Nu Vevi Siwo Hiã na Hehe Nyui Xɔxɔ

NYITSƆ laa The New York Times ta nyati aɖe si dze le eƒe axa gbãtɔ dzi si ƒo nu tso Latoya, ƒe-16-vi si le suku kɔkɔ dem ŋuti. Egblɔ be yexɔ ƒe 11 esime ye fofo dze ye ƒoƒo kple ye gbɔ dɔdɔ gɔme. Dadaa si nye atikevɔ̃ɖizãla la fɔ agba dzo. Nyadzɔdzɔgbalẽa ka nya ta be: “Aƒea nye teƒe si wogblẽ ɖi eye nugododeƒe meli o, alo xɔa me le ale gbegbe be evɔ̃na na emedɔdɔ.” Gake Latoya nye amesi ɖe dzesi. Togbɔ be nɔnɔmeawo le alea hã la, Latoya va zu zimenɔla na Dukɔa ƒe Habɔbɔ si Doa Nusrɔ̃viwo ɖe Dzi si le eƒe suku kɔkɔa le ƒe sia ƒe gɔmedzedze eye wòxɔ dzeside kɔkɔ evelia le nusɔsrɔ̃ me.

Nukae ate ŋu akpe ɖe ɖevi si tso ƒome gbegblẽ me gɔ̃ hã ŋu be wòawɔ dɔ nyuie le suku? Zi geɖe la, nu vevi si hiã na hehe nyui xɔxɔ enye be ame tsitsi si léa be na ame nanɔ ame si—anyo wu ne ɖevia dzilawo dometɔ ɖekae wònye—amesi ana kpekpeɖeŋu eye wòatsɔ ɖe le ɖevia ƒe sukudede me vevie. Ame aɖe si le suku kɔkɔ ƒe xɔ mamletɔ me la kpɔe be esia le vevie ale gbegbe be eʋãe wògblɔ be: “Dzilawo ƒe kpekpeɖeŋu koe ana ɖeviwo nate ŋu akpɔ dzidzedze le suku.”

Nufiala geɖe lɔ̃ ɖe edzi. Nufiala aɖe si le New York City gblɔ be: “Le sukuvi ɖesiaɖe—wo dometɔ geɖe li—si wɔa dɔ nyuie eye wòkpɔa dzidzedze le sukudede me gome la, dzila aɖe nɔ anyi si na kpekpeɖeŋu wo ɣeawokatãɣi.”

Dzilawo ƒe Kpekpeɖeŋu, Nu Vevi Aɖee Wònye

Le ƒe si va yi me la, Reader’s Digest wɔ numekuku tso nyabiase sia ŋu be, “Nukatae sukuvi aɖewo dzea agbagba wu bubuwo?” Wogblɔ be nusiwo tae dometɔ ɖekae nye be “ƒome likewo nyea ŋusẽdoame na ɖeviwo le suku.” Dzila siwo le ƒome mawo me léa be na wo viwo lɔlɔ̃tɔe eye wona dzidzenu kple taɖodzinu nyuiwo nɔa wo si. Gake dzila aɖe de dzesii be: “Màte ŋu ana mɔfiame nyui ne mènya nusiwo le edzi yim le suku o.”

Mɔ nyui si dzi nàto anya enye be nàɖi tsa ayi. Vidada aɖe si ɖia tsa yina la ŋlɔ be: “Ne meto vinyenyɔnuvi ƒe sukuxɔ ŋgɔ yina la, mesena wonɔa gbegblẽnyawo kple yakanyawo gblɔm. Ðeviwo le asi lilim wo nɔewo ŋu le afisiafi—ne sinima me nukpɔkpɔe la, anye ne woagblɔ be ɖeviwo nagakpɔe o.” Sasrãkpɔ siawo akpe ɖe ŋuwò nàkpɔ alesi gbegbe wòsesẽe be ɖeviwo naxɔ hehe nyui eye woanɔ agbe nyui la adze sii.

Eɖe dzesi be agbalẽ si nye The American Teacher 1994 gblɔ be: “Anɔ eme be sukuvi siwo ŋuti wowɔ nu vlo le la agblɔ be kadodo nyui mele yewo dzilawo kple suku dome o, abe kpekpe kple nufialawo, dzilawo alo ƒuƒoƒo ƒe takpekpe dede, alo tsaɖiɖi ayi sukua ene.”

