Mɔɖelawo Kpena Ðe Ame Bubuwo Ŋu Eye Wokpɔa Yayra

“MƆÐEÐEDƆA nyo wu ŋutilãmedɔ nyui ɖesiaɖe. Naneke mehea dzidzeme vɛ wu kpekpe ɖe amewo ŋu be woanya Yehowa kple eƒe nyateƒe la o.” Nenemae Kristotɔ nyɔnu aɖe si tia mɔɖeɖedɔa—si nye ɣeyiɣiawo katã ƒe gbeƒãɖeɖe Fiaɖuƒea—wònye eƒe agbemedɔ la gblɔ. Agbemedɔ bubu nenie ate ŋu ana ame nakpɔ dzidzɔ alea?

Mɔɖeɖedɔa nye taɖodzinu kɔkɔ kple mɔnukpɔkpɔ xɔasi aɖe. Aleke ame aɖe ate ŋu atia agbe sia ƒomevi nɔnɔ? Nukae hiã be nànɔ mɔɖeɖedɔa me ɣeyiɣi didi ahakpɔ yayra siwo doa go tsoa eme?

Nu evee le vevie. Gbãtɔe nye nɔnɔme deamedziwo. Ame geɖe le nɔnɔme siwo na wòdze ƒã be womate ŋu awɔ mɔɖeɖedɔa o me. Eye eveliae nye gbɔgbɔmenudidi kple nɔnɔme nyui siwo anɔ ame si. Le nyateƒe me la, ne fifi ƒe nɔnɔmewo na ame aɖe te ŋu wɔ mɔɖeɖedɔa alo mete ŋu wɔe o, mí katã míate ŋu adze agbagba atu nɔnɔme nyui siwo ɖea Kristotɔwo ƒe tsitsi fiana ɖo.

Nusita Ame Aɖewo Wɔa Mɔɖeɖedɔa

Nukae nye mɔɖeɖedɔa wɔwɔ dzidzedzetɔe ƒe nudidiwo? Gbeƒãɖeɖe ƒe aɖaŋuwo le vevie. Ele be mɔɖelawo nanya alesi woagblɔ nyanyuia na amedzrowo, tɔtrɔ yi ɖetsɔlemetɔwo gbɔ, kple aƒeme Biblia nusɔsrɔ̃ wɔwɔ. Ne aɖaŋu siawo mele mɔɖela si o la ate ŋu aɖe dzi le eƒo. Gake nu bubuwo hã le vevie.

Le kpɔɖeŋu me, nusianu si míewɔna le míaƒe tadedeagu me do ƒome kple míaƒe ƒomedodo kple Yehowa kple eƒe habɔbɔa. Mɔɖeɖedɔa hã le eme. Sɔhɛ mɔɖela aɖe si ŋkɔe nye Rado ɖe eme be: “Naneke menyo na sɔhɛ wu be wòaɖo ŋku Yehowa dzi ahazɔ le nyateƒea ƒe mɔa dzi o.” Ẽ, mɔɖeɖedɔa nye mɔ nyui si dzi sɔhɛwo ato aɖe woƒe lɔlɔ̃ na Yehowa kple tete ɖe eŋu kplikplikpli afia le.—Nyagblɔla 12:1.

Sidzedze kple gɔmesese hã le vevie. (Filipitɔwo 1:9-11) Nɔnɔme nyui siawoe nana míeyia edzi sẽa ŋu le gbɔgbɔ me. Ðokuisinusɔsrɔ̃ edziedzi hiã be míaƒo asa na gbɔgbɔmegbɔdzɔgbɔdzɔ si ana míaƒe dzonɔameme kple tamesusuwo nu nafa. Le nyateƒe me la, mele be sidzedze nasu mía si ko o ke boŋ ele be wòawɔ dɔ ɖe míaƒe dzi dzi hã. (Lododowo 2:2) Eyata míehiã gbedodoɖa kple ŋugbledeɣiwo hã tsɔ kpe ɖe ɖokuisinusɔsrɔ̃ ŋu ale be sidzedze si sua mía si la nage ɖe míaƒe dzi me. Ekema ne míaƒe nɔnɔme ɖe mɔ la míadi be míawɔ mɔɖeɖedɔa.—Tsɔe sɔ kple Ezra 7:10.

