Ta Atɔ̃lia

Mawu Vavã la Gblɔ Woƒe Ðeɖekpɔkpɔ Ði

Yesaya 44:1-28

1, 2. (a) Nyabiabia kae Yehowa fɔ ɖe te? (b) Aleke Yehowa aɖee afia be ye koe nye Mawu vavãtɔ?

‘AMEKAE nye Mawu vavã la?’ Wobia nya sia zi geɖe le ƒe alafaawo me. Ekema aleke gbegbe wòwɔ mo yaa enye si be Yehowa ŋutɔ bia nya sia le Yesaya ƒe agbalẽa me! Egblɔ na amegbetɔwo be woabu nya sia ŋu be: ‘Yehowae nye Mawu vavã ɖeka kolia la? Alo ɖe bubu aɖe li si ate ŋu aʋli eƒe ɖoƒe kpliia?’ Esi Yehowa do nyaa ɖa vɔ la, egblɔ nusiwo me susu le si dzi woanɔ te ɖo akpɔ Mawunyenye ƒe nya la gbɔ. Nya siwo wògblɔ la kplɔa dzianukwaretɔwo ɖoa nyataƒoƒo ɖeka aɖe si womate ŋu aƒo asa na o gbɔ.

² Ame geɖe de ta agu na legbawo le Yesaya ƒe ŋkekeawo me. Aleke gbegbe wona legbasubɔsubɔ dze yakanui le Yesaya ƒe nyagblɔɖigbalẽa ƒe ta 44 lia me nya siwo le tẽ eye wo me kɔ la mee nye si! Ke hã tadedeagu na legbawo ƒe mɔ̃ ɖe Mawu ŋutɔ ƒe amewo. Eyata Israel-viwo dze na tohehe sesẽ, abe alesi míekpɔe le Yesaya ƒe agbalẽa ƒe ta siwo do ŋgɔ me ene. Gake Yehowa ka ɖe edzi na dukɔa lɔlɔ̃tɔe be togbɔ be yeaɖe mɔ Babilontɔwo nakplɔ yeƒe amewo ayi aboyo me hã la, yeaɖe wo le ye ŋutɔ ƒe ɣeyiɣi dzi. Nyagblɔɖi siwo ku ɖe ɖeɖekpɔkpɔ tso aboyo me kple tadedeagu dzadzɛ gbugbɔɖoanyi ŋu me vava aɖo kpe edzi ɖikekemanɔmee be Yehowa koe nye Mawu vavãtɔ, eye wòana ŋu nakpe amesiwo katã dea ta agu na dukɔwo ƒe mawu siwo me agbe mele o.

 3. Aleke Yesaya ƒe nyagblɔɖinyawo kpena ɖe Kristotɔwo ŋui egbea?

³ Nyagblɔɖi si le Yesaya ƒe agbalẽa ƒe akpa sia kple wo me vava le blema doa ŋusẽ Kristotɔwo egbea. Tsɔ kpe ɖe eŋu la, Yesaya ƒe nyagblɔɖinyawo ava eme le míaƒe ŋkekea me kple etsɔme hã. Eye nudzɔdzɔ mawo ku ɖe ɖela kple ɖeɖekpɔkpɔ aɖe si lolo wu esi wogblɔ ɖi na Mawu ƒe blemadukɔa gɔ̃ hã ŋu.

Mɔkpɔkpɔ na Yehowa ƒe Amewo

 4. Aleke Yehowa de dzi ƒoe na Israel?

⁴ Wotsɔ nya dedziƒoname si nye ŋkuɖodzinya dze ta 44 lia gɔmee be Mawue tia Israel, eye wòɖee ɖe vovo tso dukɔ siwo ƒo xlã wo gbɔ be woazu yeƒe dɔla. Nyagblɔɖia gblɔ be: “Azɔ nye dɔla Yakob kple nye ame tiatia Israel, see! Ale Yehowa, wɔwòla kple mèwòla tso dɔ me ke, amesi li kpli wò la, gblɔ esi: Nye dɔla Yakob kple nye ame tiatia Yesurun, megavɔ̃ o!” (Yesaya 44:1, 2) Yehowa lé be na Israel tso dadaa ƒe dɔme, le kpɔɖeŋumɔ nu, tso esime Israel va zu dukɔ esi woʋu dzo le Egipte megbe. Eyɔ eƒe dukɔa le ƒuƒoƒo me be “Yesurun,” si gɔmee nye “Dzɔdzɔetɔ,” si nye dzesideŋkɔ si me lɔlɔ̃ kple belélename dze le. Ŋkɔ ma ganye ŋkuɖodzinya hã be ele be Israel-viwo nanye ame dzɔdzɔewo, si nye nusi wodo kpo wɔwɔ zi geɖe.

