Ta Enyilia
Alakpasubɔsubɔ—Wokpɔ Eƒe Nuwuwu Ðedzesi la Do Ŋgɔ
1, 2. (a) Nukata mewɔ na ame aɖewo be tɔtrɔ gã aɖe ava xexemesubɔsubɔnyawo me kpuie o? (b) Aleke míewɔ nya be Yesaya ta 47 lia me nyawo agava eme le etsɔme? (d) Nukata “Babilon gã” nye ŋkɔ si sɔ na alakpasubɔsubɔhawo katã?
“MAWUSUBƆSUBƆ Gagbɔ Agbe.” Nya mae wogblɔ ɖe The New York Times Magazine me nyati aɖe me. Nyatia ɖee fia be edze abe mawusubɔsubɔ gakpɔa ŋusẽ ɖe ame miliɔn geɖe ƒe dzi kple susu dzi vevie kokoko ene. Eyata asesẽ be woaxɔe ase be tɔtrɔ gã aɖe ava xexemesubɔsubɔnyawo me kpuie. Gake tɔtrɔ sia tɔgbe ƒe vavae woɖe fia le Yesaya ta 47 lia me.
2 Yesaya ƒe nyaawo va eme ƒe 2,500 enye si va yi. Gake woyɔ Yesaya 47:8 me nyawo gblɔ le Nyaɖeɖefia ƒe agbalẽa me heƒo nu tso alesi wòava emee le etsɔme ŋu. Biblia gblɔ habɔbɔ si le abe gbolo ene si woyɔ be “Babilon gã”—alakpasubɔsubɔ ƒe xexemefiaɖuƒe—la ƒe nuwuwu ɖi le afima. (Nyaɖeɖefia 16:19) Ŋkɔ “Babilon” si woyɔ na xexeame ƒe alakpasubɔsubɔhawo la sɔ, elabena blema Babilon ye alakpasubɔsubɔ dze egɔme tsoe. Afimae wòtso kaka yi anyigba ƒe dzogoe eneawo katã dzi. (Mose I, 11:1-9) Mawusubɔsubɔ me nufiafia siwo dzɔ tso Babilon, siwo ƒe ɖewoe nye luʋɔ makumaku, dzomavɔ, kple mawu etɔ̃ ƒokpliwo subɔsubɔ, le subɔsubɔhawo katã kloe kple Kristodukɔa hã me.a Ðe Yesaya ƒe nyagblɔɖia gblɔ nya aɖe le subɔsubɔhawo ƒe etsɔme ŋua?
Wobɔbɔ Babilon Ðe Anyi ɖe Ke Me
3. Ƒo nu tso Babilon Xexemefiaɖuƒea ƒe gãnyenye ŋu?
3 Se nya sia si Mawu ɖe gbeƒãe la ɖa: “Wò ɖetugbi, Babel nyɔnuvi, ɖi ɖe anyi, eye nabɔbɔ nɔ ke me! Bɔbɔ nɔ anyigba fiazikpui makpɔmakpɔe, wò Kaldea-nyɔnuvi! Elabena womagayɔ wò azɔ be fewunuwɔla kple atsyɔ̃nuwɔla vivivo o.” (Yesaya 47:1) Babilon kpɔ ŋusẽ hezu xexemefiaɖuƒe ƒe geɖe. Enye “fiaɖuƒewo ƒe nu vevi”—enɔ ɖoƒe vevi aɖe le mawusubɔsubɔ, asitsatsa, kple asrafo nyawo me. (Yesaya 13:19) Esi Babilon ƒe ŋusẽ ɖo eƒe kɔkɔƒe la, eƒe fiaɖuƒea keke ɖo keke anyiehe ɖaa ke va do liƒo kple Egipte. Eye esime wòɖu Yerusalem dzi le ƒe 607 D.M.Ŋ. me la, edze abe ɖe Mawu ŋutɔ mete ŋu xe mɔ ɖe eƒe aʋadziɖuɖuwo nu o ene! Eyata ebu eɖokui be yenye “nyɔnuvi,” amesi dzi dukɔ bubu mate ŋu ava dze gbeɖe o.b
4. Nukae adzɔ ɖe Babilon dzi?
4 Gake woaxɔ ŋusẽ le “nyɔnuvi” dadala sia si nye xexemeŋusẽ si dzi womeɖu kpɔ o la si eye woana ‘wòabɔbɔ nɔ ke me’ atsɔ ado vloe. (Yesaya 26:5) Womagabui “fewunuwɔla kple atsyɔ̃nuwɔla” abe fianyɔnu si wotsɔa beléle tɔxɛ nana ene o. Eyata Yehowa de se be: “Ðo teƒo natu wɔ, ɖe moxevɔ ɖa, ɖe taɖedzi ɖa, ɖe ata ƒuƒlu, ne natso tɔ!” (Yesaya 47:2) Esi Babilon wɔ Yuda-dukɔ bliboa kluviwoe vɔ la, woana eya ŋutɔ hã nazu kluvi azɔ! Media kple Persia tɔ siwo aɖee ɖa le eƒe ŋusẽnɔƒea la azi edzi wòawɔ dɔ ɖigbɔwo na wo.
