Wokpɔ Mesia La!
“Míekpɔ Mesia la.”—YOH. 1:41.
1. Nu kae na Andrea gblɔ be: “Míekpɔ Mesia la”?
YOHANES AMENYRƆÐETSIMELA kple eƒe nusrɔ̃la eve le tsitre ɖe afi aɖe. Esi wokpɔ Yesu gbɔna la, Yohanes gblɔ be, “Kpɔ ɖa, Mawu ƒe Alẽvi lae nye esi!” Andrea kple nusrɔ̃la evelia wodze Yesu yome enumake, eye wonɔ egbɔ ŋkeke bliboa katã. Emegbe la, Andrea kpɔ nɔvia Simon Petro, eye wògblɔ dzidzɔnya sia nɛ be: “Míekpɔ Mesia la.” Emegbe ekplɔe yi Yesu gbɔ.—Yoh. 1:35-41.
2. Aleke Mesia la ŋuti nyagblɔɖi bubuwo me dzodzro aɖe vi na mí?
2 Tso ɣemaɣi la, mɔnukpɔkpɔ geɖe asu Andrea, Petro kple ame bubuwo si be woadzro Ŋɔŋlɔawo me ayi ŋgɔe, eye woagblɔ kple kakaɖedzi blibo be Yesu Nazaretetɔ lae nye Mesia si ŋugbe wodo la. Ale si míexɔ Mawu ƒe Nya la kple eƒe Amesiamina la dzi se la me agasẽ ɖe edzi ne míeyi edzi le Mesia la ŋuti nyagblɔɖiwo me dzrom.
“Kpɔ Ða, Wò Fia Gbɔna”
3. Nyagblɔɖi kawoe va eme esime Yesu ge ɖe Yerusalem abe fia ene?
3 Mesia la age ɖe Yerusalem abe fia ene. Zaxariya ƒe nyagblɔɖia gblɔ be: “Zion nyɔnuvi, kpɔ dzidzɔ vevie, Yerusalem nyɔnuvi, tso aseye! Kpɔ ɖa, wò fia gbɔna gbɔwò, dzɔdzɔetɔ kple xɔnametɔ wònye, eye wòdo tedzi kple tedzivi, si nye tedzinɔ ƒe vi.” (Zax. 9:9) Hakpalaa hã ŋlɔ bena: “Woayra ame si gbɔna le Yehowa ƒe ŋkɔ dzi!” (Ps. 118:26) Yesu mate ŋu aƒoe ɖe amehawo nu be woawɔ nu nenema o. Ke hã le nyagblɔɖia me vava me la, ameha gã nyadri ma katã do ɣli zi ɖeka kple dzidzɔ manyagblɔ. Ne èle nuŋlɔɖia xlẽm la, kpɔ nudzɔdzɔa le susu me ɖaa eye nàse dzidzɔɣli si dom amewo le.—Mixlẽ Mateo 21:4-9.
4. Ðe nu si dzɔ le Psalmo 118:22, 23 me vava me la me.
4 Ame geɖe agbe Yesu togbɔ be nu geɖewo ɖo kpe edzi be eyae nye Mesia la hã, gake Mawu ya ade asixɔxɔ eŋu. Abe ale si wogblɔe ɖii ene la, ame siwo gbe be yewomaxɔ kpeɖodziawo dzi se o la ‘do vlo’ Yesu eye ‘womebui ɖe naneke me o.’ (Yes. 53:3; Mar. 9:12) Ke hã Mawu tsɔ gbɔgbɔ ʋã hakpalaa wògblɔ be: “Kpe, si xɔtulawo gbe la, eyae trɔ zu dzogoedzikpe. Yehowa gbɔ esia tso.” (Ps. 118:22, 23) Yesu he subɔsubɔhakplɔla tsitretsiɖeŋulawo ƒe susu yi nyagblɔɖi sia dzi, eye Petro hã gblɔ be nyagblɔɖi sia va eme ɖe Kristo dzi. (Mar. 12:10, 11; Dɔw. 4:8-11) Yesu va zu Kristo hamea ƒe “dzogoedzikpe.” Togbɔ be mawumavɔ̃lawo gbee hã la, ame “tiatia xɔasi” ye wònye “le Mawu ya gbɔ.”—1 Pet. 2:4-6.
Wofia Eyomemɔ Eye Wogblẽe Ði!
