Ðe Míate Ŋu Anɔ Agbe Mavɔ Nyateƒea?
“Nufiala, nu nyui ka mawɔ, ne makpɔ agbe mavɔ mahã?”—MATEO 19:16.
1. Nukae míate ŋu agblɔ le mí amegbetɔwo ƒe agbenɔƒe ŋu?
PERSIA Fia Xerxes I, si woyɔ le Biblia me be Axasweros, nɔ ŋku lém ɖe eƒe asrafowo ŋu hafi woayi ɖe aʋa aɖe wɔƒe le ƒe 480 D.M.Ŋ. me. (Ester 1:1, 2) Helatɔ ŋutinyaŋlɔla Herodotus gblɔ be aɖatsi ge le mo na fia la esi wòkpɔ eƒe amewo. Nukae dzɔ? Xerxes gblɔ nusitae be, “etena ɖe dzinye ne mebu alesi amegbetɔ ƒe agbenɔƒe le kpuie ŋu. Elabena le amesiawo katã dome la, ame ɖeka pɛ hã meli si aganɔ agbe le ƒe alafa ɖeka siwo gbɔna me o.” Ðewohĩ wò hã ède dzesii be ewɔ nublanui be ame ƒe agbe le kpuie alea gbegbe eye be ame aɖeke medi be yeaku amegã alo nyagã, adze dɔ, aku hafi o. O, aleke wòanyoe nye si ne ɖe míate ŋu anɔ agbe le ɖekakpuime lãmesẽ kple dzidzɔkpɔkpɔ me!—Hiob 14:1, 2.
2. Mɔkpɔkpɔ kae le ame geɖe si, eye nukatae?
2 The New York Times Magazine, September 28, 1997 tɔ, ta nyati aɖe si ɖe dzesi ŋutɔ si ƒe tanyae nye “Wodi be Yewoanɔ Agbe.” Woyɔ nya aɖe si numekula aɖe gblɔ ɖe eme be: “Meka ɖe edzi tututu be ate ŋu adzɔ be míawoe anye dzidzime gbãtɔ si anɔ agbe mavɔ”! Ðewohĩ wò hã èka ɖe edzi be anya wɔ be woanɔ agbe mavɔ. Ðewohĩ esi Biblia gblɔ be míanɔ agbe si seɖoƒe meli na o le anyigba dzi afisia tae. (Psalmo 37:29; Nyaɖeɖefia 21:3, 4) Ke hã ame aɖewo xɔe se be míate ŋu anɔ agbe mavɔ ɖe susu bubu siwo to vovo na esiwo wogblɔ le Biblia me ta. Susu siawo dometɔ ʋee aɖewo me dzodzro ana míakpɔe be anya wɔ be míanɔ agbe mavɔ nyateƒe.
Wowɔ Mí be Míanɔ Agbe Tegbee
3, 4. (a) Nukata ame aɖewo xɔe se be ele be míate ŋu anɔ agbe tegbee? (b) Nukae Dawid gblɔ le eƒe wɔwɔme ŋu?
3 Susu ɖeka si ta ame geɖe xɔe se be amegbetɔwo ate ŋu anɔ agbe tegbee la ku ɖe alesi míaƒe wɔwɔme wɔ nukui ŋu. Le kpɔɖeŋu me, alesi wowɔ mí le mía dada ƒe vidzidɔ me wɔ nuku ŋutɔ. Ame aɖe si srɔ̃ nu geɖe tso amegãkuku ŋu ŋlɔ be: “Esi dzɔdzɔme na nukunuwo dzɔ be wote ŋu fɔ míaƒe fu hedzi mí eye emegbe wòna míezu ŋutsu alo nyɔnu tsitsiwo vɔ megbe la, mewɔ nusi dze nu bɔbɔe wu si ana nukunu mawo nanɔ anyi tegbee la o.” Ẽ, le ŋkuléle ɖe alesi míaƒe wɔwɔme wɔ nukui ŋu vɔ la, biabiaa gali kokoko be, Nukata wòle be míaku?
