“Ame Ka Adzi Ŋɔ Nam?”
“Ne aʋa ho ɖe ŋunye ale keke hã la, nyea maɖe dzi ɖi.”—PS. 27:3.
LE MAWUNYAKPUKPUI SIWO GBƆNA NU LA, NU KAE AKPE ÐE MÍA ŊU BE DZI NANƆ MÍA ƑO?
1. Nu ka gɔmee Psalmo 27 lia akpe ɖe mía ŋu míase?
NU KA tae míele geɖe wɔm le gbeƒãɖeɖedɔa me togbɔ be nuwo le gbegblẽm ɖe edzi le xexea me hã? Nu ka tae míelɔ̃na faa zãa míaƒe ɣeyiɣi kple ŋusẽ le gbeƒãɖeɖedɔa me togbɔ be ganyawo le sesẽm ŋutɔ le xexea me gɔ̃ hã? Aleke míawɔ be dzi nakpɔtɔ anɔ mía ƒo esi ame bubuwo le vɔvɔ̃m na nu si adzɔ le etsɔme? Míakpɔ nyabiase siawo ƒe ŋuɖoɖowo le Fia David ƒe hadzidzi aɖe si dze le Psalmo 27 lia me la me.
2. Nu kae ŋɔdzi wɔna na ame, gake kakaɖedzi kae le mía si?
2 David dze psalmo sia gɔme ale: “Yehowa enye nye kekeli kple nye xɔname, ame ka mavɔ̃? Yehowa enye mɔ na nye agbe, ame ka adzi ŋɔ nam?” (Ps. 27:1) Ŋɔdzi, si nye vɔvɔ̃ si nu sẽ la, nana be wɔna vɔna le ame ŋu kura. Gake mele be ŋɔdzidonu aɖeke natso dzika ƒo na ame si vɔ̃a Yehowa o. (1 Pet. 3:14) Ne míetsɔ Yehowa wɔ míaƒe mɔ sesẽe la, ‘míanɔ anyi bɔkɔɔ, eye dzɔgbevɔ̃e ƒe ŋɔdzidoname maɖe dzi le mía ƒo o.’ (Lod. 1:33; 3:25) Nu ka tae wòle alea ɖo?
“YEHOWA ENYE NYE KEKELI KPLE NYE XƆNAME”
3. Gɔmesese ka nue Yehowa nye míaƒe kekeli le, gake nu kae wòle be míawɔ?
3 Kpɔɖeŋunyagbɔgblɔ si nye “Yehowa enye nye kekeli” fia be Yehowa fiaa nyateƒea mí. (Ps. 27:1) Kekeli ŋutɔŋutɔ ate ŋu ana míakpɔ afɔku alo mɔxenu aɖe si le mɔ me na mí la, gake meɖenɛ ɖa o. Ele be míaƒo asa na afɔkua. Le mɔ ma ke nu la, Yehowa ɖea gɔmesese si le xexemenudzɔdzɔwo ŋu la fiaa mí. Exlɔ̃a nu mí do ŋgɔ tso afɔku siwo le nuɖoanyi sia me la ŋu. Ena Biblia me gɔmeɖose siwo wɔa dɔ ɣeawokatãɣi la mí, gake ele be míawɔ nu siwo míesrɔ̃ la ŋu dɔ. Ne míewɔe alea la, míate ŋu adze nunya wu míaƒe futɔwo kple míaƒe nufialawo siaa.—Ps. 119:98, 99, 130.
4. (a) Nu ka tae David te ŋu gblɔ kple kakaɖedzi be: “Yehowa enye nye . . . xɔname”? (b) Ɣekaɣi koŋue Yehowa ava nye míaƒe xɔname?
