Yehowa Ðoa Eteƒe Na Ame Siwo Dinɛ Vevie

1, 2. (a) Kadodo kae le lɔlɔ̃ kple xɔse dome? (b) Biabia kawo mee míadzro?

MÍELƆ̃ Yehowa, elabena ‘etre mí lɔlɔ̃.’ (1 Yoh. 4:19) Mɔ siwo nu Yehowa ɖenɛ fiana le be yelɔ̃ ye subɔla wɔnuteƒewo dometɔ ɖekae nye be eyraa wo. Ne míaƒe lɔlɔ̃ na Mawu le dzidzim ɖe edzi la, míaƒe xɔse hã dzina ɖe edzi. Menye ɖeko míexɔnɛ sena be eli o, ke míekana ɖe edzi hã be eɖoa eteƒe na ame siwo wòlɔ̃ la kokoko.—Xlẽ Hebritɔwo 11:6.

² Nu siwo ɖe dzesi le Yehowa ŋu dometɔ ɖekae nye be enye teƒeɖola. Eƒe amenyenyea ƒe akpa vevi aɖee esia nye. Ne míexɔe se be Mawu aɖo eteƒe na ame siwo dinɛ vevie o la, míaƒe xɔsea made edeƒe o, elabena “xɔse nye dziɖoɖo ɖe nu si wole mɔ kpɔm na la ŋu kakaɖedzitɔe.” (Heb. 11:1) Ɛ̃, xɔse bia be ame naka ɖe edzi be yayra siwo ƒe ŋugbe Mawu do la ava eme godoo. Ke aleke mɔkpɔkpɔ na teƒeɖoɖo ɖea vi na mí? Aleke Yehowa yra esubɔla siwo nɔ anyi le blema kple egbea siaa. Na míakpɔe ɖa.

 3. Ŋugbedodo kae dze le Malaki 3:10?

³ Yehowa Mawu ɖoe eɖokui dzi be yeaɖo eteƒe na ye subɔla wɔnuteƒewo, eya ta ekpea mí be míawɔ nu siwo ana yeayra mí. Yehowa gblɔ be: ‘Midom kpɔ be nyemaʋu dziƒowo ƒe tsigbowo na mi, eye nyemadudu yayra akɔ ɖe mia dzi va se ɖe esime naneke magahiã mi o hã.’ (Mal. 3:10) Nya mawo dzi wɔwɔ ɖea ale si gbegbe míekpɔ ŋudzedze ɖe Yehowa ƒe amekpekpea ŋui fiana.

 4. Nu ka tae míate ŋu aka ɖe Yesu ƒe nya si dze le Mateo 6:33 la dzi?

⁴ Yesu ka ɖe edzi na eƒe nusrɔ̃lawo be ne wotsɔ Fiaɖuƒea ɖo nɔƒe gbãtɔ la, Mawu akpe ɖe wo ŋu. (Xlẽ Mateo 6:33.) Kakaɖedzi le Yesu ƒe ŋugbedodoa ŋu, elabena Yehowa ƒe nya ɖe sia ɖe vaa eme bliboe. Yesu nyae be Mawu ƒe ŋugbedodowo medoa kpo emevava gbeɖe o. (Yes. 55:11) Míawo hã míeka ɖe edzi be ne míexɔ Yehowa dzi se tso dzi blibo me la, ŋugbe si wòdo be, “Nyemaɖe asi le ŋuwò akpɔ o, eye nyemagblẽ wò ɖi hã akpɔ o” la ava eme na mí. (Heb. 13:5) Ŋugbedodo ma na míeka ɖe nya si Yesu gblɔ be ne míetsɔ Fiaɖuƒea kple Mawu ƒe dzɔdzɔenyenye ɖo nɔƒe gbãtɔ la, woatsɔ nu bubuawo akpe ɖe eŋu na mí la dzi.

