Ðe Wò Ðoɖowo Wɔ Ðeka Kple Mawu Ƒe Tameɖoɖoa?

XEVI ɣi flukpee aɖe si dzia ha si woyɔna be Clark’s nutcracker la nye xe aɖe si nɔa dzodzom le ave siwo le Dziehe Amerika ƒe ɣedzeƒe la me. Efɔa nuku siwo ade 33,000 heɖia wo ɖe to me ƒe sia ƒe, eye wòdzraa wo ɖo ɖe teƒe vovovo 2,500 aɖewo tsɔ dzrana ɖo ɖe vuvɔŋɔli si fana miamiamia la ŋu. Nyateƒee, xevi sia ‘dze nunya eteƒe mekɔ o’ le mɔ si nu wòdzraa nuɖuɖu ɖo ɖi ɖe etsɔ ŋu le la me.—Lododowo 30:24.

Ŋutete ɖedzesi siwo kɔ boo wu esia ye le amegbetɔwo si. Le Yehowa ƒe nuwɔwɔ siwo le anyigba dzi dome la, amegbetɔwo ko sie ŋutete le be woasrɔ̃ nu tso nu siwo dzɔ va yi la me, eye woana nusɔsrɔ̃ siawo nakpɔ ŋusẽ ɖe nyametsotso siwo woagawɔ le etsɔ me la dzi. Nunyala Salomo gblɔ be: “Tameɖoɖo geɖewo le amegbetɔ ƒe dzi me.”—Lododowo 19:21.

Togbɔ be ele alea hã la, zi geɖe la, amegbetɔwo tua woƒe ɖoɖowo ɖe nu si wosusu be etsɔme anye la dzi. Le kpɔɖeŋu me, èwɔa ɖoɖo ɖe dɔ si nàwɔ etsɔ la ŋu hesusunɛ be ɣe adze eye yeakpɔtɔ anɔ agbe. Kpeɖodzi le nususukpɔ gbãtɔa ŋu; gake kakaɖedzi boo aɖeke mele evelia ya ŋu o. Biblia ŋlɔla Yakobo gblɔe wòsɔ be: “Mienya nu si miaƒe agbe ava zu etsɔ o.”—Yakobo 4:13, 14.

Gbɔdzɔgbɔdzɔ ma mele Yehowa Mawu ya ŋu o. Enya “nuwuwu” la tso “gɔmedzedzea me ke.” Nu ka kee ɖadzɔ o, eƒe tameɖoɖo si wòɖe gblɔ la ava eme. Egblɔ be: “Nye tameɖoɖo ava me, eye mawɔ nye didiwo katã dzi.” (Yesaya 46:10) Ekema nu kae dzɔna ne amegbetɔwo ƒe ɖoɖowo tsi tsitre ɖe Mawu tɔwo ŋu?

Ne Amegbetɔwo Ƒe Ðoɖowo Tsi Tsitre Ðe Mawu Tɔwo Ŋu

Ƒe 4,000 aɖewoe nye esi va yi la, Babel Xɔ Kɔkɔ tulawo ɖoe be yewoana amegbetɔwo nagakaka ɖe anyigba dzi o. Wogblɔ be: “Mina míatso du, eye míatu [xɔ] kɔkɔ aɖe, si tame natɔ dziƒo, ne míaƒe ŋkɔ nanyɔ, bena míagakaka ɖe anyigba blibo la katã dzi o!”—1 Mose 11:4.

