Biblia Ƒe Nukpɔsusu

Gadodo le Xɔlɔ̃wo Dome

“AME VƆ̃ÐI LA DOA NUGBANA, EYE MEXENƐ O; KE AME DZƆDZƆE LA VEA AME NU, EYE WÒNAA NU AME.”​—PSALMO 37:⁠21.

“MÈGANYE amesi biaa gadodo, alo amesi doa ga na ame o; elabena enuenu la, gaa kple xɔlɔ̃a sia dome gblẽna.” Aleae Eŋlisi fefeŋlɔla William Shakespeare ŋlɔ eye wònye nunya si li tso tititi ke. Le nyateƒe me la, nu ʋee aɖewo koe gate ŋu hea masɔmasɔwo vɛ dea gadodo le ame gbɔ alo gadodo na ame nu le amewo dome ƒomedodowo me. Ne wowɔ ɖoɖo nyuitɔ kekeake eye tameɖoɖo nyuiwo kura gɔ̃ hã le eŋu hã la, menye ɣesiaɣie nuwo yina abe alesi wokpɔ mɔ nɛ ene o.​—Nyagblɔla 9:​11, 12.

Nanewo ate ŋu adzɔ si awɔe be wòasesẽ na amesi wodo gaa na be wòawɔ ɖe eƒe ŋugbedodo dzi alo be magate ŋu awɔ ɖe edzi kura o. Alo ate ŋu adzɔ be amesi gbɔ wodo gaa le la ŋutɔ ahiã na ga si wòdo la kpata. Ne nusiawo ƒomevi dzɔ la, xɔlɔ̃dzedze kple ƒomedodo si le ameawo dome me ate ŋu agblẽ abe alesi Shakespeare gblɔe ene.

Nyateƒee, susu gobi aɖewo anɔ ame aɖe si si ta wòanɔ ga dom ɖo. Le afɔku dziŋɔ aɖe alo dɔwɔɖui si ge le esi si na ganyawo le fu ɖem nɛ ta la, abui be gadodo koe ate ŋu akpe ɖe ye ŋu. Biblia de dzi ƒo na amesiwo ate ŋui be woakpe ɖe amesiwo hiã tu ŋu nenye be ŋutete le wo ŋu. (Lododowo 3:​27) Gadodo ate ŋu anye esia ƒe akpa aɖe. Gake aleke wòle be Kristotɔ siwo dome ɖoɖo sia le nakpɔ woƒe agbanɔamedziawoe?

Gɔmeɖose Siwo Ŋu Woade Ŋugble Le

Menye ganyawo ŋuti mɔfiagbalẽe Biblia nye o. Meƒo nu tso nusiwo katã gadodo le ame gbɔ kple gadodo na ame abia la ŋu o. Egblẽ demexɔxɔ alo emaxɔmaxɔ kple deme home si woaxɔ ŋu nyawo ɖe gadonamelaa kple amesi wòle edom na si me.a Gake nusi Biblia gblɔ nye gɔmeɖose siwo me kɔ eye lɔlɔ̃ le wo me siwo ate ŋu akpɔ ŋusẽ ɖe amesiame si wole ga dom na alo amesi le ga dom na amea ƒe nɔnɔmewo kple nuwɔna dzi.

