Wowɔ Yehowa Ƒe Lɔlɔ̃nu

Sasrãkpɔ aɖe si me Woxɔ Teƒeɖoɖo Geɖe Le

MƆZƆZƆ tso Saba yi Yerusalem anye nusi ate ɖeɖi fianyɔnu la ŋu ŋutɔ. Enye amesi agbenɔnɔ le dziɖeɖi me ma. Fifia, ele mɔ si ƒe didimee nye kilometa 2,400 zɔm le kposɔ ƒe azɔlizɔzɔ ƒe ablaɖeɖe nu to anyigba si ƒe akpa gãtɔ nye dzogbe si ƒe dzoxɔxɔ nu sẽ ale gbegbe dzi. Ame aɖewo susui be eƒe mɔzɔzɔa axɔ ŋkeke 75, eye yiyi koe nye ema!a

Nukatae fianyɔnu hotsuitɔ sia dzo le enɔƒe le Saba si dzidzeme geɖe le hezɔ mɔ teɖeɖiameŋu sia?

Nyatakaka Dodzidzɔname Aɖe

Saba-fianyɔnua va Yerusalem esi ‘wòse alesi Salomo ŋkɔ ɖi kpe ɖe Yehowa ƒe ŋkɔ ŋuti.’ (Fiawo I, 10:1) Womegblɔ nya si tututu fianyɔnua se tso Salomo ŋu ya o. Gake míenya be Yehowa yra Salomo etɔxɛe kple nunya, kesinɔnu, kple bubu. (Kronika II, 1:11, 12) Aleke fianyɔnua wɔ nya nusiawo? Esi Saba nye asitsadu ta la, ɖewohĩ anya se Salomo ƒe ŋkɔxɔxɔ to asitsala siwo va tsaa asi le eƒe dukɔa me dzi. Ðewohĩ wo dometɔ aɖewo dea Ofir, dukɔ si Salomo tsaa asi kplii.—Fiawo I, 9:26-28.

Eɖanye kae o, fianyɔnua va Yerusalem “kple ha gã ŋutɔ kple kposɔ, siwo tsɔ atike ʋeʋẽe kple sika geɖe ŋutɔ kpakple kpe xɔasiwo.” (Fiawo I, 10:2a) Ame aɖewo gblɔ be dzɔla siwo bla aʋakpa kpe ɖe “ha gã ŋutɔ” sia ŋu. Esia gɔme nya se, ne míede ŋugble le eŋu be fianyɔnua nye ŋusẽtɔ si ŋu bubu le eye wòle mɔ zɔm kple nunɔamesi siwo ƒe home ade dɔlar miliɔn gbogbo aɖe ŋu.b

Gake de dzesii be, fianyɔnua se Salomo ƒe ŋkɔxɔxɔ “kpe ɖe Yehowa ƒe ŋkɔ ŋuti.” Eyata esia menye asitsatsa ƒe mɔzɔzɔ dzro aɖe ko o. Eme kɔ ƒã be anye Salomo ƒe nunya sese ta koŋue fianyɔnua va ɖo—ɖewohĩ be ne wòanya wɔ la, ne yeasrɔ̃ nane atso eƒe Mawu Yehowa gɔ̃ hã ŋu. Esi wònye be anye Sem alo Xam siwo nye Yehowa subɔlawo ƒe dzidzimevie wònye ta la, anya di vevie be yeanya nu tso ye tɔgbuiwo ƒe mawusubɔsubɔ ŋu.

Nyabiabia Siwo Tɔtɔa Ame, Ŋuɖoɖo Siwo me Kɔ

Esi fianyɔnua do go Salomo la, edze edodokpɔ gɔme kple “adzototowo.” (Fiawo I, 10:1) Hebrigbe me nya si wozã le afisia ate ŋu afia ‘nyabiabia siwo tɔtɔa ame’ hã. Gake mefia be fianyɔnua bia nyamaɖinyawo Salomo o. Enye nusi ɖe dzesi be wozã Hebrigbe me nya ma ke le Psalmo 49:5 na nyabiabia vevi siwo ku ɖe nuvɔ̃, ku, kple ɖeɖe ŋu. Eyata anɔ eme be anye nya deto siwo do Salomo ƒe nunya ƒe goglome kpɔ mee Saba-fianyɔnua dzro kple Salomo. Biblia gblɔ be fianyɔnua ‘gblɔ nya siwo katã le eƒe dzi me la nɛ.’ Salomo hã “ɖo eƒe biabiawo katã ŋu nɛ; biabia aɖeke meli, si Salomo do kpo eŋu ɖoɖo nɛ o.”—Fiawo I, 10:2b, 3.

