Nyabiabia Siwo tso Exlẽlawo Gbɔ

Ðe míate ŋu agblɔ be gɔmesese yeye si va le nya “dzidzime” si le Mateo 24:34 ŋu la na míate ŋu asusui be nuɖoanyi sia ƒe nuwuwu atsi megbe ava le keke etsɔme ʋĩ kea?

Nya la mele nenema kura o. Ðe wòle be gɔmesese si woɖɔ ɖo nyitsɔ le nya sia ŋu la nakpe ɖe mía ŋu míanɔ mɔ kpɔm na nuwuwua ɣesiaɣi boŋ. Alekee?

Enyo, abe alesi November 1, 1995, ƒe Gbetakpɔxɔ gblɔe ene la, Yesu zã nyagbɔgblɔ “dzidzime sia” ɖe eŋɔlimetɔ vɔ̃ɖiwo ŋu. (Mateo 11:7, 16-19; 12:39, 45; 17:14-17; Dɔwɔwɔwo 2:5, 6, 14, 40) Menye nyagbɔgblɔ si ku ɖe ɣeyiɣi ƒe didime ɖoɖi aɖe si dze egɔme tso ɣeyiɣi aɖe koŋ dzie o.

Le nyateƒe me la, “Nyabiabia Siwo Tso Exlẽlawo Gbɔ” si nɔ Gbetakpɔxɔ ma ke me la tɔ asi nu vevi eve dzi: “Womate ŋu abu amewo ƒe dzidzime be enye ƒe xexlẽme ɖoɖi aɖe o” kple, “Ne wotsɔe sɔ kple ɣeyiɣi bubuwo la, ɣeyiɣi kpui aɖe koe dzidzime ɖeka me tɔwo nɔa anyi.”

Mɔ sia nue míezãa “dzidzime” le zi geɖe. Le kpɔɖeŋu me, míate ŋu agblɔ be: ‘Asrafo siwo nɔ anyi le Napoléon ƒe dzidzimea me la menya naneke le yameʋuwo kple atɔm bɔmbwo ŋu o.’ Asrafo siwo wodzi le ƒe si tututu me wodzi Napoléon koe míewɔnɛa? Franse-srafo siwo ku do ŋgɔ na Napoléon ŋu dzro koe míele nu ƒom lea? Gbeɖe; eye ne míezã nya “dzidzime” nenema la, menye ɖe míedi be míatɔ asi ƒe ɖoɖi aɖewo dzi o. Gake ne míetsɔe sɔ kple ƒe bubuwo la, ɣeyiɣi si le kpuie wue míanɔ asi fiamee, menye ƒe alafa aɖewo siwo tso Napoléon ŋɔli heyi etsɔme ye o.

Nenema ke wòle be míase nya si Yesu gblɔ le eƒe Amito dzi nyagblɔɖia me la gɔmee. Nyagblɔɖia ƒe akpa vovovowo ƒe emevava ɖo kpe edzi be nuɖoanyi sia ƒe nuwuwu ɖo vɔ. (Mateo 24:32, 33) Ðo ŋku edzi be Nyaɖeɖefia 12:9, 10 gblɔ be esi woɖo Mawu ƒe dziƒo Fiaɖuƒea anyi le ƒe 1914 me ko la, wotsɔ Satana ƒu gbe ɖe anyigba dzi nutowo me. Nyaɖeɖefia gblɔ kpee be dzi le Satana kum ŋutɔ. Nukatae? Elabena enyae be, “vovoɣi vi aɖe ko yekpɔ.”—Nyaɖeɖefia 12:12.

Eyata esɔ be tanya sue sia nɔ November 1 ƒe Gbetakpɔxɔ la me be: “Minɔ Ŋudzɔ!” Memamã si kplɔe ɖo gblɔe wòsɔ be: “Ɣeyiɣi si me nudzɔdzɔawo ava eme la ŋutɔŋutɔ nyanya mehiã mí o. Ele be míaƒe susu nanɔ ŋudzɔnɔnɔ boŋ ŋu, míanɔ ŋusẽ dom míaƒe xɔse, eye míaƒe ŋku nabiã ɖe Yehowa ƒe subɔsubɔdɔa wɔwɔ ŋu—menye ɖe ɣletiŋkeke aɖe bubu ŋu o.” Emegbe eyɔ Yesu ƒe nyawo be: “Mikpɔ nyuie, eye minɔ ŋudzɔ; elabena mienya ɣekaɣi azãgbe la le edzi su ge o. Nusi gblɔm mele na mi la, mele egblɔm na amewo katã bena: Minɔ ŋudzɔ!”—Marko 13:33, 37.