Vidada aɖe si tsɔ ɖe le eme la ɖe nusi wòle be dzilawo nawɔ la gblɔ. Egblɔ be: “Ði tsa yi! Na sukudzikpɔlawo nanya be yetsɔ ɖe le nusi viwòa le sɔsrɔ̃m me. Meɖia tsa yia sukua edziedzi eye menɔa anyi kpɔa nusi srɔ̃m wole teƒe.” Vidada bubu te gbe ɖe alesi wòle vevie be woanye ɖevia taʋlĩlae dzi. Eɖe eme be: “Vinyewo yi ɔfis be yewoaƒo nu kple sukudzikpɔla gake meɖo to wo o. Esi vinye kplɔm yi le ŋufɔke la, woxɔm atuu be yewoakpe ɖe ŋunye—kple vinyea hã ŋu.”

Vidada sia si si viŋutsuvi ene la la te gbe ɖe alesi wòle be woatsɔ ɖe le suku wɔna siwo kpɔa ŋusẽ ɖe viwòa ƒe hehexɔxɔ dzi tẽ la hã me vevie. Egblɔ be: “De dzilawo kple nufialawo ƒe kpekpe, aɖaŋudɔwɔwɔ ɖeɖefia—nusianu si wɔm viwòwo le si woakpe wò be nàyi ko. Esia ana mɔnukpɔkpɔ wò be nàdo go viwòa ƒe nufialawo. Ele be woanya be èbua viwò ƒe sukudede be enye nu vevi le eƒe agbe me. Ne nufialawo nya esia la, aʋã wo be woatsɔ ɖe le eme na viwòa geɖe wu.”

Nuwɔwɔ Aduadu Kple Nufialawo

Dzila aɖewo ase le wo ɖokui me be nu vevi geɖe le yewo si yewoawɔ le fiẽ siwo me sukuwo awɔ ɖoɖo tɔxɛ be dzilawo kple nufialawo nado go me. Gake le nyateƒe me la, nukae le vevie wu be nàyi amesiwo le agbagba dzem be woakpe ɖe viwòwo ŋu be woasrɔ̃ nu nyuie la gbɔ? Ele vevie be dzilawo kple nufialawo nawɔ nu aduadu!

Wowɔ ɖoɖo nyui aɖe le Russia be woatsɔ atu dzilawo kple nufialawo dome ƒomedodo ɖo. Woŋlɔa suku dɔdasiwo katã ɖe agbalẽvi si woyɔna be Dnievnik dzi—enye nusi wowɔna gbesiagbe ƒe nuŋlɔɖi si ŋu wowɔ ɣletigbalẽ kpe ɖo. Ele be sukuvi natsɔ eƒe Dnievnik ava sukuxɔme gbesiagbe eye wòatsɔe afia nufiala ne ebia eta. Sukuviawo tsɔa Dnievnik la fiaa wo dzilawo hã, eye wobia tso wo si be woade asi ete kwasiɖa ɖesiaɖe. Abe alesi Victor Lobachov, vifofo si le Moscow si ƒe viwo tsi ɖo sukudede me gblɔ ene la, “nuŋlɔɖi sia kpena ɖe dzilawo ŋu be woanya wo viwo ƒe dɔdasiwo kple dzesi siwo woxɔ.”

Gake nufialawo toa nyatoƒoe egbea be dzilawo megatsɔa ɖeke le wo viwo ƒe sukudede me o. Suku kɔkɔ ƒe nufiala aɖe si le United States gblɔ be yeɖo lɛta 63 ɖe dzilawo kpɔ tsɔ na nyanya wo be wo viwo mele agbagba dzem le suku o. Dzila etɔ̃ koe zɔ ɖe edzi va kpɔ ye!

Esia wɔ nublanui vavã! Ele be dzilawo natsɔ ɖe le wo viwo ƒe sukudede me, eye enye woƒe agbanɔamedzi. Sukudzikpɔla aɖe ƒo nu tso nya la ŋu nyuie esi wògblɔ be: “Sukudede ƒe taɖodzinue nye be wòakpe ɖe dzilawo ŋu be wo viwo nazu ame tsitsi siwo atsɔ agbanɔamedziwo.”

Eyata ele be dzilawo natso ɖe eŋu adze si wo vi ƒe nufialawo. Abe alesi dzila aɖe gblɔe ene be, “ele be nufialawo navo le wo ɖokui me aƒo ka na wò ɣesiaɣi.” Eye ele be dzilawo naʋu woƒe ʋɔtru ɖi na nufialawo—woade dzi ƒo na wo gɔ̃ hã—be woaƒo nu faa tso wo vi ŋu. Dzilawo nabia nya siawo tɔgbe be: Ðe nèkpɔ kuxi aɖe le vinye ŋua? Ebua amea? Ekpɔa gome le nusɔsrɔ̃awo katã mea? Evana ɖe game dzia?

