Yehowa ƒe Nya la Le Agbe
Nya Vevi Siwo Tso Hawo ƒe Ha ƒe Agbalẽa Me
“ALESI dzogbenya nɔa aŋɔka mee la, nenema xɔ̃nye le nyɔnuviwo domee.” “Alesi atɔtɔŋuti le avemetiwo domee la, nenema nye lɔlɔ̃tɔ le ɖekakpuiwo domee.” “Amekae le anyi me kpɔm abe agudzedze ene, nyo abe ɣleti ene, dza abe ɣe ene?” (Hawo ƒe Ha 2:2, 3; 6:10) Nya ŋɔnɔe kawoe nye esi le Biblia-gbalẽ si nye Hawo ƒe Ha ƒe kpukpui siawo me! Agbalẽ bliboa yɔ fũ kple hakpanya vavãwo, eye wonya se ale gbegbe be woyɔe be “hawo ƒe ha,” si gɔmee nye ha si ƒo hawo katã ta.—Hawo ƒe Ha 1:1.
Ha sia nye alẽkplɔvi aɖe kple ɖetugbi aɖe, si tso kɔƒedu si nye Sunem me la, dome lɔlɔ̃ ŋutinya si blema Israel Fia Salomo kpa le ƒe 1020 D.M.Ŋ. me lɔƒo, si nye ƒe 40 siwo wòtsɔ ɖu fia la ƒe gɔmedzedze. Ame bubu siwo hã woyɔ le hakpanya siawo mee nye ɖetugbia dada kple nɔviaŋutsuwo, “Yerusalem-nyɔnuviwo [fiasã me dɔlanyɔnuwo],” kple “Zion-nyɔnuviwo [Yerusalem-nyɔnuwo].” (Hawo ƒe Ha 1:5; 3:11) Esesẽna ŋutɔ hafi amesi le Biblia xlẽm la nyana amesiawo dometɔ ɖesiaɖe ƒe numenyawo le Hawo ƒe Ha ƒe agbalẽa me, gake ate ŋu anyae ne ede ŋugble le nya siwo ameawo gblɔ kple nyaŋuɖoɖo siwo wona wo la ŋu nyuie.
Asixɔxɔ gã aɖe le Hawo ƒe Ha, si hã nye Mawu ƒe Nya ƒe akpa aɖe la, me nyawo ŋu, le susu eve ta. (Hebritɔwo 4:12) Gbã la, efia nusi tututu lɔlɔ̃ vavãtɔ si nɔa ŋutsu kple nyɔnu dome nye la mí. Evelia, enye kpɔɖeŋu na lɔlɔ̃ si tɔgbe le Yesu Kristo kple amesiaminawo ƒe haa dome.—Korintotɔwo II, 11:2; Efesotɔwo 5:25-31.
‘MIGANYƆ LƆLƆ̃ ÐE MENYE O’
‘Netsɔ eƒe nu gbugbɔ nu nam, elabena eƒe lɔlɔ̃ nyo wu wein.’ (Hawo ƒe Ha 1:2) Wodze Hawo ƒe Ha me nyawo gɔme kple Sunem-ɖetugbi la, si wokplɔ va Fia Salomo ƒe avɔgbadɔ me la, ƒe numenyawo. Aleke wòwɔ va do ɖe afima?
Egblɔ be: “Danye viŋutsuwo do dɔmedzoe ɖe ŋunye; wotsɔm ɖo weingbledzɔlae.” Nɔviaŋutsuwo do dɔmedzoe ɖe eŋu, elabena alẽkplɔvi si wòlɔ̃ la kpee be wòava ne yewoaɖaɖi tsa, le adame ŋkeke nyui aɖe dzi. Esi womedi be wòayi o ta la, wode dɔ asi nɛ be wòanɔ agblea ŋu dzɔm bene ‘abeivi siwo gblẽa weingblewo’ la nagage ɖe eme o. Dɔ sia wɔmee wònɔ va do “ɖe azibɔ,” si tsɔ ɖe Salomo ƒe asaɖaa gbɔ la me. Afimae Fia la kpɔe le loo, alo ame bubu aɖe kpɔe le va gblɔ na Fia la, eye Fiaa na wokplɔe va asaɖa la me, le eƒe tugbedzedze ta.—Hawo ƒe Ha 1:6; 2:10-15; 6:11.
