Ta Enelia
“Miawoe Nye Nye Ðasefowo”!
1. Aleke Yehowa zãa nyagblɔɖii, eye aleke wòle be eƒe dukɔ nawɔ nu ɖe nyagblɔɖi me vava ŋui?
ETSƆMEGBƆGBLƆÐI ƒe ŋutete nye nusiwo dea vovototo Mawu vavã la kple alakpamawuwo katã dome la dometɔ ɖeka. Gake menye Yehowa ƒe Mawunyenye ɖeɖefia ta koe wògblɔa nya ɖi o. Abe alesi woɖee fia le Yesaya ta 43 lia ene la, Yehowa tsɔ nyagblɔɖi ɖo kpe eƒe Mawunyenye kple eƒe lɔlɔ̃ na dukɔ si wòbla nu kpli la dzi. Eƒe amewo hã makpɔ nyagblɔɖi me vava azi ɖoɖoe o; ele be woawo hã naɖi ɖase le nusi wokpɔ ŋu. Ẽ, ele be woanye Yehowa ƒe ɖasefowo!
2. (a) Nɔnɔme kae nɔ Israel le Yesaya ƒe ɣeyiɣia me? (b) Aleke Yehowa ʋu ŋku na eƒe dukɔ lae?
2 Nublanuitɔe la, kaka Yesaya ƒe ɣeyiɣia naɖo la, Israel ƒe nɔnɔme va gblẽ ale gbegbe be Yehowa bu dukɔa be wonye nuwɔametɔwo le gbɔgbɔ me. “Kplɔ dukɔ, si ta ŋku le, hafi wònye ŋkunɔ, to le eta, hafi wònye tokunɔ la doe!” (Yesaya 43:8) Aleke dukɔ si nye ŋkunɔ kple tokunɔ le gbɔgbɔ me awɔ azu Yehowa ƒe ɖasefo gbagbewo? Mɔ ɖeka dzi koe woato awɔ esia. Ele be woaʋu ŋku kple to na wo nukutɔe. Eye Yehowa ʋui na wo hã! Aleke wòwɔe? Gbã Yehowa he to sesẽ aɖe na wo—Israel-dziehefiaɖuƒea me tɔwo yi aboyo me le ƒe 740 D.M.Ŋ. me, eye Yudatɔwo hã yi le ƒe 607 D.M.Ŋ. me. Emegbe Yehowa wɔ nu kple ŋusẽ ɖe eƒe dukɔ la ta esi wòna ablɔɖe wo eye wòkplɔ ame susɔe siwo trɔ dzime, amesiwo ŋu ŋusẽ gaɖo le gbɔgbɔ me la va wo denyigba dzi le ƒe 537 D.M.Ŋ. me. Le nyateƒe me la, Yehowa ka ɖe edzi be womate ŋu agblẽ yeƒe tameɖoɖo sia me o ale gbegbe be anɔ ƒe 200 do ŋgɔ la, eƒo nu tso Israel ƒe ablɔɖekpɔkpɔ ŋu abe ɖe wòva eme xoxo ene.
3. Aleke Yehowa de dzi ƒo na etsɔme aboyomenɔlawoe?
3 “Ale Yehowa, amesi wɔ wò Yakob, eye wòmè wò Israel la, gblɔ esi: Megavɔ̃ o, elabena meɖe wò, metsɔ wò ŋkɔ yɔ wò be: Tɔnye nènye. Ne èto tɔ me la, meli kpli wò, eye ne èto tɔsisiwo me la, womalé wò o. Ne èto dzo me, mamè wò o, eye dzo ƒe aɖewo mafiã wò o. Elabena nye Yehowa enye wò Mawu, nye Israel ƒe kɔkɔetɔ la enye wò xɔnametɔ.”—Yesaya 43:1-3a.
4. Aleke wòdzɔe be Yehowa nye Israel ƒe Wɔla, eye kakaɖedzi kae wòna eƒe dukɔa le woƒe tɔtrɔ yi wo denyigba dzi ŋu?
4 Yehowa tsɔ ɖe le eme na Israel etɔxɛe elabena etɔe dukɔ ma nye. Enye dukɔ si eya ŋutɔ ɖo anyi be wòana Abraham ƒe nubabla la nava eme. (Mose I, 12:1-3) Eyata Psalmo 100:3 gblɔ be: “Midze sii be, Yehowa ye nye Mawu! Eyae wɔ mí, eye etɔ míenye, eƒe dukɔ kple alẽwo le eƒe lãnyiƒe míenye.” Esi Yehowa nye Israel ƒe Wɔla kple Ðela ta la, akplɔ eƒe dukɔ atrɔ yi wo denyigba dzi dedie. Kplamatsedonuwo abe tsi, tɔɖɔɖɔwo, kple dzogbenyigba xɔdzowo ene, maxe mɔ na wo alo awɔ nuvevi wo o, abe alesi nusiawo tɔgbe mexe mɔ na wo tɔgbuiwo esime woɖo ta Ŋugbedodonyigba la dzi ƒe akpe ɖeka do ŋgɔ o ene.