5. (a) Aleke woaɖe ‘moxevɔ kple taɖedzi’ le Babilon ŋui? (b) Nukae se si wode nɛ be ‘wòatso tɔ’ la ate ŋu afia?
5 Alea wòadzɔe be woaɖe Babilon ƒe ‘moxevɔ kple taɖedzi’ ɖa, eye eƒe gãnyenye kple bubu ɖesiaɖe si nɔ eŋu tsã nu ayi. Eƒe dɔtɔwo aɖe gbe nɛ be, ‘tso tɔ.’ Ðewohĩ woade se na Babilontɔ aɖewo ŋutɔŋutɔ be woawɔ kluvidɔ le gota. Alo nyagblɔɖia ate ŋu afia be woahe wo dometɔ aɖewo atso tɔ ŋutɔŋutɔ ne wokplɔ wo yina aboyo mee. Nuka ke ɖadzɔ o, Babilon maganye fianyɔnu si ɖo atsyɔ̃ gã si woatsɔ ɖe zikpui alo ʋu me atso tɔe azɔ o. Ke boŋ anɔ abe kluvi si mele be ŋu nagakpe o si ahe eƒe taɖedzi ɖe dzi eƒe ata nadze be wòate ŋu atso tɔ ene. Aleke gbegbe woɖi gbɔe enye si!
6. (a) Gɔmesese ka nue Babilon ƒe ama adze go le? (b) Aleke Mawu mana ‘ame aɖeke natso wo dome o’? (Kpɔ etenuŋɔŋlɔ.)
6 Yehowa yi edzi tɔ gbee be: “Wò ama adze go, eye woakpɔ wò ŋukpeƒe. Mabia hlɔ̃, eye ame aɖeke matso mía dome o.” (Yesaya 47:3)c Ẽ, ŋu akpe Babilon eye bubu aklo le eŋu. Woaklo nu le nu vɔ̃ɖi siwo wòwɔna ɖe Mawu ƒe amewo ŋu kple ŋuta si wòsẽna le wo ŋu dzi wòadze. Amegbetɔ aɖeke mate ŋu axe mɔ na Mawu ƒe hlɔ̃biabia o!
7. (a) Aleke Yudatɔ aboyomewo awɔ nu ɖe Babilon ƒe mumu ŋu nya la ŋui? (b) Mɔ ka nue Yehowa agbugbɔ eƒe amewo aƒle le?
7 Esi Mawu ƒe amewo nɔ aboyo me le Babilon-du sesẽ ma me ƒe 70 ta la, woakpɔ dzidzɔ ɖe eƒe mumu ŋu ŋutɔ. Woado ɣli be: “Míaƒe xɔnametɔ la ŋkɔ enye [aʋakɔwo ƒe Yehowa, “NW”], Israel ƒe kɔkɔetɔ!” (Yesaya 47:4) Le Mose ƒe Sea te la, ne Israel-vi dzra eɖokui zu kluvi tsɔ xe eƒe fewoe la, xɔnametɔ (eƒe ƒometɔ) ate nu aƒle eyama, alo axɔe tso kluvinyenye me. (Mose III, 25:47-54) Esi woava dzra Yudatɔwo woazu Babilon ƒe kluviwo ta la, ahiã be woagbugbɔ wo aƒle, alo woana ablɔɖe wo. Nusi aʋadziɖuɖu fia na kluvi zi geɖe koe nye be woava nɔ aƒetɔ bubuwo te. Gake Yehowa aʋã Fia Kores si va ɖu wo dzi la be wòaɖe Yudatɔwo tso kluvinyenye me. Woatsɔ Egipte, Etiopia, kple Seba ana Kores ‘tafee’ ɖe Yudatɔwo teƒe. (Yesaya 43:3) Esɔ be woyɔ Israel Ðela la be “aʋakɔwo ƒe Yehowa.” Babilon-ʋakɔ siwo dze abe ɖe wosesẽ ene la meɖi naneke o ne míetsɔ wo sɔ kple mawudɔlawo ƒe aʋakɔ gã makpɔmakpɔ siwo le Yehowa si.