Esi ɖetugbia gblɔ alesi eƒe dzi katã ku ɖe eƒe alẽkplɔvi lɔlɔ̃a ŋui la, fiasã me dɔlanyɔnuwo gblɔ nɛ be ‘wòado afɔ na lãhawo’ aɖadii. Gake Salomo meɖe mɔ nɛ be wòayi o. Ekafui ŋutɔ ɖe eƒe tugbedzedze ta, hedo ŋugbe nɛ be yeana ‘sikakɔsɔkɔsɔ kple klosalokpeviwoe.’ Gake esiawo mete ŋu kpɔ ŋusẽ ɖe ɖetugbia dzi o. Alẽkplɔvia hã va do ɖe Salomo ƒe asaɖaa me, hekpɔ ɖetugbia, eye wògblɔ be: “Èdze tugbe, xɔ̃nye, èdze tugbe loo!” Ðetugbia de se na fiasã me dɔlanyɔnuwo be: ‘Miganyɔ lɔlɔ̃ ɖe menye o, vaseɖe esime wòɖo menye hafi!’—Hawo ƒe Ha 1:8-11, 15; 2:7; 3:5.
Ŋɔŋlɔawo me Biabiawo Ŋuɖoɖo:
1:2, 3—Nukatae ŋkuɖoɖo alẽkplɔvia ƒe lɔlɔ̃ dzi nɔ abe wein ene, eye eƒe ŋkɔ nɔ abe ami ene ɖo? Abe alesi ko wein doa dzidzɔ na ame ƒe dzi eye ami kɔkɔ ɖe tame nana ame ƒe dzi dzea emee ene la, nenema kee ŋkuɖoɖo alẽkplɔvia ƒe lɔlɔ̃ kple eƒe ŋkɔ dzi doa ŋusẽ ɖetugbia hefaa akɔ nɛ. (Psalmo 23:5; 104:15) Nenema kee ŋugbledede le lɔlɔ̃ si Yesu Kristo ɖe fia la ŋu doa ŋusẽ Kristotɔ vavãwo, vevietɔ amesiaminawo hedea dzi ƒo na woe.
1:5—Nukatae Sunem-ɖetugbia tsɔ eƒe ŋutigbalẽ yi la sɔ kple ‘Kedar ƒe agbadɔwo’ ɖo? Wotsɔa avɔ siwo wotsɔ gbɔ̃fu lɔ̃e la wɔa nu geɖe. (Mose IV, 31:20) Le kpɔɖeŋu me, ‘wotsɔ kuntru siwo wotsɔ gbɔ̃fu lɔ̃’ la ‘gbã avɔgbadɔ’ lae. (Mose II, 26:7) Anye be gbɔ̃ yibɔwo ƒe fue wotsɔna lɔ̃a avɔ siwo wotsɔna gbãa Kedar ƒe agbadɔawo lae, abe alesi ko tagba nɔlawo gawɔnɛ egbea ene.
1:15—Nya si alẽkplɔvia gblɔ be, “Wò ŋkuwo le abe ahɔne ƒe ŋkuwo ene” la gɔme ɖe? Alẽkplɔvia ƒe nyaa fia be eƒe lɔlɔ̃tɔa ƒe ŋkuwo dzi kɔ henya kpɔ ale gbegbe, abe ahɔnewo tɔ ene.
2:7; 3:5—Nukatae ɖetugbia yɔ “sãde alo zinɔ le gbe me” hafi de se na fiasã me dɔlanyɔnuwo ɖo? Sãdewo kple zinɔwo nya kpɔna ale gbegbe. Eyata nya si Sunem-ɖetugbia gblɔ la fia be ne fiasã me dɔlanyɔnuwo lɔ̃a nusianu si nya kpɔ la, ekema ele be woawɔ ɖe se si yede na wo la dzi be atse nagable wo woanyɔ lɔlɔ̃ ɖe ye me o.
Nusɔsrɔ̃ Siwo Le Eme na Mí:
1:2; 2:6. Asɔ be amesiwo do srɔ̃ɖeŋugbe na wo nɔewo la naɖe lɔlɔ̃ afia wo nɔewo le mɔ si sɔ eye eŋu kɔ la nu. Gake ele be woakpɔ egbɔ be enye lɔlɔ̃ akuakua ɖeɖe fia, ke menye fieŋufieŋu ƒe nuwɔna makɔmakɔ, si ate ŋu akplɔ wo ade gbɔdɔdɔ ƒe agbegbegblẽ nɔnɔ me o.—Galatiatɔwo 5:19.
