William Whiston—Aglãdzelae Alo Agbalẽnyala Anukwaretɔea?

ÐE NÀÐE ASI le wò dɔwɔɖui ŋuti le wò dzixɔse ta? William Whiston ɖe asi le etɔ ŋu.

Eva zu amesi ŋuti subɔsubɔ ŋuti nyaʋiʋliwo fɔ ɖo le ƒe alafa 18 lia ƒe gɔmedzedze me, esime wòhe nya kple England Sɔlemeha la le Biblia ƒe nufiafia aɖe ŋuti. Le esia ta wova bui be enye aglãdzela. Woɖu fewu le eŋu le nusi wòwɔ ta gake eƒe nuwɔna de bubu eŋu hã.

Amekae nye William Whiston? Eye dɔ kae wòwɔ?

Enye Biblia Nyala

William Whiston nye Aƒetɔ Isaac Newton ƒe zɔhɛ tagbɔ ɖaɖɛtɔ aɖe si wo kplii wode Cambridge Yunivɛsiti. Ne èxlẽ ƒe alafa gbãtɔ me Yudatɔ ŋutinyaŋlɔla Flavius Josephus ƒe agbalẽ siwo le Eŋlisigbe me kpɔ la, ɖewohĩ anye esi gɔme Whiston ɖe le 1736 mee nye ma nèxlẽ. Togbɔ be agbalẽ sia ƒe gɔmeɖeɖe bubuwo li hã la, agbalẽ si gɔme wòtsɔ agbalẽnyanya geɖe ɖe hekpe ɖe eƒe dzesidenyawo kple numeɖeɖe siwo wòŋlɔ kpe ɖe eŋuti la tɔgbe aɖeke meli haɖe o eye wogale etam fifia nakpɔ aƒle. Ame geɖe bua agbalẽ sia be eyae ƒo Whiston ƒe agbalẽ siwo katã wòŋlɔ va yi la ta.

Gake mele be míaŋe aɖaba ƒu Primitive New Testament si nye Kristotɔwo ƒe Hela Ŋɔŋlɔawo si gɔme Whiston ɖe la dzi o. Wotae le ƒe 1745 me esi Whiston nɔ eƒe ƒe 78 lia me. Whiston ɖe Nyanyui eneawo kple Apostolowo ƒe Dɔwɔwɔwo gɔme tso blemagbalẽ si wotsɔ asi ŋlɔe ɖe egbegbegbalẽwo ƒe nɔnɔme nu si woyɔna be Codex Bezae me, eɖe Paulo ƒe lɛtawo gɔme tso Clermont Codex me, eye wòɖe akpa susɔeawo hekpe ɖe Nyaɖeɖefia ŋu gɔme tso Alexandrine ƒe Blemagbalẽ si wotsɔ asi ŋlɔe me. Etsɔ ŋuɖɔɖɔɖo ɖe teƒe masɔmasɔ si le Yohanes I, 5:7 me la ɖa. Whiston tia Hela-blemagbalẽ etɔ̃ siawo be woawoe nye agbalẽ nyuitɔ siwo nɔ anyi ɣemaɣi.

Edze ƒã be lɔlɔ̃ na Biblia koŋ ye ʋã Whiston be wòwɔ dɔ ma. Nusi bɔ le eƒe ŋkekea mee nye dzɔdzɔmesubɔsubɔ si nye nufiafia si gblɔ be woanɔ te ɖe tamesusuwo ɖeɖeko dzi axɔ Mawu dzi se. Agbalẽ si nye William Whiston—Honest Newtonian gblɔ be, elé “amesiwo léa blemakɔnuwo me ɖe asi la ƒe susu si nye be Biblia koe nye blemaŋutinya dzɔtsoƒe ɖeka kolia si ŋu kpɔtsotso mele o” la me ɖe asi goŋgoŋ. Nya Newtonian si wozã le afisia la ku ɖe Isaac Newton, amesi wonya nyuie le eƒe agbalẽ si nye Principia, si me wòɖe nu me le nuheŋusẽ ƒe se si le xexeame katã ŋu la ta. Newton ƒe susuwo kpɔ ŋusẽ gã aɖe ɖe William Whiston dzi. Alekee?