4 Biblia-ŋlɔla Dawid de ŋugble le nukunu sia tututu ŋu ƒe akpe geɖe enye si va yi, togbɔ be mete ŋu kpɔ vidzidɔ me ŋutɔŋutɔ abe alesi dzɔdzɔmeŋutinunyalawo kpɔnɛ egbea ene o hã. Dawid yi ŋugble me le eya ŋutɔ ƒe wɔwɔme esime ‘wokpɔ eta le dadaa ƒe dɔme’ ŋu, abe alesi wòŋlɔe ene. Egblɔ be ɣemaɣi la, ‘wowɔ yeƒe ayikuwo.’ Eƒo nu tso eƒe “ƒuwo” hã ŋu esime le eƒe nya nu la, ‘wowɔe le ɣaɣlaƒe.’ Emegbe Dawid gagblɔ be “menye ʋukɔe” eye egblɔ le ʋukɔea ŋu esime wònɔ dadaa ƒe vidzidɔ me be: “Woŋlɔ eƒe akpawo katã ɖe agbalẽ me.”—Psalmo 139:13-16, NW.
5. Nukunu kawoe dzɔna ne míele tsitsim le vidzidɔ me?
5 Edze ƒã be menye ɖe woŋlɔ alesi woawɔ Dawid le dadaa ƒe vidzidɔ me ŋuti ɖoɖo ɖe agbalẽ me ŋutɔŋutɔ o. Gake esi Dawid nɔ ŋugble dem le eƒe “ayikuwo,” eƒe “ƒuwo,” kple eƒe ŋutilã ƒe akpa bubuwo ƒe wɔwɔme ŋu la, ewɔ nɛ be ɖoɖo aɖe nue nusiawo ƒe tsitsi zɔ ɖo—abe ke ɖe ‘woŋlɔ nusianu ɖe agbalẽ me’ ene. Ðeko wòwɔ abe ɖe xɔ gã aɖe si me agbalẽwo yɔ fũ siwo me vidzĩwɔwɔ ŋuti mɔfiame tsitotsitowo le la li na azi si nɔ tsitsim le dadaa ƒe dɔme ene eye wòwɔ abe ɖe wotsɔa mɔfiame siawo naa lãmenugbagbevi ɖesiaɖe si do ene. Eyata Science World magazine zã kpɔɖeŋunyagbɔgblɔ sia be ‘aɖaka blibo si me ɖoɖogbalẽwo le la li na lãmenugbagbevi ɖesiaɖe si le ʋukɔe si le tsitsim la me.’
6. Kpeɖodzi kae li be ‘wowɔ mí nukutɔe’ abe alesi Dawid ŋlɔe ene?
6 Ède ŋugble le mɔ wɔnuku si nu míaƒe ametia wɔa dɔe ŋu kpɔa? Jared Diamond si nye nugbagbeŋutinunyala gblɔ be: “Míeɖɔa li míaƒe dɔka me ŋuti nugbagbeviwo zi ɖeka le ŋkeke ʋee aɖewo me, míeɖɔa li míaƒe aɖuɖɔtoe tɔwo zi ɖeka dzinu eve sia dzinu eve, eye míeɖɔa li míaƒe ʋumenugbagbevi dzĩwo dzinu ene sia dzinu ene.” Eƒo nya ta be: “Dzɔdzɔme kakaa mí eye wògakpea mí gbesiagbe.” Nuka tututue nusia fia? Efia be ƒe nenie míetsɔ le agbee o—eɖanye ƒe 8, 80, alo 800 o—míaƒe ametia ganɔa abe ɖekakpui tɔ ene. Dzɔdzɔmeŋutinunyala aɖe susui kpɔ be: “Le ƒe ɖeka me la, nu suesue bubu siwo míekpɔna tsoa míaƒe ya, nuɖuɖu, kple nunonowo me ava xɔ ɖe nu suesue siwo le mía me fifia la ƒe alafa memamã 98 kloe teƒe.” Le nyateƒe me abe alesi Dawid gblɔe tsɔ kafu Mawui ene la, ‘wowɔ mí nukutɔe.’—Psalmo 139:14.