Ŋutasesẽ ƒe Fetu
8. Gɔmesese ka nue Babilon ‘ayi ɖe blukɔ me’ le?
8 Yehowa gayi eƒe fɔbubu Babilon le nyagblɔɖi me dzi be: “Kaldea-nyɔnuvi, zi ɖoɖoe klenee nabɔbɔ nɔ anyi, eye nayi ɖe blukɔ me! Elabena womagayɔ wò azɔ be fiaɖuƒewo ƒe aƒenɔ o.” (Yesaya 47:5) Nusi Babilon akpɔ koe nye viviti kple blukɔ. Maganye aƒenɔ ŋutasẽla si kpɔ ŋusẽ ɖe fiaɖuƒewo dzi azɔ o.—Yesaya 14:4.
9. Nukata Yehowa do dɔmedzoe ɖe Yudatɔwo ŋu?
9 Gake nuka koŋ tae woɖe mɔ na Babilon wòwɔ fu Mawu ƒe amewo? Yehowa ɖe eme be: “Medo dɔmedzoe ɖe nye dukɔ ŋu, medo gu nye domenyinu, eye metsɔ wo de asi na wò.” (Yesaya 47:6a) Yehowa tɔ dzɔ be wòado dɔmedzoe ɖe Yudatɔwo ŋu. Exlɔ̃ nu wo do ŋgɔ be tomaɖomaɖo yeƒe Se ana woanya wo ɖa le anyigba la dzi. (Mose V, 28:64) Esi woge ɖe trɔ̃subɔsubɔ kple gbɔdɔdɔ ƒe agbegbegblẽnɔnɔ me la, Yehowa ɖo nyagblɔɖilawo ɖe wo lɔlɔ̃tɔe be wòakpe ɖe wo ŋu woagatrɔ va tadedeagu vavãtɔ me. Gake “woɖe alɔme le Mawu ƒe ame dɔdɔawo ŋu, wodo vlo eƒe nyawo, eye woɖu fewu le eƒe nyagblɔɖilawo ŋu, vaseɖe esime Yehowa do dɔmedzoe ɖe eƒe dukɔ ŋu ɖe dzi, eye womete ŋu lé enu o.” (Kronika II, 36:16) Eyata Mawu ɖe mɔ wodo gu eƒe domenyinu, Yuda, esime Babilon va dze anyigba la dzi hegblẽ kɔ ɖo na Eƒe gbedoxɔ kɔkɔe la.—Psalmo 79:1; Xezekiel 24:21.
10, 11. Nukata Yehowa do dziku ɖe Babilon ŋu, togbɔ be eƒe didi wònye be woaɖu eƒe amewo dzi?
10 Esia ta ɖe manye Mawu ƒe lɔlɔ̃nu ko wɔm Babilon le esime wòwɔ Yudatɔwo kluviwoe oa? Ao, elabena Mawu gblɔ be: “Ke mèkpɔ nublanui na wo o, eye nètsɔ wò kɔkuti kpekpe ɖo amegã ɖeɖiwo dzi. Ègblɔ be, yeanye aƒenɔ ɖaa tegbee; esia mede dzigbɔ na wò o, eye mèɖo ŋu alesi wòava nɔ emegbe o.” (Yesaya 47:6b, 7) Mawu megblɔ na Babilon be wòawɔ ŋutasẽnu wòagbɔ eme, alo be megave ‘amegã ɖeɖiwo gɔ̃ hã’ nu o. (Konyifahawo 4:16; 5:12) Eye mede dzi ƒo na wo be woakpɔ dzidzɔ ɖe fewuɖuɖu le Yudatɔ siwo wolé aboyoe ŋu ŋutasesẽtɔe hã o.—Psalmo 137:3.
11 Babilon mete ŋu kpɔe be ɣeyiɣi kpui aɖe koe yeakpɔ ŋusẽ ɖe Yudatɔwo dzi o. Woŋe aɖaba ƒu Yesaya ƒe nuxlɔ̃ame be le ɣeyiɣi aɖe megbe la, Yehowa ana ablɔɖe eƒe amewo la dzi. Ewɔ nu abe ɖe wòakpɔ ŋusẽ ɖe Yudatɔwo dzi ɖaa ahakpɔtɔ anye aƒenɔ ɖe dukɔ siwo le ete dzi tegbee ene. Meɖo to gbedasi si nye be eƒe ŋutasẽdziɖuɖua ava ‘nuwuwu’ la o!