4 David ƒe nya siwo le Psalmo 27:1 la ɖee fia be anya ɖo ŋku ale si Yehowa ɖee, alo xɔ nɛ, le ɣeyiɣi siwo va yi me la dzi. Le kpɔɖeŋu me, Yehowa ɖee “tso dzata kple sisiblisi si me.” Yehowa kpe ɖe eŋu hã wòɖu ame dzɔtsu Goliat dzi. Emegbe la, Fia Saul dze agbagba be yeatɔ akplɔ David, gake ɣesiaɣi la, Yehowa kpɔa eta. (1 Sam. 17:37, 49, 50; 18:11, 12; 19:10) Eya ta mewɔ nuku o be David te ŋu gblɔ kple kakaɖedzi be: “Yehowa enye nye . . . xɔname”! Ɛ̃, Yehowa agaxɔ na esubɔlawo ake abe ale si wòxɔ na David ene. Alekee? Awɔ esia ne eɖe esubɔlawo tso “xaxa gã” si gbɔna la me.—Nyaɖ. 7:14; 2 Pet. 2:9.
ÐO ŊKU ALE SI YEHOWA KPE ÐE ŊUWÒ VA YI LA DZI
5, 6. (a) Aleke ŋkuɖoɖo nu siwo dzɔ va yi dzi naa dzi ɖoa mía ƒo geɖe wu? (b) Aleke ale si Yehowa kpe ɖe eƒe amewo ŋu va yi la doa ŋusẽ mí?
5 Wohe míaƒe susu yi nu vevi aɖe si akpe ɖe mía ŋu be dzi nanɔ mía ƒo la dzi le Psalmo 27:2, 3. (Mixlẽe.) David ɖo ŋku nudzɔdzɔ siwo me Yehowa xɔ nɛ le la dzi. (1 Sam. 17:34-37) Ŋkuɖoɖo nu mawo dzi na dzideƒoe wòte ŋu kpe akɔ kple nɔnɔme siwo gasesẽ wu. Ðe nèɖoa ŋku ale si Yehowa kpe ɖe ŋuwò va yi la dzia, eye ɖe esia naa dzi ɖoa ƒowòa? Le kpɔɖeŋu me, ɖe nèdo gbe ɖa vevie tso kuxi aɖe si doa nuxaxa na wò la ŋu eye nèkpɔ ale si Yehowa na nunya kple ŋusẽ wò nètsɔ kpe akɔ kpliia? Alo ɖe nèɖo ŋku ale si Yehowa ɖe nane si wɔe be mète ŋu nɔ esubɔm kple dzidzɔ o la ɖa, alo ale si wòʋu dɔwɔwɔ ƒe ʋɔtru gã aɖe na wò la dzia? (1 Kor. 16:9) Dɔ kae ŋkuɖoɖo nu siawo dzi wɔna ɖe dziwò fifia? Ðe esiawo menaa kakaɖedzi wò ɣesiaɣi be Yehowa ate ŋu akpe ɖe ŋuwò nàɖu mɔxenu siwo gasesẽ wu la dzi alo ana nàdo dzi le dodokpɔ siwo nu sẽ wu la me oa?—Rom. 5:3-5.
6 Ne dziɖuɖu sẽŋu aɖe ɖoe be yeatsrɔ̃ Yehowa Ðasefowo ƒe habɔbɔ bliboa ɖa ya ɖe? Le míaƒe ŋkekeawo me la, dziɖula geɖe tee kpɔ be yewoawɔ esia gake medze edzi o. Ŋkuɖoɖo ale si Yehowa kpe ɖe eƒe amewo ŋu va yi dzi ana dzideƒo mí be míado dzi le nu sia nu si adzɔ le etsɔme la me.—Dan. 3:28.
LƆ̃ TADEDEAGU VAVÃTƆ LA
7, 8. (a) Le Psalmo 27:4 ƒe nya nu la, nu kae David bia Yehowa? (b) Nu kae nye Yehowa ƒe gbɔgbɔmegbedoxɔ gã la, eye aleke míesubɔna le afi ma?
