‘Zɔzɔ Le Xɔse Me, Menye Le Nukpɔkpɔ Nu O’

“Míezɔna le xɔse me, eye menye le nukpɔkpɔ me o.”—KORINTOTƆWO II, 5:7.

 1. Nukae ‘zɔzɔ le xɔse me’ fia?

ƔESIAƔI si míenya le gbe dom ɖa wòsɔ ɖe alesi wofia mɔe le Mawu ƒe Nya me nu ko la, míeɖenɛ fiana be xɔse aɖe ya teti le mía si. Ne míedze ɖaseɖiɖi na amewo le Mawu ƒe Fiaɖuƒea ŋu gɔme la, míegaɖea xɔse fiana. Eye ne míetsɔ míaƒe agbe ɖe adzɔgbe na Yehowa la, míele eɖem fia be enye míaƒe didi be ‘míazɔ le xɔse me,’ si fia be, míanɔ agbe si dzi xɔse kpɔ ŋusẽ ɖo.—Korintotɔwo II, 5:7; Kolosetɔwo 1:9, 10.

 2. Nukatae gomekpɔkpɔ le hamea me dɔwo me ɖeɖe mefia kokoko be xɔse le ame si o?

² Ne míanɔ agbe le mɔ sia nu vavã la, ke ele be xɔse si wotu ɖe gɔmeɖokpe vavã dzi nanɔ mía si. (Hebritɔwo 11:1, 6) Agbe nyui deŋgɔ si Yehowa Ðasefowo nɔna kple lɔlɔ̃ si Ðasefowo ɖena fiaa wo nɔewo lae hea ame geɖewo ɖe wo ŋu. Gɔmedzedze nyui aɖee nye ma, gake esia mefia be xɔse le amesiawo si o. Ðewohĩ ame bubuwo srɔ̃ alo wo dzila aɖe sẽ ŋu le xɔse me, eye ɖewohĩ woawo hã kpɔa gome le dɔwɔna siwo woƒe lɔlɔ̃tɔa wɔna la dometɔ aɖewo me. Yayrae wònye be ŋusẽkpɔɖeamedzinu sia nanɔ ame ƒeme, gake esia hã mexɔ ɖe ame ŋutɔ ƒe lɔlɔ̃ na Mawu kple xɔse si anɔ amea ŋutɔ si teƒe o.—Luka 10:27, 28.

 3. (a) Bene xɔse si gɔmeɖoanyi sesẽ li na nanɔ mía si la, kakaɖedzi kae wòle be wòanɔ mía ŋutɔwo si le Biblia ŋu? (b) Nukata ame aɖewo te ŋu kana ɖe edzi kaba be Biblia tso gbɔgbɔ me wu ame bubuwo?

³ Amesiwo zɔna le xɔse me vavã la ka ɖe edzi bliboe be Mawu ƒe Nyae Biblia nye. Ðaseɖiɖi gbogbo aɖe le mía si si fia be le nyateƒe me la, Ŋɔŋlɔ Kɔkɔeawo “tso Mawu ƒe gbɔgbɔ me.”a (Timoteo II, 3:16) Ðaseɖiɖi sia ƒe agbɔsɔsɔme kae hiã hafi ame naxɔ edzi ase? Ðewohĩ ema anɔ te ɖe eƒe agbe me nuteƒekpɔkpɔ dzi. Nusi ana ame aɖe naka ɖe nane dzi bliboe la matsɔ fu lãme na ame bubu ya o. Le go aɖewo me la, togbɔ be ame akpɔ ɖaseɖiɖi gbogbo siwo mate ŋu ake ɖii o hã la, agbe nyataƒoƒo si me susu le la kokoko. Nukatae? Nusiwo ɣla ɖe eƒe dzi ƒe gogloeƒe si ʋãnɛ tae. (Yeremya 17:9) Eyata togbɔ be ame aɖe agblɔ be yekpɔ dzidzɔ ɖe Mawu ƒe tameɖoɖo ŋu hã la, eƒe dzi aku ɖe xexeametɔwo ƒe ŋudzedzekpɔɖeameŋu ŋuti. Madi be yeaɖe asi le agbenɔnɔ aɖe si ŋu Biblia me dzidzenuwo tsi tre ɖo ŋu o. Gake ne nyateƒea ƒe dɔ le ame wum vavã, ne alɔ̃ aɖi anukware na eɖokui, eye ne ebɔbɔa eɖokui la, ava nya le ɣeyiɣi aɖe megbe be Mawu ƒe Nyae Biblia nye vavã.

