Biblia ƒe Nukpɔsusu

Tsiɖɔɖɔa Nyateƒee loo alo Glie?

‘Lãwo katã yi ɖe Noa gbɔ, eveveve le aɖakaʋu la me.’—Mose I, 7:8, 9.

AMEKAE mese nu tso Noa ƒe ŋkekea me Tsiɖɔɖɔa ŋu kpɔ o? Ðewohĩ tso ɖevime kee nènya ŋutinya sia. Le nyateƒe me ne èyi agbalẽdzraɖoƒe si le mia gbɔ be yeaku nu me le Tsiɖɔɖɔa ŋu la, ɖewohĩ àkpɔ be agbalẽ siwo woŋlɔ na ɖeviwo le nya sia ŋu sɔ gbɔ wu ame tsitsiwo tɔ. Esia ta ɖewohĩ àgblɔ be gli koe Tsiɖɔɖɔa nye. Ame geɖe susuna be gli koe Noa ƒe Tsiɖɔɖɔ ŋutinya kpakple Biblia ƒe akpa geɖe nye, alo ne enyo ʋuu hã ke agbenɔnɔ ŋuti mɔfiame si amegbetɔ to vɛ ko wònye.

Ewɔ nuku be amesiwo gblɔna be Biblia dzie yewotu yewoƒe mawusubɔsubɔdzixɔsewo ɖo gɔ̃ hã dometɔ aɖewo kea ɖi be Tsiɖɔɖɔa menye nudzɔdzɔ ŋutɔŋutɔ o. Katoliko-nunɔla Edward J. McLean gblɔ gbeɖeka be ɖe wobe woagblɔ Noa ƒe ŋutinya la wòanye “kpɔɖeŋu alo agbalẽnyalagãwo ƒe nyagbɔgblɔ” ke menye ŋutinya ŋutɔŋutɔ o.

Gake Tsiɖɔɖɔ ŋutinya la ɖe, kpɔɖeŋu ko wònye wogblɔ ɖe Biblia me, esi medzɔ le nya la ŋutɔŋutɔ nu oa? Ðe Biblia ŋutɔ lɔ̃ ɖe nukpɔsusu ma dzia?

Nyateƒenya Vavãwo

Gbã la, de ŋugble le nusi Mose ŋlɔ ɖe Mose ƒe Agbalẽ Gbãtɔ me ŋu. Woyɔ ƒe, ɣleti, kple ŋkeke si tututu tsia te dzadza, gbesigbe aɖakaʋua ɖi go, kple ɣeyiɣi si me tsia mie le anyigba dzi. (Mose I, 7:11; 8:4, 13, 14) Togbɔ be womeŋlɔ ŋkeke tɔxɛwo ɖe Mose ƒe Agbalẽ Gbãtɔ ƒe teƒe bubuwo ɣesiaɣi o hã la, ŋkeke siawo ɖo kpe nyateƒenya sia dzi be Mose bu Tsiɖɔɖɔa be enye nudzɔdzɔ ŋutɔŋutɔ. Tsɔ Biblia ƒe nyateƒenya sia sɔ kple alesi wodzea ŋutinyakpakpa geɖe gɔmee kpɔ, “Gbeɖeka la . . .”

Kpɔɖeŋu bubue nye aɖakaʋua ŋutɔ, bu eya hã ŋu kpɔ. Biblia ƒo nu tso aɖakaʋu si ƒe didime de afɔ 437 ŋu, eƒe didime nye eƒe kɔkɔme teƒe 10 eye eƒe didime nye eƒe kekeme teƒe 6. (Mose I, 6:15) Azɔ hã menye aɖakaʋukpalae Noa nye o. Eye ɖo ŋku edzi be nusia dzɔ ƒe 4,000 kple edzivɔ enye sia! Gake wokpa aɖakaʋua eƒe dzidzeme sɔ ta be wòaho ɖe tsi dzi. Le nyateƒe me la, egbegbe meliwɔlawo kpɔe be dzidzeme ma tɔgbe nye lolome si sɔ nyuie si ana wòaho ɖe atsiaƒu dzi. Togbɔ be Biblia meyɔ ɣeyiɣi didime si tututu Noa tsɔ kpa aɖakaʋua o hã la, le nuŋlɔɖia nu la, axɔ ƒe 50 alo 60. (Mose I, 5:32; 7:6) Nya siawo to vovo kura na ŋutinya nyanyɛ si le Babilontɔwo ƒe Gilgamesh Xotutu me. Xotutua ƒo nu tso aɖaka gã glɔ̃mɔ aɖe ŋu si ƒe didime kple kekeme anɔ meta 60 si wokpa le ŋkeke adre pɛ ko me. Biblia ƒe Tsiɖɔɖɔ ŋuti nuŋlɔɖia na kakaɖedzi le eƒe nyateƒenyenye ŋu, si to vovo na Babilontɔwo ƒe xotutua.