5. (a) Aleke Yehowa ƒe nyawo fa akɔ na gbɔgbɔ me Israel lae? (b) Amekawoe nye gbɔgbɔ me Israel la ƒe zɔhɛwo, eye amekawoe nye amesiawo ƒe kpɔɖeŋu le blema?
5 Yehowa ƒe nyawo faa akɔ na gbɔgbɔ me Israel ƒe ame susɔe siwo li le egbeŋkekea me, si me tɔwo nye “nuwɔwɔ yeye” siwo wodzi le gbɔgbɔ me la hã. (Korintotɔwo II, 5:17) Esi woɖo afɔ ameƒomea ƒe “tɔ” me dzideƒotɔe la, Mawu kpɔ wo ta lɔlɔ̃tɔe to kpɔɖeŋutɔɖɔɖɔwo me. Dzo si tso woƒe futɔwo gbɔ mewɔ nuvevi wo o, ɖe wòkɔ wo ŋu boŋ. (Zaxarya 13:9; Nyaɖeɖefia 12:15-17) Yehowa kpɔa ‘alẽ bubuawo’ ƒe “ameha gã” si va wɔ ɖeka kple Mawu ƒe gbɔgbɔmedukɔa la hã ta. (Nyaɖeɖefia 7:9; Yohanes 10:16) Amesiawo ƒe blema kpɔɖeŋue nye ‘amedzrowo ƒe ha gã’ si nɔ Israel-viwo dome esime woʋu tso Egipte kple amesiwo menye Yudatɔwo o siwo nɔ aboyome siwo wona ablɔɖee tso Babilon la dome.—Mose II, 12:38; Ezra 2:1, 43, 55, 58.
6. Aleke Yehowa ɖee fia be yenye Mawu si lɔ̃a nya dzɔdzɔe le tafexexe (a) ɖe ŋutilã me Israel tae? (b) ɖe gbɔgbɔ me Israel tae?
6 Yehowa do ŋugbe be yeato Media kple Persia ʋakɔwo dzi aɖe yeƒe amewo tso Babilon. (Yesaya 13:17-19; 21:2, 9; 44:28; Daniel 5:28) Esi Yehowa nye Mawu si lɔ̃a nya dzɔdzɔe ta la, axe tafe si sɔ na Medo-Persia si nye eƒe “dɔtsɔlawo” atsɔ axɔ na Israel. “Matsɔ Egipte aƒle tawò, eye Kus kple Seba axɔ ɖe tewòƒe. Esi nèxɔ asi le ŋkunye me, bubu le ŋuwò, eye melɔ̃ wò ta la, matsɔ amegbetɔwo ana ɖe tewòƒe kple dukɔwo ɖe wò agbe ta.” (Yesaya 43:3b, 4) Ŋutinya ɖo kpe edzi be Persia Fiaɖuƒe ɖu Egipte, Etiopia, kple Seba si te ɖe eŋu dzi, abe alesi tututu Mawu gblɔe ɖi ene. (Lododowo 21:18) Nenema ke le ƒe 1919 me la, Yehowa ɖe gbɔgbɔ me Israel ƒe ame susɔeawo tso aboyo me to Yesu Kristo dzi. Gake mehiã be woaxe naneke na Yesu ɖe dɔ siwo wòwɔ ta o. Menye xexemedukɔ aɖe ƒe dziɖula wònye o. Eye eya ŋutɔ ƒe gbɔgbɔmenɔviwo ɖemee wònɔ. Tsɔ kpe ɖe eŋu la, Yehowa tsɔ ‘dukɔwo wɔ eƒe domenyinu kple anyigba ƒe mlɔenuwo wɔ etɔe’ xoxo le ƒe 1914 me.—Psalmo 2:8.
