Mawu ƒe Nya la Nɔa Anyi Tegbee
“Mía Mawu ƒe nya anɔ anyi tegbee.”—YESAYA 40:8.
1. (a) Nukae “mía Mawu ƒe nya” fia le afisia? (b) Vovototo kae le amegbetɔ ƒe ŋugbedodowo kple Mawu ƒe nya dome?
AMEGBETƆWO lɔ̃a ŋuɖoɖo ɖe ŋutsu kple nyɔnu ŋkutawo ƒe ŋugbedodowo ŋu. Gake eɖanye aleke ke ŋugbedodo siawo nyoe na amesiwo di be nuwo naka ɖe eme na yewo le agbe me o, wole ko abe seƒoƒo siwo yrɔna ene ne míetsɔ wo sɔ kple mía Mawu ƒe nya. (Psalmo 146:3, 4) Ƒe 2,700 kple edzivɔe nye si va yi la, Yehowa Mawu ƒe gbɔgbɔ ʋã nyagblɔɖila Yesaya wòŋlɔ bena: “Ŋutilãwo katã le abe gbe ene, eye woƒe atsyɔ̃ le abe seƒoƒo le gbe me ene. . . . Gbe ƒuna, eye seƒoƒo yrɔna, ke mía Mawu ƒe nya anɔ anyi tegbee.” (Yesaya 40:6, 8) “Nya” kae nye ma si nɔa anyi ɖaa? Eyae nye Mawu ƒe tameɖoɖo si wògblɔ. Egbea míekpɔa “nya” ma si woŋlɔ ɖe Biblia me.—Petro I, 1:24, 25.
2. Nɔnɔme kple nuwɔna kawoe nɔ anyi hafi Yehowa na eƒe nya siwo ku ɖe Israel kple Yuda ŋu va eme?
2 Amesiwo nɔ agbe le blema Israel ƒe ŋkekeawo me kpɔ nya si Yesaya ŋlɔ ɖi ƒe nyateƒenyenye. Yehowa gblɔe ɖi to eƒe nyagblɔɖilawo dzi be le anukwaremaɖimaɖi na eyama si dze ƒã ta la, gbã woakplɔ Israel-to ewo fiaɖuƒea ayi aboyo me eye emegbe Yuda-to eve fiaɖuƒea akplɔe ɖo. (Yeremya 20:4; Amos 5:2, 27) Togbɔ be woti Yehowa ƒe nyagblɔɖilawo yome hewu wo, wotɔ dzo agbalẽ xatsaxatsa si me Mawu ƒe nuxlɔ̃amegbedasia nɔ, eye wobia Egipte-srafowo be woakpe ɖe yewo ŋu ne nya la nagava eme o hã la, Yehowa ƒe nya medo kpo emevava o. (Yeremya 36:1, 2, 21-24; 37:5-10; Luka 13:34) Tsɔ kpe ɖe eŋu la, ŋugbe si Mawu do be yeagbugbɔ Yudatɔ susɔe siwo trɔ dzime ava wo denyigba dzi la va eme wòɖe dzesi.—Yesaya, ta 35.
3. (a) Ŋugbedodo siwo Yesaya ŋlɔ ɖi kawo mee míetsɔ ɖe le vevie? (b) Nukata nèka ɖe edzi be nusiawo ava eme nyateƒe?
3 Yehowa to Yesaya dzi gblɔ dziɖuɖu dzɔdzɔe si aɖu ameƒomea dzi to Mesia dzi, ɖeɖekpɔkpɔ tso nuvɔ̃ kple ku me, kple anyigba tɔtrɔ wòazu paradiso hã ɖi. (Yesaya 9:5, 6; 11:1-9; 25:6-8; 35:5-7; 65:17-25) Ðe nusiawo hã ava emea? Ðikeke aɖeke mele eme o! ‘Mawu mate ŋu aka aʋatso o.’ Ena woŋlɔ eƒe nyagblɔɖinya la ɖi be wòaɖe vi na mí, eye ena wokpɔ eta.—Tito 1:2; Romatɔwo 15:4.
4. Togbɔ be womekpɔ Biblia ƒe nuŋlɔɖi gbãtɔ siwo woŋlɔ kple asi ta o hã la, aleke wònye nyateƒee be Mawu ƒe nya le ‘agbee’?