1:6; 2:10-15. Menye ɖe Sunem-ɖetugbia nɔviŋutsuwo susui be enye ɖevi gbegblẽ alo be nu gbegblẽ wɔwɔ ƒe susu aɖee le esi tae womena mɔ wo nɔvinyɔnua be wòaɖaɖi tsa kple eƒe lɔlɔ̃tɔa le to siwo sa ɖe aga la dzi o. Ke boŋ esi womedi be wòage ɖe nɔnɔme aɖe si ate ŋu akplɔe ade tetekpɔ me la me o tae. Nusi amesiwo le srɔ̃ɖeŋugbedodo me ate ŋu asrɔ̃ tso esia mee nye be woawo ɖeɖe nagayi teƒe siwo sa ɖe aga o.
2:1-3, 8, 9. Togbɔ be Sunem-ɖetugbia dze tugbe ŋutɔ hã la, ebu eɖokui ɖokuibɔbɔtɔe be ‘Saron-seƒoƒo koe yenye le tɔ to.’ Le eƒe tugbedzedze kple nuteƒewɔwɔ na Yehowa ta la, alẽkplɔvia bunɛ be enye ‘dzogbenya le aŋɔkawo me.’ Ke alẽkplɔvia ya ɖe? Esi eya hã dze ɖeka ta la, eɖi “sãde” na ɖetugbia. Eya hã anya léa fɔ ɖe gbɔgbɔmenuwo ŋu vevie eye wòtsɔ eɖokui ke Yehowa. Ðetugbia gblɔ be: “Alesi atɔtɔŋuti le avemetiwo domee la, nenema nye lɔlɔ̃tɔ le ɖekakpuiwo domee.” Ðe xɔse kple ɖokuitsɔtsɔ na Mawu menye nɔnɔme nyui siwo ame nadi be yeakpɔ le amesi wòava ɖe la ŋu oa?
2:7; 3:5. Sunem-ɖetugbia mena Salomo ƒe nu lé dzi nɛ kura o. Ede se na fiasã me dɔlanyɔnuwo hã be atse nagable wo woate kpɔ be yewoable ye nu ne yealɔ̃ ame bubu aɖeke tsɔ wu alẽkplɔvi la o. Ame mate ŋu aɖo ahiãwɔwɔ ƒe lɔlɔ̃ na amesiame ko o, eye mesɔ hã o. Ele be Kristotɔ si le srɔ̃ dim be yeaɖe la nadii le Yehowa subɔla wɔnuteƒewo ɖeɖe dzaa ko dome.—Korintotɔwo I, 7:39.
“NUKAE MIEKPƆ LE SUNEM-ÐETUGBI LA ŊU?”
Nanee “nye ekem tso gbe me gbɔna abe dzudzɔ babla ene.” (Hawo ƒe Ha 3:6) Esi Yerusalem-nyɔnuwo do be yewoaɖakpɔ nua la, nukae wokpɔ? Salomo kple eƒe subɔviwoe trɔ gbɔna va dua me! Eye fia la kplɔ Sunem-ɖetugbi la ɖe asi.
Alẽkplɔvia dze ɖetugbia yome eye wòdze agbagba to mɔ aɖe dzi ƒo nu kplii. Esi wòka ɖe edzi na ɖetugbia be yelɔ̃e vevie la, ɖetugbia hã ɖe didi si le eme be yeadzo le Fia ƒe dua me atrɔ ayi aƒe la gblɔ be: “Mayi atike ʋeʋẽe towo kple dzudzɔ ʋeʋẽe donu togbɛwo dzi, hafi anyinu nafa, eye vɔvɔli nu nayi.” Ekpe alẽkplɔvia be ‘wòava eƒe abɔ me, eye wòaɖu eƒe kutsetse nyuiawo.’ Alẽkplɔvia ɖo eŋu be: “Nɔvinyenyɔnu, nye ŋugbetɔ, meva nye abɔ me.” Yerusalem-nyɔnuwo gblɔ na wo be: ‘Xɔ̃wo, miɖu nu, mino lɔlɔ̃ha miamu!’—Hawo ƒe Ha 4:6, 17; 5:1.
