Ta 34

Woɖe Nya Ɣaɣla Dziŋɔ aɖe Gɔme

 1. (a) Aleke Yohanes wɔ nui esime wòkpɔ gbolo gã la kple lã dziŋɔ si dom wòle la, eye nukatae? (b) Aleke Yohanes ƒe ha la wɔa nui esime nudzɔdzɔwo le eme vam le nyagblɔɖiŋutega la me vava nu?

ALEKE Yohanes wɔ esime wòkpɔ gbolo gã la kple lã dziŋɔ si dom wòle la? Eya ŋutɔ ɖo eŋu be: “Eye esime mekpɔe la, nye mo wɔ yaa geɖe ŋutɔ.” (Nyaɖeɖefia 17:6b) Amegbetɔ ƒe tamesusu dzro ko mate ŋu asusu nu ma gbegbe si wòkpɔ la o. Gake eyae nye ma le afima—le gbeadzi—gbolo agbegbegblẽnɔla si bɔbɔ nɔ lã wɔadã dzẽ dziŋɔ aɖe dzie! (Nyaɖeɖefia 17:3) Yohanes habɔbɔ la hã ƒe mo wɔna yaa ŋutɔ egbea esime nudzɔdzɔwo le eme vam le nyagblɔɖiŋutega la me vava nu. Ne ɖe amesiwo le xexeame ate ŋu akpɔe la, woado ɣli be ‘Nukpekpee!’ eye xexeamedziɖulawo axɔe na wo bobobo be ‘Numasekpɔe!’ Gake ŋutega la va zu nu ŋutɔŋutɔ si ʋuʋua ame le ƒe alafa 20 lia me. Mawu ƒe amewo wɔ akpa ɖedzesi aɖe le ŋutega la me vava me xoxo, eye esia na kakaɖedzi wo be nyagblɔɖia aɖe zɔ aɖo eƒe taƒoƒo wɔnuku la gbɔ kokoko.

 2. (a) Esi mawudɔla la kpɔ be Yohanes ƒe mo wɔ yaa la, nya kae wògblɔ nɛ? (b) Nukae woɖe fia Yohanes habɔbɔ la, eye aleke wowɔ esiae?

² Mawudɔla la kpɔ alesi Yohanes ƒe mo wɔ yaae la dze sii. Yohanes yi edzi be: “Eye mawudɔla la gblɔ nam bena: Nukaŋuti wò mo wɔ yaa ɖo mahã? Magblɔ nyɔnu la kple lã, si le etsɔm, eye ta adre kple dzo ewo li nɛ la, ŋu nya ɣaɣla afia wò.” (Nyaɖeɖefia 17:7) Ehẽ, mawudɔla la le nya ɣaɣla la me ɖe ge azɔ! Eɖe ŋutega la ƒe akpa vovovoawo kple nudzɔdzɔ wɔdɔɖeamedzi siwo akplɔe ɖo le ema megbe teti la me na Yohanes si ke ŋku ɖi hɔ̃ɔ la. Nenema ke woklo nu le nyagblɔɖi ma ƒe gɔmesese dzie na Yohanes habɔbɔ si le ŋudzɔ esime wòle subɔsubɔm le mawudɔlawo ƒe mɔfiafia te egbea. “Alo drɔ̃e gɔmeɖeɖe la menye Mawu tɔe oa?” Abe nuteƒewɔla Yosef ene la, míexɔe se be etɔe. (Mose I, 40:8; tsɔe sɔ kple Daniel 2:29, 30.) Ðeko wòle abe ɖe wona Mawu ƒe amewo zu nukpɔkpɔ ene esime Yehowa le ŋutega la kple ŋusẽ si wòle be wòakpɔ ɖe woƒe agbe dzi la me ɖem na wo. (Psalmo 25:14) Ena nyɔnu la kple lã wɔadã la ƒe nya ɣaɣla la gɔme sese ʋu ɖi na wo ɖe game dzi tututu.—Psalmo 32:8.

3, 4. (a) Dutoƒonuƒo kae Habɔbɔa ƒe zimenɔla ƒo le ƒe 1942 me, eye aleke wòɖe nusi lã wɔadã dzẽ la nye la mee? (b) Nya kawo siwo mawudɔla la gblɔ na Yohanes mee Zimenɔla Knorr dzro?