4 Yehowa mekpɔ agbalẽ gbãtɔ siwo dzi eƒe blemanuŋlɔlawo tsɔ asi ŋlɔ nyagblɔɖi mawo ɖo la ta o. Gake eƒe “nya,” si nye eƒe tameɖoɖo si wòɖe gblɔ la, nye nya si kpɔtɔ le agbe. Tameɖoɖo ma le ŋgɔ yim matɔmatɔe, eye le esia wɔwɔ me la, ena amesiwo ƒe agbenɔnɔ dzi wòwɔ dɔ ɖo ƒe susu kple seselelãme ememe tɔwo dzena. (Hebritɔwo 4:12) Tsɔ kpe ɖe eŋu la, ŋutinya me nuŋlɔɖi ɖee fia be Mawu ƒe mɔfiafia tee wokpɔ Ŋɔŋlɔ siwo tso gbɔgbɔ me la ta heɖe wo gɔme le.
Ne Amewo Dze Agbagba be Yewoabu Mo Nɛ
5. (a) Agbagba kae Siria-fia aɖe dze be yeatsrɔ̃ Hebri Ŋɔŋlɔ siwo tso gbɔgbɔ me la? (b) Nukata wòdo kpo nu?
5 Dziɖulawo te kpɔ zi geɖe be yewoatsrɔ̃ nuŋlɔɖi siwo tso gbɔgbɔ me la. Le ƒe 168 D.M.Ŋ. me la, Siria Fia Antiochus Epiphanes (edze le axa 10 lia) wɔ vɔsamlekpui aɖe na Zeus ɖe gbedoxɔ si ŋu wokɔ na Yehowa me. Edi ‘Segbalẽawo’ hã, etɔ dzo wo, eye wòde se be woawu amesiame si si Ŋɔŋlɔ siawo le. Eɖanye ɖekaɖeka nenie wòtɔ dzoe le Yerusalem kple Yudea o, mete ŋu bu mo na Ŋɔŋlɔawo keŋkeŋ o. Yudatɔwo ƒe nutowo nɔ dukɔ geɖe me ɣemaɣi, eye agbalẽ xatsaxatsa geɖe nɔ woƒe ƒuƒoƒe ɖesiaɖe.—Tsɔe sɔ kple Dɔwɔwɔwo 13:14, 15.
6. (a) Agbagba kae wodze vevie be woatsrɔ̃ Ŋɔŋlɔ siwo Kristotɔ gbãtɔwo zã la? (b) Nukae do tso eme?
6 Le ƒe 303 M.Ŋ. me la, Roma Fiagã Diocletian hã de se be woagbã Kristotɔwo ƒe ƒuƒoƒewo eye be ‘woatɔ dzo’ woƒe ‘Ŋɔŋlɔawo.’ Nuwo tsɔtsrɔ̃ sia yi edzi ƒe ewo sɔŋ. Togbɔ be yometitia nu sẽ ŋutɔ hã la, Diocletian mete ŋu ɖe Kristotɔnyenye ɖa o, eye Mawu meɖe mɔ fiagã la ƒe dɔtsɔlawo tsrɔ̃ Eƒe Nya si tso gbɔgbɔ me ƒe akpa aɖe gɔ̃ hã ƒe tatawo katã hã o. Gake alesi tsitretsiɖeŋulaawo wɔ nu ɖe Mawu ƒe Nya la mamã kple gbeƒãɖeɖee ŋu la ɖe nusi nɔ woƒe dzime fia. Woɖee fia be yewonye amesiwo Satana gbã ŋku na siwo wɔa eƒe lɔlɔ̃nu.—Yohanes 8:44; Yohanes I, 3:10-12.
7. (a) Aleke wodze agbagbae be Biblia me sidzedze nagakaka ɖe ɣetoɖoƒe Europa o? (b) Dɔ kae wote ŋu wɔ le Biblia gɔmeɖeɖe kple etata me?
