Ðe Nèka Ðe Ale Si Yehowa Wɔa Nui Dzia?

1-2. (a) Nu ka tae wòsesẽna na ame geɖe be woaka ɖe ame siwo le ŋusẽnɔƒewo dzi egbea? (b) Nu kawo mee míadzro le nyati sia me?

AME geɖe megakana ɖe ame siwo le ŋusẽnɔƒewo dzi egbea o. Nu si tae nye be, wode dzesii be dziɖuɖuwo kple woƒe se geɖewo dea kesinɔtɔwo kple ŋusẽtɔwo dzi, gake womedea ame dahewo ya dzi o. Biblia gblɔe eme kɔ be: “Amegbetɔ ɖua fia ɖe amegbetɔ dzi hena eƒe gbegblẽ.” (Nyagb. 8:9) Azɔ hã subɔsubɔhakplɔla aɖewo wɔa nu gbegblẽwo si wɔe be ame aɖewo megakana ɖe Mawu dzi o. Eya ta ne míete Biblia sɔsrɔ̃ kple ame aɖea, ehiã be míakpe ɖe eŋu wòaka ɖe Yehowa kple ame siwo wòɖo be woaxɔ ŋgɔ le anyigba dzi la dzi.

² Gake menye Biblia nusrɔ̃viwo koe wòhiã be woasrɔ̃ ale si woaka ɖe Yehowa kple eƒe habɔbɔa dzi o. Ne míele Yehowa subɔm ƒe gbogbo aɖewoe nye esia hãa, ele be míasrɔ̃ ale si míaka ɖe edzi bliboe be, ale si Yehowa wɔa nui ye nye nyuitɔ ɣesiaɣi. Ɣeaɖewoɣia, nanewo adzɔ, siwo ate ŋu ado ale si míeka ɖe Yehowa dzii la akpɔ. Le nyati sia me la, míadzro nu etɔ̃ aɖewo siwo ate ŋu ado míaƒe xɔse kpɔa me; woawoe nye: (1) ne míele Biblia me nudzɔdzɔwo xlẽm, (2) ne míexɔ mɔfiamewo tso Yehowa ƒe habɔbɔa gbɔ, kple (3) ne nɔnɔme sesẽwo va mía dzi le etsɔme.

 3. Aleke Biblia me nudzɔdzɔ aɖewo xexlẽ ate ŋu ado ale si míexɔ Yehowa dzi sea akpɔ?

³ Ne míele Mawu ƒe Nyaa xlẽma, míate ŋu anɔ mía ɖokui biam be ‘Nu ka tae Mawu wɔ nu ɖe ame aɖewo ŋu le mɔ aɖewo nu, eye wòtso nya me le mɔ aɖewo nu abe ale si wòwɔe ene?’ Le kpɔɖeŋu me, míexlẽe le Mose Ƒe Agbalẽ Enelia me be Yehowa tso kufia na Israel ŋutsu aɖe si nɔ nake fɔm le Sabat ŋkekea dzi. Le Samuel Ƒe Agbalẽ Evelia mea, míexlẽe be, ƒe alafa aɖewo megbea, Yehowa tsɔ Fia David si wɔ ahasi eye wòwu ame la ƒe nu vɔ̃wo kee. (4 Mose 15:32, 35; 2 Sam. 12:9, 13) Míate ŋu anɔ mía ɖokui biam be, ‘Nu ka tae Yehowa tsɔ David si wɔ ahasi eye wòwu ame la ƒe nu vɔ̃wo kee, gake wòna wowu nakefɔla si wɔ nu vɔ̃ sue aɖe ya?’ Be míaɖo nya sia ŋua, na míakpɔ nu vevi etɔ̃ aɖewo siwo wòle be woanɔ susu me na mí ne míele Biblia xlẽm ɖa.