7. Esi ame aɖewo kpɔ alesi míaƒe ŋutilã ƒe wɔwɔme le vɔ la, nyataƒonya ka gbɔe woɖo?
7 Tsitsiŋutinunyala aɖe nɔ te ɖe míaƒe ŋutilã ƒe wɔwɔme dzi gblɔ be: “Nusita wòle be míaku amegã la me mekɔ o.” Le nyateƒe me la, edze abe ɖe wòle be míanɔ agbe tegbee ene. Eye eyatae amewo le agbagba dzem be yewoato mɔ̃ɖaŋununya dzi aɖo taɖodzinu sia gbɔ. Eteƒe medidi kura o la, Ðk. Alvin Silverstein tsɔ kakaɖedzi ŋlɔ ɖe eƒe agbalẽ si nye Conquest of Death (Ku Dzi Ðuɖu) me be: “Míegbɔna keke ge ɖe nusi tututu wotsɔ wɔ agbee ŋu. Míele alesi wòwɔna amegbetɔ kua amegã . . . gɔme se ge.” Ne wòaɖe vi ka? Egblɔ ɖi be: “ ‘Amegãɖeɖiwo kple nyagãɖeɖiwo’ maganɔ anyi o, elabena sidzedze si ana míaɖu ku dzi la ke ahe ɖekakpui kple ɖetugbi me nɔnɔ mavɔ hã vɛ.” Esi nèkpɔ alesi dzɔdzɔmeŋutinunyalawo ku nu me ŋkeke siawo le amegbetɔ ƒe wɔwɔme ŋui la, ɖe wòwɔ na wò be mate ŋu adzɔ be woanɔ agbe mavɔ oa? Susu sẽŋu bubu li si tae nàxɔe ase be anya wɔ be míanɔ agbe mavɔ.
Didi be Woanɔ Agbe Mavɔ
8, 9. Dzɔdzɔmedidi kae le amewo si le ŋutinya katã me?
8 Ède dzesii kpɔ be enye amegbetɔ ƒe dzɔdzɔmedidi be yeanɔ agbe tegbeea? Ðɔkta aɖe ŋlɔ ɖe Germanygbe me nyadzɔdzɔgbalẽ aɖe me be: “Anɔ eme be agbe mavɔ nɔnɔ ƒe dzodzro kple ameƒomea ye dzɔ ɖekae.” Esi The New Encyclopædia Britannica nɔ nu ƒom tso blema Europatɔ aɖewo ƒe dzixɔsewo ŋu la, egblɔ be: “Bubumewo anɔ akpata dadzo si wotsɔ sika gbae me tegbee.” Eye agbagba gbogbo kawo gbegbee nye si amewo dze be yewoƒe asi nasu agbe mavɔ si le wo dzrom la dzi!
9 The Encyclopedia Americana gblɔ be ƒe 2,000 kple edzivɔe nye sia le China la, “Tao nunɔlawo nɔ ŋgɔ na fiagãwo kple dukɔmevi [gbɔlowo] siaa wogbe dɔwɔwɔ nɔ agbemavɔnɔnɔtike dim”—woda ŋkɔ ɖe edzi be eyae nye ɖekakpuimenɔnɔ ƒe dzɔƒe. Le nyateƒe me le ŋutinya katã me la, amewo xɔe se be atike vovovo alo tsi aɖewo nono ana yewoanɔ ɖekakpui me ɖaa.
10. Agbagba kae wodze le míaƒe ɣeyiɣia me be woakpɔ ta na agbe mavɔ nɔnɔ?
10 Agbagba siwo wodze le míaƒe ɣeyiɣia me be woakpɔ ta na agbe mavɔ nɔnɔ ƒe nudzroame si wotsɔ dzi amee la hã ɖe dzesi nenema ke. Eƒe kpɔɖeŋu ɖedzesi aɖee nye ame kuku si dɔléle aɖe wu la dede ice me. Wowɔ nusia kple susu be woagava gbɔ agbee le etsɔme ne wokpɔ atike na dɔ si wui. Ame aɖe si ƒe gbe de dzi bobobo le nusia wɔwɔ me ŋlɔ be: “Ne míaƒe mɔkpɔkpɔa te ŋu dze edzi eye míenya alesi míada gbe le nu gbegblẽ ɖesiaɖe ŋu alo adzra wo ɖo—tsɔ kpe ɖe amegãkuku me gbɔdzɔgbɔdzɔwo ŋu—la, ke amesiwo ‘le kukum’ fifia ƒe agbe adidi ɖe edzi aɖo ɣeyiɣi manyamanyawo le etsɔme.”
