Agbenɔnɔ Kple Subɔsubɔdɔ Kpekpe Ƒe Nusrɔ̃gbalẽ Ƒe Nyatsoƒewo
NOVEMBER 2-8
Mawu Ƒe Nyaa Me Kesinɔnuwo Didi
Esi wowu avɔgbadɔa tutu nu la, “alilikpo va tsyɔ takpegbadɔ la dzi, eye Yehowa ƒe ŋutikɔkɔe yɔ avɔgbadɔ la taŋ.” (2 Mose 40:34) Esia na wòdze ƒãa be Yehowa kpɔ ŋudzedze ɖe wo ŋu! Aleke nèsusu be Bezalel kple Oholiab anya se le wo ɖokui me ɣemaɣi? Togbɔ be womeŋlɔ woƒe ŋkɔwo ɖe dɔ siwo wowɔ ŋu o hã, woƒe dzi anya dze eme esi wonyae be Mawu yra ɖe yewoƒe agbagbadzedzewo katã dzi. (Lod. 10:22) Le ƒe siwo kplɔe ɖo me la, dzi anya dzɔ wo godoo esi wokpɔe be yewole nu siwo yewowɔ la zãm le Yehowa subɔsubɔ me. Ðikeke mele eme o be, ne wova fɔ Bezalel kple Oholiab ɖe tsitre le xexe yeyea me la, dzi adzɔ wo ale gbegbe ne wova nyae be wozã avɔgbadɔa le tadedeagu vavãtɔ me abe ƒe 500 sɔŋ ene!
NOVEMBER 9-15
NU XƆASI SIWO LE MAWU ƑE NYA LA ME | 3 MOSE 1-3
Wotsɔa lã si woatsɔ asa numevɔ la katã naa Mawu, eye ame si le vɔa sam la maɖe lã ƒe akpa aɖeke na eɖokui o. (Tsɔe sɔ kple Ʋɔn 11:30, 31, 39, 40.) Wosaa vɔ sia tsɔ ɖea kuku na Yehowa be wòaxɔ alo akpɔ ŋudzedze ɖe nuvɔ̃vɔ si wosana ɣeaɖewoɣi tsɔ kpena ɖe numevɔa ŋu la ŋu. Yesu Kristo tsɔ eɖokui na bliboe abe “numevɔsa” ene.
NOVEMBER 16-22
Mawu Ƒe Nyaa Me Kesinɔnuwo Didi
Wobua nyi, alẽ kple gbɔ̃ ƒe ŋgɔgbevi siwo nye atsu la be wole kɔkɔe na Yehowa, eye mele be woaxe fe ɖe wo ta o. Ele be woatsɔ wo asa vɔe, eye vɔsalãa ƒe akpa aɖe yina na nunɔla siwo ŋu wokɔ. (4 Mo 18:17-19) Agblemenukuwo ƒe gbãtɔ kple nu ewolia nye nu kɔkɔewo abe ale si vɔsa kple nunana siwo katã wozãna le subɔsubɔ kɔkɔea ƒe dɔwo me la hã le kɔkɔe ene. (2 Mo 28:38) Mele be woabu nu siwo katã le kɔkɔe na Yehowa la nu tsɛ alo azã wo le mɔ madzemadze alo mɔ gbegblẽ aɖeke nu o. Eƒe kpɔɖeŋu ɖekae nye se si wode ku ɖe nu ewolia ŋu. Ne ŋutsu aɖe ɖe nane ɖe vovo, ɖewohĩ lu, be yeatsɔ ana nu ewolia eye eya ŋutɔ alo eƒe aƒemetɔ aɖe zã lu ma ƒe ɖe le manyamanya me tsɔ ɖa nu alo tsɔ wɔ nu bubu aɖe la, ekema ŋutsua da le Mawu ƒe se si ku ɖe nu kɔkɔewo ŋu la dzi. Eya ta Sea bia be wòaɖo nua teƒe eye wòatsɔ nua me mama blaeve le alafa me akpee, eye wòagatsɔ agbo si sɔ blibo la akpe ɖe nuawo ŋu ne woatsɔ asa vɔ. Esia ɖee fia be ele be woade bubu gã aɖe nu siwo le kɔkɔe na Yehowa la ŋu.—3 Mo 5:14-16.
NOVEMBER 23-29
Mawu Ƒe Nyaa Me Kesinɔnuwo Didi
Ele be woasa nuvɔ̃vɔ ne ame aɖe meɖoe hafi wɔ nu vɔ̃ o alo wòɖe ŋu ɖi wɔ nu vɔ̃a. Lã si woatsɔ asa vɔa la nɔ te ɖe ame si wɔ nu vɔ̃a la dzi—ne nunɔla ye loo, dukɔ bliboa ye loo, amegã aɖe ye loo alo ame tsɛ aɖe koe. To vovo na numevɔ kple akpedavɔ siwo ame ŋutɔ atso eƒe dzi me faa asa la, ehiã be woasa nuvɔ̃vɔwo ya godoo.—3 Mo 4:1-35; 6:24-30.
NOVEMBER 30–DECEMBER 6
Mawu Ƒe Nyaa Me Kesinɔnuwo Didi
Mawu ɖo Mose wònye domenɔla le Se ƒe nubabla kple Israel-viwo dome, ame aɖeke menɔ ɖoƒe sia si naa kadodo kplikplikpli nɔa ame kple Mawu dome la kpɔ o, negbe Yesu Kristo ame si nye nubabla yeyea ƒe Domenɔla ko. Mose hlẽ lã si wotsɔ sa vɔ la ƒe ʋu ɖe nubablagbalẽ, si le tsitre ɖi na Yehowa la ŋu, eye wògahlẽe ɖe dukɔa (si teƒe ametsitsiawo nɔ la) hã ŋu. Azɔ exlẽ nubablagbalẽa na dukɔa eye wogblɔ be, “Nya siwo katã Yehowa gblɔ la míalé wo me ɖe asi awɔ wo dzi.” (2 Mo 24:3-8; Heb 9:19) Esi Mose nye domenɔla ta la, mɔnukpɔkpɔ su esi wòkpɔ avɔgbadɔa tutu kple emenuwo wɔwɔ ƒe dɔa dzi, eye wòzɔ ɖe mɔfiame siwo Mawu nɛ ku ɖe wo ŋu la dzi. Eɖo nunɔlawo, kɔ avɔgbadɔa ŋu, eye wòsi ami si wotsɔ nu tɔxɛwo wɔ la na Aron si nye nunɔlagã la. Eyome exɔ ŋgɔ le vɔ siwo wosa zi gbãtɔ esime wonɔ nunɔla yeyewo ɖom la me.—2 Mo ta 25-29; 3 Mo ta 8, 9.