Salomo ƒe nunya kple eƒe fiaɖuƒea ƒe kesinɔnuwo ƒe agbɔsɔsɔme si Saba-fianyɔnua kpɔ la wɔ dɔ ɖe edzi ale gbegbe be “gbɔgblɔ bu ɖee.” (Fiawo I, 10:4, 5) Ame aɖewo bui be nyagbe sia fia be “gbɔgbɔtsixe tsi” fianyɔnua “ƒo.” Agbalẽnyala aɖe do susua ɖa gɔ̃ hã be eku ƒenyi! Nuka ke ɖadzɔ o, nusi fianyɔnua kpɔ kple nusi wòse la wɔ nuku nɛ. Egblɔ le Salomo ƒe dɔlawo ŋu be wonye dzidzɔtɔwo be mɔnukpɔkpɔ su wo si wosea eƒe nunya, eye ekafu Yehowa le esi wòtsɔ Salomo ɖo fiazikpui dzi ta. Eye etsɔ nunana xɔasi geɖewo na fia la, ne míabu sika ɖeɖe dzaa ƒe agbɔsɔsɔme si wòtsɔ na fia Salomo ɖe egbegbe ƒe nuwo ƒe asixɔxɔ nu la, ade $40,000,000. Salomo hã na nu fianyɔnua, “nusiwo katã Saba-fianyɔnu la bia.”c—Fiawo I, 10:6-13.

Nusi Míate Ŋu Asrɔ̃ tso Eme

Yesu zã Saba fianyɔnua be enye amesi ƒe nuwɔna me agbalẽfialawo kple Farisitɔwo ate ŋu asrɔ̃ nu tsoe. “Dziehe-fianyɔnu la atsi tre le ʋɔnudɔdrɔ̃ la me kple nenem dzidzime sia, eye wòabu fɔe, elabena etso kekeke anyigba ƒe seƒe ke va Salomo ƒe nunya se ge; eye kpɔ ɖa amesi wu Salomo la, le afii!” (Mateo 12:42) Ẽ, Saba-fianyɔnua ɖe ŋudzedzekpɔkpɔ gã fia ɖe nunya si Mawu nana ŋu. Ne ezɔ mɔ kilometa 2,400 be yeava se nya tso Salomo gbɔ la, ke enye nusi me nunya le be agbalẽfialawo kple Farisitɔwo naɖo to Yesu, amesi mele adzɔge tso wo gbɔ o la nyuie.

Mí amesiwo li egbea hã míate ŋu aɖe ŋudzedzekpɔkpɔ deto sia ɖe Yesu Kristo, Salomo Gãtɔ, ŋu afia. Le mɔ ka nu? Eƒe mɔnu ɖekae nye wɔwɔ ɖe eƒe mɔfiame si nye, “Miheyi ɖawɔ dukɔwo katã ne woanye nusrɔ̃lawo” dzi. (Mateo 28:19) Mɔ bubue nye be míade ŋugble edziedzi le Yesu ƒe kpɔɖeŋu kple eƒe tamesusu ƒe nɔnɔme ŋu nyuie eye míasrɔ̃e.—Filipitɔwo 2:5; Hebritɔwo 12:2, 3.

Nyateƒee, Salomo Gãtɔ ƒe kpɔɖeŋu sɔsrɔ̃ abia tso mía si be míaku kutri. Gake ne míewɔe alea la, míaxɔ teƒeɖoɖo geɖe. Le nyateƒe me la, Yehowa do ŋugbe na eƒe amewo be ne woɖe ɖokuitsɔtsɔsavɔgbɔgbɔ fia la, ‘yeaʋu dziƒo nu, eye yeadudu yayra aƒo ɖe wo dzi wòagbɔ eme.’—Maleaxi 3:10.

[Etenuŋɔŋlɔwo]