7. Aleke Yehowa se le eɖokui me ɖe eƒe amewo ŋu le blema kple le egbe ɣeyiɣiwo siaa me?
7 Kpɔ alesi Yehowa ɖe eƒe beléle na aboyome siwo wòɖe la fiae ɖa. Egblɔ na wo be ‘woxɔ asi’ eye ‘bubu le wo ŋu’ le yeƒe ŋkume eye be ‘yelɔ̃’ wo. (Yeremya 31:3) Nenema ke wòsena le eɖokui me ɖe esubɔla nuteƒewɔlawo ŋu egbea—eye eléa be na wo wu gɔ̃ hã. Wona ƒomedodo va le Kristotɔ amesiaminawo kple Mawu dome, menye to dzɔdzɔme nu o, ke to Mawu ƒe gbɔgbɔ kɔkɔe ƒe dɔwɔwɔ me esi woa ŋutɔwo ɖe adzɔgbe na wo Wɔla la megbe. Yehowa he amesiawo va Via kple eɖokui gbɔe eye eŋlɔ eƒe sewo kple gɔmeɖosewo ɖe woƒe dzi senuwo dzi.—Yeremya 31:31-34; Yohanes 6:44.
8. Kakaɖedzi kae Yehowa na aboyomeawo, eye aleke woabu woƒe ɖeɖekpɔkpɔ lae?
8 Esi Yehowa nɔ kakaɖedzi geɖe wu nam aboyomenɔlaawo la, egagblɔ be: “Megavɔ̃ o, elabena meli kpli wò; makplɔ viwòwo tso ɣedzeƒe vɛ, eye maƒo nuwò ƒu tso ɣetoɖoƒe! Magblɔ na anyiehe be: Tsɔe vɛ! eye na dziehe be: Megasika ame ɖi o! Kplɔ vinyeŋutsuwo tso didiƒe vɛ kple vinyenyɔnuwo tso anyigba ƒe mlɔenu, amesiwo katã ŋu woyɔ nye ŋkɔ ɖo, amesiwo mewɔ hena nye bubu, memè wo, eye mewɔ wo.” (Yesaya 43:5-7) Yehowa ate ŋu aɖo anyigba ƒe teƒe diditɔ kekeake gɔ̃ hã ne ɣeyiɣia de be wòana ablɔɖe viaŋutsuwo kple vianyɔnuwo ahakplɔ wo atrɔ va wo denyigba lɔlɔ̃a dzi. (Yeremya 30:10, 11) Ðikeke mele eme o be woabu ablɔɖekpɔkpɔ sia be aƒo dukɔa ƒe ɖeɖekpɔkpɔ tso Egipte gɔ̃ hã ta.—Yeremya 16:14, 15.
9. Mɔ eve kawo nue Yehowa tsɔ eƒe ɖeɖedɔwo wɔwɔ ku ɖe eƒe ŋkɔ ŋu le?
9 Esi Yehowa ɖo ŋku edzi na eƒe dukɔa be yeƒe ŋkɔe wotsɔ na wo la, eɖo kpe ŋugbe si wòdo be yeaɖe Israel la dzi. (Yesaya 54:5, 6) Tsɔ kpe ɖe eŋu la, Yehowa tsɔa eƒe ŋkɔ kuna ɖe ŋugbe siwo wòdo le ɖeɖekpɔkpɔ ŋu la ŋuti. Le esia wɔwɔ me la, ekpɔa egbɔ be bubu si atso yeƒe nyagblɔɖinya me vava me la nanye ye tɔ. Amesi va ɖu Babilon dzi gɔ̃ hã mate ŋu axɔ bubu si nye Mawu gbagbe ɖeka kolia la tɔ o.
Mawuwo le Ʋɔnu
10. Nya sesẽ kae Yehowa tsɔ ɖo dukɔwo kple woƒe mawuwo ŋkume?
10 Azɔ Yehowa nɔ te ɖe ŋugbe si wòdo be yeana ablɔɖe Israel la dzi fɔ xexeame katã ƒe ʋɔnunya aɖe si me wòadrɔ̃ ʋɔnu dukɔwo ƒe mawuwo le la ɖe te. Míexlẽ be: “Dukɔwo katã neƒo ƒu, anyigba dzi dukɔwo katã neƒo ta kpli: Ameka le wo dome agblɔ esia, alo ana míase nya, siwo dzɔ va yi? Woƒe ɖasefowo neva, ne woatso na wo, eye wosee ahagblɔ bena: Ele eme.” (Yesaya 43:9) Yehowa tsɔ nya sesẽ aɖe ɖo xexemedukɔwo ŋkume. Nya si gblɔm wòle enye be: ‘Mina miaƒe mawuwo nagblɔ etsɔme ɖi wòasɔ pɛpɛpɛ ne woatsɔ aɖee afia be mawuwoe yewonye.’ Esi wònye Mawu vavã la koe ate ŋu agblɔ nya ɖi vodadamanɔmee ta la, dodokpɔ sia aklo nu le alakpamawuwo katã ŋu. (Yesaya 48:5) Gake Ŋusẽkatãtɔ la gagblɔ nudidi bubu si sɔ le se nu: Amesiwo katã gblɔ be mawu vavãwoe yewonye nakplɔ woƒe ɖasefowo vɛ, le woƒe nyagblɔɖiwo kple wo me vava siaa ŋu. Yehowa meɖe eɖokui le se ƒe nudidi sia me o.
