‘Woƒle Nyateƒe’!

‘ƑLE nyateƒe, eye mègatsɔe dzra o.’ (Lododowo 23:23) Nunyala Salomoe xlɔ̃ nu nenema. Togbɔ be woate ŋu agblɔ le nyateƒenyawo katã ŋu nenema hã la, vevietɔ nyateƒe si le Mawu ƒe Nya, Biblia me ŋue woate ŋu agblɔe le wu. Nyateƒe ma ate ŋu akplɔ ame ayi agbe mavɔ me! (Yohanes 17:3, 17) Gake de dzesii be nyateƒe ma mesua ame si agbagbamadzemadzee o. Ele be woalɔ̃ ‘aƒlee,’ si fia be, woatsɔ nane asa vɔe alo aɖe asi le nane ŋu hafi axɔe. (Tsɔe sɔ kple Mateo 13:45, 46.) Ame akpa gãtɔ mele lɔlɔ̃m be yewoawɔ nenema o. Gake dzideƒotɔ aɖewo siwo ƒe xexlẽme le dzidzim ɖe edzi la le Biblia me nyateƒea ƒlem le dukɔ geɖe me—eye woɖea asi le woƒe nu xɔasi aɖe ŋu zi geɖe.

Le kpɔɖeŋu me, bu Yehowa Ðasefo siwo le Ɣetoɖoƒe Afrika dukɔ si nye Ghana me ŋu kpɔ. Le ƒe 1989 ƒe June me la, ame 34,000 kple edzivɔ koe xɔ Biblia me nyateƒea le dukɔ ma me henɔ egblɔm veviedodotɔe na ame bubuwo. Emegbe wode se ɖe woƒe gaglãgbe gbeƒãɖeɖedɔa nu. Ke hã, dzianukwaretɔwo ganɔ ‘nyateƒea ƒlem’—togbɔ be se meɖe mɔ o hã. Woɖe mɔxenua ɖa le October 31, 1991 dzi, eye kaka ƒe 1995 ƒe domedome naɖo si nye ƒe etɔ̃ kple afã tso esime woɖe mɔxenua ɖa megbe la, Yehowa ƒe Ðasefo siwo le dɔ dzi le Ghana ƒe xexlẽme dzi ɖe edzi va ɖo 46,104! Eye le ƒe sia me woƒe xexlẽme dzi ɖe edzi wu 52,800.

Nukae he amewo va Mawu ƒe Nya ƒe nyateƒea gbɔ? Nukawoe wo dometɔ aɖewo tsɔ sa vɔe hafi te ŋu ‘ƒle nyateƒea’? Bene míakpɔ ŋuɖoɖoa la, mina míalé ŋku ɖe Ghanatɔ Kristotɔ etɔ̃ ƒe nuteƒekpɔkpɔwo ŋu akpɔ.

Biblia me Nufiafiawoe Hee

Mina míalé ŋku ɖe nyɔnu aɖe si le eƒe ƒe blaeveawo me ŋu gbã. Fofoa nye subɔsubɔhakplɔla gake eva do le fofoa ƒe ha me. Le susu ka ta? Alesi wòlɔ̃ nyateƒea tae.

Nyɔnua gblɔ ɣeaɖeɣi be: “Ðasefoawo vaa míaƒe aƒeme zi geɖe ne wole yiyim tso aƒeme yi aƒeme. Meva dze sii le numedzodzro ʋee aɖewo megbe be Biblia dzie nusiwo fiam wonɔ la nɔ te ɖo bliboe. Mebia nya geɖe ku ɖe nyawo abe Mawuɖekaetɔ̃, dzomavɔ, luʋɔ ƒe makumakunyenye, kple vevietɔ xɔsegbedada ŋu. Mexɔ se vevie be Biblia mee nufiafia siawo tso. Gake Ðasefoawo kpe ɖe ŋunye mekpɔe be mele nenema o.”—Ne èdi Biblia ƒe nukpɔsusu le nyati siawo ŋu la, ke taflatse kpɔ Marko 13:32; Romatɔwo 6:23; Dɔwɔwɔwo 10:40; kple Korintotɔwo I, 13:8-10.

Ðetugbia yi edzi be: “Gake ƒonyemetɔwo tsi tre ɖe ŋunye vevie, vevietɔ fofonye. Esusu be ɖe wole bleyem. Gake menyae be nyateƒee nya siwo srɔ̃m menɔ tso Yehowa Ðasefowo gbɔ la nye. Medze agbagba be mana fofonye nanya nya siawo tso Biblia me, gake egbe esese. Le nyateƒe me la, tsitretsiɖeŋua nu va sẽ ɖe edzi.