5, 6. Nu tuameɖo kawoe Yehowa atsɔ na Israel, eye nukae ado tso eme?

⁵ Aleke gbegbe Yehowa ƒe nya siwo kplɔe ɖo vivi hetua ame ɖoe nye si! Egblɔ be: “Maƒo tsi ɖe kuɖiɖinyigba dzi kple tɔʋuwo ɖe anyigba ƒuƒu dzi. Matrɔ nye gbɔgbɔ akɔ ɖe viwòwo dzi kple nye yayra ɖe wò dzidzimeviwo dzi, ne woamie abe gbe ene, abe amuti le tɔ to ene.” (Yesaya 44:3, 4) Atiwo te ŋu tsina le tɔ to, le kuɖiɖinyigba si dzi ƒu kplakplakpla gɔ̃ hã dzi. Ne Yehowa na nyateƒea ƒe tsi si naa agbe eye wòkɔ eƒe gbɔgbɔ kɔkɔe ɖi la, Israel atsi nyuie, abe ati si wodo ɖe tsimɔ to ene. (Psalmo 1:3; Yeremya 17:7, 8) Yehowa ana ŋusẽ eƒe amewo be woawɔ woƒe akpa dzi, si nye be woaɖi ɖase le eƒe Mawunyenye ŋuti.

⁶ Nusiwo ado tso gbɔgbɔ kɔkɔea kɔkɔ ɖi sia me dometɔ ɖekae nye be ame aɖewo agava kpɔ ŋudzedze ɖe Israel ƒe ƒomedodo kple Yehowa ŋu. Eyata míexlẽ be: “Amesi agblɔ be, Yehowa tɔ ye nye, ame kemɛ atsɔ Yakob ƒe ŋkɔ na eɖokui, eye ame bubu aŋlɔ Yehowa ɖe eƒe asi ŋu, eye wòaƒo Israel ŋkɔ ɖo na eɖokui.” (Yesaya 44:5) Ẽ, anye bubu be Yehowa ƒe ŋkɔ nanɔ ame ŋu, elabena woakpɔe be eyae nye Mawu vavã ɖeka kolia.

Wotɔ Gbe Mawuwo

7, 8. Aleke Yehowa tɔ gbe dukɔwo ƒe mawuwoe?

⁷ Le Mose ƒe Sea me la, xɔnametɔ—si nyea ƒometɔ si nyea ŋutsu zi geɖe la—ate ŋu axɔ ame tso aboyo me. (Mose III, 25:47-54; Rut 2:20) Azɔ Yehowa ɖee fia be yee nye Israel ƒe Xɔnametɔ—amesi aɖe dukɔa, wòakpe ŋu na Babilon kple eƒe mawuwo katã. (Yeremya 50:34) Etɔ gbe alakpamawuawo kple wo subɔlawo be: “Ale Yehowa, Israel ƒe fia kple eƒe xɔnametɔ, Yehowa Zebaot, gblɔ esi: Nyee nye gbãtɔ, eye nyee nye mlɔetɔ; mawu aɖeke mekpe ɖe ŋunye o. Ameka agblɔ nya abe nye, amesi ɖo dukɔwo gɔme anyi tso blema ke la ene, ne wòaɖee afia, eye wòatoe nam? Woagblɔ nusi le eme va ge kple nusi le dzɔdzɔ ge la na wo! Ŋɔ megadzi mi o, eye migadzo nyanyanya o! Ðe nyemena miesee tso gbaɖegbe ke, eye nyemetoe na mi oa? Miawoe nye nye ɖasefowo. Ðe mawu aɖe li kpe ɖe ŋunyea? Agakpe aɖeke meli o, nyemenya ɖeke o.”—Yesaya 44:6-8.