³ Esime Xexemeʋa II nɔ edzi yim sesĩe la, Yehowa Ðasefo siwo le United States la wɔ woƒe Xexeme Yeye Teokrasi Takpekpe tso September 18 vaseɖe 20 lia dzi, le ƒe 1942 me. Wotsɔ telefonkadodo tsiã takpedu bubu siwo wu 50 kple takpedugã si nye Kleveland, Ohio la, eye wokpɔ vavalawo ƒe agbɔsɔsɔ gãtɔ kekeake si nye ame 129,699. Le afisiwo aʋaŋɔli ƒe nɔnɔmewo ɖe mɔ le la, woƒo takpekpe me nuƒo mawo ke le takpekpe bubuwo me le xexeame katã. Yehowa ƒe amewo dometɔ geɖe susui ɣemaɣi be aʋa la atrɔ zu Mawu ƒe Harmagedon-ʋa la; eyata dutoƒonuƒo si nye “Ŋutifafa—Ate Ŋu Anɔ Anyi Adidia?” nyɔ didi vevie be yewoanya ɖe amewo me. Aleke Gbetakpɔxɔ Habɔbɔa ƒe zimenɔla yeyea N. H. Knorr ate ŋu aka ɖe edzi alea gbegbe be yeaƒo nu tso ŋutifafa ŋu esime wòwɔ abe nusi tsi tre ɖe ema ŋu tututue le dukɔwo lalam ene?a Nusitae nye be Yohanes ƒe ha la ‘nɔ ŋku lém ɖe’ Mawu ƒe Nyagblɔɖinya la ‘ŋu etɔxɛe.’—Hebritɔwo 2:1; Petro II, 1:19.

⁴ Nyagblɔɖia me kɔkɔ kae dutoƒonuƒo si nye “Ŋutifafa—Ate Ŋu Anɔ Anyi Adidia?” la na? Esi Zimenɔla Knorr ɖee fia kɔte be lã wɔadã dzẽ lae nye Dukɔwo ƒe Nubabla la vɔ la, enɔ te ɖe mawudɔla la ƒe nya siwo gbɔna si wògblɔ na Yohanes la dzi eye wòyi edzi ƒo nu tso eƒe dɔ si wòawɔ kple adã la ŋu be: “Lã [wɔadã], si nèkpɔ la, enɔ anyi, eye megali o, eye wòle dodo ge atso aʋli me, eye wòayi ɖe gbegblẽ me.”—Nyaɖeɖefia 17:8a.

 5. (a) Aleke wɔ ‘lã wɔadã la nɔ anyi’ eye “megali o”? (b) Aleke Zimenɔla Knorr ɖo biabia si nye “Ðe Nubabla la atsi aʋlia mea?” ŋue?

⁵ ‘Lã wɔadã la nɔ anyi.’ Ẽ, enɔ anyi kpɔ abe Dukɔwo ƒe Nubabla ene tso January 10, 1920 dzi heyi eye dukɔ 63 nɔ eme kpɔ ɣeaɖeɣi. Gake Japan, Germania, kple Italia kplɔ wo nɔewo ɖo do go le eme eye woɖe Soviet Union le Nubabla la me. Le September 1939 me la, Nazi Germania ƒe dzizizidziɖula la he Xexemeʋa II vɛ.b Esi Dukɔwo ƒe Nubabla la do kpo ŋutifafa ta kpɔkpɔ le xexeame la, eyi dɔmawɔmawɔ ƒe aʋli me keŋkeŋ kloe. Le ƒe 1942 me la, ezu nusi nɔ anyi kpɔ. Menye do ŋgɔ na esia alo le ɣebubuɣi emegbe ye Yehowa ɖe ŋutega la ƒe gɔmesese deto bliboa katã me na eƒe amewo o—ke boŋ ɣeyiɣi vevi ma me tututue! Le Xexeme Yeye Teokrasi Takpekpea me la, N. H. Knorr te ŋu gblɔ kɔte, le ɖekawɔwɔ me kple nyagblɔɖia be “lã wɔadã la . . . megali o.” Azɔ ebia be, “Ðe Nubabla la atsi aʋlia mea?” Esi wòyɔ nya tso Nyaɖeɖefia 17:8 me la, eɖo eŋu be: “Xexemedukɔwo ƒe habɔbɔ la agafɔ ɖe te ake.” Alea tututue wòva emee—esi nye Yehowa ƒe Nyagblɔɖinya la ƒe nyateƒenyenye ta ʋiʋli!

