Ðe Wònye Kpɔɖeŋu Nyui Nàsrɔ̃a, Alo Nuxlɔ̃amekpɔɖeŋue?
“Mina míayi Yehowa . . . Yakob ƒe Mawu . . . la gbɔ, ne wòafia nu mí le eƒe mɔwo ŋu, eye míazɔ eƒe toƒewo.”—YES. 2:3.
1, 2. Mɔ kawo nue Biblia me kpɔɖeŋuwo ate ŋu aɖe vi na mí le?
ÐE MÈKA ɖe edzi be nuŋlɔɖi siwo le Biblia me la ate ŋu aɖe vi na wò oa? Ŋutsu kple nyɔnu nuteƒewɔla geɖe siwo ƒe agbenɔnɔ kple nɔnɔme nyuiwo nàdi be yeasrɔ̃ la ƒe agbemeŋutinyawo le Biblia me na mí. (Heb. 11:32-34) Ke hã ànya de dzesi ŋutsu kple nyɔnu aɖewo hã, siwo nye nuxlɔ̃amekpɔɖeŋuwo na mí, siwo ƒe nuwɔnawo kple nɔnɔmewo nàdi be yeaƒo asa na.
2 Le nyateƒe me la, ame aɖewo le Biblia me siwo ƒe nuwɔna aɖewo nye kpɔɖeŋu nyui siwo míate ŋu asrɔ̃, eye woƒe nuwɔna bubuwo hã nye kpɔɖeŋu gbegblẽ siwo wòle be míaƒo asa na. Bu David, ame si nye alẽkplɔla ɖokuibɔbɔla le gɔmedzedzea me, emegbe wòva zu fia kalẽtɔ aɖe la, ŋu kpɔ. Àkpɔe adze sii be enye ame si ɖo kpɔɖeŋu nyui, elabena elɔ̃ nu si nye nyateƒe eye wòɖo ŋu ɖe Yehowa ŋu. Ke hã David wɔ nu vɔ̃ gã aɖewo hã; ewɔ ahasi kple Bat-Seba, ena wowu Uriya, eye wòwɔ bometsinu esi wòna woxlẽ dukɔa. Togbɔ be ele alea hã la, mina míade ŋugble tso via Salomo, si nye fia heganye Biblia ŋlɔla la, ŋu. Gbã la, míalé ŋku ɖe mɔ eve siwo nu wònye kpɔɖeŋu nyui le la ŋu.
“Salomo Ƒe Nunya”
3. Nu ka tae míate ŋu agblɔ be Salomo ɖo kpɔɖeŋu nyui aɖe ɖi na mí?
3 Yesu Kristo, si nye Salomo Gãtɔ la, kafu Fia Salomo na mí be enye kpɔɖeŋu nyui aɖe si míasrɔ̃. Yesu gblɔ na Yudatɔ ɖikela aɖewo be: “Woafɔ anyiehe fianyɔnu la ɖe tsitre le ʋɔnudɔdrɔ̃ la me kpe ɖe dzidzime sia ŋu, eye wòabu fɔe; elabena etso keke anyigba la seƒe ke va be yease Salomo ƒe nunya, gake kpɔ ɖa! Nane si lolo wu Salomo la le afii.” (Mat. 12:42) Ɛ̃, Salomo xɔ ŋkɔ le eƒe nunya ta, eye wòde dzi ƒo na mí be míadi nunya.
4, 5. Afi kae Salomo kpɔ eƒe nunyaa tsoe, eye aleke míawo ya míawɔ hafi nunya nasu mía si?
