Wowɔ Yehowa Ƒe Lɔlɔ̃nu

Ðokuitsɔtsɔsavɔ Kple Nuteƒewɔwɔ ƒe Kpɔɖeŋu Aɖe

SƆHƐ agbledela si ŋkɔe nye Elisa dze ŋkeke aɖe gɔme kple anyigbadzobodɔ si wòwɔna gbesiagbe eye wòva trɔ zu ŋkeke si ɖe dzesi wu le eƒe agbe me. Esi Elisa nɔ dɔ wɔm le agblea me la, Eliya, amesi nye Israel ƒe nyagblɔɖila vevitɔ va ɖi ɖee. Ðewohĩ Elisa bia eɖokui be, ‘Nuka dim wòle le gbɔnye?’ Eteƒe medidi hafi wòkpɔ ŋuɖoɖoa o. Eliya da eƒe awu ʋlaya ɖo ɖe Elisa, si fia be Elisa ava xɔ ɖe eteƒe gbeɖeka. Elisa mebu eƒe yɔyɔ sia nu tsɛe o. Edzo le eƒe agble me enumake va zu Eliya subɔvi.—Fiawo I, 19:19-21.

Anɔ ƒe ade megbe la, azã va su be Eliya nadzo. Wogblɔ le nuŋlɔɖi si ƒo nu tso eƒe dzodzoa ŋu be enye Hebri Ŋɔŋlɔawo me “ŋutinya wɔdɔɖeamedzi kekeakewo dometɔ ɖeka.”

Eliya Dzra Ðo be Yeadzo

Eliya di be yeayi Betel, Yerixo, kple Yordan zi mamlɛtɔ. Abia be wòazɔ afɔ kilometa geɖe, ato tonyigba klitsawo dzi le teƒe aɖewo. Ne wozɔ mɔa ɖo dzeƒe ɖesiaɖe la, Eliya gblɔna na Elisa be wòatsi afima. Gake Elisa tea tɔ ɖe edzi be ɖeko yeanɔ yeƒe aƒetɔ ŋu vaseɖe nuwuwu.—Fiawo II, 2:1, 2, 4, 6.

Esime wonɔ Betel kple Yerixo la, ‘nyagblɔɖilawo ƒe nusrɔ̃viwo’ va Elisa gbɔ.a Wobiae be: “Ènyae be, Yehowa le wò aƒetɔ kɔ ge agbɔ tawò ayii egbea?” Eɖo ŋu na wo be: “Nye hã menyae, mizi ɖoɖoe.”—Fiawo II, 2:3, 5.

Azɔ Eliya kple Elisa wodze mɔ ɖo ta Yordan Tɔsisia gbɔ. Esi woɖo Yordan to la, Eliya wɔ nukunu aɖe eye nyagblɔɖilawo ƒe nusrɔ̃vi 50 nɔ adzɔge nɔ eteƒe kpɔm. “Eliya ɖe eƒe awu ʋlaya, eye wòŋlɔe tsɔ ƒo tsi la dzi wòmã ɖe akpa eve, eye woa kple eve la woto ƒuƒuiƒe ɖi go.”—Fiawo II, 2:8.

Esi woɖi go vɔ la, Eliya gblɔ na Elisa be: “Bia nusi mawɔ na wò, hafi woatsɔm adzoe le gbɔwò.” Elisa bia be woana Eliya ƒe gbɔgbɔ ƒe “akpa eve” ye—si nye, nuwo memamã teƒe eve si vi ŋgɔgbea xɔna zi geɖe. Nyateƒee wònye be Elisa de bubu Eliya ŋu abe alesi vi ŋgɔgbea dea bubu fofoa ŋui ene. Gakpe ɖe eŋu la, wosi ami nɛ be wòazu Yehowa ƒe nyagblɔɖila le Israel ɖe Eliya teƒe. Eyata nusi wòbia la menye eɖokuitɔ didi alo nusi mesɔ o. Gake esi Eliya nya be Yehowa koe ate ŋu ana nusi wòbia la, eɖo eŋu ɖokuibɔbɔtɔe be: “Èbia nu sesẽ.” Eye wògblɔ kpee be: “Ne èkpɔ be, wotsɔm dzoe le gbɔwò la, ekema ava me na wò; ke ne mele alea o la, ekema mava me o.”—Fiawo II, 2:9, 10; Mose V, 21:17.