Ke ne nufiala la gblɔ nya aɖe le viwò ŋu si medzɔ dzi na wò o ɖe? Mègabui be aʋatso kam wòle o. Nublanuitɔe la, sɔhɛ geɖe siwo edze abe wonɔa agbe ɖɔʋu le aƒeme alo le woƒe subɔsubɔha me la le agbe eve nɔm vavã. Eyata ɖo to nufiala la bubutɔe, eye nade dzesi nya siwo gblɔm wòle.

Ne Viwòa Gbɔ Va Aƒeme

Aleke wò dzila nèsena le ɖokuiwò me zi geɖe ne ètso dɔ me gbɔ va aƒeme? Nu tia kɔ na wòa? Dzi ɖena le ƒowòa? Viwò tɔ ate ŋu awu ema ne etso suku gbɔ va aƒeme. Eyata vifofo aɖe de dzi ƒo be: “Wɔe be gbɔgbɔ va aƒeme navivi wo nu. Ðewohĩ ŋkekea me sesẽ na wo.”

Ne anya wɔ la, anyo ŋutɔ be ɖevia nagbɔ va tu dzilaa le aƒea me. Vidada aɖe de dzesii be, “ɖeviwo mate ŋu agblɔ nusi le edzi yim la na wò ne mèli aƒo nu kpli wo o. Eyata medzea agbagba be manɔ aƒeme hafi ɖeviawo nagbɔ.” Menye nusi wɔm ɖevia le koe wòle be dzila nanya o ke ele be wòanya nusi ŋu bum wòle kple alesi wòsena le eɖokui me hã. Esia nyanya bia ɣeyiɣi, agbagbadzedze, kple amenubeble geɖe. (Lododowo 20:5) Dzeɖoɖo gbesiagbe le vevie.

Gɔmedzesukunufiala aɖe si le New York City de dzesii be: “Le ŋkeke ɖeka ɖesiaɖe dzi la, woate ŋu aƒa nɔnɔme siwo le suku si ɖo xaxa me ɖe viwò me.” Eyata ede dzi ƒo be: “Nɔ ŋudzɔ ɖe nusi le gegem ɖe viwò ƒe dzi me ŋu. Ne ɖeɖi te ŋuwò aleke ke hã, gbɔ dzi ɖi nàna wòaɖe eƒe dzimenyawo agblɔ eye nàɖe nɔnɔme gbegblẽ ɖesiaɖe si le eme atsɔ nyuiawo aɖo eteƒe.”—Lododowo 1:5.

Nenema ke ame aɖe si fia nu ɣeyiɣi didi le suku kɔkɔ me xlɔ̃ nu be: “Aɖe vi ne èbia nya aɖewo koŋ tso ŋkekea kple nusiwo wowɔ ŋuti tsɔ wu be nàbia nusi dzɔ le suku ko. Mele be woawɔ esia kple moveviɖoɖo alo nyaheɖeameŋutɔe o ke boŋ le dzeɖoɖo kple ɖevia le gbeɖɔɖɔe me.”

Richard W. Riley si nye amesi kpɔa agbalẽsrɔ̃nyawo dzi le United States xlɔ̃ nu be: “Ƒo nu kple viwòwo tẽ, vevietɔ kple ƒewuiviwòwo, tso afɔku siwo le atike vɔ̃ɖiwo kple aha muame me kpakple agbe si ƒomevi nèdi be woanɔ ŋu. Ne dzeɖoɖo kpli wo alea mevivia nuwò o hã la, ate ŋu akpɔ woƒe agbe ta.”

Mele be dzila, vevietɔ amesi dzi agbanɔamedziwo le le Kristo-hamea me, nawɔe wòadze abe ɖe wòxaxa akpa be mate ŋu aɖo to viawo ene o. Togbɔ be nya si gblɔm wole sese ate ŋu ate ɖe ame dzi hã la, na wò moɖoɖo kple nɔnɔme nana woanya be edzɔ dzi na ye be wole dze ɖom kpli ye faa. Sukuvi aɖe ɖo aɖaŋu be: “Megawɔ nuku na wò ne viwòa le nu ƒom tso atike vɔ̃ɖi alo gbɔdɔdɔ le suku ŋuti o.”