 4. Nukae wòle be ame nawɔ hafi xɔse nasu esi?

⁴ Zi geɖe le ɣleti ʋee aɖewo ko megbe la, amesiwo ŋu wole kpekpem ɖo be woasrɔ̃ Biblia kpɔnɛ dzea sii kaba be yewokpɔ susu geɖe siwo ta yewoaxɔ edzi ase be enye Mawu ƒe Nya. Ne nusia ʋãa wo woʋua woƒe dzi faa be Yehowa nafia nu yewo la, ke nusiwo wosrɔ̃na la atrɔ woƒe dzimesusu, woƒe didiwo, kple nusiwo ʋãa wo la vivivi. (Psalmo 143:10) Romatɔwo 10:10 gblɔ be ‘dzie’ wotsɔna xɔa nu dzi sena. Xɔse ma ɖea alesi tututu amea sena le eɖokui me ke fiana, eye adze kɔte hã le eƒe agbenɔnɔ me.

Noa Wɔ Nu le Xɔse Like Me

 5, 6. Nuka dzie Noa ƒe xɔse nɔ te ɖo?

⁵ Noa nye ame aɖe si si xɔse like nɔ. (Hebritɔwo 11:7) Nukatae xɔse ma tɔgbe nɔ esi? Mawu ƒe nya, menye esi woŋlɔ ɖe agbalẽ me o, ke boŋ esi wogblɔ nɛ tẽ ye nɔ Noa si. Mose I, 6:13 gblɔ be: “Mawu gblɔ na Noa bena: Ŋutilãwo katã ƒe nuwuwu ɖo azɔ, elabena woƒe nu vlo wɔwɔ xɔ anyigba la dzi.” (Míawoe te gbe ɖe edzi.) Yehowa de se na Noa be wòakpa aɖakaʋu, eye wòna ekpakpa ŋuti mɔfiafia detowoe. Mawu gagblɔ nɛ be: “Nye la mana tsi naɖe anyigba la, bena ŋutilã, siwo katã le dziƒoa te, esiwo me agbegbɔgbɔ le la, natsrɔ̃, eye anyigba dzi nuwo katã naku.”—Mose I, 6:14-17.

⁶ Ðe tsi dza kpɔ do ŋgɔ na esia? Biblia megblɔe o. Mose I, 2:5 gblɔ be: “Yehowa Mawu mena tsi dza ɖe anyigba dzi haɖe o.” Gake aleae Mose, amesi va nɔ agbe ƒe alafa geɖe megbe gblɔ nya lae esime wònɔ nu ƒom le ɣeyiɣi didi aɖe si do ŋgɔ na Noa ƒe ŋkekea ŋu. Abe alesi wòdze le Mose I, 7:4 ene la, Yehowa gblɔ tsidzadza ƒe nya esi wònɔ nu ƒom na Noa, eye edze ƒã be Noa se nusi gblɔm wònɔ la gɔme. Gake menye nusi Noa ate ŋu akpɔ dzie wòxɔ se o. Apostolo Paulo ŋlɔ bena Noa xɔ “ɖeɖefia tso Mawu gbɔ le nusiwo womekpɔ haɖe o ŋuti.” Mawu gblɔ na Noa be Yeana “tɔɖɔɖɔ,” alo “dziƒotsiaƒu,” naɖe anyigba la, abe alesi New World Translation ƒe etenuŋɔŋlɔ gblɔe le Mose I, 6:17 ene. Nu ma tɔgbe medzɔ kpɔ vaseɖe ɣemaɣi o. Gake nuwɔwɔ siwo katã Noa kpɔna kple ŋku nye ɖaseɖiɖi kɔte be Mawu ate ŋu ahe tɔɖɔɖɔ gblẽnu ma vɛ nyateƒe. Xɔse ʋã Noa wòkpa aɖakaʋua.

