Sitsoƒeduwo—Mawu Ƒe Nublanuikpɔkpɔ Ƒe Ðoɖoe Wònye

“Du ade siawo nanye sitsoƒe . . . bena ne ame aɖe mebua wu ame o la, ne wòasi ayi afima.”—MOSE IV, 35:15.

 1. Nukae nye Mawu ƒe nukpɔsusu le agbe kple ʋufɔɖiɖi ŋu?

YEHOWA MAWU bua amegbetɔ ƒe agbe nu kɔkɔe. Eye agbe le ʋu la me. (Mose III, 17:11, 14) Eyata Kain si nye ame gbãtɔ si wodzi ɖe anyigba dzi la ɖi ʋufɔ esi wòwu nɔvia Habel. Esia ta Mawu gblɔ na Kain be: “Nɔviwò ƒe ʋu, si nèkɔ ɖe anyi la ƒe gbe le ɖiɖim tso anyigba dzi mese!” Togbɔ be ʋu si kɔ ɖe anyi meƒo nu o hã la, eɖi ɖase blibo le agbe si nu wotso kpata ŋutasesẽtɔe la ŋu. Habel ƒe ʋu do ɣli na Mawu be wòabia hlɔ̃.—Mose I, 4:4-11.

 2. Aleke Yehowa te gbe ɖe eƒe bubudede agbe ŋu dzii le Tsiɖɔɖɔa megbe?

² Wote gbe ɖe alesi Mawu dea bubu amegbetɔ ƒe agbe ŋui dzi esime ame dzɔdzɔe Noa kple eƒe ƒomea tsi agbe le xexeame katã ƒe Tsiɖɔɖɔa me hedo tso aɖakaʋua me vɔ megbe. Ɣemaɣi la, Yehowa tsɔ lãwo ɖuɖu kpe ɖe ameƒomea ƒe nuɖuɖu ŋu, gake metsɔ ʋu kpee o. Ede se hã be: “Mia ŋutɔwo miaƒe ʋu la, mabiae le lãwo kple amewo siaa si, mabia amesiame ƒe agbe le nɔvia si. Amesi kɔ ameʋu ɖi la, amewo akɔ eya hã ƒe ʋu ɖi; elabena Mawu ƒe nɔnɔme nue wowɔ ame ɖo.” (Mose I, 9:5, 6) Yehowa kpɔe be ame kukua ƒe ƒometɔ si do ƒome kplii wu kpɔ mɔ awu amewula la ne edo goe.—Mose IV, 35:19.

 3. Aleke Mose ƒe Sea te gbe ɖe agbe ƒe kɔkɔenyenye dzii?

³ Wogate gbe ɖe agbe ƒe kɔkɔenyenye dzi enuenu le Se si wona Israel to nyagblɔɖila Mose dzi la me. Le kpɔɖeŋu me, Mawu de se be: “Megawu ame o.” (Mose II, 20:13) Bubudede agbe ŋu gadze le nusi Mose ƒe Sea gblɔ le afɔku si adzɔ ɖe nyɔnu funɔ aɖe dzi ŋu la me. Sea gblɔe kɔte be ne ŋutsu eve aɖewo ƒe dzrewɔwɔ na nyɔnua alo vinɔdɔmea ku la, ke ʋɔnudrɔ̃lawo nada alesi nua dzɔe kpɔ be ɖe wobua wɔe hã, gake tohehea ate ŋu anye ‘luʋɔ ɖe luʋɔ teƒe,’ alo agbe ɖe agbe teƒe. (Mose II, 21:22-25) Gake ɖe Israel-vi hlɔ̃dola ate ŋu asi le eƒe ŋutasẽnuwɔna me tsonuwo nu le mɔ aɖe nua?

Sitsoƒe na Hlɔ̃dolawoa?