 5. Nu ka tae nya si Yesu gblɔ tsɔ ɖo nya ŋu na Petro la doa ŋusẽ míaƒe xɔse?

⁵ Gbe ɖeka apostolo Petro bia Yesu be: “Míegblẽ nuwo katã ɖi hedze yowòme; ke nu kae ava nye mía tɔ?” (Mat. 19:27) Yesu meka mo na Petro ɖe nya ma biabia ta o, ke boŋ egblɔ na eƒe nusrɔ̃lawo be woana teƒeɖoɖo wo ɖe nu siwo wotsɔ sa vɔe ta. Apostolo wɔnuteƒeawo kple ame bubuwo aɖu fia kplii le dziƒo. Gake fifia gɔ̃ hã, yayrawo li. Yesu gblɔ be: “Ame sia ame si gblẽ aƒewo alo nɔviŋutsuwo alo nɔvinyɔnuwo alo fofo alo dada alo viwo alo agblewo ɖi le nye ŋkɔ ta la, akpɔ wo ɖe eteƒe zi alafa, eye wòanyi agbe mavɔ dome.” (Mat. 19:29) Yayra siwo eƒe nusrɔ̃lawo akpɔ la sɔ gbɔ sãsãsã wu nu siwo wotsɔ sa vɔe. Ðe gbɔgbɔ me fofowo, dadawo, nɔviŋutsuwo, nɔvinyɔnuwo kple viwo menyo sãsãsã wu nu sia nu si gbɔ míegbe nu le alo gblẽ ɖi ɖe Fiaɖuƒea ta oa?

 6. Nu ka tae Yehowa do ŋugbe be yeaɖo eteƒe na ye subɔlawo?

⁶ Esi Yehowa ɖo teƒeɖoɖo ƒe ŋugbe na esubɔlawo ta la, esia léa wo ɖe te ne nuteƒewɔwɔ ƒe dodokpɔwo va wo dzi. Yehowa Mawu subɔla wɔnuteƒewo le gbɔgbɔmeyayra geɖe kpɔm egbea, eye wole mɔ kpɔm vevie na yayra siwo lolo wu gɔ̃ hã le etsɔme. (1 Tim. 4:8) Ɛ̃, kakaɖedzi sẽŋu si le mía si be Yehowa nye “teƒeɖola na ame siwo dinɛ vevie la” akpe ɖe mía ŋu míanɔ te sesĩe le xɔse la me.—Heb. 11:6.

 7. Mɔ ka nue mɔkpɔkpɔ le abe seke ene le?

⁷ Yesu gblɔ le Todzimawunyaa me be: “Mitso aseye, eye migli kple dzidzɔ, elabena miaƒe fetu lolo le dziƒo, elabena nenema kee woti nyagblɔɖila siwo do ŋgɔ na mi hã yome.” (Mat. 5:12) Mawu subɔla aɖewo axɔ woƒe fetu le dziƒo. Eye esubɔla bubuwo hã axɔ woƒe fetu le paradiso me le anyigba dzi. Esia hã nye susu nyui aɖe si tae ‘woatso aseye ahagli kple dzidzɔ’ ɖo. (Ps. 37:11; Luka 18:30) Míeɖale mɔ kpɔm be míanɔ agbe le dziƒo loo alo le anyigba dzi o, míaƒe mɔkpɔkpɔa ate ŋu anɔ abe “seke ene na míaƒe luʋɔwo, kakaɖedzi le eŋu, eye wòli ke.” (Heb. 6:17-20) Abe ale si ko seke ate ŋu ana tɔdziʋu nanɔ te sesĩe ɖe ahom nu ene la, nenema kee ne míeka ɖe edzi bliboe be Mawu aɖo eteƒe na mí la, esia ate ŋu akpe ɖe mía ŋu míali ke le gbɔgbɔ me ahanɔ ŋute le susu me. Ate ŋu ado ŋusẽ mí míanɔ te ɖe nɔnɔme sesẽwo nu.

 8. Aleke xɔse ate ŋu ado ŋusẽ mí míaɖu dzimaɖitsitsi dzi?

⁸ Míaƒe mɔkpɔkpɔa ate ŋu ado ŋusẽ mí míaɖu dzimaɖitsitsi dzi egbea. Mawu ƒe ŋugbedodowo le abe gbɔgbɔmedɔmi ene si naa gbɔdzɔe míaƒe dziwo ne míetsi dzimaɖi. Akɔfafa gãe wònye na mí be míanya be ne ‘míedro míaƒe agba ɖe Yehowa dzi’ la, ‘alé mí ɖe te.’ (Ps. 55:22) Míeka ɖe edzi bliboe be Mawu ate ŋu “awɔ nu siwo míebiana alo nu siwo vaa míaƒe susu me la na mí wòagbɔ eŋu sãsãsã.” (Ef. 3:20) Bu eŋu kpɔ ko—menye be Yehowa ayra mí wòagbɔ edzi ko evɔ o, ke ‘agbɔ eŋu sãsãsã’ gɔ̃ hã!

