Yehowa ƒe Ŋkekea Nenɔ Susu me na Wò Vevie
“Le ŋkeke mamlɛawo dzi la fewuɖulawo lava.”—PETRO II, 3:3.
1. Hiahiã kpata ƒe nukpɔsusu kae le egbegbe Kristotɔ aɖe si?
ƔEYIƔIAWO katã ƒe subɔla aɖe si wɔ dɔ sia wu ƒe 66 enye sia la ŋlɔ be: “Mesena alesi nuwɔwɔ kpata hiãe le ɖokuinye me ɣesiaɣi. Ɣeawokatãɣi mebunɛ abe etsɔe Harmagedon ava ene. (Nyaɖeɖefia 16:14, 16) Abe fofonye kple eya hã fofoa ene la, menɔ agbe abe alesi apostolo [Petro] xlɔ̃ nui ene, eye ‘menaa Yehowa ƒe ŋkeke la ƒe vava nɔa susu me nam vevie.’ Ɣesiaɣi mebua xexeme yeye si ƒe ŋugbe wodo la be enye ‘nu ŋutɔŋutɔ togbɔ be míekpɔe haɖe o hã.’ ”—Petro II, 3:11, 12; Hebritɔwo 11:1; Yesaya 11:6-9; Nyaɖeɖefia 21:3, 4.
2. Nukae wòfia be Yehowa ƒe ŋkekea nanɔ susu me na ame vevie?
2 Petro ƒe nyagbɔgblɔ si nye be Yehowa ƒe ŋkekea ‘nenɔ susu me na mí vevie’ fia be míagabui be ele didiƒe o. Mele be míaŋlɔe be o be ŋkeke si dzi Yehowa atsrɔ̃ nuɖoanyi sia atsɔ adzra mɔ dzi ɖo na xexeme yeye si ƒe ŋugbe wòdo la tu aƒe ŋutɔ. Ele be wòanye nu ŋutɔŋutɔ na mí ale gbegbe be míate ŋu akpɔe kɔte, abe nane si le mía ŋgɔ tututu ene. Nenemae Mawu ƒe blema nyagblɔɖilawo bui nu ŋutɔŋutɔe, eye zi geɖe la, wogblɔ be egogo.—Yesaya 13:6; Yoel 1:15; 2:1; Obadya 15; Zefanya 1:7, 14.
3. Edze abe anye nukae ʋã Petro wòxlɔ̃ nu tso Yehowa ƒe ŋkekea ŋu ene?
3 Nukatae Petro xlɔ̃ nu mí be míabu Yehowa ƒe ŋkekea abe “etsɔ ɖeka koe” wògbɔna ene? Elabena edze abe ɖe ame aɖewo va nɔ fewu ɖum le Kristo ƒe anyinɔnɔ si ŋugbe wòdo si me woahe to na nugbegblẽwɔlawo le ƒe vava ŋu ene. (Petro II, 3:3, 4) Eyata Petro ɖo nya siwo fewuɖulawo fɔ ɖe te ŋu le eƒe agbalẽ evelia ƒe ta 3 lia si me míadzro me.
Nuxɔxlɔ̃ Lɔlɔ̃tɔe be Woaɖo Ŋku Nu Dzi
4. Nuka dzie Petro di be míaɖo ŋkui?
4 Alesi Petro lɔ̃ nɔviawo vevie la dze le alesi wòyɔ wo edziedzii le ta sia me be “lɔlɔ̃tɔwo” me. Esi Petro nɔ nu xlɔ̃m wo lɔlɔ̃tɔe be woaɖo ŋku nusiwo wofia wo dzi la, edze egɔme be: “Lɔlɔ̃tɔwo, . . . metsɔ ŋkuɖoɖonudzi nyɔ miaƒe tamesusu, si me kɔ la . . . bene miaɖo ŋku nya, siwo nyagblɔɖila kɔkɔeawo gblɔ ɖi tsã la, kple Aƒetɔ kple xɔla ƒe se, si wòde to miaƒe apostolowo dzi la dzi.”—Petro II, 3:1, 2, 8, 14, 17; Yuda 17.
