“Ahom me Dzedze Ayi Ƒu Dzi”

ÐE MÀBU afɔɖeɖe ma be mesɔ o, eye wònye bometsinu si me afɔku ate ŋu anɔ oa? Gake ame aɖewo dea wo ɖokui nɔnɔme ma ƒomevi me le kpɔɖeŋumɔ nu. Le mɔ ka nu? Ƒe alafa 17 lia me agbalẽŋlɔla Englandtɔ Thomas Fuller gblɔ be: “Mègawɔ naneke le dziku me o. Esɔ kple ahom me dzedze ayi ƒu dzi.”

Nuwɔwɔ le dziku si nu womelé o me ate ŋu ahe afɔku gãwo vɛ. Nudzɔdzɔ aɖe si ŋu nya woŋlɔ̃ ɖe Biblia me ɖo kpe esia ƒe nyateƒenyenye dzi. Blemafofo Yakob viŋutsu eve siwo nye Simeon kple Lewi wɔ nu le dziku me be yewoabia hlɔ̃ ɖe yewo nɔvinyɔnu Dina si wogblẽ la ta. Nusi do tso emee nye ame gbogbo aɖe si wowu kple nuwo dome gbegblẽ. Mewɔ nuku o be Yakob ƒo nu tsi tre ɖe ŋutasẽnu si wowɔ ŋu be: ‘Miehe dzɔgbevɔ̃e va dzinye, eye anyigbadzinɔlawo além ɖe fu me.’—Mose I, 34:25-30.

Mawu ƒe Nya Biblia ɖo aɖaŋu nunyatɔe be míawɔ nusi to vovo na ema. Egblɔ be: “Wò dɔmedzoe nu nefa, eye nadzudzɔ dzikudodo; dzi megaku wò o, elabena nu vɔ̃ɖi ko nayi wɔwɔ ge!” (Psalmo 37:8) Aɖaŋuɖoɖo ma dzi wɔwɔ ate ŋu axe mɔ ɖe nuvɔ̃ gãwo nu.—Nyagblɔla 10:4; kpɔ Lododowo 22:24, 25 hã.