⁸ Yehowa tɔ gbe mawuawo be woagblɔ woƒe nya. Ðe woate ŋu ayɔ nusiwo meli o abe ɖe woli ene, ahagblɔ nusiwo adzɔ le etsɔme ɖi wòasɔ pɛpɛpɛ ale gbegbe be wòadze abe ɖe wole dzɔdzɔm xoxo enea? ‘Ame gbãtɔ kple mlɔetɔ,’ amesi nɔ anyi hafi wova te alakpamawuwo katã ŋu bubu eye wòaganɔ anyi ne woŋlɔ wo be xoxoxo la koe ate ŋu awɔ nusia. Mele be eƒe dukɔa navɔ̃ be yewoaɖi ɖase le nyateƒenya sia ŋu o, elabena Yehowa, amesi li ke hexɔ anyinɔ abe agakpe gã nyadri ene la le megbe na wo!—Mose V, 32:4; Samuel II, 22:31, 32.

Tadedeagu na Legbawo ƒe Toflokonyenye

 9. Ðe mesɔ be Israel-viwo nawɔ nu gbagbe aɖeke ƒe nɔnɔme oa? Ðe eme.

⁹ Alesi Yehowa tɔ gbe alakpamawuwo na míeɖo ŋku Se Ewoawo me se evelia dzi. Sedede ma gblɔe kɔte be: “Megawɔ legba aɖeke na ɖokuiwò o. Megawɔ nusiwo le dziƒo, alo nusiwo le anyigba dzi, alo nusiwo le tsi me le anyigba te la, ƒe nɔnɔme o. Megade ta agu na wo o, eye megasubɔ wo o.” (Mose II, 20:4, 5) Gake se sia mefia be mele be Israel-viwo nawɔ nuwo ƒe nɔnɔme wòanye atsyɔ̃ɖonu o. Yehowa ŋutɔ gblɔ be woawɔ atiwo kple kerubiwo ƒe nɔnɔme ada ɖe avɔgbadɔa me. (Mose II, 25:18, 33; 26:31) Gake mele be woade bubu tɔxɛ wo ŋu, alo ade ta agu na wo o. Mele be ame aɖeke nado gbe ɖa na nɔnɔmewɔwɔ siawo alo asa vɔ na wo o. Mawu ƒe sedede si tso gbɔgbɔ me meɖe mɔ be woawɔ naneke ade ta agu nɛ o. Nɔnɔmewɔwɔwo subɔsubɔ alo tadedeagu na wo nye trɔ̃subɔsubɔ.—Yohanes I, 5:21.

10, 11. Nukata Yehowa bua legbawo be wonye ŋukpenanuwo?

¹⁰ Azɔ Yesaya ƒo nu tso legba siwo me agbe mele o ƒe toflokonyenye kple ŋukpe si le wo wɔlawo lalam ŋu be: “Legba mèlawo katã la toflokowo wonye, eye woƒe nu lɔlɔ̃awo mele ɖeke me o; woawo ŋutɔwoe nye woƒe ɖasefowo be, womele nu kpɔm o, eye womedzea si nu o, eyata ŋukpe alé wo. Amekae wɔ mawu aɖe, eye amekae kɔ legba aɖe, si mele ɖeke me o? Kpɔ ɖa, ŋu akpe wo hatiwo katã; aɖaŋuawo la, amegbetɔwo wonye, wo katã naƒo ta kpli, eye woado; ke woadzo nyanyanya, eye ŋukpe alé wo katã.”—Yesaya 44:9-11.

¹¹ Nukata Mawu bua legba siawo be wonye ŋukpenanuwo nenema gbegbe? Gbã la, womate ŋu atsɔ ŋutilãmenuwo aɖo Ŋusẽkatãtɔ la teƒe wòasɔ o. (Dɔwɔwɔwo 17:29) Tsɔ kpe ɖe eŋu la, enye vlododo Yehowa ƒe Mawunyenye be woagblẽ Wɔla la ɖi ava subɔ nuwɔwɔ. Eye ɖe menye gbɔɖiɖi amegbetɔ si wowɔ ɖe ‘Mawu ƒe nɔnɔme nu’ oa?—Mose I, 1:27; Romatɔwo 1:23, 25.

