Ðe Nèxɔa Ŋgɔ Le Bubudede Nɔvi Haxɔsetɔwo Ŋu Mea?
“Milɔ̃ mia nɔewo vevie abe dadaviwo ene. Ame sia ame nedi be yeade bubu ye nɔvi ŋu gbã.”—ROM. 12:10.
1, 2. (a) Nuxlɔ̃amenya kae Paulo ŋlɔ ɖe lɛta si wòŋlɔ na Romatɔwo me? (b) Biabia kawo mee míadzro?
LE LƐTA si apostolo Paul ŋlɔ na Romatɔwo me la, ete gbe ɖe ale si wòle vevie be mí Kristotɔwo míaɖe lɔlɔ̃ afia le hamea me la dzi. Eɖo ŋku edzi na mí be mele be “alakpanuwɔwɔ aɖeke nanɔ [míaƒe] lɔlɔ̃ la me o.” Egblɔ hã be ‘míalɔ̃ mía nɔewo vevie,’ abe ale si “dadaviwo” lɔ̃a wo nɔewo ene.—Rom. 12:9, 10a.
2 Le nyateƒe me la, ame nɔewo lɔlɔ̃ vevie bia nu geɖe wu ɖetsɔtsɔ le eme na ame bubuwo dzro ko. Ele be míato nuwɔnawo dzi aɖe nɔnɔme siawo afia. Nya lae nye be, ame aɖeke mate ŋu ade dzesi ale si gbegbe míelɔ̃a amee, ne míeɖee fia to nuwɔna me o. Eya ta Paulo gblɔ nuxlɔ̃amenya sia kpee be: “Ame sia ame nedi be yeade bubu ye nɔvi ŋu gbã.” (Rom. 12:10b) Nu kae bubudede ame ŋu lɔ ɖe eme? Nu ka tae wòle vevie be míaxɔ ŋgɔ le bubudede mía nɔvi haxɔsetɔwo ŋu me? Alekee míate ŋu awɔ esiae?
Ƒomedodo Si Le Amebubu Kple Bubudede Ame Ŋu Dome
3. Gɔmesese kae le nya si gɔme woɖe be “bubudede ame ŋu” la si le gbe siwo me woŋlɔ Biblia ɖo gbã la me?
3 Hebrigbe me nya vevi si wozã na “bubudede ame ŋu” le nya la ŋutɔŋutɔ nue nye “kpekpeme.” Be woade bubu ame aɖe ŋu fia be woabui be kpekpeme le eŋu, alo be enye ame vevi aɖe. Woɖe Hebrigbe me nya ma ke gɔme be ‘ŋutikɔkɔe’ le Ŋɔŋlɔawo me, eye esia hã ɖea bubu deto si gbegbe wodea ame si ŋu wole bubu demee la ŋu fiana. (1 Mose 45:13) Helagbe me nya si gɔme woɖe be “bubu” le Biblia me la fia ŋudzedzekpɔkpɔ, vevienyenye, kple asixɔxɔ. (Luka 14:10) Ɛ̃, asixɔxɔ le ame siwo ŋu míedea bubui la ŋu na mí, eye wole vevie na mí.
4, 5. Ƒomedodo kae le bubudede ame ŋu kple amebubu dome? Wɔ eƒe kpɔɖeŋu.
4 Nu kae bubudede ame bubuwo ŋu lɔ ɖe eme? Edzea egɔme kple amebubu. Zi geɖe la, wozãa nya siwo nye “bubudede ame ŋu” kple “amebubu” aduadui elabena ƒomedodo kplikplikpli le woa kple eve la dome. Bubudede ame ŋu nye ale si wobua amee la ɖeɖe fia le nuwɔna me. Ne míagblɔe bubui la, nu vevitɔ si amebubu lɔ ɖe emee nye nukpɔsusu si le mía si ɖe mía nɔviwo ŋu, evɔ bubudede ame ŋu ya ku ɖe ale si míewɔa nu ɖe wo ŋui la ŋu.
