Xɔse Na Barak Ðu Aʋakɔ Sẽŋu Aɖe dzi

TSƆE be yedze ŋgɔ asrafo sẽŋuta aɖewo ŋkume kple ŋkume. Aʋawɔnu siwo le tsia dzi ye le wo si, eye wole klalo na wo zazã. Wɔna aɖeke mele mia kple wò zɔhɛwo ŋu le wo ŋkume o.

Le ɣeyiɣi si me ʋɔnudrɔ̃lawo nɔ Israel dzi ɖum la, Barak, Debora, kple Israel-vi 10,000 to nɔnɔme sia tɔgbe me. Kanaan-ʋakɔ siwo kplɔm aʋafia Sisera nɔ lae nye futɔawo. Woƒe aʋawɔnuawo nye tasiaɖam siwo ƒe afɔti nu wode yi ɖaɖɛ wuamewoe. Teƒea enye Tabor-to kple Kison-tɔʋua gbɔ. Nusi dzɔ le afima la ɖe Barak fia be enye ŋutsu si ƒe xɔse woasrɔ̃. De ŋugble tso nudzɔdzɔ siwo he aʋakpekpe sia vɛ ŋu kpɔ.

Israel Do Ɣli Yɔ Yehowa

Ʋɔnudrɔ̃lawo ƒe agbalẽa ƒo nu tso alesi Israel gblẽ tadedeagu vavãtɔ ɖi enuenu kple nu gbegblẽ siwo do tso eme nɛ ɖe nuwɔna siawo ta ŋu. Le go ɖesiaɖe me la, ne wonya bia Mawu ƒe nublanuikpɔkpɔ tso dzi blibo me ko la, Mawu ɖoa ɖela na wo, si naa ablɔɖe wo, eye emegbe wogadzea aglã ake. Woƒe nuwɔna sia tae “esi Ehud [si nye ʋɔnudrɔ̃la si ɖe wo tso Moabitɔwo ƒe ameteteɖeanyi te] ku la, Israel-viwo gade asi nusi medze Yehowa ŋu o la wɔwɔ me” ake ɖo. Le nyateƒe me la, “wotia mawu yeyewo.” Nukae do tso eme? “Yehowa tsɔ wo dzra na Kanaan-fia Yabin, amesi ɖu dzi le Xazor; eƒe aʋafia nye Sisera . . . Eye Israel-viwo do ɣli na Yehowa elabena gatasiaɖam alafa asieke le [Sisera si], eye wòte Israel-viwo ɖe anyi sesẽtɔe ƒe blave sɔŋ.”—Ʋɔnudrɔ̃lawo 4:1-3; 5:8.

Ŋɔŋlɔawo gblɔ le alesi agbenɔnɔ nɔ le Israel ŋu be: “[Le ŋkeke mawo me la,] mɔwo to gbe, eye amesiwo zɔa mɔ tatawo dzi la, to gbedzemɔwo. Aʋafiawo nu tso.” (Ʋɔnudrɔ̃lawo 5:6, 7) Amedzidzela tasiaɖamdolawo na vɔvɔ̃ lé amewo. Agbalẽnyala aɖe gblɔ be: “Vɔvɔ̃ ɖo amewo katã le Israel eye edze abe dukɔ bliboa tu eye wɔna vɔ le eŋu ene.” Eyata abe alesi ko wowɔnɛ zi geɖe do ŋgɔ ene la, Israel-vi siwo ƒo dzi ɖe le la do ɣli bia Yehowa ƒe kpekpeɖeŋu.

Yehowa Ðo Kplɔla Aɖe

Kanaantɔwo ƒe ameteteɖeanyia va zu xaxa ƒe ɣeyiɣi na Israel. Mawu zã nyɔnunyagblɔɖila Debora be wòagblɔ eƒe ʋɔnudrɔ̃nyawo kple mɔfiamenyawo na wo. Yehowa to esia dzi na mɔnukpɔkpɔe be wòawɔ nu abe kpɔɖeŋudada ene le Israel.—Ʋɔnudrɔ̃lawo 4:4; 5:7.