Le ƒomewo ƒe gbagbã ta la, ame geɖe li egbea siwo míate ŋu ayɔ be ‘tsyɔ̃eviwo.’ (Hiob 24:3; 29:12; Psalmo 146:9) Zi geɖe la, ame aɖe le Kristo-hamea me si ate ŋu ana kpekpeɖeŋu sɔhɛ si ɖo xaxa me. Ènye amesi ate ŋuia?

Na Woasrɔ̃ Nu Ahatsɔ Agbanɔamedziwo

Sɔhɛ geɖe medoa vevie sukunusɔsrɔ̃ abe Latoya si ƒe nya míegblɔ le gɔmedzedzea me ene o. Ehiã be woado ŋusẽ wo dometɔ geɖe be woasrɔ̃ nu. Joseph Fernandez si nye New York City sukuwo dzikpɔla tsã gblɔ be: “Míewɔ ɖoɖo koŋ le aƒeame na nusɔsrɔ̃ si dzi wòle be woawɔ ɖo. Míeƒle agbalẽwo na wo, wɔ ɖoɖo ɖe agbalẽdzraɖoƒe yiyi ŋu, eye míena sukudede kple gomekpɔkpɔ le nusɔsrɔ̃ me xɔ nɔƒe gbãtɔ.”

Sukudzikpɔla bubu gblɔ be: “Ele be míana agbalẽwo kple ŋutinyawo nabɔ ɖe ɖeviwo si abe alesi míena television, sinima, video kple fiasemenuwo bɔ ɖe wo si ene.” Ne ɖeviwo le woƒe sukudɔdasiwo wɔm la, dzilawo ate ŋu awɔ ɖoɖo ate ɖe wo ŋu anɔ wɔa ŋutɔwo ƒe nu srɔ̃m alo anɔ agbalẽ xlẽm. Esia awɔe be viwòwo nakpɔe be èdea asixɔxɔ agbalẽsɔsrɔ̃ ŋu.

Television ye nye mɔxenu gãtɔ na nusɔsrɔ̃ le aƒe geɖe me. Nufiala aɖe gblɔ be: “Kaka sɔhɛwo naxɔ ƒe 18 la, wozã gaƒoƒo 11,000 ɖe sukuxɔmenusɔsrɔ̃ ŋu eye wogblẽ gaƒoƒo 22,000 ɖe television kpɔkpɔ ŋu.” Dzilawo ate ŋu aɖe wo viwo ƒe television kpɔkpɔ dzi akpɔtɔ ɖewohĩ to alesi woa ŋutɔwo manɔ ekpɔm edziedzi o me. Hekpe ɖe eŋu la, miƒo mia ɖokui ɖe nane sɔsrɔ̃ kpli mia viwo me. Mixlẽ nu ɖekae. Ðo ɣeyiɣi ɖi gbesiagbe nàkpɔe be wowɔ woƒe sukudɔdasiwo.

Woana dɔdasi geɖe viwòwo le suku be woawɔ. Ðe woawɔea? Ðewohĩ woawɔe ne èfia wo be woatsɔ woƒe agbanɔamedziwo le aƒeme. Mɔ vevi ɖeka si dzi nàto enye be nàde aƒemedɔwo asi na wo gbesiagbe. Azɔ̃ bia tso wo si be woawɔe ɖe ɣeyiɣi ɖoɖi aɖe dzi. Enye nyateƒe be hehenana sia abia agbagbadzedze geɖe le gowòme, gake afia viwòwo alesi woatsɔ agbanɔamedziwoe ale be woate ŋu akpɔ dzidzedze le suku kple le agbe me emegbe.

Sukuvi ƒe Eɖokuitsɔtsɔna, Nu Vevi Wònye

Vidzikpɔkpɔ ƒe aɖaŋuɖola Arthur Kirson de dzesi nu vevi bubu si ana woasrɔ̃ nu nyuie esime wògblɔ tso Latoya si ŋkɔ míeyɔ le gɔmedzedzea me ŋu be: “Zi gbãtɔ si medo goe enye esime aƒeme nya gã aɖe gadzɔ. Ðeviae nye si nɔ anyi eye eƒe mo katã xɔ abi [le ŋlɔmi si fofoa wɔ le eŋu ta]. Gake nusi ŋu mekpɔ be etsi dzi ɖo koe nye eƒe sukudɔdasi.”