Gododo tso Aʋlia Me

 6. (a) Ɣekaɣie lã wɔadã dzẽ la do go tso aʋlia me, eye kple ŋkɔ yeye ka? (b) Nukatae Dukɔ Ƒoƒuawo nye lã wɔadã dzẽ si wogbɔ agbee la ŋutɔŋutɔ?

⁶ Lã wɔadã dzẽ la do go tso aʋlia me nyateƒe. Le June 26, 1945 me la, dukɔ 50 tsɔ aseyetsotso hoo ɖe adzɔgbe le San Fransisko, U.S.A. be yewoaxɔ Dukɔ Ƒoƒuawo ƒe habɔbɔa ƒe Ðoɖo la. Habɔbɔ sia ƒe taɖodzinue nye be “wòakpɔ dukɔwo dome ŋutifafa kple dedienɔnɔ ta.” Nu geɖe li siwo ɖi wo nɔewo le Nubabla la kple Dukɔ Ƒoƒuawo dome. The World Book Encyclopedia de dzesii be: “Le mɔ aɖewo nu la, Dukɔ Ƒoƒuawo ɖi Dukɔwo ƒe Nubabla si woɖo anyi le Xexemeʋa I megbe la . . . Dukɔ siwo ɖo Dukɔ Ƒoƒuawo anyi la dometɔ geɖee ɖo Nubabla la hã anyi. Abe Nubabla la ene la, woɖo Dukɔ Ƒoƒuawo anyi be wòakpɔ ŋutifafa ta le dukɔwo dome. Dukɔ Ƒoƒuawo ƒe dɔwɔnu veviwo ɖi Nubabla la tɔ ŋutɔ.” Eyata Dukɔ Ƒoƒuawo nye lã wɔadã dzẽ si wogbɔ agbee la vavã. Dukɔ siwo sɔ gbɔ wu 160 siwo le eme la sɔ gbɔ wu Nubabla la tɔ si nye dukɔ 63 la sãa; ede ta agbanɔamedzi siwo lolo wu habɔbɔ si nɔ anyi do ŋgɔ nɛ la tɔ hã te.

 7. (a) Mɔ ka nue anyigbadzinɔlawo ƒe mo wɔ yaa le esime wokpɔ lã wɔadã dzẽ la? (b) Taɖodzinu ka gbɔ ɖoɖoe Dukɔ Ƒoƒuawo do kpoe, eye nukae eƒe agbalẽŋlɔla gã gblɔ ku ɖe esia ŋu?

⁷ Gbã la, wogblɔ mɔkpɔkpɔ gãwo ɖe Dukɔ Ƒoƒuawo ŋu. Esia nye mawudɔla la ƒe nyawo me vava be: “Eye ne anyigbadzinɔla, siwo ƒe ŋkɔwo womeŋlɔ ɖe agbegbalẽa me tso xexeame ƒe gɔmeɖoɖoanyi me o la, akpɔ lã la ɖa, alesi wònɔ anyi, eye megali o, eye wòagava la, woƒe mo awɔ yaa.” (Nyaɖeɖefia 17:8b) Habɔbɔ yeye gã sia si le dɔ wɔm tso eƒe dɔwɔƒea ƒe ta ƒe xɔ gã dzeani si le New York ƒe East River to la wɔ nuku na anyigbadzinɔlawo. Gake ŋutifafa kple dedienɔnɔ vavãtɔ bu ɖe Dukɔ Ƒoƒuawo. Le Abosam ƒe nuklia ƒe azã sia me la, vɔvɔ̃ na “ame nɔewo tsɔtsrɔ̃ si ŋu kakaɖedzi le”—si woŋlɔ kpuie le Eŋlisigbe me be MAD—ƒe ŋɔdzi koe na ŋutifafa le xexeame eye kɔlili aʋawɔnuwo yi edzi le agbogbo dom ŋɔdzitɔe. Le Dukɔ Ƒoƒuawo ƒe agbagbadzedze ƒe 40 kloe megbe la, eƒe agbalẽŋlɔla gãtɔ Javier Pérez de Cuéllar, fa konyi le ƒe 1985 me be: “Míele zazɛ̃nyahelawo ƒe azã bubu me, eye míenya nusi míawɔ le eŋu o.”

