Na Lɔlɔ̃ Naʋã Wò Nàyi Edzi Anɔ Gbeƒã Ðem!

 1. Nya kawoe míese le ƒe 2023 ƒe sia ƒe takpekpea me?

LE ƑE 2023 ƒe sia ƒe takpekpea mea,a míese numekɔkɔ yeyewo tso míaƒe dzixɔsewo ŋu eye woɖe gbeƒã dzidzɔnya aɖewo tso míaƒe subɔsubɔdɔa ŋu. Le kpɔɖeŋu me, míesee be anɔ eme be mɔnukpɔkpɔ asu ame aɖewo si be woava Yehowa ƒe akpa dzi ne wotsrɔ̃ Babilon Gã la vɔ megbe gɔ̃ hã. Wona míenya hã be tso November 2023 me la, Fiaɖuƒegbeƒãɖelawo magana akɔnta le nu sia nu si wowɔ le gbeadzi ŋu o. Ðe tɔtrɔ siwo wowɔa fia be míaƒe gbeƒãɖeɖedɔa megale vevie o eye megahiã kpata oa? Ao, mefia nenema kura o!

 2. Nu ka tae gbeƒãɖeɖedɔa hiã kpata esi ŋkekeawo va le yiyim? (Marko 13:10)

² Zi ale si ŋkekeawo le yiyim la, zi nenemae gbeƒãɖeɖedɔa hiã vevie wu. Nu ka tae? Elabe ɣeyiɣiawo le vɔvɔm. Bu nya si Yesu gblɔ ɖi tso gbeƒãɖeɖedɔ si woawɔ le ŋkeke mamlɛawo mea ŋu kpɔ. (Xlẽ Marko 13:10.) Le Mateo ƒe nuŋlɔɖia nua, Yesu gblɔ be woaɖe gbeƒã nya nyuia le anyigba bliboa katã dzi hafi “nuwuwu la” nava. (Mat. 24:14) Nya “nuwuwu” si wòzã le afi sia ku ɖe ale si woatsrɔ̃ Satana ƒe nuɖoanyi vɔ̃ɖi sia keŋkeŋ ŋu. Yehowa ɖo ‘ŋkeke kple gaƒoƒo’ si nuɖoanyi sia awu enu ɖi xoxo. (Mat. 24:36; 25:13; Dɔw. 1:7) Esi ŋua le kekem eye zã le dodom ko la, míele tetem tu ŋkeke ma. (Rom. 13:11) Eya ta ele be míayi edzi anɔ gbeƒã ɖem va se ɖe esime ŋkeke ma va.

 3. Nu kae ʋãa mí míeɖea gbeƒã?

³ Nyabiase vevi aɖe si ŋu wòle be mí katã míade ŋugble le ye nye be: Nu ka tae míeɖea gbeƒã nya nyuia? Kpuie koa, lɔlɔ̃e ʋãa mí. Ale si míeɖea gbeƒã la ɖea ale si gbegbe míelɔ̃ nya nyuia, míelɔ̃ amewo, eye ƒo wo katã taa, míelɔ̃ Yehowa kple eƒe ŋkɔa fiana. Na míadzro wo me ɖekaɖeka.

MÍEÐEA GBEƑÃ ELABE MÍELƆ̃ NYA NYUIA

 4. Aleke míewɔa nui ne míese nya nyui aɖe?

⁴ Aleke nèse le ɖokuiwò me esi nèse nya nyui aɖe, ɖewohĩ esi nèse be wò ƒometɔ aɖe dzi vi alo dɔ aɖe si dim nènɔ vevie la su asiwò? Ðikeke mele eme o be ètsɔ dzidzɔ gblɔe na xɔ̃wòwo kple wò ƒometɔwo. Ðe nu ma tɔgbi dzɔ ɖe dziwò esi nèse Mawu Fiaɖuƒe ŋuti nya nyuia si nye nya nyuitɔ kekeakea?