5. Nukae nyagblɔɖila aɖewo gblɔ le Yehowa ƒe ŋkekea ŋu?
5 “Nya, siwo nyagblɔɖila kɔkɔeawo gblɔ ɖi tsã” kawo dzie Petro le dzi dem ƒo na eƒe agbalẽa xlẽlawo be woaɖo ŋkui? Woawoe nye esiwo ku ɖe Kristo ƒe anyinɔnɔ le Fiaɖuƒeŋusẽ me kple ʋɔnudɔdrɔ̃ mawumavɔ̃lawo ŋuti. Petro he woƒe susu yi nya siawo dzi do ŋgɔ. (Petro II, 1:16-19; 2:3-10) Yuda ƒo nu tso Henox, ame gbãtɔ si ŋu nuŋlɔɖi le be enye nyagblɔɖila si ƒo nu tso Mawu ƒe fɔbubuʋɔnudɔdrɔ̃ ame vlowo ŋu la ŋuti. (Yuda 14, 15) Nyagblɔɖila bubuwo kplɔ Henox ɖo, eye Petro medi be míaŋlɔ nusi woŋlɔ la be o.—Yesaya 66:15, 16; Zefanya 1:15-18; Zaxarya 14:6-9.
6. Kristo kple eƒe apostoloawo ƒe nyagbɔgblɔ kawoe kɔ nu me na mí le Yehowa ƒe ŋkekea ŋu?
6 Hekpe ɖe eŋu la, Petro gblɔ na eƒe agbalẽa xlẽlawo be woaɖo ŋku “Aƒetɔ kple xɔla ƒe se, si wòde” dzi. Yesu ƒe sededea ƒe ɖee nye nuxlɔ̃amenya si gblɔ be: “Mikpɔ mia ɖokui dzi nyuie, bena . . . miaƒe dzi [nagate] ɖe to o, eye ŋkeke ma nagalili mi abe mɔ̃ ene o.” “Mikpɔ nyuie, eye minɔ ŋudzɔ; elabena mienya ɣekaɣi azãgbe la le edzi su ge o.” (Luka 21:34-36; Marko 13:33) Petro gaxlɔ̃ nu mí be míase apostoloawo ƒe nyawo hã. Le kpɔɖeŋu me, apostolo Paulo ŋlɔ be: “Aƒetɔ ƒe ŋkeke la gbɔna, abe alesi fiafitɔ vana le zã me ene. Eyata azɔ migana míanɔ alɔ̃ dɔm abe ame bubuwo ene o, ke boŋ mina míanɔ ŋudzɔ, eye míanɔ mo xexi.”—Tesalonikatɔwo I, 5:2, 6.
Fewuɖulawo ƒe Nudzodzrowo
7, 8. (a) Amekawo ƒomevie ɖua fewu le Mawu ƒe nuxlɔ̃amegbedasiwo ŋu? (b) Nukae fewuɖulawo gblɔna?
7 Abe alesi míegblɔe va yi ene la, nusitae Petro le nuxlɔ̃amenya sia gblɔm enye be ame aɖewo va nɔ fewu ɖum le nuxlɔ̃ame mawo ŋu, abe alesi Israel-vi siwo nɔ anyi le blema ɖe alɔme le Yehowa ƒe nyagblɔɖilawo ŋui ene. (Kronika II, 36:16) Petro ɖe eme be: “Minya esia gbã bena, le ŋkeke mamlɛawo dzi la fewuɖulawo lava kple fewuɖuɖu, amesiwo zɔna le woawo ŋutɔwo ƒe nudzodzrowo nu.” (Petro II, 3:3) Yuda gblɔ be ‘mawumavɔ̃mavɔ̃nuwoe’ fewuɖula siawo dina. Eyɔ wo be “dzɔdzɔmeme, siwo me gbɔgbɔ mele o.”—Yuda 17-19.
8 Anɔ eme be aʋatsonufiala siwo ŋu Petro gblɔ le be ‘wozɔna le ŋutilã nu le makɔmakɔnyenye ƒe nudzodzro me’ la le amesiawo siwo si gbɔgbɔmemenyenye mele o dome. (Petro II, 2:1, 10, 14) Wobiaa Kristotɔ wɔnuteƒewo fewuɖuɖutɔe be: “Afika eƒe vava la ƒe ŋugbedodo la le? Elabena tso esime fofoawo dɔ alɔ̃ la, nuwo katã nɔ anyi nenema tso nuwɔwɔ ƒe gɔmedzedze la me.”—Petro II, 3:4.