11. Nukatae amewo dina be yewoanɔ agbe mavɔ?
11 Ðewohĩ àbia be, nukatae agbe mavɔ nɔnɔ ƒe didi le susu me na mí alea gbegbe ɖo? Ðe wònye be “[Mawu de] mavɔmavɔ dzi me na [ame]” taea? (Nyagblɔla 3:11) Ehiã be míayi ŋugble me le nya sia ŋu vevie! Bu eŋu kpɔ ko: Nukata míadzɔ kple agbe mavɔ nɔnɔ ƒe didi—be míanɔ agbe tegbee—ne ɖe menye mía Wɔla ƒe tameɖoɖo be yeana nudzroame sia mí o? Eye ɖe manye tagbɔsesẽ be wòawɔ mí kple agbe mavɔ nɔnɔ ƒe dzodzro eye wòatrɔ mí ato eme agbe be yemana míaƒe nudzroame ma mí gbeɖe oa?—Psalmo 145:16.
Ameka Ŋue Wòle Be Míaɖo Ŋu Ðo?
12. Kakaɖedzi kae le ame aɖewo si, gake èka ɖe edzi be gɔmesese le eŋua?
12 Afika, alo nuka dzie, wòle be míada kakaɖedzi si le mía si na agbe mavɔ kpɔkpɔ la ɖo? Míaƒe ƒe alafa 20 alo 21 lia me ƒe amegbetɔ ƒe mɔ̃ɖaŋununya dziea? The New York Times Magazine me nyati si nye “Wodi be Yewoanɔ Agbe” la ƒo nu tso “mawu: mɔ̃ɖaŋununya” kple “vivi siwo dom wole ɖe nusiwo mɔ̃ɖaŋununya ate ŋu awɔ ŋu” la ŋuti. Wogblɔ be numekula aɖe ya “ka ɖe edzi dzidzɔtɔe . . . be míava ke ɖe agbe ƒe domenyiŋusẽ dzidziɖedziɖaŋu ŋu gbeɖeka wòatso mí axɔ tso amegãkuku me, ɖewohĩ wòatrɔe kura.” Gake le nyateƒe me la, amegbetɔwo ƒe agbagbadzedzewo be yewoatɔ te amegãkuku alo aɖu ku dzi la nye tofloko ko.
13. Aleke míaƒe ahɔhɔ̃ ƒe wɔwɔme ɖee fiae be ɖe woɖoe be míanɔ agbe mavɔ?
13 Ðe wòfia be agbe mavɔ kpɔkpɔ ƒe mɔ aɖeke meli oa? Kura o! Eƒe mɔ aɖe li! Ele be míaƒe ahɔhɔ̃ wɔnukua ƒe wɔwɔme, kple eƒe nusɔsrɔ̃ ŋutete si seɖoƒe meli na o nana míaka ɖe nya sia dzi. Agbeŋusẽŋutinunyala James Watson yɔ míaƒe ahɔhɔ̃ be enye “nusi gɔmesese goglo wu ɖesiaɖe si ŋu míeke ɖo le míaƒe xexeame katã vaseɖe fifia.” Eye ahɔhɔ̃ŋutinunyala Richard Restak gblɔ be: “Naneke megogoe vie gɔ̃ hã le nusiwo katã míenya vaseɖe fifia le xexeame godoo la dome o.” Nukata ahɔhɔ̃ si ŋu ŋutete le be wòadzra nyatakaka siwo seɖoƒe meli na o ɖo eye wòase wo gɔme tsɔ kpe ɖe ŋutilã si wowɔ be wòanɔ dɔwɔwɔ dzi tegbee ŋu nanɔ mía si ne menye ɖe woɖoe be míanɔ agbe mavɔ o?
14. (a) Nya kae Biblia-ŋlɔlawo gblɔ le amegbetɔ ƒe agbenɔnɔ ŋu? (b) Nukata wòle be míaɖo ŋu ɖe Mawu ŋu ke menye ɖe amegbetɔ ŋu o?
