TA 4

Ŋkɔ Le Mawu Si

ZI GEÐE la, nukae nye nya gbãtɔ si nèbiana amesi nèdo goe zi gbãtɔ?— Ẽ, eƒe ŋkɔe nèbiana. Ŋkɔ le mí katã mía si. Mawu tsɔ ŋkɔ na ame gbãtɔ si nɔ anyigba dzi. Eyɔe be Adam. Adam srɔ̃ ŋkɔe nye Xawa.

Gake menye amegbetɔwo ko sie ŋkɔ le o. Bu nu bubu siwo hã si ŋkɔ le la ŋu kpɔ. Ne ame aɖe na aŋevidzĩ alo lã aɖe abe avuvi ene wò be nànyi la, ètsɔa ŋkɔ nɛ ɖe, alo?— Ẽ, ele vevie ŋutɔ be ŋkɔ nanɔ nuwo si.

Fɔ mo dzi nàkpɔ ɣletivi gbogboawo ɖa le zã me. Èsusu be ŋkɔ le woawo hã sia?— Ẽ, Mawu tsɔ ŋkɔ na ɣletivi siwo le dziƒo la dometɔ ɖesiaɖe. Biblia gblɔ na mí be: ‘Eyae nye amesi ɖo xexlẽme na dzinuviwo, eye wòyɔa wo katã ŋkɔ.’—Psalmo 147:4.

Amekae nàgblɔ be eyae nye ame vevitɔ kekeake le xexeame godoo?— Ẽ, eyae nye Mawu. Èsusu be ŋkɔ le esia?— Yesu gblɔ na mí be ŋkɔ le Esi. Gbeɖeka Yesu gblɔ le gbedodoɖa na Mawu me be: ‘Mena yonyemedzelawo nya wò ŋkɔ la.’ (Yohanes 17:26) Ènya Mawu ƒe ŋkɔa?— Mawu ŋutɔ yɔ eŋkɔ na mí. Egblɔ be: “Nyee nye Yehowa, ŋkɔnyee.” Eyata Mawu ƒe ŋkɔe nye YEHOWA.—Yesaya 42:8.

Aleke nèsena le ɖokuiwò me ne amewo ɖo ŋku wò ŋkɔ dzi?— Ðe medzɔa dzi na wò oa?— Yehowa hã di be amewo nanya yeƒe ŋkɔ. Eyata ele be míazã ŋkɔ Yehowa ne míele nu ƒom tso Mawu ŋuti. Nufiala Gã la zã Mawu ƒe ŋkɔ Yehowa esime wònɔ nu ƒom na amewo. Ɣeaɖeɣi Yesu gblɔ be: ‘Lɔ̃ Yehowa, wò Mawu la, kple wò dzi blibo.’—Marko 12:30.

Yesu nya be ŋkɔ “Yehowa” nye ŋkɔ vevi aɖe. Eyata efia eyomedzelawo be woazã Mawu ƒe ŋkɔa. Efia wo gɔ̃ hã be woaƒo nu tso Mawu ƒe ŋkɔa ŋu le woƒe gbedodoɖawo me. Yesu nya be enye Mawu ƒe didi be amesiame nanya Yeƒe ŋkɔ Yehowa.

Ɣeyiɣi didi aɖe enye si va yi la, Mawu ɖe alesi eƒe ŋkɔa le vevie la fia ŋutsu aɖe si woyɔna be Mose, si nye Israel-viwo dometɔ ɖeka. Ɣemaɣi la, Israel-viwo nɔ afisi woyɔna be Egipte-nyigba dzi. Woyɔa anyigba ma dzi tɔwo be Egiptetɔwo. Wowɔ Israel-viwo kluviwoe eye wonɔ ŋuta sẽm le wo ŋu ŋutɔ. Esi Mose tsi la, edze agbagba be yeakpe ɖe ye detɔawo dometɔ ɖeka ŋu. Esia na Farao, Egipte-fia la, do dziku. Edi be yeawu Mose! Eyata Mose si dzo le Egipte.

