Sɔhɛwo Biana Be . . .

Aleke Mawɔ Anɔ Te Ðe Dɔléle Alea Gbegbe Nu?

TOGBƆ be ƒe 18 koe Jason xɔ hã la, ewɔ abe ɖe eƒe agbemetaɖodzinuwo katã tsi akpo dzi ene. Enɔ mɔ kpɔm be yeanye Kristotɔ subɔla asubɔ ɣeyiɣiawo katã hafi, gake eva kpɔe be Crohn-dɔ nɔ ye ŋu—si nye dɔmedɔ vɔ̃ɖi aɖe si na wosea veve heliheli. Gake fifia la, Jason te ŋu le akɔ kpem kple eƒe kuxia dzidzedzetɔe.

Ðewohĩ wò hã èle dɔléle sesẽ aɖe ƒe fu kpem. Wodzro kuxi siwo dzea ŋgɔ sɔhɛwo abe wò ke ene la me le Nyɔ! ƒe tata aɖe si va yi me.a Azɔ na míakpɔ alesi nàte ŋu akpɔ wò nɔnɔmea gbɔ wòanyo wui ɖa.

Nukpɔsusu Nyui ƒe Amesinɔnɔ

Ele be nukpɔsusu nyui nanɔ asiwò hafi nàte ŋu anɔ te ɖe dɔléle ɖesiaɖe nu dzidzedzetɔe. Biblia gblɔ be: “Ŋutsu ƒe dzidodo tsɔa eƒe fukpekpewo, ke ne wɔna vɔ le dzidodo ŋu la, ameka atsɔ eya?” (Lododowo 18:14) Ne èwɔa susu ɖaa be dɔlélea maka ɖe eme na ye o ke boŋ ɖeko wòasesẽ ɖe edzi la, ke asesẽ be dɔlélea navɔ. Jason kpɔe be nya sia le eteƒe.

Gbã la, ele be Jason nawɔ avu kple seselelãme gbegblẽwo abe dzikudodo ene, siwo na wòléa blanui. Nukae kpe ɖe eŋu? Egblɔ be: “Gbetakpɔxɔ kple Nyɔ! me nyati siwo ƒo nu tso blanuiléle ŋue kpe ɖe ŋunye vavã be nukpɔsusu nyui su asinye. Nusi ŋkeke ɖesiaɖe ahe vɛ nue medzea agbagba be manɔ te ɖo azɔ.”b

Carmen si xɔ ƒe 17 hã kpɔe be ele be yeatsɔ susu nyui akpɔ nuwoe. Togbɔ be ʋuvɔlelãmedɔ le eŋu hã la, nusiwo de edzi ŋue wòbuna. Egblɔ be: “Mebua tame le amesiwo ƒe nɔnɔme sesẽ wu tɔnye kple amesiwo mete ŋu wɔa nusiwo mete ŋu wɔna o la ŋu. Eye medaa akpe ɖe eta eye nye nu mewɔa nublanui na ɖokuinye o.”

Lododowo 17:22 gblɔ be: “Dzi kpɔdzidzɔ nana lãme hayana.” Ame aɖewo asusu be manyo be woako nu ne dɔ sesẽ aɖe dze ame dzi o. Gake nukokoedoame si sɔ kple hadede nyui ana wò susu nadze akɔ anyi eye wòade agbe mewò ɖe edzi. Le nyateƒe me la, dzidzɔ nye mawumenɔnɔme aɖe si nye Mawu ƒe gbɔgbɔa ƒe kutsetsewo dometɔ ɖeka. (Galatiatɔwo 5:22) Gbɔgbɔ ma ate ŋu ana dzi nanɔ dzɔwòm togbɔ be dɔléle aɖe anɔ fu ɖem na wò hã.—Psalmo 41:4.