4 Le Salomo ƒe dziɖuɣi ƒe gɔmedzedze la, Mawu ɖe eɖokui fiae le drɔ̃e me eye wòbia tso esi be wòabia nu sia nu si wòdi la ye. Esi Salomo kpɔe dze sii be nuteƒekpɔkpɔ mele ye si o ta la, ebia nunya. (Mixlẽ 1 Fiawo 3:5-9.) Esi wòdo dzidzɔ na Mawu be fia la bia nunya, ke mebia kesinɔnu kple bubu o ta la, Mawu na “dzi nyanu, si sea nu gɔme” la Salomo—etsɔ kesinɔnu hã kpe ɖe eŋu nɛ. (1 Fia. 3:10-14) Abe ale si Yesu gblɔe ene la, Salomo ƒe nunya de du ale gbegbe be Seba fianyɔnu la se eŋkɔ eye wòzɔ mɔ tso didiƒe ke va Salomo gbɔ be ye ŋutɔ yeava se eƒe nunyaa kple to.—1 Fia. 10:1, 4-9.
5 Míekpɔa mɔ be woana nunya mí nukutɔe o. Salomo gblɔ be, “Yehowa naa nunya,” gake eŋlɔ bena ele be míaku kutri be mawumenunya nasu mía si, esi wògblɔ be: ‘Ƒu wò to anyi ɖe nunya ŋu, eye nàbi wò dzi ɖe gɔmesese ŋuti.’ Egagblɔ hã be ‘míayɔ nunya,’ ‘míadii,’ eye ‘míadi eyome mɔ.’ (Lod. 2:1-6) Eme kɔ ƒãa be míaƒe asi ate ŋu asu nunya dzi.
6. Mɔ kawo nue míate ŋu aɖee afia le be kpɔɖeŋu nyui si Salomo ɖo ɖi le nunya gome la le vi ɖem na mí?
6 Anyo be míabia be, ‘Ðe nye hã medea asixɔxɔ mawumenunya ŋu abe ale si Salomo wɔe enea?’ Ganyawo ƒe kemalimali na ame geɖe va tsɔ woƒe susu katã ɖo woƒe dɔwɔɖui kple ga si woakpɔ ŋu, alo woɖe mɔ esia kpɔ ŋusẽ ɖe afi si woade suku ase ɖo kple nu siwo woasrɔ̃ le suku la ƒe nyametsotsowo dzi. Ke wò ŋutɔ kple wò ƒomea ya ɖe? Ðe tiatia siwo miewɔna ɖenɛ fiana be miedea asixɔxɔ mawumenunya ŋu eye miele eyome tima? Ne miewɔ asitɔtrɔ le miaƒe taɖodzinuwo ŋu la, ɖe wòana nunya geɖe wu nasu mia sia? Le nyateƒe me la, ne miaƒe asi su nunya dzi eye mienɔ agbe ɖe enu la, ahe viɖe mavɔ avae na mi. Salomo ŋlɔ bena: “Ekema àse dzɔdzɔenyenye, nu dzɔdzɔe kple nuteƒewɔwɔ gɔme; mɔ nyuiwo katã gɔme nase.”—Lod. 2:9.
Tadedeagu Vavãtɔ Dodo Ðe Dzi He Ŋutifafa Vae
7. Alekee wòdzɔe be wotu gbedoxɔ gã dzeani aɖe na Mawu?
7 Le Salomo ƒe fiaɖuɖu ƒe gɔmedzedze la, etu gbedoxɔ dzeani aɖe si va xɔ ɖe avɔgbadɔ si wozãna tso Mose ŋɔli ke la teƒe. (1 Fia. 6:1) Míeyɔnɛ be Salomo ƒe gbedoxɔ, gake menye ɖe wòtui be yeaxɔ ŋkɔ o. Menye eyae ɖoe be yeatu gbedoxɔa gɔ̃ hã o. Le nyateƒe me la, David ye ɖoe gbã be yeatu gbedoxɔ aɖe, eye esia megbee Mawu ɖɔ gbedoxɔ si woatu la ƒe nɔnɔme kple emenuwo na David tsitotsito. Eye David dzra ga gbogbo aɖe ɖo ɖi be woatsɔ atu xɔ la. (2 Sam. 7:2, 12, 13; 1 Kron. 22:14-16) Ke hã Salomo dzie wòdze be wòatu gbedoxɔa, si xɔ ƒe adre kple afã hafi wowu enu.—1 Fia. 6:37, 38; 7:51.