Ke hã, tame si Mawu ɖo ɖe anyigba ŋu la to vovo kura. Egblɔ na Noa kple viaŋutsuwo be: “Midzi, ne miasɔ gbɔ, eye miayɔ anyigba la dzi!” (1 Mose 9:1) Aleke Mawu wɔ nu ɖe aglãdzela siwo nɔ Babel la ƒe tameɖoɖo ŋui? Etɔtɔ woƒe gbe ale be womegate ŋu nɔ wo nɔewo ƒe nyawo gɔme sem o. Nu kae do tso eme? ‘Yehowa na bena, wokaka tso afi ma ɖe anyigba blibo la katã dzi.’ (1 Mose 11:5-8) Wozi Babel xɔtulawo dzi wosrɔ̃ nu vevi aɖe. Ne amegbetɔwo ƒe ɖoɖowo tsi tsitre ɖe Mawu ƒe tameɖoɖo ŋu la, ‘Yehowa ƒe adaŋudedee nɔa anyi.’ (Lododowo 19:21) Ðe nèɖea mɔ nusɔsrɔ̃ siwo le nu siwo dzɔ va yi me la kpɔa ŋusẽ ɖe wò agbenɔnɔ dzia?

Ŋutsu Kesinɔtɔ Aɖe Ƒe Bometsinuwɔwɔ

Ðewohĩ màɖoe be yeatu xɔ kɔkɔ o ya, gake egbea la, ame geɖe wɔa ɖoɖo be ga geɖe nanɔ yewo si le gadzraɖoƒe, eye wolia kɔ ŋutilãmenunɔamesiwo ɖi bene yewoate ŋu anɔ agbe bɔkɔɔ ne yewoxɔ dzudzɔ le dɔ me. Esɔ le dzɔdzɔme nu be ame nadi be yeaɖu yeƒe agbagbadzedzewo me tsonuwo. Salomo ŋlɔ bena: “Be ame aɖe naɖu nu ano nu, eye wòanyo nɛ le eƒe agbagbadzedzewo katã me la, Mawu ƒe nunanae.”—Nyagblɔla 3:13.

Yehowa abia akɔnta mí tso ale si míele nunana sia zãmee ŋu. Anɔ abe ƒe 2,000 kloe nye esia la, Yesu wɔ kpɔɖeŋu aɖe tsɔ te gbe ɖe esia ƒe vevienyenye dzi na eƒe nusrɔ̃lawo. Egblɔ be: “Kesinɔtɔ aɖe ƒe anyigba wɔ nu nyuie. Eya ta ete bubu le eɖokui me be, ‘Esi teƒe aɖeke megale asinye madzra nye agblemenukuwo ɖo o ɖe, nu ka wɔ ge mala?’ Eya ta egblɔ be, ‘Mawɔe ale: Mamu nye nudzraɖoƒewo, eye matu esiwo lolo wu; afi mae madzra nye nuku la katã kple nye nu nyuiwo katã ɖo; eye magblɔ na nye luʋɔ be: “Luʋɔ, wodzra nu nyui geɖe ɖo ɖi na wò hena ƒe geɖewo; ɖe dzi ɖi, ɖu nu, no nu, na dzi nadzɔ wò.”’” (Luka 12:16-19) Edze abe susu le kesinɔtɔ la ƒe ɖoɖoa me ene, alo? Edze abe ŋutsu si ŋu woƒo nu tsoe le kpɔɖeŋua me la nɔ dzadzram ɖo ɖe eƒe etsɔmenuhiahiãwo ŋu abe ale si xevi si ŋkɔe nye Clark’s nutcracker si ŋu míeƒo nu tsoe va yi la wɔnɛ ene.

Gake ŋutsua ƒe nuŋububu mesɔ o. Yesu yi edzi be: “Mawu gblɔ nɛ be, ‘Movitɔ, woabia wò luʋɔ tso asiwò zã sia me. Ekema ame ka tɔe nu siwo nèdzra ɖo ɖi la ava zu?’” (Luka 12:20) Ðe Yesu nɔ nu ƒom nɔ tsitre tsim ɖe nya si Salomo gblɔ be dɔwɔwɔ kple nu nyui siwo wokpɔna tso eme la nye nunana tso Mawu gbɔ la ŋua? Ao. Ke nya ka gblɔmee Yesu nɔ? Yesu gblɔ be: “Nenemae wònɔna na ame si ƒo nu xɔasiwo nu ƒu na eɖokui, gake menye kesinɔtɔ le Mawu gbɔ o.”—Luka 12:21.