11. Dɔ kae Yehowa de asi na esubɔlawo, eye nukae Yehowa ɖe fia le eƒe Mawunyenye ŋu?
11 Esi ŋusẽ mele alakpamawuwo si o ta la, womate ŋu akplɔ ɖasefo aɖeke vɛ o. Eyata ezu ŋukpe na wo be ame aɖeke meva ɖasefonɔƒea o. Gake ɣeyiɣi ɖo azɔ be Yehowa naɖo kpe eƒe Mawunyenye dzi. Etrɔ kpɔ eƒe dukɔa hegblɔ be: “Miawoe nye nye ɖasefowo kple nye dɔla, si metia, ne mianyae, miaxɔ dzinye ase, eye miadze sii be, nyee. Womewɔ mawu aɖeke do ŋgɔ nam o, eye ɖeke mado megbe nam o. Nyee nye Yehowa, eye xɔnametɔ aɖeke meli kpe ɖe ŋunye o. Medo ŋugbe, eye mexɔ na ame; mena miesee, eye mawu tutɔ aɖeke menɔ mia dome o; . . . Miawoe nye nye ɖasefowo, eye nyee nye Mawu. Nyee li tso tititi ke, eye ame aɖeke maxɔ ame le asinye o; ne mewɔ nu la, ameka [alé nye asi]?”—Yesaya 43:10-13.
12, 13. (a) Ðaseɖiɖi gbogbo kawoe le Yehowa ƒe amewo si woagblɔ? (b) Aleke Yehowa ƒe ŋkɔ va de du le egbeɣeyiɣiwo mee?
12 Eteƒe medidi o ɖasefo kpɔdzidzɔwo ƒe ameha aɖe wɔ ɖe Yehowa ƒe nyawo dzi va yɔ ɖasefonɔƒea. Woƒe ɖaseɖiɖia me kɔ eye ɖikeke mele eŋu o. Abe Yosua ene la, woɖi ɖase be ‘nya sia nya si Yehowa gblɔ la va eme. Nya ɖeka hɔ̃ hã medo kpo emevava o.’ (Yosua 23:14) Yesaya, Yeremya, Xezekiel, kple nyagblɔɖila bubu siwo tsɔ nusɔsɔe gblɔ Yuda ƒe aboyomenɔnɔ kple wo ɖeɖe tso aboyo me nukutɔe ɖi la katã ƒe nyawo gale ɖiɖim le Yehowa ƒe amewo ƒe tome. (Yeremya 25:11, 12) Woyɔ Yuda ɖela, Kores, ƒe ŋkɔ xoxoxo do ŋgɔ na edzidzi!—Yesaya 44:26–45:1.
13 Esi kpeɖodzi gbogbo siawo li ta la, amekae ate ŋu agbe be menye Yehowae nye Mawu vavã ɖeka kolia la o? Yehowa ko sie wɔla mele o, si to vovo na dukɔwo ƒe mawuwo; eya koe nye Mawu vavã la.a Eyata mɔnukpɔkpɔ dodzidzɔname aɖe le amesiwo ŋu Yehowa ƒe ŋkɔ le si be woagblɔ eƒe nu wɔnukuwo na megbeviwo kple ame bubu siwo abia eta se. (Psalmo 78:5-7) Nenema ke mɔnukpɔkpɔ su Yehowa ƒe egbeŋkekea me Ðasefowo si be woaɖe gbeƒã Yehowa ƒe ŋkɔ le anyigbaa dzi katã. Le ƒe 1920 ƒeawo me la, Mawu ƒe ŋkɔ Yehowa ŋuti gɔmesese deto va su Biblia Nusrɔ̃viwo si. Emegbe le takpekpe aɖe si wowɔ le Columbus, Ohio, le July 26, 1931, dzi me la, Habɔbɔa ƒe zimenɔla Joseph F. Rutherford, gblɔ tameɖoɖo kplikpaa aɖe si ƒe tanyae nye “Ŋkɔ Yeye.” Nya siwo nye, “Míedi be amewo nanya ŋkɔ Yehowa ɖasefowo na mí eye woayɔ mí nenema” la do dzidzɔ na takpekpevalawo, eye wolɔ̃ ɖe edzi sesĩe be “Ẽ!” tsɔ da asi ɖe tameɖoɖo kplikpaa ma dzi. Yehowa ƒe ŋkɔ de du le xexeame katã tso ɣemaɣi.—Psalmo 83:19.