 7. (a) Nukae mehiã Noa hafi wòawɔ Mawu ƒe sedede dzi o? (b) Viɖe kae míakpɔ tso ŋugbledede le Noa ƒe xɔse ŋu me, eye aleke míaƒe xɔse ate ŋu anye yayra na ame bubuwoe?

⁷ Mawu megblɔ ŋkeke si dzi Tɔɖɔɖɔa adze egɔme na Noa o. Gake Noa metsɔ ema wɔ taflatsedodoe be wòanɔ agbe si fia be edi be yealala akpɔ nusi le dzɔdzɔ ge ɖa, eye wòatsɔ aɖakaʋua kpakpa kple gbeƒãɖeɖedɔa aɖo nɔƒe evelia le eƒe agbe me o. Mawu na ɣeyiɣi si sɔ gbɔ la Noa hena aɖakaʋua me yiyi. Do ŋgɔ na esia la, ‘Noa wɔ nusiwo katã ƒe se Mawu de nɛ. Nenema pɛ wòwɔ.’ (Mose I, 6:22) Noa zɔ le xɔse me, ke menye le nukpɔkpɔ nu o. Edzɔa dzi na mí ŋutɔ be ewɔe alea! Xɔse si wòɖe fia tae míele agbe egbea ɖo. Le míawo hã gome la, xɔse si míeɖena fiana ate ŋu akpɔ ŋusẽ deto ɖe nusi ɣeyiɣi si gbɔna ahe vɛ dzi, menye na míawo ɖeɖeko o ke na mía viwo kple amesiwo dome míele hã.

Abraham ƒe Xɔse

8, 9. (a) Nuka dzie Abraham tu eƒe xɔse ɖo? (b) Mɔ ka nue Yehowa “ɖe eɖokui fia” Abraham le?

⁸ Bu kpɔɖeŋu bubu—si nye Abraham tɔ—hã ŋu kpɔ. (Hebritɔwo 11:8-10) Nuka dzie Abraham tu eƒe xɔse ɖo? Trɔ̃subɔsubɔ kple ŋutilãmenudidi xɔ aƒe ɖe nuto siwo me wòtsi ɖo le Ur si nye Kaldeatɔwo ƒe du la me. Gake nu bubuwoe kpɔ ŋusẽ ɖe Abraham ƒe nukpɔsusu dzi. Ðikeke mele eme o be ete ŋu de ha kple Noa ƒe vi Sem, amesi ŋɔli wònɔ agbe ƒe 150 sɔŋ. Abraham va ka ɖe edzi be Yehowae nye “Mawu dziƒoʋĩtɔ, si wɔ dziƒo kple anyigba la.”—Mose I, 14:22.

⁹ Nu bubu aɖe hã kpɔ ŋusẽ ɖe Abraham dzi vevie. Yehowa “ɖe eɖokui fia . . . Abraham, esime wòle Mesopotamia, hafi wòva nɔ Xaran, eye wògblɔ nɛ bena: ‘Ʋu tso wò anyigba dzi kple ƒowòmeawo gbɔ, eye nayi anyigba, si mafia wò la dzi.’ ” (Dɔwɔwɔwo 7:2, 3) Mɔ ka nue Yehowa ‘ɖe eɖokui fia’ Abraham le? Abraham mekpɔ Mawu ŋutɔŋutɔ o. (Mose II, 33:20) Ke hã anɔ eme be Yehowa ɖe eɖokui fia Abraham le drɔ̃eƒe, eto ŋutikɔkɔe ƒe ɖeɖefia si de ŋgɔ wu dzɔdzɔmetɔ me, alo edɔ mawudɔla, alo eteƒenɔla aɖe. (Tsɔe sɔ kple Mose I, 18:1-3; 28:10-15; Mose III, 9:4, 6, 23, 24.) Eɖanye mɔ ka nue Yehowa ɖe eɖokui fia Abraham toe o, ŋutsu nuteƒewɔla ma nya be mɔnukpɔkpɔ xɔasi aɖee Mawu tsɔ le ye ŋkume ɖom. Abraham wɔ nu le xɔse me.