8, 9. (a) Kpɔɖeŋu nyui kae Salomo ɖo ɖi na mí le kutrikuku le dɔ nyuiwo wɔwɔ me gome? (b) Esi Salomo do tadedeagu vavãtɔ ɖe dzi la, nu kae do tso eme?
8 Eya ta Salomo ɖo kpɔɖeŋu nyui aɖe ɖi na mí le kutrikuku le dɔ nyuiwo wɔwɔ me gome, eye wòna eƒe susu nɔ nu si le vevie ŋu. Esi wowu gbedoxɔa tutu nu eye wokɔ nubablaɖaka la va da ɖe eme la, Salomo do gbe ɖa le dukɔ la ŋkume. Egblɔ na Yehowa le gbedodoɖaa me be: “[Na] wò ŋkuwo nanɔ te ɖe xɔ sia ŋu zã kple keli, ɖe teƒe, si ŋu nègblɔ le be: nye ŋkɔ anɔ afi ma la ŋu; eye nàse gbe, si wò dɔla ado ɖa le teƒe sia.” (1 Fia. 8:6, 29) Israel viwo kple du bubu me tɔwo siaa ate ŋu atrɔ mo ɖe xɔ sia si ŋu Mawu ƒe ŋkɔ le la ŋu ado gbe ɖa na Mawu.—1 Fia. 8:30, 41-43, 60.
9 Esi Salomo do tadedeagu vavãtɔ ɖe dzi la, nu kae do tso eme? Esi wokɔ gbedoxɔa ŋu vɔ la, dukɔ la kpɔ “dzidzɔ, eye woƒe dzi dze eme le nu nyui, siwo katã Yehowa wɔ na eƒe dɔla Dawid kple eƒe dukɔ Israel la ŋuti.” (1 Fia. 8:65, 66) Le nyateƒe me la, ŋutifafa kple nudzedziname ɖe dzesi ŋutɔ le ƒe 40 siwo Salomo ɖu fia la me. (Mixlẽ 1 Fiawo 4:20; 5:1, 5.) Psalmo 72 lia ɖo kpe esia dzi, eye wòna míekpɔ yayra siwo gbegbe ava su mía si le Salomo Gãtɔ, Yesu Kristo, ƒe dziɖuɖu te.—Ps. 72:6-8, 16.
Salomo Ƒe Agbenɔnɔ Si Nye Nuxlɔ̃amekpɔɖeŋu Na Mí
10. Ne woyɔ Salomo ŋkɔ la, eƒe nu gbegblẽ wɔwɔ kae ate ŋu ava susu me na mí enumake?
10 Gake nu ka tae míate ŋu agblɔ be Salomo ƒe agbenɔnɔ nye nuxlɔ̃amekpɔɖeŋu hã na mí? Ðewohĩ dutanyɔnu siwo wòɖe kple ahiã gbogbo siwo nɔ esi lae ava susu me na wò gbã. Biblia gblɔ be: “Eye wòva me, esime Salomo tsi la, srɔ̃awo trɔ eƒe dzi ɖe mawu bubuwo ŋu, eye eƒe dzi menɔ Yehowa, eƒe Mawu la ŋu blibo . . . o.” (1 Fia. 11:1-6) Ðikekemanɔmee la, èɖoe kplikpaa tso wò dzi me be yemadze eƒe kpɔɖeŋu gbegblẽa yome gbeɖe o. Gake Salomo ƒe nuwɔna ma koe nye nuxlɔ̃ame na mía? Bu numeɖeɖe aɖewo siwo dzi míaƒe susu meyina bɔbɔe o ŋu, eye nàkpɔe ɖa be nuxlɔ̃ame kae le eme na wò hã.