 5. Aleke nèse le ɖokuiwò me esi nèse nyateƒe si le Mawu ƒe Nyaa me zi gbãtɔ? (Kpɔ fotoawo hã.)

⁵ Bu ale si nèse le ɖokuiwò me esi nèse nya nyui si le Mawu ƒe Nyaa me zi gbãtɔ ŋu kpɔ. Èva srɔ̃e be mía Fofo si le dziƒo lɔ̃ wò vevie, eye wòdi be nàva nɔ yeƒe ƒomea me le ye subɔlawo dome. Èva nyae hã be edo ŋugbe be yeaɖe vevesese kple fukpekpe ɖa eye yeafɔ wò ame vevi siwo ku ɖe tsitre ale be nàgakpɔ wo le xexe yeyea me. Èva nyae hã be edo ŋugbe be yeawɔ nu nyui bubu geɖe. (Marko 10:​29, 30; Yoh. 5:​28, 29; Rom. 8:​38, 39; Nyaɖ. 21:​3, 4) Nya mawo lé dzi na wò ale gbegbe. (Luka 24:32) Èva lɔ̃ nu siwo srɔ̃m nènɔ la vevie ŋutɔ eye nèdi vevie be yeaƒo nu tso nyateƒenya xɔasi mawo ŋu na ame bubuwo.—Tsɔe sɔ kple Yeremiya 20:9.

 6. Nu kae nèsrɔ̃ tso Ernest kple Rose gbɔ?

⁶ Nuteƒekpɔkpɔ aɖee nye esi. Nɔviŋutsu aɖe si ŋkɔe nye Ernestb xɔ ƒe ewo esime tɔa ku. Egblɔ be: “Mebiaa ɖokuinye be: ‘Ðe wòyi dziƒoa? Ðe nyemagakpɔe ake oa?’ Meʋãa ŋu ɖevi siwo tɔ le agbe.” Ernest yia ameɖibɔa me va dzea klo ɖe tɔa ƒe yɔkpe dzi doa gbe ɖa be: “Mawu, meɖe kuku, medi be manya afi si tɔnye le.” Abe ƒe 17 ene le tɔa ƒe ku megbea, Yehowa Ðasefowo te ɖe eŋu eye wòlɔ̃ faa be woasrɔ̃ Biblia kpli ye. Dzi dzɔe ŋutɔ esi wòva srɔ̃e be kukuawo meganya naneke o, ele ko abe ɖe wodɔ alɔ̃ yi eme ʋĩi ene, eye Biblia do ŋugbe be le etsɔmea, woava fɔ wo ɖe tsitre. (Nyagb. 9:​5, 10; Dɔw. 24:15) Azɔ Ernest va kpɔ ŋuɖoɖo na biabia siwo nɔ fu ɖem nɛ ɣeyiɣi didi aɖee nye ema! Biblia me nyateƒe siwo srɔ̃m wònɔ la dzɔ dzi nɛ ale gbegbe. Srɔ̃a Rose hã va te Biblia sɔsrɔ̃ eye eya hã lɔ̃ Fiaɖuƒegbedeasia vevie. Woxɔ nyɔnyrɔ le ƒe 1978 me. Dzo nɔ wo me wogblɔ nyateƒenya xɔasi siwo wova srɔ̃ la na woƒe ƒometɔwo, xɔlɔ̃wo kple ame sia ame si aɖo to. Esia wɔe be Ernest kple Rose te ŋu kpe ɖe ame 70 kple edzivɔ ŋu wova xɔ nyɔnyrɔ.

 7. Nu kae dzɔna ne míelɔ̃ Biblia me nyateƒea? (Luka 6:45)

⁷ Eme kɔ ƒãa be ne míelɔ̃ Biblia me nyateƒea eye wòƒo ke ɖe to ɖe míaƒe dzi mea, míate ŋu amia nu ɖe edzi o. (Xlẽ Luka 6:45.) Míawo hã míesena le mía ɖokui me abe Yesu ƒe nusrɔ̃la siwo nɔ anyi le ƒe alafa gbãtɔ me ene esi wogblɔ be: “Míate ŋu adzudzɔ nuƒoƒo le nu siwo míekpɔ kple nu siwo míese la ŋu o.” (Dɔw. 4:20) Míelɔ̃ nyateƒea ale gbegbe be míedi be míagblɔe na ame geɖe ale si wòanya wɔ.