10. Aleke Yehowa do ŋusẽ Abraham ƒe xɔsee?

¹⁰ Menye anyigba si dzi Mawu le Abraham fiam be wòayi ŋu nya geɖe sese ye na wòxɔ se o. Menye ɣeyiɣi si me woatsɔ anyigba la anae nyanya hãe na wòxɔ se o. Yehowa nyanya be eyae nye Mawu Ŋusẽkatãtɔe na wòxɔ se. (Mose II, 6:3) Yehowa gblɔ na Abraham be adzi vi, gake Abraham bua tame ɣeaɖewoɣi tso alesi esia ate ŋu adzɔe ŋu. Enɔ amegã kum. (Mose I, 15:3, 4) Yehowa do ŋusẽ Abraham ƒe xɔse esi wògblɔ nɛ be wòafɔ kɔ dzi akpɔ ɣletiviwo ɖa eye wòaxlẽ wo ne ate ŋui ko. Mawu gblɔ be: “Nenema wò ƒome anɔ.” Esia ʋã Abraham ƒe dzi vevie. Edze nɛ ƒã be dziƒonu dziŋɔ mawo Wɔla ate ŋu awɔ nusi ŋugbe wòdo dzi. Abraham ‘xɔ Yehowa dzi se.’ (Mose I, 15:5, 6) Menye nya si sem Abraham nɔ si dzɔ dzi nɛ ta koe wòxɔe se o; xɔse si wotu ɖe gɔmeɖoanyi nyui dzie nɔ esi.

11. (a) Esi Abraham tsi gogo ƒe 100 la, aleke wòwɔ nu ɖe ŋugbe si Mawu do be Sara nyagã la adzi vi ŋu? (b) Xɔse ka ƒomevie nɔ Abraham si wòtsɔ dze ŋgɔ dodokpɔ si nye be wòakplɔ viaŋutsuvi ayi Moria To dzi atsɔe asa vɔe?

¹¹ Esi Abraham gogo ƒe 100 xɔxɔ eye srɔ̃a Sara hã gogo ƒe 90 la, Yehowa gagblɔ ŋugbe si wòdo be viŋutsu anɔ Abraham si eye Sara anye nyɔnu si adzii la nɛ. Abraham bu nɔnɔme si me wònɔ ŋu nyuie. ‘Gake le ŋugbe si Mawu do ta la, megbɔdzɔ le dzimaxɔse ta o, ke esẽ ŋu to eƒe xɔse me, eye wòtsɔ bubu na Mawu eye wòka ɖe edzi bliboe be nusi ŋugbe wòdo la, awɔe hã.’ (Romatɔwo 4:19-21) Abraham nya be Mawu ƒe ŋugbedodo mado kpo emevava o. Le xɔse si nɔ Abraham si ta la, eɖo to emegbe esi Mawu gblɔ nɛ be wòakplɔ via Isak, ayi Moria-nyigba dzi atsɔe asa vɔe. (Mose I, 22:1-12) Abraham ka ɖe edzi bliboe be Mawu si te ŋu na wodzi vi ma nukutɔe la agate ŋu agbɔ agbee bene wòawɔ ɖe ŋugbe bubu siwo Wògado le ɖevia ŋu la dzi.—Hebritɔwo 11:17-19.

12. Ɣeyiɣi didi kae Abraham yi edzi zɔ le xɔse me, eye teƒeɖoɖo kae le eya kple eƒe ƒomea me tɔ siwo ɖe xɔse sesẽ fia la lalam?

