Efesotɔwo

4 Eya ta nye, ame si le ga me+ le Aƒetɔ la ta, mele kuku ɖem na mi vevie be miazɔ ale si dze+ mia yɔyɔ la, 2 le ɖokuibɔbɔ+ kple tufafa blibo me, le dzigbɔgbɔ blewu me,+ eye miado dzi anɔ anyi kple mia nɔewo le lɔlɔ̃ me,+ 3 eye midze agbagba vevie mialé gbɔgbɔ la ƒe ɖekanyenye me ɖe asi le ŋutifafa ƒe nublanu la me.+ 4 Ŋutilã ɖeka+ kple gbɔgbɔ ɖekae+ li, abe ale si ko woyɔ mi va mɔkpɔkpɔ ɖeka+ si ta woyɔ mi ɖo la gbɔ ene; 5 Aƒetɔ ɖeka,+ xɔse ɖeka, nyɔnyrɔxɔxɔ ɖeka; 6 Mawu ɖeka, si nye amewo katã Fofo, ame si le amewo katã nu, ame si wɔa dɔ to amewo katã dzi, eye wòwɔnɛ le amewo katã me.

7 Ke wove mía dometɔ ɖe sia ɖe nu le Kristo la ƒe nunana faa si wòdzidze na mí la nu.+ 8 Elabena egblɔ be: “Esi wòlia yi dzi ʋĩi la, ekplɔ aboyomewo yii; ena nunana siwo nye amewo.”+ 9 Ke nu ka fiam nya si nye “wòlia yi dzi” la le, ne menye be eɖi va anyi me hã, si nye anyigba dzi oa? 10 Ame si tututu ɖi va la kee lia yi dzi+ ʋĩi wògbɔ dziƒowo ƒe dziƒo ŋu,+ ale be wòana nuwo katã nazu blibo.*

11 Eye wòna ame aɖewo wonye apostolowo,+ ɖewo nye nyagblɔɖilawo,+ ɖewo nye nyanyuigblɔlawo,+ eye ɖewo nye alẽkplɔlawo kple nufialawo,+ 12 kple susu be woana hehe* ame kɔkɔewo hena subɔsubɔdɔ wɔwɔ, na Kristo la ƒe ŋutilã* tutu ɖo,+ 13 va se ɖe esime mí katã míaɖo xɔse ƒe ɖekanyenye gbɔ, eye míaɖo Mawu ƒe Vi la ŋuti sidzedze vavãtɔ gbɔ azu ame siwo tsi blibo+ ahaɖo tsitsime blibo si gbɔ Kristo ɖo la gbɔ; 14 ale be míaganye ɖeviwo ne nufiafia ƒe ya sia ya+ si ƒona yina gbɔna la nanɔ mía nyamam abe ƒutsotsoewo ene, to amewo ƒe beble kple amefuflu ayetɔe me o. 15 Ke boŋ mina míato nyateƒe, ale be míato lɔlɔ̃ me atsi le nuwo katã me le Kristo, si nye ta la me.+ 16 Eya gbɔe wòtso be wokpe ŋutilã blibo+ la ɖekae pɛpɛpɛ, eye wona wòle dɔ wɔm ɖekae esi eƒe kpeƒekpeƒewo katã le woƒe akpa dzi wɔm. Ne ŋutinu ɖe sia ɖe wɔa eƒe dɔ nyuie la, ewɔnɛ be ŋutilã la tsina le esi wòtua eɖokui ɖo le lɔlɔ̃ me ta.+

17 Eya ta nya si gblɔm mele hele ɖase ɖim le eŋu le Aƒetɔ la ƒe ŋkɔ mee nye be, miagayi edzi anɔ zɔzɔm abe ale si dukɔwo hã zɔna+ le woƒe tamesusu gbɔlowo me la ene o.+ 18 Woƒe tamesusu do viviti, eye wole adzɔge na agbe si tso Mawu gbɔ, le esi numanyamanya xɔ aƒe ɖe wo me, eye woƒe dzi ku atri hã ta. 19 Naneke megakpea ŋu na wo o, eye woɖe asi le wo ɖokuiwo ŋu na ŋukpenanuwɔwɔ dzimesesẽtɔe,*+ ale be woanɔ nu makɔmakɔ ɖe sia ɖe ƒomevi wɔwɔ dzi kɔmaɖimaɖii.

20 Ke miawo la, menye alea miesrɔ̃e be Kristo la le o, 21 ne vavãe miese eŋu nya, eye woto edzi fia nu mi, abe ale si nyateƒe la le Yesu me ene. 22 Wofia nu mi be miaɖe amenyenye xoxo+ si sɔ ɖe miaƒe agbenɔnɔ tsãtɔ nu, si le gbegblẽm le eƒe nudzodzro fluamewo nu, la ɖa.+ 23 Ke minɔ miaƒe tamesusu ƒe nɔnɔme si kpɔa ŋusẽ ɖe mia dzi* wɔm yeyee,+ 24 eye miado amenyenye yeye+ si wowɔ le Mawu ƒe lɔlɔ̃nu nu le dzɔdzɔenyenye kple nuteƒewɔwɔ vavãtɔ me la.

25 Eya ta esi mieɖe amebeble ɖa azɔ la, mia dometɔ ɖe sia ɖe nato nyateƒe na ehavi,+ elabena ŋutinuwoe míenye na mía nɔewo.+ 26 Mibi dzi, ke migawɔ nu vɔ̃ o;+ ɣe nagaɖo to ɖe miaƒe dzibibi dzi o;+ 27 eye migana mɔ Abosam hã o.+ 28 Fiafitɔ la nagafi fi azɔ o; ke boŋ newɔ dɔ sesẽ, netsɔ eƒe asi wɔ dɔ nyui,+ ale be wòakpɔ nane ana ame si hiã tu.+ 29 Migana nya ƒaƒã aɖeke nado tso miaƒe nu me o,+ ke boŋ nya siwo nyo hena tutuɖo le ale si nɔnɔmea le nu, ale be wòaɖe vi na ame siwo asee la.+ 30 Eye miganɔ nuxaxa dom na Mawu ƒe gbɔgbɔ kɔkɔe,+ si wotsɔ tre mia nu+ hena ŋkeke si dzi woato tafe la dzi aɖe mi la o.+

31 Miɖe ameléleɖedɔme kaɖikaɖi,+ dɔmedzoe, dziku, ɣlidodo, kple nya veame+ ɖe sia ɖe ƒomevi ɖa le mia dome hekpe ɖe nu sia nu si gblẽa nu le ame ŋu la ŋuti.+ 32 Ke boŋ minyo dɔme na mia nɔewo, miaƒe dɔme netrɔ ɖe mia nɔewo ŋu vevie,+ eye mitsɔ nɔ mia nɔewo kem faa, abe ale si ko Mawu hã to Kristo dzi tsɔ ke mi faa ene.+