Wogblɔ Babilon ƒe Mumu Ði
12. Nukata woyɔ Babilon be “agbe vivi ɖula”?
12 Yehowa gblɔ be: “Azɔ see, wò agbe vivi ɖula, si li bɔkɔɔ, eye nèle gbɔgblɔm le wò dzi me be: Nye koe, ɖeke megali o, nyemazu ahosi o, eye womaɖe vi le ŋunye o.” (Yesaya 47:8) Wonya Babilon ƒe agbeɖuɖu nyuie. Ƒe alafa atɔ̃lia D.M.Ŋ. me ŋutinyaŋlɔla Herodotus ƒo nu tso Babilontɔwo ƒe “kɔnu si nye ŋukpenanu wu ɖesiaɖe” ŋu, si nye be wobiana tsoa nyɔnuwo katã si be woawɔ gbolo atsɔ ade bubu woƒe lɔlɔ̃mawunɔ ŋui. Ŋutinyaŋlɔla Curtius si nɔ anyi le blema hã gblɔ nya ma tɔgbe be: “Dua me tɔwo ƒe agbenɔnɔ vlo wu ɖesiaɖe; nugbegblẽwɔwɔ atraɖii aɖeke meli si ʋãa ame ɖe agbeblibanɔnɔ ŋu hena wòdzroa ame de wo tɔ nu o.”
13. Aleke Babilon ƒe agbe vivi ɖuɖu vivivo ana wòamu kabae?
13 Alesi agbeɖuɖu vivia Babilon nu ana wòamu kaba. Le fiẽ si do ŋgɔ na eƒe tsɔtsrɔ̃ la, eƒe fia kple amegãwo anɔ azã ɖum eye woano aha amu vlevlevle. Eyata womatso ɖe Medo-Persia ʋakɔ si va le dua dzi dzem ŋu o. (Daniel 5:1-4) Esi Babilon “li bɔkɔɔ” ta la, abu be yeƒe gli si dze abe womate ŋu agbãe age ɖe dua me o ene kple ʋe gã si me tsi yɔ si ƒo xlãe la akpɔ ye ta. Egblɔ na eɖokui be ‘ame aɖeke meli’ si ava xɔ yeƒe ŋusẽnɔƒea o. Mebui be yeate ŋu azu “ahosi” eye yeƒe fiagã kpakple ye ‘viwo,’ alo fiaɖuƒea me tɔwo abu ɖe ye o. Ke hã gli aɖeke mate ŋu akpɔ eta tso Yehowa Mawu ƒe asi si wòatsɔ abia hlɔ̃e la si me o! Yehowa agblɔ emegbe be: “Ne Babel lia dziŋgɔli me, eye eƒe mɔ̃ sesẽwo mele lialia o hã la, nugblẽla atso gbɔnye ava ƒo ɖe edzi.”—Yeremya 51:53.
14. Mɔ kawo nue ‘woaɖe vi le Babilon ŋu eye wòazu ahosi’ le?
14 Nukae ado tso eme na Babilon? Yehowa yi edzi be: “Eyata nusiawo kple eve adzɔ ɖe dziwò gbe ɖeka kpoyi, woaɖe vi le ŋuwò, eye nazu ahosi; to wò dzosasa geɖeawo kple wò gbesa gbogboawo gbɔ hã woaƒo ɖe dziwò bibibi.” (Yesaya 47:9) Ẽ, xexemefiaɖuƒe ƒe ŋusẽ si le Babilon si avɔ zi ɖeka kpata. Ahosizuzu kple vikuname nye afɔku gãtɔwo kekeake si ate ŋu adzɔ ɖe nyɔnu dzi le Ɣedzeƒe dukɔwo me. Míenya “vi” nenie woɖe le Babilon ŋu le zã si me wòmu la me ya o.d Gake le ɣeyiɣi aɖe megbe la, woagblẽ du ma ɖi keŋkeŋ. (Yeremya 51:29) Azu ahosi hã, si fia be woaɖe eƒe fiawo le zi dzi.
15. Susu bubu ka hã tae Yehowa do dɔmedzoe ɖe Babilontɔwo ŋu le ŋutasesẽ le Yudatɔwo ŋu megbe?
15 Gake menye Babilon ƒe ŋlɔmiwɔwɔ le Yudatɔwo ŋu ta koe Yehowa do dɔmedzoe o. ‘Eƒe dzosasa geɖeawo’ hã tae wòdo dziku ɖo. Se si Mawu de na Israel tsi tre ɖe gbɔgbɔyɔyɔ ŋu; gake gbɔgbɔyɔyɔnuwɔnawo bɔ ɖe Babilon ŋutɔ. (Mose V, 18:10-12; Xezekiel 21:26) Agbalẽ si nye Social Life Among the Assyrians and Babylonians gblɔ be “vɔvɔ̃ nɔ” Babilontɔwo “me ɣesiaɣi na gbɔgbɔ vɔ̃ gbogbo siwo woxɔ se be woƒo xlã yewo la.”
Ŋuɖoɖo Ðe Vɔ̃ɖivɔ̃ɖi Ŋu
16, 17. (a) Aleke Babilon ‘ɖo ŋu ɖe eƒe vɔ̃ɖivɔ̃ɖi ŋui’? (b) Nukata womate ŋu axe mɔ na Babilon ƒe nuwuwu o?