5, 6. Nya kae wogblɔ ɖi ku ɖe Mesia la yomemɔfiafia ŋu, eye aleke wòva eme?
5 Wogblɔe ɖi be Mesia la xɔlɔ̃ mawɔnuteƒe aɖee afia eyomemɔ. David gblɔ ɖi be: “Xɔ̃nye kekeake, ame si ŋu meɖoa ŋu ɖo, eye wòɖua nye abolo la, kɔ afɔkpodzi dzi ɖe ŋunye.” (Ps. 41:10) Wobua ame si ɖua abolo kple ame aɖe la be enye exɔlɔ̃. (1 Mose 31:54) Eya ta Yuda Iskariot ƒe Yesu dede asi nye nuteƒemawɔmawɔ gãtɔ kekeake. Yesu he susu yi David ƒe nyagblɔɖi sia me vava dzi esi Wònɔ nu ƒom tso ame si afia eyomemɔ la ŋu eye wògblɔ na eƒe apostolowo be: “Menye mi katãe mewɔnɛ o; menya ame siwo metia. Gake be Ŋɔŋlɔ la nava eme tae, be: ‘Ame si ɖua nye abolo la, kɔ eƒe afɔkpodzi dzi ɖe ŋunye.’”—Yoh. 13:18.
6 Woaxe klosalo 30, si nye kluviƒlega, na Mesia la yomemɔfialaa! Esi Mateo nɔ susu hem yi Zaxariya 11:12, 13 dzi la, eɖee fia be ga sue ma gbegbee ame si fia Yesu yome mɔ la xɔ. Gake aleke wɔ Mateo gblɔ be “nyagblɔɖila Yeremiya dzi” ye wogblɔ nya sia toe? Le Mateo ƒe ŋkekea me la, ewɔ abe Yeremiya ƒe agbalẽa ye nye gbãtɔ le Biblia agbalẽwo ƒe ƒuƒoƒo aɖe, siwo dome Zaxariya ƒe agbalẽa hã nɔ, la me ene. (Tsɔe sɔ kple Luka 24:44.) Yuda mete ŋu zã ga ƒoɖi si wòxɔ la o, elabena etsɔ gaa ƒu gbe ɖe gbedoxɔa me, eye wòdzo ɖawu eɖokui.—Mat. 26:14-16; 27:3-10.
7. Aleke Zaxariya 13:7 va emee?
7 Mesia la ƒe nusrɔ̃lawo kekeake hã aka xlẽ le eŋu. Zaxariya ŋlɔ bena: “Dza lãkplɔvi, ne lãha nakaka ahlẽ!” (Zax. 13:7) Le ƒe 33 M.Ŋ. ƒe Nisan 14 lia dzi la, Yesu gblɔ na eƒe nusrɔ̃lawo be: “Mi katã miakli nu le tanye le zã sia me, elabena woŋlɔe ɖi be, ‘Mada nu alẽkplɔla la, eye alẽ siwo le alẽha la me la aka ahlẽ.’” Eye nu ma tututue dzɔ, elabena Mateo ka nya ta be “nusrɔ̃lawo katã gblẽ [Yesu] ɖi hesi dzo.”—Mat. 26:31, 56.
Wotso Enu Eye Wodo Vloe
8. Aleke Yesaya 53:8 va emee?
8 Woadrɔ̃ ʋɔnu Mesia la eye woabu fɔe. (Mixlẽ Yesaya 53:8.) Le Nisan 14 lia ƒe fɔŋli la, Sanhedrin la me tɔwo katã kpe ta, wona wobla Yesu, eye wokplɔe yi ɖade asi na Roma Nutomefia Pontio Pilato. Ebia gbe Yesu eye wòkpɔe be meɖi fɔ aɖeke o. Gake esi Pilato gblɔ be yeaɖe asi le Yesu ŋu la, amehaa do ɣli be: “Hee ɖe ati ŋu!” Eye wobia be wòaɖe asi le hlɔ̃dola Baraba boŋ ŋu. Esi Pilato di be yeadze amehawo ŋu ta la, eɖe asi le Baraba ŋu, ena woƒo Yesu, eye wòtsɔe de asi be woahee ɖe ati ŋu.—Mar. 15:1-15.
