“Woafɔ Ame Kukuwo Ðe Tsitre”

“Woaku kpẽ, eye woafɔ ame kukuwo ɖe tsitre magblẽmagblẽ, eye míawo la woatrɔ míaƒe nɔnɔme.”—KORINTOTƆWO I, 15:52.

1, 2. (a) Ŋugbedodo fakɔname kae wotsɔ na to nyagblɔɖila Hosea dzi? (b) Aleke míewɔ nya be Mawu di be yeagbɔ agbe ame kukuwo?

AME vevi aɖe ku na wò kpɔa? Ekema ènya veve si ku te ŋu dona na ame. Gake ŋugbe si Mawu do to nyagblɔɖila Hosea dzi faa akɔ na Kristotɔwo: “Mava aɖe wo le tsieƒe si me, eye mava axɔ wo aƒle le ku si me! Ku, wò dɔvɔ̃ ɖe? Tsieƒe, wò veve ɖe?”—Hosea 13:14.

² Awɔ na ɖikelawo be dzixɔse si nye be woagbɔ agbe ame kukuwo la mele dzɔdzɔme nu o. Gake ŋusẽ le Mawu Ŋusẽkatãtɔ la si be wòawɔ nukunu sia! Nusi le vevie wue nye nenye be Yehowa di be yeagbɔ agbe ame kukuwo. Ame dzɔdzɔe Hiob bia be: “Ne ŋutsu ku la, ɖe wògagbɔa agbea?” Azɔ etsɔ nya sia si naa kakaɖedzi ame la ɖo eŋu be: “Àyɔm, eye matɔ na wò, ne wò asinudɔwɔwɔ ƒe nu le dzrowòm.” (Hiob 14:14, 15) Nya si nye “dzrowòm” fia be woanɔ mɔ kpɔm na nane alo adii vevie. (Tsɔe sɔ kple Psalmo 84:3.) Ẽ, Yehowa le mɔ kpɔm na tsitretsitsia vevie—ele edzrom be yeagakpɔ nuteƒewɔla siwo ku, amesiwo dzi wògaɖoa ŋkui vevie la ake.—Mateo 22:31, 32.

Yesu Kɔ Tsitretsitsia Me

3, 4. (a) Numekɔkɔ kae Yesu na le tsitretsitsi mɔkpɔkpɔa ŋu? (b) Nukata wofɔ Yesu ɖe tsitre le gbɔgbɔ me ke menye le ŋutilã me o?

³ Xɔsetɔ siwo nɔ anyi le blema siwo ƒe ɖee nye Hiob mese nusi tsitretsitsia fia me bliboe o. Yesu Kristoe va na mɔkpɔkpɔ wɔnuku sia me kɔ bliboe. Eɖe akpa vevi si eya ŋutɔ wɔna fia esime wògblɔ be: “Amesi xɔa Via dzi sena la, agbe mavɔ le esi.” (Yohanes 3:36) Afikae woanɔ agbe ma le? Le amesiwo xɔa edzi sena ƒe akpa gãtɔ gome la, anye le anyigba dzi. (Psalmo 37:11) Gake Yesu gblɔ na eƒe nusrɔ̃lawo be: “Ha sue, megavɔ̃ o! Elabena edze mia Fofo la ŋu be, yeatsɔ fiaɖuƒe la na mi.” (Luka 12:32) Dziƒoe Mawu ƒe Fiaɖuƒea le. Eyata ŋugbedodo sia fia be ele be “ha sue” aɖe nanɔ Yesu gbɔ le dziƒo anye gbɔgbɔmenuwɔwɔwo. (Yohanes 14:2, 3; Petro I, 1:3, 4) Ŋutikɔkɔe mɔkpɔkpɔ ka gbegbee nye si! Yesu gaɖee fia apostolo Yohanes be “ha sue” sia me tɔwo ƒe xexlẽme anye ame 144,000 ko.—Nyaɖeɖefia 14:1.