Le Mose ƒe Agbalẽ Gbãtɔ me nuŋlɔɖia megbe la, Ŋɔŋlɔawo yɔ Noa alo ƒo nu tso xexeame katã ƒe Tsiɖɔɖɔa ŋu zi ewo. Ðe nyayɔyɔ siawo fia be agbalẽŋlɔla siawo siwo gbɔgbɔ ʋã la bu Tsiɖɔɖɔa ŋutinya vavãe alo glia?

Woɖo Kpe Eƒe Nyateƒenyenye Dzi

Woyɔ Noa ɖe Israel-dukɔa ƒe dzidzimegbalẽ eve me le Ŋɔŋlɔawo me, evelia va se ɖe Yesu Kristo dzi. (Kronika I, 1:4; Luka 3:36) Ezra kple Luka, amesiwo ŋlɔ dzidzimegbalẽ siawo la nye ŋutinyaŋlɔla bibiwo eye woaxɔe se be Noa nye ame ŋutɔŋutɔ.

Woyɔ Noa kpe ɖe ŋutinyamemewo ŋu le Biblia ƒe teƒe bubuwo, eye wogblɔ be enye ame dzɔdzɔe kple xɔsetɔ. (Xezekiel 14:14, 20; Hebritɔwo 11:7) Ðe susu anɔ eme be Biblia-ŋlɔlawo nayɔ glimeme hã be enye kpɔɖeŋu si woasrɔ̃a? Gbeɖe, elabena esia ate ŋu awɔe be amesiwo xlẽa Biblia naƒo nya ta be xɔse nye nusi kɔkɔ wu amegbetɔ eye amesiwo le gligbalẽwo me koe ate ŋu aɖee afia. Woyɔ Noa kple ŋutsu bubuawo kpakple nyɔnu xɔsetɔawo elabena wonye amegbetɔ siwo ŋu gbɔdzɔgbɔdzɔwo kple seselelãmewo nɔ abe míawo ene.—Hebritɔwo 12:1; tsɔe sɔ kple Yakobo 5:17.

Le teƒe bubu siwo Ŋɔŋlɔawo gayɔ Noa kple Tsiɖɔɖɔa le la, eƒo nu tso wo ŋu le tsɔtsrɔ̃ si Mawu he va dzidzime maxɔse si dome Noa nɔ dzi me. Se nya si Yesu gblɔ le Tsiɖɔɖɔa ŋu ɖa le Luka 17:26, 27: “Alesi wòva ve me le Noa ƒe ŋkekeawo mee la, nenema wòanɔ le Amegbetɔvi la ƒe ŋkekeawo hã me. Wole nuɖuɖu dzi, wole nunono dzi, wole srɔ̃ɖeɖe dzi, eye wole wo tsɔm na, be woaɖe, vaseɖe ŋkeke, si dzi Noa yi ɖe aɖakaʋu la me, eye tsiɖɔɖɔ va, eye wòtsrɔ̃ wo katã.”

Yesu Kristo kpɔ nudzɔdzɔ siwo ŋu wòƒo nu tsoe la teƒe, elabena enɔ dziƒo kpɔ hafi va anyigba dzi. (Yohanes 8:58) Ne gli koe Tsiɖɔɖɔa nye la, ke Yesu ƒe nyawo fia be eƒe anyinɔnɔ le etsɔme nye nuŋububukpɔ ko alo be aʋatso kam wòle. Nyataƒoƒo eve siawo ƒe ɖeke mesɔ kple Ŋɔŋlɔ mamlɛawo o. (Petro I, 2:22; Petro II, 3:3-7) Eyata Yesu Kristo, le nusi eya ŋutɔ kpɔ nu la, xɔ xexeame katã ƒe Tsiɖɔɖɔ ŋuti nuŋlɔɖi si le Biblia me dzi se be enye ŋutinya vavã. Esia nye kpeɖodzi matrɔmatrɔ si Kristotɔ vavãwo mekea ɖi kura o be Noa ƒe ŋkekea me Tsiɖɔɖɔa nye nudzɔdzɔ ŋutɔŋutɔ, menye gli wònye o.

[Nɔnɔmetata Tsoƒe si le axa 24]

L. Chapons/Illustrirte Familien-Bibel nach der deutschen Uebersetzung Dr. Martin Luthers