16 Ðe Babilon ƒe etsɔmegblɔɖilawo ate ŋu axɔ nɛa? Yehowa ɖo eŋu be: “Èɖo ŋu ɖe wò vɔ̃ɖivɔ̃ɖi ŋu gblɔ bena: Ame aɖeke mele kpɔyem o. Wò nunya kple wò ayedzedze flu wò, nègblɔ le wò dzi me bena: Nye koe, ɖeke megali o!” (Yesaya 47:10) Babilon bu be yeate ŋu alé yeƒe ɖoƒe si nye xexemefiaɖuƒe la ɖe te to yeƒe nunyanya le xexeme kple mawusubɔsubɔ nyawo gome, yeƒe asrafoŋusẽ, kple yeƒe nublanuimakpɔmakpɔ ayetɔe me. Ebu be ame aɖeke mate ŋu ‘akpɔ’ ye o, si fia be womate ŋu abia akɔnta ye ɖe yeƒe nu vɔ̃ɖi wɔwɔwo ta o. Eye mekpɔe hã be ame aɖeke ate ŋu axɔ yeƒe ɖoƒea kpata o. Egblɔ na eɖokui be: “Nye koe, ɖeke megali o.”
17 Gake Yehowa xlɔ̃ nu to eƒe nyagblɔɖila bubu dzi be: “Ðe ame aɣla ɖe ɣaɣlɛƒe, eye magbe ekpɔkpɔa?” (Yeremya 23:24; Hebritɔwo 4:13) Eyata Yehowa gblɔ be: “Dzɔgbevɔ̃e adzɔ ɖe dziwò, eye màte ŋu asa gbe adoe o; gbegblẽ ava dziwò, màte ŋu atsi enu o, eye tsɔtsrɔ̃ aƒo ɖe dziwò kpoyi, hafi nava nyae.” (Yesaya 47:11) Babilon mawuwo loo alo eƒe gbɔgbɔyɔlawo ƒe ‘gbesa’ mate ŋu axe mɔ na afɔku si gbɔna o—enye afɔku si ƒo ɖesiaɖe ta si dzɔ ɖe wo dzi kpɔ ta!
Babilon ƒe Aɖaŋuɖolawo Do Kpo Nu
18, 19. Aleke Babilon ƒe ŋuɖoɖo ɖe eƒe aɖaŋuɖolawo ŋu anye afɔkui?
18 Yehowa zã nya siwo ɖia gbɔ ame ŋutɔ tsɔ de se be: “Do kple wò gbesawo kpakple wò dzo gbogbo, siwo ŋu nèku kutri le tso wò ɖevime ke; ɖewohĩ àte ŋu awɔ nane, ɖewohĩ àte ŋu ado ŋɔdzi na ame aɖe.” (Yesaya 47:12) Wogblɔ na Babilon be ‘wòado,’ alo wòakpɔtɔ anɔ ŋu ɖom ɖe akunyawɔwɔ ŋu dzimematrɔmatrɔe. Elabena dukɔa vu ɖe vivimenuwɔwɔwo dodo ɖe ŋgɔ ŋu tso keke eƒe “ɖevime ke.”
19 Gake Yehowa ɖu fewu le eŋu be: “Ède aɖaŋu geɖe wòti kɔ na wò; na dziŋgɔli me nyalawo, amesiwo ɖea ŋku ɖe dzinuviwo, eye wodzea si nusi gbɔna dzɔdzɔ ge ɖe dziwò le dzinu me la, natso axɔ na wò.” (Yesaya 47:13)e Babilon ƒe aɖaŋuɖolawo ado kpo nu keŋkeŋ. Enye nyateƒe be woanya tsɔ ƒe alafa geɖe lé ŋku ɖe ɣletiviwo ŋu le Babilontɔwo ƒe ɣletivimefakaka me ya. Gake le zã si me wòamu la, eƒe ɣletivimefakalawo ƒe kpododonu nublanuitɔe aɖe alesi afakaka nye nu dzodzroe afia.—Daniel 5:7, 8.