 9. Nu kae ana míaka ɖe edzi be Yehowa ayra mí?

⁹ Hafi míaƒe asi nasu teƒeɖoɖoa dzi la, ele be míaxɔ Yehowa dzi se bliboe eye míawɔ eƒe mɔfiamewo dzi. Mose gblɔ na Israel dukɔa be: “Yehowa ayra wò godoo le anyigba si Yehowa wò Mawu tsɔ le nawòm be wòanye wò domenyinu la dzi, ne ènya ɖo to Yehowa wò Mawu ƒe gbe, eye nèwɔ se siwo katã dem mele na wò egbea la dzi pɛpɛpɛ ko. Elabena Yehowa wò Mawu ayra wò, abe ale si wòdo ŋugbe na wòe ene.” (5 Mose 15:4-6) Ðe nèka ɖe edzi bliboe be Yehowa ayra wò ne èyi edzi subɔe nuteƒewɔwɔtɔea? Ðikeke mele eme o be susu nyuiwo li si tae nàka ɖe edzi.

10, 11. Aleke Yehowa yra Yosef?

¹⁰ Míaƒe nyonyo tae woŋlɔ Biblia ɖo. Ale si Mawu ɖo eteƒe na esubɔla wɔnuteƒewo la ŋuti nuŋlɔɖi geɖewo le eme. (Rom. 15:4) Yosef ƒe ŋutinyaa nye esia ƒe kpɔɖeŋu nyui aɖe. Nɔviaŋutsuwo ɖo nugbe ɖe eŋu hetsɔe dzra wòzu kluvi, eye emegbe eƒe aƒetɔ srɔ̃ hã da alakpa ɖe esi si wɔe be wolée de gaxɔ me le Egipte. Ðe esia xe mɔ na Mawu ƒe yayra? Kura o! “Yehowa nɔ kple Yosef, eye wònyoa dɔme nɛ hevea enu . . . Yehowa nɔ kple Yosef, eye nu sia nu si wòwɔna la, Yehowa nana wòdzea edzi.” (1 Mose 39:21-23) Le nɔnɔme sesẽ mawo katã me la, Yosef kpɔ Mawu sinu dzigbɔɖitɔe.

¹¹ Ƒe aɖewo megbe la, Farao ɖe Yosef le gaxɔ me eye wòna kluvi tsɛ sia zu amegã le Egipte, negbe fia la koe nɔ ŋgɔ nɛ. (1 Mose 41:1, 37-43) Esi Yosef srɔ̃ dzi viŋutsu eve nɛ la, “Yosef na ŋkɔ eƒe ŋgɔgbevi la be Manase, elabena egblɔ be: ‘Mawu na meŋlɔ nye fukpekpewo katã kple fofonye ƒe aƒe la katã be.’ Eye wòna ŋkɔ evelia be Efrayim, elabena egblɔ be: ‘Mawu na medzi ɖe edzi le anyigba si dzi mekpe fu le la dzi.’” (1 Mose 41:51, 52) Esi Yosef yi edzi wɔ nuteƒe na Mawu ta la, yayra siwo Mawu tsɔ ɖo eteƒe nɛ la wɔe be Israel-viwo kple Egiptetɔwo siaa tsi agbe. Nya lae nye be Yosef de dzesii be Yehowa ye nɔ yeƒe nuteƒewɔwɔ teƒe ɖom na ye henɔ ye yram.—1 Mose 45:5-9.

12. Nu kae kpe ɖe Yesu ŋu wòwɔ nuteƒe esime wòto dodokpɔwo me?

¹² Yesu Kristo hã yi edzi ɖo to Mawu le xɔse ƒe dodokpɔ vovovowo me, eye Mawu ɖo eteƒe nɛ. Nu kae kpe ɖe eŋu wòwɔ nuteƒe? Mawu ƒe Nya la gblɔ be: “Le dzidzɔ si wotsɔ ɖo eŋkume ta la, edo dzi kpe fuwɔameti ŋuti fu, eye mebu ŋukpe ɖe naneke me o.” (Heb. 12:2) Ðikeke mele eme o be edzɔa dzi na Yesu be yeakɔ Mawu ƒe ŋkɔa ŋu. Eye ekpɔ teƒeɖoɖo si nye be eƒe nu dze Fofoa ŋu eye wòna mɔnukpɔkpɔ nyui geɖe su Yesu si. Biblia gblɔ be Yesu bɔbɔ “nɔ Mawu ƒe fiazikpui la ƒe ɖusime.” Ŋɔŋlɔawo gblɔ le afi bubu hã be: “Mawu doe ɖe dzi wòle ɖoƒe si kɔ wu, eye wòlɔ̃ faa tsɔ ŋkɔ si ƒo ŋkɔ bubuwo katã ta la nɛ.”—Flp. 2:9.