Esi Sunem-ɖetugbia lĩ drɔ̃e aɖe na fiasã me dɔlanyɔnuwo vɔ megbe la, egblɔ na wo be: “Lɔlɔ̃ de dɔ lã me nam!” Wobiae be: “Nuka wò lɔlɔ̃tɔ tsɔ ƒo lɔlɔ̃tɔ bubuwo tae?” Eɖo eŋu be: “Nye lɔlɔ̃tɔ fu, eye wòbiã, eye wòƒo ame akpe nanewo ta.” (Hawo ƒe Ha 5:2-10) Eɖo Salomo ƒe kafukafunya ŋɔnɔewo ŋu bubutɔe be: “Nukae miekpɔ le Sunem-ɖetugbi la ŋu?” (Hawo ƒe Ha 6:4–7:1, NW) Fia la bu ɖetugbia ƒe nyabiase sia be enye mɔnukpɔkpɔ na ye be yeana yeƒe nu nalé dzi nɛ, eyata etsɔ nya ŋɔnɔewo kafu eƒe tugbedzedze geɖe ɖe edzi wu. Ke hã, ɖetugbia gakpɔtɔ lé eƒe lɔlɔ̃ na alẽkplɔvia me ɖe asi goŋgoŋ. Mlɔeba, Salomo ɖe asi le eŋu wòtrɔ yi aƒe.
Ŋɔŋlɔawo me Biabiawo Ŋuɖoɖo:
4:1; 6:5—Nukatae wotsɔ ɖetugbia ƒe ɖa sɔ kple ‘gbɔ̃hawo’ ɖo? Etsɔtsɔ sɔ kplii na wòdze ƒã be eƒe ɖa la daa dzo hesɔ gbɔ abe gbɔ̃fu yibɔ ene.
4:11—Nukae ‘anyitsi si le tsyɔtsyɔm le Sunem-ɖetugbia ƒe nuyi ŋu’ kple ‘anyitsi kple notsi si le eƒe aɖe te’ la fia? Anyitsi si le anyixe me, alo esi wometa haɖe o, la ʋẽna lilili hevivina wu esi wota va kɔ ɖi. Eyata gbɔgblɔ be anyitsi le tsyɔtsyɔm le Sunem-ɖetugbia ƒe nuyi ŋu kpakple be anyitsi kple notsi le eƒe aɖe te, ɖo kpe edzi be eƒe numenyawo nyea nya vavã kple nya dzetowo sɔŋ.
5:12—Nya si ɖetugbia gblɔ be ‘eƒe ŋkuwo le abe ahɔne, siwo le notsi lem, le tɔʋu to ene’ la gɔme ɖe? Eƒe lɔlɔ̃tɔa ƒe ŋku siwo nya kpɔ ŋutɔ la ƒe nya gblɔmee wòle. Ðewohĩ etsɔ alesi eƒe ŋku ƒe akpa si le ɣi la ƒo xlã yibɔeƒeae la nɔ sɔsɔm kple alesi ahɔne yibɔewo anɔ tsi lem le notsi me ene.
5:14, 15—Nukatae wòɖɔ alẽkplɔvia ƒe alɔwo kple atawo alea ɖo? Anɔ eme be alẽkplɔvia ƒe asibidewo yɔmee ɖetugbia nɔ be sikati mlimɔwo, eye be eƒe fetsuwo ɖɔmee wònɔ be tarsis-kpewo. Etsɔ eƒe atawo sɔ kple ‘kpe ɣi sɔtiwo’ elabena ŋusẽ le wo ŋu eye wodze ani.
6:4—Nukatae wotsɔ ɖetugbia sɔ kple Tirza ɖo? Yosua ɖu Kanaantɔwo ƒe du sia dzi le aʋawɔwɔ me, eye dua va zu Israel ƒe to ewo fiaɖuƒe si nɔ Yordan ƒe dziehe gome la ƒe fiadu le Salomo ƒe dziɖuɣi megbe. (Yosua 12:7, 24; Fiawo I, 16:5, 6, 8, 15) Numekugbalẽ aɖe gblɔ be: “Du sia anya nya kpɔ ŋutɔ, si wɔe be woyɔ eƒe ŋkɔ le afisia.” Eyata alesi du sia nya kpɔ la tae wotsɔ ɖetugbia ƒe tugbedzedze sɔ kplii ɖo.
7:1—Nukae nye ‘Aʋaɣeɖuɖu la’? Woagate ŋu ayɔe be “ɣe si woɖuna le Maxanaim.” Maxanaim-du la le Yordan-tɔsisia ƒe ɣedzeƒe kpa dzi, eye wòte ɖe Yabok-tɔʋua ŋu. (Mose I, 32:3, 23; Samuel II, 2:29) ‘Aʋaɣeɖuɖu la’ anya nye ɣe aɖe si woɖuna le du ma me le azãɖuɣiwo.