De ŋugble le gɔmeɖose siwo wòle be amesi wole gaa dom na la natsɔ ade dɔwɔna me la ŋuti kpɔ. Apostolo Paulo xlɔ̃ nu Kristotɔwo be ‘woaganyi naneke ƒe fe le ame aɖeke si o, negbe wo nɔewo lɔlɔ̃ ƒe fe ko.’ (Romatɔwo 13:⁠8) Togbɔ be gɔmeɖose gbadzaa aɖe ko ɖomee Paulo le anyi le afisia hã la, ɖikeke mele eme o be woate ŋu awɔ eƒe aɖaŋuɖoɖoa ŋudɔ hena ŋudzɔnɔnɔ ɖe fenyinyi ŋuti. Ɣeaɖewoɣi la, anyo be naneke manɔ ame si o wu be fe nanɔ eŋu. Nukatae? Lododowo 22:⁠7 ɖe eme be “amesi doa nugbana la, dɔla wònye na agbanatɔ” la. Ele be amesi wodo gaa na nanya be agba le ye dzi vaseɖe esi yeagbugbɔ gaa vɛ. Ele be wòase egɔme be yeƒe nunɔamesiwo menye ye ɖeɖeko tɔ o. Ele be fe si wònyi la xexe ɖe ɖoɖo si nu wo kpakple evea lɔ̃ ɖo dzi nanye nusi wòada ɖe nɔƒe gbãtɔ le eƒe agbe me, ne menye nenema o la, kuxi sesẽwo ate ŋu ado mo ɖa.

Le kpɔɖeŋu me, ne ɣeyiɣiawo va le yiyim eye gaa mele vavam ɖe game dzi o la, amesi do gaa na amea la ate ŋu akpɔ dziku. Ne amesi gbɔ wodo gaa le la le amesi wòdoe na ƒe nuwɔnawo abe awuƒeƒle, nuɖuɖu le nuɖuɖudzraƒe, alo mɔkekeyiyi kpɔm la, ate ŋu anɔ susu vɔ̃wo bum ɖe eyama ŋuti. Dzi ate ŋu akui. Ƒomedodo si le wo kplii kpakple woƒe ƒomewo kura gɔ̃ hã dome magavivi o alo agblẽ. Ne amesi wodo gaa na la mewɔ ɖe eƒe nyawo dzi o la, nu madodzidzɔname siawoe ate ŋu atso eme.​—Mateo 5:⁠37.

Ke ne nane si ŋuti amesi wodo gaa na mate ŋu awɔ naneke le o la dzɔ kpata si wɔe be mate ŋu awɔ ɖe ŋugbe si wòdo la dzi o ya ɖe? Ðe esia ate fli ɖe fea mea? Mefia nenema kokoko o. Hakpala la gblɔ be ame dzɔdzɔe “ka atam, si me eya ŋutɔ ƒe gbegblẽ tsona, ke megatrɔnɛ o.” (Psalmo 15:⁠4) Le nya sia me la, nunyanu si me lɔlɔ̃ le si amesi wodo gaa na ate ŋu awɔe nye be wòayi aɖaɖe nu me na amesi gbɔ wòdo gaa le enumake. Ekema woate ŋu awɔ ɖoɖo bubu. Esia ahe ŋutifafa vɛ, eye wòadze Yehowa Mawu ŋu.​—Psalmo 133:⁠1; Korintotɔwo II, 13:⁠11.

Le nyateƒe me la, alesi wokpɔa fe siwo wonyi gbɔe la ƒoa nu geɖe tso ame ŋu. Dzimatsimatsi ɖe gaa gbugbɔ vɛ ŋu ɖea ɖekematsɔ le ame bubuwo me fiana. Ne woagblɔe tututu la, amesi si nɔnɔme ma le la ɖea ɖokuitɔdidi fiana​—etsɔa eƒe dzodzrowo kple didiwo ɖoa nɔƒe gbãtɔ. (Filipitɔwo 2:⁠4) Kristotɔ si aɖoe koŋ agbe fe siwo wònyi la xexe dea eƒe tenɔnɔ le Mawu ŋkume afɔku me, eye eƒe nuwɔnawo ɖea ŋukeklẽ kple dzi vɔ̃ɖi ƒe amesinɔnɔ fiana.​—Psalmo 37:⁠21.