14. Nuka dzie Yehowa ɖo ŋkui na Israel-viwo, eye nukata ŋkuɖodzinya sia sɔ ɖe ɣeyiɣia dzi?
14 Yehowa léa be na amesiwo wɔa nu ɖe eƒe ŋkɔ ŋu bubutɔe, eye ebua wo abe “eƒe ŋkuvi” ene. Eɖo ŋku esia dzi na Israel-viwo, eye wògblɔ alesi wòɖe wo tso Egipte hekplɔ wo to gbedzi dedie la na wo. (Mose V, 32:10, 12) Mawu tutɔ aɖeke menɔ wo dome ɣemaɣi o, elabena woa ŋutɔwo kpɔ alesi gbegbe woɖi gbɔ Egipte-mawuwo katãe. Ẽ, Egiptetɔwo ƒe mawuwo katã mete ŋu kpɔ Egipte ta alo xe mɔ na Israel ƒe dzodzo o. (Mose II, 12:12) Nenema ke Babilon sesẽ si alakpamawuwo ƒe gbedoxɔ 50 ya teti le eƒe dugã me la mate ŋu alé Ŋusẽkatãtɔ la ƒe asi ne ɣeyiɣia de be wòana ablɔɖe eƒe amewo o. Edze ƒã be ‘xɔnametɔ aɖeke meli kpe ɖe Yehowa ŋu o.’
Aʋawɔsɔwo Dze Anyi eye Gaxɔwo Ʋu
15. Nya kae Yehowa gblɔ ɖi le Babilon ŋu?
15 “Ale Yehowa, miaƒe xɔnametɔ, Israel ƒe kɔkɔetɔ la, gblɔ esi: Le mia tae medɔ ame ɖo ɖe Babel, eye mena wonyã amewo ɖe nu, eye wonyã Kaldeatɔwo ɖo ɖe woƒe ʋu, siwo me wokpɔ dzidzɔ le tsã la me. Nye Yehowa enye miaƒe kɔkɔetɔ, nye Israel ƒe wɔla enye miaƒe fia. Ale Yehowa, amesi ta mɔ ɖe atsiaƒu me, eye wòɖe toƒe ɖe tɔ sesẽwo me la, gblɔ esi; eya, amesi na tasiaɖamwo, sɔwo, aʋakɔwo kple kalẽtɔwo siaa ho; woɖo baba ɖe anyigba, eye womegafɔ o, wo nu tsi, abe alesi akaɖi me ɖovu tsina ene.”—Yesaya 43:14-17.
16. Nukae adzɔ ɖe Babilon, Kaldea-sitsalawo, kple Babilon-taʋlila ɖesiaɖe dzi?
16 Babilon le abe gaxɔ ene na aboyomeawo le gɔmesese sia nu be exe mɔ na woƒe tɔtrɔ yi Yerusalem. Gake Babilon-takpɔnuwo menye mɔxenu na Ŋusẽkatãtɔ la o, elabena eyae nye Amesi “ta mɔ ɖe [Ƒudzĩa me va yi], eye wòɖe toƒe ɖe tɔ sesẽwo me”—anye Yordan-tɔsisia ye wòwɔnɛ. (Mose II, 14:16; Yosua 3:13) Nenema ke Yehowa ƒe dɔla Kores ana Frat-tɔsisi gã la namiẽ be eƒe aʋawɔlawo nate ŋu age ɖe dua me. Kaldea-sitsala siwo toa Babilon-tsimɔwo—tsitoƒe siwo asitsatɔdziʋu gãwo kple tɔdziʋu siwo me wotsɔa Babilon-mawuwo ɖo tona—la afa konyi ne woƒe fiadu sesẽ la mu. Wɔna aɖeke manɔ Babilon-tasiaɖam ɖiduwo ŋu o, abe alesi wòdzɔ ɖe Farao ƒe tasiaɖamwo dzi le Ƒudzĩa me ene. Womate ŋu axɔ nɛ o. Wo dzi dzelawo awu amesiame si ate kpɔ be yeaʋli dua ta, abe alesi wotsia akaɖi me ɖovu bɔbɔe ene.
Yehowa Akplɔ Eƒe Amewo Ayi Wo De Dedie
17, 18. (a) Nu “yeye” kae Yehowa gblɔ ɖi? (b) Mɔ ka nue dukɔa maɖo ŋku gbaɖegbe nuwo dzi le o, eye nukatae?