 4. Aleke 1 Mose 18:20, 21 kple 5 Mose 10:17 kpe ɖe mía ŋu míegaka ɖe Yehowa ƒe nyametsotsowo dzi?

⁴ Menye ɣesiaɣie Biblia ƒoa nu tso nudzɔdzɔ aɖe ŋu tsitotsito o. Le kpɔɖeŋu me, míenya be David trɔ dzi me ŋutɔŋutɔ. (Ps. 51:2-4) Gake ame ka tɔgbie ŋutsu si da Sabat sea dzi ya nye? Ðe wòse veve ɖe nu si wòwɔa ta? Ðe wògbe wɔwɔ ɖe Yehowa ƒe sewo dzi va yia? Ðe wòŋe aɖaba ƒu nuxlɔ̃ame siwo wonae va yi dzi alo do toku wo gɔ̃ hã? Biblia megblɔe o. Gake míate ŋu aka ɖe edzi be, Yehowa “mewɔa nu madzɔmadzɔ gbeɖe o.” (5 Mose 32:4) Enɔa te ɖe nyateƒenyawo dzi hafi tsoa nya me, ke menye wobewobewo, nazãbubu kple nu bubu siwo wɔnɛ be amegbetɔwo ya metea ŋu tsoa nya me nyuie o la dzi o. (Xlẽ 1 Mose 18:20, 21; 5 Mose 10:17.) Ne míesrɔ̃a nu tso Yehowa kple eƒe sewo ŋua, ana míagava ka ɖe eƒe nyametsotsowo dzi geɖe wu. Eya ta ne míexlẽ Biblia me nudzɔdzɔ aɖewo, eye wofɔ biabia aɖewo ɖe te le míaƒe susu me, siwo mímekpɔ ŋuɖoɖo na fifia o la, míate ŋu aka ɖe edzi be mía Mawu la “ƒe mɔwo katã le dzɔdzɔe.”—Ps. 145:17.

 5. Aleke blibomademade wɔnɛ be míeƒoa nya ta nyuie ɣesiaɣi o? (Kpɔ aɖaka si nye “Blibomademade Wɔnɛ Be Nu Si Míesusu Tso Nya Aɖe Ŋu Mesɔna Ɣesiaɣi O” hã.)

⁵ Míaƒe blibomademade wɔnɛ be nu si míesusuna tso nya aɖe ŋu la mesɔna ɣesiaɣi o. Esi Mawu wɔ mí ɖe eƒe nɔnɔme nu ta, míawo hã míedina be woawɔ nu ɖe ame sia ame ŋu nyuie. (1 Mose 1:26) Gake esi míede blibo o ta, ne míesusu be míenya nyateƒe bliboa tso nya aɖe ŋu hã, ate ŋu adzɔ be mímaƒo nya ta nyuie o. Le kpɔɖeŋu me, ɖo ŋku edzi be esime Yehowa tiae be yeakpɔ nublanui na Niniwetɔwoa, Yona do dziku. (Yona 3:10–4:1) Ke hã, míenya nu si va do tso eme. Niniwetɔ siwo wu ame 120,000 ye trɔ dzi me eye wotsi agbe! Edze ƒãa be, Yona boŋue wòhiã be wòaɖɔ eƒe susu ɖo, ke menye Yehowa o.

 6. Nu ka tae mehiã be Yehowa naɖe eƒe nyametsotsowo me na mí o?

⁶ Mehiã be Yehowa nagblɔ susu si ta wòwɔ nane alo di be yeawɔ nane ɖo la na mí kokoko o. Ele eme be, Yehowa ɖe mɔ na esubɔla siwo nɔ anyi le blema be woagblɔ woƒe susu le nane si yewɔ alo di be yeawɔ ŋu. (1 Mose 18:25; Yona 4:2, 3) Eye ɣeaɖewoɣia, eɖea susua me na wo ya. (Yona 4:10, 11) Ke hã, mele na Yehowa be wòaɖe eƒe nyametsotsowo me na mí kokoko o. Esi wònye Wɔlaa ta, mehiã be wòabia mɔ le mía gbɔ hafi awɔ nane, alo ne ewɔ nane vɔa, wòava ɖe eme na mí o.—Yes. 40:13, 14; 55:9.