9. (a) Nukatae fewuɖulawo dzea agbagba be yewoafa lãme na amewo le nuwɔwɔ kpata si dze le Mawu ƒe Nya la katã me ŋu? (b) Aleke Yehowa ƒe ŋkekea ƒe susu me nɔnɔ na mí vevie nye takpɔkpɔ na míi?
9 Nukata woɖua fewu le wo ŋu? Nukatae woagblɔ be ɖewohĩ Kristo ƒe anyinɔnɔ la mava gbeɖe o, be Mawu mede nu amegbetɔ ƒe nyawo me kpɔ o eye mele nu de ge eme hã akpɔ o? Esi wotrɔ tsi ɖe nuwɔwɔ kpata si dze le Mawu ƒe Nya la katã me dzi la, dzɔdzɔmeme fewuɖula siawo dina be yewoafa lãme na ame bubuwo be womagatsɔ ɖeke le gbɔgbɔmenuwo me o ale be woazu amesiwo yewoate ŋu able bɔbɔe ade yewoƒe ɖokuitɔdidinuwɔnawo me. Aleke esia de dzi ƒo na mí vevie egbea be míanɔ ŋudzɔ le gbɔgbɔ me ɣesiaɣi enye si! Mina Yehowa ƒe ŋkekea nenɔ susu me na mí vevie eye míaɖo ŋku edzi ɣesiaɣi be eƒe ŋku le mía ŋu! Esia wɔwɔ aʋã mí be míatsɔ dzonɔameme asubɔ Yehowae eye míanɔ agbe dzadzɛ ɣeawokatãɣi.—Psalmo 11:4; Yesaya 29:15; Xezekiel 8:12; 12:27; Zefanya 1:12.
Ðe Woɖonɛ Wɔna eye Woƒe Nuwɔna Nyɔ Ŋu
10. Aleke Petro ɖee fiae be aʋatsoe fewuɖulawo ka?
10 Fewuɖula mawo ƒe susu menɔa nudzɔdzɔ vevi aɖe dzi o. Woawo ŋutɔwoe ɖonɛ ɖenɛ le susu me eye wodzea agbagba be yewoana ame bubuwo hã naɖee le susu me. Nukatae? Bene wo beble nanɔ bɔbɔe na wo. Petro ŋlɔe be: “Elabena ɖe woɣlae ɖe wo, esi wole edim nenema.” Nukae ɣla ɖe wo? “Bena dziƒowo li tso blema ke, eye anyigba hã li hedo tso tsi me, eye wòto tsi me le Mawu ƒe nya nu; nusiawo na tsiɖɔɖɔ yɔ xexe kema me, eye wòtsrɔ̃.” (Petro II, 3:5, 6, míawoe te gbe ɖe edzi.) Ẽ, Mawu ɖe vɔ̃ɖinyenye ɖa le Noa ƒe ŋkekea me Tsiɖɔɖɔa me, si nye nyateƒenya si dzi Yesu hã te gbe ɖo. (Mateo 24:37-39; Luka 17:26, 27; Petro II, 2:5) Eyata nuwo katã menɔ anyi “nenema tso nuwɔwɔ ƒe gɔmedzedze la me” o, si to vovo na nusi fewuɖulawo gblɔna.
11. Kristotɔ gbãtɔwo ƒe mɔkpɔkpɔ na nuwo do ŋgɔ na ɣeyiɣia ƒe dede kae na woɖu fewu le wo ŋu?
11 Fewuɖulawo ate ŋu aɖe alɔme le Kristotɔ nuteƒewɔlawo ŋu le esi woƒe mɔkpɔkpɔwo meva eme haɖe o ta. Ɣeyiɣi kpui aɖe do ŋgɔ na Yesu ƒe ku la, eƒe nusrɔ̃lawo “bu xa bena, mawufiaɖuƒe la le dodo ge enumake.” Eye le eƒe tsitretsitsi megbe la, wobia be ɖe wòle Fiaɖuƒea ɖo ge anyi enumake hã. Tsɔ kpe ɖe eŋu la, ƒe ewo hafi Petro naŋlɔ eƒe agbalẽ evelia la, ‘numenya’ alo ‘agbalẽ aɖe’ si wòwɔ abe apostolo Paulo alo eƒe zɔhɛwo gbɔe wotso ene la ‘ʋuʋu’ ame aɖewo wosusu be ‘Yehowa ƒe ŋkeke la ɖo vɔ.’ (Luka 19:11; Tesalonikatɔwo II, 2:2; Dɔwɔwɔwo 1:6) Gake menye aʋatsoe Yesu ƒe nusrɔ̃lawo ƒe mɔkpɔkpɔ mawo nye o, ɖeko wobu eƒe vava wòdo ŋgɔ na eƒe ɣeyiɣi. Yehowa ƒe ŋkekea le vava ge godoo!