 4. Sitsoƒe kawoe nɔ anyi tsã le Israel megbe?

⁴ Le Israel megbe la, sitsoƒe alo bebeƒe nɔ dukɔ bubuwo me na hlɔ̃dolawo kple nuvlowɔla bubuwo. Aleae wònɔ le teƒewo abe mawunɔ Diana ƒe gbedoxɔ ene me le blema Efeso. Wogblɔ le teƒe mawo tɔgbe ŋu be: “Gbedoxɔ aɖewo va zu nuvlowɔlawo nyiƒe; eye eva hiã zi geɖe be woaɖe sitsoƒe xexlẽme si anɔ anyi dzi akpɔtɔ. Le Atene la, gbedoxɔ aɖewo ŋu koe se ɖe mɔ ɖo be woanye sitsoƒewo, (le kpɔɖeŋu me, Theseus ƒe gbedoxɔ na kluviwo); le Tiberius ŋɔli la, vɔvɔ̃ nɔ nuvlowɔlawo ƒe ha siwo nɔ gbedoxɔwo me ŋu ale gbegbe be du ʋee aɖewo me koe woɖe mɔ be Sitsoƒewo nanɔ (le ƒe 22 lia me).” (The Jewish Encyclopedia, ƒe 1909, Babla II, axa 256) Emegbe Kristodukɔa ƒe gbedoxɔwo va zu sitsoƒewo, gake esia va wɔe be dziɖulawo ƒe ŋusẽ va yi ɖe nunɔlawo si me eye wòna womegate ŋu drɔ̃a ʋɔnu dzɔdzɔe nyuie o. Sitsoƒewo zazã ɖe mɔ gbegblẽ nu wɔe be wova ɖe ɖoɖo sia ɖa mlɔeba.

 5. Kpeɖodzi kae li si fia be Sea meɖe mɔ be woakpɔ nublanui na ame ne eƒe ŋumaɖɔɖo na ame aɖe ku o?

⁵ Womenaa sitsoƒe amesiwo bua do hlɔ̃ le Israel-viwo dome o. Wogblɔ be ne Lewi-vi nunɔla si le subɔsubɔm le Mawu ƒe vɔsamlekpui ŋu gɔ̃ hã bua wu ame la, woahee yi aɖawu. (Mose II, 21:12-14) Hekpe ɖe eŋu la, Sea meɖe mɔ be ne ŋumaɖɔɖo na ame aɖe wu ame la, woakpɔ nublanui nɛ o. Le kpɔɖeŋu me, wobia be ne ame aɖe tu xɔ yeye la, wòatɔ kpɔ ɖe eta. Ne metɔe o eye ame aɖe ge le edzi heku la, aƒea aɖe hlɔ̃fe. (Mose V, 22:8) Azɔ hã ne nyi aɖe dia dzotutu ame eye wona nyia tɔ nya, gake mekpɔ edzi o eye wòtu dzo ame aɖe wòku la, ke nyia tɔ ɖe hlɔ̃fe eye woate ŋu awui gɔ̃ hã. (Mose II, 21:28-32) Alesi Mawu bua agbe nu vevii ŋuti ɖaseɖiɖi bubu gadze le esia me be ne ame aɖe ƒo fiafi le ŋkeke me, esime wòate ŋu akpɔe adze sii hafi, eye wòwui la, ke eɖi ʋufɔ. (Mose II, 22:1, 2) Eyata eme kɔ nyuie be Mawu ƒe se siwo da sɔ bliboe la meɖe mɔ be woagblẽ amesi bua wu ame ɖi emawumawui o.

 6. Aleke wowɔ ɖe “agbe ɖe agbe teƒe” ƒe sea dzi le blema Israel?

⁶ Ne wodo hlɔ̃ le blema Israel la, ele be woabia hlɔ̃ ɖe ame kukua ƒe ʋu ta. Ne ‘hlɔ̃biala’ wu hlɔ̃dola la, ke wowɔ ɖe “agbe ɖe agbe teƒe” ƒe se la dzi. (Mose IV, 35:19) Hlɔ̃bialae nye ŋutsu si do ƒome kplikplikpli kple ame kukua wu. Ke amesiwo mebua wu ame o ya ɖe?

Yehowa ƒe Nublanuikpɔkpɔ ƒe Ðoɖo La

 7. Ðoɖo kae Mawu wɔ na amesiwo mebua wu ame o?