17 Yehowa tsɔ ɖeɖedɔ siwo wòwɔ va yi sɔ kple nusi wògale wɔwɔ ge hegblɔ be: “Migaɖo ŋu gbaɖegbe nuwo o, eye migalé ŋku ɖe nusiwo dzɔ va yi la ŋu o. Kpɔ ɖa, mele nu yeye wɔ ge; ele nu dom ɖa xoxo, miedze sii oa? Mana mɔ tata naɖo gbe dzi, eye tɔsisiwo naɖo gbegbe. Gbemelãwo, amegãxiwo kple golowo akafum, elabena mena tsi ɖo gbe dzi, eye tɔsisiwo ɖo gbegbe, ne mana tsi nye dukɔ, nye ame tiatiawo, ne woano. Dukɔ, si mewɔ na ɖokuinye la, axlẽ nya afia le nye kafukafu ŋu.”—Yesaya 43:18-21.
18 Esi Yehowa gblɔ be “migaɖo ŋu gbaɖegbe nuwo o” la, menye ɖe wòle gbɔgblɔm be ye subɔlawo naɖe ɖeɖedɔ siwo yewɔ va yi ɖa le susu me o. Le nyateƒe me la, nusiawo nye Israel ƒe ŋutinya si tso Mawu ƒe gbɔgbɔ me la ƒe akpa aɖe, eye Yehowa de se be woaɖo ŋku woƒe dzodzo le Egipte dzi ƒe sia ƒe le Ŋutitotoŋkekenyuia ɖuɣi. (Mose III, 23:5; Mose V, 16:1-4) Gake fifia Yehowa di be yeƒe amewo nakafu ye ɖe “nu yeye” aɖe ta—nusi teƒe woa ŋutɔwo woakpɔ kple ŋku. Esia menye wo ɖeɖe tso Babilon ko o, ke woƒe mɔzɔzɔ yi wo de, ɖewohĩ to dzogbemɔ si le tẽ dzi hã le eme. Yehowa ata “mɔ” na wo le anyigba ma si nye gbegbe la dzi eye wòawɔ nukunu siwo ɖi nusiwo wòwɔ na Israel-viwo le Mose ƒe ŋkekea me—ana nu amesiwo trɔ gbɔna la woaɖu le dzogbenyigbaa dzi eye wòana woakpɔ tsi ano le tɔsisi ŋutɔŋutɔwo me. Nusiwo Yehowa awɔ na wo la asɔ gbɔ ale gbegbe be lã wɔadãwo gɔ̃ hã akafu Mawu eye womalé ameawo o.
19. Aleke gbɔgbɔ me Israel ƒe ame susɔeawo kple woƒe zɔhɛwo zɔa “mɔ tata kɔkɔe” la dzii?
19 Nenema ke wona ablɔɖe gbɔgbɔ me Israel-viwo ƒe ame susɔeawo tso Babilon ƒe aboyo me le ƒe 1919 mee, eye wodze mɔ si Yehowa ta na wo si nye “mɔ tata kɔkɔe,” la dzi zɔzɔ gɔme. (Yesaya 35:8) Mebia be woaʋu ato dzogbenyigba xɔdzo dzi ayi anyigba ƒe teƒe bubu abe Israel-viwo ene o, eye womeva ɖo Yerusalem le ɣleti ʋɛ aɖewo megbe wònye woƒe mɔzɔzɔa ƒe nuwuwu o. Gake Kristotɔ amesiaminawo zɔ “mɔ tata kɔkɔe” la dzi yi gbɔgbɔmeparadiso aɖe me. Le woawo gome la, woayi edzi azɔ “mɔ tata kɔkɔe” ma dzi, elabena egahiã kokoko be woazɔ mɔ to nuɖoanyi sia me. Zi alesi woyi edzi le mɔ tataa dzi zɔm—zi alesi wowɔna ɖe Mawu ƒe dzadzɛnyenye kple kɔkɔenyenye ƒe dzidzenuwo dzi—ko la, woakpɔtɔ anɔ gbɔgbɔmeparadisoa me. Eye dzidzɔ kae nye si wònye na wo be zɔhɛ siwo “menye Israel-viwo o” ƒe ameha gã aɖe va wɔ ɖeka kpli wo! Vovototo gã si le wo kple amesiwo kpɔa Satana ƒe nuɖoanyia sinu domee nye be ame susɔeawo kple woƒe zɔhɛwo yi edzi le vivi sem le gbɔgbɔmekplɔ̃ gã aɖe si Yehowa ɖo ŋu. (Yesaya 25:6; 65:13, 14) Esi ame geɖe siwo si lãwo ƒe nɔnɔme nɔ tsã kpɔ alesi Yehowa le eƒe amewo yramee la, wotrɔ woƒe mɔwo hekafu Mawu vavã la.—Yesaya 11:6-9.