 7. Togbɔ be míeka ɖe Yehowa dzi hã, nu ka wɔwɔe ate ŋu asesẽ na mí, eye nu ka tae?

⁷ Míelɔ̃ ɖe edzi tso dzi blibo me be Yehowa wɔa nu dzɔdzɔe ɣesiaɣi. Ke hã, nu si sesẽna na mí koŋue nye ale si míaka ɖe ame siwo wòɖo be woaxɔ ŋgɔa dzi. Ate ŋu anɔ wɔwɔm na mí be, ‘Yehowae le mɔ fiam nɔvi siwo le ŋgɔ xɔm loo, alo woawo ŋutɔ ƒe susu ko zãm wole?’ Ðewohĩ le blema la, susu ma nɔ ame aɖewo si. Bu kpɔɖeŋu siwo ŋu míeƒo nu tsoe le memama 3 lia me ŋu kpɔ. Ate ŋu anɔ wɔwɔm na ŋutsu si da Sabat sea dzi la ƒe ƒometɔ aɖe be, ‘Nyateƒee wònye be Mose tsɔ nya sia ɖo Yehowa ŋkume hafi tso kufia nɛa?’ Eye esi David wɔ ahasi kple Hititɔ Uriya srɔ̃a, ate ŋu anɔ wɔwɔm na Uriya xɔlɔ̃ aɖe be, esi David nye fia ta, ezã eƒe ɖoƒe tsɔ trɔ gbo nyaa, ale be woagahe to si wòdze na la nɛ o. Nyateƒeae nye be, Yehowa ka ɖe ame siwo wòɖo be woaxɔ ŋgɔa dzi. Eya ta, ne míeka ɖe wo dzi oa, ke efia be míeka ɖe Yehowa hã dzi o.

 8. Le Dɔwɔwɔwo 16:4, 5 ƒe nya nua, aleke Yehowa fia mɔ eƒe amewo le blema, eye aleke wòle ewɔm egbeae?

⁸ Egbea, Yehowa toa “kluvi nuteƒewɔla kple aɖaŋudzela” la dzi fiaa mɔ eƒe habɔbɔa ƒe akpa si le anyigba dzi. (Mat. 24:45) Abe dɔdzikpɔha si nɔ anyi le ƒe alafa gbãtɔ me enea, wokpɔa Mawu ƒe amewo ƒe dɔwo dzi le xexea me godoo, eye wonaa mɔfiame hamemetsitsiwo. (Xlẽ Dɔwɔwɔwo 16:4, 5.) Hamemetsitsiawo hã kpɔa egbɔ be hameawo wɔ ɖe mɔfiameawo dzi. Ne míewɔna ɖe mɔfiame siwo míexɔna tso habɔbɔa kple hamemetsitsiwo gbɔ dzia, míeɖenɛ fiana be míeka ɖe ale si Yehowa wɔa nui dzi.

 9. Go ka mee wòate ŋu asesẽ le be míawɔ ɖe hamemetsitsiwo ƒe mɔfiame dzi, eye nu ka tae wòate ŋu asesẽ na mí?

⁹ Ate ŋu asesẽ na mí ɣeaɖewoɣi be míawɔ ɖe hamemetsitsiwo ƒe nyametsotsowo dzi. Le kpɔɖeŋu me, ƒe aɖewoe nye esia wole asi trɔm le hame aɖewo kple nutome sue aɖewo ŋu. Esia wɔe be hamemetsitsiwo bia tso gbeƒãɖela aɖewo si be woaʋu ayi hame bubuwo me ale be woate ŋu azã Fiaɖuƒe Akpatawo wòaɖe vi wu. Ne wobia tso asiwò be nàyi hame bubu mea, ɖewohĩ, ate ɖe dziwò be yemaganɔ hame ɖeka me kple ye xɔlɔ̃wo kple ƒometɔwo o. Gake Mawue gblɔa hame si me gbeƒãɖela ɖe sia ɖe nanɔ la na hamemetsitsiwoa? Ao. Eye esia koŋue ate ŋu ana wòasesẽ na mí be míawɔ ɖe hamemetsitsiwo ƒe mɔfiamea dzi. Gake Yehowa ka ɖe hamemetsitsiawo dzi be woatso nya me nyuie, eye ele be míawo hã míaka ɖe wo dzi.b

10. Le Hebritɔwo 13:17 ƒe nya nua, nu ka tae wòhiã be míawɔ ɖe hamemetsitsiwo ƒe nyametsotsowo dzi?

¹⁰ Nu ka tae wòle be míawɔ ɖe hamemetsitsiwo ƒe nyametsotsowo dzi ne nyametsotso mawo medzɔ dzi na mí o gɔ̃ hã? Elabe ne míewɔe alea, enana ɖekawɔwɔ yia edzi nɔa Mawu ƒe amewo dome. (Ef. 4:2, 3) Ne mí katã míebɔbɔa mía ɖokui eye míewɔna ɖe hamemetsitsiwo ƒe nyametsotsowo dzia, hamea tsina. (Xlẽ Hebritɔwo 13:17.) Vevietɔ wua, míeɖenɛ fiana Yehowa be míeka ɖe edzi, eye míeka ɖe ame siwo wòɖo be woalé be na mí la dzi.—Dɔw. 20:28.