12, 13. Nukata amegbetɔ aɖeke mate ŋu awɔ legba aɖeke si adze na tadedeagu o?

¹² Ðe ŋutilãmenu ŋu ate ŋu akɔ le mɔ aɖe nu le esi wotrɔ asi le eŋu wòzu nusi woade ta agu na taa? Yesaya ɖo ŋku edzi na mí be amegbetɔ ƒe agbagbadzedze dzro koe legbawɔwɔ nye. Dɔwɔnu kple aɖaŋu siwo legbawɔla zãna la kee le asinudɔwɔla bubuwo hã si: “Gbede tsɔa gayibɔ tua fiae, ewɔa eŋu dɔ le dzoka xɔxɔ me, etsɔa zũ tunɛ, eye wòtsɔa eƒe alɔkpa sesẽ wɔa dɔ le eŋu; ne dɔ va wui la, ekema ŋusẽ vɔna le eŋu, ne meno tsi o la, ekema eƒe lãme tuna. Atikpala daa dzidzeka, etsɔa ɣe tanɛ, eye wòtsɔa fi kpanɛ, etsɔa nudzidzega tanɛ, eye wòwɔnɛ ɖe ŋutsu ƒe nɔnɔme me, ɖe amegbetɔ ƒe ɖekadzedze me, ne wòanɔ xɔ me.”—Yesaya 44:12, 13.

¹³ Mawu vavã lae wɔ nu gbagbe siwo katã le anyigba sia dzi siwo dome amegbetɔ hã le. Nu gbagbe siwo sea nu le lãme ƒe agbenɔnɔ nye Yehowa ƒe Mawunyenye ƒe kpeɖodzi si wɔ nuku, gake nusianu si Yehowa wɔ mede eya ŋutɔ nu o. Ðe amegbetɔ ate ŋu awɔ nane wòanyo wu emaa? Ðe wòate ŋu awɔ nane si de ŋgɔ wu eya ŋutɔ—nusi de ŋgɔ ale gbegbe be wòadze be wòasubɔea? Ne amegbetɔ wɔ legba la, ɖeɖi tea eŋu, eye dɔ kple tsikɔ wunɛ. Nusiawo ɖe alesi seɖoƒe li na amegbetɔ ƒe ŋutete fia, gake woɖee fia be amea le agbe ya teti. Legba si wòwɔ la ate ŋu aɖi amegbetɔ. Ate ŋu adze ani gɔ̃ hã. Gake agbe mele eme o. Legbawo menye mawuwo le go aɖeke me o. Tsɔ kpe ɖe eŋu la, nɔnɔmewɔwɔ aɖeke ‘mege tso dziƒo’ kpɔ, abe ɖe menye amegbetɔ si kuna ye wɔe ene o.—Dɔwɔwɔwo 19:35.

14. Aleke wònye nusiwo Yehowa wɔ ye legbawɔlawo zãna?

¹⁴ Yesaya yi edzi ɖee fia be dzɔdzɔmenuwo kple nusiwo Yehowa wɔ koŋue legbawɔlawo zãna: “Ame aɖe lã sedertiwo, etsɔ fɔfɔli kple logoti, eye wòtia avemetiwo na eɖokui. Edo sesewuwo, eye tsidzadza na wotsi. Wonye dzodonu na amegbetɔ; etsɔ ɖe do dzoe heƒu, eye wòtsɔe do dzo ƒo aboloe; etsɔ ɖe wɔ mawui hede ta agu nɛ, eye wòtsɔ ɖe wɔ aklama kpakpɛe hedo gbe ɖa nɛ. Etsɔa eƒe afã doa dzoe, eye eƒe afã dzi woɖua lã le; etɔa lã ɖuna ɖia ƒo, eƒua dzo hegblɔna be: Ehɛ̃, dzo ɖo lã me nam, dzoa le nunye vivim! Etsɔ mamlɛa wɔ mawui, etsɔe wɔ eƒe legbae, eye wòdze klo de ta agu nɛ hedo gbe ɖa nɛ gblɔ bena: Ðem, elabena wòe nye nye mawu!”—Yesaya 44:14-17.