“Gake nyemena ta o. Menyae be sidzedze vavãtɔ koe akplɔ ame ayi agbe mavɔ nɔnɔ me le Paradiso me, eye meɖoe kplikpaa be maku ɖe eŋu goŋgoŋ. Esi Ðasefo siwo le nutoa me se kuxi siwo dze ŋgɔm la, wova kpe ɖe ŋunye lɔlɔ̃tɔe, wode dzi ƒo nam eye wona nuhiahiã aɖewom. Esia na meva kpɔ Yesu ƒe nya siwo le Yohanes 13:35 ƒe vevienyenye dze sii, be: ‘Esia me amewo katã woanyae le bena, nye nusrɔ̃lawo mienye, ne lɔlɔ̃ le mia dome.’ Alesi meka ɖe edzi be Yehowa Ðasefowoe nye subɔsubɔha vavãtɔ la va de to ɖe edzi. Emegbe esi dzinyelawo kpɔe be nye agbenɔnɔ va nyo ɖe edzi la, edze wo ŋu, eye woƒe nɔnɔme ɖe ŋunye hã trɔ—wotrɔ ale gbegbe be fofonye gblɔ na Ðasefoawo be woava srɔ̃ Biblia kple fonye!”

Nyateƒea me Dzodzro na Ame Ðokui

‘Nyateƒea ƒeƒle’ nye nu sesẽ na sɔhɛ siwo dzila Ðasefowo nyi. Sɔhɛ aɖewo dina be yewoabu Biblia me nyateƒea nu tsɛe. Ne wodo kpo nyateƒeawo didi na wo ɖokui la, woƒe xɔse me mesẽna o, eye medea to o. (Tsɔe sɔ kple Mateo 13:20, 21.) Nathaniel si nye Ghana-ŋutsu aɖe si le eƒe ƒe blaetɔ̃awo me gblɔ alesi ‘wòƒle nyateƒea’ esime wònɔ ɖevime.

Egblɔ be: “Tso esime menye vidzĩ kee dzinyelawo fia Biblia lam. Esi menɔ tsitsim la, medzea wo yome míeyia gbeƒãɖeƒe, gake nyemetso nya me be mazu Ðasefo o. Le ɣeyiɣi aɖe megbe la, meva kpɔe be ele be malé ŋku ɖe nuwo ŋu na ɖokuinye.

“Gbã la, ele be maka ɖe edzi be Bibliae nye Mawu ƒe Nya, ke menye subɔsubɔgbalẽ kɔkɔe bubu aɖeke o. Mesrɔ̃e le ɖokuisinusɔsrɔ̃ me be eya koe nye agbalẽ kɔkɔe si me nyagblɔɖi gbogbo aɖewo siwo me kɔ eye wova eme pɛpɛpɛ la le. Mesrɔ̃e hã be dzɔdzɔmeŋutinunya me nyateƒenya aɖewo le Biblia me—le kpɔɖeŋu me, be anyigba ‘meku ɖe naneke ŋu o.’ (Hiob 26:7) Woŋlɔ nya siawo ƒe akpe geɖe hafi dzɔdzɔmeŋutinunyalawo va nya nu tso míaƒe ɣe kple eŋu ɣletinyigbawo ŋu. Mawu koe ate ŋu aʋã amewo be woaŋlɔ nya mawo!a

“Emegbe medi be manya subɔsubɔha si fiaa nyateƒe siwo wofia le Biblia me eye wonɔa agbe ɖe wo nu. Subɔsubɔha akpa gãtɔ fiaa dzomavɔ, Mawuɖekaetɔ̃, kple luʋɔ ƒe agbenɔnɔ le ku megbe. Gake nufiafia siawo me mekɔ nam o. Nye susue nye be: Ðe menye vifofo tagbɔsesẽtɔ koe alé via ƒe asi ade tsi si le fiefiem le ze me me be yele to hem nɛ oa? Ke aleke wɔ hafi Mawu lɔlɔ̃tɔ atsɔ viawo ade hell ƒe dzobibi me be woakpe fu? Gake Yehowa Ðasefowo fiaa nu wòsɔna ɖe Biblia kpukpui abe esi le Romatɔwo 6:23 ene nu, si gblɔ be: ‘Nuvɔ̃ la ƒe fetu enye ku’—menye hell ƒe dzobibi aɖe o. Esia me kɔ nam.

“Mekpɔe hã be Yehowa Ðasefowo dina be yewoƒe amewo katã nanɔ agbe ɖe Biblia ƒe gɔmeɖosewo nu eye be woɖea amesiwo katã gbea dzimetɔtrɔ henɔa nuvɔ̃wɔwɔ dzi la le hame. Le susu siawo katã ta la, meƒo nya ta be Yehowa Ðasefowo sie nyateƒea le, eye nye ŋutɔ meɖoe be mazu wo dometɔ ɖeka. Medze agbagba vevie hafi medze wonyrɔm mezu Ðasefo.”—Korintotɔwo I, 5:11-13.

Nathaniel ƒe nuteƒekpɔkpɔa fia be ele be sɔhɛ siwo dzila Kristotɔwo nyi gɔ̃ hã ‘naƒle nyateƒea.’ Mele be woanɔ hame ƒe kpekpewo dem ɖekematsɔlemee dzro ko o. Ele be woanɔ abe blema Beroiatɔwo ene, ‘anɔ ŋɔŋlɔawo me dzrom gbesiagbe be, nusiawo le eme hã.’ (Dɔwɔwɔwo 17:11) Esia bia ɣeyiɣi kple agbagbadzedze, gake xɔse sesẽ kple kakaɖedzie ado tso eme.—Tsɔe sɔ kple Efesotɔwo 3:17-19.