¹² Abraham ɖe xɔse fia menye le nudzɔdzɔ aɖewo me ko o, ke le eƒe agbenɔɣi katã si dzi xɔse kpɔ ŋusẽ ɖo la me. Abraham mexɔ Ŋugbedodonyigba la ƒe akpa aɖeke wònye eƒe domenyinyi tso Mawu gbɔ le eƒe agbenɔɣi o. (Dɔwɔwɔwo 7:5) Ke hã, ɖeɖi mete Abraham ŋu wòtrɔ yi Ur si nye Kaldeatɔwo ƒe du me o. Enɔ avɔgbadɔwo me ƒe 100 sɔŋ le anyigba si Mawu fiae la dzi vaseɖe eƒe kugbe ke. (Mose I, 25:7) Hebritɔwo 11:16 gblɔ le eya kple srɔ̃a Sara, wo viŋutsu Isak, kple wo tɔgbui kple mamayɔvi Yakob ŋu be: “Ŋu mekpe Mawu le wo ŋuti be, woyɔe be woƒe Mawu o; elabena edzra du ɖo na wo.” Ẽ, Yehowa dzra nɔƒe ɖo ɖi na wo le eƒe Mesia Fiaɖuƒea ƒe dziɖuɖu te le anyigba dzi.

13. Yehowa subɔla siwo li egbea dometɔ kawoe ɖee fia be xɔse le yewo si abe Abraham ene?

¹³ Yehowa subɔla siwo li egbea dometɔ aɖewo le abe Abraham ene. Wozɔ le xɔse me ƒe geɖe. Wozã ŋusẽ si Mawu nana la tsɔ ɖu mɔxenu siwo le abe to ene la dzii. (Mateo 17:20) Woƒe xɔse meʋuʋuna le esi womenya ɣeyiɣi si tututu Mawu ana domenyinyi si ŋugbe wòdo la wo o ta o. Wonya be Yehowa ƒe nya mate ŋu ado kpo emevava o, eye wobua eƒe Ðasefowo dome nɔnɔ mɔnukpɔkpɔ xɔasi aɖee. Nenemae nèsena le ɖokuiwò mea?

Xɔse si Ʋã Mose

14. Aleke woɖo xɔse gɔme anyi na Mosee?

¹⁴ Xɔse ƒe kpɔɖeŋuɖola bubue nye Mose. Nukae nye eƒe xɔse ƒe gɔmeɖoanyi? Eƒe vidzĩmee woɖo egɔme anyi le. Togbɔ be Farao vinyɔnu kpɔ Mose le kusi si wotsɔ aɖa lɔ̃e me le Nil-tɔsisi to eye wòtsɔe wɔ viae hã la, Mose dada Yoxebet si nye Hebritɔ la ŋutɔe na no ɖevia eye eya ŋutɔe kpɔ edzi le eƒe ɖevime. Edze ƒã be Yoxebet fia nui nyuie, eye wòƒã lɔlɔ̃ na Yehowa kple ŋudzedzekpɔkpɔ ɖe ŋugbe siwo Wòdo na Abraham ŋu ɖe eyama me. Emegbe esi Mose va zu Farao ƒemetɔ la, ‘wofia Egiptetɔwo ƒe nunyawo katãe.’ (Dɔwɔwɔwo 7:20-22; Mose II, 2:1-10; 6:20; Hebritɔwo 11:23) Gake togbɔ be wove Mose nu wòɖo nɔƒe sia hã la, Mawu ƒe ame siwo wowɔ kluviwo ŋue eƒe dzi ku ɖo.