20. Nukae adzɔ ɖe Babilon-ɖaŋuɖolawo dzi?
20 Yehowa wu nyagblɔɖia ƒe akpa sia nu be: “Kpɔ ɖa, gbe ƒuƒu wonye, dzo afiã wo, womaɖe woƒe agbe tso dzoƒaɖe ƒe ŋusẽ nu o, elabena menye dzoka xɔxɔ wònye, ne woaƒu o, eye menye mlekpui me dzo wònye, ne woabɔbɔ nɔ enu o. Alea amesiwo ŋu nèku kutri ɖo, eye mia kpli wo mietsa asi tso wò ɖevime ke la, woazu na wò, amesiame lé eƒe mɔ, eye ɖeke mexɔ na wò o.” (Yesaya 47:14, 15) Ẽ, ɣeyiɣi sesẽ siwo le abe dzo ene ava alakpaɖaŋuɖola siawo dzi. Manye mlekpui me dzo si gbɔ woanɔ aƒu o, ke boŋ enye dzo gã gblẽnu si aɖee fia be alakpaɖaŋuɖolaawo le abe gbe ƒuƒu maɖinu ene. Eyata mewɔ nuku be dzidzi aƒo Babilon-ɖaŋuɖolawo woasi o! Esi nu susɔe si ŋu Babilon le ŋu ɖom ɖo bu ta la, ame aɖeke manɔ anyi si axɔ nɛ o. Nusi wòwɔ Yerusalem la kee adzɔ ɖe eya hã dzi.—Yeremya 11:12.
21. Aleke Yesaya ƒe nyagblɔɖinyawo va emee eye ɣekaɣie wòva eme?
21 Nya siawo siwo tso gbɔgbɔ me la te emevava le ƒe 539 D.M.Ŋ. me. Media kple Persia ʋakɔ siwo le Kores ƒe kpɔkplɔ te xɔ dua eye wowu eƒe fia, Belsazar, si nɔ dua me. (Daniel 5:1-4, 30) Wotutu Babilon tso eƒe xexemedziɖuɖu ƒe ɖoƒea wòdze anyi le zã ɖeka me. Esia na Sem ƒe dzidzimeviwo ƒe ŋusẽkpɔkpɔ wu enu, eye xexemeŋusẽa va zu Aryatɔwo tɔ azɔ. Babilon ŋutɔ nɔ gbegblẽm ɖe edzi le ƒe alafaawo me. Kaka ƒe alafa enelia M.Ŋ. me naɖo la, ezu “anyiglãgo.” (Yeremya 51:37) Alea wòdzɔe be Yesaya ƒe nyagblɔɖia va eme bliboe.
Egbeŋkekea Me Babilon
22. Nukae Babilon ƒe mumu fia mí le dada ŋu?
22 Nufiame geɖe le Yesaya ƒe nyagblɔɖia me. Ðekae nye be ete gbe ɖe afɔku siwo le dada kple ɖokuidodoɖedzi me dzi. Babilon si dana ƒe mumu nye Biblia me lododo sia ƒe nyateƒenyenye ƒe kpɔɖeŋu, si gblɔ be: “Dada doa ŋgɔ na gbegblẽ, eye ɖokuidodoɖedzi na anyidzedze.” (Lododowo 16:18) Dada kpɔa ŋusẽ ɖe míaƒe nɔnɔme madebliboawo dzi ɣeaɖewoɣi, gake ‘ɖokuidodoɖedzi’ ate ŋu akplɔ mí ade “dzudzu kple Abosam ƒe mɔ̃tetre” me. (Timoteo I, 3:6, 7) Eyata enyo be míawɔ ɖe Yakobo ƒe aɖaŋuɖoɖo sia dzi be: “Mibɔbɔ mia ɖokui ɖe anyi le Aƒetɔ la ŋku me, eye wòakɔ mi ɖe dzi.”—Yakobo 4:10.
23. Kakaɖedzi kae Yesaya ƒe nyagblɔɖia kpe ɖe mía ŋu be wòanɔ mía si?
23 Nyagblɔɖinya siawo kpe ɖe mía ŋu hã be míaka ɖe Yehowa, amesi ŋu ŋusẽ le sã wu amesiwo katã tsia tre ɖe eŋu la dzi. (Psalmo 24:8; 34:8; 50:15; 91:14, 15) Esia nye ŋkuɖodzinya fakɔname le ŋkeke sesẽ siawo me. Kaka ɖe Yehowa dzi doa ŋusẽ míaƒe tameɖoɖo kplikpaa be míanye ame maɖifɔwo le eŋkume, elabena míenya be ‘ame maɖifɔ akpɔ ŋutifafa le etsɔme.’ (Psalmo 37:37, 38) Nunya le eme ɣesiaɣi be míakpɔ Yehowa sinu eye míagaɖo ŋu ɖe mía ɖokui ŋu ne míedze ŋgɔ Satana ƒe “aɖaŋu vɔ̃wo” o.—Efesotɔwo 6:10-13, NW ƒe etenuŋɔŋlɔ.
24, 25. (a) Nukata susu mele ɣletivimefakaka me o, ke hã nukata ame geɖe kpɔa gome le eme? (b) Nusiwo ta Kristotɔwo tsria aʋatsodzixɔsewo la dometɔ aɖewo ɖe?