Amesiwo ƒe Nɔnɔmewo To Vovo

Wodzi William Whiston le ƒe 1667 eye wònye England Sɔlemeha la ƒe nunɔla aɖe ƒe vi. Le esi woɖoe nunɔlae le ƒe 1693 me megbe la, etrɔ yi Cambridge Yunivɛsiti be wòasrɔ̃ akɔntabubu eye wòva zu Newton ƒe kpeɖeŋutɔ. Hadede kplikplikpli aɖe va nɔ wo dome. Esime Newton ɖe asi le eƒe ɖoƒe ŋu abe Lucasia Akɔntafiala Gã ene le ƒe etɔ̃ megbe la, ekpɔ egbɔ be wotia Whiston ɖo ye teƒe. Le Whiston ƒe dɔa wɔwɔ me la, efia nu le ɣletiviŋutinunya kple akɔntabubu ŋu, gake Newton ƒe ŋusẽkpɔɖeamedzi hã ʋãe be wòtsɔ ɖe le Biblia ƒe akɔntabubu kple nufiafia me vevie.

Newton lɔ̃a mawusubɔsubɔ. Esi wòxɔ Ƒe Akpe Ðeka Dziɖuɖu si ŋu Biblia ƒo nu tsoe dzi se vevie ta la, eŋlɔ agbalẽ geɖe le Daniel kple Nyaɖeɖefia ƒe nyagblɔɖiwo ŋu. Gake wometa agbalẽ siawo dometɔ aɖeke le eƒe agbenɔɣi o. Egbe Triniti-nufiafia la. Gake esime wòɖo edzi be woata eƒe kpeɖodzi siwo tsi tre ɖe Trinitia ŋu la, The New Encyclopædia Britannica gblɔ be “Newton he ɖe megbe le vɔvɔ̃ be amewo ava nya yeƒe susu siwo tsi tre ɖe Triniti la ŋuti la ta.” Alesi F. E. Manuel gblɔ le Isaac Newton, Historian mee nye si: “Newton ƒe ha la mia nu ɖe woƒe nukpɔsusuwo dzi alo woɖo asi woƒe dzonɔameme dzi. . . . Afisi Newton le vɔvɔ̃m le la, Whiston ya doa aƒa ƒoa nu kple dzideƒo.” Esia wɔe be ŋutsu eveawo ƒe nɔnɔme to vovo na wo nɔewo.

Woɖee le Hame

Le July, 1708 me la, Whiston ŋlɔ agbalẽ ɖo ɖe bisiɔpgã siwo le Canterbury kple York siaa henɔ eƒom ɖe wo nu be woawɔ tɔtrɔ le England Sɔlemeha ƒe nufiafiawo me le Triniti ƒe alakpanufiafia si dze le Atanasio ƒe Xɔsemeʋuʋua me ŋu. Eme kɔ be woxlɔ̃ nui be wòanya nuƒoƒo. Gake Whiston mese woƒe gbe o. Egblɔ be: “Mesrɔ̃ nu tso nyati siawo ŋu tsitotsito eye meva se egɔme ƒã be wotsɔ nya siawo flu Kristo-hamea ŋutɔ ƒe geɖe; ne Mawu yram eye ŋusẽ le asinye la, womagaflui azɔ o.”

Newton vɔ̃ be yeƒe hadome kple agbalẽnyanya ƒe ɖoƒe ava ge le ye si. Ke Whiston ya mevɔ̃ o. Esi wòtrɔ asi le eƒe dzixɔse siwo tsi tre ɖe Trinitia ŋu ŋu vɔ la, eŋlɔ agbalẽvi aɖe si me wòɖe eƒe nukpɔsusuwo gblɔ le. Gake le August 1708 me la, Cambridge Yunivɛsiti gbe be yemana mɔɖegbalẽ Whiston wòata agbalẽ sia o le esi wobui be mesɔ ɖe sɔlemeha ƒe sewo nu o ta.

Le 1710 me la, wobu fɔ Whiston be eƒe nufiafia tsi tre ɖe England Sɔlemehaa ƒe dzixɔsewo ŋu. Woɖe agɔdzedze nɛ, woxɔ nufialagãnyenye ƒe dzesideŋkɔa le esi eye wonyãe le Cambridge. Gake togbɔ be wohe nya ɖe eŋu le ʋɔnu wòyi edzi abe ƒe atɔ̃ sɔŋ ene hã la, womebu fɔe be enye aglãdzela o.