9. Nu kae dzɔ le Yesu ƒe ŋkekea me, si ŋu nya wogblɔ ɖi le Psalmo 35:11?
9 Aʋatsoɖaseɖilawo aɖi ɖase tso Mesia la ŋu. Hakpala David ŋlɔ bena: “Ðasefo ŋutasẽlawo tsi tre, eye wole nu si nyemenya o la biamem.” (Ps. 35:11) Abe ale si tututu wogblɔe ɖii ene la, “nunɔlawo ƒe tatɔwo kple Sanhedrin blibo la nɔ ame siwo aɖi aʋatsoɖase tso Yesu ŋu la dim, ne woawui.” (Mat. 26:59) Le nyateƒe me la, “ame geɖewo nɔ aʋatsoɖase ɖim le eŋuti, gake woƒe nutsotsoawo mesɔ kple wo nɔewo tɔ o.” (Mar. 14:56) Yesu ƒe ku ko dimee futɔ vɔ̃ɖi mawo nɔ, wometsɔ ɖeke le eme ne ɖaseɖiɖiawo nye nyateƒe alo aʋatso o.
10. Ðe ale si Yesaya 53:7 va eme la me.
10 Mesia la azi kpi le enutsolawo ŋkume. Yesaya gblɔ ɖi be: “Wowɔ fui, ke ebɔbɔ eɖokui, eye meke nu o; abe alẽ, si wokplɔ yina wuwu ge, kple alẽvi, si li kpoo le eƒe fukolawo ŋkume ene la, nenema eya hã meke nui o.” (Yes. 53:7) Esi “nunɔlawo ƒe tatɔwo kple amegãwo nɔ” Yesu nu “tsom la, meɖo nya aɖeke ŋu o.” Pilato biae be: “Mèle nya gbogbo siwo tsɔm wole ɖe ŋuwò la sem oa?” Gake Yesu “meɖo eŋu nɛ o, ao, meɖo nya ɖeka pɛ hã ŋu o, ale be nutomefia la ƒe mo wɔ yaa ŋutɔ.” (Mat. 27:12-14) Yesu meɖo vɔ̃ si enutsolawo wɔ ɖe eŋu la teƒe na wo o.—Rom. 12:17–21; 1 Pet. 2:23.
11. Nu kae dzɔ le Yesaya 50:6 kple Mixa 4:14 me vava me?
11 Yesaya gblɔ ɖi be woado vlo Mesia la. Nyagblɔɖilaa ŋlɔ bena: ‘Megblẽ nye dzime ɖi na ameƒolawo, eye meɖo nye tome anyi na ame siwo nyɔa ɖa; nyemetsyɔ nu ŋkume le vlododo kple taɖeɖe ŋuti o.’ (Yes. 50:6) Mixa hã gblɔ ɖi bena: “Azɔ kuko ŋuti na ɖokuiwò; elabena woaƒu kpo ɖe ŋuwò, eye woatsɔ ati aƒo tome na Israel ƒe ʋɔnudrɔ̃la.” (Mixa 4:14) Esi Nya Nyui ŋlɔla Marko nɔ kpe ɖom nyagblɔɖi siawo me vava dzi la, egblɔ be: “Eye ame aɖewo de asi taɖeɖe ɖe [Yesu] ŋu me, eye wotsyɔ nu mo nɛ hetu kɔe gblɔ nɛ be: ‘Ne nyagblɔɖilae nènye la, ekema gblɔ ame si ƒo wò la na mí!’ Eye esi ʋɔnudrɔ̃ƒea ƒe dzɔlawo ƒo tome nɛ vɔ la, wokplɔe yii.” Marko gblɔ hã be asrafowo tsɔa “aƒla ƒoa tame nɛ, eye woɖea ta ɖe eŋu, eye wodzea klo hebɔbɔna nɛ” fewuɖuɖutɔe. (Mar. 14:65; 15:19) Le nyateƒe me la, Yesu mewɔ naneke si ta woawɔ nu ɖe eŋu nenema o.