Kakaɖedzi Le Mawu ƒe Nya la Ŋu
12. Aleke Mawu ƒe Nya la na kakaɖedzi le ‘Yehowa ƒe ŋkekea’ ŋuti nyagblɔɖiwo ŋui?
12 Abe alesi míegblɔe va yi ene la, nyagblɔɖila siwo nɔ anyi do ŋgɔ na Kristotɔwo ŋɔli xlɔ̃ nu be Yehowa ƒe hlɔ̃biabia la gogo. ‘Yehowa ƒe ŋkekea’ ƒe kpɔɖeŋu sue aɖe va le ƒe 607 D.M.Ŋ. me esime Yehowa bia hlɔ̃ eƒe dukɔ mawɔsedzi la. (Zefanya 1:14-18) Emegbe ‘Yehowa ƒe ŋkekea’ ƒe kpɔɖeŋu sia tɔgbe va dukɔ bubuwo, siwo ƒe ɖewoe nye Babilon kple Egipte hã dzi. (Yesaya 13:6-9; Yeremya 46:1-10; Obadya 15) Wogblɔ ƒe alafa gbãtɔ me Yudatɔwo ƒe nuɖoanyia ƒe nuwuwu hã ɖi, eye eva eme esime Romatɔwo va wɔ Yudea aƒedoe le ƒe 70 M.Ŋ. me. (Luka 19:41-44; Petro I, 4:7) Gake ‘Yehowa ƒe ŋkeke’ si gbɔ xexeame katã ƒe Tsiɖɔɖɔa gɔ̃ hã meɖi naneke le o si gbɔna le etsɔme ƒe nya gblɔm Petro le!
13. Ŋutinya me kpɔɖeŋu kawoe fia be kakaɖedzi le nuɖoanyi sia ƒe nuwuwu ŋu?
13 Petro tsɔ nya siawo dze nuƒoƒo tso tsɔtsrɔ̃ ma si gbɔna ŋu gɔme be: “Ke wotsɔ nya ma ke.” Fifi laa koe wògblɔ be “le Mawu ƒe nya nu” anyigba si nɔ anyi do ŋgɔ na Tsiɖɔɖɔa “to tsi me.” Nɔnɔme sia si ŋu woƒo nu le le Biblia ƒe xexemewɔwɔ ŋuti nuŋlɔɖi me na be Tsiɖɔɖɔa va le Mawu ƒe mɔfiafia, alo nya, nu. Petro yi edzi be: “Wotsɔ [Mawu ƒe] nya ma ke dzra fifi dziƒo kple anyigba la ɖo, eye woda wo ɖi na dzo, vaseɖe ame mavɔ̃mawuwo ƒe ʋɔnudɔdrɔ̃ kple gbegblẽ ƒe ŋkeke la dzi.” (Petro II, 3:5-7; Mose I, 1:6-8) Enye Yehowa ƒe nya si ŋu kakaɖedzi le! Ahe “dziƒo kple anyigba”—nuɖoanyi sia—ƒe nuwuwu vɛ le eƒe dɔmedzoedoŋkeke gã la ƒe dziku helĩhelĩ me! (Zefanya 3:8) Gake ɣekaɣie anye ma?
Mɔkpɔkpɔ na Nuwuwua ƒe Vava Vevie
14. Nukatae míate ŋu aka ɖe edzi be míele “ŋkeke mamlɛawo” me fifia?
14 Yesu ƒe nusrɔ̃lawo di be yewoanya ɣeyiɣi si me nuwuwua ava, eyata wobiae be: “Ka enye wò anyinɔnɔ kple nuɖoanyiawo ƒe nuwuwu la ƒe dzesi?” Edze abe ɣeyiɣi si me Yudatɔwo ƒe nuɖoanyia ƒe nuwuwu ava biam wonɔ ene, gake ɣeyiɣi si me woatsrɔ̃ fifi ‘dziƒo kple anyigba’ ŋu koŋ ye Yesu ƒo nu le le eƒe ŋuɖoɖoa me. Yesu gblɔe ɖi be aʋa gãwo adzɔ, nuɖuɖu ƒe veve, anyigbaʋuʋuwo, dɔléle, kple nuvlowɔwɔ ava. (Mateo 24:3-14, NW; Luka 21:5-36) Tso ƒe 1914 me ke la, míekpɔ ‘nuɖoanyiawo ƒe nuwuɣi’ ƒe dzesi si Yesu gblɔ la kple nusiwo apostolo Paulo yɔ be woafia be míele “ŋkeke mamlɛawo” me hã wole eme vam. (Timoteo II, 3:1-5) Le nyateƒe me, kpeɖodzi siwo fia be míele nuɖoanyi sia ƒe nuwuɣi la li fũ!
