katã ɖe tame, eye wòbu wo ŋu le eƒe dzi me.
Egbea ame geɖe xɔe se be wodzi Yesu le December 25 lia dzi. Gake December nye tsidzaɣi kple vuvɔŋɔli le Betlexem. Alẽkplɔlawo manɔ gbedzi kple woƒe alẽwo le zã me le ƒea ƒe ɣeyiɣi ma me o. Romatɔ Kaisaro hã mabia tso dukɔ si le didim be yeadze aglã ɖe eŋu xoxo la si be woazɔ mɔ aɖaŋlɔ ŋkɔ le vuvɔŋɔli o. Edze ƒã be wodzi Yesu le kele me ƒe gɔmedzedze. Luka 2:1-20, Mixa 5:1.
▪ Nukatae Yosef kple Maria wozɔ mɔ yi Betlexem?
▪ Nu wɔmoyaa kae dzɔ le zã si me wodzi Yesu?
▪ Aleke míewɔ nya be womedzi Yesu le December 25 lia dzi o?