Amesi Gbɔ Wodo Gaa Le

Togbɔ be amesi wole gaa dom na la dzie agba gãtɔ le wu hã la, gɔmeɖosewo li siwo ku ɖe amesi gbɔ wole gaa dom le la hã ŋu. Biblia fia be ne ŋutetea le mía ŋu be míakpe ɖe ame dahewo ŋu la, míkpe ɖe wo ŋu. ( Yakobo 2:​14-16) Gake mefia be enye ame ƒe agbanɔamedzi be wòado ga na ame kokoko o, nenye be amesi le gaa biam la nye gbɔgbɔmenɔvi kura gɔ̃ hã. Biblia gblɔ be: “Nunyala kpɔa dzɔgbevɔ̃e, eye wòɣlaa eɖokui; ke ame bebewu dea ta eme, eye akpɔ etɔnua.”​—Lododowo 22:⁠3.

Afɔku siwo koŋ dona tsoa gadodo me la nyanya kple wo gɔmesese ana be amesi bua nu ŋu nyuie nade ŋugble tso amewo ƒe gadodo biabia ŋuti nyuie. Ðe gadodoa hiã ŋutɔŋutɔa? Ðe amesi le gaa biam la bu nyaa ŋu nyuia? Ðe ɖoɖo nyui le amesi nàdo gaa na la si eye amewo ƒoa nu nyui le eŋua? Ðe wòlɔ̃ be yeade asi agbalẽ si ɖe nusiwo ku ɖe ɖoɖo sia ŋu la tea? (Tsɔe sɔ kple Yeremya 32:​8-14.) Alɔ̃ nyateƒe be yeagbugbɔ gaa vɛa?

Esia mele fiafiam be ele be Kristotɔ nagbe kpekpeɖeŋu nana hiãtɔ si ŋuti wòadze le be ɖewohĩ mate ŋu agbugbɔ gaa vɛ la o. Nusi wòle be Kristotɔ nawɔ na ame bubuwo la ƒo asitsatsa ƒe nuwɔna nyuiwo ta sasasã. Apostolo Yohanes bia be: “Amesi ke xexemenuwo le esi, eye wòkpɔ nɔvia hiã tui, eye wòsẽ dzime ɖee heku ŋɔe la, ekema aleke Mawu ƒe lɔlɔ̃ la nɔa emee mahã?” Ẽ, menye “nya kple aɖe” ɖeɖekoe wòle be Kristotɔwo natsɔ ‘alɔ̃ amee o, ke le nuwɔwɔ kple nyateƒe hã mee.’​—Yohanes I, 3:​17, 18.

Le go aɖewo me la, amea ate ŋu atso nya me be yemado ga na ye nɔvi si hiã tu la o. Adi be yeana nui alo ana kpekpeɖeŋu ƒomevi bubu aɖee. Le gɔmesese ma ke nu la, ne nya sesẽwo do mo ɖa le ɖoɖo si le gaa dodo ŋu me la, amesi gbɔ wodo gaa le la ate ŋu atia be yeawɔ nu le nublanuikpɔkpɔ me. Adi be yeabu alesi nɔnɔmewo trɔe na amesi wòdo gaa na la ŋu ahadidi ɣeyiɣi si wòatsɔ axe feae ɖe edzi loo, aɖe fea dzi loo, alo ate fli ɖe fea me keŋkeŋ kura gɔ̃ hã. Esiawo nye ame ŋutɔ ƒe nyametsotso si ame ɖesiaɖe awɔ na eɖokui.

Ele be wòanɔ susu me na Kristotɔwo be Mawu le nusianu kpɔm eye be míabu alesi míenɔ agbee hezã míaƒe nunɔamesiwo la ŋu kɔnta nɛ. (Hebritɔwo 4:​13) Ðikekemanɔmee la, Biblia ƒe aɖaŋu si woɖo be “[míawɔ] nuwo katã le lɔlɔ̃ me” la sɔ be woazã le gadodo le xɔlɔ̃wo dome hã me.​—Korintotɔwo I, 16:⁠14.

[Etenuŋɔŋlɔ]

[Nɔnɔmetata si le axa 22]

“Gagbala la Kple Srɔ̃a” (ƒe 1514), si Quentin Massys ta

[Afi Si Míexɔ Mɔɖeɖe Tso]

Scala/Art Resource, NY