15. Nukae Kristotɔwo dze agbagba be yewoawɔ togbɔ be Yesu xlɔ̃ nu wo gake?
15 Yehowa Ðasefowo di vevie be yewoanya ɣeyiɣi si me Yehowa ƒe ŋkekea ava. Le woƒe didi veviea me la, wodze agbagba be yewoasusu ɣeyiɣi si me wobu be ate ŋu ava la agblɔ. Gake le esia wɔwɔ me womewɔ ɖe Aƒetɔ la ƒe nuxlɔ̃amenya si gblɔ be ‘míenya ɣekaɣi azãgbe la le edzi su ge o’ la dzi o, abe Yesu ƒe nusrɔ̃la gbãtɔwo ene. (Marko 13:32, 33) Fewuɖulawo ɖe alɔme le Kristotɔ nuteƒewɔlawo ŋu ɖe nusiwo wonɔ mɔ kpɔm na do ŋgɔ na ɣeyiɣia ƒe dede ta. (Petro II, 3:3, 4) Ke hã Petro ka ɖe edzi na mí be Yehowa ƒe ŋkekea ava godoo, le Eƒe ɣeyiɣikɔntabubu nu.
Yehowa ƒe Nukpɔsusu ƒe Amesinɔnɔ Hiã
16. Nuxlɔ̃ame ka dzie nunya anɔ eme be míawɔ ɖo?
16 Ehiã be Yehowa ƒe nukpɔsusu le ɣeyiɣi ŋu nanɔ mía si, abe alesi Petro ɖo ŋku edzi na mí ene be: “Ke, lɔlɔ̃tɔwo, nu ɖeka sia naganɔ ɣaɣla ɖe mi o bena, le Mawu gbɔ la ŋkeke ɖeka le abe ƒe akpe ɖeka ene, eye ƒe akpe ɖeka hã le abe ŋkeke ɖeka ene.” Aleke míaƒe agbenɔƒe si nye ƒe 70 alo 80 le kpuie enye si ne míetsɔe sɔ kplii! (Petro II, 3:8; Psalmo 90:4, 10) Eyata ne ewɔ abe ɖe Mawu ƒe ŋugbedodowo ƒe mevava le megbe tsim ene la, ele be míaxɔ Mawu ƒe nyagblɔɖila la ƒe nuxlɔ̃ame atsɔ awɔ dɔe be: “Ne [ɣeyiɣi ɖoɖia tsi megbe] la, kpɔ esinu; elabena ele vava ge kokoko, eye mahe ɖe megbe o.”—Xabakuk 2:3, míawoe te gbe ɖe edzi.
17. Togbɔ be ŋkeke mamlɛawo nɔ anyi didi wu alesi ame geɖe nɔ mɔ kpɔm nɛ hã, nuka dzie míate ŋu aka ɖo?
17 Nukatae nuɖoanyi sia ƒe ŋkeke mamlɛawo nɔ anyi eteƒe didi wu alesi ame geɖe kpɔ mɔ nɛ? Susu nyui aɖe tae, abe alesi Petro yi edzi ɖe eme ene be: “Menye ɖe Aƒetɔ la le wɔwɔm blewu le eƒe ŋugbedodowo dziwɔwɔ me, abe alesi ame aɖewo bunɛ blewuwɔwɔ la ene o; hafi egbɔ dzi ɖi blewu na mi, esi melɔ̃ bena, ame aɖeke natsrɔ̃ o, ke boŋ bena amewo katã natrɔ va dzimetɔtrɔ gbɔ la ŋuti.” (Petro II, 3:9) Yehowa bua nusiwo ade ameƒomea katã dzi wu ŋu. Etsi dzi ɖe amewo ƒe agbe ŋu, abe alesi wògblɔe ene be: “Ame vɔ̃ɖi ƒe ku mevivia nunye o, negbe be, ame vɔ̃ɖi naɖe asi le eƒe zɔzɔme ŋu, ne wòanɔ agbe boŋ ye.” (Xezekiel 33:11) Eyata míate ŋu aka ɖe edzi be nuwuwua ava le ɣeyiɣi nyuitɔ dzi tututu si ana mía Wɔla nuwokatãnyala, lɔ̃ame la ƒe tameɖoɖo nava eme!