⁴ Gake aleke ame 144,000 la awɔ age ɖe dziƒoŋutikɔkɔe la me? Yesu “[he] agbe kple magblẽmagblẽ ɖe go va kekeli nu to nyanyui la me.” Eto eƒe ʋu me ʋu “mɔ yeye gbagbe” ɖi ɖe dziƒoyiyi ŋu. (Timoteo II, 1:10; Hebritɔwo 10:19, 20) Gbã la, eku abe alesi Biblia gblɔe ɖi be adzɔ ene. (Yesaya 53:12) Emegbe Petro ɖe gbeƒã be “nenem Yesu sia la Mawu fɔe ɖe tsitre.” (Dɔwɔwɔwo 2:32) Gake womefɔ Yesu ɖe tsitre wònye amegbetɔ o. Egblɔe do ŋgɔ be: “Abolo, si na ge mala ɖe xexeame ƒe agbe ta la, enye nye ŋutilã.” (Yohanes 6:51) Ne egatsɔ eƒe ŋutilã do la, anye flitete ɖe vɔsasa la me. Eyata ‘wowu Yesu le ŋutilã gome, ke wogbɔ agbee le gbɔgbɔ gome.’ (Petro I, 3:18) Yesu to esia dzi ‘tsɔ xɔxɔ mavɔ vɛ na mí,’ si fia “ha sue” la. (Hebritɔwo 9:12) Etsɔ eƒe amegbetɔ ƒe agbe deblibo ƒe asixɔxɔ na Mawu wònye tafe ɖe ameƒome wɔnuvɔ̃ ta, eye ame 144,000 woe nye ame gbãtɔ siwo esia ɖe vi na.

 5. Mɔkpɔkpɔ kae wotsɔ ɖo Yesu yomedzelawo ŋkume le ƒe alafa gbãtɔ me?

⁵ Menye Yesu koe woafɔ ɖe tsitre be wòava nɔ agbe le dziƒo o. Paulo gblɔ na hati Kristotɔ siwo nɔ Roma be wotsɔ gbɔgbɔ kɔkɔe si ami na wo be woanye Mawu viwo kple hadomenyilawo kple Kristo ne wodo dzi vaseɖe nuwuwu tsɔ ɖo kpe ami si wosi na wo dzi. (Romatɔwo 8:16, 17) Paulo gaɖe eme be: “Ne míezu ɖeka kplii hena sɔsɔ kplii le eƒe ku me la, ekema míasɔ kplii le eƒe tsitretsitsi hã me.”—Romatɔwo 6:5.

Tsitretsitsi Mɔkpɔkpɔ Ta Ʋiʋli

 6. Nukata amewo tsi tre ɖe tsitretsitsi dzixɔsea ŋu le Korinto, eye aleke apostolo Paulo wɔ nu ɖe enui?

⁶ Kristotɔnyenye ƒe “nufiafia ƒe gɔmedzedze” ƒe akpa aɖee tsitretsitsia nye. (Hebritɔwo 6:1, 2) Gake amewo tsi tre ɖe nufiafia la ŋu le Korinto. Hamea me tɔ aɖewo siwo dzi Helatɔwo ƒe xexemenunyafiafia anya kpɔ ŋusẽ ɖo la nɔ gbɔgblɔm be: “Ame kukuwo ƒe tsitretsitsi aɖeke meli o.” (Korintotɔwo I, 15:12) Esi esia ŋuti nyatakaka ɖo apostolo Paulo gbɔ la, eʋli tsitretsitsi mɔkpɔkpɔa ta, vevietɔ le Kristotɔ amesiaminawo ƒe mɔkpɔkpɔ ŋu. Mina míadzro Paulo ƒe nya siwo woŋlɔ ɖe Korintotɔwo I, ta 15 me. Ade dziwò ne èxlẽ ta bliboa katã abe alesi míeɖo aɖaŋu le nyati si do ŋgɔ me ene.

 7. (a) Nya vevi ka dzie Paulo he susu yii? (b) Amekawoe kpɔ Yesu si wofɔ ɖe tsitre la?