7 Nu vevi bubu aɖe si naa míewɔa nu dzinɔameƒotɔe lae nye lɔlɔ̃ si le mía si na tadedeagu vavãtɔa. (Mixlẽ Psalmo 27:4.) Le David ƒe ŋkekea me la, avɔgbadɔa ye nye “Yehowa ƒe me.” David ŋutɔ ye wɔ ɖoɖo ɖe gbedoxɔ gã dzeani si viaŋutsu Salomo va tu la ŋu. Ƒe alafa geɖe megbe la, Yesu va ɖee fia be ɣeyiɣi aɖe le vava ge si me magahiã be woayi gbedoxɔ gã aɖe me hafi ade ta agu na Yehowa o. (Yoh. 4:21-23) Apostolo Paulo ɖe eme le Hebritɔwo ta 8 va se ɖe 10 be woɖo gbɔgbɔmegbedoxɔ gã aɖe anyi le Yesu ƒe nyɔnyrɔxɔɣi le ƒe 29 M.Ŋ. me, esime wòtsɔ eɖokui na be yeawɔ Yehowa ƒe lɔlɔ̃nu. (Heb. 10:10) Gbɔgbɔmegbedoxɔ gã siae nye ɖoɖo si Yehowa wɔ be míate ŋu asubɔ ye wòadze ye ŋu to Yesu ƒe tafevɔsa la dzi xɔxɔ se me. Ke aleke míesubɔna le gbɔgbɔmegbedoxɔ sia me? Míewɔa esia ne míetsɔa ‘dzi nyateƒetɔwo tena ɖe Mawu ŋu le gbedodoɖa me le xɔse ƒe kakaɖedzi blibo me’; ne míeʋua míaƒe mɔkpɔkpɔ me le dutoƒo dzinɔameƒotɔe; ne míebua mía hati tadeagulawo ŋu, doa ŋusẽ wo hedea dzi ƒo na wo le hame ƒe kpekpewo kpakple ƒome tadedeagu me. (Heb. 10:22-25) Ŋudzedzekpɔkpɔ ɖe tadedeagu vavãtɔ ƒe ɖoɖo sia ŋu doa ŋusẽ mí le ŋkeke mamlɛ sesẽ siawo me.
8 Le xexea me katã la, Yehowa subɔla wɔnuteƒewo le geɖe wu wɔm le gbeƒãɖeɖedɔa me, wole gbegbɔgblɔ yeyewo srɔ̃m, eye wole ʋuʋum le afi siwo Fiaɖuƒegbeƒãɖela geɖe wu hiã le la yim. Woto esia me le eɖem fia be, abe hakpala la ene la, nu ɖeka ko yewobia Yehowa. Eyae nye be yewoakpɔ “Yehowa ƒe vivisesewo katã kple ŋku.” Wodi be yewoasubɔ Yehowa, nu ka kee ɖadzɔ o.—Mixlẽ Psalmo 27:6.
KA ÐE EDZI BE MAWU AKPE ÐE ŊUWÒ
9, 10. Gɔmesese kae le kakaɖedzi si wona mí le Psalmo 27:10 la ŋu?
9 David gblɔ ale si gbegbe wòka ɖe edzi be Yehowa akpe ɖe ye ŋu la eme kɔ nyuie ale: “Ne fofonye kple danye gblẽm ɖi hã la, Yehowa axɔm.” (Ps. 27:10, NW) Ne míexlẽ nuŋlɔɖi si le 1 Samuel ta 22 la, míade dzesii be David dzilawo megblẽe ɖi o. Ke hã egbea la, ame geɖewo ƒe ƒometɔwo gbe wo kura. Gake ame siwo wogbe alea la dometɔ geɖe va kpɔ kpekpeɖeŋu kple takpɔkpɔ le Kristo hame lɔ̃ame la me.
10 Esi Yehowa le klalo be yeakpe ɖe ye subɔlawo ŋu ne ame bubuwo gblẽ wo ɖi ta la, ɖe makpe ɖe wo ŋu hã le tetekpɔ bubu ƒomeviwo me oa? Le kpɔɖeŋu me, ne míetsi dzimaɖi le ale si míawɔ akpɔ míaƒe ƒomea ƒe nuhiahiãwo gbɔ na wo ŋu la, ɖe míate ŋu aka ɖe edzi be Yehowa akpe ɖe mía ŋu oa? (Heb. 13:5, 6) Esea nɔnɔme siwo me tom esubɔla wɔnuteƒe ɖe sia ɖe le la gɔme eye wònya woƒe nuhiahiãwo hã.