Ðɔkta si Sea Nu Gɔme Didi

Ne ɖɔkta si sea nu gɔme na sɔhɛwo le asiwò la, akpe ɖe ŋuwò ŋutɔ. Zi geɖe la, susu kple seselelãme gome kpekpeɖeŋu si sɔhɛwo hiã la to vovo na ame tsitsiwo tɔ. Ƒe ewo koe Ashley xɔ esime wòhiã be woakplɔe ayi kɔdzi bene woawɔ atike nɛ le ahɔhɔ̃ me nutete vɔ̃ɖi aɖe ta. Ashley ƒe ɖɔkta tsɔ dɔmetɔtrɔ kpɔ egbɔ eye wòkpɔ egbɔ le alesi wòase nyawo gɔmee nu. Egblɔ alesi eya ŋutɔ ƒe ɖevime dɔléle ʋãe be wòva zu ɖɔkta la na Ashley. Ðɔktaa tsɔ gbe bɔbɔe ɖe nu me nɛ gake ena atike si wogbɔna wɔwɔ ge nɛ la me kɔ nɛ nyuie, ale be Ashley nya nusi gbɔna dzɔdzɔ ge.

Mia kple dziwòlawo miadi be yewoadi atikewɔla siwo ade bubu ŋuwò eye woase wò nuhiahiãwo gɔme na wò. Ne nane tae alesi wole gbɔwò kpɔm mekɔ lãme na wò tututu o la, ke gblɔ wò kuxiwo na dziwòlawo faa.

Ʋli Wò Lãmesẽ Ta!

Ehiã hã be nàdze agbagba ɖesiaɖe si nàte ŋui awɔ avu kple wò dɔlélea. Le kpɔɖeŋu me, srɔ̃ nusianu si nàte ŋui tso wò nɔnɔmea ŋu. Biblia me lododo aɖe gblɔ be: “Ŋutsu nugɔmesela ɖea ŋusẽ fiana.” (Lododowo 24:5) Sidzedze aɖe vɔvɔ̃ na nusi mènya o la ɖa.

Gakpe ɖe eŋu la, sɔhɛ si nya nu tso dɔ si wɔm wole nɛ ŋu la ate ŋu atsɔ eɖokui ana geɖe awu eye wòate ŋu awɔ nu aduadu wu. Le kpɔɖeŋu me, anya be mele be yeadzudzɔ atike aɖe nono esi eƒe ɖɔkta megblɔ be wòadzudzɔ hafi o. Carmen si míeyɔ va yi la xlẽ agbalẽ siwo ƒo nu tso ʋuvɔlelãmedɔ ŋu, eye edzilawo hã xlẽe. Nusi woxlẽ la kpe ɖe wo ŋu wodi atike si nyo na Carmen wu.

Ne nanewo me mekɔ na wò o la, bia wò ɖɔkta tẽ—biae wu zi ɖeka ne ehiã. Le esi teƒe be nàgblɔ nya si nèsusu be ɖɔktaa adi be yease la, kɔ dzi me nàgblɔ nusi nèsusu kple alesi nèle sesem le ɖokuiwò me la nɛ. Abe alesi Biblia gblɔe ene la, “afisi aɖaŋudede mele o la, tameɖoɖowo tsia akpo dzi.”—Lododowo 15:22.

Le ɣeaɖeɣi la, edze abe Ashley mekɔa nu le eƒe dɔlélea dzi na ame aɖeke o ene. Dadaa koe wòƒoa nu tso eŋu na. Hadomekpekpeɖeŋudɔwɔla dzeaɖaŋu aɖe biae dzaa be: “Ðe wòwɔna na wò be womele nya sia nya gblɔm na ye oa?” Ashley ʋu eme nɛ be nenemae nyaa le. Eyata nyɔnua tsɔ Ashley ƒe kɔdzigbalẽwo fiae eye wòɖe nuwo me nɛ. Egblɔ na ɖɔktaawo be woakpɔ vovo geɖe ɖe Ashley ŋu wu, le esi teƒe be woanɔ eŋu nyawo gblɔm na edzilawo ɖeɖeko. Esi Ashley gblɔ nusi tututu le eƒe dzi me mlɔeba ta la, wote ŋu na kpekpeɖeŋu si hiã lae.