11. Nu kae akpe ɖe mía ŋu be míagaka ɖe mɔfiame siwo míexɔna tso hamemetsitsiwo gbɔa dzi geɖe wu?

¹¹ Míagate ŋu aka ɖe mɔfiame siwo míexɔna tso hamemetsitsiwo gbɔa dzi geɖe wu ne enɔa susu me na mí be wodoa gbe ɖa biaa gbɔgbɔ kɔkɔea ne wole nya siwo ku ɖe hamea ŋu la me dzrom. Azɔ hã, woléa ŋku ɖe Biblia me gɔmeɖosewo kple mɔfiame siwo Yehowa ƒe habɔbɔa na la ŋu nyuie. Woƒe didie nye be yewoadze Yehowa ŋu, eye yewoalé be na eƒe amewo ale si wòanya wɔ. Nɔvi wɔnuteƒe siawo nyae be yewoabu akɔnta na Yehowa Mawu ɖe ale si yewowɔ dɔ si wòde asi na yewo la ta. (1 Pet. 5:2, 3) Bu nya sia ŋu kpɔ: Esi ŋutigbalẽwo ƒe vovototo, subɔsubɔhawo, kple dunyahehe de mama amewo me le xexea mea, Yehowa ƒe amewo ya wɔ ɖeka, eye wole Mawu vavã ɖeka la subɔm le ŋutifafa me. Yehowa gbɔ koe wòate ŋu atso be ŋutifafa kple ɖekawɔwɔ sia nanɔ eƒe amewo dome!

12. Ne hamemetsitsiwo di be yewoakpɔe ɖa be ame aɖe trɔ dzi me nyateƒe la, nu kawo ŋue wòahiã be woalé ŋku ɖo?

¹² Yehowa de dɔ gã aɖe asi na hamemetsitsiwo be woakpɔ egbɔ be hamea le dzadzɛ. Ne ame aɖe wɔ nu vɔ̃ gã aɖea, Yehowa di be hamemetsitsiawo nadae akpɔ nenye be amea dze akpɔtɔ anɔ hamea me. Nu siwo ŋu hamemetsitsiwo léa ŋku ɖoa dometɔ aɖee nye be ɖe amea se veve ɖe nu si wòwɔ la ta ŋutɔŋutɔ hã. Amea ate ŋu agblɔ be yetrɔ dzi me, gake ɖe wòlé fu nu si wòwɔ la nyateƒea? Ðe wòɖoe kplikpaa be yemagawɔ nu vɔ̃ ma ake oa? Ne hadede vɔ̃woe kplɔe de nu vɔ̃a mea, ɖe wòle klalo be yeatso kadodo mawo mea? Hamemetsitsiawo doa gbe ɖa na Yehowa, wokua nyaa me be yewoanya nu si tututu dzɔ, kple nu si Biblia gblɔ tso eŋu, eye wodea dzesi ale si amea le sesem le eɖokui me tso nu gbegblẽ si wòwɔ la ŋu. Eyome wotsoa nya me nenye be ame si wɔ nu gbegblẽa dze akpɔtɔ anɔ hamea me. Le go aɖewo mea, ahiã be woaɖe amea le hamea me.—1 Kor. 5:11-13.

13. Ne woɖe mía xɔlɔ̃ alo ƒometɔ aɖe le hamea mea, nu ka ŋue míate ŋu atsi dzi ɖo?

¹³ Nu kawoe ate ŋu ado ale si míeka ɖe hamemetsitsiwo dzii la akpɔ? Ne ame si woɖe le haa me menye mía xɔlɔ̃ kplikplikpli alo ƒometɔ oa, ate ŋu anɔ bɔbɔe be míalɔ̃ ɖe hamemetsitsiawo ƒe nyametsotso dzi. Gake nu kae ate ŋu adzɔ ne amea nye mía xɔlɔ̃ kplikplikpli? Míate ŋu atsi dzi be hamemetsitsiawo melé ŋku ɖe nyateƒenyawo katã ŋu o, alo ate ŋu anɔ wɔwɔm na mí be, ‘ɖe wokpɔ nyaa gbɔ ŋutɔŋutɔ abe ale si Yehowa awɔe enea?’ Nu kae akpe ɖe mía ŋu be míaɖe nɔnɔme nyui afia ɖe nyametsotsoa ŋu?