11. Dɔ kae míaƒe ŋuɖoɖo ɖe Yehowa ŋu ate ŋu awɔ ɖe ame bubuwo dzi? Wɔ eƒe kpɔɖeŋu.
11 De ŋugble le nu si me Victoria, si nye Biblia nusrɔ̃vi aɖe si le Liberia, to la ŋu kpɔ. Esime wònɔ ŋgɔyiyi wɔm ɖo ta nyɔnyrɔxɔxɔ gbɔ la, ŋutsu si woa kplii woli la gblẽ eya kple via etɔ̃awo ɖi. Togbɔ be eva zu aƒemanɔsitɔ eye dɔwɔɖui aɖeke menɔ esi o hã la, eyi edzi nɔ gbɔgbɔmeŋgɔyiyi wɔm. Le Victoria ƒe nyɔnyrɔxɔxɔ megbe la, vianyɔnuvi si xɔ ƒe 13 la fɔ gakotoku aɖe si me ga gbogbo aɖe le. Esi womedi be gaa nazu tetekpɔ na yewo o ta la, wotso nya me be yewomaxlẽe kpɔ gɔ̃ hã o. Ke boŋ wowɔ kaba di asrafo si tɔ gakotokua nye la. Ŋutsua gblɔ na wo be, ne amewo katã nye anukwareɖilawo abe Yehowa Ðasefowo ene la, xexea me anye teƒe nyui aɖe si ŋutifafa geɖe wu anɔ. Victoria tsɔ Yehowa ƒe ŋugbedodo si ku ɖe xexe yeyea ŋu la fia asrafoa le Biblia me. Esi Victoria ƒe anukwareɖiɖia wɔ nuku na asrafoa ŋutɔ ta la, eɖe ga gbogbo aɖe le gakotokua me nae. Amewo nya Yehowa Ðasefowo le xexea me godoo be woɖia anukware ɣesiaɣi. Nu si na woɖia anukware ye nye be woka ɖe edzi bliboe be Yehowa akpɔ yewoƒe nuhiahiãwo gbɔ na yewo.
12. Nu ka tae míeyia edzi subɔa Yehowa ne dɔ ge le mía si alo wotafa mí gɔ̃ hã? Wɔ eƒe kpɔɖeŋu.
12 Bu ale si Thomas, si nye gbeƒãɖela maxɔnyɔnyrɔ aɖe si le Sierra Leone la, hã ase le eɖokui me ŋu kpɔ. Ezu nufiala le sekɛndrisuku aɖe, gake womexe fe nɛ o anɔ abe ƒe ɖeka kloe ene va se ɖe esime wowu eƒe xɔxɔɖedɔme ƒe agbalẽwo wɔwɔ nu. Nu kae nye nudidi mamlɛtɔ si gbɔ wòle be Thomas naɖo hafi woate fexexe nɛ eye wòaxɔ eƒe ga siwo katã le sukua? Eyae nye be sukua dzikpɔla, si nye nunɔla aɖe, nabia gbee. Nunɔlaa gblɔ nɛ be Yehowa Ðasefowo ƒe dzixɔsewo mewɔ ɖeka kple sukua ƒe nudidiwo o. Eya ta egblɔ na Thomas be, mate ŋu anye Yehowa Ðasefo agakpɔtɔ anɔ dɔ wɔm le sukua o. Thomas ɖe asi le dɔa ŋu togbɔ be mexɔ ƒe ɖeka kloe ƒe fetu si wòle be woaxe nɛ la o hã. Ekpɔ dɔ bubu, si nye radio kple asitelefon dzadzraɖo. Kpɔɖeŋu sia kple etɔgbi bubuwo ɖee fia be, ne míeɖoa ŋu ɖe Yehowa ŋu la, mele be míavɔ̃ gbeɖe be hiã atu mí o. Esi wònye be eyae nye nuwo katã Wɔla eye wòkpɔa eƒe amewo ta ɣesiaɣi ta la, míeka ɖe edzi be akpɔ míaƒe nuhiahiãwo gbɔ na mí.