Togbɔ be Newton ƒe nukpɔsusu siwo tsi tre ɖe Triniti-nufiafia ŋu la ɖi Whiston tɔ hã la, Newton meƒo nu ɖe exɔlɔ̃a nu o eye mlɔeba eɖee le hame. Le ƒe 1754 me la, wova ta Newton ƒe Biblia gɔmeɖegbalẽ si ɖe Triniti gɔme—ƒe 27 le eƒe ku megbe. Gake etsi megbe akpa be wòakpe ɖe Whiston, amesi ku ƒe eve do ŋgɔ la ŋu.

Wobui be anye Newton kee nye amesi na wo xe mɔ na Whiston be magakpɔ gome le Dzɔdzɔmeŋutinunyalawo ƒe habɔbɔ xɔŋkɔ si nɔ London la ƒe wɔnawo me o. Gake dzi meɖe le Whiston ƒo o. Eʋu kple eƒe ƒomea yi London afisi wòɖo Kristotɔnyenye Dodoɖeŋgɔ ƒe Habɔbɔ le. Etsɔ eƒe ŋutete katã de agbalẽŋɔŋlɔ me eye wòŋlɔ eƒe agbalẽ vevitɔ kekeake si wòŋlɔ kpɔ le ɣemaɣi me si nye Primitive Christianity Revived si nɔ babla ene me.

Wohe Nya le Eŋu Vaseɖe Eƒe Kuɣi Ke

Esi Whiston nye dzɔdzɔmeŋutinunyala ta la, edze agbagba geɖe be yeafia alesi woanɔ atsiaƒu dzi anya afisi anyigba le la ƒudzidelawo. Togbɔ be womexɔ eƒe susuawo o hã la, eƒe kutrikuku wɔe be mlɔeba la, wova wɔ mɔ̃ aɖe si ƒudzidelawo tsɔ dzidzea ɣeyiɣi kple dometsotso si le teƒe eve dome. Togbɔ be Whiston ƒe nukpɔsusu geɖe le Biblia me nyagblɔɖiwo ŋu mesɔ o abe eŋɔlimetɔ geɖeawo tɔ ene hã la, edze agbagba ɖesiaɖe si wòate ŋui le eƒe nyateƒea didi me. Agbalẽ geɖe siwo wòŋlɔ tsɔ ʋli dzɔdzɔmeŋutinunya kple Biblia me nyateƒea tae dometɔ aɖewoe nye eƒe trakt siwo wòŋlɔ tso ɣletivitoasikewo kple eƒe nukpɔsusuwo le Noa ƒe ŋkekea me Tsiɖɔɖɔa ŋu. Gake eƒe agbalẽ si ƒo bubuawo katã tae nye esiwo klo nu le Triniti-nufiafia dzi be metso Ŋɔŋlɔawo me o.

Abe alesi Whiston wɔa nu ɣesiaɣi ene la, edo le England Sɔlemehaa me le ƒe 1747 me. Edo go le haa me le nuwɔna ŋutɔŋutɔ me kple le kpɔɖeŋumɔ nu siaa, esime wòtso dzo le sɔlemexɔa me esi nunɔla aɖe dze Atanasio ƒe Xɔsemeʋuʋua xexlẽ gɔme. A Religious Encyclopædia gblɔ le Whiston ŋu be: “Ele be woakafu eƒe nɔnɔme si nye nuƒoƒo kalẽtɔe kple nyateƒetoto, eƒe nɔnɔme matrɔmatrɔ, kple eƒe nuwɔwɔ si toa mɔ ɖeka.”

William Whiston ƒe susue nye be, mele be woana ta le nyateƒea gbɔgblɔ me o, eye ame ŋutɔ ƒe dzixɔsewo xɔ asi sã wu kafukafu xɔxɔ tso amewo gbɔ. Togbɔ be Whiston ƒe nuwɔnawo he nyahehewo vɛ hã la, enye agbalẽŋlɔla anukwaretɔ si ʋlĩ Biblia ta vɔvɔ̃manɔmee be enye Mawu ƒe Nya.—Timoteo II, 3:16, 17.

[Nɔnɔmetata Tsoƒe si le axa 26]

Copyright British Museum