5 Ðe Kristotɔ ate ŋu ade bubu nɔvia haxɔsetɔwo ŋu vavã ne mebua wo ɖe naneke me oa? (3 Yoh. 9, 10) Abe ale si ko ati tea ŋu tsina nyuie eye wònɔa anyi eteƒe didina nenye be eƒo ke ɖe to nyuie ɖe anyigba wɔnu me ene la, nenema kee bubudede ame ŋu ate ŋu anye vavãtɔ kple esi nɔa anyi ɖaa ne enye ale si míesena le míaƒe dzi me ŋutɔŋutɔ ɖe amea ŋu la ɖeɖe fia. Esi wònye be bubudede ame ŋu si nye kesekukuɖɔɖɔname metsoa dzi anukwaretɔ me o ta la, menɔa anyi ɖaa o, eye enu yina kaba. Eya ta mewɔ nuku o be, hafi Paulo nagblɔ bubudede ame ŋu ƒe nuxlɔ̃amenyaa la, egblɔ tẽe eme kɔ nyuie be: “Migana alakpanuwɔwɔ aɖeke nanɔ miaƒe lɔlɔ̃ la me o.”—Rom. 12:9; mixlẽ 1 Petro 1:22.
De Bubu Ame Siwo Wowɔ “Ðe Mawu Ƒe Nɔnɔme Nu” La Ŋu
6, 7. Nu ka tae wòle vevie be míabu ame bubuwo?
6 Esi wònye be asixɔxɔ si míedea ame ŋu le dzi me ye nana míedea bubu eŋu ta la, mele be míaŋlɔ susu siwo tae Ŋɔŋlɔawo de dzi ƒo na mí be míabu mía nɔviwo katã ɖo la be gbeɖe o. Eya ta na míadzro susu siawo dometɔ eve me.
7 Le anyigba dzi nuwɔwɔwo katã dome me la, amegbetɔwo koe wowɔ “ɖe Mawu ƒe nɔnɔme nu.” (Yak. 3:9) Esia tae míeɖea nɔnɔme siwo nye lɔlɔ̃, nunya, kple dzɔdzɔenyenye fiana ɖo. Kpɔ nu bubu aɖe si mía Wɔla la na mí ɖa. Hakpala la gblɔ be: “Yehowa, . . . wò ŋutikɔkɔe gbagba gbɔ dziƒo ta! . . . Esusɔ vie, nèna [amegbetɔ sɔ] kple Mawu kloe, eye nètsɔ bubu kple ŋutikɔkɔe ɖɔ nɛ.” (Ps. 8:2, 5, 6; 104:1)a Mawu tsɔ bubu kple ŋutikɔkɔe aɖe si nu ɖɔ na amegbetɔwo katã, alo tsɔ ɖo atsyɔ̃ na woe, eye wòde asixɔxɔ aɖe wo ŋu. Eya ta ne míede bubu ame bubu aɖe ŋu la, ekema, Yehowa, Ame si ɖo atsyɔ̃ na amegbetɔwo la ŋui míele bubu demee. Azɔ ne susu nyuiwo li siwo tae míebua ame ƒomevi ɖe sia ɖe ɖo la, ɖe mele be míabu mía nɔvi haxɔsetɔwo geɖe wu oa?—Yoh. 3:16; Gal. 6:10.
Míenye Ƒome Ðeka Me Tɔwo
8, 9. Susu vevi kae Paulo gblɔ si tae wòle be míabu mía nɔvi haxɔsetɔwo?
8 Paulo ƒo nu tso susu bubu si tae míebua mía nɔewo ɖo la ŋu. Hafi Paulo nagblɔ bubudede ame nɔewo ŋu ƒe nuxlɔ̃amenyaa la, egblɔ be: “Milɔ̃ mia nɔewo vevie abe dadaviwo ene.” Helagbe me nya si gɔme woɖe be ‘dadavilɔlɔ̃’ la fiaa kadodo sẽŋu si naa ɖekawɔwɔ nɔa ƒometɔ siwo lɔ̃a wo nɔewo hekpea asi ɖe wo nɔewo ŋu la dome. Eya ta esi Paulo zã nya sia la, enɔ gbe tem ɖe edzi be ele be ƒomedodo si le hamea me tɔwo dome la me nasẽ eye vividoɖeameŋu nanɔ eme abe ƒometɔ siwo dome le kplikplikpli la tɔ ene. (Rom. 12:5) Gakpe ɖe eŋu la, nenɔ susu me wò be Kristotɔ amesiamina, siwo katã Yehowa, si nye wo katã Fofo la, xɔ abe viawo ene lae Paulo ŋlɔ nya siawo na. Esia ta wonye ƒometɔ kplikplikpliwo le gɔmesese tɔxɛ aɖe nu. Eya ta le nyateƒe me la, susu nyuiwo nɔ Kristotɔ amesiamina siwo nɔ anyi le Paulo ƒe ŋkekea me la si, si tae wobua wo nɔewo ɖo. Nenema kee wòle le amesiamina siwo li egbea hã gome.