⁷ Paulo na eƒe numedzodzroa ƒe tanya dze ƒã le Korintotɔwo I, ta 15 ƒe kpukpui eve gbãtɔawo me: “Nɔviwo, mena mienya nyanyui, si megblɔ fia mi, si miexɔ hã, esi me mietsi tre ɖo hã, si me woxɔ mi ɖe agbe le hã, . . . [negbe ɖe] miexɔ edzi se dzodzro.” Ne Korintotɔwo menɔ te sesĩe le nyanyui la me o la, ke woxɔ nyateƒea dzodzro. Paulo yi edzi be: “Nusi nye hã mexɔ la, metsɔ de asi na mi gbãgbiagbã bena, Kristo ku le mía nuvɔ̃ ŋuti le ŋɔŋlɔ la nu, eye bena woɖii, eye bena wogafɔe ɖe tsitre tso ame kukuwo dome le ŋkeke etɔ̃agbe le ŋɔŋlɔ la nu, eye bena eɖe eɖokui fia Kefa, emegbe la ame wuieve la. Eya megbe la eɖe eɖokui fia nɔvi, siwo wu ame alafa atɔ̃ la zi ɖeka, amesiwo dome geɖeawo le agbe vaseɖe fifi, ke ame aɖewo hã dɔ alɔ̃. Emegbe la eɖe eɖokui fia Yakobo, emegbe la apostolowo katã. Wo katã megbe la eɖe eɖokui fia nye hã abe fu gegee ene.”—Korintotɔwo I, 15:3-8.

8, 9. (a) Aleke gbegbee tsitretsitsi dzixɔsea le vevie? (b) Anɔ eme be nudzɔdzɔ ka mee Yesu ɖe eɖokui fia “nɔvi, siwo wu ame alafa atɔ̃” le?

⁸ Le amesiwo xɔ nyanyui la gome la, ele be woaxɔ Yesu ƒe tsitretsitsi dzi ase kokoko. Eteƒekpɔla geɖe nɔ anyi siwo ɖi ɖase be “Kristo ku le mía nuvɔ̃ ŋuti” eye be wofɔe ɖe tsitre. Wo dometɔ ɖekae nye Kefa, alo Petro, si nye alesi amewo yɔnɛ. Esi Petro gbe nu le Yesu gbɔ le zã si me wofia eyome mɔ helée megbe la, anya fa akɔ nɛ ŋutɔ esime Yesu ɖe eɖokui fiae. Yesu si wofɔ ɖe tsitre la ɖe eɖokui fia “ame wuieve la” si nye apostoloawo ƒe ƒuƒoƒoa hã—ɖikeke mele eme o be nudzɔdzɔ sia kpe ɖe wo ŋu woɖu vɔvɔ̃ si nɔ wo me dzi eye wozu Yesu ƒe tsitretsitsi ŋuti ɖaseɖila siwo ƒo dzi le.—Yohanes 20:19-23; Dɔwɔwɔwo 2:32.

⁹ Kristo ɖe eɖokui fia ame gbogbowo hã, amesiwo “wu ame alafa atɔ̃.” Esi wònye Galilea koe eyomedzelawo sɔ gbɔ ɖo alea ta la, anɔ eme be nudzɔdzɔ si ŋu woƒo nu tsoe le Mateo 28:16-20, esime Yesu de se be woawɔ nusrɔ̃lawo la mee. Ðaseɖiɖi sẽŋu ka gbegbee nye si le amesiawo si! Wo dometɔ aɖewo ganɔ agbe le ƒe 55 M.Ŋ. me esime Paulo ŋlɔ lɛta sia na Korintotɔwo. Gake de dzesii be wogblɔ le amesiwo ku ŋu be ‘wodɔ alɔ̃ le ku me.’ Womefɔ wo ɖe tsitre be woaxɔ woƒe dziƒofetua haɖe o.

10. (a) Nukae do tso Yesu ƒe kpekpe kple eƒe nusrɔ̃lawo zi mamlɛtɔ me? (b) Aleke Yesu ɖe eɖokui fia Paulo “abe fu gegee ene”?