14 Ekema nyataƒonya si nye nyateƒe si ko me susu le ka gbɔe míate ŋu aɖo? Ðe menye eyae nye be Wɔla nyanu si nye ŋusẽkatãtɔ ye wɔ aɖaŋu le mía ŋu hewɔ mí be míanɔ agbe mavɔ oa? (Hiob 10:8; Psalmo 36:10; 100:3; Maleaxi 2:10; Dɔwɔwɔwo 17:24, 25) Eyata ɖe míawɔ nu le nunya me awɔ ɖe Biblia me hakpala ƒe sedede si tso gbɔgbɔ me be, “migaɖo ŋu ɖe amegãwo, amegbetɔvi, siwo mate ŋu axɔ na ame o” dzi oa? Nukata mele be míaɖo ŋu ɖe amegbetɔwo ŋu o? Elabena abe alesi hakpala ŋlɔe ene la, “ne eƒe gbɔgbɔ nu tso la, egbugbɔna yia eƒe anyi gbɔ; gbemagbe eƒe tameɖoɖowo nu yina.” Le nyateƒe me la, togbɔ be agbe mavɔ nɔnɔ ƒe ŋutete le amewo si hã, ne ku va tu wo la, naneke mele wo si woawɔ o. Hakpala la ƒo nya ta be: “Woayra amesi . . . ƒe mɔkpɔkpɔ le Yehowa, eƒe Mawu la dzi.”—Psalmo 146:3-5.
Mawu ƒe Tameɖoɖo Wònye Nyateƒea?
15. Nukae fia be enye Mawu ƒe tameɖoɖo be míanɔ agbe mavɔ?
15 Gake ɖewohĩ àbia be, Ðe wònye Yehowa ƒe tameɖoɖo nyateƒe be míanɔ agbe mavɔa? Ẽ, eƒe tameɖoɖoe! Eya ŋutɔ ƒe Nya gblɔe zi gbɔ zi geɖe. Biblia na kakaɖedzi mí be: “Mawu ƒe amenuvevenunana la enye agbe mavɔ.” Mawu subɔla Yohanes ŋlɔ be: “Ŋugbedodo, si [Mawu] ŋutɔ do na mí la, eya nye agbe mavɔ la.” Mewɔ nuku o be ɖekakpui aɖe bia Yesu be: “Nufiala, nu nyui ka mawɔ, ne makpɔ agbe mavɔ mahã?” (Romatɔwo 6:23; Yohanes I, 2:25; Mateo 19:16) Le nyateƒe me la, apostolo Paulo ŋlɔ nu tso “agbe mavɔ ƒe mɔkpɔkpɔ . . . si Mawu, amesi meka aʋatso o la, do ŋugbe, hafi ɣeyiɣi mavɔmavɔwo dze gɔme” la ŋuti.—Tito 1:2.
16. Gɔmesese ka nue Mawu do agbe mavɔ nɔnɔ ƒe ŋugbe “hafi ɣeyiɣi mavɔmavɔwo dze gɔme”?
16 Nukae wòfia be Mawu do agbe mavɔ ŋugbe “hafi ɣeyiɣi mavɔmavɔwo dze gɔme”? Ame aɖewo bui be apostolo Paulo fia be Mawu ɖoe hafi wɔ atsu kple asi gbãtɔ, Adam kple Xawa, be yeana amegbetɔwo nanɔ agbe mavɔ. Gake ne ɣeyiɣi aɖe le amegbetɔwo wɔwɔ vɔ megbe si me Yehowa gblɔ eƒe tameɖoɖo ye Paulo wɔnɛ hã la, eme kɔ kokoko be Mawu ƒe tameɖoɖowo dometɔ aɖee nye be amegbetɔwo nanɔ agbe mavɔ.
17. Nukata wonyã Adam kple Xawa le Eden-bɔa me, eye nukatae woda kerubiwo ɖe mɔa nu?
17 Biblia gblɔ be le Eden-bɔ me la, ‘Yehowa Mawu na agbeti mie tso anyigba me le abɔ la titina.’ Susu si ta wonyã Adam tso abɔa me enye “be wòagado asi ɖa agbe agbetia hã ƒe ɖe aɖu, eye wòanɔ agbe ɖoɖoɖo o”—ẽ, agbe tegbee! Esi Yehowa nyã Adam kple Xawa tso Eden-bɔa me vɔ la, “[ena] kerubiwo tsɔ yi, si trɔa eɖokui, eye wòklẽna abe dzo ƒe aɖe ene la, . . . bena woadzɔ agbeti la mɔ nu.”—Mose I, 2:9; 3:22-24.