Mose dzo yi anyigba bubu dzi. Midian–nyigba dzie wòyi. Le afima la, Mose ɖe srɔ̃ dzi viwo. Ezu alẽkplɔla le afima nɔ alẽwo dzi kpɔm. Gbeɖeka esime Mose ƒe ŋku biã wònɔ eƒe alẽwo kplɔm le to aɖe ŋu la, ekpɔ nu wɔnuku aɖe. Ŋuve aɖee nye ma nɔ bibim, gake menɔ fiafiãm o! Mose ɖe afɔ yi ŋgɔ vie be yeakpɔe ɖa nyuie.

Ènya nusi dzɔa?— Mose se ame aɖe ƒe gbe wònɔ eyɔm tso ŋuve ma si nɔ bibim la me. Gbeɖiɖia nɔ eyɔm be, “Mose! Mose!” Amekae nɔ eyɔm?— Mawue! Dɔ geɖe nɔ Mawu si na Mose be wòawɔ. Mawu gblɔ nɛ be: ‘Va madɔ wò ɖo ɖe Egipte-fia Farao gbɔ, be nàkplɔ nye dukɔ Israel-viwo adzoe le Egipte.’ Mawu do ŋugbe be yeakpe ɖe Mose ŋu le dɔ sia wɔwɔ me.

Gake Mose gblɔ na Mawu be: ‘Tsɔe be meva Israel-viwo gbɔ le Egipte eye megblɔ na wo be Mawue dɔm ɖo ɖa. Nenye be wobiam be, “Eƒe ŋkɔ ɖe mahã?” ɖe, nuka gblɔ ge mala?’ Mawu gblɔ na Mose be wòaɖo ŋu na Israel-viwo be: ‘Yehowa ye dɔm ɖo ɖe mia gbɔ. Yehowa ye nye nye ŋkɔ tegbee.’ (Mose II, 3:1-15) Esia fia be Mawu atɔ ŋkɔ Yehowa tegbee. Matrɔe akpɔ gbeɖe o. Mawu di be woanyae tegbee be yeƒe ŋkɔe nye Yehowa.

Esi Mose trɔ yi Egipte la, Egiptetɔwo susu be Israel-viwo ƒe mawu tsɛ aɖe koe Yehowa nye. Womebui be eyae nye anyigba bliboa katã ƒe Mawu o. Eyata Yehowa gblɔ na Egipte-fia be: ‘Maɖe nye ŋkɔ afia le anyigba bliboa katã dzi.’ (Mose II, 9:16) Yehowa na be wonya eƒe ŋkɔa vavã. Ènya alesi wòwɔea?—

Ena Mose kplɔ Israel-viwo dzoe le Egipte. Esi wova ɖo Ƒudzĩa nu la, Yehowa ɖe mɔ to tsia titina be woazɔ anyigba ƒuƒui dzi. Israel-viwo zɔ to anyigba ƒuƒuia dzi va ɖi go dedie. Gake esi Farao kple eƒe aʋakɔa katã hã ge ɖe ƒubali ƒuƒuia me vɔ la, tsi siwo me ma ɖe go eveawo la ŋe dze Egiptetɔawo dzi, eye wo katã woku.

Medidi o, amewo se nusi Yehowa wɔ le Ƒudzĩa nu la ŋuti nya le anyigba bliboa katã dzi. Aleke míewɔ nya be amewo se nu tso eŋu?— Anye ƒe 40 megbe la, Israel-viwo yi Kanaan, si nye anyigba si Yehowa do ŋugbe be yeatsɔ ana wo, la dzi. Le afima la, ɖetugbi aɖe si ŋkɔe nye Raxab gblɔ na Israel-ŋutsu eve be: ‘Míese alesi Yehowa na Ƒudzĩa mie le mia ŋgɔ, esime mieʋu tso Egipte.’—Yosua 2:10.