¹⁰ Ame bubu si nye Yesu ƒe tsitretsitsi ŋuti ɖaseɖila ɖedzesie nye Yakobo si nye Yosef kple Yesu dada Maria ƒe vi. Do ŋgɔ na tsitretsitsia la, anɔ eme be Yakobo meva zu xɔsetɔ haɖe o. (Yohanes 7:5) Gake esi Yesu ɖe eɖokui fia Yakobo megbe la, eva zu xɔsetɔ eye ɖewohĩ ewɔ akpa vevi aɖe tsɔ kpe ɖe nɔvia bubuwo ŋu wova zu xɔsetɔwo. (Dɔwɔwɔwo 1:13, 14) Esi Yesu kpe kple eƒe nusrɔ̃lawo zi mamlɛtɔ le nudzɔdzɔ si me wòyi dziƒo le me la, ede dɔ asi na wo be ‘woanye ɖaseɖilawo ayi ɖe anyigba ƒe seƒe ke.’ (Dɔwɔwɔwo 1:6-11) Emegbe eɖe eɖokui fia Saul si tso Tarso, amesi nye Kristotɔwo yometila. (Dɔwɔwɔwo 22:6-8) Yesu ɖe eɖokui fia Saul si nɔ “abe fu gegee ene.” Enɔ abe ɖe wofɔ Saul yi gbɔgbɔmegbenɔnɔ me xoxo ene eye wòte ŋu kpɔ Aƒetɔ si wodo ŋutikɔkɔe na la ƒe alafa geɖe do ŋgɔ na woƒe tsitretsitsia. Nudzɔdzɔ sia na Saul dzudzɔ alesi wòtsi tre ɖe Kristo-hamea ŋu kutɔkutɔe la enumake hetrɔ eƒe agbenɔnɔ wòɖe dzesi. (Dɔwɔwɔwo 9:3-9, 17-19) Saul va zu apostolo Paulo, amesi nye Kristotɔwo ƒe xɔsea ta ʋlila gbãtɔwo dometɔ ɖeka.—Korintotɔwo I, 15:9, 10.

Tsitretsitsia Dzixɔxɔse Hiã

11. Aleke Paulo klo nu le nyagbɔgblɔ si nye ‘Tsitretsitsi meli o’ ƒe aʋatsonyenye ŋui?

¹¹ Eyata Yesu ƒe tsitretsitsia nye nyateƒenya si ŋu ɖaseɖiɖi nyui le. Paulo gblɔ be: “Ne woɖe gbeƒã Kristo bena, etsi tre tso ame kukuwo dome la, aleke wɔ mia dome ame aɖewo gblɔ bena, ame kukuwo ƒe tsitretsitsi aɖeke meli o mahã?” (Korintotɔwo I, 15:12) Menye ɖe amesiawo ke ɖi tsitretsitsia alo tɔa gbee ko o ke wogblɔe amesiame se be yewomexɔ edzi se hã o. Eyata Paulo klo nu le woƒe nyawo ƒe aʋatsonyenye dzi. Egblɔ be ne womefɔ Kristo ɖe tsitre o la, ke Kristotɔwo ƒe gbedasia nye aʋatso, eye amesiwo ɖi ɖase le Kristo ƒe tsitretsitsi ŋu nye “Mawu ƒe aʋatsoɖaseɖilawo.” Ne womefɔ Kristo ɖe tsitre o la, ke womexe tafe aɖeke na Mawu hã o; si fia be Kristotɔwo ‘kpɔtɔ le woƒe nuvɔ̃wo me.’ (Korintotɔwo I, 15:13-19; Romatɔwo 3:23, 24; Hebritɔwo 9:11-14) Eye Kristotɔ siwo ‘dɔ alɔ̃ le ku me’ siwo dometɔ aɖewo ku xɔsetaku la tsrɔ̃ eye mɔkpɔkpɔ vavã aɖeke mele wo si o. Nɔnɔme wɔnublanui ka gbegbe mee nye si Kristotɔwo anɔ ne ɖe agbe sia koe li na wo! Anye woƒe fukpekpewo katã nye dzodzro.

12. (a) Nukae Kristo yɔyɔ be enye “amesiwo dɔ alɔ̃ [le ku me] la dome ŋgɔgbetɔ” la fia? (b) Aleke Kristo na wòle bɔbɔe be woafɔ amewo ɖe tsitre?

