Medi Be Maku—Ðe Biblia Ate Ŋu Akpe Ðe Ŋunye Ne Ele Wɔwɔm Nam Be Mawu Ðokuinyea?
Ale si Biblia ɖo eŋui
Ɛ̃! Biblia la tso “Mawu, ame si faa akɔ na ame siwo ƒo dzi ɖe le” la gbɔ. (2 Korintotɔwo 7:6) Togbɔ be Biblia menye susumedɔdagbalẽ o hã la, ekpe ɖe ame geɖe ŋu wodzudzɔ wo ɖokui wuwu ŋu bubu. Aɖaŋuɖoɖo nyui siwo le eme la ate ŋu akpe ɖe ŋuwò.
Aɖaŋuɖoɖo nyui kawoe le Biblia me?
● Gblɔ ale si nèle sesem le ɖokuiwò me la na ame bubuwo.
Nya si Biblia gblɔ: “Xɔlɔ̃ vavã lɔ̃a ame ɣeawokatãɣi eye ame nɔvi wònye wodzi ɖe xaxagbe ŋu.”—Lododowo 17:17.
Nufiamea: Míehĩa ame bubuwo ƒe kpekpeɖeŋu ne míele nu xam le dzi me.
Ne megblɔa ale si nèle sesem le ɖokuiwò me na amewo o la, wò seselelãme manyomanyoawo azu agba awu tsɔtsɔ na wò. Gake ne ègblɔa ale si nèle sesem le ɖokuiwò me na ame bubuwo la, nuwo aka ɖe eme na wò vie eye susu nyui asu asiwò ɖe wo nɔnɔmea ŋu.
Te mɔnu sia kpɔ: Dze agbagba nàɖo dze kple ame aɖe egbea, ɖewohĩ wò ƒometɔ aɖe alo xɔwò aɖe si dzi nèka ɖo.a Àte ŋu aŋlɔ ale si nèle sesem le ɖokuiwò me hã ɖi.
● Di kpekpeɖeŋu tso ɖɔktawo gbɔ.
Nya si Biblia gblɔ: “Ame siwo le lãmesẽ me la mehiã gbedala o, ke boŋ dɔnɔwoe hiãe.”—Mateo 9:12.
Nufiamea: Ele be míadi kpekpeɖeŋu tso dɔdalawo gbɔ ne míedze dɔ.
Susumedɔ alo blanuiléledɔ ate ŋu awɔe be ame anɔ eɖokui wuwu ŋu bum. Abe dɔléle bubuawo ke ko ene la, mele be susumedɔ alo blanuiléledɔ hã nakpe ŋu na mí o. Woate ŋu ada woawo hã.
Te mɔnu sia kpɔ: Tso kpla nàyi kɔdzi avae di kpekpeɖeŋu.
● Ðo ŋku edzi be Mawu tsɔ ɖe le eme na wò.
Nya si Biblia gblɔ: “Ðe womedzraa atsutsrɔe atɔ̃ xɔa gaku eve siwo ƒe home le sue oa? Gake Mawu meŋlɔa wo dometɔ ɖeka pɛ gɔ̃ hã be o. . . . Migavɔ̃ o; miexɔ asi sãsãsã wu atsutsrɔe geɖewo.”—Luka 12:6, 7.
Nufiamea: Èxɔ asi na Mawu.
Awɔ na wò be ame aɖeke metsɔ ɖeke le eme na ye o, gake Mawu ya nya nɔnɔme si me tom nèle. Etsɔ ɖe le eme na wò ŋutɔ ne ele wɔwɔm na wò be yemegadi be yeanɔ agbe o gɔ̃ hã. Psalmo 51:17 gblɔ be: “Oo Mawu, màdo vlo dzi si gbã hetugu la o.” Mawu di be nànɔ agbe elabe elɔ̃ wò.
Te mɔnu sia kpɔ: Dzro kpeɖodzi siwo le Biblia me siwo ɖee fia be Mawu lɔ̃ wò la me. Le kpɔɖeŋu me, kpɔ agbalẽ si nye Te Ðe Yehowa Ŋu ƒe ta 24.
● Do gbe ɖa na Mawu.
Nya si Biblia gblɔ: ‘Dro wò dzimaɖitsitsiwo katã ɖe Mawu dzi, elabena eléa be na wò.’—1 Petro 5:7.
Nufiamea: Mawu di be nàgblɔ ale si nèle sesem le ɖokuiwò me kple nu siwo le fu ɖem na wò la na ye.