Mesia La Wɔ Nuteƒe Va Se Ðe Ku Me
12. Aleke Psalmo 22:17 kple Yesaya 53:12 va eme ɖe Yesu dzi?
12 Wogblɔ Mesia la hehe ɖe ati ŋu ƒe akpa aɖewo ŋu nya ɖi. Hakpala David ŋlɔ bena: “Ame vɔ̃ɖiwo ƒe ha ɖe to ɖem, woku nye asiwo kple nye afɔwo.” (Ps. 22:17) Esime Nya Nyui ŋlɔla Marko nɔ nu ƒom tso nudzɔdzɔ aɖe si Biblia xlẽlawo nya nyuie ŋu la, egblɔ be: “Gaƒoƒo etɔ̃lia [ŋdi ga asieke me lɔƒo] ɖo azɔ, eye wohee ɖe ati ŋu.” (Mar. 15:25) Wogblɔe ɖi hã be woabu Mesia la ade nu vɔ̃ wɔlawo dome. Yesaya ŋlɔ bena: “Etsɔ eƒe agbe de ku me, eye wòna wobui kpe ɖe vodalawo ŋu.” (Yes. 53:12) Eya ta eva eme be “wohe adzodala eve ɖe ati ŋu kpe ɖe [Yesu ŋu], ɖeka ɖe eƒe ɖusime, eye ɖeka ɖe eƒe miame.”—Mat. 27:38.
13. Mɔ kawo nue Psalmo 22:8, 9 va eme ɖe Yesu dzi le?
13 David gblɔ ɖi be woaɖu fewu le Mesia la ŋu. (Mixlẽ Psalmo 22:8, 9.) Woɖu fewu le Yesu ŋu esi wònɔ veve sem le fuwɔametia ŋu, elabena Mateo ka nya ta be: “Eye ame siwo va nɔ eme tsom nɔ yiyim la te edzudzu, henɔ ta ʋuʋum nɔ gbɔgblɔm be: ‘Oo, wò ame si gblɔ be yeamu gbedoxɔ la aƒu anyi ahagbugbɔe atu le ŋkeke etɔ̃ me, ɖe ɖokuiwòe! Ne Mawu ƒe vie nènye la, ekema ɖi le fuwɔameti la ŋue!’” Nenema kee nunɔlawo ƒe tatɔwo kple agbalẽfialawo kpakple amegãwo ɖu fewu le eŋu gblɔ be: “Eɖe ame bubuwo; mate ŋu aɖe eya ŋutɔ ɖokui o! Israel Fia wònyee; neɖi tso fuwɔametia ŋu azɔ, ekema míaxɔ edzi ase. Eɖo ŋu ɖe Mawu ŋu, ne eƒe nu nyoa eŋu la, ekema nexɔ nɛ azɔe, elabena egblɔ be, ‘Mawu ƒe Vie menye.’” (Mat. 27:39-43) Ke hã Yesu tsɔ nu siawo katã kpoo eye mebui be woklo bubu le ye ŋu o. Kpɔɖeŋu nyui ka gbegbee nye esi wòɖo ɖi na mí!
14, 15. Ðe ale si nyagblɔɖi aɖewo koŋ va eme ku ɖe Mesia la ƒe awuwo kple ale si woana wain eyama ŋu la me.
14 Woadzidze nu ɖe Mesia la ƒe awuwo dzi. Hakpalaa ŋlɔ bena: “Woma nye avɔwo ɖe wo nɔewo dome, eye wodzidze nu ɖe nye awu dzi.” (Ps. 22:19) Nu sia tututue dzɔ, elabena “esi [Roma asrafowo he Yesu] ɖe ati ŋu la, wodzidze nu ɖe eƒe awudziwuiwo dzi, eye woma wo.”—Mat. 27:35; mixlẽ Yohanes 19:23, 24.
15 Woana aha tsitsi kple gbe veve Mesia la. Hakpalaa gblɔ be: “Wotsɔ veve nam be, maɖu, eye esi tsikɔ wum la, wokpe aha tsitsi nam.” (Ps. 69:22) Mateo gblɔ na mí be: “Wotsɔ wain si wotsɔ gbe veve aɖe tsakae la [na Yesu] be wòano; gake esi wòɖɔe kpɔ la, egbe enono.” Eyome “wo dometɔ ɖeka ƒu du tsɔ ƒumekutsa de wain tsitsi me, tsɔe ɖo aƒla nu, eye wòtsɔe nae be wòano.”—Mat. 27:34, 48.
16. Ðe ale si Psalmo 22:2 me nyawo va eme la me.