Debora dɔ woɖayɔ Barak vɛ eye wògblɔ nɛ bena: “Yehowa, Israel ƒe Mawu la, de se na wò be: Ho yi Tabor-to la dzi, nàɖe ame akpe ewo tso Naftali-viwo kple Zebulon-viwo dome kpe ɖe ɖokuiwò ŋu; makplɔ Sisera, Yabin ƒe aʋafia kple eƒe tasiaɖamwo kpakple eƒe aʋakɔwo ava gbɔwò le Kison-tɔʋu la nu, eye matsɔe ade asi na wò!” (Ʋɔnudrɔ̃lawo 4:6, 7) Esi Debora gblɔ be ‘Yehowa de se’ la, ena eme kɔ ƒã be yemekpɔ ŋusẽ aɖeke ɖe Barak dzi o. Ewɔ nu ko abe mɔ si dzi woto gblɔ nusi ƒe se Mawu de ene. Aleke Barak wɔ nu ɖe eŋui?

Barak gblɔ be: “Ne àyi kplim la, ekema mayi; ke ne màyi kplim o la, ekema nye hã nyemayi o.” (Ʋɔnudrɔ̃lawo 4:8) Nukatae Barak nɔ hehem ɖe megbe le agbanɔamedzi si Mawu tsɔ nɛ xɔxɔ ŋu? Ðe wònɔ vɔvɔ̃ma? Ðe meɖo ŋu ɖe Mawu ƒe ŋugbedodowo ŋu oa? Ao. Barak megbe dɔdasia xɔxɔ loo, alo gbe toɖoɖo Yehowa o. Ke boŋ eƒe ŋuɖoɖoa fia be ese le eɖokui me be yemateŋu awɔ ɖe Mawu ƒe sededea dzi le ye ɖokui si o. Mawu teƒenɔla ƒe anyinɔnɔ ana wòaka ɖe Mawu ƒe mɔfiafia dzi eye ana kakaɖedzi nasu eya kple eƒe amewo si. Eyata le esi teƒe be nusi Barak bia nanye gbɔdzɔgbɔdzɔ ƒe dzesi la, efia xɔse sẽŋu boŋ.

Míate ŋu atsɔ Barak ƒe nuwɔna asɔ kple Mose, Gideon, kple Yeremya tɔ. Amesiwo hã meka ɖe edzi be yewoate ŋu awɔ dɔ si Mawu de yewo si la o. Gake womebu wo ame mawɔnuteƒewoe le esia ta o. (Mose II, 3:11–4:17; 33:12-17; Ʋɔnudrɔ̃lawo 6:11-22; 36-40; Yeremya 1:4-10) Eye nukae míate ŋu agblɔ tso Debora ƒe nɔnɔme ŋu? Mete kpɔ be yeaxɔ ŋgɔ o. Ke boŋ eyi edzi subɔ Yehowa ɖokuibɔbɔtɔe. Egblɔ na Barak be: “Mele yiyi ge kpli wò tso.” (Ʋɔnudrɔ̃lawo 4:9) Elɔ̃ faa be yeadzo le aƒeme—afisi wòanɔ dedie wu le—aɖawɔ ɖeka kple Barak le aʋa si le ŋgɔ gbɔna la me. Debora hã ɖo xɔse kple dzideƒo ƒe kpɔɖeŋu ɖi.

Wodze Barak Yome le Xɔse Me

To aɖe si wonya nyuie si ŋkɔe nye Tabor la dzie Israel-ʋakɔwo aƒo ƒu ɖo. Teƒea sɔ nyuie. Enye teƒe si Naftali kple Zebulon to, siwo te ɖe wo nɔewo ŋu la, kpea ta le. Eyata abe alesi Mawu de se ene la, ame akpe ewo—kple Debora—tsɔ wo ɖokuiwo na dze Barak yome yi to sia tame.