¹² Gake mele nenema o. Paulo yi edzi be: “Kristo tsi tre tso ame kukuwo dome.” Tsɔ kpe ɖe eŋu la, enye “amesiwo dɔ alɔ̃ [le ku me, NW] la dome ŋgɔgbetɔ.” (Korintotɔwo I, 15:20) Esime Israel-viwo ɖo to tsɔ woƒe agblemenuwo ƒe gbãtɔwo na Yehowa la, Yehowa yra wo eye woŋe nu geɖe. (Mose II, 22:29, 30; 23:19; Lododowo 3:9, 10) Esi Paulo yɔ Kristo be “ŋgɔgbetɔ” la, efia be woagafɔ ame bubu geɖe tso ku me ayi dziƒogbenɔnɔ me. Paulo gblɔ be: “Esi wònye ame mee ku la to va ŋuti la, ame kukuwo ƒe tsitretsitsi la hã to ame ke me va. Elabena alesi amewo katã ku le Adam me la, nenema ke woagbɔ agbe wo katã hã le Kristo me.” (Korintotɔwo I, 15:21, 22) Yesu na wòle bɔbɔe be woafɔ amewo ɖe tsitre esi wòtsɔ eƒe amegbetɔ ƒe agbe deblibo na tafee eye wòʋu mɔ ɖi na ameƒomea be woaɖe wo tso nuvɔ̃ kple ku ƒe kluvinyenye me.—Galatiatɔwo 1:4; Petro I, 1:18, 19.a

13. (a) Ɣekaɣie woafɔ amesiwo ava nɔ agbe le dziƒo ɖe tsitre? (b) Aleke wòdzɔe be amesiamina aɖewo ‘madɔ alɔ̃ le ku me o’?

¹³ Paulo yi edzi be: “Gake amesiame le ye ŋutɔ ƒe ɖoɖo nu: Gbãtɔ enye Kristo; emegbe la amesiwo le Kristo me le eƒe [anyinɔɣi, NW] la.” (Korintotɔwo I, 15:23) Wofɔ Kristo ɖe tsitre le ƒe 33 M.Ŋ. me. Gake ele be eyomedzela amesiaminawo—“amesiwo le Kristo me”—nalala vaseɖe esime Yesu ƒe anyinɔnɔ le fiaɖuɖu me si Biblia ƒe nyagblɔɖi ɖee fia be edzɔ le ƒe 1914 me la ƒe gɔmedzedze megbe kpuie hafi. (Tesalonikatɔwo I, 4:14-16; Nyaɖeɖefia 11:18) Ke amesiwo anɔ agbe le anyinɔɣi ma me ya ɖe? Paulo gblɔ be: “Mikpɔ ɖa, mele nya ɣaɣla gblɔm na mi: Mí katã míele alɔ̃ dɔ ge o; gake woatrɔ mí katã míaƒe nɔnɔme, kasia le aɖabaƒoƒo ɖeka me, le kpẽkuku mamlɛa me; elabena woaku kpẽ, eye woafɔ ame kukuwo ɖe tsitre magblẽmagblẽ, eye míawo la woatrɔ míaƒe nɔnɔme.” (Korintotɔwo I, 15:51, 52) Edze ƒã be menye amesiaminawo katãe dɔ alɔ̃ le yɔdo me le tsitretsitsi lalam o. Wotrɔa amesiwo kuna le Kristo ƒe anyinɔɣia me ƒe nɔnɔme enumake.—Nyaɖeɖefia 14:13.