15. Aleke legbawɔla ɖenɛ fiana be gɔmesese aɖeke kura mele ye si o?

¹⁵ Ðe atikpo si wometsɔ do dzoe o ate ŋu aɖe ame aɖea? Ao, mate ŋui o. Mawu vavã la koe ate ŋu aɖe ame. Nukata amewo subɔa nusiwo me agbe mele o? Yesaya ɖee fia be ame ƒe dzimee kuxia ŋutɔŋutɔ nɔna: “Womenyaa nu o, eye womedzea si nu o, elabena woƒe ŋku nyẽ tre mele nu kpɔm o, eye woƒe dzi mele nu gɔme sem o. Ame aɖeke mebua ta me, eye wòkpɔ sidzedze kple gɔmesese o, ne wòagblɔ be: Metsɔ afã do dzoe, meƒo abolo ɖe eƒe akawo dzi, eye metɔ lã ɖu tso; ɖe matsɔ mamlɛa awɔ ŋunyɔnui, eye ɖe mado gbe na atikpoa? Amesi le dzofi yome la, dzi bleamee flui, maɖe eƒe agbe o, eye magblɔ na eɖokui o be: Ðe menye aʋatsoe melé ɖe nuɖusi oa?” (Yesaya 44:18-20) Ẽ, ebubu be trɔ̃subɔsubɔ ade ame dzi le gbɔgbɔ me le abe dzofi ɖuɖu ɖe nuɖuɖu si me nunyiame le teƒe ene.

16. Aleke trɔ̃subɔsubɔ dze egɔmee, eye nukae ate ŋu ana woasubɔ trɔ̃?

¹⁶ Dziƒoe trɔ̃subɔsubɔ dze egɔme tsoe ŋutɔŋutɔ esime subɔsubɔ si wòle be woatsɔ na Yehowa ɖeɖeko biã ŋu na gbɔgbɔmenuwɔwɔ sẽŋu si va zu Satana. Satana ƒe dzodzroa nu sẽ ale gbegbe be ena wòva lé fu Mawu. Nusia koŋue nye trɔ̃subɔsubɔ ƒe gɔmedzedze, elabena apostolo Paulo gblɔ be ŋukeklẽ sɔ kple trɔ̃subɔsubɔ. (Yesaya 14:12-14; Xezekiel 28:13-15, 17; Kolosetɔwo 3:5) Satana ƒã ɖokuitɔdidi ƒe susuwo ɖe ame eve gbãtɔwo me. Nusi Satana tsɔ ɖo Xawa ŋkume la biã ŋu nɛ: “Miaƒe ŋkuwo laʋu, eye mianɔ abe Mawu ene, anya nyui kple vɔ̃.” Yesu gblɔ be dzimee ŋubiabiã tsona. (Mose I, 3:5; Marko 7:20-23) Ne dzia gblẽ la, ate ŋu ana woasubɔ trɔ̃. Esia ta aleke gbegbe wòle vevie enye si be ‘míadzɔ míaƒe dzi ŋu,’ eye míaɖe mɔ gbeɖe be ame aɖeke alo naneke nava nɔ nɔƒe si dze na Yehowa le eme o!—Lododowo 4:23; Yakobo 1:14.

Yehowa Ʋã Woƒe Dzi

17. Nya ka dzie wòle be Israel naɖo ŋkui?

¹⁷ Azɔ Yehowa gblɔ na Israel-viwo be woaɖo ŋku edzi be bubunɔƒe si nye mɔnukpɔkpɔe le wo si. Eƒe ɖasefowoe wonye! Egblɔ be: “Yakob kple Israel, ɖo ŋui, elabena nye dɔla nènye; nyee wɔ wò nènye nye dɔla; Israel, megaŋlɔm be o! Mena wò dzidadawo bu abe afu ene kple wò nuvɔ̃wo abe alilikpo ene; trɔ va gbɔnye, elabena meɖe wò. Mi dziƒowo, mitso aseye, elabena Yehowa wɔe wòde go! Mi anyigba ƒe agunuwo, mido aƒa! Mi towo, avewo kple wo me nuwo katã, mitso aseye hoo, elabena Yehowa ɖe Yakob, eye wòdo kɔkɔe eɖokui ɖe Israel ŋu.”—Yesaya 44:21-23.