11. Nu ka tae Salomo ƒe srɔ̃ɖeɖe gbãtɔ nye vodada?
11 Salomo ɖu fia ƒe 40. (2 Kron. 9:30) Eya ta ne èxlẽ 1 Fiawo 14:21 la, nya ta kae nàte ŋu aƒo? (Mixlẽe.) Le mawunyakpukpui ma ƒe nya nu la, esi Salomo ku la, via Rexabeam si xɔ ƒe 41, la zu fia ɖe eteƒe, “Dadaa ŋkɔ nye Naama, Amoni-nyɔnu.” Esia fia be hafi Salomo nava zu fia la, eɖe dutanyɔnu aɖe si tso futɔ siwo subɔa legbawo la dome. (Ʋɔn. 10:6; 2 Sam. 10:6) Ðe nyɔnua hã subɔa legbawoa? Ne esubɔa wo tsã hã la, ɖewohĩ eɖe asi le legbasubɔsubɔ ŋu eye wòva zu tadeagula vavã, abe ale si Raxab kple Rut wɔe ene. (Rut 1:16; 4:13-17; Mat. 1:5, 6) Ke hã anɔ eme be Salomo to kple lɔ̃xoa kple srɔ̃a nɔviwo kpakple ƒometɔ bubuwo mesubɔ Yehowa o.
12, 13. Nyametsotso gbegblẽ kae Salomo wɔ le eƒe fiaɖuɖu ƒe gɔmedzedze, eye aleke wòanya bu nuwo ŋui?
12 Gakpe ɖe eŋu la, edze ƒãa be Salomo ƒe nuwɔna gavloe ɖe edzi le eƒe fiazuzu megbe. “Salomo do ƒome kple Egipte fia Farao, eye wòɖe Farao vinyɔnu hekplɔe va Dawid ƒe du la me.” (1 Fia. 3:1) Ðe Egipte nyɔnu sia srɔ̃ Rut ƒe kpɔɖeŋu heva tadedeagu vavãtɔa mea? Naneke meɖee fia be ewɔe nenema o. Ke boŋ, le ɣeyiɣi aɖe megbe la, Salomo tso aƒe na nyɔnua (kple ɖewohĩ eƒe dɔlanyɔnu Egiptetɔwo) ɖe David ƒe Du la godo. Nu ka tae? Ŋɔŋlɔawo gblɔ be ewɔ nu sia esi mesɔ be alakpamawusubɔla aɖeke nanɔ teƒe si te ɖe nubablaɖaka la ŋu o ta.—2 Kron. 8:11.
13 Salomo anya susui be Egipte fiavinyɔnua ɖeɖe ana kadodo nyui nanɔ Israel kple Egipte dome. Gake ɖe wòate ŋu atsɔ nya ma ado taflatsɛ ɖe eƒe nuwɔnaa ta? Ɣeyiɣi didi aɖe do ŋgɔ na esia la, Mawu de se be Israel viwo nagaɖe Kanaantɔ trɔ̃subɔlawo o, eye wòyɔ dukɔ aɖewo ŋkɔ tẽe gɔ̃ hã. (2 Mose 34:11-16) Ðe wòanye be Salomo susui be naneke megblẽ le yeƒe nuwɔnaa ŋu o, esi Egiptetɔwo menɔ dukɔ siwo woyɔ la dome o ta? Nenye be esusui nenema hã la, ɖe taflatsɛdodo sia sɔa? Le nyateƒe me la, eƒe nuwɔnaa ɖee fia be eŋe aɖaba ƒu afɔku aɖe si ŋu nya Yehowa gblɔ eme kɔ nyuie la dzi—si nye be, ame si mesubɔa Yehowa o ɖeɖe ate ŋu ana Israel vi natra ɖa le tadedeagu vavãtɔ gbɔ ahasubɔ alakpamawuwo.—Mixlẽ 5 Mose 7:1-4.