8, 9. (a) Nukatae Dukɔ Ƒoƒuawo mate ŋu akpɔ ameƒomea ƒe kuxiwo gbɔ o, eye nukae adzɔ ɖe edzi kpuie le Mawu ƒe gbeɖeɖe nu? (b) Nukatae Dukɔ Ƒoƒuawo ɖolawo kple amesiwo eƒe nu wɔa nuku na la ƒe ŋkɔwo mele Mawu ƒe “agbegbalẽa” me o? (d) Nukae Yehowa ƒe Fiaɖuƒea awɔ kple dzidzedze?

⁸ Egbɔkpɔnua mele Dukɔ Ƒoƒuawo si o. Eye nukatae? Elabena menye ameƒomea katã ƒe Agbenala ye nye Dukɔ Ƒoƒuawo ƒe agbenala o. Eƒe agbenɔƒe anɔ kpuie, elabena le Mawu ƒe gbeɖeɖe nu la, ‘ayi ɖe gbegblẽ me.’ Dukɔ Ƒoƒuawo ɖolawo kple amesiwo eƒe nu wɔa nuku na la ƒe ŋkɔwo mele Mawu ƒe agbegbalẽ la me o. Aleke amegbetɔ siwo nye nuvɔ̃me siwo kuna, amesiwo dometɔ geɖewo ɖua fewu le Mawu ƒe ŋkɔa ŋu la ato Dukɔ Ƒoƒuawo dzi be woƒe asi nasu nusi Yehowa Mawu gblɔ be yeawɔ kpuie, menye to amegbetɔwo dzi o, ke boŋ to Fiaɖuƒe si le yeƒe Kristo si me dzi la dzie?—Daniel 7:27; Nyaɖeɖefia 11:15.

⁹ Le nyateƒe me la, Dukɔ Ƒoƒuawo nye busu ƒe alakpanu si wogblɔ be awɔ nusi Mawu ƒe Mesia Fiaɖuƒe si le eƒe Ŋutifafafia Yesu Kristo—amesi ƒe dziɖuɖu nuwuwu manɔe na o—la si me awɔ la. (Yesaya 9:5, 6) Ne Dukɔ Ƒoƒuawo dze agbagba he ɣeyiɣi kpui aɖe ƒe ŋutifafa vɛ hã la, maxɔ ɣeyiɣi aɖeke hafi aʋa nagadzɔ o. Aleae amegbetɔ nuvɔ̃mewo le. “Womeŋlɔ [woƒe ŋkɔwo] ɖe agbegbalẽa me tso xexeame ƒe gɔmeɖoɖoanyi me o.” Menye ɖeko Yehowa Mawu ƒe Fiaɖuƒe si le Kristo si me ahe ŋutifafa mavɔ va anyigba dzi ko evɔ o, ke boŋ to Yesu ƒe tafevɔsa la dzi la, afɔ ame kuku siwo nye ame dzɔdzɔe kple ame madzɔmadzɔ siwo le ŋku dzi na Mawu la ɖe tsitre. (Yohanes 5:28, 29; Dɔwɔwɔwo 24:15) Esia lɔ amesiame si nɔ te sesĩe togbɔ be Satana kple eƒe dzidzimevia lé fu wo gake la ɖe eme, kpakple ame bubu siwo ava ɖee afia be yewonye toɖolawo la. Edze kɔte be amesiwo ku ɖe Babilon Gã la ŋu tamanamanatɔe alo amesiwo katã yi edzi subɔ lã wɔadã la ƒe ŋkɔwo manɔ Mawu ƒe agbegbalẽa me gbeɖe o.—Mose II, 32:33; Psalmo 86:8-10; Yohanes 17:3; Nyaɖeɖefia 16:2; 17:5.

Ŋutifafa kple Dedienɔnɔ—Dzodzroe Wole Mɔ Kpɔm Nɛ

10, 11. (a) Nukae Dukɔ Ƒoƒuawo ɖe gbe ƒãe le ƒe 1986 me, eye aleke wowɔ nu ɖe eŋue? (b) “Subɔsubɔha ƒe ƒome” nenie kpe ta ɖe Assisi, Italia, be yewoado gbe ɖa abia ŋutifafa, eye ɖe Mawu ɖoa gbedodoɖa mawo ŋua? Ðe eme.

