Te Ðe Mawu Ŋu
‘Eƒo Koko Le Yehowa Ŋku Me’
“MEBUA ɖokuinye be nyemedze kura o.” Nya siae ŋutsu aɖe, si wonyi le ƒome si me wosubɔa Mawu le me, gake wòva dze aglã la, gblɔ. Esi wònɔ agbagba dzem be yeatrɔ yeƒe agbenɔnɔ la, esusui be Mawu matsɔe ake ye gbeɖe o. Gake esi ŋutsu trɔdzime sia xlẽ Biblia ŋutinya si ku ɖe Manase ŋu, si dze le 2 Kronika 33:1-17 la, ena wòka ɖe edzi be Mawu atsɔe ake ye. Ne nu vɔ̃ siwo nèwɔ va yi na nèle sesem le ɖokuiwò me be yeƒe nu mate ŋu adze Mawu ŋu o la, ekema nu si me Manase to la ate ŋu afa akɔ na wò.
Ƒome si me wosubɔa Mawu le mee wonyi Manase le. Fofoa, Xizkiya, nye Yuda fia siwo ƒe nu nyui wɔwɔ ɖe dzesi wu la dometɔ ɖeka. Anɔ abe ƒe etɔ̃ megbe tso esime Mawu dzi Manase fofo ƒe agbenɔƒewo ɖe edzi nukutɔe, ye wodzii. (2 Fiawo 20:1-11) Ðikekemanɔmee la, Xizkiya abu vi sia be enye nunana tso Mawu gbɔ le esi wòkpɔ nublanui na ye ta, eye wòadze agbagba be yeahee be wòatsɔ dzo ɖe tadedeagu dzadzɛa ŋu. Ke hã, menye ɣesiaɣie dzila mawuvɔ̃lawo ƒe viwo toa wo dzilawo ƒe ʋe me o. Aleae wònɔ le Manase hã gome.
Manase mexɔ wu ƒe 12 hafi fofoa ku o. Nublanuitɔe la, Manase wɔ “nu si nye vɔ̃ le Yehowa ŋku me.” (Kpukpui 1, 2) Ðe wòanye be aɖaŋuɖola siwo mebua tadedeagu dzadzɛa ɖe ɖeke me o lae kpɔ ŋusẽ ɖe fia sia, si nye ɖevi dzaa la, dzia? Biblia megblɔe o. Nu si wògblɔ na mí koe nye be Manase ƒo eɖokui ɖe trɔ̃subɔsubɔ kple ŋutasẽnuwo wɔwɔ me atraɖii. Eɖi vɔsamlekpuiwo na alakpamawuwo, etsɔ viawo sa vɔe, eka afa, eye wòli legba aɖe ɖe Yehowa ƒe gbedoxɔ me le Yerusalem. Manase sẽ dzi me, togbɔ be Yehowa, Mawu si wɔ nukunu si na wodzii la, xlɔ̃ nui enuenu hã.—Kpukpui 3-10.
Mlɔeba Yehowa na wode kɔsɔkɔsɔ Manase hekplɔe yi Babilon. Esi wònɔ aboyo me le afi ma la, mɔnukpɔkpɔa su esi wòde ŋugble le ale si wònɔ agbee la ŋu. Ðe wòva kpɔe dze sii be yeƒe legba, siwo ŋu ŋusẽ mele o, eye agbe hã mele wo me o la, mete ŋu kpɔ ye ta oa? Ðe wòɖo ŋku nu siwo fofoa mawuvɔ̃la la fiae le eƒe ɖevime la dzia? Aleke kee wòɖale o, nu si míenyae nye be Manase trɔ dzi me. Nuŋlɔɖia gblɔ be: “Eƒo koko le Yehowa, eƒe Mawu la ŋku me, eye wòbɔbɔ eɖokui ɖe anyi vevie . . . [Eye wòdo] gbe ɖa nɛ.” (Kpukpui 12, 13) Gake ɖe Mawu ate ŋu atsɔ ame aɖe si wɔ nu vɔ̃ gã mawo gbegbe la ƒe nu vɔ̃wo akeea?
Manase trɔ dzi me vavã, eya ta Yehowa kpɔ nublanui nɛ. Mawu se eƒe kokoƒoƒowo, “eye wògakplɔe va Yerusalem le eƒe fiaɖuƒe la me.” (Kpukpui 13) Be Manase naɖo kpe edzi be yetrɔ dzi me vavã la, ewɔ nu sia nu si wòate ŋui tsɔ ɖɔ eƒe mɔ vɔ̃wo ɖo, eɖe legbawo katã ɖa le eƒe fiaɖuƒea me, eye wòxlɔ̃ nu eƒe amewo be “woasubɔ Yehowa.”—Kpukpui 15-17.
Ne nu vɔ̃ siwo nèwɔ va yi la na nèle sesem le ɖokuiwò me be yemedze be Mawu natsɔe ake ye gbeɖe o la, ekema na nu si me Manase to la nafa akɔ na wò. Mawu ƒe Nyaa, si eƒe gbɔgbɔ ʋã amewo woŋlɔ la, ƒe akpa aɖee nuŋlɔɖi sia nye. (Romatɔwo 15:4) Eya ta edze kɔtɛ be Yehowa di be míanya be ‘yelɔ̃a tsɔtsɔke.’ (Psalmo 86:5) Menye nu vɔ̃ si amea wɔ lae wòkpɔna o, ke boŋ dzi ƒe nɔnɔme si le esi lae wòkpɔna. Ne nu vɔ̃ si amea wɔ la te ɖe edzi, eye wòtrɔ le eƒe nu vɔ̃wo yome, eye wòɖoe kplikpaa be yeawɔ nu dzɔdzɔe hedo gbe ɖa la, ekema efia be ‘ele koko ƒom le Yehowa ŋku me,’ abe ale si ko Manase hã wɔe ene.—Yesaya 1:18; 55:6, 7.
Biblia ƒe akpa si míade dzi ƒo na wò be nàxlẽ le January me: