Dze Si Yehowa Mawu si Li Ŋutɔŋutɔ

ESI Ðk. S. Radhakrishnan si le India tsɔ alesi Hindutɔwo bua Mawui nɔ sɔsɔm kple subɔsubɔha bubuwo tɔ la, egblɔ be: “Hebritɔwo ƒe Mawu to vovo. Eli ŋutɔŋutɔ eye enye amesi ƒe nuwɔnawo dze le ŋutinya me eye wòtsɔ ɖe le xexe madeŋgɔ sia ƒe tɔtrɔwo kple nusiwo adzɔ ɖe edzi me. Ame si li ŋutɔŋutɔ si ƒoa nu kple míe wònye.”

Biblia ƒe Mawu ƒe ŋkɔ le Hebrigbe mee nye יהוה, si gɔme wolɔ̃a ɖeɖe be “Yehowa.” Ele ŋgɔ sasasã na mawu bubuwo katã. Nukae míenya le eŋu? Aleke wòwɔ nu kple amewoe le Biblia ƒe ɣeyiɣiwo me?

Yehowa Kple Mose “Ŋku Me Kple Ŋku Me”

“Ŋku me kple ŋku me” ƒomedodo kplikplikpli nɔ Yehowa kple eƒe subɔla Mose dome, togbɔ be Mose mete ŋu kpɔ Mawu kpɔ ŋutɔŋutɔ o hã. (Mose V, 34:10; Mose II, 33:20) Le Mose ƒe ɖevime la, eƒe dzi nɔ Israel-viwo, amesiwo nɔ kluvinyenye me ɣemaɣi le Egipte la ŋu. Egbe be womegabu ye Farao ƒe aƒemetɔe o, eye “elɔ̃ be, yeakpe fu akpe ɖe Mawu ƒe dukɔ la ŋuti.” (Hebritɔwo 11:25) Eyata Yehowa na mɔnukpɔkpɔ tɔxɛ geɖe Mose.

Le Farao ƒeme la, “wofia Egiptetɔwo ƒe nunyawo katã Mose.” (Dɔwɔwɔwo 7:22) Gake hafi wòakplɔ Israel-dukɔa la, ehiã be wòatu nɔnɔme siwo nye ɖokuibɔbɔ, dzigbɔgbɔɖi, kple tufafa ɖo. Esrɔ̃ nɔnɔme siawo le ƒe 40 siwo wòtsɔ kplɔ alẽe le Midian me. (Mose II, 2:15-22; Mose IV, 12:3) Togbɔ be Yehowa kpɔtɔ nye amesi womate ŋu akpɔ ŋutɔŋutɔ o kokoko hã la, eɖe eɖokui kple eƒe tameɖoɖo fia Mose, eye to mawudɔlawo dzi la, Mawu tsɔ Se Ewoawo de asi nɛ. (Mose II, 3:1-10; 19:3–20:20; Dɔwɔwɔwo 7:53; Hebritɔwo 11:27) Biblia gblɔ na mí be: “Yehowa ƒo nu kple Mose ŋku me kple ŋku me, abe alesi ame kple xɔlɔ̃a ƒoa nui ene.” (Mose II, 33:11) Le nyateƒe me, Yehowa ŋutɔ gblɔ be: “Nye ŋutɔ meƒoa nu kplii ŋku me kple ŋku me.” Ƒomedodo xɔasi si le kplikplikpli kae nye si me Mose nɔ kple eƒe Mawu si womekpɔna o gake wòli ŋutɔŋutɔ!—Mose IV, 12:8.

Tsɔ kpe ɖe Israel-dukɔa ƒe ŋutinya ƒe gɔmedzedze ŋɔŋlɔ ŋu la, Mose ŋlɔ Se la kple eme se bubuwo katã hã ɖi. Wona mɔnukpɔkpɔ xɔasi bubu hãe—be wòaŋlɔ Mose ƒe Agbalẽ Gbãtɔ. Agbalẽ ma ƒe nuwuwu lɔƒo nye ŋutinya si wonya nyuie le eya ŋutɔ ƒe ƒomea me, eyata eŋɔŋlɔ masesẽ nɛ fũ o. Gake afikae Mose kpɔ amegbetɔ ƒe ŋutinya ƒe gɔmedzedze ŋu nyawo tsoe? Ate ŋu anye be blema nuŋɔŋlɔ siwo Mose tɔgbuiwo dzra ɖo la nɔ esi si dzi wòkpɔ ŋlɔ wo. Agate ŋu anye hã be ɖe wogblɔe nɛ alo be enye Mawu ƒe ɖeɖefia tẽ si tso Yehowa gbɔ. Mawuvɔ̃la siwo nɔ anyi le ŋutinya katã me lɔ̃ ɖe edzi be ƒomedodo kplikplikpli sia nɔ Mose kple eƒe Mawu dome.

Yehowa—Eliya ƒe Mawu si Li Ŋutɔŋutɔ

Nyagblɔɖila Eliya hã nya Yehowa be enye ame si li ŋutɔŋutɔ. Dzo nɔ Eliya me ɖe tadedeagu dzadzɛtɔ ŋu eye esubɔ Yehowa togbɔ Baal, Kanaanitɔwo ƒe mawu gbogboawo ƒe tatɔ, subɔlawo lé fui hetsi tre ɖe eŋu vevie hã.—Fiawo I, 18:17-40.

Israel-fia Axab, kple srɔ̃a Izebel, di be yewoawu Eliya. Le vɔvɔ̃ be woava wu ye ta la, Eliya si yi Beer-Seba, le Ƒukukua ƒe ɣetoɖoƒe gome. Afimae wòtsa tsaglalã yi gbedzi le eye wòdo gbe ɖa bia be yeaku. (Fiawo I, 19:1-4) Ðe Yehowa gblẽ Eliya ɖia? Ðe Megatsɔ ɖeke le esubɔla wɔnuteƒe ma me oa? Ðewohĩ Eliya asusui nenema, gake vodada gã kae nye si wòwɔ! Emegbe Yehowa ƒo nu nɛ kple gbe bɔkɔɔ biae se be: “Eliya, nuka wɔm nèle le afisia?” Le ŋusẽ si de ŋgɔ wu dzɔdzɔmetɔ ɖeɖefia vɔ megbe la, “gbe aɖe va egbɔ [gagblɔ ake] bena: Eliya, nuka wɔm nèle le afisia?” Yehowa ɖe ɖetsɔtsɔ le Eliya me fia alea be yeatsɔ ade dzi ƒo na ye subɔla si dzi yekana ɖo la. Dɔ bubu ganɔ Mawu si nɛ, eye Eliya tsɔ dzonɔameme xɔ dɔ mae! Eliya wɔ eƒe dɔdasiwo nuteƒewɔwɔtɔe tsɔ kɔ Yehowa, eƒe Mawu si li ŋutɔŋutɔ, la ŋui.—Fiawo I, 19:9-18.

Esi Yehowa gbe Israel-dukɔa vɔ megbe la, eya ŋutɔ megaƒoa nu kple esubɔlawo le anyigba dzi o. Esia mefia be megatsɔ ɖeke le wo me o. To eƒe gbɔgbɔ kɔkɔe dzi la, egafiaa mɔ wo hedoa ŋusẽ wo le eƒe subɔsubɔdɔa me. Le kpɔɖeŋu me, bu apostolo Paulo, amesi woyɔna tsã be Saul ŋu kpɔ.

Gbɔgbɔ Kɔkɔea ƒe Mɔfiafia Paulo

Saul tso Tarso, si nye du xɔŋkɔ aɖe le Kilikia. Edzilawo nye Hebritɔwo, gake wodzii wònye Roma vidzidzi. Gake Farisitɔwo ƒe dzixɔse sesẽwoe wotsɔ nyi Saul. Emegbe mɔnukpɔkpɔ su esi le Yerusalem be wofia nui ‘le Gamaliel,’ Sea fiala xɔŋkɔ aɖe, ‘ƒe afɔ nu.’—Dɔwɔwɔwo 22:3, 26-28.

Esi Saul zã dzo si nɔ eme ɖe mɔ gbegblẽ nu ɖe Yudatɔwo ƒe kɔnyinyi ŋu ta la, ekpɔ gome le Yesu Kristo yomedzelawo yometiti vɔ̃ɖi aɖe me. Eda asi ɖe Stefano, Kristotɔ xɔsetakukula gbãtɔ, wuwu gɔ̃ hã dzi. (Dɔwɔwɔwo 7:58-60; 8:1, 3) Emegbe elɔ̃ ɖe edzi be togbɔ be yenye busunyagblɔla kple yometila kple vlodola hã la, ‘wokpɔ nublanui na ye, elabena yewɔe le numanyamanya kple dzimaxɔse me.’—Timoteo I, 1:13.

Didi vavãtɔ be yeasubɔ Mawue na Saul wɔ nusia. Le Saul ƒe dzimetɔtrɔ le Damasko-mɔ dzi vɔ megbe la, Yehowa zãe nukutɔe. Kristo si wofɔ ɖe tsitre gblɔ na Anania si nye Kristotɔ gbãtɔwo dometɔ ɖeka be wòayi aɖakpe ɖe eŋu. Le ema megbe Yehowa ƒe gbɔgbɔ kɔkɔe fia mɔ Paulo (Romatɔwo ƒe ŋkɔ si wova yɔna na Saul le eƒe Kristotɔ zuzu vɔ megbe) wòwɔ subɔsubɔdɔ tseku aɖe si wɔwɔ xɔ ɣeyiɣi didi le Europa kple Asia Sue bliboa katã ƒe nuto aɖewo me.—Dɔwɔwɔwo 13:2-5; 16:9, 10.

Ðe míagate ŋu akpɔ gbɔgbɔ kɔkɔea ƒe mɔfiafia ma ke egbea? Ẽ, míate ŋui.

Mawudzimaxɔse Mexea Mɔ na Yehowa ƒe Ðetsɔleme O

Joseph F. Rutherford ye nye Gbetakpɔxɔ Habɔbɔa ƒe zimenɔla evelia. Le ƒe 1906 me, exɔ nyɔnyrɔ zu Biblia Nusrɔ̃vi—si nye ŋkɔ si woyɔna na Yehowa Ðasefowo ɣemaɣi—woɖoe Habɔbɔa ƒe senyalae le ƒe si kplɔe ɖo me, eye wòzu eƒe zimenɔla le January 1917 me. Gake ɣeaɖeɣi la, ɖekakpui sia si nye senyala la nye mawudzimaxɔsela kpɔ. Aleke wòwɔ va zu Kristotɔ Yehowa subɔla si me dzo nɔ nenema gbegbe?

Le July 1913 me la, Rutherford nɔ zi me na Dukɔwo Dome Biblia Nusrɔ̃viwo ƒe Habɔbɔ ƒe takpekpe aɖe si wowɔ le Springfield, Massachusetts, U.S.A. Afima ƒe nyadzɔdzɔgbalẽ The Homestead ƒe nuŋlɔla aɖe bia gbe Rutherford, eye wogbugbɔ ŋlɔ nusi wòŋlɔ la ɖe takpekpe ma ƒe ŋkuɖodzinyatakakawo me.

Rutherford ɖe nu me be le ɣeyiɣi si me yewɔ ɖoɖo be yeaɖe srɔ̃ la, Baptisttɔwo ƒe subɔsubɔ nufiafiawo dzie yexɔ se, gake nyɔnu si yedi be yeaɖe ya nye Presbyteriatɔ. Esi Rutherford ƒe osɔfo gblɔ be “nyɔnua le dzomavɔ me yi ge le esi womena nyɔnyrɔe o ta gake eya ayi dziƒo tẽ le eƒe nyɔnyrɔxɔxɔ ta la, enyɔ ŋu na eƒe susu si dea ŋugble le nu ŋu nyuie eye wòzu mawudzimaxɔsela.”

Ebia ƒe geɖe ƒe numekuku tsitotsito hafi Rutherford gate ŋu tu eƒe Mawu si li ŋutɔŋutɔ dzixɔxɔse ɖo. Egblɔ be yebui be “mele be ame ƒe dzi naxɔ nusi me mekɔ le eƒe susu me dzi ase le seselelãme ta o.” Rutherford ɖe nu me be, “ele be [Kristotɔwo] naka ɖe edzi be Ŋɔŋlɔ siwo dzi yewoxɔ se la nye nyateƒe,” eye wògblɔ kpee be: “Ele be woanya nusi dzi wonɔ te ɖo.”—Kpɔ Timoteo II, 3:16, 17.