⁷ Mawu wɔ ɖoɖo ɖe sitsoƒeduwo ŋu lɔlɔ̃tɔe na amesiwo meɖo vɔ̃ ɖe tame alo bua wu ame o la. Wogblɔ na Mose le amesiawo ŋu be: “Ƒo nu kple Israel-viwo, eye nagblɔ na wo bena: Ne mietso Yordan va Kanaan-nyigba dzi la, ekema mitia duwo, ne woanye sitsoƒe na mi, afisi amesi mebua wu ame o la nasi ayi. Duawo nanye sitsoƒe na mi le hlɔ̃tɔ ta, ne womagawu amewula la hafi ava eƒe ʋɔnu le ameha la ŋku me o. Sitsoƒedu, siwo miana la, nanye du ade. Du etɔ̃ nanɔ Yordan ƒe go si dzi, eye du etɔ̃ nanɔ Kanaan-nyigba dzi; sitsoƒeduwo woanye, . . . bena ne ame aɖe mebua wu ame o la, ne wòasi ayi afima.”—Mose IV, 35:9-15.

 8. Afikawoe sitsoƒeduawo nɔ, eye aleke wokpena ɖe amesiwo mebua wu ame o ŋu be woaɖo duawo me?

⁸ Esi Israel-viawo ɖo Ŋugbedodonyigbaa dzi la, wotsɔ toɖoɖo tso sitsoƒedu adeawo. Wotso du siawo dometɔ etɔ̃—Kedes, Sixem, kple Xebron—ɖe Yordan-tɔsisia ƒe ɣetoɖoƒe gome. Sitsoƒedu siwo nye Golan, Ramot, kple Bezer hã nɔ Yordan ƒe ɣedzeƒe gome. Wotso sitsoƒedu adeawo ɖe teƒe siwo sɔ le mɔdodo siwo wodzra ɖo nyuie dzi. Woɖo dzesiwo ɖe mɔawo dzi le teƒe siwo sɔ eye woŋlɔ nya “sitsoƒe” ɖe wo dzi. Dzesi siawo fia afisi sitsoƒedu aɖe le, eye amesi mebua wu ame o la sina yia duawo dometɔ si tsɔ ɖe egbɔ wu me heɖea eƒe agbe. Ate ŋu akpɔ takpɔkpɔ le afima tso hlɔ̃biala si me.—Yosua 20:2-9.

 9. Nukata Yehowa wɔ ɖoɖo be woatso sitsoƒeduawo, eye amekawo ƒe viɖe tae wotso wo ɖo?

⁹ Nukata Mawu wɔ ɖoɖo be woatso sitsoƒeduwo? Ena wotso wo bene womagatsɔ ʋu maɖifɔ aƒo ɖi anyigba la eye dukɔa naɖi ʋufɔ o. (Mose V, 19:10) Amekawo ƒe viɖe tae wotso sitsoƒeduawo? Se la gblɔ be: “[Woanye] sitsoƒe na Israel-viwo kple amedzrowo kpakple wo gbɔ mewo, bena ne ame aɖe mebua wu ame o la, ne wòasi ayi afima.” (Mose IV, 35:15) Bene ameŋkumekpɔkpɔ naganɔ anyi o eye woadrɔ̃ ʋɔnu dzɔdzɔe ne wole nublanui kpɔm ta la, Yehowa gblɔ na Israel-viwo be woatso sitsoƒeduwo na amesiwo mebua wu ame o, siwo nye (1) Israel-vi ŋutɔŋutɔwo, (2) amedzro siwo va le Israel, alo (3) du bubu me tɔ siwo va tso aƒe ɖe dua me.

10. Nukata míate ŋu agblɔ be sitsoƒeduawo nye nublanuikpɔkpɔ ƒe ɖoɖo si Mawu wɔ?

¹⁰ Anyo be míade dzesii be ne ame aɖe mebua wu ame o hã la, ele be woawui le Mawu ƒe sedede sia ta be: ‘Amesi kɔ ameʋu ɖi la, amewo akɔ eya hã ƒe ʋu ɖi.’ Eyata Yehowa Mawu ƒe nublanuikpɔkpɔ ƒe ɖoɖo ta koe amesi mebua wu ame o la ate ŋu asi ayi sitsoƒeduawo dometɔ ɖeka me. Edze abe ameawo katã vea amesi si le hlɔ̃biala nu la nu ene, elabena wo katã wonya be yewo hã yewoate ŋu ada vo mawo ke le manyamanya me eye yewoahiã sitsoƒe kple nublanuikpɔkpɔ.