MÍEÐEA GBEƑÃ ELABE MÍELƆ̃ AMEWO

 8. Nu kae ʋãa mí míetsɔa nya nyuia yina na amewo? (Kpɔ aɖaka si nye “Lɔ̃ Amewo—Kpe Ðe Wo Ŋu Woazu Nusrɔ̃lawo.”) (Kpɔ fotoa hã.)

⁸ Abe Yehowa kple Via enea, míawo hã míelɔ̃ amewo. (Lod. 8:31; Yoh. 3:16) Ame siwo ‘menya Mawu o’ kple ame siwo si “mɔkpɔkpɔ aɖeke” mele o la ƒe nu wɔa nublanui na mí. (Ef. 2:12) Agbemekuxiwo vu tsyɔ wo dzi eye míawo sie Mawu Fiaɖuƒe ŋuti nya nyui si axɔ wo ɖe agbe la le. Esi míelɔ̃ wo eye woƒe nu wɔa nublanui na mí taa, esia ʋãa mí be míadze agbagba ɖe sia ɖe atsɔ nya nyuia ayi na wo. Nya nyui ma ate ŋu ana mɔkpɔkpɔ nasu wo si, akpe ɖe wo ŋu be woakpɔ dzidzɔ le agbe me fifia, eye wòana “agbe vavã,” si nye agbe mavɔ, nasu wo si le Mawu ƒe xexe yeyea me.—1 Tim. 6:19.

 9. Nu kawoe gbɔna dzɔdzɔ ge si ŋu míele nu xlɔ̃m amewo tsoe, eye nu ka tae? (Ezekiel 33:​7, 8)

⁹ Esi míelɔ̃ amewo ta la, míedina be míaxlɔ̃ nu wo tso tsɔtsrɔ̃ si le ŋgɔ gbɔna ŋu. (Xlẽ Ezekiel 33:​7, 8.) Míaƒe ƒometɔ siwo menye Yehowa subɔlawo o kple mía haviwo ƒe nu wɔa nublanui na mí. Nu si tae nye be wo dometɔ geɖe menya nu si le ŋgɔ gbɔna o; womenya be “xaxa gã si tɔgbi meva kpɔ tso xexea ƒe gɔmedzedze va se ɖe fifia o la ava, eye etɔgbi megale vava ge ake o.” (Mat. 24:21) Míedi be woanya nu tso nu siwo adzɔ ɣemaɣi ŋu: Gbã la, woatsrɔ̃ alakpasubɔsubɔhawo ɖa eye eyome woatsrɔ̃ nuɖoanyi vɔ̃ɖi sia le Armagedon me. (Nyaɖ. 16:​14, 16; 17:​16, 17; 19:​11, 19, 20) Míele gbe dom ɖa be ame geɖe nawɔ ɖe nuxlɔ̃amea dzi ava wɔ ɖeka kpli mí míasubɔ Yehowa. Ke míaƒe ƒometɔwo kple ame bubu siwo meɖoa to mí fifia o ya ɖe?

10. Nu ka tae wòhiã vevie be míayi edzi anɔ nu xlɔ̃m amewo tso nu si le ŋgɔ la ŋu?

¹⁰ Abe ale si míeɖe eme le nyati si do ŋgɔ me enea, anɔ eme be Yehowa nakpɔ nublanui na ame siwo atrɔ dzi me ne wokpɔ eteƒe wotsrɔ̃ Babilon Gã la. Ne nenemae la, ke ele vevie fifia wu be míayi edzi anɔ nu xlɔ̃m wo. Bu eŋu kpɔ: Nya si míegblɔ na wo fifia dzie woava ɖo ŋkui ne nuawo le dzɔdzɔm ɣemaɣi. (Tsɔe sɔ kple Ezekiel 33:33.) Ðewohĩ woade ŋugble le nya siwo míegblɔ na wo ŋu eye esia aʋã wo woava Yehowa ƒe akpa dzi hafi wòatsi megbe. Abe ale si wònɔ le gaxɔdzikpɔla si nɔ Filipi gome enea, eva trɔ susu esime “anyigba ʋuʋu sesĩe” vɔ megbe. Nenema kee anɔ eme be ame siwo meɖoa to mí egbea o dometɔ aɖewo atrɔ susu ne wotsrɔ̃ Babilon Gã la vɔ megbe.—Dɔw. 16:​25-34.