14. Aleke míate ŋu ana Salomo ƒe nuwɔna gbegblẽwo nanye nuxlɔ̃ame na mí?
14 Ðe míana Salomo ƒe nuwɔnaa nanye nuxlɔ̃ame na mía? Nɔvinyɔnu aɖe ate ŋu adze agbagba be yeatsɔ nya aɖewo ado taflatsɛ ahagbe se si Mawu de be míaɖe srɔ̃ “le Aƒetɔ la me ko” la dzi wɔwɔ. (1 Kor. 7:39) Nenema kee míawo hã míatsɔ nya vovovowo anɔ taflatsɛ dom le nu bubuwo gome. Le kpɔɖeŋu me, ame aɖe ate ŋu atsɔ nya aɖewo ado taflatsɛ anɔ gome kpɔm le kamedefefewo alo hadomenuwɔnawo me le suku evɔ sukua mebiae tso esi hafi o. Ame aɖe hã atsɔ nya aɖewo ado taflatsɛ ahagbe adzɔxexe ɖe viɖe siwo katã kpɔm wòle ta, alo agbe nyateƒetoto ne wobia nyae ku ɖe nuwɔna aɖe si ate ŋu ana wòaɖu ŋukpe la ŋu. Nu vevi si wòle be wòanɔ susu me na míe nye be, ne míetsɔ nanewo le taflatsɛ dom hele Mawu ƒe sewo dzi dam, abe ale si Salomo anya wɔe ene la, ate ŋu anye afɔku na mí.
15. Aleke Yehowa kpɔ nublanui na Salomo le nuwɔwɔ kplii me, gake nu ka dzie wòle be míaɖo ŋkui?
15 Ewɔ nuku ŋutɔ be esi Biblia ƒo nu tso ale si Salomo ɖe dutanyɔnu ŋu megbe la, egblɔ be Mawu na nunya si Salomo bia lae, eye Wòtsɔ kesinɔnu hã kpe ɖe eŋu nɛ. (1 Fia. 3:10-13) Salomo ŋe aɖaba ƒu Mawu ƒe mɔfiamewo dzi, ke hã naneke meɖee fia be Yehowa gbee enumake hexɔ fiaɖuƒea le esi alo he to nɛ vevie o. Ema wɔ ɖeka kple nyateƒe si wònye be Mawu nyae be amegbetɔ madeblibo, siwo nye kewɔ, ye míenye. (Ps. 103:10, 13, 14) Gake ɖo ŋku edzi be míaƒe nuwɔnawo ate ŋu agblẽ nu le mía ŋu fifia alo woagblẽ nu le mía ŋu le ƒe aɖewo megbe.
Eɖe Srɔ̃ Geɖewo!
16. Esime Salomo nɔ nyɔnu geɖewo ɖem la, Mawu ƒe se ka dzi dam wònɔ?
16 Fia la kafu ɖetugbui aɖe le Hawo ƒe Ha me be edze tugbe wu fiasrɔ̃ 60 kple ahiã 80 la katã. (Ha. 6:1, 8-10) Ne nenemae nɔnɔmea le le Salomo gome la, efia be nyɔnu gbogbo mawo gbegbee nɔ esi ɣemaɣi. Ne wo dometɔ akpa gãtɔ alo wo katã wonye tadeagula vavãwo gɔ̃ hã la, mɔfiame si Mawu na to Mose dzie nye be Israel fia “nagaɖe srɔ̃ geɖe o, ne eƒe dzi nagatre mɔ o.” (5 Mose 17:17) Ke hã le esia hã me la, Yehowa megbe Salomo o. Le nyateƒe me la, Mawu yi edzi yra Salomo eye wòzãe wòŋlɔ Biblia gbalẽ si nye Hawo ƒe Ha.
