Xexeame Katã ƒe Suku Kpɔdzidzedze aɖe
MENYE suku si ame aɖe ɖo si dede bia ga geɖe alo yunivɛsiti xɔŋkɔ si wotiaa ame ʋee aɖewo ko wodena ye esia nye o. Ao, womexɔa ga le suku sia delawo si o. Anɔ eme be wole ɖewo wɔm le afisi tsɔ ɖe gbɔwò. Woyɔnɛ be Teokrasi Subɔsubɔ Suku, eye Yehowa Ðasefowo ƒe takpeƒewoe wowɔnɛ le. Amesiwo ade miliɔn atɔ̃e dea suku sia le xexeame katã.
Ðewohĩ àbia be, ‘Nukawoe nye edede ƒe nudidiwo? Nukae wofiana le sukua? Aleke wowɔnɛ? Eye aleke wòle vi ɖem na amewoe?’
Nudidiwo
Togbɔ be wokpea amesiame be wòade Teokrasi Subɔsubɔ Sukua hã la, ele be amesiwo le edem nawɔ nu wòasɔ kple sukua ƒe nusrɔ̃gbalẽ vevitɔ, Biblia, ƒe nufiafiawo. Wodi tso wo si be woanɔ agbe si sɔ ɖe Biblia ƒe agbenyuinɔnɔ ƒe nudidiawo nu. Eyata nusrɔ̃viwo mate ŋu anɔ agbe gbegblẽ nɔm o. Womate ŋu anye fiafiwo, ahamulawo, matrewɔlawo, atamazãlawo, kple bubuwo o.—Korintotɔwo I, 6:9-11.
Egbea woŋe aɖaba ƒu awudodo ŋuti sewo dzi le suku geɖe me, gake wobia tso sukuvi siwo dea Teokrasi Subɔsubɔ Sukua si be woado awu dzadzɛwo ɖe nɔnɔme nyui me. (Timoteo I, 2:9, 10) Womeɖo ƒe aɖeke ɖi be ame naxɔ hafi ade suku sia o. Ðevi siwo xɔ ƒe ene alo atɔ̃ siwo te ŋu xlẽa nu la denɛ eye wowɔa dɔdasiwo edziedzi, abe alesi ŋutsu kple nyɔnu siwo le woƒe ƒe 90-awo me hã wɔnɛ ene.
Ðoɖo Kple Nufiafiawo
Le afisiafi kloe la, wowɔa Teokrasi Subɔsubɔ Suku si xɔa aɖabaƒoƒo 45 la le kwasiɖa domedome ƒe fiẽ me be wòanya de na amesiame. Ne sukudzikpɔla gblɔ dzaadonamenya kpui aɖe vɔ la, fiẽ ma ƒe nuƒola gbãtɔ ƒoa aɖabaƒoƒo 10 vaseɖe 15 ƒe nuƒo si tso sukua ƒe nusrɔ̃gbalẽwo dometɔ ɖeka me. Eye zi geɖe la, etsɔa aɖabaƒoƒo etɔ̃ vaseɖe atɔ̃ biaa nya le nusi ŋu wòƒo nu tsoe ŋu tsɔ toa emee.
Emegbe nufiala bibi aɖe toa kwasiɖa sia kwasiɖa ƒe Biblia xexlẽ ƒe dɔdasia me nyati veviwo me, eye zi geɖe etsoa Biblia ƒe ta eve vaseɖe ene me. Aɖabaƒoƒo adee wotsɔ wɔa numetoto siae. Sukuvi siwo zɔna ɖe kwasiɖa sia kwasiɖa ƒe aƒemedɔdasi sia dzi la axlẽ Biblia bliboa awu enu le ɣeyiɣi aɖe megbe.
Ne woto Biblia xexlẽ me nyati veviwo me vɔ la, wowɔa sukuvi ƒe dɔ etɔ̃ siwo dometɔ ɖesiaɖe xɔa aɖabaƒoƒo atɔ̃. Ðeka nye Biblia xexlẽ si tso afisi wode wo si be woaxlẽ le aƒeme la me. Nuƒo eve bubuawo tso sukua ƒe nusrɔ̃gbalẽ siwo wode dzi ƒo na sukuviawo katã be woaxlẽ atsɔ adzra ɖo ɖe nusɔsrɔ̃a ŋu la me. Le sukuvi ɖesiaɖe ƒe dɔdasi megbe la, sukudzikpɔla kafua amea heɖoa aɖaŋu nɛ be wòagawɔe ayi ŋgɔ.