Alakpasubɔsubɔ Tii

Esusɔ vie Ghana-ŋutsu aɖe si ŋkɔe nye Godwin naxɔ ƒe 70 hafi wòdo go le Presbiteria Ha kple Masonwo ƒe Lodge ha me. Godwin gblɔ be: “Nanewo nɔ edzi yim le sɔlemeha la me siwo medze ŋunye o. Le kpɔɖeŋu me, dzrehehe yia edzi ŋutɔ, eye wogale edzi kokoko. Ɣeaɖewoɣi ele be kpovitɔwo nava he ŋutifafa vɛ hafi nuwo nanɔ ɖoɖo nu! Mekpɔe be nusiawo mesɔ na Kristo yomedzelawo o. Emegbe nya va ɖo mía kple hati Presbiteriatɔ aɖe dome. Dziɖuɖu ƒe ʋɔnudrɔ̃ƒe aɖee drɔ̃ nya la eye wobu fɔ ŋutsu kemɛ. Gake sɔlemea ƒe nunɔla va de ŋutsu sia dzi madzemadzee eye wòdi be yeaka ŋkume nam le hame bliboa ŋkume! Megblɔ nya si le asinye nɛ eye medo go le sɔlemea me—nyemagayi gbeɖe o.

“Ɣeyiɣi aɖe va yi, eye Yehowa Ðasefowo va aƒenyeme. Gbã la, meɖo to le esi nyemedi be manyã amesiwo gblɔa Mawu ƒe nya o ta. Meva nɔ ekpɔm dzesii be togbɔ be menye Presbiteriatɔ ƒe bla nanewo hã la, nu geɖe li siwo nyemenya le Biblia me o. Le kpɔɖeŋu me, nyemenya be agbe mavɔ nɔnɔ le Paradiso me le anyigba dzi ƒe mɔkpɔkpɔ le Biblia me o.b Eye esi medze Yehowa Ðasefowo ƒe kpekpewo dede gɔme la, woƒe nuwɔnawo, kple vevietɔ sɔhɛ siwo le wo dome ƒe awudodo kple dzadzraɖo wɔ dɔ ɖe dzinye ŋutɔ. Amesiwo nɔa agbe ɖe Biblia ƒe gɔmeɖosewo nu ŋutɔŋutɔe nye esiawo!”

Gake ehiã kokoko be wòawɔ asitɔtrɔ kutrikukutɔe le eƒe agbe me hafi ‘aƒle nyateƒea.’ Godwin gblɔ be: “Menye Masonwo ƒe Lodge ha me tɔ. Togbɔ be wonya be nɔvisihabɔbɔ si kpena ɖe emenɔlawo ŋue wònye hã la, mewɔa kɔnu aɖewo siwo me wozãa ametakoliwo kple ƒuwo le eye woyɔa gbɔgbɔwo le. Wobe gbɔgbɔ siawo kpena ɖe amesiwo doa ka kple wo la ŋu wotsina le gbɔgbɔ me.

“Nye nusɔsrɔ̃wo kpe ɖe ŋunye mekpɔe be Yehowa Mawu tsri gbɔgbɔyɔyɔ nuwo wɔwɔ elabena ana Satana kple eƒe gbɔgbɔ vɔ̃wo nakpɔ ŋusẽ ɖe ame dzi.c Ðe mayi edzi anye Masonwo ƒe Lodge ha la me tɔ anɔ eƒe vivimenuwo wɔm loo alo ɖe mado le eme adze Yehowa ŋua? Tiatia eveliae mewɔ. Megblẽ Freemasontɔwo ƒe nuzazãwo katã kpakple awu siwo medona yia Lodgetɔwo ƒe kpekpewo gɔ̃ hã dome. Meva kpɔ ŋugbe si Yesu do be, ‘Nyateƒe la lawɔ mi ablɔɖeviwoe’ la ƒe nyateƒenyenye dze sii! (Yohanes 8:32) Fifia la, mele nusiwo mesrɔ̃ la gblɔm na ame bubuwo dzidzɔtɔe. Naneke mevem o.”

Dzianukwaretɔ akpe geɖe hã tsɔ nu gãwo sa vɔe nenema ke be ‘yewoaƒle nyateƒea.’ Naneke meve woawo hã le tɔtrɔ siwo wowɔ ŋu kura o abe Kristotɔ etɔ̃ siwo ƒe nya míegblɔ le afisia ene. Biblia me nyateƒea na be “gɔmeɖoɖoanyi nyui hena ɣeyiɣi si gbɔna [la su wo si], bene woƒe asi nasu agbe vavã la dzi.” (Timoteo I, 6:19) “Agbe vavã” la kpakple eŋu yayrawo ate ŋu asu wò hã asiwò tegbetegbe ne ‘àƒle nyateƒea’ ko.

[Etenuŋɔŋlɔwo]

[Nɔnɔmetata si le axa 9]

Nathaniel

[Nɔnɔmetata si le axa 9]

Godwin