17. Nyateƒenya ka dzie mele be míaŋe aɖaba aƒu o?
17 Ðe esia fia be Salomo ate ŋu aŋe aɖaba aƒu Mawu ƒe mɔfiamewo dzi eye makpɔ emetsonu oa? Ao. Ke boŋ efia be Mawu gbɔa dzi blewu va se ɖe ɣeyiɣi aɖe. Nyateƒea ye nye be ame aɖe ate ŋu agbe Mawu ƒe sewo dzi wɔwɔ eye makpɔ emetsonua enumake o, gake esia mefia be makpɔ emetsonu gbegblẽawo emegbe o. Ðo ŋku nya si Salomo ŋlɔ be, “Esi afia menya tsona le nu vɔ̃ɖi wɔwɔ ŋu kaba o ŋuti la, eya ta dzi ɖoa amegbetɔviwo ƒo ŋutɔ ɖe nu vɔ̃ɖi wɔwɔ ŋu,” la dzi. Egblɔ kpee be: “Nyea menyae be, eme anyo na mawuvɔ̃la, siwo sia eƒe ŋkume.”—Nyagb. 8:11, 12.
18. Aleke Salomo ƒe ŋutinyaa kpe ɖe mía ŋu míese nyateƒenya si le Galatiatɔwo 6:7 la gɔme nyuie?
18 Nublanuitɔe la, Salomo mewɔ ɖe nyateƒenya sia dzi o! Enye nyateƒe be ewɔ nu nyui geɖewo eye Mawu ƒe yayra nɔ edzi ɣeyiɣi didi aɖe. Gake esi ɣeyiɣiawo va nɔ yiyim la, ete afɔ gbegblẽwo ɖeɖe ɖe wo nɔewo yome. Yehowa ƒe seawo dzi dada va zu numame nɛ. Aleke gbegbe Paulo ƒe nya siawo siwo gbɔgbɔ ʋãe wòŋlɔ emegbe la nye nyateƒee nye esi be: “Migana woakplɔ mi atrae o: Mawu menye ame si ŋu woaɖu fewu le o. Elabena nu sia nu si ƒãm ame le la, nu sia kee wòaŋe”! (Gal. 6:7) Le ɣeyiɣi aɖe megbe la, Salomo ŋe eƒe nuwɔna, si nye eƒe aɖabaŋeŋe ƒu Mawu ƒe mɔfiamewo dzi la, me tsonu wɔnublanuiwo. Biblia gblɔ na mí be: “Fia Salomo lɔ̃ dutanyɔnu geɖewo, siwo tso Moab, Amon, Edom, Zidon kple Xet hekpe ɖe Farao-vinyɔnu la ŋu.” (1 Fia. 11:1) Nyɔnu siawo dometɔ geɖewo medzudzɔ woƒe alakpamawuwo subɔsubɔ o, eye esia kpɔ ŋusẽ ɖe Salomo dzi. Etra mɔ, eye mía Mawu dzigbɔɖitɔ la megakpɔ ŋudzedze ɖe eŋu o.—Mixlẽ 1 Fiawo 11:4-8.