18. (a) Nukata wòsɔ be Israel natso aseye? (b) Aleke Yehowa subɔlawo ate ŋu asrɔ̃ eƒe nublanuikpɔkpɔ ƒe kpɔɖeŋui egbea?

¹⁸ Menye Israel ye wɔ Yehowa o. Menye mawu si amegbetɔ wɔ ye wònye o. Yehowa boŋue ɖo Israel anyi be woanye dɔla si yetia. Eye agaɖe eƒe Mawunyenye afia ake ne eɖe dukɔa. Eƒo nu na eƒe dukɔa lɔlɔ̃tɔe heka ɖe edzi na wo be ne wotrɔ dzime la, yeatsyɔ nu woƒe nuvɔ̃wo dzi keŋkeŋ ahaɣla woƒe dzidadawo abe ɖe alilikpo siwo me womate ŋu akpɔ nu toe o ye xe wo ŋkume ene. Dzidzɔnya kae nye si esia nye na Israel! Yehowa ƒe kpɔɖeŋua ʋãa esubɔla siwo li le egbeŋkekea me be woasrɔ̃ eƒe nublanuikpɔkpɔ. Woate ŋu awɔ esia to didi be woakpe ɖe amesiwo wɔ nuvɔ̃ ŋu me—woadze agbagba agbugbɔ wo aɖo te le gbɔgbɔ me ne anya wɔ.—Galatiatɔwo 6:1, 2.

Mawunyenye ƒe Dodokpɔ la Ðo Etaƒoƒo

19, 20. (a) Aleke Yehowa ƒo eƒe nya la tae? (b) Nu dodzidzɔname kawoe Yehowa gblɔ ɖi na eƒe dukɔa, eye ameka dzie wòato ana nya siawo nava eme?

¹⁹ Azɔ Yehowa ƒo eƒe ʋɔnunya la ta ŋusẽtɔe. Ele eya ŋutɔ ƒe ŋuɖoɖo na ge le Mawunyenye ƒe dodokpɔ sesẽtɔ kekeake la me—si nye ŋutete si wotsɔ gblɔa etsɔme ɖi wòsɔna pɛpɛpɛ. Biblia ŋuti nunyala aɖe yɔ Yesaya ta 44 lia ƒe kpukpui atɔ̃ siwo kplɔe ɖo be wonye “Israel ƒe Mawu,” Wɔla ɖeka kolia la, amesi ɖeɖekoe nye etsɔme Ðefiala kple Israel ƒe xɔnamemɔkpɔkpɔ, la “ƒe gãnyenye ŋuti hakpanya.” Nya la ɖo etaƒoƒo wɔdɔɖeamedzi esi wòyɔ ŋutsu si ana ablɔɖe dukɔa tso Babilon si me ƒe ŋkɔ.

²⁰ “Ale Yehowa, ɖewòla, amesi mè wò tso dɔ me ke la, gblɔ esi: Nyee nye Yehowa, amesi wɔ nusiawo katã, nye ɖeka koliae he dziƒo me, eye mekeke anyigba me, ame aɖeke mekpe ɖe ŋunye o. Eya, amesi gblẽa nu kpoloe ƒolawo ƒe dzesi me, eye wòdoa bometsila afakalawo; eya, amesi nana nunyalawo gbugbɔna, eye wòdoa lã woƒe nunya; eya, amesi nana eƒe dɔlawo ƒe nya vaa me, eye wòwɔa eƒe ame dɔdɔ ƒe aɖaŋuɖoɖo dzi; eya, amesi gblɔ na Yerusalem be, woaganɔ eme, eye wògblɔ na Yuda-duwo be, woatso wo, eye yeafɔ eƒe glikpowo ɖe tsitrenu; eya, amesi gblɔ na tɔ gɔme be, mie, eye mana wò tɔsisiwo naƒu kplakplakpla; eya, amesi gblɔ na Kores be: Nye lãkplɔvi nènye! Eyae awɔ nye didiwo katã ade goe, eye wòagblɔ na Yerusalem be, woatsoe, eye na gbedoxɔ be woaɖo egɔme anyi!”—Yesaya 44:24-28.