Ẽ, nu vevi si hiã na hehe nyui xɔxɔ enye ɖevia ƒe ɖokuitsɔtsɔna deto ɖe nusɔsrɔ̃ ŋu. Sɔhɛ aɖe si le New York City gblɔ be: “Le sukuwo me egbea la, sukuvia ŋutɔ ƒe veviedodo kple hehexɔxɔ koŋ dzie viɖe si wòakpɔ la nɔ te ɖo.”

Le kpɔɖeŋu me, nufiala aɖe gblɔ na vidada aɖe si tsɔ ɖe le via ƒe sukudede me be: “Aƒenɔ Smith, megatsi dzi o. Justin nye ame sesẽ ale gbegbe, mahiã be wòanya nuŋɔŋlɔ nyuie o. Axɔ agbalẽŋlɔla be wòaŋlɔ nu nɛ.” Aleke ke ɖevi aɖe sesẽe o, be woanya nuxexlẽ kple nuŋɔŋlɔ—kpakple alesi woaŋlɔ nu tso nane ŋu eme nakɔ, asinua nanya xlẽ, eye nyawo nade—le vevie.

Ewɔ nuku be nufiala aɖewo megbe nya si susuŋutinunyala xɔŋkɔ Carl Rogers gblɔ o be: “Mele be ame aɖeke nadze agbagba be yeasrɔ̃ nane si ŋu mekpɔ asixɔxɔ le o.” Nukae gblẽ le eƒe nya la ŋu? Ele be wòanɔ nyanya me be ɖevi mate ŋu akpɔ asixɔxɔ si le nusi wobe nesrɔ̃ ŋu do ŋgɔ o. Zi geɖe la, womanya asixɔxɔ si le eŋu o vaseɖe esime wova tsi hafi. Eme kɔ ƒã be egbeviwo hiã ɖokuitsɔtsɔna be woasrɔ̃ nu nyuie!

Cindy si nye ƒe-14-vi si le sukuxɔ asiekelia me la nye sɔhɛ si ɖo kpɔɖeŋu nyui le ɖokuitsɔtsɔna sia me. Eɖe eme be: “Ne míekpã le suku la, meɖoa dze kple nufialawo be madze si wo nyuie. Medzea agbagba be manya nusi dim wole tso woƒe sukuviwo si.” Eɖoa to nyuie hã le klass eye wòtsɔa eƒe dɔdasiwo ɖoa nɔƒe gbãtɔ. Enye numãme na sukuvi siwo kpɔa dzidzedze la be woatsɔ nuŋlɔti kple agbalẽ ɖe asi anɔ dzesi dem nya veviwo ne wole to ɖom le klass alo le nu xlẽm.

Nu vevi bubu si ana woasrɔ̃ nu nyuie enye be woaɖoe kplikpaa atsri hadede vɔ̃wo. Cindy gblɔ be: “Media amesi nɔa agbe nyui ɣesiaɣi. Le kpɔɖeŋu me, mebiaa sukuhatiwo nusi wosusu le asimasi si le atike vɔ̃ɖiwo zãm hele agbe gbegblẽ nɔm ŋuti. Ne wogblɔ nya aɖe abe, ‘Nukae gblẽ le ema ŋu?’ ene la, mekpɔnɛ dzea sii be womenye zɔhɛ nyuiwo o. Gake ne ame aɖe ɖee fia be yenyɔ̃ ŋu agbenɔnɔ ma ƒomevi eye wògblɔ be yedi be yeato vovo la, ke metianɛ be manɔ egbɔ le ŋudɔmenuɖuɣi.”

Edze ƒã be hehe nyui xɔxɔ egbea ƒe gbetɔame geɖe li. Gake woate ŋu axɔ hehe nyui alea ne dzilawo kple sukuviwo siaa wɔ nu veviawo ŋuti dɔ. Azɔ̃ miadzro ɖoɖo bubu si li si ate ŋu akpe ɖe ŋuwò geɖe be nàsrɔ̃ nu nyuie la me.

[Aɖaka si le axa 19]

Èwɔa Vinugbee alo Lɔ̃a Hehenana?

Biblia xlɔ̃ nu be vinugbeewɔwɔ na ɖeviwo hea afɔku vɛ. (Lododowo 29:21) Albert Shanker si nye zimenɔla na Amerika Nufialawo ƒe Habɔbɔ lɔ̃ ɖe esia dzi be: “Dzila aɖewo susui be yewole nusianu si nyo na yewo viwo wɔm nenye be wowɔ nusianu ɖe ɖeviawo ƒe didi nu. Gake míenya be ema mesɔ o.”