Mɔɖeɖedɔa wɔwɔ hiã ɖokuitsɔtsɔsavɔ hã. Sɔhɛ aɖe si ŋkɔe nye Ron wɔ eƒe ɖoɖowo katã ɖe mɔɖeɖedɔa wɔwɔ ŋu. Enɔ nɔnɔme nyuitɔ lalam ale be wòate ŋu adze egɔme. Nusi koŋ dim wòlee nye dɔ si ana wòate ŋu awɔ mɔɖeɖedɔa eye wòagana wòakpɔ kesinɔnuwo le agbe me le ɣeyiɣi ma ke me. Esi wògblɔ esia na nɔvinyɔnu tsitsi aɖe la, eƒe ŋuɖoɖo do voɖi nɛ. Nɔvinyɔnua gblɔ be: “Nuwɔnawoe Yehowa yrana ke menye ŋugbedodowo o.” Ŋutsuvia kpɔ dɔ si ƒe fetu mesɔ gbɔ o si na wòte ŋu kpɔ ɣeyiɣi wɔ mɔɖeɖedɔa. Mateo 6:25-34 ƒe nyawo tsɔtsɔ awɔ dɔe akpe ɖe ame ŋu wòawɔ fetu sue ŋudɔ nyuie.

Lɔlɔ̃ faa awɔ aɖaŋuɖoɖowo ŋudɔ hã akpe ɖe mía ŋu míage ɖe mɔɖeɖedɔa me. Hanna tu mɔɖeɖedɔa wɔwɔ ƒe dzodzro ɖo le eƒe Kristotɔ ƒe agbenɔnɔ ƒe gɔmedzedze. Gake mete ŋu wɔ mɔɖeɖedɔa o le esi wònɔ ƒome dzi kpɔm eye emegbe wòva nɔ asi tsam ta. Eɖo to hamemegã siwo le ŋudzɔ la ƒe aɖaŋuɖoɖo eye wòdzudzɔ eƒe ŋutilãmedɔ nyuia wɔwɔ hedze mɔɖeɖedɔa wɔwɔ gɔme. Fifia Hanna le dzidzɔ geɖe kpɔm le kpekpe ɖe ame bubuwo ŋu be woaɖe adzɔgbe kple kpekpe ɖe gbɔdzɔgbɔdzɔtɔwo ŋu me.

Akpedada ɖe nusi nyateƒea wɔ le ame ƒe agbe me ta hã ate ŋu anye nusi aʋa mí be míawɔ mɔɖeɖedɔa. De ŋugble le nyɔnu aɖe si lé blanui vevie si ƒe srɔ̃ɖeɖe nɔ gbagbãm la ŋu kpɔ. Nɔnɔme sia trɔ nukutɔe esime wòsrɔ̃ Mawu ƒe Nya la me nyateƒenyawo eye wòtsɔe wɔ dɔ. Le dzidzɔ si wòkpɔ le nusi nyateƒea wɔ nɛ me ta la, etso nya me be mɔ nyuitɔ si dzi yeaɖe yeƒe ŋudzedzekpɔkpɔ afia le lae nye be yeawɔ mɔɖeɖedɔa akpe ɖe ame bubuwo ŋu. Ewɔ esia eye fifia ele Biblia-nusɔsrɔ̃wo kple ƒomegbenɔnɔ si me dzidzɔ le ƒe yayra geɖe kpɔm.

Ame Bubuwo Ate Ŋu Ana Kpekpeɖeŋu

Mɔɖelawo wɔa ame bubuwo mɔɖelawoe. Ƒe adee Rado si ŋu míeƒo nu tsoe va yi la xɔ esime mɔɖela eve srɔ̃ Biblia kple edzilawo. Esime Rado nye ɖevi la ewɔ ɖeka kple ɣeyiɣiawo katã ƒe gbeƒãɖela siawo edziedzi le gbeadzisubɔsubɔdɔa me. Rado hã va zu gbesiagbe mɔɖela esime wòxɔ ƒe 17. Sɔhɛ bubu si ŋkɔe nye Arno hã nɔ Kristotɔwo ƒe aƒeme tsi gake eva gbɔdzɔ le gbɔgbɔ me. Emegbe ewɔ afɔɖeɖe be yeagakpɔ ŋusẽ le gbɔgbɔ me, eye fifia egblɔ be: “Mexɔ dzideƒo geɖe tso mɔɖelawo gbɔ. Mede ha kpli wo vevietɔ le sukumɔkekewo me eye ɣeaɖewoɣi mekpɔa gbeadzigaƒoƒo abe 60 ene le ɣleti ɖeka me. Ema wɔe be afɔɖeɖe si mawɔ age ɖe gbesiagbe mɔɖeɖedɔa [si bia gaƒoƒo 90] me la megasesẽ nam fũ o.” Ŋugbledede le aɖaŋuɖoɖo si le Korintotɔwo I, 7:29-31 si gblɔ be míagawɔ xexeame ŋudɔ bliboe o la kpe ɖe sɔhɛ siawo tɔgbe ŋu vavã.