7:4—Nukatae Salomo tsɔ Sunem-ɖetugbi la ƒe kɔ sɔ kple “nyiɖuxɔ tsrala” ɖo? Do ŋgɔ la, ekafu ɖetugbia be: “Wò kɔ le abe Dawid ƒe xɔ tsrala . . . ene.” (Hawo ƒe Ha 4:4) Xɔ si ƒomevi woyɔna be xɔ tsrala la nyea xɔ si kɔ tsrala abe alesi gbetakpɔxɔ kɔnae ene. Nyiɖu ya ŋu zrɔ̃na nyuie. Eyata esi Salomo tsɔ ɖetugbia ƒe kɔ sɔ kple nyiɖuxɔ tsrala la, ele fiafiam be ɖetugbia ƒe kɔ le tsralɛ eye eŋu zrɔ̃ dredredre.
Nusɔsrɔ̃ Siwo Le Eme na Mí:
4:1-7. Togbɔ be Sunem-ɖetugbia nye ame madeblibo hã la, eto Salomo ƒe amenublenyawo gbegbe dzi ɖee fia be yenye agbe nyui nɔla. Eƒe agbenyuinɔnɔ sia na eƒe tugbedzedzea de blibo. Aleae wòle be wòanɔ le nyɔnu Kristotɔwo hã gomee.
4:12. Abe alesi ko woatɔ kpɔ ɖe abɔ nyui dzeani aɖe ŋu ale be ɖe woaʋu agbo na amesi dze la hafi wòage ɖe eme ene la, Sunem-ɖetugbia do ʋɔ ɖe eƒe ahiãwɔwɔ ƒe lɔlɔ̃ nu be ŋutsu si yeava ɖe la koe yeaʋui na. Ðe esia menye kpɔɖeŋu nyui aɖe na nyɔnu kple ŋutsu Kristotɔ siwo mekpɔ ɖe srɔ̃ haɖe oa?
“YEHOWA ƑE DZOƑAÐE WÒNYE!”
Esi Sunem-ɖetugbia nɔviŋutsuwo kpɔe wòtrɔ gbɔna aƒeme la, wobia be: “Ameka nye ekem tso gbe me gbɔna heziɔ ɖe eƒe lɔlɔ̃tɔ ŋu?” Ɣeyiɣi aɖe do ŋgɔ la, wo dometɔ ɖeka gblɔ tso wo nɔvinyɔnua ŋu be: “Nenye glie wònye la, míatsɔ klosalo atɔ kpɔ ɖe edzi, eye nenye agboe wònye la, míatsɔ sederʋuƒowo aklãe.” Azɔ esi wònye be nusiwo me ɖetugbia to la mete ŋu gblẽ nuteƒewɔwɔ ƒe lɔlɔ̃ si wòɖo na eƒe lɔlɔ̃tɔa me o ta la, egblɔ be: “Gli menye, eye nye nowo le abe xɔ tsralawo ene; eye mekpɔ ŋutifafa le eŋku me.”—Hawo ƒe Ha 8:5, 9, 10.
Lɔlɔ̃ akuakua nye “Yehowa ƒe dzoƒaɖe.” Nukatae? Elabena Yehowa gbɔe lɔlɔ̃ sia tɔgbe dzɔ tso. Eyae nye Amesi de lɔlɔ̃ ƒe ŋutetea mía me. Enye dzo aɖe si womate ŋu atsi o. Hawo ƒe Ha na wòdze ƒã be ŋutsu kple nyɔnu dome lɔlɔ̃ te ŋu ‘tria akɔ wu ku.’—Hawo ƒe Ha 8:6.
Salomo ƒe ha sia si ƒo hawo katã ta la na ƒomedodo kplikplikpli si le Yesu Kristo kple eƒe gbɔgbɔme “ŋugbetɔ” la dome la hã me kɔ nyuie. (Nyaɖeɖefia 21:2, 9) Alesi Yesu lɔ̃ Kristotɔ amesiaminawoe la ƒo lɔlɔ̃ ɖesiaɖe si anɔ ŋutsu kple nyɔnu dome la ta. Amesiwo woƒo ƒu yɔ be ŋugbetɔa la léa nuteƒewɔwɔ me ɖe asi maʋãmaʋãe. Yesu tsɔ eƒe agbe na ɖe ‘alẽ bubuawo’ hã ta lɔlɔ̃tɔe. (Yohanes 10:16) Eyata tadeagula vavãwo katã ate ŋu asrɔ̃ Sunem-ɖetugbi la ƒe lɔlɔ̃ sẽŋu kple eƒe nuteƒewɔwɔ bliboe ƒe kpɔɖeŋua.
[Nɔnɔmetata si le axa 18]
Nɔnɔme kawoe Hawo ƒe Ha fia mí be míadi le amesi míava ɖe la ŋu?