15. Nukae ɖekawɔwɔ kple Yehowa ƒe amewo bia tso Mose si?

¹⁵ Le Mose ƒe ƒe 40 lia xɔxɔ me la, eƒo Egiptetɔ aɖe wòku hexɔ na Israel-vi si wonɔ fu wɔmee madzemadzee la. Nyadzɔdzɔ sia ɖe alesi Mose bua Mawu ƒe amewoe fia. Vavãe, “le xɔse me, esi Mose tsi la, egbe be, womegayɔ ye be Farao ƒe vinyɔnuvi [ƒe] vi o.” Le esi teƒe be wòaku ɖe ‘nuvɔ̃ ƒe vivisese si nɔa anyi ɣeyiɣi kpui aɖe ko’ ŋu esi wònɔ Egipte-fiasã me la, xɔse ʋãe wòwɔ ɖeka kple Mawu ƒe ame siwo wonɔ funyafunya wɔmee.—Hebritɔwo 11:24, 25; Dɔwɔwɔwo 7:23-25.

16. (a) Dɔ kae Yehowa de asi na Mose, eye aleke Mawu kpe ɖe eŋui? (b) Aleke Mose ɖe xɔse fia le eƒe dɔdasia wɔwɔ me?

¹⁶ Mose di vevie be yeawɔ nu atsɔ aɖe yeƒe amewoe, gake ɣeyiɣi si Mawu ɖo ɖe wo ɖeɖe ŋu mede haɖe o. Eva hiã be Mose nasi adzo le Egipte. Anɔ ƒe 40 megbe hafi Yehowa to mawudɔla aɖe dzi de dɔ asi na Mose be wòatrɔ agbɔ va Egipte akplɔ Israel-viwo adzoe. (Mose II, 3:2-10) Aleke Mose wɔ nui? Meke ɖi ŋutete si le Yehowa si be wòaɖe Israel-viwo o, gake ewɔ nɛ be yemedze na ɖoƒe si Mawu tsɔ ɖo ye ŋkume o. Yehowa na dzideƒo si hiã Mose lae lɔlɔ̃tɔe. (Mose II, 3:11–4:17) Ŋusẽ va ɖo Mose ƒe xɔse ŋu. Etrɔ va Egipte hexlɔ̃ nu Farao enuenu ŋkume kple ŋkume le fuwɔame siwo ava Egipte dzi ŋu le fia ma ƒe asimaɖemaɖe le Israel-viwo ŋu be woayi aɖasubɔ Yehowa ta. Ŋusẽ menɔ Mose ŋutɔ si be wòahe fuwɔame mawo vɛ o. Ezɔ le xɔse me, ke menye le nukpɔkpɔ nu o. Yehowa kple eƒe nya dzie wòxɔ se. Farao do ŋɔdzi na Mose. Gake Mose do dzi. “Le xɔse me wògblẽ Egipte ɖi, eye mevɔ̃ fia ƒe dɔmedzoe la o; elabena edo dzi, abe ɖe wòle amesi womekpɔna o la kpɔm ene.” (Hebritɔwo 11:27) Menye ame debliboe Mose nye o. Edaa vo. (Mose IV, 20:7-12) Gake esi Mawu de dɔ asi nɛ vɔ megbe la, ena xɔse kpɔ ŋusẽ ɖe eƒe agbenɔnɔ bliboa katã dzi.

17. Togbɔ be Noa, Abraham, kple Mose menɔ agbe kpɔ Mawu ƒe xexeme yeyea o hã la, nukae do tso eme esi wozɔ le xɔse me?

¹⁷ Neva eme be wò xɔse nanɔ abe Noa, Abraham, kple Mose tɔ ene. Ele eme be womekpɔ Mawu ƒe xexeme yeyea le wo ŋɔli o. (Hebritɔwo 11:39) Mawu ƒe ɣeyiɣi ɖoɖia mede haɖe o; eƒe tameɖoɖo ƒe akpa bubuwo gali siwo wòahiã be woava eme. Gake woƒe Mawu ƒe nya dzixɔxɔse meʋuʋu o, eye woŋlɔ woƒe ŋkɔwo ɖe Mawu ƒe agbegbalẽa me.