18. (a) Nukae anye ne agbetia ɖuɖu afia na Adam kple Xawa? (b) Nukae atia ɖuɖu tsi tre ɖi na?
18 Ne ɖe wona Adam kple Xawa ɖu agbetia la, nukae wòafia na wo? Agbe mavɔ nɔnɔ le Paradiso mee! Biblia me nyawo meɖela aɖe gblɔ be: “Anye be ŋusẽ aɖe le agbetia me si ana be tsitsime ƒe gbɔdzɔgbɔdzɔwo alo nusiwo nɔa gbegblẽm le ame ŋu vivivi va ɖoa ame ƒe kuɣi la maɖe fu na ametia o.” Egblɔ gɔ̃ hã be “gbedaŋusẽ aɖe nɔ paradiso me si ate ŋu axe mɔ ɖe [tsitsime ƒe] nugbegblẽ le ame ŋu nu.” Gake Biblia megblɔ be agbenaŋutetewo le agbetia ŋutɔ si o. Ke boŋ ɖeko atia nye kpɔɖeŋu na kakaɖedzi si Mawu na amesi wòaɖe mɔ na wòaɖu eƒe tsetsea be anɔ agbe mavɔ.—Nyaɖeɖefia 2:7.
Mawu ƒe Tameɖoɖo Metrɔ O
19. Nukatae Adam ku, eye nukatae mí eƒe dzidzimeviwo hã míekuna?
19 Esi Adam wɔ nuvɔ̃ la, ebu agbe mavɔ nɔnɔ ƒe gome na eɖokui kple eƒe dzidzimevi siwo katã medzɔ haɖe o. (Mose I, 2:17) Esi wòzu nuvɔ̃me le eƒe tomaɖomaɖo ta la, ezu ame madeblibo si ŋu vodada va le. Tso ɣeyiɣi ma dzi la, ɖeko Adam ƒe ŋutilã wɔ abe ɖe woɖoe be wòaku ene. Abe alesi Biblia gblɔe ene la, “Nuvɔ̃ la ƒe fetue nye ku.” (Romatɔwo 6:23) Tsɔ kpe ɖe eŋu la, ɖeko woɖo Adam ƒe dzidzimevi madebliboawo hã ɖi na ku, menye na agbe mavɔ nɔnɔ o. Biblia ɖe eme be: “To ame ɖeka [Adam] dzi nuvɔ̃ la va xexeame, eye to nuvɔ̃ me ku la va, eye nenema ku la va to amewo katã dzi yi, esi wo katã wɔ nuvɔ̃ ŋuti.”—Romatɔwo 5:12.
20. Nukae fia be ɖe woɖoe be amegbetɔwo nanɔ anyigba dzi tegbee?
20 Gake ne ɖe Adam mewɔ nuvɔ̃ o ɖe? Ne ɖe megbe toɖoɖo Mawu o eye woɖe mɔ nɛ be wòaɖu agbetia ɖe? Anye ne afikae wòakpɔ Mawu ƒe nunana si nye agbe mavɔ la le? Dziƒoea? Ao! Mawu megblɔ nya aɖeke be yeakplɔ Adam ayi dziƒoe o. Anyigba dzi ye wòna dɔe le be wòawɔ. Biblia ɖe nu me be “[Yehowa] Mawu na ati vovovo, siwo nya kpɔna, siwo ƒe tsetse nyo na ɖuɖu la, mie tso anyigba me,” eye egagblɔ be: “[Yehowa] Mawu tsɔ ame la ɖo Eden-bɔ me, be wòaŋlɔ eme, eye wòakpɔ edzi.” (Mose I, 2:9, 15) Esi wowɔ Xawa be wòanye kpeɖeŋutɔ na Adam vɔ megbe la, wotsɔ dɔ bubuwo kpee na wo ame evea le anyigba dzi. Mawu gblɔ na wo be: “Midzi, ne miasɔ gbɔ, eye miayɔ anyigba la dzi, eye mianye agbo ɖe edzi, miaɖu ƒumelãwo kple dziƒoxe dzodzoewo kple lã, siwo katã zɔna le anyigba dzi la dzi!”—Mose I, 1:28.