Ehiã be xɔse nanɔ amesiwo katã wɔ ɖeka kple Barak la si. Yehowa do ŋugbe na Barak be yeana wòaɖu Kanaantɔwo dzi, gake aʋawɔnu kawoe le Israel-viwo si? Ʋɔnudrɔ̃lawo 5:8 gblɔ be: “Womegakpɔ akpoxɔnu kple akplɔ aɖeke le Israel ƒe ame akpe blaneawo dome o.” Eyata aʋawɔnu boo aɖeke menɔ Israel-viwo si o. Akplɔ kple akpoxɔnu kura gɔ̃ hã maɖi naneke o ne wotsɔ wo sɔ kple tasiaɖam siwo nu yi ɖaɖɛwo le. Esi Sisera see be Barak yi Tabor-toa dzi la, eƒo eƒe tasiaɖamwo kple asrafohaa nu ƒu enumake le Kison-tɔʋu la me. (Ʋɔnudrɔ̃lawo 4:12, 13) Nusi Sisera menya o enye be ele aʋa wɔ ge kple Mawu Ŋusẽkatãtɔ la.

Barak Ðu Sisera ƒe Aʋakɔa Dzi

Esi aʋakpegbea ɖo la, Debora gblɔ na Barak be: “Tso! Elabena egbe sia Yehowa le Sisera tsɔ ge ade asi na wò. Alo ɖe Yehowa madze ŋgɔwò oa?” Ele na Barak kple eƒe amewo be woaɖi tso Tabor-toa dzi ava tɔʋu la ƒe baliwo me, gake afima ade Sisera ƒe tasiaɖamwo dzi. Aleke nàse le ɖokuiwò me ne ɖe nènɔ Barak ƒe aʋakɔa dome? Ðe Nàlɔ̃ faa aɖo to ahaɖo ŋkui be Yehowa gbɔe mɔfiamea tsoa? Barak kple eƒe ame akpe ewo la ɖo to. “Eye Yehowa tsɔ yi de zi Sisera kple eƒe tasiaɖamwo katã kple eƒe aʋakɔ blibo la me le Barak ŋgɔ.”—Ʋɔnudrɔ̃lawo 4:14, 15.

Esi Yehowa nɔ megbe na Barak ta la, eɖu Sisera ƒe aʋakɔa dzi. Nuŋlɔɖisi ku ɖe aʋa la ŋu megblɔ nusianu si dzɔ o. Ke hã, aʋadziɖuha si Barak kple Debora dzi gblɔ be ‘dziŋgɔ ɖuɖu tsi, eye alilikpowo hã dza tsi.’ Anye kokoko be tsidzadza gã aɖee na Sisera ƒe tasiaɖamwo ɖo ba eye esia de Barak dzi. Ale Kanaantɔwo ƒe aʋawɔnu veviawo zazã zu dɔ. Hadzidzia gblɔ le Sisera ƒe ame siwo ku ŋu be: “Kison-tɔʋu la kplɔ wo yii.”—Ʋɔnudrɔ̃lawo 5:4, 21.

Ðe woate ŋu axɔ nudzɔdzɔ sia dzi asea? Kison-tɔʋu la me ƒuna, eye tsi vi aɖewo koe sina le eme. Le tsidzadza gãwo alo ɣeyiɣi didi aɖe ƒe tsidzadza megbe la, tsisisi siawo ate ŋu aɖɔ enumake azu tɔʋu dziŋɔ si me tsiwo sina kabakaba. Wogblɔ be le xexemeʋa I wɔɣi la, aɖabaƒoƒo 15 pɛ ko ƒe tsi si dza le nuto sia ke ƒe akpa si me tsu sɔ gbɔ ɖo la de sɔdzisrafowo katã ƒe agbagbadzedzewo afɔku me. Aʋa si Napoleon kple Turkeytɔwo wɔ le Tabor-to dzi le April 16, 1799 dzi ŋuti nuŋlɔɖiwo gblɔ be ‘tsi lé Turkeytɔ geɖe esime wonɔ agbagba dzem be yewoasi to Kison-tɔʋua ƒe akpa si ɖɔ la.’