9 Ke ame siwo nye ‘alẽ bubuawo’ ya ɖe? (Yoh. 10:16) Togbɔ be Mawu mekpɔ xɔ wo abe viwo ene o hã la, woate ŋu ayɔ wo nɔewo be nɔviŋutsu kple nɔvinyɔnu wòasɔ, elabena ƒomedodo kplikplikpli le wo dome le xexea me katã ƒe Kristotɔwo ƒe ƒome si me wole la me. (1 Pet. 2:17; 5:9) Eya ta ne ame siwo nye alẽ bubuawo se ale si woyɔa wo nɔewo be “nɔviŋutsu” alo “nɔvinyɔnu” la gɔme nyuie la, ekema, susu nyui aɖe le wo si si tae wòle be woabu wo nɔvi haxɔsetɔwo tso dzi blibo me ɖo.—Mixlẽ 1 Petro 3:8.
Nu Si Ta Wòle Vevie Be Míade Bubu Mía Nɔewo Ŋu
10, 11. Nu ka tae mía nɔviwo bubu kple bubudede wo ŋu le vevie ŋutɔ?
10 Nu ka tae wòle vevie be míade bubu mía nɔewo ŋu? Susu si tae nye esi: Ne míedea bubu mía nɔviŋutsuwo kple nɔvinyɔnuwo ŋu la, míekpea asi ɖe hamea katã ƒe nyonyo kple ɖekawɔwɔ ŋu le mɔ vevi aɖe nu.
11 Le nyateƒe me la, míekpɔe be ƒomedodo kplikplikpli me nɔnɔ kple Yehowa kpakple eƒe gbɔgbɔ kɔkɔea ƒe kpekpeɖeŋuxɔxɔe nye ŋusẽtsoƒe sesẽtɔwo kekeake, siwo li na mí Kristotɔ vavãwo egbea. (Ps. 36:8; Yoh. 14:26) Le ɣeyiɣi ma ke me la, ne mía nɔvi haxɔsetɔwo ɖee fia be yewodea asixɔxɔ mía ŋu la, edea dzi ƒo na mí. (Lod. 25:11) Ne wode asixɔxɔ kple bubu si tso dzi me mía ŋu la, dzi dzɔa mí ŋutɔ. Edoa ŋusẽ mí geɖe wu be míayi edzi atsɔ kakaɖedzi anɔ zɔzɔm le agbemɔa dzi kple dzidzɔ. Ðikeke mele eme o be wò ŋutɔ èse le ɖokuiwò me nenema kpɔ.
12. Nu kae mía dometɔ ɖe sia ɖe ate ŋu awɔ be vividoɖeameŋu kple lɔlɔ̃ nanɔ hamea?
12 Azɔ, esi wònye be Yehowa nyae be le dzɔdzɔme nu la, míedina be woade bubu mía ŋu ta la, esɔ be eto eƒe Nya la dzi de dzi ƒo na mí be “ame sia ame nedi be yeade bubu ye nɔvi ŋu gbã.” (Rom. 12:10; mixlẽ Mateo 7:12.) Kristotɔ siwo katã wɔna ɖe aɖaŋuɖoɖo sia si wɔa dɔ ɣeawokatãɣi la dzi tso dzi blibo me la nana be vividoɖeameŋu kple lɔlɔ̃ nɔa Kristotɔwo ƒe nɔviwo ƒe habɔbɔa me. Eya ta anyo be míatɔ sẽe abia mía ɖokuiwo be, ‘Ɣekaɣie nye zi mamlɛtɔ si meto nye nuƒoƒo kple nuwɔna dzi de bubu nɔviŋutsu alo nɔvinyɔnu aɖe ŋu le hamea me tso dzi me?’—Rom. 13:8.