Yesu nɔ nu fiam eƒe nyaselawo be Yehowa di be míabu Ye ŋu ne míele míaƒe ɖoɖowo wɔm. Ŋutsu kesinɔtɔ la ate ŋu anye kesinɔtɔ le Mawu gbɔ ne edi mɔ siwo dzi wòato eƒe ɖokuitsɔtsɔ na Mawu, nunya, kple lɔlɔ̃ nadzi ɖe edzi. Ŋutsua ƒe nyagbɔgblɔwo ɖee fia be metsɔ ɖeke le nu mawo me o; eye metsɔ ɖeke le eƒe nuku aɖewo gbegblẽɖi be ame dahewo nafɔ loo alo wo tsɔtsɔ asa numevɔ na Yehowa me o. Ŋutsu kesinɔtɔa metia mawusubɔsubɔ me nuwɔna siawo kple ɖokuitɔmadimadi ƒe nuwɔnawo yome kura le eƒe agbe me o. Eya ŋutɔ ƒe dzodzro kple dzidzemekpɔkpɔ ŋu koe eƒe ɖoɖowo kuna ɖo.

Ède dzesii be ame geɖe ƒe taɖodzinu vevitɔ le agbe me sɔ kple ŋutsu kesinɔtɔ si ŋu Yesu ƒo nu tsoe la tɔa? Míeɖanye ame siwo si alɔme le loo alo ame siwo dzi nu mede o, ele bɔbɔe ŋutɔ be míage ɖe ŋutilãmenuwo yome titi ƒe mɔ me ahaɖe mɔ gbe sia gbe nuhiahiãwo kple nudzodzrowo natutu gbɔgbɔmenuwo aɖo nɔƒe evelia. Nu kae nàte ŋu awɔ atsɔ aƒo asa na mɔ sia?

Ðoɖowɔwɔ Ðe Agbe “Si Sɔ Wòle Be Ame Nanɔ” Ŋu

To vovo na ŋutsu kesinɔtɔ si ŋu Yesu ƒo nu tsoe le eƒe kpɔɖeŋua me la, ànya nɔ akɔ kpem kple gakuxiwo. Ke hã, ne srɔ̃tɔe nènye la, anɔ eme godoo be èwɔ ɖoɖo ɖe wò ƒomea ƒe nuhiahiãwo gbɔ kpɔkpɔ ŋu, eye ne anya wɔ la, be ye viwo nade suku nyuie. Ne tree nènye la, anɔ eme be wò ɖoɖoe nye be yeakpɔ dɔ aɖe awɔ alo akpɔ esi wɔm yele la ta, ale be yeaganye agba na ame bubuwo o. Esiawo nye ɖoɖo siwo ŋu viɖe le.—2 Tesalonikatɔwo 3:10-12; 1 Timoteo 5:8.

Togbɔ be ele alea hã la, ate ŋu adzɔ be dɔwɔwɔ, nuɖuɖu, nunono—nu siwo amewo buna be wonye agbe si sɔ wòle be ame nanɔ la—nana be ame ƒe ɖoɖowo natsi tsitre ɖe Mawu ƒe tameɖoɖo ŋu. Aleke esia ate ŋu adzɔe? Yesu gblɔ be: “Ale si Noa ƒe ŋkekeawo nɔ la, nenema kee Amegbetɔvi la ƒe anyinɔnɔ la hã anɔ. Elabena ale si wowɔ le ŋkeke mawo me do ŋgɔ na tsiɖɔɖɔa, wonɔ nu ɖum, nɔ nu nom, ŋutsuwo nɔ srɔ̃ ɖem, eye wonɔ nyɔnuwo tsɔm na be woaɖe, va se ɖe ŋkeke si dzi Noa ge ɖe aɖakaʋu la me, eye wometsɔ ɖeke le eme o, va se ɖe esime tsiɖɔɖɔa va, eye wòkplɔ wo katã yii la, nenema kee Amegbetɔvi la ƒe anyinɔnɔ hã anɔ.”—Mateo 24:37-39.