MÍEÐEA GBEƑÃ ELABE MÍELƆ̃ YEHOWA KPLE EƑE ŊKƆA

11. Mɔ kawoe dzie míetona tsɔa ŋutikɔkɔe, bubu kple ŋusẽ nana Yehowa le? (Nyaɖeɖefia 4:11) (Kpɔ fotoawo hã.)

¹¹ Susu vevitɔ si tae míeɖea gbeƒã nya nyui lae nye be míelɔ̃ Yehowa Mawu kple eƒe ŋkɔ kɔkɔea. Míetoa míaƒe subɔsubɔdɔa dzi kafua mía Mawu la. (Xlẽ Nyaɖeɖefia 4:11.) Míelɔ̃ ɖe edzi tso dzi blibo me be Yehowa Mawue dze be wòaxɔ ŋutikɔkɔe, bubu kple ŋusẽ. Míetsɔa bubu kple ŋutikɔkɔe nana Yehowa ne míena amewo nya kpeɖodzi siwo ɖee fia be eyae “wɔ nuwo katã” eye eyae na míele agbe. Ne míezã míaƒe ɣeyiɣi, ŋutete kple nunɔamesiwo tsɔ kpe asi ɖe subɔsubɔdɔa ŋu le ale si míaƒe nɔnɔmea aɖe mɔe nu la, ke míetsɔ míaƒe ŋusẽ le Yehowa nam ye nye ema. (Mat. 6:33; Luka 13:24; Kol. 3:23) Nya lae nye be edzɔa dzi na mí be míaƒo nu tso mía Mawu si míelɔ̃ vevie la ŋu. Míaƒe dzi ʋãa mí be míana amewo nanya eƒe ŋkɔ kple Mawu si ƒomevi wònye. Nu ka tae?

12. Aleke míetoa míaƒe subɔsubɔdɔa dzi kɔa Yehowa ƒe ŋkɔa ŋu?

¹² Ale si míelɔ̃ Yehowa ʋãa mí be míakɔ eƒe ŋkɔa ŋu. (Mat. 6:9) Míedi be míana amewo nanya be nya vɔ̃ siwo katã wose tso Yehowa ŋu nye alakpa siwo tso Satana gbɔ. (1 Mose 3:​1-5; Hiob 2:4; Yoh. 8:44) Le míaƒe subɔsubɔdɔa mea, míedina vevie be míana amewo nanya ame si tututu Yehowa nye. Míedi be amewo katã nanyae be eƒe nɔnɔme vevitɔe nye lɔlɔ̃ eye mɔ si dzi wòtona ɖua dzi ye nye nyuitɔ kple dzɔdzɔetɔ. Eteƒe madidi o, eƒe Fiaɖuƒea ava ɖe fukpekpewo ɖa eye wòana ŋutifafa naxɔ aƒe ɖi eye amegbetɔwo nakpɔ dzidzɔ. (Ps. 37:​10, 11, 29; 1 Yoh. 4:8) Ne míena amewo nya nu siawo tso Yehowa ŋua, ke míele eƒe ŋkɔa ŋu kɔm. Esia nana dzi dzɔa mí ale gbegbe, elabe míewɔ nu si wòle be míawɔ; eƒe Ðasefowoe míenye. Nu ka tae míegblɔe alea?