18. Nukata wòhiã le amesiwo woyɔ na dziƒogbenɔnɔ gome be woazɔ le xɔse me?

¹⁸ Apostolo Paulo ŋlɔ be: “Mawu kpɔ nu aɖe, si nyo wu la, da ɖi na mí.” Efia be, Mawu kpɔ nu nyui aɖe da ɖi na amesiwo, le abe Paulo ene, siwo woyɔ yi dziƒogbenɔnɔ me kpe ɖe Kristo ŋu. (Hebritɔwo 11:40) Amesiawo koŋ ye nɔ susu me na Paulo esi wòŋlɔ nya siwo le Korintotɔwo II, 5:7 be: “Míezɔna le xɔse me, eye menye le nukpɔkpɔ me o.” Le nya mawo ŋlɔɣi la, wo dometɔ aɖeke mexɔ woƒe dziƒofetua haɖe o. Womete ŋu kpɔe kple woƒe ŋku ŋutɔŋutɔ o, gake gɔmeɖokpe nyui dzie wonɔ te ɖo xɔ edzi se. Wofɔ Kristo tso ame kukuwo dome, amesi nye amesiwo woafɔ ayi dziƒogbenɔnɔ me ƒe ŋgɔgbetɔ. Eye eteƒekpɔla 500 kple edzivɔ kpɔe hafi wòyi dziƒo. (Korintotɔwo I, 15:3-8) Susu geɖe li siwo tae woana xɔse ma nakpɔ ŋusẽ ɖe woƒe agbe dzi. Susu nyui le míawo hã mía si si tae míazɔ le xɔse me.

19. Abe alesi woɖee fia le Hebritɔwo 1:1, 2 ene la, ameka dzie Mawu to ƒo nu na míawo?

¹⁹ Egbea la, menye mawudɔla aɖe dzie Yehowa to le nu ƒom na eƒe amewo, abe alesi wòƒo nui na Mose le ŋuve bibi la gbɔ ene o. Mawu to Via dzi ƒo nu. (Hebritɔwo 1:1, 2) Nusi Mawu gblɔ to edzi la, Ena woŋlɔe ɖe Biblia me, eye woɖe egɔme ɖe gbe siwo amewo dona le xexeame godoo me.

20. Aleke míaƒe nɔnɔmea de mía dzi kura wu Noa, Abraham, kple Mose tɔe?

²⁰ Nu geɖe le mía si wu nusi nɔ Noa, Abraham, kple Mose si. Mawu ƒe Nya bliboa katã le mía si—eye eƒe akpa gã aɖe va eme xoxo. Le nya si gbegbe Biblia gblɔ le ŋutsu kple nyɔnu siwo ɖee fia be yewonye Yehowa ƒe ɖasefo wɔnuteƒewo le dodokpɔ ƒomevi ɖesiaɖe me ŋu ta la, Hebritɔwo 12:1 de dzi ƒo na mí be: “Mina míaɖe nu kpekpe sia nu kpekpe kple nuvɔ̃, si ɖea to ɖe mí la ɖa, eye mina míatsɔ dzidodo anɔ dudimekeke, si woɖo na mí la dzi.” Míaƒe xɔse menye nusi míabu nu tsɛe o. “Nuvɔ̃, si ɖea to ɖe mí” bɔbɔe lae nye xɔse manɔamesi. Ebia be míawɔ aʋa sesĩe hafi ate ŋu ayi edzi ‘azɔ le xɔse me.’

[Etenuŋɔŋlɔ]

Nya Kae Nàgblɔ?

◻ Nukae ‘zɔzɔ le xɔse me’ bia?

◻ Aleke xɔse si Noa ɖe fia la aɖe vi na míi?

◻ Aleke alesi Abraham ɖe xɔse fia akpe ɖe mía ŋui?

◻ Nukatae Biblia yɔ Mose be enye xɔse ƒe kpɔɖeŋuɖola?

[Nɔnɔmetata si le axa 10]

Abraham zɔ le xɔse me

[Nɔnɔmetata si le axa 10]

Mose kple Aron ɖe xɔse fia esi wonɔ Farao ŋkume