7 Wodze agbagba le mɔ bubuwo hã nu be Biblia me sidzedze nagasu ame geɖe si o. Esime Latingbe dodo megava bɔ o la, amesiwo gblɔ be Kristotɔwoe yewonye—Papa Gregory VII (1073-85) kple Papa Innocent III (1198-1216)—boŋ ye tsi tre ɖe Biblia gɔmeɖeɖe ɖe gbegbɔgblɔ siwo ame akpa gãtɔ dona me ŋu vevie, ke menye dziɖula trɔ̃subɔlawoe o. Le agbagba si wodze be woagana amewo natrɔ megbe de sɔlemeha la ƒe ŋusẽ o me la, Roma Katoliko ƒe Adaŋudeha si nɔ Toulouse, France, de se le ƒe 1229 me be mele be Biblia-gbalẽwo nanɔ ame tsɛ si le gbe si ame akpa gãtɔ dona me o. Wowɔ Ŋutasẽʋɔnudɔdrɔ̃ ŋudɔ asisesẽtɔe be sea nawɔ dɔ. Ke hã le Ŋutasẽʋɔnudɔdrɔ̃ ƒe 400 megbe la, Mawu ƒe Nya la lɔ̃lawo ɖe Biblia bliboa gɔme ɖe gbegbɔgblɔ siwo ade 20, kple gbetagbe bubuwo me, eye eƒe akpa gã aɖewo nɔ gbe 16 bubuwo me.
8. Le ƒe alafa 19 lia me la, nukae nɔ dzɔdzɔm le Biblia gɔmeɖeɖe kple emamã me le Russia?
8 Menye Roma Katoliko Ha la koe dze agbagba be yewomana Biblia nanɔ ame tsɛwo si o. Le ƒe alafa 19 lia ƒe gɔmedzedze la, Pavsky si nye nufialagã le Petersburg Kɔkɔe ƒe Mawunyasrɔ̃ƒe ɖe Mateo ƒe Nyanyuigbalẽa gɔme tso Helagbe me yi Russiagbe me. Woɖe Kristotɔwo ƒe Hela Ŋɔŋlɔawo ƒe agbalẽ bubuwo hã gɔme ɖe Russiagbe me, eye Pavsky ye to wo me. Womã gɔmeɖeɖe siawo wòde didiƒe vaseɖe ƒe 1826 me esime sɔlemeha la dze agbagba na fiagã la tsɔ Russia Biblia Habɔbɔa de Russia Orthodɔks Ha la ƒe “Osɔfowo ƒe Aɖaŋuɖoha Kɔkɔe” la te, eye woɖo asi eƒe dɔwɔnawo dzi keŋkeŋ. Emegbe Pavsky ɖe Hebri Ŋɔŋlɔawo gɔme tso Hebrigbe me yi Russiagbe me. Le ɣeyiɣi ma ke me lɔƒo la, Makarios si nye bisiɔptenɔla le Orthodɔks Ha me hã ɖe Hebri Ŋɔŋlɔawo gɔme tso Hebrigbe me yi Russiagbe me. Wohe to na wo ame evea siaa ɖe woƒe agbagbadzedzewo ta, eye wotsɔ woƒe gɔmeɖeɖeawo de sɔlemeha la ƒe blemanuŋlɔɖidzraɖoƒe. Sɔlemeha la ɖoe kplikpaa be yeana Biblia nanɔ Slavonikgbe xoxo si ame akpa gãtɔ mexlẽna alo sea egɔme o la ɖeɖeko me. Esi wodze agbagba tsi amewo ƒe agbagbadzedze be Biblia me sidzedze nasu yewo si nu do kpoe hafi “Osɔfowo ƒe Aɖaŋuɖoha Kɔkɔe” la ŋutɔ ɖe esi dzi woa ŋutɔwo da asi ɖo gɔme le ƒe 1856 me, eye wowɔ ɖe mɔfiafia siwo ŋu wotrɔ asi le nyuie be nya siwo woazã la nasɔ ɖe sɔlemeha la ƒe nukpɔsusuwo nu la dzi. Eyata Mawu ƒe Nya si wokaka la na vovototo aɖe va nɔ dzedzem le subɔsubɔhakplɔlawo ƒe gota gome dzedzeme kple gbɔgbɔ si woɖena fiana dome, abe alesi woƒe nyawo kple nuwɔnawo ɖee fiae ene.—Tesalonikatɔwo II, 2:3, 4.