14. Aleke ‘wonaa nyɔnyrɔ’ amesiaminawo ‘le ame kukuwo ta’?

¹⁴ Paulo bia be: “Nuka wɔm amesiwo na [wona nyɔnyrɔ] wo le ame kukuwo ta la le? Ne womafɔ ame kukuwo ɖe tsitre kura o la, nuka wona [wonyrɔ wo] le woamawo ta mahã? Nukaŋuti míawo hã míeɖoa ŋɔdzi me le gaƒoƒo sia gaƒoƒo mea?” (Korintotɔwo I, 15:29, 30) Paulo megblɔ be wona nyɔnyrɔ ame gbagbewo ɖe ame kukuwo ta, abe alesi Biblia gɔmeɖeɖe aɖewo na wòdze ene o. Ne míebu eŋu kpɔ la, Kristotɔwo ƒe nusrɔ̃lanyenye ŋue nyɔnyrɔxɔxɔ ku ɖo eye luʋɔ kukuwo mate ŋu azu nusrɔ̃lawo o. (Yohanes 4:1) Amesiwo ŋu Paulo nɔ nu ƒom tsoe boŋue nye Kristotɔ gbagbe siwo dometɔ geɖe nɔ “ŋɔdzi me le gaƒoƒo sia gaƒoƒo [me]” abe Paulo ŋutɔ ene. Wona ‘nyɔnyrɔ’ Kristotɔ amesiaminawo ‘ɖe Kristo ƒe ku me.’ (Romatɔwo 6:3) Tso esime wosi ami na wo la, wole ‘nyɔnyrɔ nam wo’ ɖe agbenɔnɔ si ana woava ku abe alesi Kristo kui ene me le kpɔɖeŋumɔ nu. (Marko 10:35-40) Mɔkpɔkpɔ si anɔ wo si woatsɔ akue nye be woafɔ wo ɖe tsitre ayi dziƒo le ŋutikɔkɔe me.—Korintotɔwo I, 6:14; Filipitɔwo 3:10, 11.

15. Ŋɔdzinu kawo mee Paulo anya to, eye aleke tsitretsitsia dzixɔse na wòte ŋu do dzii?

¹⁵ Azɔ Paulo ɖe eme be ye ŋutɔ yedo go afɔku ale gbegbe be wòte ŋu gblɔ be: “Gbesiagbee mekuna.” Be amewo nagagblɔ be ele ami ɖem ɖe nya la o ta la, Paulo gblɔ kpee be: “Metà miaƒe kafukafu, si le asinye le Kristo Yesu, mía Aƒetɔ me.” Kpukpui sia xlẽ le The Jerusalem Bible me be: “Nɔviwo, medzea ŋgɔ ku gbesiagbe eye mate ŋu atsɔ dada si mienye nam la aka atam le Kristo Yesu mía Aƒetɔ la me.” Paulo ƒo nu tso ‘aʋawɔwɔ kple lã wɔadãwo le Efeso’ ŋu le kpukpui 32 lia wònye afɔku siwo me wòto ƒe kpɔɖeŋu. Zi geɖe la, Romatɔwo daa nuvlowɔlawo ɖe lã wɔadãwo dome wokuna le fefewɔƒewo. Ne Paulo to avuwɔwɔ kple lã wɔadãwo ŋutɔŋutɔ me la, ke anye be etsi agbe le Yehowa ƒe kpekpeɖeŋu me. Tsitretsitsi mɔkpɔkpɔa manɔmee la, anye bometsitsi nyateƒe be wòanɔ agbe si ana wòatsɔ eɖokui ade afɔku sia me. Ne ɖe etsɔmegbenɔnɔ ƒe mɔkpɔkpɔ aɖeke meli o la, anye gɔmesese boo aɖeke manɔ nɔnɔme sesẽ siwo me wòto kple nusiwo wòtsɔ sa vɔe le Mawu subɔsubɔ me ŋu o. Paulo gblɔ be: “Ne [womafɔ] ame kukuwo ɖe tsitre o la, ekema ‘minɛ míaɖu nu, eye míano nu, elabena etsɔ míele kuku ge!’ ”—Korintotɔwo I, 15:31, 32; kpɔ Korintotɔwo II, 1:8, 9; 11:23-27.

16. (a) Anye afikae nyagbɔgblɔ si nye “minɛ míaɖu nu, eye míano nu, elabena etsɔ míele kuku ge” la dzɔ tso? (b) Afɔku kawoe nɔ nukpɔsusu sia ƒe amesinɔnɔ me?