13. Nu ka tae nɔvi siwo le dukɔ dahewo me la le Fiaɖuƒegbeƒãɖeɖedɔa wɔm dzonɔamemetɔe?
13 Le dukɔ geɖe siwo me ganyawo le sesẽm ŋutɔ le me la, zi geɖe la, Fiaɖuƒegbeƒãɖelawo ɖea gbeƒã kple dzonɔameme ale gbegbe. Nu ka tae wòdzɔna alea? Alɔdzedɔwɔƒe aɖe ka nya ta be: “Dɔwɔɖui mele ame geɖe siwo lɔ̃na be woasrɔ̃ Biblia kpli yewo la si o, eya ta ɣeyiɣi geɖe nɔa wo si le ŋkeke me wotsɔ srɔ̃a nu. Ɣeyiɣi geɖe nɔa nɔviawo hã si wotsɔ ɖea gbeƒãe. Vevietɔ la, mehiã be woagblɔ na ame siwo le nuto siwo me nɔnɔmeawo gasesẽ le wu me la be ŋkeke mamlɛwo mee míele o; woawo ŋutɔwo le nu sia nu teƒe kpɔm xoxo.” Dutanyanyuigblɔla aɖe, si le subɔsubɔm ƒe 12 kple edzivɔ le dukɔ aɖe si me gbeƒãɖela ɖe sia ɖe wɔa Biblia nusɔsrɔ̃ siwo wu etɔ̃ le mama dedie nu me la, ŋlɔ bena: “Esi wònye be gbeƒãɖela geɖe nɔa agbe tsɛ eye susuhenuwo mebɔ o ta la, zi geɖe la, wokpɔa ɣeyiɣi geɖe wu ɖe gbeƒãɖeɖe kple Biblia nusɔsrɔ̃wo wɔwɔ ŋu.”
14. Mɔ kawo nue Mawu akpɔ ameha gã la ta le?
14 Yehowa do ŋugbe be yeakpe ɖe yeƒe amewo ŋu abe ƒuƒoƒo ene, yeakpɔ wo ta ahaɖe wo le ŋutilãme kple gbɔgbɔ me siaa, eye míeka ɖe edzi be awɔe hã. (Ps. 37:28; 91:1-3) Ameha gã aɖe ŋutɔe le agbe tsi ge le “xaxa gã la” me. (Nyaɖ. 7:9, 14) Eya ta woakpɔ ameha gã ma ta abe ƒuƒoƒo ene le ŋkeke mamlɛawo ƒe akpa susɔea katã me be woagatsrɔ̃ wo o. Yehowa ana nu sia nu si wohiã be woado dzi le dodokpɔwo me eye woakpɔ woa kplii dome ƒomedodoa ta la wo. Eye le xaxa gã la ƒe akpa mamlɛa katã me la, Yehowa akpɔ eƒe amewo ta.
“YEHOWA, FIA WÒ MƆM”
15, 16. Ne míewɔ ɖe mɔfiame siwo Mawu naa mí dzi la, aleke wòɖea vi na míi? Wɔ eƒe kpɔɖeŋu.
15 Ne míedi be dzi nakpɔtɔ anɔ mía ƒo la, ele be míaɖe mɔ be Mawu nayi edzi anɔ eƒe mɔ fiam mí. Esia dze ƒãa le koko si David ƒo na Mawu la me be: “Yehowa, fia wò mɔm, eye nàkplɔm to toƒe sɔsɔe le nye futɔwo ta!” (Ps. 27:11) Nuwɔwɔ le ɖekawɔwɔ me kple gbedodoɖa sia bia be míayi edzi anɔ to lém ɖe Biblia me mɔfiame ɖe sia ɖe si míaxɔ to Yehowa ƒe habɔbɔa dzi la ŋu nyuie ahawɔ ɖe edzi enumake. Ame geɖe siwo xe wo ŋu fewo eye wodzra nunɔamesi siwo womehiã o la ate ŋu agblɔ kple kakaɖedzi be wɔwɔ ɖe aɖaŋu si woɖo na mí be míanɔ agbe tsɛ la dzi ɖe vi na yewo esime ganyawo sesẽ le ƒe siwo va yi nyitsɔ laa me. Eya ta azɔ la, mehiã be woayi edzi anɔ fe xem ɖe nuzazã siwo mehiã o la ta o, eye wovo be woakeke woƒe subɔsubɔdɔa ɖe enu. Enyo be mía dometɔ ɖe sia ɖe nabia eɖokui be, ‘Ðe mewɔna ɖe mɔfiame ɖe sia ɖe si mexlẽna le Biblia kple kluvi nuteƒewɔla kple aɖaŋudzela ƒe haa ƒe agbalẽwo me dzi enumake ne esia wɔwɔ bia be matsɔ nu geɖewo asa vɔe gɔ̃ hã?’—Mat. 24:45.