Nya la Takpɔkpɔ be Woagatɔ Tsii O
9. Aleke Biblia-gɔmeɖela aɖewo ɖe woƒe lɔlɔ̃ na Mawu ƒe Nya la fiae?
9 Ŋɔŋlɔawo gɔmeɖelawo kple egbugbɔŋlɔla aɖewo nye amesiwo lɔ̃ Mawu ƒe Nya la nyateƒe eye wodze agbagba vevie be wòasu amesiame si. Wowu William Tyndale (le ƒe 1536 me) ɖe dɔ si wòwɔ be yeana Biblia nanɔ Eŋlisigbe me ta. Katoliko Ŋutasẽʋɔnudrɔ̃ƒea de Francisco de Enzinas mɔ (le ƒe 1544 megbe) ɖe Kristotɔwo ƒe Hela Ŋɔŋlɔawo gɔmeɖeɖe kple etata ɖe Spaingbe me ta. Robert Morrison tsɔ eƒe agbe de afɔku me (tso ƒe 1807 vaseɖe 1818) ɖe Biblia gɔme ɖe Chinagbe me.
10. Kpɔɖeŋu kawoe li si fia be gbegɔmeɖela aɖewo li siwo menye lɔlɔ̃ na Mawu ƒe Nya lae ʋã wo o?
10 Gake ɣeaɖewoɣi la, nu bubu siwo menye lɔlɔ̃ na Mawu ƒe Nya la o ye ʋã egbugbɔŋlɔlawo kple egɔmeɖelawo. Bu kpɔɖeŋu ene ŋu kpɔ: (1) Samariatɔwo tu gbedoxɔ ɖe Gerizim Toa dzi be wòasɔ kple Yerusalem-gbedoxɔa. Wotrɔ nya siwo le Mose II, 20:17 le Samariatɔwo ƒe Mose ƒe Agbalẽ Atɔ̃awo me be wòaɖo kpe edzi. Wotsɔ sedede sia de eme abe ɖe Se Ewoawo ƒe akpa aɖee wònye ene be, woatsɔ kpe awɔ vɔsamlekpui ɖe Gerizim Toa dzi eye woasa vɔwo le afima. (2) Amesi ɖe Daniel ƒe agbalẽa gɔme le Helagbe me Septuagint me tsɔ eya ŋutɔ ƒe nyawo de eme. Etsɔ nya siwo wòbu be aɖe nya siwo le Hebrigbe me nuŋlɔɖia me nyuie alo ana woanyo wu la kpee. Eɖe nya aɖewo siwo wòbu be madzɔ dzi na nuxlẽlawo o le eme. Esi wòɖe nyagblɔɖi si ku ɖe ɣeyiɣi si me Mesia la ado, si le Daniel 9:24-27 me la, eŋlɔ ɣeyiɣi ɖoɖi bubu eye wòtsɔ nya aɖewo kpee, gbugbɔ ɖewo gblɔ bubui, eye wòtrɔ nya aɖewo ƒe nɔƒewo, eye edze ƒã be ewɔe kple susu be yeana nyagblɔɖia nade Maccabeewo ƒe ʋiʋlia dzi. (3) Le Latingbe me nuŋlɔɖi aɖe me le ƒe alafa enelia M.Ŋ. me la, edze ƒã be Mawuɖekaetɔ̃nufiafia dzixɔsela aɖe si ƒe zãzɛnyahehe gbɔ eme la tsɔ nya siwo nye “le dziƒo, Fofo la, Nya la, kple gbɔgbɔ kɔkɔe la; eye ame etɔ̃ siawo le ɖeka” de eme abe ɖe esia nye Yohanes I, 5:7 ƒe akpa aɖe ene. Emegbe wotsɔ nya mawo de Latingbe me Biblia aɖe si woŋlɔ kple asi me. (4) Le France la, Louis XIII (1610-43) na ŋusẽ Jacques Corbin be wòaɖe Biblia gɔme ayi Fransegbe me ale be wòatsɔ aɖu Protestantɔwo ƒe agbagbadzedzewo dzii. Taɖodzinu ma na Corbin kpa nya aɖewo de eme, si ƒe ɖee nye “Misa ƒe vɔsa kɔkɔe la” le Dɔwɔwɔwo 13:2.
11. (a) Aleke Mawu ƒe Nya la yi edzi nɔ anyii togbɔ be egɔmeɖela aɖewo meɖi anukware o hã? (b) Blemanuŋlɔɖi siwo woŋlɔ kple asi nenie li si ɖo kpe nya si Biblia gblɔ le gɔmedzedzea me dzi? (Kpɔ aɖaka la.)