Yehowa Ðe Nusi Ve Eyama Fia
20. Aleke Israel si nɔ anyi le Yesaya ƒe ŋkekea me mewɔ nu ɖe Yehowa ŋu nyuie o?
20 Le blema la, Israel-vi susɔe siwo wogbugbɔ ɖo te la nye amesiwo trɔ woƒe nɔnɔme ne wotsɔ wo sɔ kple dzidzime vɔ̃ɖi si nɔ anyi le Yesaya ƒe ɣeyiɣia me. Yehowa gblɔ le dzidzime vɔ̃ɖi sia ŋu be: “Yakob, menye wòe yɔm o, eye Israel, mèdze agbagba le ŋunye o. Mètsɔ wò alẽviwo sa numevɔ nam o, eye mètsɔ wò akpedavɔsawo de bubu ŋunye o. Nyemetsɔ wò nuɖuvɔsawo do agba na wò o, alo tsɔ dzudzɔ ʋeʋẽe dodo ɖe fu na wò o. Mètsɔ ga ƒle gbekee nam o, eye mètsɔ wò akpedavɔsawo ƒe ami ɖi ƒoe nam o; ke boŋ ètsɔ wò nuvɔ̃wo do agba nam, eye nèɖe fu nam kple wò vodadawo.”—Yesaya 43:22-24.
21, 22. (a) Nukata míate ŋu agblɔ be Yehowa ƒe nudidiwo menye agba kpekpe o? (b) Aleke dukɔa ƒe nuwɔna fia be wona Yehowa le wo subɔm?
21 Esi Yehowa gblɔ be, “nyemetsɔ wò nuɖuvɔsawo do agba na wò o, alo tsɔ dzudzɔ ʋeʋẽe dodo ɖe fu na wò o” la, menye ɖe wòle gbɔgblɔm be vɔsasa kple dzudzɔ ʋeʋẽe (kotoklobo si nɔa nusiwo wotsɔ wɔa dzudzɔdonu ʋeʋẽe kɔkɔe me) mehiã o. Le nyateƒe me la, tadedeagu vavãtɔ ƒe akpa vevi aɖee nusiawo nye le Se ƒe nubablaa te. Nenema ke enye ‘gbeke,’ si nye gbe aɖe si ʋẽna lilili, si hã wodena ami kɔkɔe si wosina na ame me. Israel-viwo ŋea aɖaba ƒua nusiawo zazã le gbedoxɔ me subɔsubɔdɔwo wɔwɔ me dzi. Gake ɖe nudidi siawo nye agbaa? Kura o! Nu bɔbɔe aɖe koe Yehowa ƒe nudidiwo nye ne wotsɔ wo sɔ kple alakpamawuwo tɔ. Le kpɔɖeŋu me, alakpamawu Molex bia be woatsɔ ɖeviwo asa vɔe na ye—nusi Yehowa mebia kpɔ o!—Mose V, 30:11; Mixa 6:3, 4, 8.
22 Ne ɖe Israel-viwo te ŋu kpɔa nu kple gbɔgbɔmeŋkuwo la, anye ne ‘Yehowa ƒe nu mati wo’ akpɔ o. Ne ɖe wolé ŋku ɖe eƒe Sea ŋu la, anye ne woakpɔ lɔlɔ̃ deto si le esi na wo eye woatsɔ dzidzɔ ana “ami” si nye woƒe vɔsawo ƒe akpa nyuitɔ la eyama. Woa ŋutɔwo boŋue tsɔa amia ŋukeklẽtɔe. (Mose III, 3:9-11, 16) Aleke gbegbe dukɔ vɔ̃ɖi sia tsɔ woƒe nuvɔ̃wo do agbae na Yehowa enye si—si na eya boŋ va le wo subɔm!—Nexemya 9:28-30.
Tohehe Ðe Vi na Wo
23. (a) Nukata Yehowa ƒe tohehea sɔ nyuie? (b) Nukawoe Mawu tsɔ he toe na Israel?