Si Yi Sitsoƒe

11. Le blema Israel la, nukae ame ate ŋu awɔ ne mebua hafi wu eƒe hadɔwɔla o?

¹¹ Ðewohĩ kpɔɖeŋu aɖe adzi wò ŋudzedzekpɔkpɔ ɖe Mawu ƒe sitsoƒe ŋuti mɔnuɖoɖo si wòwɔ nublanuikpɔkpɔtɔe ŋu ɖe edzi. Tsɔe be yenɔ blema Israel nɔ ati tsom. Kasia fia tu le atia me hedze hawòdɔwɔla aɖe wòku. Nukae nàwɔ? Wowɔ ɖoɖo le Sea me ɖe nusia tututu ŋu. Ðikeke mele eme o be àwɔ ɖoɖo sia si Mawu wɔ la ŋudɔ: “Ale amesi asi ayi [sitsoƒedu me] atsi agbe la, ƒe nya anɔ enye si: Ne ame aɖe wu nɔvia, evɔ wònye mebua o, eye melé fui tsã hã o, alo ne ame aɖe kple nɔvia woyi ave me nake fɔ ge, eye wòkɔ fia dzi, be yealã nake, kasia fia tu le atia me hedze nɔvia wòku la, ekema wòasi ayi du siawo dometɔ ɖeka me, bena wòatsi agbe.” (Mose V, 19:4, 5) Gake ne èsi yi sitsoƒedu me hã la, nusi dzɔ ƒe agba ɖesiaɖe mado le dziwò o.

12. Ðoɖo ka dzie woazɔ ɖo ne amesi mebua wu ame o ɖo sitsoƒedu me?

¹² Togbɔ be woaxɔ wò nyuie hã la, ahiã be nàɖe wò nya dzi na dumegãwo le sitsoƒedua ƒe agbo nu. Ne ège ɖe dua me vɔ la, woagbugbɔ wò aɖo ɖe dumegã siwo le afisi amewunya la dzɔ le dzi kpɔm eye wole Israel ƒe ha la teƒe le agbowo nu la gbɔ. Mɔnukpɔkpɔ asu asiwò le afima be nàɖe ɖokuiwò nu be yemeɖi fɔ o.

Ne Wole Ʋɔnu Drɔ̃m Amewulawo

13, 14. Nusiwo dumegãawo adi be yewoanya ne wole ʋɔnu drɔ̃m amewula la dometɔ aɖewo ɖe?

¹³ Ne èle dumegãwo ƒe ŋkume le ʋɔnu le du si kpɔa afima dzi ƒe agbo nu la, ɖikeke mele eme o be àda akpe be alesi yenɔ agbe va yi ŋu koŋue woalé ŋku ɖo wu. Dumegãawo alé ŋku ɖe alesi mia kple ame kukua dome nɔ ŋu nyuie. Ðe nèlé fui, de xa ɖi nɛ, hebua xlã nu ɖee wòkua? Ne nenemae la, ke dumegãawo akplɔ wò ade asi na hlɔ̃biala la, eye àku. Dumegã siawo anya nusi Sea bia be ‘woatutu ame maɖifɔ ƒe ʋu ɖa le Israel dome.’ (Mose V, 19:11-13) Nenema ke le ʋɔnudrɔ̃nyawo me egbea la, ahiã be Kristotɔ hamemegãwo nanya Ŋɔŋlɔawo nyuie, azɔ ɖe wo dzi, abu nugbegblẽwɔla ƒe nuwɔna kple nɔnɔme tsãtɔwo hã ŋu.