11 Yehowa mexe mɔ ɖe eƒe Nya la gbegblẽ alea nu o, gake metrɔ eƒe tameɖoɖo hã o. Nukawoe do tso eme? Gerizim To ŋu nyawo tsɔtsɔ kpee mewɔe be Mawu to Samariatɔwo ƒe subɔsubɔ dzi yra ameƒomea o. Ke boŋ eɖo kpe edzi be togbɔ be wogblɔ le Samariatɔwo ƒe subɔsubɔ me be woxɔ Mose ƒe Agbalẽ Atɔ̃awo dzi se hã la, womate ŋu aɖo ŋu ɖe wo ŋu be woafia nyateƒea o. (Yohanes 4:20-24) Nyawo totro le Septuagint la me mexe mɔ ɖe Mesia ƒe vava le ɣeyiɣi si wogblɔ ɖi to nyagblɔɖila Daniel dzi nu o. Tsɔ kpe ɖe eŋu la, togbɔ be wozã Septuagint le ƒe alafa gbãtɔ me hã la, edze ƒã be Hebrigbe mee woxlẽa Ŋɔŋlɔawo le na Yudatɔwo le woƒe ƒuƒoƒewo. Esia na “dukɔ la [nɔ] mɔkpɔkpɔ me” esime ɣeyiɣi si nyagblɔɖia ava eme la gogo. (Luka 3:15) Le nya siwo wotrɔ le Yohanes I, 5:7 be woatsɔ aɖo kpe Mawuɖekaetɔ̃ dzi kple le Dɔwɔwɔwo 13:2 be woatsɔ aɖo kpe Misa dzi gome la, nya mawo metrɔ nyateƒea o. Eye le ɣeyiɣi aɖe megbe la, wova klo nu le alakpanyaawo dzi keŋkeŋ. Biblia ƒe nuŋlɔɖi siwo wotsɔ asi ŋlɔ ɖe gbegbɔgblɔ gbãtɔwo me si li kpaŋkpaŋ la na wote ŋu doa gɔmeɖeɖe ɖesiaɖe ƒe vavãnyenye kpɔna.
12. (a) Tɔtrɔ siwo nye ŋkubiãnya kawoe Biblia-gɔmeɖela aɖewo wɔ? (b) Afika gbegbee wowɔe se ɖo?
12 Agbagba bubu siwo wogadze be woatrɔ Ŋɔŋlɔawo me nyawo la yi ŋgɔ wu kpukpui ʋee aɖewo gbɔgblɔ bubui. Enye ŋkɔ si wotsɔ dzea si Mawu vavã la ŋutɔ dzi dzedze. Alesi wowɔ tɔtrɔawoe kple afisi wowɔe se ɖo ɖo kpe edzi kɔte be ame aɖe si tri akɔ wu amegbetɔ alo amegbetɔhabɔbɔ ɖesiaɖe lae le megbe nɛ—ẽ, Yehowa ƒe futɔ gãtɔ, Satana Abosam, ƒe ŋusẽkpɔɖeamedzi mee wòtso. Esi gbegɔmeɖelawo kple nyagbugbɔŋlɔlawo bɔbɔ ɖe ŋusẽkpɔɖeamedzi ma te—ɖewo tsɔ didi vevie, bubuwo mewɔe tso woa ŋutɔ ƒe lɔlɔ̃nu me o—la, wodze egɔme nɔ Mawu ƒe ŋkɔ ŋutɔŋutɔ, Yehowa, ɖem ɖa le eƒe Nya si tso gbɔgbɔ me la ƒe teƒe akpe geɖe siwo wòdze le. Ɣeaɖeɣi la, woɖe Mawu ƒe ŋkɔ ɖa keŋkeŋ alo dee teƒe ʋee aɖewo ko le esiwo gɔme woɖe tso Hebrigbe me yi Helagbe, Latingbe, Germanygbe, Eŋlisigbe, Italygbe, kple Netherlandsgbe, kple gbe bubuwo me la me. Woɖee ɖa le Kristotɔwo ƒe Hela Ŋɔŋlɔawo ƒe nuŋlɔɖiwo hã me.