¹⁰ Le agbagbadzedze be woado ŋusẽ ameƒomea ƒe mɔkpɔkpɔ me la, Dukɔ Ƒoƒuawo ɖe gbe ƒã ƒe 1986 be enye “Dukɔwo Dome Ŋutifafaƒe,” si ƒe tanyae nye “Woakpɔ Ŋutifafa kple Ameƒomea ƒe Etsɔ Me Ta.” Wobia tso dukɔ siwo le aʋa wɔm si be woada woƒe aʋawɔnuwo ɖi, ƒe ɖeka ya teti. Aleke wowɔ nu ɖe esia ŋue? Le Dukɔwo Dome Ŋutifafa ƒe Numekudɔwɔƒe ƒe nyatakaka aɖe nu la, wowu amesiwo ade miliɔn atɔ̃ le aʋawɔwɔwo ta le ƒe 1986 ɖeɖeko me! Togbɔ be wotso ga tɔxɛ aɖewo eye wowɔ stamp siwo woatsɔ aɖo ŋku edzii hã la, dukɔwo ƒe akpa gãtɔ meti ŋutifafa ƒe taɖodzinua yome le ƒe ma me o. Ke hã la, xexeame ƒe subɔsubɔhawo—esi wotsi dzi ɣesiaɣi be yewoanɔ ƒomedodo nyui me kple Dukɔ Ƒoƒuawo ta la—wodze gbeƒãɖeɖe le ƒea ŋu gɔme le mɔ vovovo nu. Le January 1, 1986 dzi la, Papa John Paul II kafu dɔ si Dukɔ Ƒoƒuawo le wɔwɔm eye wòkɔ ƒe yeyea ŋu na ŋutifafa. Eye le October 27 dzi la, eƒo xexeame ƒe subɔsubɔhawo ƒe akpa gãtɔ ƒe ŋgɔnɔlawo nu ƒu ɖe Assisi, Italia be woado gbe ɖa abia ŋutifafa.

¹¹ Ðe Mawu ɖoa ŋutifafagbedodoɖa mawo tɔgbe ŋua? Enyo, Mawu kae subɔsubɔhakplɔla mawo nɔ gbe dom ɖa na? Ne èbia nya sia wo la, ƒuƒoƒoawo dometɔ ɖesiaɖe aɖo eŋu vovovoe. Ðe mawu miliɔn geɖe ƒe ƒuƒoƒo aɖe li si ate ŋu ase koko siwo woƒo le mɔ vovovo nu la eye wòawɔ wo dzia? Vavalawo dometɔ geɖe de ta agu na Kristodukɔa ƒe Mawuɖekaetɔ̃ la.c Buddhatɔwo, Hindutɔwo, kple ame bubuwo dzi gbedoɖahawo na mawu siwo ŋu xexlẽme mele o. Ne woƒo wo katã nu ƒu la, “subɔsubɔha ƒe ƒome” 12 ye ƒo ƒu, eye ame xɔŋkɔawo abe Anglikan ƒe Bisiɔpgã si le Kanterbury, Buddhatɔwo ƒe Dalai Lama, Russiatɔwo ƒe Orthodoks nunɔla, Tokyo ƒe Shinto-trɔ̃xɔwo ƒe Habɔbɔ ƒe zimenɔla, trɔ̃subɔla Afrikatɔwo kple Amerika Indiatɔ eve siwo tsɔ kuku siwo wotsɔ xefu wɔe la ɖo atsyɔ̃ na wo ɖokui la ene nɔ wo teƒe. Ne míaƒo nu fũ o la, míagblɔ be wonye amesiwo le amadede si nya kpɔ me eye wonye nukpɔkpɔ dzeani si woɖe le television dzi. Ƒuƒoƒoa ɖeka do gbe ɖa ʋuu gaƒoƒo 12 matɔmatɔe ɣeaɖeɣi. (Tsɔe sɔ kple Luka 20:45-47.) Gake ɖe gbedodoɖa mawo dometɔ aɖe yi dzi to alilikpo siwo nɔ ƒuƒoƒo ma tame la ŋua? Ao, ɖe susu siwo gbɔna la ta:

12. Susu kawo tae Mawu meɖo xexeme ƒe subɔsubɔhakplɔlawo ƒe ŋutifafagbedodoɖawo ŋu o?

¹² Abe amesiwo to vovo na amesiwo ‘zɔna le Yehowa ƒe ŋkɔa me’ ene la, mawusubɔla mawo dometɔ ɖeka pɛ hã medo gbe ɖa na Yehowa, Mawu gbagbe la si ƒe ŋkɔ dze abe zi 7,000 sɔŋ ene le gbe gbãtɔ si me woŋlɔ Biblia ɖo la me o. (Mixa 4:5; Yesaya 42:8, 12)d Abe ƒuƒoƒo ene la, womeva Mawu gbɔ le Yesu ƒe ŋkɔ me o, wo dometɔ akpa gãtɔ mexɔ Yesu Kristo dzi se gɔ̃ hã o. (Yohanes 14:13; 15:16) Wo dometɔ aɖeke mele nusi nye Mawu ƒe lɔlɔ̃nu hena míaƒe ŋkekea si nye gbeƒãɖeɖe Mawu ƒe Fiaɖuƒe si woɖo anyi yeyee la le xexeame katã be eyae nye mɔkpɔkpɔ ŋutɔŋutɔ si li na ameƒomea—ke menye Dukɔ Ƒoƒuawo o—la wɔm o. (Mateo 7:21-23; 24:14; Marko 13:10) Le wo dometɔ akpa gãtɔ gome la, woƒe subɔsubɔhawo kpɔ gome le aʋa siwo me wokɔ ʋu geɖe ɖi le le ŋutinya me, siwo dome ƒe alafa sia me xexemeʋa eveawo le, la me. Mawu gblɔ na ame mawo tɔgbe be: “Ne mieli kɔ gbedodoɖawo gleglegle hã la, nyemasee o, elabena ʋu yɔ asi me na mi!”—Yesaya 1:15; 59:1-3.

13. (a) Nukatae alesi xexeame ƒe subɔsubɔhakplɔlawo kpe ɖe Dukɔ Ƒoƒuawo ŋu le ŋutifafadidi me la nye nusi ɖe nu geɖe fia mí? (b) Nuka mee Mawu gblɔ be ŋutifafaɣliawo ava wu nu ɖo mlɔeba?

¹³ Azɔ hã alesi xexeame ƒe subɔsubɔhakplɔlawo de asi eme na Dukɔ Ƒoƒuawo le ŋutifafa biabia me fifia hã ɖe nu geɖe ŋutɔ fia mí. Wodi be yewoakpɔ ŋusẽ ɖe Dukɔ Ƒoƒuawo dzi be wòaɖe vi na yewo ŋutɔwo, vevietɔ le míaƒe egbeŋkeke siawo siwo me woƒe amewo dometɔ geɖe le megbe trɔm de mawusubɔsubɔ la. Abe kplɔla mawɔnuteƒe siwo nɔ blema Israel ene la, wole ɣli dom be, “Ŋutifafa, ŋutifafa! evɔ ŋutifafa meli o hafi.” (Yeremya 6:14) Ðikekemanɔmee la, woƒe ŋutifafaɣlia ayi edzi, ade dzi vaseɖe kɔkɔƒe gãtɔ kekeake si ŋu apostolo Paulo gblɔ nya ɖi le la be: “Yehowa ƒe ŋkeke la gbɔna, abe alesi tututu fiafitɔ vana le zã me ene. Ne wole gbɔgblɔm be: ‘Ŋutifafa kple dedienɔnɔ!’ la, tete tsɔtsrɔ̃ kpata ava lili wo kpoyi abe alesi fuɖuame va lilia funɔ ene, eye womate ŋu asi le enu o.”—Tesalonikatɔwo I, 5:2, 3, New World Translation.

14. Aleke woado “Ŋutifafa kple dedienɔnɔ!” ƒe ɣli lae, eye aleke míawɔ be magaflu mí o?

¹⁴ Nɔnɔme ka mee “Ŋutifafa kple dedienɔnɔ!” ƒe ɣli gã sia aɖi le? Wogblɔe le afisia be anye nusi aɖe dzesi ne esusɔ vie ko tsɔtsrɔ̃ kpata nalili amesiwo le ɣli ma dom la. Eyata ele be wòanye nane si de ŋgɔ wu nya siwo xexeamekplɔlawo gblɔ do ŋgɔ la dometɔ ɖesiaɖe. Ðikekemanɔmee la, woadoe le xexeame katã. Gake amenublenu koe wòanye. Le ememe la, naneke matrɔ ŋutɔŋutɔ o. Ðokuitɔdidi, fuléle, nuvlowɔwɔ, ƒomewo ƒe gbagbã, agbegbegblẽnɔnɔ, dɔléle, vevesese, kple ku aganɔ anyi kokoko. Ema tae wòaflu amesiwo mele ŋudzɔ ɖe Biblia ƒe nyagblɔɖiwo ŋu o ɖo. Gake mele be wòaflu wò ya o, ne èle ŋudzɔ ɖe nusi xexeamenudzɔdzɔwo fia la ŋu eye nèɖo to nyagblɔɖi me nuxlɔ̃me siwo le Mawu ƒe Nya la me la.—Marko 13:32-37; Luka 21:34-36.