Yudatɔ ŋutinyaŋlɔla Flavius Josephus gblɔ be esime Sisera kple Barak ƒe aʋakɔwo de go do ge wo nɔewo la, “ya sesẽ aɖe si, na tsi kple tsikpe gbogbo aɖe dza la, ƒo tso dziƒo eye yatsia na Kanaantɔwo megate ŋu kpɔ nu o, ale woƒe datiwo kple akafowo meɖe vi aɖeke na wo o.”

Ʋɔnudrɔ̃lawo 5:20 gblɔ be: “Dziƒo wotso wɔ aʋa la, ɣletiviwo nɔ woƒe mɔwo dzi wɔ aʋa kple Sisera.” Aleke ɣletiviwo wɔ aʋa kple Siserae? Ame aɖewo susui be nya siawo fia Mawu ƒe kpekpeɖeŋu. Ame bubuwo gblɔ be efia mawudɔlawo ƒe kpekpeɖeŋu, ɣletivitoasikewo ƒe dzadza, alo Sisera ƒe ŋuɖoɖo ɖe ɣletivimefakalawo ƒe nyagblɔɖiwo ŋu si meva eme o. Esi wònye Biblia meɖe alesi tututu ɣletiviwo wɔ aʋa siae me o ta la, ewɔ abe nya sia gɔmesese be efia be Mawu kpe ɖe Israel-ʋakɔa ŋu le mɔ aɖe nu la ɖeɖe sɔ gbɔ. Aleke kee wòɖale o, Israel-viwo wɔ nɔnɔmea ŋuti dɔ bliboe. “Barak ti tasiaɖamwo kple aʋakɔ la yome . . . eye Sisera ƒe aʋakɔ blibo la tsi yi nu, ame ɖeka hɔ̃ hã mekpɔtɔ o.” (Ʋɔnudrɔ̃lawo 4:16) Nukae dzɔ ɖe aʋafia Sisera dzi?

Ameteɖeanyila la Dze “Nyɔnu aɖe Si Me”

Biblia gblɔ be: “Ke Sisera to afɔ si [le aʋa la nu] va Yael, Kenitɔ Xeber srɔ̃ ƒe agbadɔ gbɔ, elabena ŋutifafa le Xazor-fia, Yabin kple Kenitɔ Xeber ƒe aƒe la dome.” Yael kpe Sisera si ŋu nu te la va eƒe agbadɔ me, na notsii wòno, hetsyɔ avɔ nɛ, ale be wòdɔ alɔ̃. Tete Yael “tsɔ agbadɔtsyoti, eye wòtsɔ zũ,” siwo nye nusiwo agbadɔmenɔlawo zãna edziedzi la, “ɖe asi yi egbɔ dzaa, eye wòƒu tsyoti la ɖe tonu nɛ mimi ɖe anyigba. Ke edɔ alɔ̃ yi me ʋĩ, elabena ɖeɖi te eŋu, eye wòku.”—Ʋɔnudrɔ̃lawo 4:17-21.

Emegbe Yael do go va kpe Barak hegblɔ nɛ be: “Va ne mafia amesi dim nèle la wò!” Nuŋlɔɖia gblɔ kpee be: “Esi wòyi la, ekpɔ Sisera ku ɖi, eye tsyoti ƒo ɖe tonu nɛ.” Nuteƒekpɔkpɔ si ado ŋusẽ xɔse ka gbegbee nye esi wòanye na Barak! Nyɔnu nyagblɔɖila Debora gblɔ nɛ do ŋgɔ be: “Ke bubu, si le mɔ, si dzi dze ge nàla me la, manye tɔwò o, elabena Yehowa atsɔ Sisera ade asi na nyɔnu aɖe!”—Ʋɔnudrɔ̃lawo 4:9, 22.