Enye Nu Si Wodi Tso Mí Katã Si
13. (a) Ame kae wòle na be wòade bubu nɔvia ŋu gbã? (b) Nu kae Paulo ƒe nya siwo le Romatɔwo 1:7 la fia?
13 Ame kae wòle na be wòade bubu nɔvia ŋu gbã? Le lɛta si Paulo ŋlɔ na Hebritɔwo me la, eɖɔ Kristotɔ hamemetsitsiwo be wonye “ame siwo le ŋgɔ xɔm le mia dome.” (Heb. 13:17) Le nyateƒe me la, hamemetsitsiwo xɔa ŋgɔ le dɔ vovovowo me. Ke hã, esi wonye alẽkplɔlawo ta la, ele vevie be woaxɔ ŋgɔ le bubudede nɔvi haxɔsetɔwo ŋu me, eye esia lɔ wo hati hamemetsitsiwo hã ɖe eme. Le kpɔɖeŋu me, ne hamemetsitsiwo kpe ta be yewoadzro hamea ƒe nuhiahiãwo me la, wodea bubu wo nɔewo ŋu ne woɖoa to nyuie esime wo hati hamemetsitsiawo dometɔ ɖe sia ɖe le nu ƒom. Gakpe ɖe eŋu la, wodea bubu wo nɔewo ŋu ne wobua nya siwo hamemetsitsi ɖe sia ɖe gblɔ la ŋu hafi wɔa nyametsotsoa. (Dɔw. 15:6-15) Gake ele be míaɖo ŋku edzi be, menye hamemetsitsiwo koe Paulo ƒe lɛta si wòŋlɔ na Romatɔwo la me nyawo yi na o, ke woyi na hamea me tɔwo katã. (Rom. 1:7) Eya ta ne míekekee ɖe enu la, eƒe aɖaŋuɖoɖo si nye be ame sia ame nedi be yeade bubu ye nɔvi ŋu gbã la yi na mí katã egbea hã.
14. (a) Wɔ vovototo si le bubudede ame ŋu kple bubudede ame nɔvi ŋu gbã dome ƒe kpɔɖeŋu. (b) Nya kae wòle be míabia mía ɖokuiwo?
14 De ŋugble le Paulo ƒe aɖaŋuɖoɖoa ƒe akpa sia hã ŋu kpɔ. Menye ɖeko wòde dzi ƒo na nɔvia haxɔsetɔ siwo nɔ Roma la be woade bubu wo nɔewo ŋu o, ke egblɔ na wo be woade bubu wo nɔviwo ŋu gbã. Ðe vovototo aɖe le nya eve siawo domea? Bu kpɔɖeŋu sia ŋu kpɔ. Ðe nufiala aɖe abia tso sukuvi siwo nya agbalẽ la si be woasrɔ̃ nuxexlẽa? Ao. Wonya nuxexlẽ xoxo. Ke nu si nufialaa adi be yeawɔ boŋue nye be yeakpe ɖe wo ŋu woabi ɖe nuxexlẽ me. Nenema kee esi míelɔ̃a mía nɔewo, eye lɔlɔ̃ si le mía si na mía nɔewo la ʋãa mí míedea bubu wo ŋu ta la, enye nu si dea dzesi mí xoxo be míenye Kristotɔ vavãwo. (Yoh. 13:35) Ke hã, abe ale si ko sukuvi siwo nya nuxexlẽ xoxo la agate ŋu asrɔ̃ nuxexlẽ nyuie wu ene la, nenema kee míawo hã míate ŋu awɔ ŋgɔyiyi geɖe wu ne míedea bubu mía nɔewo ŋu gbã. (1 Tes. 4:9, 10) Nu siae wodi tso mía dometɔ ɖe sia ɖe si. Ele be míabia mía ɖokuiwo be, ‘Ðe mewɔnɛ alea? Ðe metsona le ɖokuinye si dea bubu ame bubuwo ŋu le hamea mea?’
De Bubu ‘Ame Siwo Wobɔbɔ Ðe Anyi’ La Ŋu
15, 16. (a) Ne míele bubu dem amewo ŋu la, ame kawo dzie mele be míaŋe aɖaba aƒui o, eye nu ka tae? (b) Nu kae ate ŋu akpe ɖe mía ŋu míanya ne míedea bubu mía nɔviŋutsuwo kple nɔvinyɔnuwo ŋu tso dzi me?