13. Nukata agbagba si ame geɖe dze be yewoatrɔ Biblia la meɖe Mawu ƒe ŋkɔ ɖa le amegbetɔ ƒe susu me o?
13 Ke hã womeɖe ŋkɔ kɔkɔe ma ɖa le amegbetɔ ƒe susu me o. Wotsɔ anukwareɖiɖi de Mawu ŋutɔ ƒe ŋkɔ Hebri Ŋɔŋlɔ siwo gɔme woɖe yi Spaingbe, Portugalgbe, Germanygbe, Eŋlisigbe, Fransegbe, kple bubu geɖe me la me. Kaka ƒe alafa 16 lia naɖo la, Mawu ŋutɔ ƒe ŋkɔ gava nɔ dzedzem le Kristotɔwo ƒe Hela Ŋɔŋlɔ vovovo siwo gɔme woɖe ɖe Hebrigbe me la hã me; enɔ Germanygbe me tɔwo me le ƒe alafa 18 lia me; enɔ Croatiagbe kple Eŋlisigbe tɔwo me le ƒe alafa 19 lia me. Togbɔ be amewo adze agbagba aɣla Mawu ƒe ŋkɔ hã la, ne ‘Yehowa ƒe ŋkekea’ va ɖo la, ekema abe alesi Mawu gblɔ ene la, ‘dukɔwo adze sii be nyee nye Yehowa.’ Mawu ƒe tameɖoɖo ma si wòɖe gblɔ la mado kpo emevava o.—Petro II, 3:10; Xezekiel 38:23; Yesaya 11:9; 55:11.
Gbedasia Ðo Xexeame Katã
14. (a) Kaka ƒe alafa 20 lia naɖo la, Europa-gbegbɔgblɔ neni mee wota Biblia ɖo, eye nukae do tso eme? (b) Kaka ƒe 1914 nawu enu la, Afrika-gbegbɔgblɔ neni mee Biblia nɔ?
14 Le ƒe alafa 20 lia ƒe gɔmedzedze lɔƒo la, wonɔ Biblia tam ɖe gbegbɔgblɔ 94 me xoxo le Europa. Ena Biblia-nusrɔ̃vi siwo nɔ xexeame ƒe akpa ma de dzesii be nudzɔdzɔ siwo aʋuʋu xexeame ava le Dukɔwo ƒe Ɣeyiɣi Ðoɖiawo ƒe nuwuwu le ƒe 1914 me, eye wova eme hã nyateƒe! (Luka 21:24) Hafi ƒe 1914 si nye ɣeyiɣi ɖedzesi nawu enu la, wota Biblia, bliboa katã loo alo eƒe agbalẽ aɖewo, ɖe Afrika-gbegbɔgblɔ 157 me, tsɔ kpe ɖe Eŋlisigbe, Fransegbe, kple Portugalgbe siwo ame geɖe dona ŋu. Esia ɖo Biblia me nyateƒe siwo naa ablɔɖe ame le gbɔgbɔ me la fiafia ɖokuibɔbɔla siwo tso to kple dukɔ geɖe me siwo le afima la gɔme anyi.
15. Esi ŋkeke mamlɛawo dze egɔme la, afikae woɖe Biblia gɔme ɖe Amerika-nyigba dzi tɔwo ƒe gbegbɔgblɔwo me se ɖo?
15 Esi xexeame ge ɖe ŋkeke mamlɛ siwo wogblɔ ɖi me la, Biblia va bɔ ɖe Amerika-nyigbawo dzi. Ʋuʋula siwo tso Europa tsɔ ɖewo vɛ wòle woƒe gbe vovovoawo me. Yehowa Ðasefo siwo woyɔ ɣemaɣi be Dukɔwo Dome Biblia Nusrɔ̃viwo la wɔ Biblia sɔsrɔ̃ ƒe ɖoɖo aɖe si keke ta, eye woƒoa dutoƒonuƒowo hemãa Biblia-srɔ̃gbalẽ le teƒe geɖe. Tsɔ kpe ɖe eŋu la, Biblia-habɔbɔwo nɔ Biblia tam ɖe gbegbɔgblɔ 57 bubuwo me na Ɣetoɖoƒe Nutome nɔla siwo doa gbe vovovowo.
16, 17. (a) Aleke gbegbee Biblia va bɔe esime xexeame katã ƒe gbeƒãɖeɖea dze egɔme? (b) Mɔ ka nue Biblia nye agbalẽ si nɔ anyi didi hekpɔ ŋusẽ ɖe amewo dzi vevie le?