¹⁴ Dumegãawo abia nyawo wò dɔmenyotɔe adi be yewoanya ne ɖe nède xa ɖe eŋu wui. (Mose II, 21:12, 13) Ðe nède xa ɖi nɛ hewuia? (Mose V, 27:24) Ðe nèdo dziku ɖe amea ŋu ale gbegbe be nèdi ayemɔ aɖe nu wuia? Ne nenemae la, ke èdze na ku. (Mose II, 21:14) Vevietɔ dumegãawo adi be yewoanya nenye be adikã alo fuléle nɔ mia kple ame kukua dome. (Mose V, 19:4, 6, 7; Yosua 20:5) Mítsɔe be dumegãawo kpɔe be mèɖi fɔ o eye wogakplɔ wò yi sitsoƒedua mee. Aleke gbegbe nàda akpe ɖe nublanui si wokpɔ na wò ta enye si!

Agbenɔnɔ le Sitsoƒedua Me

15. Nukawoe wodi tso amesi mebua wu ame o si?

¹⁵ Wobia tso amesi mebua wu ame o si be wòanɔ sitsoƒedua me alo wòagagbɔ eƒe gliwo ŋu wu abɔklugui 1,000 (si ade afɔ 1,450) o. (Mose IV, 35:2-4) Ne egbɔ liƒo ma ŋu la, ate ŋu ado go hlɔ̃biala la. Ne edzɔ alea la, hlɔ̃biala ate ŋu awu hlɔ̃dola la faa. Gake womedea kunyowu hlɔ̃dola la alo denɛ mɔ o. Esi wòle sitsoƒedua me la, ele be wòasrɔ̃ asinudɔ, awɔ dɔ, eye wòanye dumevi nyui si ŋu viɖe le na amewo.

16. (a) Ɣeyiɣi didi kae amesi mebua wu ame o anɔ sitsoƒedua me? (b) Nukata nunɔlagã ƒe ku ʋu mɔ na amesi mebua wu ame o be wòadzo le sitsoƒedua me?

¹⁶ Ɣeyiɣi didi kae amesi mebua wu ame o la anɔ sitsoƒedua me? Ate ŋu anye le eƒe agbemeŋkeke mamleawo katã me. Eɖanye kae o, Sea gblɔ be: “Ðe wobe, wòanɔ sitsoƒedu la me, vaseɖe esime nunɔlagã naku. Ke le nunɔlagã ƒe ku megbe la amewula kpɔ mɔ agbugbɔ ava eya ŋutɔ ƒe anyigba dzi.” (Mose IV, 35:26-28) Nukata nunɔlagã ƒe ku ɖe mɔ na amesi mebua wu ame o be wòadzo le sitsoƒedua me? Ẽ, nunɔlagã nye amesiwo xɔ ŋkɔ wu le dukɔa me dometɔ ɖeka. Eyata eƒe ku anye nudzɔdzɔ ɖedzesi aɖe ale gbegbe be woasee le Israel-toawo katã me. Ɣemaɣi sitsoƒedila siwo katã le sitsoƒeduawo me kpɔ mɔ agbugbɔ ayi wo de eye hlɔ̃bialawo manye ŋɔdzi na wo o. Nukata? Elabena Mawu ƒe Sea gblɔ be ɣeyiɣi si hlɔ̃biala kpɔ mɔ awu hlɔ̃dola la nu yi ne nunɔlagã la ku, eye esia le nyanya na amesiame. Ne amesi do ƒome kplii wu bia hlɔ̃ le ema megbe la, ke ezu amewula eye axe amewuwu ƒe tohehe ŋuti fe godoo.

Ŋusẽkpɔɖeamedzi Siwo Nɔa Anyi Didina

17. Ŋusẽ kawoe mɔxeɖenu siwo woɖo amesi mebua wu ame o dzi la ate ŋu akpɔ ɖe edzi?