13, 14. Aleke Yehowa sena le eɖokui me tso nu siwo míewɔna nɛ ŋu?

¹³ Ðikeke mele eme o be Yehowa kpɔa ŋudzedze ɖe agbagba ɖe sia ɖe si míedzena be míasubɔe ŋu. Yehowa sea nɔnɔme ɖe sia ɖe si nana vɔvɔ̃ ɖoa mí alo míekea ɖi le mía ɖokui me la gɔme. Ne ganyawo le fu ɖem na mí alo lãmesẽkuxiwo kple nuteɖeamedzi wɔe be míegate ŋu le geɖe wɔm le subɔsubɔdɔa me o la, esea veve ɖe mía nu. Eye míate ŋu aka ɖe edzi bliboe be Yehowa dea asixɔxɔ gã agbagba si esubɔlawo dzena be yewoawɔ nuteƒe nɛ la ŋu.—Xlẽ Hebritɔwo 6:10, 11.

¹⁴ Ðo ŋku edzi hã be míate ŋu ate ɖe “Gbedodoɖasela” la ŋu kple kakaɖedzi be ase míaƒe dzimenyawo na mí. (Ps. 65:2) “Dɔmetɔtrɔ Fofo kple akɔfafawo katã ƒe Mawu” la ana nu sia nu si míehiã ale be míanɔ eŋu kplikplikpli la mí faa. Ɣeaɖewoɣi la, ewɔa esia to haxɔsetɔwo dzi. (2 Kor. 1:3) Ne míaƒe dɔme trɔ ɖe amewo ŋu eye míekpe ɖe wo ŋu la, esia dzea Yehowa ŋu ŋutɔ. “Ame si vea ame dahe nu la le nu dom na Yehowa, eye aɖo nu si wòwɔ la teƒe nɛ.” (Lod. 19:17; Mat. 6:3, 4) Esia fia be ne míelɔ̃ faa kpe ɖe ame siwo ɖo xaxa me ŋu la, Yehowa bunɛ be míedo nu na ye. Eye edo ŋugbe be yeaɖo dɔmenyowɔwɔa teƒe na mí.

15. Teƒeɖoɖo kawoe nèle mɔ kpɔm na? (Kpɔ nɔnɔmetata si le nyati sia ƒe gɔmedzedze.)

¹⁵ Kristotɔ amesiaminawo le mɔ kpɔm na “dzɔdzɔenyenye ƒe dziɖuɖukuku . . . si Aƒetɔ la si nye ʋɔnudrɔ̃la dzɔdzɔe la, atsɔ aɖo eteƒe [na wo] le ŋkeke ma dzi,” eye esia doa ŋusẽ wo. (2 Tim. 4:7, 8) Gake ne menye mɔkpɔkpɔ mae le asiwò o gɔ̃ hã la, Mawu ana teƒeɖoɖo dedie wò. ‘Alẽ bubu’ miliɔn geɖewo le mɔ kpɔm vevie na teƒeɖoɖo si nye be yewoanɔ agbe tegbee le paradiso me le anyigba dzi. Le paradisoa me la, “dzi adzɔ wo geɖe ɖe ŋutifafa gbogbo la ŋuti.”—Yoh. 10:16; Ps. 37:11.

16. Aleke 1 Yohanes 3:19, 20 me nyawo faa akɔ na mí?

¹⁶ Ɣeaɖewoɣi la, awɔ na mí be míete ŋu le geɖe wɔm le Yehowa subɔsubɔ me o, alo míaƒe susu anɔ wɔwɔm eveveve nenye be agbagba siwo dzem míele la dzea eŋu. Ðewohĩ míava nɔ susum gɔ̃ hã be míedze na teƒeɖoɖo aɖeke o. Gake mele be míaŋlɔ be gbeɖe o be, “Mawu nye gã wu míaƒe dziwo, eye wònya nuwo katã.” (Xlẽ 1 Yohanes 3:19, 20.) Eɖoa eteƒe na mí ɖe nu sia nu si xɔse kple lɔlɔ̃ ʋã mí míewɔ le subɔsubɔdɔ kɔkɔea me ta, ne míawo ŋutɔwo míesusui be meɖi naneke o gɔ̃ hã.—Marko 12:41-44.