Srɔ̃ Nu Tso Eƒe Kpɔɖeŋu Nyuiawo Kple Gbegblẽawo Me
19. Nu ka tae nàgblɔ be kpɔɖeŋu nyuiwo sɔ gbɔ le Biblia la me fũu?
19 Yehowa tsɔ eƒe gbɔgbɔa ʋã Paulo wòŋlɔ ɖi dɔmenyotɔe be: “Nu siwo katã woŋlɔ ɖi tsã la, woŋlɔ wo ɖi le míaƒe nufiafia ta, bene to míaƒe dzidodo kple akɔfafa si míekpɔna le Ŋɔŋlɔawo me dzi la, mɔkpɔkpɔ nasu mía si.” (Rom. 15:4) Ŋutsu kple nyɔnu geɖe siwo ɖe xɔse sẽŋu fia la ƒe agbemeŋutinyawo le nuŋlɔɖi mawo me. Esi Paulo nɔ nu ƒom tso wo ŋu la, egblɔ be: “Eye nya kae magagblɔ? Elabena ɣeyiɣi manɔ anyi o, ne medi be mayi edzi aƒo nu tso Gideon, Barak, Simson, Yefta, David, kpakple Samuel kple nyagblɔɖila bubuawo ŋu, ame siwo to xɔse me ɖu fiaɖuƒewo dzi le aʋa me, do nu dzɔdzɔe wɔwɔ ɖe ŋgɔ, [woxɔ] ŋugbedodowo, . . . wona ŋusẽ ɖo wo ŋu le gbɔdzɔgbɔdzɔ me.” (Heb. 11:32-34) Ɛ̃, kpɔɖeŋu nyui siwo le Ŋɔŋlɔawo me la ate ŋu aɖe vi na mí ne míedze kpɔɖeŋu nyui ɖola siawo ƒe afɔɖoƒewo yome alo srɔ̃ woƒe nɔnɔme nyui siwo ŋu woƒo nu tsoe le Biblia me.
20, 21. Nu ka tae nèɖoe kplikpaa be yeana nuxlɔ̃amekpɔɖeŋu siwo le Mawu ƒe Nya me la naɖe vi na wò?
20 Ke hã le Biblia me la, nuxlɔ̃amekpɔɖeŋue ame aɖewo ƒe ŋutinya nye na mí. Wo dometɔ aɖewo nye ŋutsu kple nyɔnu siwo subɔ Yehowa eye wòkpɔ ŋudzedze ɖe wo ŋu le ɣeyiɣi aɖe me. Ne míele Biblia xlẽm la, míate ŋu alé ŋku ɖe vodada siwo Mawu subɔla aɖewo wɔ kple nu si na wotra mɔ ale be woƒe nuwɔnawo zu nuxlɔ̃amekpɔɖeŋu na mí la ŋu. Míate ŋu ade dzesii be nɔnɔme gbegblẽwo nɔ wo dometɔ aɖewo si sum vivivi, si va kplɔ wo de afɔku me mlɔeba. Nya ta kae míate ŋu aƒo tso ŋutinya mawo tɔgbi ŋu? Míadi be míabia nya siawo ƒomevi mía ɖokuiwo: ‘Alekee nu sia wɔ va dzɔ? Ðe nɔnɔme ma ate ŋu ado mo ɖa le gonyemea? Nu kae mate ŋu awɔ aƒo asa nɛ ahana nuxlɔ̃amekpɔɖeŋu sia naɖe vi nam?’
21 Vavãe, ele be míade ŋugble le kpɔɖeŋu siawo ŋu vevie, elabena gbɔgbɔ ʋã Paulo wòŋlɔ bena: “Nu siawo dzɔ ɖe wo dzi abe kpɔɖeŋuwo ene, eye woŋlɔ wo ɖi be woanye nuxɔxlɔ̃ na mí ame siwo dzi nuɖoanyi siawo ƒe nuwuwu va ɖo la.”—1 Kor. 10:11.
Nu Kae Nèsrɔ̃?
• Nu ka tae nàte ŋu akpɔ kpɔɖeŋu nyuiwo kple nuxlɔ̃amekpɔɖeŋuwo le Biblia me?
• Aleke Salomo ɖe mɔ nɔnɔme gbegblẽwo va su esi?
• Aleke Salomo ƒe agbenɔnɔ si nye nuxlɔ̃amekpɔɖeŋu na mí la ate ŋu aɖe vi na wòe?
[Nɔnɔmetata si le axa 9]
Salomo wɔ nunya si Mawu nae la ŋu dɔ
[Nɔnɔmetata siwo le axa 12]
Ðe nèna Salomo ƒe agbenɔnɔ si nye nuxlɔ̃amekpɔɖeŋu na mí la le vi ɖem na wòa?