24 Woxlɔ̃ nu mí le gbɔgbɔyɔyɔ nuwɔnawo koŋ, vevietɔ ɣletivimefakaka ŋu. (Galatiatɔwo 5:20, 21) Esi Babilon mu la, amewo meɖe asi le ɣletivimefakaka ŋu o. Enyo be míade dzesii be agbalẽ si nye Great Cities of the Ancient World gblɔ be ɖoƒe si ɣletiviwo nɔ si Babilontɔwo ta le blema la “trɔ,” eye “ena gɔmesese aɖeke megava le [ɣletivimefakaka] bliboa ŋu o.” Ke hã ɣletivimefakaka kpɔtɔ le edzi yim, eye wotaa dzigbeɣletivimefakaka ŋu nyawo ɖe nyadzɔdzɔgbalẽ geɖe me be wo xlẽlawo nate ŋu ake ɖe wo ŋu bɔbɔe.
25 Nukae naa ame aɖewo—siwo dometɔ geɖe nye agbalẽnyalawo—léa ŋku ɖe ɣletiviwo ŋu alo kpɔa gome le aʋatsodzixɔse nuwɔna bubu siwo me susu mele o me? The World Book Encyclopedia gblɔ be: “Ðewohĩ aʋatsodzixɔsewo akpɔtɔ anye agbenɔnɔ ƒe akpa aɖe zi alesi amewo vɔ̃na na wo nɔewo eye womekana ɖe etsɔme dzi o ko.” Vɔvɔ̃ kple kakaɖedzimanɔamesi ate ŋu ana amewo nazu aʋatsodzixɔselawo. Gake Kristotɔwo ya tsria aʋatsodzixɔsewo. Womevɔ̃na na amegbetɔ o—Yehowa ŋue woziɔ ɖo. (Psalmo 6:5-11) Eye wometsi vedomesi le etsɔme ŋu o; wonya Yehowa ƒe tameɖoɖo siwo wòɖe fia eye woka ɖe edzi bliboe be “Yehowa ƒe adaŋudede li tegbee.” (Psalmo 33:11) Ne míena míaƒe agbenɔnɔ wɔ ɖeka kple Yehowa ƒe adaŋudede la, ana etsɔme si me dzidzɔ anɔ ɖaa nasu mía si.
26. Aleke “nunyalawo ƒe susuwo” zu ‘dzodzroe’?
26 Le ƒe siwo va yi nyitsɔ laa me la, ame aɖewo te kpɔ be yewoato mɔ si sɔ ɖe “dzɔdzɔmeŋutinunya” nu wu dzi anya etsɔme. Nane li gɔ̃ hã woyɔ be etsɔmeŋutinunya, eye woɖe egɔme be enye “nusɔsrɔ̃ le nusiwo ate ŋu adzɔ le etsɔme ŋu si nɔ te ɖe fifi nudzɔdzɔwo dzi.” Le kpɔɖeŋu me, le keke ƒe 1972 me ke la, suku deŋgɔ delawo kple asitsalawo ƒe ƒuƒoƒo si woyɔna be Roma Habɔbɔ la gblɔ ɖi be kaka ƒe 1992 naɖo la, sika, merkuri, zink, kple mɔmemi siwo katã le xexeame la avɔ. Ele eme be kuxi dziŋɔwo ɖe kpe na xexeame tso ƒe 1972 me ya, gake nya si wogblɔ ɖi la meva eme le go aɖeke me o. Sika, merkuri, zink, kple mɔmemi gakpɔtɔ le anyigba me. Amegbetɔ dzea agbagba ɖesiaɖe be yeagblɔ etsɔme ɖi, gake kakaɖedzi menɔa woƒe nususukpɔ la ŋu ɣeaɖekeɣi o. ‘Nunyalawo ƒe susuwo nye dzodzro’ vavã!—Korintotɔwo I, 3:20.
Babilon Gã ƒe Nuwuwu si Gbɔna
27. Ɣekaɣie Babilon Gã la mu wòɖi esi dzɔ ɖe Babilon dzi le ƒe 539 D.M.Ŋ. me, eye le mɔ ka nu?
27 Egbeŋkekea me subɔsubɔhawo lé blema Babilontɔwo ƒe nufiafia geɖe me ɖe asi. Eyata esɔ nyuie be wotsɔ ŋkɔ na alakpasubɔsubɔ ƒe xexemefiaɖuƒea be Babilon Gã. (Nyaɖeɖefia 17:5) Dukɔwo dome subɔsubɔhawo ƒe ƒuƒoƒo ma mu xoxo wòɖi esi dzɔ ɖe blema Babilon dzi le ƒe 539 D.M.Ŋ. me. (Nyaɖeɖefia 14:8; 18:2) Le ƒe 1919 me la, Kristo nɔviwo ƒe ame susɔeawo do le gbɔgbɔmeboyo me eye wodo tso Kristodukɔ si nye Babilon Gã la ƒe akpa vevi aɖe la ƒe mawusubɔsubɔ me ŋusẽkpɔɖeamedzi te. Tso ɣemaɣi la, Kristodukɔa megakpɔ ŋusẽ ɖe ame geɖe dzi le dukɔ siwo me ŋusẽ nɔ eŋu le tsã la me boo o.