13. Nu ka tae wònye bubu gã aɖe na mí be míenye Yehowa ƒe Ðasefowo? (Yesaya 43:​10-12)

¹³ Yehowae tia mí be míanye yeƒe “ɖasefowo.” (Xlẽ Yesaya 43:​10-12.) Ƒe aɖewo va yia, Dɔdzikpɔhaa gblɔ le lɛta aɖe me be: “Mɔnukpɔkpɔ gãtɔ kekeake si ate ŋu asu ame sie nye be woaɖoe Yehowa ƒe Ðasefo.” Nu ka tae? Bu kpɔɖeŋu sia ŋu kpɔ. Tsɔe be wotsɔ nya ɖe ŋuwò be èwɔ nu gbegblẽ aɖe eye wòhiã be nàdi ame aɖe si aɖi ɖase tso ŋuwò be ame nyui nènye eye wòaʋli tawò be màwɔ nu ma akpɔ gbeɖe o. Ame ka ƒomevie nàtia? Ðikeke mele eme o be àtia ame aɖe si nènya nyuie si dzi nèka ɖo eye ŋkɔ nyui le eŋu, ale be amewo nate ŋu axɔ eƒe nyawo dzi ase. Esi Yehowa tia mí be míanye yeƒe Ðasefowo la, eɖee fia be yenya mí nyuie eye yeka ɖe edzi be míaɖi ɖase tso ye ŋu be yee nye Mawu vavã ɖeka kolia la. Míesena le mía ɖokui me be bubu gã wònye na mí be míenye eƒe Ðasefowo, eya ta míewɔa mɔnukpɔkpɔ ɖe sia ɖe ŋu dɔ be míana amewo nanya eƒe ŋkɔa. Eye míekloa nu le alakpanya siwo wogblɔ tso eŋu la dzi. Míetoa esiawo me ɖenɛ be fiana be míenye eƒe Ðasefowo nyateƒe!—Ps. 83:18; Rom. 10:​13-15.

MÍAYI EDZI ANƆ GBEƑÃ ÐEM VA SE ÐE NUWUWU

14. Nu kawoe míetsɔ dzidzɔ le mɔ kpɔm na?

¹⁴ Míetsɔ dzidzɔ le mɔ kpɔm na nu siwo adzɔ le etsɔme kpuie! Míele mɔ kpɔm be Yehowa ƒe yayra nawɔe be ame geɖe nava xɔ nyateƒea hafi xaxa gãa nadze egɔme. Azɔ hã dzi adzɔ mí ŋutɔ be le xaxa gã, si nye ɣeyiɣi sesẽtɔ kekeake le amegbetɔwo ƒe ŋutinya me gɔ̃ hã me la, ɖewohĩ ame geɖe asi le Satana ƒe xexe si le kudɔ ƒom la me ava wɔ ɖeka kpli mí míakafu Yehowa!—Dɔw. 13:48.

15-16. Nu kae míayi edzi anɔ wɔwɔm, eye va se ɖe ɣekaɣi?

¹⁵ Hafi ɣemaɣi naɖoa, dɔ vevi aɖe li wòle be míawɔ si tɔgbi míagawɔ ake o. Eyae nye be míaɖe gbeƒã Mawu Fiaɖuƒe ŋuti nya nyuia le anyigba bliboa dzi. Le ɣeyiɣi ma ke mea, míaxlɔ̃ nu amewo tso nu siwo ava dzɔ la ŋu. Ehiã be amewo nanya be nuɖoanyi vɔ̃ɖi sia ƒe nuwuwu tu aƒe. Ekema ne ʋɔnudrɔ̃gbea va ɖo la, woakpɔe be nya siwo míenɔ gbeƒã ɖem la tso Yehowa Mawu gbɔ.—Eze. 38:23.

¹⁶ Esi nyaa le alea, nu kae wòle be míaɖo kplikpaa be míawɔ? Eyae nye be míana lɔlɔ̃ na nya nyuia, lɔlɔ̃ na amewo, eye ƒo wo katã taa, lɔlɔ̃ na Yehowa Mawu kple eƒe ŋkɔa naʋã mí míatsɔ dzonɔameme ayi edzi anɔ gbeƒã ɖem veviedodotɔe va se ɖe esime Yehowa nagblɔ be, “dɔa wu enu!”