Nukawo Nue Ava Ayi?
18, 19. (a) Nukatae Yehowa ɖoe be yeatsrɔ̃ nuɖoanyi sia godoo? (b) Aleke Petro ƒo nu tso nuɖoanyi sia ƒe nuwuwu ŋui, eye nukawo tututue woatsrɔ̃?
18 Esi le nyateƒe me, Yehowa lɔ̃a amesiwo subɔnɛ ta la, aɖe amesiwo doa kplamatse wo ɖa keŋkeŋ. (Psalmo 37:9-11, 29) Esi Petro de dzesii alesi Paulo hã ŋlɔe do ŋgɔ ene be tsɔtsrɔ̃ sia ava lili ame ta la, eŋlɔ be: “Aƒetɔ la ƒe ŋkeke le vava ge abe fiafitɔ ene, le esime dziƒowo ava yi kple gbeɖeɖe; ke gɔmedzenuwo labi, eye woalólo le dzo me, eye anyigba kple eme dɔwɔwɔwo lafiã keŋ.” (Petro II, 3:10; Tesalonikatɔwo I, 5:2) Dziƒo kple anyigba ŋutɔŋutɔ metsrɔ̃ le Tsiɖɔɖɔa me o, eye le Yehowa ƒe ŋkekea dzi hã womafiã o. Ke nukawo ‘nue ayi,’ alo siwo woatsrɔ̃?
19 Amegbetɔwo ƒe dziɖuɖu siwo ɖu ameƒomea dzi abe “dziƒowo” ene ava woƒe nuwuwu eye nenema ke nye “anyigba,” alo mawumavɔ̃lawo ƒe habɔbɔ si li hã. “Gbeɖeɖe” ate ŋu afia alesi dziƒowo nu ava yi le ablaɖeɖe gã mee. “Gɔmedzenuwo” si nye nusiwo ƒo ƒu nye amegbetɔ ƒe habɔbɔ gblẽku la “labi,” alo woatsrɔ̃ wo. Eye “anyigba,” tsɔ kpe ɖe “eme dɔwɔwɔwo” ŋu, “lafiã keŋ.” Yehowa aklo nu le amewo ƒe nu vɔ̃ɖi wɔwɔwo dzi ne ehe xexemenuɖoanyi bliboa va eƒe nuwuwu si wòdze na ŋutɔ la.
Wò Susu Nenɔ Wò Mɔkpɔkpɔa Dzi Ðaa
20. Aleke wòle be nusiwo gbɔna dzɔdzɔ ge nyanya nakpɔ ŋusẽ ɖe míaƒe agbe dzii?
20 Esi nu wɔdɔɖeamedzi siawo gbɔna dzɔdzɔ ge kpuie ta la, Petro gblɔ be ele be míaƒo mía ɖokui ɖe “anyinɔnɔ kɔkɔe kple mawusosroɖa me, eye [míalala adi] Mawu ƒe ŋkeke la ƒe vava vevie.” Ðikeke aɖeke mate ŋu anɔ eŋu o! “Woalólo dziƒo le dzo me, eye gɔmedzenuwo hã lalólo le dzoxɔxɔ gã me”! (Petro II, 3:11, 12) Ele be nyateƒe si wònye be nu wɔdɔɖeamedzi siawo ate ŋu ate dzɔdzɔ etsɔ ko la nakpɔ ŋusẽ ɖe nusianu si míewɔna alo míaɖo be míawɔ dzi.
21. Nukae ava xɔ ɖe fifi dziƒo kple anyigba teƒe?
21 Azɔ Petro gblɔ nusi ava xɔ ɖe nuɖoanyi xoxoa teƒe na mí, esi wògblɔ be: “Ke míele dziƒo yeye kple anyigba yeye, siwo me dzɔdzɔenyenye anɔ la, lalam le eƒe ŋugbedodo la nu.” (Petro II, 3:13; Yesaya 65:17) Aa, gbɔɖeme gã kae nye si! Kristo kple eƒe hatidziɖula 144,000 la anye dziɖuɖu ƒe “dziƒo yeye” la, eye amesiwo tsi agbe le xexe sia ƒe nuwuwu anye “anyigba yeye” la.—Yohanes I, 2:17; Nyaɖeɖefia 5:9, 10; 14:1, 3.