28. Adegbe kae Babilon Gã la ƒo, gake nukae le elalam?
28 Gake nusi ado ŋgɔ na alakpasubɔsubɔhawo ƒe tsɔtsrɔ̃ ɖikaa koe eƒe mumu ma nye. Enyo be Babilon Gã la ƒe tsɔtsrɔ̃ ŋuti nyagblɔɖi si le Nyaɖeɖefia me la ɖo ŋku nyagblɔɖinya si woŋlɔ ɖe Yesaya 47:8, 9 la dzi na mí. Abe blema Babilon ene la, egbeŋkekea me Babilon Gã la gblɔ be: “Mebɔbɔ nɔ anyi abe fianyɔnu ene, eye nyemenye ahosi o, eye nyemegale konyi fa ge akpɔ o.” Gake “le ŋkeke ɖeka dzi la eƒe fukpekpewo ava edzi: Ku kple konyifafa kpakple dɔwuame, eye woatɔ dzoe wòafiã keŋkeŋ; elabena Aƒetɔ Mawu, amesi drɔ̃ ʋɔnui la, enye ŋusẽtɔ.” Eyata nyagblɔɖinya siwo woŋlɔ ɖe Yesaya ta 47 lia me kpɔtɔ nye nuxlɔ̃ame na amesiwo kpɔtɔ le alakpasubɔsubɔhawo me. Ne womedi be yewoakpɔ gome le eƒe tsɔtsrɔ̃ me o la, ke ele be woawɔ ɖe sedede si tso gbɔgbɔ me la dzi be: “Mido go tso me”!—Nyaɖeɖefia 18:4, 7, 8.
[Etenuŋɔŋlɔwo]
a Àkpɔ numeɖeɖe deto le alesi mawusubɔsubɔ me alakpanufiafiawo dze egɔmee ŋu le agbalẽ si nye Alesi Ameƒomea Le Mawu Dimee, si Watchtower Bible and Tract Society of New York, Inc. ta me.
b Le Hebrigbe me la, “Babel nyɔnuvi” nye nyagbɔgblɔ si fia Babilon alo Babilontɔwo. Enye “nyɔnuvi” elabena tso esime wòva zu xexemefiaɖuƒe la, ame aɖeke meva ɖu edzi ha eƒe nuwo kpɔ o.
c Agbalẽnyalawo gblɔ le Hebrigbe me nyagbɔgblɔ si gɔme woɖe be “ame aɖeke matso mía dome o” la ŋu be enye ‘nyagbɔgblɔ si gɔme ɖeɖe sesẽ ŋutɔ.’ New World Translation Biblia tsɔ nya “dɔmenyotɔe” kpe ɖe eŋu si ana wòafia be womaɖe mɔ ame bubuwo nava xɔ na Babilon o. Yudatɔwo ƒe Agbalẽtahabɔbɔ ƒe gɔmeɖeɖe aɖe ɖe nyagbɔgblɔ sia gɔme be: “Nyemana . . . ame aɖeke naxɔ nɛ o.”
d Agbalẽ si nye Nabonidus and Belshazzar si Raymond Philip Dougherty ŋlɔ gblɔ be togbɔ be Nabonido ƒe Ŋutinyagbalẽ gblɔ be Babilon dzi dzelawo ge ɖe dua me “aʋamawɔmawɔe” hã la, Helatɔ ŋutinyaŋlɔla Xenophon ɖee fia be ate ŋu anɔ eme be wokɔ ʋu geɖe ɖi.
e Ame aɖewo ɖe Hebrigbe me nyagbɔgblɔ si gɔme woɖe be “dziŋgɔli me nyalawo” la gɔme be “dziƒo me malawo.” Anye ɣletivimefakalawo ƒe nuwɔna si nye be womaa dziƒo me ɖe akpa vovovowo me tsɔ gblɔa nusi adzɔ ɖe ame dzi ŋue nusia ku ɖo.
[Nɔnɔmetata siwo le axa 111]
Woabɔbɔ Babilon agbeviviɖula la ɖe anyi ɖe ke me
[Nɔnɔmetata si le axa 114]
Babilon-ɣletivimefakalawo mate ŋu agblɔ eƒe mumu ɖi o
[Nɔnɔmetata si le axa 116]
Babilon-ɣletivimefakaka ƒe ɣletigbalẽ aɖe, ƒe akpe gbãtɔ D.M.Ŋ.
[Nɔnɔmetata siwo le axa 119]
Esusɔ vie egbeŋkekea me Babilon maganɔ anyi o