Mawu ate ŋu ana wò dzi nadze eme eye wòado ŋusẽ wò be nànɔ te sesĩe. (Filipitɔwo 4:6, 7, 13) Mawu toa mɔ siawo dzi léa ame siwo doa gbe ɖa be wòakpe ɖe yewo ŋu la ɖe te.—Psalmo 55:22.
Te mɔnu sia kpɔ: Do gbe ɖa na Mawu egbea. Zã Mawu ƒe ŋkɔ Yehowa ne èle gbe dom ɖa, eye nàgblɔ ale si nèle sesem le ɖokuiwò me la nɛ. (Psalmo 83:18) Biae be wòakpe ɖe ŋuwò nàdo dzi.
● De ŋugble le etsɔme mɔkpɔkpɔ si le Biblia me la ŋu.
Nya si Biblia gblɔ: “Mɔkpɔkpɔ sia le mía si abe seke ene na míaƒe agbewo, kakaɖedzi le eŋu, eye wòli ke.”—Hebritɔwo 6:19, etenuŋɔŋlɔ.
Nufiamea: Míaƒe seselelãmewo ate ŋu anɔ dzi yim anɔ gbɔgbɔm abe tɔdziʋu si le atsiaƒu dzeagbo dzi ene, gake etsɔme mɔkpɔkpɔ si le Biblia me ate ŋu alé wò ɖe te.
Menye drɔ̃e dzro aɖe koe mɔkpɔkpɔ sia nye o, ke boŋ enye ŋugbe si Mawu ŋutɔ do be yeava ɖe vevesesewo ɖa.—Nyaɖeɖefia 21:4.
Te mɔnu sia kpɔ: Xlẽ nu geɖe tso Biblia me mɔkpɔkpɔ sia ŋu le agbalẽ gbadza si nye Nya Nyui Si Tso Mawu Gbɔ! ƒe nusɔsrɔ̃ 5 lia me.
● Wɔ nane si doa dzidzɔ na wò.
Nya si Biblia gblɔ: “Dzi kpɔdzidzɔ nye atike nyui.”—Lododowo 17:22.
Nufiamea: Ne míewɔa nu siwo doa dzidzɔ na mí la, míaƒe seselelãmewo ganyona ɖe edzi eye míenɔa lamesẽ nyui me geɖe wu.
Te mɔnu sia kpɔ: Wɔ nane si wɔwɔ doa dzidzɔ na wò. Le kpɔɖeŋu me, ɖo to hadzidzi tuameɖowo, xlẽ nyati siwo dea dzi ƒo, alo di ɣeyiɣi nàtsɔ asrɔ̃ nu yeye aɖe si doa dzidzɔ na wò la wɔwɔ. Àkpɔ dzidzɔ geɖe wu ne èwɔ nanewo tsɔ kpe ɖe ame bubuwo ŋu, nu suewo kura gɔ̃ hã.—Dɔwɔwɔwo 20:35.
● Lé be na ɖokuiwò.
Nya si Biblia gblɔ: “Ŋutilãmamla nyo.”—1 Timoteo 4:8.
Nufiamea: Eɖea vi ne míede kame, ɖi ɖe eme nyui eye míeɖu nu siwo me nunyiame le.
Te mɔnu sia kpɔ: Zã ɣeyiɣi aɖe nàtsɔ azɔ kabakaba gbe sia gbe, ne miniti 15 ye gɔ̃ hã.
● Ðo ŋku edzi be míaƒe seselelãmewo kple nu bubuwo le agbe me trɔna.
Nya si Biblia gblɔ: “Mienya ale si miaƒe agbe anɔ etsɔ o.”—Yakobo 4:14.
Nufiamea: Nu siwo ɖea fu na mí, esiwo ŋu míate ŋu awɔ naneke le o kura gɔ hã menɔa anyi ɖaa o.
Aleke kee nɔnɔmea le sesẽm na wò egbea o, nuwo ate ŋu atrɔ na wò le etsɔme kpuie. Eya ta dze agbagba nàdo dzi. (2 Korintotɔwo 4:8) Wò vevesesewo nu ate ŋu ayi, gake ne èwu ɖokuiwò la, màgate ŋu awɔ naneke tso eŋu o.
Te mɔnu sia kpɔ: Xlẽ nu tso ame siwo ƒo dzi ɖe le ale gbegbe be wodi be yewoaku la ƒe ŋutinyawo ŋu le Biblia me, eye nàkpɔ ale si nuwo va trɔ na wo nyuie le mɔ siwo womenɔ mɔ kpɔm na o nu gɔ̃ hã. Kpɔ esia ƒe kpɔɖeŋu aɖewo ɖa.