Mɔɖeɖedɔa ƒe gbɔgbɔ ate ŋu anɔ aƒe si me wotsɔa gbɔgbɔmenuwo ɖoa nɔƒe gbãtɔ eye dzilawo dea dzi ƒo na wo viwo be woage ɖe ɣeyiɣiawo katã ƒe subɔsubɔdɔa me le la me. Philo si tsi le aƒe sia tɔgbe me la gblɔ be: “Ame geɖe ɖo aɖaŋu nam be mayi nye sukudede dzi be makpɔ dzidzedze le etsɔ me. Gake dzinyelawo kpe ɖe ŋunye mewɔ tiatia si me nunya le wu. Wogblɔ nam be ne medi be madzra ɖo ɖe etsɔ me ŋu la, ke nu gbãtɔ si wòle be mawɔe nye be matu ƒomedodo kple Yehowa ɖo.”

Nyɔnuvi aɖe si ŋkɔe nye Thamar hã gblɔ be ye dzilawo ƒe kpɔɖeŋu kple agbagbadzedzewoe na yewɔ mɔɖeɖedɔa. Egblɔ be: “Nyemate ŋu agblɔ ɣeyiɣi si me metu gbɔgbɔmegbenɔnɔ ƒe nukpɔsusu ɖo o gake menya be menye ɖe wotsɔe dzim o. Dzinyelawo ƒe gomekpɔkpɔ le gbeadzisubɔsubɔdɔa kple kpekpewo yiyi me edziedzi, kple woƒe lɔlɔ̃ deto na nyateƒea kpe ɖe ŋunye geɖe le nye gbɔgbɔmemenyenye tutuɖo me.”

Wɔwɔ Ðe Wò Nyametsotso Dzi

Ne ame ge ɖe mɔɖeɖedɔa me la, veviedodo nana wòkpɔa viɖe le nyametsotso si me nunya le si wòwɔ la me. Woate ŋu aɖo aɖaŋu geɖe le akpa sia ŋu na mɔɖelawo. Le kpɔɖeŋu me, enyo be mɔɖelawo nanya alesi woawɔ ɖoɖo ɖe woƒe ɣeyiɣi ŋu be viɖe nanɔ eŋu alesi woate ŋui. Gake nu vevitɔe nye kadodo si anɔ amea kple Yehowa kple Eƒe habɔbɔa dome.

Nusi do ƒome kple esiae nye gbedodoɖa. Cor gblɔ be: “Esime meva nyateƒea me la, medi vevie ŋutɔ be mawɔ mɔɖeɖedɔa.” Gake fofoa gblɔ be wòawu nusɔsrɔ̃ aɖe nu le Agbledede Ŋuti Yunivɛsiti hafi. Emegbe la, Cor dze mɔɖeɖedɔa gɔme. Eteƒe medidi o eva ɖe srɔ̃ eye srɔ̃a wɔ ɖeka kplii le mɔɖeɖedɔa me. Esime nyɔnua fɔ fu la eva nɔ nɛ be wòaɖe asi le mɔɖeɖedɔa ŋu. Cor gblɔ be: “Medo gbe ɖa na Yehowa edziedzi eye metsɔ nye dzimedidi be mayi mɔɖeɖedɔa dzi ɖo eƒe ŋkume. Mlɔeba Cor va kpɔ dɔ si na wòte ŋu wɔ mɔɖeɖedɔa eye wòganɔ ƒome dzi kpɔm.