14. Nu kae ate ŋu akpe ɖe mía ŋu ne hamemetsitsiwo tso nya me be yewoaɖe mía xɔlɔ̃ alo ƒometɔ aɖe le haa me?

¹⁴ Ele be míaɖo ŋku edzi be ameɖeɖelehame nye ɖoɖo si tso Yehowa gbɔ, eye eɖea vi na hamea eye ate ŋu aɖe vi na ame si wɔ nu gbegblẽa hã. Ne woɖe mɔ na nu vɔ̃ wɔla matrɔdzime aɖe be wòakpɔtɔ anɔ hamea mea, ate ŋu awɔe be ame bubuwo hã nava wɔ nu vɔ̃ ma ke. (Gal. 5:9) Azɔ hã, makpɔ ale si gbegbe nu vɔ̃ si wòwɔ la nye ŋkubiãnya, kple ale si wòhiã be wòatrɔ eƒe nuŋububu kple nuwɔnawo, ale be Yehowa nagakpɔ ŋudzedze ɖe eŋu o. (Nyagb. 8:11) Míate ŋu aka ɖe edzi be, menye ɖeko hamemetsitsiwo tsona ko ɖea ame le haa me o. Abe ale si wònɔ le ʋɔnudrɔ̃la siwo nɔ anyi le blema Israel gome enea, hamemetsitsiwo nyae be ‘menye amegbetɔe yewodrɔ̃a ʋɔnua na o, ke boŋ Yehowa ye.’—2 Kron. 19:6, 7.

15. Nu ka tae wòle be míawɔ ɖe mɔfiame siwo Yehowa nana mí la dzi fifia wu ɣeyiɣi bubu ɖe sia ɖe?

¹⁵ Esi xexe vɔ̃ɖi sia ƒe nuwuwu le aƒe tuma, ahiã be míagaka ɖe ale si Yehowa wɔa nui dzi fifia wu ɣeyiɣi bubu ɖe sia ɖe. Nu ka tae? Elabe le xaxa gãa mea, woana mɔfiame aɖewo siwo adze na mí be wole saga, susu mele wo me o, eye wo dzi manya wɔ o. Gake nya lae nye be, Yehowa maƒo nu na míawo ŋutɔwo tẽe o. Anɔ eme be, ame siwo wòɖo be woaxɔ ŋgɔ la dzie wòato ana mɔfiameawo. Menye ɣemaɣie míanɔ ɖeklemi ɖem tso mɔfiameawo ŋu, alo anɔ bubum be, ‘Mɔfiame siawo tso Yehowa gbɔ fia, alo hamemetsitsiawo koe le woƒe susuwo gblɔm?’ Ðe nàka ɖe Yehowa kple eƒe habɔbɔa dzi le ɣeyiɣi vevi ma mea? Ale si míewɔna ɖe habɔbɔa ƒe mɔfiamewo dzi fifia ye akpe ɖe mía ŋu míaɖo nya ma ŋu. Ne míekana ɖe mɔfiame siwo míexɔna egbea dzi eye míewɔna ɖe wo dzi enumakea, anɔ bɔbɔe be míawɔe nenema ke le xaxa gãa me.—Luka 16:10.