Ðikeke mele eme o be Elisa gaɖoe kplikpaa wu tsã be yeanɔ yeƒe aƒetɔ ŋu. Tete “dzotasiaɖam kple dzosɔwo” va do. Elisa ɖi vo, ale wokplɔ Eliya dzoe le ahom me le eŋkume—wokɔe yi teƒe bubu nukutɔe.b Elisa tsɔ Eliya ƒe awu ʋlaya la eye wògbugbɔ ɖo ta Yordan Tɔsisia to. Etsɔe ƒo tsia dzi gblɔ be: “Afika Yehowa, Eliya ƒe Mawu la le?” Tsia me mã, si nye kpeɖodzi si me kɔ ƒã be Mawu le megbe na Elisa be wòanye Eliya teƒenɔla.—Fiawo II, 2:11-14.

Nusɔsrɔ̃ Siwo Le Eme na Mí

Esi wotsɔ amekpekpea ɖo Elisa ŋkume be wòasubɔ etɔxɛe kple Eliya la, edzo le eƒe agble me enumake be wòava subɔ Israel ƒe nyagblɔɖila vevitɔ la. Edze ƒã be eƒe dɔ aɖewo nɔ tsɛ, elabena wonyae be eyae nye amesi “de tsi asi na Eliya.”c (Fiawo II, 3:11) Ke hã, Elisa bu eƒe dɔa mɔnukpɔkpɔe, eye wònɔ Eliya ŋu nuteƒewɔwɔtɔe.

Mawu ƒe egbegbe subɔla geɖe ɖea ɖokuitsɔtsɔsavɔ ƒe gbɔgbɔ ma fiana. Wo dometɔ aɖewo gblẽ “agblewo,” si nye agbenɔnɔ si mã wo ɖi, bene woaɖe gbeƒã nyanyuia le didiƒenyigbawo dzi alo anye Betel-ƒomea me tɔwo. Ame bubuwo zɔ mɔ yi dzronyigbawo dzi be woawɔ dɔ le Habɔbɔa ƒe xɔtudɔwo ŋu. Wo dometɔ geɖe le dɔ si ɖewohĩ amewo abu dɔ tsɛe la wɔm. Gake amesiwo le kluvidɔ wɔm na Yehowa dometɔ aɖeke mele dɔ maɖinu wɔm o. Yehowa kpɔa ŋudzedze ɖe amesiwo katã lɔ̃ faa le esubɔm la ŋu, eye ayra woƒe ɖokuitsɔtsɔsavɔ ƒe gbɔgbɔa.—Marko 10:29, 30.

Elisa nɔ Eliya ŋu vaseɖe nuwuwu. Egbe be yemagblẽ nyagblɔɖila tsitsi la ɖi o esime wobe nedzo gɔ̃ hã. Ðikeke mele eme o be ƒomedodo kplikplikpli si wòna wòva nɔ woa kple Eliya domee wɔe be ameŋunɔnɔ lɔlɔ̃tɔe nenema nye dzidzɔ nɛ. Egbea la, Mawu subɔlawo dzea agbagba be yewo kple Mawu dome ƒomedodo me nasẽ eye wodzea agbagba be yewoate ɖe yewoƒe haxɔsetɔwo ŋu kplikplikpli. Woayra ɖekawɔwɔ ƒe ƒomedodo kplikplikpli ma, elabena Biblia gblɔ le Yehowa ŋu be: “Èwɔa nuteƒe na amesi nye nuteƒewɔla.”—Samuel II, 22:26, NW.

[Etenuŋɔŋlɔwo]