Ðevi geɖe gɔ̃ hã nya be viwɔwɔ na ame alea menyo o. Massachusetts-nyadzɔdzɔgbalẽ aɖe ka nya ta le ƒe sia ƒe gɔmedzedze be: “Numekuku si wowɔ le sukuvi siwo le xɔ adelia vaseɖe wuievelia me le afisi woyɔna be 1572 West Springfield ɖee fia be ‘dzilawo ƒe mɔɖeɖe ɖe nusianu ŋu’ koŋ gbɔe wòtso be ɖevi siwo xɔ ƒe siawo va le atikevɔ̃ɖiwo kple aha muamewo zãm le suku ke ­menye xɔlɔ̃wo ƒe nyaƒoɖeamenu gbɔe wòtso o.”

Viwɔwɔ na ɖeviwo alea hã gbɔe wòtso be gbɔdɔdɔ ƒe agbegbegblẽnɔnɔ va bɔ. Vavãe, Biblia gblɔe be ne wogbe tohehe na vi la, ahe ŋukpe ava ƒomea dzi.​—⁠Lododowo 29:⁠15.

[Aɖaka si le axa 22]

Nusi Dzilawo Ate Ŋu Awɔ

✔ Nya viwòa ƒe suku, eƒe taɖodzinuwo, kple alesi wòbua wò agbenyuinɔnɔ kple dzixɔsewoe.

✔ Dze si viwòa ƒe nufialawo, eye dze agbagba nàtu dɔwɔwɔ aduadu ƒe ƒomedodo nyui ɖo kpli wo.

✔ Tsɔ ɖe le viwòa ƒe sukudɔdasiwo me vevie. Xlẽ nu kplii edziedzi.

✔ Wɔ ɖoɖo ɖe nusi viwòa kpɔna le television dzi kple ɣeyiɣi si gbegbe wòkpɔnɛ ŋu.

✔ Le ŋku ɖe nusi viwòa ɖuna ŋu. Suklinuwo ɖuɖu fũ ate ŋu agblẽ nu le ɖevia ƒe ŋutete be wòanɔ ŋute ŋu.

✔ Kpɔ egbɔ be viwòa dɔa alɔ̃ wòsuna nɛ. Ðevi siwo ŋu ɖeɖi te mete ŋu srɔ̃a nu nyuie o.

✔ Kpe ɖe viwòa ŋu wòatia xɔlɔ̃ nyuiwo.

✔ Nye viwòa ƒe xɔlɔ̃ vevitɔ. Ehiã xɔlɔ̃ tsitsi geɖe alesi nu wòate ŋu akpɔ.

Nusi Ðeviwo Ate Ŋu Awɔ

✔ Na dziwòlawo nakpe ɖe ŋuwò nàɖo sukudede me taɖodzinuwo kple mɔ siwo dzi nàto aɖo wo gbɔ. Dzro taɖodzinu siawo me kple wò nufialawo.

✔ Tsɔ ŋuɖɔɖo tia nusiwo nàsrɔ̃ le wò nufialawo kple dziwòlawo ƒe kpekpeɖeŋu me. Zi geɖe la, nusɔsrɔ̃ si le bɔbɔe si wò ŋutɔ nate ŋu atia faa la menyea nyuitɔ o.

✔ Dze agbagba nàtu ƒomedodo nyui ɖo kple wò nufialawo. Nya nusi wodi tso asiwò. Dzro wò ŋgɔyiyi kple wò kuxiwo me kpli wo.

✔ Nye toɖola nyui le sukuxɔ me. Mègana woahe wò ade nuwɔna gbegblẽwo me o.

✔ Tia xɔ̃wòwo nunyatɔe. Woate ŋu akpe asi ɖe wò ŋgɔyiyi le suku ŋu alo axe mɔ ɖee.

✔ Wɔ wò aƒemedɔwo kple sukudɔdasiwo nyuie alesi nàte ŋui. Na esia naxɔ wò ɣeyiɣi veviwo. Bia kpekpeɖeŋu tso dziwòlawo alo ame tsitsi bubu gbɔ ne ehiã.

[Nɔnɔmetata si le axa 20]

Ðo to bubutɔe ne nufiala le nutsotso aɖe nam tso viwòa ŋu

[Nɔnɔmetata si le axa 21]

Bia nya viwòa tso suku ŋu gbesiagbe