Lé Nuwɔwɔ Kpata Kple Agbenɔnɔ Dzadzɛ Me Ðe Asi
22. (a) Nukae akpe ɖe mía ŋu be gbɔgbɔ me ɖi alo mokaka aɖeke naganɔ mía ŋu o? (b) Afɔku ka ŋue Petro ƒo nu le?
22 Petro yi edzi be: “Eyata, lɔlɔ̃tɔwo, esi miele nusiawo lalam ŋuti la, mido vevie, bena woakpɔ mi le ŋutifafa me ɖimaƒomaƒo kple mokaka manɔŋui le eƒe ŋku me, eye mibu mía Aƒetɔ ƒe dzigbɔgbɔ blewu la bena, enye mia xɔxɔ.” Ne míetsɔ mɔkpɔkpɔ vevie le Yehowa ƒe ŋkekea lalamee eye míebua nusianu si adze abe eƒe megbetsitsi ene be enye Mawu ƒe dzigbɔgbɔ blewu la, akpe ɖe mía ŋu be gbɔgbɔ me ɖi alo mokaka aɖeke manɔ mía ŋu o. Gake afɔku aɖe li! Petro na míenya be “nya aɖewo ƒe gɔmesese nye dɔ” le “mía nɔvi lɔlɔ̃tɔ Paulo” ƒe nuŋɔŋlɔwo me, “siwo ame masrɔ̃nuwo kple ame malikewo trɔna, abe alesi wowɔa ŋɔŋlɔ bubuawo hã hena woa ŋutɔwo ƒe tsɔtsrɔ̃ ƒe gbegblẽ la ene.”—Petro II, 3:14-16.
23. Aɖaŋu kae Petro ɖo tsɔ ƒo etae?
23 Edze ƒã be aʋatsonufialawo tro nusiwo Paulo ŋlɔ le Mawu ƒe amenuveve ŋu, eye wotsɔ wo do taflatse nɔ hadzegbee. Esiae anya nɔ susu me na Petro esime wòŋlɔ eƒe nuxlɔ̃amenya mamlɛa be: “Azɔ la, mi lɔlɔ̃tɔwo, esi mienya nusiawo ɖi ŋuti la, mikpɔ mia ɖokui dzi nyuie, bene ame gblẽkuwo ƒe beble nagahe mi ayii o, eye miagadze anyi atso mia ŋutɔwo miaƒe kelili la me o.” Azɔ eƒo eƒe agbalẽa ta be: “Mitsi le mía Aƒetɔ kple xɔla Yesu Kristo ƒe amenuveve kple sidzedze la me.”—Petro II, 3:17, 18.
24. Nɔnɔme kae wòle be wòanɔ Yehowa subɔlawo katã si?
24 Edze kɔte be Petro di be yeado ŋusẽ ye nɔviwo. Edi be seselelãme si nɔ Ðasefo si xɔ ƒe 82 me si ƒe nya wògblɔ míeyɔ le nyatia ƒe gɔmedzedze la nanɔ wo me be: “Menɔ agbe abe alesi apostoloa xlɔ̃ nui ene, eye ‘menaa Yehowa ƒe ŋkeke la ƒe vava nɔa susu me nam vevie.’ ” Neva eme be mí katã míanɔ agbe nenema.
Aleke Nàɖo Wo Ŋui?
◻ Nukae nana be Yehowa ƒe ŋkekea ‘nenɔ susu me na mí vevie’ fia?
◻ Nuka dzie fewuɖulawo ɖonɛ koŋ ŋea aɖaba ƒuna, eye nukatae?
◻ Nukatae fewuɖulawo ɖu fewu le Kristotɔ wɔnuteƒewo ŋu?
◻ Nukpɔsusu kae wòhiã be wòanɔ mía si ɣesiaɣi?
[Nɔnɔmetata si le axa 23]
Yehowa ƒe ŋkekea . . .
[Nɔnɔmetata si le axa 24]
. . . kple xexeme yeye si akplɔe ɖo nenɔ susu me na wò vevie