Ðe Biblia ƒo nu tso ame aɖewo siwo di be yewoaku la ŋua?
Ɛ̃. Biblia la ƒo nu tso ame aɖewo siwo di be yewoaku la ŋu. Gake Mawu medo dziku ɖe wo ŋu o, ke boŋ, ɖe wòkpe ɖe wo ŋu. Ate ŋu akpe ɖe wò hã ŋuwò.
Eliya
● Ame kae wònye? Enye nyagblɔɖila dzinɔameƒotɔ aɖe. Togbɔ be Mawu ƒe nyagblɔɖilae wònye hã la, dzi ɖe le eya hã ƒo ɣeaɖeɣi. Yakobo 5:17 gblɔ be: “Eliya nye amegbetɔ si ƒe seselelãmewo sɔ kple mía tɔwo.”
● Nu ka tae wòdi be yeaku? Eva ɖo afi aɖe la, Eliya nɔ vɔvɔ̃m eye wòse le eɖokui me be yetsi akogo eye viɖe aɖeke mele ye ŋu o. Ta egblɔ be, “Yehowa, ɖe nye agbe ɖa.”—1 Fiawo 19:4.
● Nu kae kpe ɖe eŋu? Eliya gblɔ ale si tututu wònɔ sesem le eɖokui me la na Mawu. Aleke Mawu de dzi ƒo nɛ. Mawu ɖee fia Eliya be yetsɔ ɖe le eme nɛ, eye wòwɔ nukunu aɖe tsɔ ɖe ale si gbegbe ŋusẽ le eŋu la fiae. Mawu ka ɖe edzi na Eliya be asixɔxɔ le eŋu eye wòkpe ɖe eŋu lɔlɔ̃tɔe.
▸ Xlẽ nu tso Eliya ŋu: 1 Fiawo 19:2-18.
Hiob
● Ame kae wònye? Hiob nye kesinɔtɔ aɖe si si ƒome gã aɖe nɔ eye wòsubɔ Mawu vavã la nuteƒewɔwɔtɔe.
● Nu ka tae wòdi be yeaku? Gbe ɖeka kple eƒe zãdodo la, nya vɔ̃wo dzɔ ɖe Hiob dzi. Eƒe kesinɔnuwo katã tsrɔ̃. Viawo katã ku le afɔku aɖe me. Dɔléle vɔ̃ɖi aɖe va ɖe kpe nɛ. Eye mlɔeba la, wotso enu alakpatɔe be eya ŋutɔe he kuxiawo va eɖokui dzi. Hiob gblɔ be: “Menyɔ ŋu nye agbe; nyemegadi be manɔ agbe o.”—Hiob 7:16.
● Nu kae kpe ɖe eŋu? Hiob do gbe ɖa na Mawu eye wògblɔ eƒe dzimenyawo na ame bubuwo. (Hiob 10:1-3) Exɔlɔ̃ Elihu se veve ɖe enu eye wòkpe ɖe eŋu be susu nyui nanɔ esi ɖe nɔnɔmea ŋu. Ƒo wo katã ta la, Hiob lɔ̃ faa xɔ Mawu ƒe aɖaŋuɖoɖo kple kpekpeɖeŋu.
▸ Xlẽ nu tso Hiob ŋu: Hiob 1:1-3, 13-22; 2:7; 3:1-13; 36:1-7; 38:1-3; 42:1, 2, 10-13.
Mose
● Ame kae wònye? Mose nye blema Israel dukɔa kplɔla kple nyagblɔɖila wɔnuteƒe.
● Nu ka tae wòdi be yeaku? Agba gã aɖe nɔ Mose dzi, amewo toa nyatoƒoe le eŋu enuenu, eye ɖeɖi tea eŋu. Ta èdo ɣli na Mawu be: “Meɖe kuku, wum fifia.”—4 Mose 11:11, 15.
● Nu kae kpe ɖe eŋu? Mose gblɔ ale si wònɔ sesem le eɖokui me la na Mawu. Mawu kpe ɖe Mose ŋu eye wòɖe agba si nɔ edzi la dzi kpɔtɔ.
▸ Xlẽ nu tso Mose ŋu: 4 Mose 11:4-6, 10-17.
a Ne ɖokuiwò wuwu ƒe seselelãmea nu le sesẽm ɖe edzi la, ekema ƒo ka na dɔwɔƒe alo kɔdzi siwo kpena ɖe ame siwo di be yewoawu yewo ɖokuiwo la enumake, nenye be ɖe li.