Ẽ, egbea gɔ̃ hã amesi mexɔ Mawu dzi se o alo amesi meka ɖe Mawu ƒe anyinɔnɔ dzi o hã ate ŋu aku Ŋɔŋlɔawo me eye wòaxɔ Yehowa Mawu dzi ase eye ƒomedodo nanɔ wo kplii dome. Esi ɖekakpui aɖe tsɔ Gbetakpɔxɔ Habɔbɔa ƒe agbalẽ si nye Sidzedze si Kplɔa Ame Yia Agbe Mavɔ Me srɔ̃ Bibliae nyuie la, eʋu me be: “Nyemexɔ Mawu dzi se esime medze nusɔsrɔ̃ sia gɔme o, gake fifia mekpɔ be Biblia nyanya na nye tamebubu trɔ kura. Meva le si dzem Yehowa hele kakam ɖe edzi.”

“Abunetɔwo” Kple Mawu

Ðk. James Hastings gblɔ le A Dictionary of the Bible me be: “Meva susu me na Nubabla Xoxoa [Hebri Ŋɔŋlɔawo] ŋlɔla aɖeke kpɔ be yeaɖo kpe Mawu ƒe anyinɔnɔ dzi alo yeahe eŋu nya o. Mebɔ le blema be woagbe nu le Mawu ƒe anyinɔnɔ ŋu, alo be woaʋli nya atsɔ aɖo kpe edzi o. Dzixɔse sia sɔ le dzɔdzɔme nu na amegbetɔ ƒe susu eye alea wòle na amewo katã.” Gake mefia be amesiame nye Mawu vɔ̃la ɣemaɣi o. Kura o. Psalmo 14:1 kple 53:2 siaa yɔ ‘abunetɔ’ si gblɔ le eƒe dzi me be “Mawu aɖeke meli o.”

Ameka ƒomevie nye abunetɔ sia si gblɔna be Mawu meli o? Menye amesi ƒe susu mele dɔ wɔm ye o. Ke boŋ Hebrigbe me nya na·valʹ fia amesi ƒe agbenɔnɔ ŋu kpɔtsotso le. Nufialagã S. R. Driver gblɔ ɖe The Parallel Psalter me be nusi gblẽ le amea ŋu la “menye gbɔdzɔgbɔdzɔ le susu me o, ke boŋ numanyamanya le agbenɔnɔ kple mawusubɔsubɔ me, si nye sidzedze alo dzesidedenu ƒe anyimanɔmanɔ kura ye.”

Hakpala la yi edzi ƒo nu tso agbenɔnɔ manyomanyo si tsoa nɔnɔme sia ƒe amesinɔnɔ me ŋu be: “Wowɔa nu gbegblẽwo kple nu nyɔŋuwo. Ame aɖeke meli, si wɔa nu nyui o.” (Psalmo 14:1) Ðk. Hastings ƒo eta be: “Amewo nɔa te ɖe Mawu ƒe xexeame manɔmanɔ sia kple tohehe maxɔmaxɔ dzi zua ame gbegblẽwo eye wowɔa nu nyɔŋuwo.” Woxɔa mawumavɔ̃mavɔ̃ gɔmeɖosewo eye woŋea aɖaba ƒua Mawu ŋutɔŋutɔ si womedi be yewoabu akɔnta na o dzi. Gake tamebubu nenema nye numanyamanya kple bometsitsi egbea abe alesi wònyee esime hakpala la ŋlɔ eƒe nyawo ƒe 3,000 kple edzivɔwoe nye sia ene.

Nuxlɔ̃amenya Siwo Tso Mía Mawu si Li Ŋutɔŋutɔ Gbɔ

Mina míatrɔ ɖe nya siwo míebia le míaƒe nyati gbãtɔa me ŋu azɔ. Nukatae ame geɖe mese nusita Mawu nanye ame anɔ anyi ŋutɔŋutɔ evɔ fukpekpe nabɔ fũ ɖe xexeame gɔme o?

Numeɖeɖe siwo tso amesiwo ‘gbɔgbɔ kɔkɔe la ʋã wogblɔ Mawu ƒe nyawo’ gbɔ la le Biblia me. (Petro II, 1:21) Eya ɖeɖekoe ɖe amesi Yehowa, Mawu si li ŋutɔŋutɔ, nye la fia mí. Exlɔ̃ nu le ame vɔ̃ɖi aɖe si amegbetɔ mate ŋu akpɔ o, si kpɔ ŋusẽ gã aɖe ɖe amewo ƒe tamebubu dzi eye wòɖua wo dzi la ŋu—Satana Abosam. Ne míexɔ edzi se be ame aɖe nye Mawu si li ŋutɔŋutɔ o la, aleke míawɔ axɔ edzi ase be ame aɖe hã li ŋutɔŋutɔ si nye Abosam, alo Satana?