Wò Ame Nyanyɛwo ƒe Kpekpeɖeŋu

Ne ƒome aɖe me tɔ ɖeka dze dɔ vevie la, eva zua ƒome bliboa ƒe nya, eye wòbia amesiame ƒe agbagbadzedze. Ashley ƒe ƒomea me tɔwo kple Kristo-hamea wɔ ɖeka kpe ɖe eŋu. Woɖoa ŋku edzi na hamea me tɔwo enuenu be ele kɔdzi. Hamea me tɔwo va srãnɛ kpɔna enuenu, eye wokpena ɖe ƒomea me tɔwo ŋu le aƒemedɔwo kple nuɖaɖa me vaseɖe esime ƒomea me tɔwo ŋutɔwo gadze woƒe dɔwo gɔme abe tsã ene. Ðevi siwo le hamea me va srãa Ashley kpɔna le kɔa dzi nenye be dɔa mesesẽ nɛ akpa be mahiã be woakpɔe ɖa o. Menye Ashley koe nusia nyo na o ke enyo na etɔ ɖeviawo hã.

Gake hafi amewo akpe ɖe ŋuwò la, ele be woanya be èhiã kpekpeɖeŋu. Carmen nɔ mɔ kpɔm be ye dzilawo kple hamemegãwo ado ŋusẽ ye le seselelãme kple gbɔgbɔ me. Eɖoa ŋu ɖe amesiwo le woƒe suku siwo ƒe Kristotɔnyenye ƒe dzixɔsewo sɔ kple etɔ la ŋu be woakpe ɖe ye ŋu. Carmen gblɔ be: “Wotsia dzi ɖe ŋunye, eye mese le ɖokuinye me be wotsɔ ɖe le eme nam.”

Miaƒe suku ate ŋu aɖo aɖaŋu na wò tso atikewɔwɔ kple gakpekpeɖeŋuxɔxɔ siwo akpe ɖe ŋuwò la ŋu eye ɖewohĩ woawo ŋutɔ hã ana kpekpeɖeŋu aɖewo wò. Le kpɔɖeŋu me, Ashley ƒe nufiala de dzi ƒo na eƒe sukuhatiwo be woaŋlɔ agbalẽ aɖo ɖe Ashley eye be woayi aɖasrãe kpɔ. Ne wò nufialawo menya fu siwo kpem nèle o la, ke ɖewohĩ ahiã be dziwòlawo naɖe nyaa me na sukutatɔwo bubutɔe.

Zã Wò Susu Kple Ametia le Nunya Me

Ne èdze dɔ vevie la, naneke meli nàwɔ wu be nàzã ŋusẽ ɖesiaɖe si gale ŋuwò bene wò lãme naka ɖe eme o. Ne mètsi afi ɖeka o la, nu geɖe li nàte ŋu awɔ siwo aɖe vi. Agbalẽŋlɔla Jill Krementz gblɔ nusi wòde dzesii esime wònɔ numekuku wɔm na eƒe agbalẽ si nye How It Feels to Fight for Your Life be: “Le ƒe eve siwo katã mezã tsɔ nɔ tsa ɖim to xɔwo nu le kɔdzi la, alesi ɖevi geɖe kea ŋku ɖi nɔa television kpɔm la wɔa nublanui nam. Ehiã be míade dzi ƒo na ɖevi siawo be woaxlẽ nu geɖe awu. Dɔbadzi nye teƒe nyui aɖe si wòle be míana míaƒe ahɔhɔ̃ nade kame le.”