21. Mɔkpɔkpɔ wɔnuku kawoe nɔ atsu kple asi gbãtɔa si?
21 Bu anyigba dzi mɔnukpɔkpɔ wɔnuku siwo ƒe mɔ Mawu ƒe nya mawo ʋu be woasu Adam kple Xawa si ŋu kpɔ! Woava nyi viŋutsu kple vinyɔnu deblibowo le anyigba dzi Paradisoa me. Ne wo vi lɔlɔ̃awo tsi la, woakpe ɖe wo ŋu le vidzidzi kple abɔmedzadzraɖo si nye dɔ dodzidzɔname me ahalé be na Paradiso ma. Esi lãwo katã abɔbɔ ɖe wo te ta la, woƒe dzi adze eme alesi dze. Gabu dzidzɔ si wòanye be woakeke Eden-bɔa ƒe liƒowo ɖe enu ale be mlɔeba anyigba bliboa katã nazu paradiso ŋu kpɔ! Ðe nàse vivi na agbe le anyigbadziƒe dzeani sia me, dzi aɖeke matsimatsii ɖe tsitsi alo ku ŋua? Na nusi wò dzi gblɔ na wò la naɖo nya ma ŋu.
22. Nukata míate ŋu aka ɖe edzi be Mawu metrɔ tame si wòɖo ɖe anyigba la ŋu o?
22 Enyo, ke esi Adam kple Xawa wɔ nuvɔ̃ eye wonyã wo le Eden-bɔa me la, ɖe Mawu trɔ tame si wòɖo ɖe amegbetɔwo ŋu be woanɔ agbe tegbee le Paradiso me le anyigba dzi la? Kura o! Ne Mawu wɔe nenema la, afia be elɔ̃ ɖe edzi be yemate ŋu ana yeƒe tameɖoɖo gbãtɔa nava eme o. Kakaɖedzi ate ŋu anɔ mía si be Mawu wɔna ɖe eƒe ŋugbedodowo dzi, abe alesi eya ŋutɔ ɖe gbeƒãe ene be: “Nenema ke nye nya, si do tso nye nu me la anɔ: Magbugbɔ va gbɔnye ƒuƒlu o, negbe ɖeko wòawɔ nye lɔlɔ̃nu, eye wòawɔ nusi gbe meɖoe ɖo la hafi.”—Yesaya 55:11.
23. (a) Nukae gaɖo kpe edzi be enye Mawu ƒe tameɖoɖo be amesiwo lɔ̃a nudzɔdzɔewɔwɔ nanɔ anyigba dzi tegbee? (b) Nuka mee míadzro emegbe?
23 Míate ŋu akpɔe kɔte le Biblia me be tame si Mawu ɖo ɖe anyigba la ŋu metrɔ o, afisi Mawu do ŋugbe le be: “Ame dzɔdzɔewo anyi anyigba la dome, eye woanɔ edzi tegbee.” Yesu Kristo ŋutɔ hã gblɔe le eƒe Todzimawunya me be ame fafawo anyi anyigba la dome. (Psalmo 37:29; Mateo 5:5) Ke hã aleke míawɔ míaƒe asi naka agbe mavɔ, eye nukae wòle be míawɔ ase vivi le agbe ma tɔgbe me? Míadzro nya sia me le nyati si kplɔe ɖo me.
Aleke Nàɖo Wo Ŋui?
◻ Nukata ame geɖe xɔe se be míate ŋu anɔ agbe mavɔ?
◻ Nukae wòle be wòana míase egɔme be ɖe woɖoe be míanɔ agbe mavɔ?
◻ Tameɖoɖo kae nɔ Mawu si na ameƒomea kple anyigba la tso gɔmedzedzea me?
◻ Nukatae míate ŋu aka ɖe edzi be Mawu ana eƒe gɔmedzetameɖoɖoa nava eme?