[Etenuŋɔŋlɔwo]

[Aɖaka si le axa 250]

Nuwɔna Siwo Tsi Tre Ðe “Ŋutifafa” Ŋu

Togbɔ be Dukɔ Ƒoƒuawo ɖe gbe ƒã ƒe 1986 be enye Dukɔwo Dome Ŋutifafaƒe hã la, kɔlili amegbetɔ ƒe ɖokuitsɔtsrɔ̃ʋawɔnuwo yi edzi. World Military Social Expenditures 1986 ŋlɔ numeɖeɖe siawo siwo ɖea fu tame na ame la be:

Le ƒe 1986 me la, ga si wozã ɖe asrafodɔwo ŋu le xexeame katã ɖo dɔlar miliɔn akpe 900.

Ga si wozãna ɖe aʋawɔnuwo ŋu le xexeame katã le gaƒoƒo ɖeka me asu be woatsɔ awɔ atike si axe mɔ na dɔléle siwo wua ame miliɔn 3.5 siwo kuna ƒe sia ƒe tso dɔxɔleameŋu siwo woate ŋu axe mɔ na hafi si me la.

Le xexeame katã la, ame ɖeka le ame atɔ̃ ɖesiaɖe me da ahe kolikoli. Ga si xexeame zãna ɖe aʋawɔnuwo ŋu le ŋkeke eve me ate ŋu anyi dɔwuitɔ siawo katã ƒe ɖeka blibo hafi.

Nukliaʋawɔnu si xexeame li kɔ ɖi la ƒe nugblẽŋusẽ lolo zi gbɔ zi 160,000,000 sɔŋ wu nusi Chernobyl ƒe nuklianuwo ƒe wówo la gblẽ.

Egbea woate ŋu ada nukliabɔmb ɖeka si ƒe ŋusẽ gbɔ bɔmb si woge ɖe Hiroshima dzi le ƒe 1945 me la ŋu zi gbɔ zi 500 kple edzivɔ.

Aʋawɔnu siwo li egbea ƒe ŋusẽ ate ŋu agblẽ nu wu nusi gblẽ le Hiroshima ŋu la ƒe teƒe miliɔn ɖeka kple edzivɔ. Wosɔ kple nusi bɔmb siwo woda le Xexemeʋa II me gblẽ esime ame miliɔn 38 ku la, ƒe teƒe 2,700 sɔŋ.

Aʋawɔwɔwo va bɔ wu eye wogblẽa nu wu. Amesiwo ku le aʋawɔwɔ me le ƒe alafa 18 lia me ƒe ƒuƒoƒo nye miliɔn 4.4, wonye miliɔn 8.3 le ƒe alafa 19 lia me, kple miliɔn 98.8 le ƒe alafa 20 lia ƒe ƒe 86 me. Tso ƒe alafa 18 lia dzi la, amesiwo ku le aʋawɔwɔ me la dzi ɖe edzi kabakaba zi gbɔ zi ade wu alesi amewo ƒe agbɔsɔsɔ dzi ɖe edzie. Amesiwo ku le aʋawɔwɔ ɖesiaɖe me le ƒe alafa 20 lia me dzi ɖe edzi zi gbɔ zi ewo wu amesiwo wowu le eme le ƒe alafa 19 lia me.

[Nɔnɔmetata siwo le axa 247]

Abe alesi wogblɔe ɖi le lã wɔadã dzẽ la ŋu ene la, Dukɔwo ƒe Nubabla la yi aʋli me le Xexemeʋa II me gake wogbɔ agbee abe Dukɔ Ƒoƒuawo ene

[Nɔnɔmetata siwo le axa 249]

Le megbenɔnɔ na Dukɔ Ƒoƒuawo ƒe “Ŋutifafaƒe” la ɖeɖe fia me la, xexeamesubɔsubɔhawo teƒenɔlawo do gbe siwo tɔtɔ ɖa le Assisi, Italia, gake wo dometɔ ɖeka pɛ hã medo gbe ɖa na Yehowa, Mawu gbagbe la o