¹⁶ Ðewohĩ Yesaya 22:13 me nyawoe Paulo yɔ, si ƒo nu tso Yerusalem-nɔla tosẽlawo ƒe nɔnɔme si me afɔku nɔ ŋu. Alo ɖewohĩ Epikurotɔwo ƒe dzixɔsewoe nɔ susu me nɛ, amesiwo ɖe alɔme le agbenɔnɔ le ku megbe ƒe mɔkpɔkpɔ ɖesiaɖe ŋu hexɔe se be ŋutilãmevivisese koŋue nye nu nyuitɔ kekeake si woate ŋu akpɔ le agbe me. Eka ke wòwɔnɛ o, ‘míaɖu nu ano nu’ ƒe nukpɔsusua menye mawusosroɖa ƒe agbenɔnɔ o. Eyata Paulo xlɔ̃ nu be: “Migana woable mi o! Habɔbɔ vɔ̃wo gblẽa nuwɔna nyuiwo.” (Korintotɔwo I, 15:33) Afɔku ate ŋu anɔ hadede kple amesiwo gbe tsitretsitsia me. Ðewohĩ hadede sia hã gbɔe kuxi siwo gbɔ wòle be Paulo nakpɔ le Korinto-hamea me tso, si ƒe ɖewoe nye gbɔdɔdɔ ƒe agbegbegblẽnɔnɔ, mamã, amekpɔkplɔ yi ʋɔnui, kple bubumademade Aƒetɔ ƒe Fiẽnuɖuɖua ŋu.—Korintotɔwo I, 1:11; 5:1; 6:1; 11:20-22.

17. (a) Nuxlɔ̃ame kae Paulo na Korintotɔwo? (b) Nyabiabia kawoe gali siwo ŋu wòle be míaɖo?

¹⁷ Paulo to esia me tsɔ kakaɖedzi xlɔ̃ nu Korintotɔwo be: “Mizu mo xexee tɔwo vavã, eye migawɔ nuvɔ̃ o! Elabena simadzemadze Mawu le ame aɖewo me; ŋukpedodo mi ta megblɔe ɖo.” (Korintotɔwo I, 15:34) Tsitretsitsia ŋuti nukpɔsusu gbegblẽ na ame aɖewo meganɔ ŋute le gbɔgbɔ me o, abe ɖe womu aha ene. Ehiã be woanyɔ, eye woanɔ mo xexi. Egbea hã, ele be Kristotɔ amesiaminawo nanɔ ŋudzɔ le gbɔgbɔ me eye womagana xexe sia me ɖikeke ƒe nukpɔsusuwo nakpɔ ŋusẽ ɖe wo dzi o. Ele be woalé woƒe tsitretsitsi ayi dziƒo ƒe mɔkpɔkpɔa me ɖe asi sesĩe. Gake biabia aɖewo ganɔ anyi—na Korintotɔwo ɣemaɣi kple na míawo hã egbea. Le kpɔɖeŋu me, alekee woafɔ ame 144,000 la ayi dziƒoe? Eye ame miliɔn geɖe bubu siwo gale yɔdo me eye dziƒoyiyi ƒe mɔkpɔkpɔ mele wo si o ya ɖe? Nukae tsitretsitsia afia na amesiawo? Míadzro Paulo ƒe tsitretsitsia ŋuti numeɖeɖe mamlɛa me le nyati si kplɔe ɖo me.

[Etenuŋɔŋlɔ]

Èɖo Ŋku Wo Dzia?

◻ Numekɔkɔ kae Yesu na le tsitretsitsia ŋu?

◻ Amekawoe nye Kristo ƒe tsitretsitsi ŋuti ɖaseɖilawo dometɔ aɖewo?

◻ Nukata wotɔ gbe tsitretsitsi ƒe nufiafia la, eye aleke Paulo wɔ nu ɖe enui?

◻ Nukata tsitretsitsia dzixɔxɔse le vevie na Kristotɔ amesiaminawo?

[Nɔnɔmetata si le axa 15]

Yairo vinyɔnuvia va zu kpeɖodzi be woate ŋu afɔ amewo ɖe tsitre

[Nɔnɔmetata si le axa 16, 17]

Tsitretsitsi mɔkpɔkpɔa manɔmee la, gɔmesese manɔ Kristotɔ nuteƒewɔlawo ƒe xɔsetaku ŋu o