Ŋudzedzekpɔkpɔ ɖe ŋutilãmenu siwo le mía si ŋu hã nye nu vevi si kpena ɖe ame ŋu zi geɖe be wòakpɔtɔ anɔ mɔɖeɖedɔa me. Apostolo Paulo ŋlɔ bena: “Mina miaƒe susu navo tso galɔlɔ̃ me, eye nusiwo le mia si la, nadze mia ŋu; elabena eya ŋutɔ gblɔ be: ‘Nyemele asi ɖe ge le mia ŋu o, eye nyemele mia gblẽ ge ɖi akpɔ o.’” (Hebritɔwo 13:5) Ŋudzedzekpɔkpɔ ɖe nusiwo le ame si ŋu kpe ɖe Harry kple Irene ŋu woyi mɔɖeɖedɔa wɔwɔ dzi. Irene si nye ŋkunɔ la wɔ mɔɖeɖedɔa ƒe enyi sɔŋ. Egblɔ be: “Míebu míaƒe ganya ƒe nɔnɔme be enye kuxi kpɔ o. Ðeko míenɔ ŋudzɔ be míagada agba ɖe mía ɖokui dzi le ganya gome o. Míebu nusianu si míatsɔ ga awɔ ŋu ɣesiaɣi hafi wɔnɛ. Míenɔ agbe bɔbɔe si nye dzidzeme na mí ɣesiaɣi eye míekpɔ yayra geɖe le eme.

Dzidzɔ Kple Yayra Geɖe Le Eme

Esi Thamar trɔ kpɔ ƒe asieke ƒe mɔɖeɖedɔ si wòwɔ la, egblɔ be: “Àva te ɖe Yehowa ŋu kplikplikpli abe ɖe wòlé wò alɔnu ene.” (Psalmo 73:23) Tetekpɔ aɖewo hã vaa susu me na ame. Thamar gblɔ be: “Nye ŋutɔ kple ame bubuwo ƒe blibomademade ɖea fu nam edziedzi. Gawu la, mebua tame le nɔviŋutsu kple nɔvinyɔnu siwo wɔa dɔ siwo nana wokpɔa ŋutilãmenu geɖe la ŋu eye woƒe tiatia si wowɔ le agbe me la dzroam ne mele zɔzɔm tso aƒeme yi aƒeme le tsidzadza kple vuvɔ me. Gake le nye dzime ŋutɔŋutɔ la, nyemadi be madzudzɔ mɔɖeɖedɔa agava wɔ ŋutilãmedɔ o. Dɔ kae agate ŋu ahe dzidzɔ, gbɔgbɔmedzidzeme, kple yayra siawo vɛ na ame wu mɔɖeɖedɔa?” Ðe nàde asixɔxɔ dzidzɔ kple yayra siawo tɔgbe ŋua?

Esi mɔɖelawo zãa ɣeyiɣi geɖe le Kristotɔwo ƒe subɔsubɔdɔa me ta la, wote ŋu kpena ɖe ame geɖe ŋu wokpɔa Biblia me nyateƒea ŋuti sidzedze. Harry kple Irene siwo ŋu míeƒo nu le va yi la gblɔ be: “Mɔnukpɔkpɔ geɖe li si ate ŋu asu ame si le Yehowa ƒe habɔbɔa me, gake kpekpe ɖe ɖetsɔlemetɔ ŋu be wòayi ŋgɔ ava zu Yehowa ƒe subɔlae ƒo wo katã ta.”

Mɔɖela bubu gblɔe nyuie be: “Lododowo 10:22 ƒe nyawo nye nyateƒe le gonyeme esi gblɔ be: “Yehowa ƒe yayra wɔa ame kesinɔtɔ agbagba madzemadzee.” Mawunyakpukpui sia va eme nam zi geɖe le ƒe siwo metsɔ subɔ Yehowa me.”

Dzilawo, ɖe miele mɔɖeɖedɔa ƒe didi ƒãm ɖe mia viwo mea? Mɔɖelawo, ɖe miele agbagba dzem be mianyɔ didi sia ɖe ame bubuwo mea? Hamemegãwo, ɖe miedoa alɔ mɔɖelawo le miaƒe hamea me eye mienaa kpekpeɖeŋu le mɔɖeɖedɔ ƒe gbɔgbɔ tutu ɖo ɖe ame bubuwo mea? Yehowa ƒe amewo dometɔ geɖe wu nati yayra gbogbo siawo tɔgbe yome esime wole gome kpɔm le mɔɖeɖedɔa me.