15 Ne míele bubu dem amewo ŋu la, ame kawo dzie mele be míaŋe aɖaba aƒui le hamea me o? Mawu ƒe Nya la gblɔ be: ‘Ame si ve ame dahe nu la, edo nugbana na Yehowa, eye wòaɖo eƒe nuwɔwɔ teƒe nɛ.’ (Lod. 19:17) Alekee wòle be míawɔ gɔmeɖose si dze le nya mawo me la ŋu dɔ ne míele agbagba dzem be míade bubu mía nɔviwo ŋu gbã?
16 Àlɔ̃ ɖe edzi be ame akpa gãtɔ dzea agbagba dea bubu ame siwo ƒe ɖoƒe kɔ wu wo tɔ la ŋu, gake ate ŋu anɔ eme be ame mawo ke medea bubu aɖeke ame siwo wobuna be wole yewo te la ŋu o. Gake Yehowa ya mewɔa nu alea o. Eya ŋutɔ gblɔ be: ‘Ame si buam la, mabui.’ (1 Sam. 2:30; Ps. 113:5-7) Yehowa dea bubu ame siwo katã subɔnɛ hedea bubu eŋu la ŋu. Etsɔa ɖe le eme na ‘ame siwo wobɔbɔ ɖe anyi la.’ (Mixlẽ Yesaya 57:15; 2 Kron. 16:9) Le nyateƒe me la, míedi be míasrɔ̃ Yehowa. Eya ta ne míedi be míanya ale si gbegbe míedea bubu vavãtɔ amewo ŋui la, anyo be míabia mía ɖokuiwo be, ‘Alekee mewɔa nu ɖe ame bɔbɔɖeanyiwo, alo ame siwo mele agbanɔamedzinɔƒe aɖeke le hamea me o la ŋu?’ (Yoh. 13:14, 15) Ŋuɖoɖoa akpe ɖe mía ŋu le mɔ geɖe nu míanya ale si gbegbe míedea bubu amewo ŋu tso dzi me.—Mixlẽ Filipitɔwo 2:3, 4.
Bubudede Amewo Ŋu To Vovokpɔkpɔ Ðe Wo Ŋu Me
17. Mɔ vevi siwo dzi míate ŋu ato ade bubu hamea me tɔwo katã ŋu gbã la dometɔ ɖekae nye ka, eye nu ka tae wòle alea ɖo?
17 Mɔ vevi siwo dzi míate ŋu ato ade bubu hamea me tɔwo katã ŋu gbã la dometɔ ɖekae nye ka? Eyae nye vovokpɔkpɔ ɖe wo ŋu. Nu ka tae wòle alea ɖo? Abe Kristotɔwo ene la, vovo menɔa mía ŋu o, eye hamea me dɔ gbogbo siwo le vevie la gbɔ kpɔkpɔ xɔa ɣeyiɣi geɖe le mía si. Eya ta mewɔ nuku o be, míebua ɣeyiɣia nu xɔasii. Eya ta míekpɔe be mele be míadi tso mía nɔviwo si be woazã woƒe ɣeyiɣiwo ɖe mía ŋu wu ale si dze o. Nenema kee edzɔa dzi na mí ne hamea me tɔ bubuwo kpɔe dze sii be mele be yewoaxɔ ɣeyiɣi geɖe fũu akpa le mía si o.
18. Abe ale si nɔnɔmetata si le axa 18 lia ɖee fia ene la, alekee míate ŋu aɖee afia be míelɔ̃na faa be míazã míaƒe ɣeyiɣi ɖe mía nɔvi haxɔsetɔwo ŋu?