16 Ne míeɖe mɔ Yehowa fia mɔ mí eye wòkplɔ mí to toƒe sɔsɔe la, susu aɖeke manɔ anyi si tae míavɔ̃ ɖo o. Esi gbesiagbe mɔɖela aɖe si le United States la bia be yeawɔ dɔ aɖe si akpe ɖe eŋu be eƒe ƒome bliboa nayi ɣeyiɣiawo katã ƒe subɔsubɔdɔa dzi la, eƒe dɔmemegã gblɔ nɛ be esi wònye be mede yunivɛsiti o ta la, womate ŋu atsɔ dɔ ma nae gbeɖe o. Ne dziwòe nu sia dzɔ ɖo la, ɖe wòave wò be yemede yunivɛsiti o, ke boŋ yetiae be yeawɔ ɣeyiɣiawo katã ƒe subɔsubɔdɔa? Kwasiɖa eve megbe la, wonya dɔmemegã ma le dɔa me, eye dɔmemegã yeyea bia nɔviŋutsua be taɖodzinu kawoe le esi mahã. Eɖe eme nɛ enumake be Yehowa Ðasefowo ƒe ɣeyiɣiawo katã ƒe subɔlawoe ye kple ye srɔ̃ yewonye, eye yewodi be yewoayi edzi nenema. Esi nɔviŋutsua mekpɔ ɖe nu le nyaa me o la, dɔmemegãa gblɔ be: “Menya be wò ya èto vovo! Esime fofonye nɔ eƒe kuba dzi la, miaƒe hametɔ eve va srãnɛ kpɔ gbe sia gbe hexlẽa Biblia nɛ. Meka atam na ɖokuinye be, ne mɔnukpɔkpɔ aɖe su asinye be makpe ɖe Yehowa Ðasefo aɖe ŋu la, mawɔe godoo.” Le ŋufɔke la, wotsɔ dɔ si tututu dɔmemegã tsãtɔa gbe be yematsɔ ana nɔviŋutsua o la nae. Vavãe, ne míetsɔ Fiaɖuƒea ƒe nuwo ɖo nɔƒe gbãtɔ la, Yehowa hã awɔ ŋugbe si wòdo na mí be yeakpɔ míaƒe ŋutilãmenuhiahiãwo gbɔ na mí la dzi.—Mat. 6:33.
XƆSE KPLE MƆKPƆKPƆ LE VEVIE
17. Nu kae akpe ɖe mía ŋu míakpɔ mɔ na etsɔme kple kakaɖedzi?
17 David na míekpɔ nu si tae xɔse kple mɔkpɔkpɔ le vevie ɖo la dze sii esi wògblɔ be: “Ne nyemehexɔe se be, makpɔ Yehowa ƒe nu nyuiwo le agbagbeawo ƒe anyigba dzi o fĩ!” (Ps. 27:13) Le nyateƒe me la, aleke agbea anɔ na mí ne ɖe Mawu mena mɔkpɔkpɔ mí o eye míenya nya siwo me míedzro le Psalmo 27 lia me o! Ekema mina míayi edzi anɔ gbe dom ɖa anɔ Yehowa biam be wòado ŋusẽ mí le nuwuɣi sia me eye wòaɖe mí le Harmagedon me.—Mixlẽ Psalmo 27:14.
[Nɔnɔmetata si le axa 23]
Dzi nɔ David ƒo esi wòɖo ŋku ale si Yehowa xɔ nɛ va yi la dzi
[Nɔnɔmetata si le axa 25]
Ne ganyawo le sesẽm la, ɖe míekpɔnɛ be eʋua mɔnukpɔkpɔ ɖi na mí be míakeke míaƒe subɔsubɔdɔa ɖe enua?