21. Kakaɖedzi kae Yehowa ƒe nyawo naa ame?

²¹ Ẽ, menye ɖeko Yehowa ate ŋu agblɔ etsɔme nudzɔdzɔwo ɖi ko o ke ŋusẽ le esi hã be wòana eƒe tameɖoɖo si wòɖe fia nava eme bliboe. Nya sia ana mɔkpɔkpɔ Israel. Enye kpeɖodzi be togbɔ be Babilonia-ʋakɔwo awɔ anyigba la aƒedoe hã la, woagatso Yerusalem kple eŋu duwo eye woagbugbɔ tadedeagu vavã aɖo anyi le afima. Gake aleke wòadzɔe?

22. Ƒo nu tso alesi Frat-tɔsisi la mie ŋu.

²² Zi geɖe la, bokɔnɔ siwo ƒe nyawo metso gbɔgbɔ me o la melɔ̃na be yewoagblɔ nya ɖi tẽ o le esi wovɔ̃na be ɖewohĩ nuwo mava dzɔ nenema o ta. Gake Yehowa ya to Yesaya dzi yɔ amesi tututu dzi wòato aɖe eƒe dukɔ tso aboyo me be woayi wo de aɖagbugbɔ Yerusalem kple eƒe gbedoxɔa atu la ƒe ŋkɔ. Eŋkɔe nye Kores, eye woyɔnɛ be Persiatɔ Kores Gãtɔ. Yehowa ƒo nu tso aɖaŋu si Kores azã atsɔ ato Babilon-takpɔnu gã gbogboawo me hã ŋu. Babilon-takpɔnuwo anye gli kɔkɔwo kple tsimɔ siwo to dua me kple eŋu godoo. Kores atrɔ takpɔnu ma ƒe nu vevitɔ—si nye Frat-tɔsisia—to teƒe bubu be wòade edzi. Blemaŋutinyaŋlɔla Herodotus kple Xenophon gblɔ be Kores trɔ mɔ na Frat me tsiwo le afisi tɔsisia tsona yia Babilon, vaseɖe esime tɔsisia mie be eƒe asrafowo nate ŋu atsoe. Frat-tɔsisi gã la mie, va ɖo afisi magate ŋu akpɔ Babilon ta o.

23. Nyagblɔɖi si gblɔ be Kores ana ablɔɖe Israel la me vava ŋuti nuŋlɔɖi kae li?

²³ Ke ŋugbe si wodo be Kores ana ablɔɖe Mawu ƒe dukɔa eye wòakpɔ egbɔ be wogbugbɔ Yerusalem tso hetu gbedoxɔa ya ɖe? Nya si Kores ŋutɔ gblɔ si woŋlɔ ɖe Biblia mee nye be: “Persia-fia Kores ƒe gbe enye si: Yehowa, dziƒo Mawu la, tsɔ anyigba dzi fiaɖuƒewo katã nam, eye wòde se nam be, matu xɔ na ye ɖe Yerusalem le Yuda. Eyata mi eƒe dukɔ la dome amesiame neyi Yerusalem le Yuda, eye eƒe Mawu anɔ kplii, ne wòatu xɔ na Yehowa, Israel ƒe Mawu, si nye Mawu le Yerusalem.” (Ezra 1:2, 3) Yehowa ƒe nya si wògblɔ to Yesaya dzi va eme tututu!

Yesaya, Kores, Kple Egbe Kristotɔwo

24. Ƒomedodo kae le Artaxsasta ƒe sedede be “woagatso Yerusalem” kple Mesia ƒe vava dome?