Ne aƒeme alo kɔdzie nèɖale o, zi geɖe la, wò susu ƒe ŋutetewo ŋudɔwɔwɔ akpe ɖe ŋuwò be wò lãme naka ɖe eme. Ète lɛta alo hakpanyawo ŋɔŋlɔ kpɔa? Ke nutata ya ɖe? Ne wò nɔnɔmea ɖe mɔ ɖe, ète haƒonu aɖe ƒoƒo sɔsrɔ̃ kpɔa? Ne wò lãme gblẽ gɔ̃ hã la, nu geɖe li nàte ŋu awɔ. Nyateƒe wònye be nu nyuitɔ kekeake si nàte ŋu awɔe nye be nàna gbedodoɖa na Mawu kple eƒe Nya, Biblia la xexlẽ nazu numãme na wò.—Psalmo 63:7.

Ne wò nɔnɔmea aɖe mɔ la, kamedede si sɔ hã ate ŋu akpe ɖe ŋuwò be wò lãme naka ɖe eme. Le susu sia ta atikewɔƒe aɖewo wɔ ɖoɖo ɖe dɔdada to kamedede me na ɖevi dɔnɔwo. Le go geɖe me la, menye ɖeko kamedede si sɔ la daa dɔ na ŋutilã la ko o, ke ana agbe naɖo mewò hã.

Mègana Ta O!

Esime Yesu nɔ fu kpem vevie la, edo gbe ɖa na Mawu, eɖo ŋu ɖe Eŋu, eye eƒe susu katã nɔ dzidzɔ si wòava kpɔ le etsɔme ŋu boŋ wu veve si sem wònɔ. (Hebritɔwo 12:2) Esrɔ̃ nu tso eƒe fukpekpe sesẽawo me. (Hebritɔwo 4:15, 16; 5:7-9) Exɔ kpekpeɖeŋu kple dzideƒoname. (Luka 22:43) Ame bubuwo ƒe nyonyo ŋue eƒe susu nɔ tsɔ wu eya ŋutɔ ƒe xaxawo ŋu.—Luka 23:39-43; Yohanes 19:26, 27.

Togbɔ be ànɔ dɔ lém hã la, wò hã àte ŋu ade dzi ƒo na ame bubuwo. Ashley nɔvinyɔnu Abigail, si tsi wui la ŋlɔ suku ƒe nyatakaka aɖe be: “Amesi ƒe nu nyoa ŋunye wue nye nɔvinyenyɔnua. Togbɔ be ele be wòayi kɔdzi eye woado nuwo nɛ to eƒe ʋuka me eye wodoa abui geɖe nɛ hã la, eɖoa nukomo ɣesiaɣi!”c

Jason meɖe asi le eƒe taɖodzinuwo ŋu o, ɖeko wòtrɔ asi le wo ŋu vie. Fifia la, eƒe taɖodzinue nye be yeasubɔ le afisi Mawu Fiaɖuƒea ƒe gbeƒãɖelawo hiã le wu. Ðewohĩ màte ŋu awɔ nusianu si nèdi be yeawɔ o, abe alesi wònɔ le Jason gome ene. Nusi le vevie enye be nànɔ agbe wòasɔ ɖe wò ŋutetewo nu, nàgawɔ vi na ɖokuiwò akpa alo agbe ŋuɖɔɖɔɖo o. Ðo ŋu ɖe Yehowa ŋu be wòana nunya kple ŋusẽ wò be nàwɔ nusianu si nàte ŋui. (Korintotɔwo II, 4:16; Yakobo 1:5) Eye ɖo ŋku edzi be ɣeyiɣi gbɔna esime anyigba katã dzi azu paradiso, afisi “duametɔ aɖeke magblɔ be, yele dɔ lém o.” (Yesaya 33:24) Ẽ, wò lãme agasẽ gbeɖeka!

[Etenuŋɔŋlɔwo]

[Nɔnɔmetata si le axa 25]

Ashley ƒe dzideƒo nyoa eda Abigail ŋu