18 Ke hã, míede dzesii hã (vevietɔ mí ame siwo le subɔsubɔm abe alẽkplɔlawo ene la) be míaƒe lɔlɔ̃ faa aɖe asi le dɔ aɖe si wɔm míele la ŋu bene míate ŋu akpɔ vovo ɖe mía nɔvi haxɔsetɔwo ŋu la ɖenɛ fiana be míedea bubu wo ŋu. Le mɔ ka nu? Ne míeɖe asi le nu siwo wɔm míele ŋu eye míezã míaƒe ɣeyiɣi aɖewo ɖe mía nɔviwo ŋu la, ne míagblɔe la, efia be míele gbɔgbɔm be, ‘Medea asixɔxɔ ŋuwò ale gbegbe be vovokpɔkpɔ ɖe ŋuwò le vevie nam wu dɔ si wɔm mele la dzi yiyi.’ (Mar. 6:30-34) Le go bubu me la, ne míedina be míaɖe asi le nu si wɔm míele la ŋu be míakpɔ vovo ɖe mía nɔvi aɖe ŋu o la, ate ŋu ana wòase le eɖokui me be míedea asixɔxɔ ye ŋu o. Nyateƒee, mí katã míelɔ̃ ɖe edzi be ɣeaɖewoɣi la, hiahiã kpatawo doa mo ɖa siwo ŋu womate ŋu aɖe asi le o. Ke hã, ne míelɔ̃na faa kpɔa vovo ɖe mía nɔviŋutsuwo kple nɔvinyɔnuwo ŋu la, eɖea ale si gbegbe míedea bubu wo ŋu tso dzi me la fiana, eye nenema kee wòle ne míedina be míakpɔ vovo ɖe wo ŋu o.—1 Kor. 10:24.
Ðoe Kplikpaa Be Nàde Bubu Nɔviwò Ŋu Gbã
19. To vovo na vovokpɔkpɔ ɖe mía nɔvi haxɔsetɔwo ŋu la, mɔ bubu ka dzie míate ŋu ato ade bubu wo ŋu?
19 Mɔ vevi bubu aɖewo hã li siwo dzi míate ŋu ato ade bubu mía nɔvi haxɔsetɔwo ŋu. Le kpɔɖeŋu me, le vovokpɔkpɔ ɖe wo ŋu me la, ele be míaƒe susu hã nanɔ wo ŋu. Le go sia hã me la, Yehowa ɖo kpɔɖeŋu ɖi na mí. Hakpala David gblɔ be: “Yehowa ƒe ŋkuwo le ame dzɔdzɔewo ŋu, eye eƒe towo le woƒe ɣlidodo ŋu.” (Ps. 34:16) Ne míenaa míaƒe ŋkuwo kple towo—alo míaƒe susu katã—nɔa mía nɔviwo ŋu, vevietɔ esiwo te ɖe mía ŋu hena kpekpeɖeŋu la, ekema, míele agbagba dzem be míasrɔ̃ Yehowa le go sia me. Ne míewɔnɛ alea la, efia be míele bubu dem wo ŋu.
20. Ŋkuɖodzinya siwo ku ɖe bubudede amewo ŋu kawoe míadi be míaŋlɔ be o?
20 Abe ale si míedzro emee ene la, míedi be susu siwo tae wòle be míabu mía nɔvi haxɔsetɔwo tso dzi me la nanɔ susu me na mí ɣeawokatãɣi. Gakpe ɖe eŋu la, míedia mɔnukpɔkpɔ be míatre bubudede amewo katã ŋu, ame siwo wobɔbɔ ɖe anyi hã le eme. Ne míeɖea afɔ siawo la, míana nɔvilɔlɔ̃ kple ɖekawɔwɔ si le hamea me la me nagasẽ ɖe edzi. Eya ta neva eme be, mí katã míayi edzi anɔ bubu dem mía nɔviwo ŋu gbã, ke menye be míanɔ bubu dem wo ŋu ko o. Èɖoe kplikpaa be yeawɔ esia?
[Etenuŋɔŋlɔ]
a Nya siwo David gblɔ le Psalmo 8 lia me la ganye nyagblɔɖi siwo nɔ asi fiam ame deblibo, Yesu Kristo.—Heb. 2:6-9.
Èɖo Ŋku Wo Dzia?
• Ƒomedodo kae le amebubu kple bubudede ame ŋu dome?
• Susu kawo tae wòle be míanɔ bubu dem mía nɔvi haxɔsetɔwo ŋu?
• Nu ka tae wòle vevie be míade bubu mía nɔewo ŋu?
• Mɔ kawo dzie míate ŋu ato ade bubu mía nɔvi haxɔsetɔwo ŋu?
[Nɔnɔmetata si le axa 18]
Alekee míate ŋu ade bubu mía nɔvi haxɔsetɔwo ŋu?