Sukudzikpɔla ƒe aɖaŋuɖoɖo tsoa agbalẽ si nye Theocratic Ministry School Guidebook si wokpɔ mɔ be sukuvi ɖesiaɖe axlẽ nyuie la me. Be sukuvia nate ŋu awɔ nuƒo ƒe nɔnɔme tɔxɛ aɖe ŋudɔ nyuie wu le dɔ si woagade esi me la, woabia tso esi be wòato mɔfiagbalẽa ƒe ta aɖe me, abe “Nyaselawo Ŋkume Kpɔkpɔ Kple Nuƒogbalẽ Ŋudɔwɔwɔ,” “Kpɔɖeŋu Siwo Sɔ,” “Gbeteteɖenyadzi Kple Ŋutinuwo Ŋudɔwɔwɔ,” kple “Gbetete Ðe Gɔmesesea Dzi Kple Gbetɔtrɔ” ene.
Le nuto aɖewo me la, wowɔ nuxexlẽ kple nuŋɔŋlɔ kpakple nuxexlẽ sɔsrɔ̃ nyuie wu ƒe ɖoɖo kpe ɖe Teokrasi Subɔsubɔ Sukua ŋu. Ame akpe bla nanewo srɔ̃ nuxexlẽ alo dzi woƒe nuxlẽŋutete ɖe edzi le agbalẽsrɔ̃ɖoɖo sia me. Le kpɔɖeŋu me, tso ƒe 1946 vaseɖe ƒe 1994 me la, wokpe ɖe ame siwo wu 127,000 ŋu wonya nuxexlẽ le Mexico.
Kpekpe Ðe Ame Miliɔn Geɖe Ŋu
Le xexeame katã la, Teokrasi Subɔsubɔ Sukua le alɔ dom dzilawo ƒe agbagbadzedze be yewoana yewo viwo nasrɔ̃ nu nyuie. Moriah si xɔ ƒe 16 la gblɔ be: “Mesrɔ̃ numekuku wɔwɔ adi nyawo kple alesi mato nye nuƒowo me. Fifia dɔ ɖesiaɖe si wodea mía si le suku kɔkɔ la nɔa bɔbɔe nam.”
Ƒe-15-vi Matthew si le Subɔsubɔ Sukua dem tso esime wòxɔ ƒe adre la de dzesii be: “Mede ŋgɔ wu nye hatiwo sã le agbalẽnyanya me. Mete ŋu tu nusɔsrɔ̃ kple toɖoɖo ƒe ŋutetewo ɖo eye mete ŋu ƒoa nu nyuie hã.” Nɔviaŋutsu Phil si xɔ ƒe 17 la gblɔ kpe ɖe eŋu be: “Teokrasi Subɔsubɔ Sukua na kakaɖedzi su asinye wu. Menya be ne wode dɔ asi nam la mate ŋu awɔe.”
Teokrasi Subɔsubɔ Sukua na hehe ame tsitsiwo hã. Michael si te ŋu ɖo taɖodzinu abe nuƒoƒo na dɔwɔhawo ene gbɔ la gblɔ be: “Mevɔ̃na ŋutɔ esime mege ɖe Subɔsubɔ Sukua me. Nyemegakpea ŋu o. Sukua na nɔnɔme nyui, sidzedze, ŋutetewo, kple dzideƒo si nye ŋutɔ mehiã be maɖu nye ŋukpea dzi lam.” Dzila aɖe de dzesii be: “Mesenɛ le ɖokuinye me be mewɔ nu tsɔ ɖo nusɔsrɔ̃ ƒe mɔnukpɔkpɔ si to ŋunye le ɖevime la teƒe.”
Le Latin Amerika kɔƒe sue aɖe me la, amesiwo wɔa dɔ le Agbalẽsrɔ̃nyawo Dzikpɔƒe la de Teokrasi Subɔsubɔ Sukua. Esi wose afimatɔ aɖe ƒe nuƒo vɔ la, amedzroawo dometɔ ɖeka si nye suku aɖe dzikpɔla la gblɔ be: “Manya wɔ be ŋutsu sia si míebuna ɣesiaɣi be menya agbalẽ o la nate ŋu aɖo dze le Spaniagbe me [menye le wo degbe me o] ʋuu keke wòava ƒo nu na nyaselawo o, gake ete ŋui.”
Nyateƒee, suku nyuitɔ kekeake siwo le xexeame la dometɔ ɖekae Teokrasi Subɔsubɔ Sukua nye! Ate ŋu akpe ɖe ɖeviwo kple tsitsiawo siaa ŋu be woasrɔ̃ agbalẽ nyuie. Sɔhɛ ɖeka gblɔ be, “Made dzi ƒo na amesiame si di be yeade sukua be wòage ɖe eme kaba.”
[Nɔnɔmetata si le axa]
Teokrasi Subɔsubɔ Sukua le kpekpem ɖe ame miliɔn geɖe ŋu be woasrɔ̃ agbalẽ nyuie