¹⁷ Ŋusẽ kawoe mɔxeɖenu siwo woɖo amesi mebua wu ame o dzi la ate ŋu akpɔ ɖe edzi? Wonye ŋkuɖodzi nɛ be ewu ame. Awɔe be abu amegbetɔ ƒe agbe nu kɔkɔe ɖaa emegbe. Azɔ hã asesẽ ŋutɔ hafi wòaŋlɔ be be wokpɔ nublanui na ye kpɔ. Esi wokpɔ nublanui nɛ ta la, adi godoo be ye hã yeakpɔ nublanui na ame bubuwo. Sitsoƒedu siwo woɖo kple wo ŋu mɔxeɖenuwo ɖe vi na dukɔ bliboa katã hã. Le mɔ ka nu? Awɔ dɔ ɖe wo dzi kokoko be mele be woawɔ nu ŋumaɖɔɖotɔe alo abu amegbetɔ ƒe agbe nu tsɛe o. Ele be esia naɖo ŋku edzi na Kristotɔwo be ehiã be woatsri ŋumaɖɔɖo si ate ŋu ana ame nadze afɔku aku. Hekpe ɖe eŋu la, ele be sitsoƒeduwo ŋuti ɖoɖo si Mawu wɔ nublanuikpɔkpɔtɔe la naʋã mí be míakpɔ nublanui ne esɔ be míawɔe nenema.—Yakobo 2:13.

18. Mɔ kawo nue sitsoƒedu siwo Mawu na wotso la ɖe vi le?

¹⁸ Viɖe le sitsoƒedu siwo Yehowa Mawu ɖo ŋu le mɔ bubuwo hã nu. Ameawo meɖo nuvlowɔlawo ƒe tohehawo be woadi hlɔ̃dola ne wobui be eɖi fɔ le ʋɔnu o. Ke wobunɛ ame maɖifɔ si mebua wu ame o, eye wokpena ɖe eŋu gɔ̃ hã yia dedienɔƒee. Hekpe ɖe eŋu la, sitsoƒedu siwo wotso to vovovo sã na ɖoɖo si li egbea be woade hlɔ̃dolawo mɔ alo gaxɔ me, ahatsɔ dumeviwo ƒe ga akpɔ wo dzii, si na wogazua nuvlowɔlagãwo wu zi geɖe le esi wova de ha kple nugbegblẽwɔla bubuwo kplikplikpli ta. Le sitsoƒedu ƒe ɖoɖoa me la, mehiã kura be woagblẽ ga gbogbo atɔ kpɔwoe, atsɔ gakpo atu gaxɔwoe, afisi gamenɔlawo dina be yewoasi le zi geɖe, anɔ wo dzram ɖo, ahanɔ wo ŋu dzɔm o. Le nyateƒe me la, amewulae dia “gaxɔ” la henɔa eme vaseɖe ɣeyiɣi si woɖo dzi. Ele hã be wòawɔ dɔ, awɔ nane si aɖe vi na ehavi amegbetɔwo.

19. Biabia kawoe fɔ ɖe te le sitsoƒeduwo ŋu?

¹⁹ Sitsoƒedu siwo ƒe ɖoɖo Yehowa wɔ le Israel be woakpɔ amesiwo mebua wu ame o ta la nye nublanuikpɔkpɔ ƒe ɖoɖo nyateƒe. Míeka ɖe edzi be ɖoɖo sia na wode bubu agbe ŋu. Gake ɖe gɔmesese aɖe le blemasitsoƒeduawo ŋu na ƒe alafa 20 lia sia me tɔ woa? Ðe míate ŋu aɖi ʋufɔ le Yehowa Mawu ŋkume evɔ míanya be míehiã eƒe nublanuikpɔkpɔ oa? Ðe gɔmesese aɖe le Israel-viwo ƒe sitsoƒeduawo ŋu na mí egbea?

Aleke Nàɖo Wo Ŋui?

◻ Aleke Yehowa bua amegbetɔ ƒe agbee?

◻ Nublanuikpɔkpɔ ƒe ɖoɖo kae Mawu wɔ na amesiwo mebua wu ame o?

◻ Aleke amewula wɔna yia sitsoƒedu me, eye ɣeyiɣi didi kae wòle bewòanɔ afima?

◻ Ŋusẽ kawoe mɔxeɖenu siwo woɖo na amesi mebua wu ame o la ate ŋu akpɔ ɖe edzi?

[Anyigbatata si le axa 12]

Wotso Israel ƒe sitsoƒeduawo ɖe teƒe siwo sɔ

(Edze nyuie le agbalẽa ŋutɔ me)

KEDES Yordan-tɔsisi GOLAN

SIXEM RAMOT

XEBRON BEZER