23 Togbɔ be to si Yehowa he na wo la nu sẽ, eye esɔ nenema hã la, nu nyuiwo do tso eme, si na wòte ŋu kpɔ nublanui na wo. “Nyee, nyee atutu wò dzidadawo ɖa le nye ŋutɔ ɖokuinye ta, eye nyemaɖo ŋu wò nuvɔ̃wo o. Ðo ŋku edzi nam, na míahe nya kple mía nɔewo; to wò nyawo, ne tɔwò nadzɔ. Fofowò gbãtɔ wɔ nuvɔ̃, eye [wò nyanuɖelawo, (“nyagɔmeɖelawo,” “NW” ƒe etenuŋɔŋlɔ)] to vo ɖe ŋunye. Eyata medo gu [kɔkɔeƒe la ƒe amegãwo, “NW”], metsɔ Yakob de asi na tsɔtsrɔ̃ gbidigbidi, eye Israel na fewuɖuɖu.” (Yesaya 43:25-28) Adam, si nye ame “gbãtɔ” la mee Israel dzɔ tso abe xexemedukɔ bubuwo katã ene. Eyata Israel-vi aɖeke mate ŋu agblɔ be ‘ye tɔ dzɔ’ o. Israel ƒe “nyanuɖelawo”—Sea fialawo, alo wo gɔme ɖelawo—gɔ̃ hã wɔ nuvɔ̃ ɖe Yehowa ŋu hefia alakpanuwo. Eyata Yehowa hã atsɔ eƒe dukɔ bliboa ade asi na “tsɔtsrɔ̃” kple “fewuɖuɖu.” Ado gu amegã siwo katã le eƒe “kɔkɔeƒe,” alo gbedoxɔa me.
24. Susu vevi ka tae Yehowa atsɔ ake eƒe dukɔwo—le blema kple fifia—ke hã aleke wòsena le eɖokui me ɖe wo ŋu?
24 Gake de dzesii be menye Israel ƒe dzimetɔtrɔ ta koe Mawu ava kpɔ nublanui na wo ɖo o; Yehowa ŋutɔ hã tae. Ẽ, eƒe ŋkɔ hã le nyaa me. Ne ɖe wòagblẽ Israel ɖe aboyo me ɖaa la, anye ne eteƒekpɔlawo ado vlo eya ŋutɔ ƒe ŋkɔ. (Psalmo 79:9; Xezekiel 20:8-10) Nenema ke egbea hã Yehowa ƒe ŋkɔa ŋuti kɔkɔ kple eƒe dziɖulanyenye taʋiʋli le vevie wu amegbetɔwo ƒe ɖeɖekpɔkpɔ. Gake Yehowa lɔ̃a amesiwo xɔa eƒe amehehe bliboe hesubɔnɛ le gbɔgbɔ kple nyateƒe me. Eɖea eƒe lɔlɔ̃ na amesiawo fiana—woɖanye amesiaminawo alo alẽ bubuawo o—to alesi wòtutua woƒe nuvɔ̃wo ɖa to Yesu Kristo ƒe vɔsa la dzi me.—Yohanes 3:16; 4:23, 24.
25. Nu dziŋɔ kawoe Yehowa awɔ le etsɔme si gbɔna kpuie, eye aleke míate ŋu aɖe míaƒe ŋudzedzekpɔkpɔ afiae fifia?
25 Eteƒe madidi o Yehowa aɖe eƒe lɔlɔ̃ na esubɔla nuteƒewɔlawo ƒe ameha gã la afia ne ewɔ nu yeye aɖe na wo to wo ɖeɖe tso “xaxa gã” la me tsɔ yi ɖe “anyigba yeye” si ŋu wokɔ dzi me. (Nyaɖeɖefia 7:14; Petro II, 3:13) Woakpɔ Yehowa ƒe ŋusẽ ɖeɖefia si dzi ŋɔ wu ɖesiaɖe si amegbetɔwo kpɔ kpɔ la teƒe. Mɔkpɔkpɔ si ŋu kakaɖedzi le le nudzɔdzɔ ma ŋu naa amesiaminawo ƒe ame susɔeawo kple amesiwo katã ava nye ameha gã la me tɔwo kpɔa dzidzɔ eye wonɔa agbe gbesiagbe wòwɔa ɖeka kple dɔ gã si wotsɔ de asi na wo, si dze le nya sia me be: “Miawoe nye nye ɖasefowo”!—Yesaya 43:10.
[Etenuŋɔŋlɔwo]
a Wogblɔ le mawu geɖe ŋu le dukɔwo ƒe xotutuwo me be ɖe “wodzi” wo eye woawo hã dzi “vi.”
[Nɔnɔmetata si le axa 48, 49]
Yehowa akpe ɖe Yudatɔwo ŋu ne wole mɔ dzi yina wo de Yerusalem
[Nɔnɔmetata siwo le axa 52]
Yehowa tɔ gbe dukɔwo be woakplɔ woƒe mawuwo ƒe ɖasefowo vɛ
1. Baal ƒe nɔnɔme si wowɔ kple gadzẽ 2. Astarte ƒe anyikpememe suewo 3. Egiptetɔwo ƒe mawuɖekaetɔ̃ siwo nye Horus, Osiris, kple Isis 4. Hela-mawu siwo nye Athena (miame) kple Afrodito
[Nɔnɔmetata siwo le axa 58]
“Miawoe nye nye ɖasefowo.”—Yesaya 43:10