Gbɔgbɔ ʋã apostolo Yohanes wòŋlɔ be: “Abosam kple Satana, amesi nye xexeame katã blela.” (Nyaɖeɖefia 12:9) Emegbe Yohanes gblɔ be: “Míenyae bena, Mawu me míetso, eye xexeme blibo la katã le vɔ̃ɖitɔ la me.” (Yohanes I, 5:19) Nya siwo Yesu gblɔ, siwo Yohanes ŋutɔ ŋlɔ ɖe eƒe Nyanyuia me, dze le nya siawo me be: “Xexeamefia gbɔna, eye mekpɔ naneke le ŋunye o.”—Yohanes 14:30.

Aleke gbegbe Ŋɔŋlɔawo ƒe nufiafia sia dome didi tso nusi dzi amewo xɔ se fifia gbɔe nye si! Catholic Herald gblɔ be: “Nuƒoƒo le Abosam ŋu megabɔ kura egbea o. Míaƒe makamakaɖenudzi kple dzɔdzɔmeŋutinunya ƒe azã la ɖe Satana ɖa le amewo ƒe susu me.” Gake Yesu gblɔ na amesiwo ɖoe be yewoawui be: “Miawo la mietso fofo, si nye Abosam la me, eye mia fofo ƒe nudzodzrowo miedina be, miawɔ.”—John 8:44.

Alesi Biblia ɖe Satana ƒe ŋusẽ mee la me kɔ. Ena nusita togbɔ be ame akpa gãtɔ dina be yewoanɔ ŋutifafa kple ɖekawɔwɔ me hã la, fuléle, aʋawɔwɔ, kple ʋunyaʋunyawɔwɔ siwo me susu mele o, abe esi dzɔ le Dunblane (si ƒe nya míegblɔ le axa 3 kple 4 ene) bɔ fũ ɖe xexeame la me kɔ na mí. Gawu la, menye Satana ɖeɖekoe nye futɔ si ŋu wòle be míatsi tre ɖo o. Biblia gaxlɔ̃ nu tso gbɔgbɔ vɔ̃wo hã ŋu—gbɔgbɔmenuwɔwɔ vɔ̃ɖi siwo kpe ɖe Satana ŋu tso gbaɖegbe ke le ameƒomea beble kple nugbegblẽ le wo ŋu me. (Yuda 6) Yesu Kristo tsi tre ɖe gbɔgbɔ siawo ƒe ŋusẽ ŋu zi geɖe, eye ete ŋu ɖu wo dzi.—Mateo 12:22-24; Luka 9:37-43.

Yehowa, Mawu vavã la, ɖo tame be yeaɖe vɔ̃ɖinyenye ɖa le anyigba sia dzi eye mlɔeba yeaɖe Satana kple eƒe gbɔgbɔ vɔ̃wo siaa ƒe dɔwɔwɔwo ɖa keŋkeŋ. Míate ŋu anɔ te ɖe míaƒe sidzedze Yehowa dzi be xɔse sesẽ naɖo mía si eye míaka ɖe eƒe ŋugbedodowo dzi. Egblɔ be: “Womewɔ mawu aɖeke do ŋgɔ nam o, eye ɖeke mado megbe nam o. Nyee nye Yehowa, eye xɔnametɔ aɖeke meli kpe ɖe ŋunye o.” Le nyateƒe me la, Mawu si li ŋutɔŋutɔe Yehowa nye na amesiwo katã dze sii, dea ta agu nɛ, hesubɔnɛ. Eya, sinu koe míakpɔ hena míaƒe ɖeɖekpɔkpɔ, ẽ, eyama ɖeɖeko sinue míakpɔ.—Yesaya 43:10, 11.

[Nɔnɔmetata si le axa 7]

Ƒe alafa 18 lia me kpe dzi nutata aɖe si fia Mose wònɔ Mose I, 1:1 ŋlɔm le gbɔgbɔ ƒe ameʋaʋã te

[Afi Si Míexɔ Mɔɖeɖe Tso]

Etso The Holy Bible, J. Baskett, Oxford, me

[Nɔnɔmetata si le axa 8]

Yesu Kristo kpe gbɔgbɔ vɔ̃wo dzi zi geɖe