17. Yayra siwo kpɔm míele fifia dometɔ aɖewo ɖe?

¹⁷ Le Satana ƒe nuɖoanyi vɔ̃ɖi sia ƒe ŋkeke mamlɛawo me gɔ̃ hã la, Yehowa le eƒe amewo yram. Ekpɔa egbɔ be sidzedze geɖe sua mía si eye míaƒe ŋutifafa gbaa go le xexea me godoo ƒe nɔviwo ƒe habɔbɔ si me míele la me. (Yes. 54:13) Abe ale si Yesu do ŋugbee ene la, Yehowa le eteƒe ɖom na mí fifia esi wòna míele ƒome gã aɖe si me tɔwo lɔ̃ wo nɔewo eye wotso dukɔ vovovowo me la me. (Marko 10:29, 30) Gawu la, Mawu tsɔa ŋutifafa, dzidzeme kple dzidzɔ manyagblɔ ɖoa eteƒe na ame siwo dinɛ vevie.—Flp. 4:4-7.

18, 19. Aleke Yehowa subɔlawo sena le wo ɖokui me tso ale si wòɖoa eteƒe na woe ŋu?

¹⁸ Yehowa subɔla siwo le xexea me godoo ate ŋu aɖi ɖase tso yayra nyui geɖe siwo kpɔm wole tso egbɔ la ŋu. Le kpɔɖeŋu me, Bianca si tso Germany gblɔ be: “Nyemate ŋu ada akpe na Yehowa wòade edeƒe ɖe ale si wòli kplim gbe sia gbe hekpena ɖe ŋunye mekpɔa nye kuxiwo gbɔ la ta o. Nuwo tɔ agu le xexea me eye xaxawo bɔ. Gake ne mele dɔ wɔm aduadu kple Yehowa la, mekpɔnɛ be mele dedie le eƒe asi me. Ɣesiaɣi si metsɔ nanewo sa vɔ nɛ la, eɖoa eteƒe nam zi gbɔ zi alafa.”

¹⁹ Alo bu nɔvinyɔnu Paula si xɔ ƒe 70 eye wòle Canada ŋu kpɔ. Dzimeƒudɔ sesẽ aɖe le eŋu, ke hã egblɔ be: “Togbɔ be azɔli boo mele ŋunye o hã la, esia mexea mɔ ɖe nye subɔsubɔdɔa wɔwɔ nu o. Mekpɔa gome le ɖaseɖiɖidɔa ƒe akpa vovovowo abe telefon dzi ɖaseɖiɖi kple vomeɖaseɖiɖi ene me. Nu si mewɔna tsɔ dea dzi ƒo na ɖokuinye ye nye be meŋlɔa mawunyakpukpuiwo kple míaƒe agbalẽwo me nya aɖewo ɖe agbalẽvi aɖe me henɔa eme tom edziedzi. Meɖo ŋkɔ na agbalẽvia be ‘Nye Ŋusẽtsoƒe Gbalẽvi.’ Ne míaƒe susu le Yehowa ƒe ŋugbedodowo ŋu la, dzi meɖena le mía ƒo keŋkeŋ o. Aleke kee míaƒe nɔnɔmea ɖale o, Yehowa akpe ɖe mía ŋu ɣesiaɣi.” Ðewohĩ nɔnɔme si me nèle la to vovo na Bianca kple Paula tɔ. Ke hã, àte ŋu abu mɔ vovovo siwo nu Yehowa ɖo eteƒe na wò ŋutɔ kple wò ame nyanyɛwo ŋu. Aleke gbegbe wònyo ye nye esi be nàde ŋugble le ale si Yehowa le eteƒe ɖom na wò fifia kple ale si wòava ɖo eteƒe na wò le etsɔme ŋu!

20. Nu kae míate ŋu akpɔ mɔ na ne míeyi edzi subɔ Yehowa tso dzi blibo me?

²⁰ Mègaŋlɔ be gbeɖe o be “teƒeɖoɖo gã li” na wò ɖe gbe siwo nèdona ɖa na Mawu vevie tso dzi me la ta. Àte ŋu aka ɖe edzi be ‘ne èwɔ Mawu ƒe lɔlɔ̃nu vɔ la, wò asi asu ŋugbedodo la dzi.’ (Heb. 10:35, 36) Eya ta mina míayi edzi anɔ ŋusẽ dom míaƒe xɔse ahawɔ nu si míate ŋui tso dzi blibo me abe Yehowae míele ewɔm na ene. Míeka ɖe edzi be ne míewɔ esia la, míaxɔ fetu dedie tso Yehowa gbɔ.—Xlẽ Kolosetɔwo 3:23, 24.