Egbea ame geɖe ƒe nɔnɔme le ko abe Egiptetɔ mawo ene. Womexɔe se be Yehowae nye anyigba bliboa katã ƒe Mawu o. Eyata Yehowa di be ye ŋutɔ yeƒe amewo naƒo nu na ame bubuwo tso ye ŋu. Nusiae Yesu wɔ. Le Yesu ƒe anyigba dzi nɔnɔ ƒe nuwuwu lɔƒo la, egblɔ na Yehowa le gbedodoɖa me be: “Mena wonya wò ŋkɔ la.”—Yohanes 17:26.

Èdi be yeanɔ abe Yesu enea? Ekema gblɔ na amewo be Mawu ƒe ŋkɔe nye Yehowa. Àkpɔe be ame gbogbo aɖewo menya esia o. Eyata ɖewohĩ àte ŋu afia Biblia ƒe mawunyakpukpui si le Psalmo 83:19 la wo. Na míatsɔ Biblia fifi laa adi ŋɔŋlɔ ma. Egblɔ be: “Ne woadze sii be, ŋkɔwòe nye Yehowa, eye wò ɖeɖe koe ɖo kpo ɖe anyigba blibo la dzi!”

Nukae míesrɔ̃ tso ŋɔŋlɔ sia xexlẽ me?— Ẽ, míesrɔ̃e be Yehowae nye ŋkɔ vevitɔ kekeake si li. Eyae nye Mawu Ŋusẽkatãtɔ, Yesu Fofo kple Amesi wɔ nuwo katã ƒe ŋkɔ. Eye ɖo ŋku edzi be Yesu gblɔ be ele be míalɔ̃ Yehowa Mawu kple míaƒe dzi blibo. Èlɔ̃ Yehowaa?—

Aleke míaɖee afiae be míelɔ̃ Yehowa?— Alesi míaɖee afia ƒe mɔnu ɖekae nye be míadze si eyama nyuie eye míana wòanye mía Xɔlɔ̃. Mɔnu bubu hãe nye be míafia eƒe ŋkɔa amewo. Míate ŋu afia wo tso Biblia me tẽ be eƒe ŋkɔe nye Yehowa. Míate ŋu agblɔ nu wɔnuku kple nu nyui siwo Yehowa wɔ la hã na amewo. Esia doa dzidzɔ na Yehowa elabena edi be amewo nanya nu tso ye ŋu. Míate ŋu akpɔ gome le esia wɔwɔ me ɖe, alo?—

Menye amesiamee adi be yeaɖo to ne míele nu ƒom tso Yehowa ŋu o. Ame geɖe meɖo to Yesu, Nufiala Gã la gɔ̃ hã esime wònɔ nu ƒom tso Yehowa ŋu o. Ke hã ema mena Yesu dzudzɔ nuƒoƒo tso Yehowa ŋu o.

Eyata na míanɔ abe Yesu ene. Na míayi edzi aƒo nu tso Yehowa ŋu. Ne míewɔe alea la, Yehowa Mawu akpɔ dzidzɔ ɖe mía ŋu elabena míeɖee fia be míelɔ̃ eƒe ŋkɔa.

Azɔ na míaxlẽ mawunyakpukpui ʋɛ aɖewo tso Biblia me siwo ɖe Mawu ƒe ŋkɔa ƒe vevienyenye fia: Yesaya 12:4, 5; Mateo 6:9; Yohanes 17:6; kple Romatɔwo 10:13.

[Nɔnɔmetata si le axa 27]

Ènya be ŋkɔ le ɣletiviwo katã sia?

[Nɔnɔmetata si le axa 28]

Nu vevi kae Mose srɔ̃ le ŋuve si nɔ bibim la gbɔ?

[Nɔnɔmetata si le axa 29]

Aleke Mawu ɖe eƒe ŋkɔa fia le Ƒudzĩa nui?

[Nɔnɔmetata siwo le axa 30]

Yesu na wonya Mawu ƒe ŋkɔa. Àte ŋu atɔ asi Mawu ƒe ŋkɔ dzi le Biblia mea?