16 Esime ɣeyiɣia de be woaɖe gbeƒã nyanyuia le xexeame katã hafi ‘nuwuwua nava’ la, Biblia la meganye nu yeye le Asia kple Pasifik Ƒukpowo dzi o. (Mateo 24:14) Wonɔ etam ɖe gbegbɔgblɔ 232 siwo wodona le xexeame ƒe akpa ma la me xoxo. Ðewo nye Biblia blibowo; geɖe nye Kristotɔwo ƒe Hela Ŋɔŋlɔawo ƒe gɔmeɖeɖewo; bubuwo nye Ŋɔŋlɔ Kɔkɔeawo ƒe agbalẽ ɖeka aɖe ko.
17 Edze ƒã be Biblia menye blemagbalẽ si woda ɖe blemanudzraɖoƒe be amewo nakpɔ ko o. Le agbalẽ siwo katã li dome la, eyae nye esi gɔme woɖe wu kple esi womã wòde teƒe geɖe wu ɖesiaɖe. Nusi wɔ ɖeka kple kpeɖodzi si li be Mawu le megbe nɛ lae nye be, nya siwo woŋlɔ ɖe agbalẽ ma me la nɔ eme vam. Eƒe nufiafiawo kple gbɔgbɔ si ʋã amewo woŋlɔ woe hã nɔ ŋusẽ kpɔm ɖe amewo ƒe agbenɔnɔ dzi ɖaa le dukɔ geɖe me. (Petro I, 1:24, 25) Gake nu geɖe ganɔ ŋgɔ—geɖe ŋutɔ.
Èɖo Ŋku Wo Dzia?
◻ Nukae nye “mía Mawu ƒe nya” si nɔa anyi ɖaa?
◻ Agbagba kawoe wodze be woabu mo na Biblia, eye nukawoe do tso eme?
◻ Aleke wokpɔ Biblia me nyawo ta be wometɔ tsii o?
◻ Aleke Mawu ƒe tameɖoɖo si wòɖe gblɔ la nye nya si le agbee?
[Aɖaka si le axa 12]
Ðe Míenya Nya si Biblia Gbãtɔwo Gblɔ Ŋutɔŋutɔa?
Hebrigbe me nuŋlɔɖi siwo wotsɔ asi ŋlɔe 6,000 li siwo ɖo kpe Hebri Ŋɔŋlɔawo me nyawo dzi. Woŋlɔ esiawo dometɔ ʋee aɖewo do ŋgɔ na Kristotɔwo ƒe ɣeyiɣia. Ɣeyiɣi si do ŋgɔ na agbalẽtakpe si wogate ŋu zãna totovɛ mee woŋlɔ Hebri Ŋɔŋlɔa ƒe nuŋlɔɖi blibo 19 ya teti siwo wotsɔ asi ŋlɔe eye wogakpɔtɔ li. Tsɔ kpe ɖe eŋu la, esiwo gɔme woɖe ɖe gbegbɔgblɔ 28 bubuwo me le ɣeyiɣi ma ke me hã li.
Le Kristotɔwo ƒe Hela Ŋɔŋlɔawo gome la, wode dzesi Helagbe me nuŋlɔɖi 5,000 siwo woŋlɔ kple asi ɖi. Wogblɔ be woŋlɔ esiawo dometɔ ɖeka aɖe do ŋgɔ na ƒe 125 M.Ŋ. me, si fia be woŋlɔe le gbãtɔa ŋɔŋlɔ ƒe ʋee aɖewo ko megbe. Eye wobu kakɛ aɖewo be woŋlɔ wo do ŋgɔ na ɣeyiɣi ma. Nuŋlɔɖi blibo 10 va ɖo 19 siwo woŋlɔ kple asi ɖe blema asinuŋɔŋlɔ nu la le agbalẽ 27 siwo tso gbɔgbɔ me la dometɔ 22 me. Biblia ƒe akpa sia ƒe agbalẽwo dometɔ si ƒe nuŋlɔɖi blibo si wotsɔ asi ŋlɔe ɖe blema asinuŋɔŋlɔ me si mesɔ gbɔ kura o la de etɔ̃ ya teti—Nyaɖeɖefia ƒe agbalẽa. Wogblɔ be ƒe alafa enelia M.Ŋ. mee woŋlɔ Kristotɔwo ƒe Hela Ŋɔŋlɔ bliboa si woŋlɔ kple asi la dometɔ ɖeka.
Blemagbalẽ bubu aɖeke meli si dzi blemanuŋlɔɖi gbogbo aɖewo ɖo kpee alea gbegbe o.