16. Aleke woate ŋu ado ale si míeka ɖe Yehowa ƒe ʋɔnudɔdrɔ̃wo dzii akpɔ le etsɔme?

¹⁶ Nu bubu aɖe li si ŋu wòhiã be míalé ŋku ɖo. Eyae nye ʋɔnu si Yehowa ava drɔ̃ le xexe sia ƒe nuwuwu. Egbea, míegblɔa nya nyuia na amewo katã, siwo dome míaƒe ƒometɔwo hã le. Gake le Armagedon-ʋaa mea, Yehowa ato Yesu dzi atso nya me mamlɛa ne woatsi agbe alo womatsi agbe o. (Mat. 25:31-33; 2 Tes. 1:7-9) Menye míawoe atso nya me le ame si Yehowa axɔ ɖe agbe alo maxɔ ɖe agbe o ŋu o. (Mat. 25:34, 41, 46) Ðe míaka ɖe Yehowa ƒe ʋɔnudɔdrɔ̃a dzia, alo ɖe míadzudzɔ Yehowa subɔsubɔ le esi míeda asi ɖe eƒe nyametsotsowo dzi o ta? Eme kɔ ƒãa be, ele be míaka ɖe Yehowa dzi fifia geɖe wu, ale be míate ŋu aka ɖe edzi bliboe le etsɔme.

17. Ne míeka ɖe ʋɔnu si Yehowa adrɔ̃ le xexea ƒe nuwuwu dzia, vi kae wòaɖe na mí?

¹⁷ Bu ale si míase le mía ɖokui me ne míeva kpɔ nu siwo do tso Yehowa ƒe ʋɔnudɔdrɔ̃ me le xexe yeyea me la ŋu kpɔ. Alakpasubɔsubɔhawo maganɔ anyi o, eye asitsahabɔbɔ ŋuklẽlawo, kple dunyahedziɖuɖu siwo tea amewo ɖe anyi hã maganɔ anyi o. Lãmegbegblẽ, tsitsi kple ku magaɖe fu na mí azɔ o. Satana kple eƒe gbɔgbɔ vɔ̃wo magakpɔ ŋusẽ ɖe amegbetɔwo dzi o hena ƒe akpe ɖeka sɔŋ. Nu siwo katã do tso woƒe aglãdzedzea me la maganɔ anyi o. (Nyaɖ. 20:2, 3) Ɣemaɣia, míakpɔ dzidzɔ be míeka ɖe edzi be Yehowa ƒe mɔwoe nye nyuitɔ!

18. Nu kawoe míate ŋu asrɔ̃ le Israel-viwo ƒe ŋutinya si dze le 4 Mose 11:4-6 kple 21:5 me?

¹⁸ Le Mawu ƒe xexe yeyea mea, ɖe kuxi aɖewo ado ale si míeka ɖe Yehowa dzii la akpɔa? Bu nu si dzɔ esi woɖe Israel-viwo tso kluvinyenye me le Egipte megbe teti ŋu kpɔ. Wo dometɔ aɖewo va nɔ nyatoƒoe tom be yewomegale nuɖuɖu nyui siwo yewo ɖuna le Egipte la kpɔm o, eye wogblɔ be mana si Yehowa na yewo la nye nuɖuɖu nyɔŋu. (Xlẽ 4 Mose 11:4-6; 21:5.) Ðe nu ma tɔgbi ate ŋu adzɔ ɖe míawo hã dzi le xaxa gãa megbea? Mímenya dɔ si gbegbe míawɔ be míadzra anyigbaa dzi ɖo, eye vivivia, wòatrɔ azu paradiso o. Anɔ eme be, dɔ gbogbo aɖe anɔ anyi míawɔ, eye agbea manɔ bɔbɔe le gɔmedzedzea me o. Ðe míava nɔ nyatoƒoe tom le nu siwo Yehowa ana mí ɣemaɣia ŋua? Míate ŋu aka ɖe edzi be: Ne míekpɔa ŋudzedze ɖe nu siwo Yehowa naa mí fifia ŋua, anɔ bɔbɔe be míawɔe nenema ɣemaɣi hã.

19. Ƒo nu tso nu siwo me míedzro le nyati sia me la ŋu kpokploe?

¹⁹ Yehowa ƒe mɔwo le dzɔdzɔe ɣesiaɣi. Ele be míaka ɖe nya ma dzi. Azɔ hã, ele be míaka ɖe ame siwo dzi Yehowa ka ɖo, siwo wòde dɔ asi na be woakpɔ egbɔ be wowɔ ɖe yeƒe mɔfiamewo dzi la dzi. Mègaŋlɔ nya siwo Yehowa to nyagblɔɖila Yesaya dzi gblɔ la be gbeɖe o. Egblɔ be: “Miakpɔ ŋusẽ ne mieɖe dzi ɖi heɖo ŋu ɖe ŋunye.”—Yes. 30:15.