Do ŋgɔ na Tsiɖɔɖɔa la, ame akpa gãtɔ kpɔa dzidzɔ ɖe agbe si ɖewohĩ wobuna be eyae nye agbe si sɔ la nɔnɔ ŋu. Gake woƒe kuxiae nye be “wometsɔ ɖeke le” tame si Mawu ɖo be yeatsɔ xexea me katã ƒe tɔɖɔɖɔ atsrɔ̃ xexe vɔ̃ɖi ma la me o. Ðikekemanɔmee la, wobui be susu aɖeke menɔ ale si Noa nɔ agbe nɔm ɣemaɣi la me o. Gake, esi Tsiɖɔɖɔa va la, agbenɔnɔmɔ si Noa kple eƒe ƒomea tia la mee nunya nɔ wu.

Egbea la, kpeɖodzi siwo katã li la ɖee fia be míele nuwuɣia me. (Mateo 24:3-12; 2 Timoteo 3:1-5) Eteƒe madidi o, Mawu Fiaɖuƒea “agbã” nuɖoanyi siwo li fifia “eye wòagblẽ wo.” (Daniel 2:44) Le Fiaɖuƒe ma te la, woatrɔ anyigba la wòazu paradiso. Fiaɖuƒea aɖe dɔléle kple ku ɖa. (Yesaya 33:24; Nyaɖeɖefia 21:3-5) Anyigba dzi nuwɔwɔwo katã anɔ anyi le ɖekawɔwɔ me, eye dɔ magawu wo azɔ o.—Psalmo 72:16; Yesaya 11:6-9.

Gake hafi Yehowa naɖe afɔ siawo la, eɖo tame be “woaɖe gbeƒã” yeƒe Fiaɖuƒe ŋuti nya nyuia le “anyigba blibo la katã dzi, be wòanye ɖaseɖiɖi na dukɔwo katã.” (Mateo 24:14) Le ɖekawɔwɔ me kple Mawu ƒe tameɖoɖo sia la, Yehowa Ðasefo miliɔn adre kloe le gbeƒã ɖem nya nyui sia le dukɔ 236 me le gbegbɔgblɔ siwo wu alafa ene me.

Yehowa Ðasefowo ƒe agbenɔnɔ ate ŋu awɔ mo yaa na amewo le mɔ aɖewo nu—aɖi kokoe na wo gɔ̃ hã. (2 Petro 3:3, 4) Abe ale si wònɔ le ame siwo nɔ agbe do ŋgɔ na Tsiɖɔɖɔa gome ene la, gbe sia gbe dɔwɔnawo ŋu koe ame akpa gãtɔ tsia dzi ɖo egbea. Woate ŋu abu ame sia ame si gbea agbenɔnɔ ɖe mɔ si nu amewo buna be eyae nye esi sɔ nu la be meda sɔ o. Gake le ame siwo xɔa Mawu ƒe ŋugbedodowo dzi sena ya gome la, agbenɔnɔ si wotu ɖe Mawu subɔsubɔ dzi koŋ ye nye esi da sɔ vavã.

Eya ta èɖanye kesinɔtɔ alo ame dahe alo ame si dzi nuwo de vie o, nunya le eme be nànɔ ɖoɖo siwo nèwɔ ɖe etsɔme ŋu la me dzrom tso ɣeyiɣi yi ɣeyiɣi. Ne èle esia wɔm la, nɔ ɖokuiwò biam be, ‘Ðe nye ɖoɖowo wɔ ɖeka kple Mawu ƒe tameɖoɖoa?’

[Nɔnɔmetata si le axa 11]

Ne ameƒomea ƒe ɖoɖowo tsi tsitre ɖe Mawu ƒe tameɖoɖo ŋu la, Yehowa ƒe adaŋudedee nɔa anyi

[Nɔnɔmetata si le axa 12]

Esime ŋutsu kesinɔtɔ si ŋu Yesu ƒo nu tsoe la nɔ eƒe ɖoɖowo wɔm la mebu Mawu ƒe tameɖoɖo ŋu o