Ðe woate ŋu abu Yael ƒe nuwɔna be enye amededeasia? Yehowa mebui nenema o. Barak kple Debora ƒe aʋadziɖuha la gblɔ be: “Woayrae le nyɔnu, siwo nɔa agbadɔ me la dome!” Ha sia na míese Sisera ƒe kua gɔme nyuie wu. Woɖɔ dadaa be etsɔ dzimaɖitsitsi le eƒe tɔtrɔgbɔ tso aʋagbedzi lalam. Ebia be: “Nukaŋuti eƒe tasiaɖamwo gbe vava?” “Nyɔnu bubume, siwo le egbɔ la” dze agbagba be yewoana woaɖe dzi ɖi esime wogblɔ nɛ be anya nɔ aboyomewo—awu ŋɔŋɔe nyuiwo kple nyɔnuviwo—mam na ŋutsuwo. Nyɔnuawo bia be: “Ðe womekpɔ aboyonuwo mã oa? Nyɔnuvi ɖeka alo eve [nyagbe siwo asrafowo zãna tsɔ ƒoa nu tso ahiãvi siwo wokpɔ le aʋagbedzi ŋu, etenuŋɔŋlɔ] na ŋutsu ɖeka, Sisera ƒe aboyonuwo nanye awu ŋɔŋɔewo, akɔgbavɔ ɖeka alo eve, siwo le ŋɔŋɔe, nanye fiasrɔ̃ tɔ.”—Ʋɔnudrɔ̃lawo 5:24, 28-30.

Nusɔsrɔ̃ si Le Eme na Mí

Nusɔsrɔ̃ veviwo le Barak ŋuti nuŋlɔɖia me na mí. Kuxiwo kple dzigbãnyawo aɖe fu na amesiwo mebua Yehowa ŋu le woƒe agbenɔnɔ me o la godoo. Amesiwo trɔ dzime hetrɔ ɖe Mawu ŋu eye woxɔ eyama dzi se la ate ŋu avo tso ameteteɖeanyi ƒomevi ɖesiaɖe me. Eye ɖe mele be míaɖe toɖoɖo ƒe gbɔgbɔ hã afia oa? Ne edze abe Mawu ƒe nudidiwo tsi tre ɖe amegbetɔ ƒe nuŋububu ŋu ene hã la, míate ŋu aka ɖe edzi be míaƒe viɖe mavɔ tae eƒe mɔfiamewo li ɖo. (Yesaya 48:17, 18) Yehowa dzixɔxɔse kple toɖoɖo Mawu ƒe mɔfiamewo koe te ŋu na Barak ‘si futɔwo ƒe aʋakɔwo.’—Hebritɔwo 11:32-34.

Nya ʋãme siwo wotsɔ ƒo Debora kple Barak ƒe hadzidzia tae enye: “Yehowa, alea wò futɔwo katã atsrɔ̃ enye si! Ke amesiwo lɔ̃nɛ la le, abe alesi ɣe dzena kple ŋusẽ ene.” (Ʋɔnudrɔ̃lawo 5:31) Aleke gbegbee nya siawo ava eme enye si ne Yehowa he Satana ƒe xexe vɔ̃ɖia va nuwuwui!

[Nɔnɔmetata si le axa 29]

Yehowa zã Debora hede dɔ asi na Barak

[Nɔnɔmetata si le axa 31]

Kison-tɔsisia ɖɔ gbagba ɖi

[Afi Si Míexɔ Mɔɖeɖe Tso]

Pictorial Archive (Near Eastern History) Est.

[Nɔnɔmetata si le axa 31]

Tabor-to