²⁴ Yesaya ƒe ta 44 lia do Yehowa ɖe dzi be eyae nye Mawu vavã ɖeka la kple eƒe blemadukɔ la Ðela. Tsɔ kpe ɖe eŋu la, gɔmesese deto aɖe le nyagblɔɖia ŋu na mí katã egbea. Se si Kores de le ƒe 538/537 D.M.Ŋ. me be woagbugbɔ Yerusalem-gbedoxɔa atu la na nudzɔdzɔ siwo ana nyagblɔɖi ɖedzesi bubu aɖe nava eme la dze egɔme. Dziɖula aɖe si ŋkɔe nye Artaxsasta hã va de se aɖe le Kores tɔa megbe be ele be woagbugbɔ Yerusalem-dua atso. Daniel ƒe agbalẽa ɖee fia be “tso ɣeyiɣi, si wode se be, woagatso Yerusalem [le ƒe 455 D.M.Ŋ.] vaseɖe amegã, si wosi ami na dzi” anye “kwasiɖa” 69 siwo dometɔ ɖesiaɖe nye ƒe 7. (Daniel 9:24, 25) Nyagblɔɖi sia hã va eme. Le ɣeyiɣi si woɖo dzi tututu si nye ƒe 29 M.Ŋ. me, si nye ƒe 483 tso esime Artaxsasta ƒe sededea va ɖo Ŋugbedodonyigbaa dzi megbe la, wona nyɔnyrɔ Yesu eye wòdze eƒe anyigba dzi subɔsubɔdɔa gɔme.a

25. Nukae Kores ƒe Babilon mumu fia asii le egbeɣeyiɣiawo me?

²⁵ Yudatɔ nuteƒewɔlawo ƒe ablɔɖekpɔkpɔ tso aboyo me si Babilon ƒe mumu he vɛ la nye kpɔɖeŋu na Kristotɔ amesiaminawo ƒe ablɔɖekpɔkpɔ tso gbɔgbɔmeboyo me le ƒe 1919 me. Ablɔɖekpɔkpɔ ma nye kpeɖodzi be Babilon bubu si woyɔ be Babilon Gã si nye gbolo—si tsi tre ɖi na xexeame alakpasubɔsubɔwo katã ƒe ƒuƒoƒo—la mu. Apostolo Yohanes kpɔ eƒe mumu la do ŋgɔ, abe alesi woŋlɔe ɖe Nyaɖeɖefia ƒe agbalẽa me ene. (Nyaɖeɖefia 14:8) Ekpɔ alesi woava tsrɔ̃e kpatae hã. Alesi Yohanes ƒo nu tso xexemefiaɖuƒe ma si me legbawo yɔ fũ ƒe tsɔtsrɔ̃ ŋui la ɖi nya siwo Yesaya gblɔ le alesi Kores aɖu blemadu si nye Babilon dzi dzidzedzetɔe la le mɔ aɖewo nu. Abe alesi Babilon ƒe tsimɔ siwo nye takpɔnu nɛ mete ŋu kpɔ eta tso Kores si me o ene la, nenema ke ameƒomea ƒe “tsi” si doa alɔ Babilon Gã la hekpɔa eta la ‘amie’ hafi eƒe tsɔtsrɔ̃ si wòdze na la nakplɔe ɖo.—Nyaɖeɖefia 16:12.b

26. Aleke Yesaya ƒe nyagblɔɖia kple emevava doa ŋusẽ míaƒe xɔsee?

²⁶ Le míaƒe ɣeyiɣia me, si nye le ƒe akpe eve alafa atɔ̃ kple edzivɔ tso esime Yesaya gblɔ eƒe nyagblɔɖia megbe la, míate ŋu akpɔe be Mawu ‘wɔa eƒe ame dɔdɔwo ƒe aɖaŋuɖoɖo dzi’ nyateƒe. (Yesaya 44:26) Eyata Yesaya ƒe nyagblɔɖia me vava nye kpɔɖeŋu ɖedzesi aɖe be kakaɖedzi le nyagblɔɖi siwo katã le Ŋɔŋlɔ Kɔkɔeawo me ŋu.

[Etenuŋɔŋlɔwo]

[Nɔnɔmetata si le axa 63]

Ðe atikpo si wometsɔ do dzo o ate ŋu aɖe ame aɖea?

[Nɔnɔmetata si le axa 75]

Kores na nyagblɔɖi aɖe va eme esi wòtrɔ mɔ na Frat-tɔsisia me tsiwo