16 Adze abe ɖe Mawu gblẽ Mesia la ɖi ene. (Mixlẽ Psalmo 22:2.) Le ɖekawɔwɔ me kple nyagblɔɖia la, “le gaƒoƒo asiekelia dzi [si nye ɣetrɔ ga etɔ̃ me lɔƒo] la, Yesu do ɣli kple gbe sesẽ be: ‘Eli, Eli, lama sabaxtani?’ si gɔmee nye: ‘Nye Mawu, nye Mawu, nu ka ta nègblẽm ɖi?’” (Mar. 15:34) Ale si Yesu xɔ Fofoa si le dziƒo la dzi se me megbɔdzɔ o. Mawu gblẽ Yesu ɖe eƒe futɔwo si me eye meganɔ eta kpɔm o kple susu be woado Kristo la ƒe nuteƒewɔwɔ kpɔ bliboe. Esi Yesu do ɣli gblɔ nya mawo la, ena Psalmo 22:2 va eme.
17. Aleke Zaxariya 12:10 kple Psalmo 34:21 va emee?
17 Woaƒo nu ɖe Mesia la gake womaŋe eƒe ƒuwo o. Yerusalemtɔwo ‘afɔ ŋku ɖe ame si woƒo nu ɖo la dzi.’ (Zax. 12:10) Psalmo 34:21 hã gblɔ be: “[Mawu kpɔa] eƒe ƒuwo katã ta, womaŋe wo dometɔ aɖeke o.” Esi apostolo Yohanes nɔ kpe ɖom ale si nyagblɔɖi sia va emee dzi la, eŋlɔ bena: “Asrafoawo dometɔ ɖeka tɔ akplɔ [Yesu ƒe] axadame, eye enumake ʋu kple tsi do go. Eye ame si kpɔe [si nye Yohanes] la ɖi ɖase, eye eƒe ɖaseɖiɖi la nye nyateƒe . . . Nu siawo dzɔ, bene ŋɔŋlɔ la nava eme be: ‘Womaŋe eƒe ƒu ɖeka pɛ hã o.’ Eye ŋɔŋlɔ bubu gblɔ be: ‘Woafɔ ŋku ɖe Ame si wotɔ nui la dzi.’”—Yoh. 19:33-37.
18. Aleke wòdzɔe be woɖi Yesu ɖe kesinɔtɔwo dome?
18 Woaɖi Mesia la ɖe kesinɔtɔwo dome. Yesaya gblɔ ɖi be: “Woɖe yɔdo nɛ ɖe ame vɔ̃ɖiwo dome eye le eƒe ku me wòmlɔ kesinɔtɔwo dome; evɔ mewɔ vɔ̃ aɖeke loo alo beble nɔ eƒe nume o.” (Yes. 53:9, Agbenya La) Le Nisan 14 lia ƒe ɣetrɔ me la, “kesinɔtɔ aɖe si tso Arimatia, si ŋkɔe nye Yosef” bia Pilato be yeaɖe Yesu ƒe ŋutilã kukua, eye wòɖe mɔ nɛ. Mateo ƒe nuŋlɔɖia gblɔ yi edzi be: “Yosef xɔ ame kukua, eye wòxatsa aklala nyui dzadzɛ aɖe ɖe eŋu, eye wòtsɔe mlɔ eƒe ŋkuɖodziyɔdo yeye, si wòna woɖe ɖe agakpe me la me. Eye esi wòmli kpe gã aɖe tsɔ xe ŋkuɖodziyɔdoa nu vɔ la, edzo.”—Mat. 27:57-60.
Wodo Mesia La Ðe Dzi!
19. Aleke Psalmo 16:10 va emee?
19 Woafɔ Mesia la ɖe tsitre. David ŋlɔ bena: “[Wò Yehowa] màgblẽ nye luʋɔ ɖe tsiẽƒe si me o, eye màlɔ̃ be, wò mawumeme la nakpɔ yɔdo o.” (Ps. 16:10) Wò ya bu ale si nyɔnu siwo yi yɔdo si me wotsɔ Yesu ƒe kukua mlɔ to la ƒe nu kui la ŋu kpɔ. Wokpɔ mawudɔla aɖe si do amegbetɔŋutilã, wògblɔ na wo be: “Dzidzi negaƒo mi o. Yesu Nazaretetɔ si wohe ɖe ati ŋu la dimee miele. Wofɔe ɖe tsitre, mele afi sia o. Kpɔ ɖa! Afi si wotsɔe mlɔe nye esi.” (Mar. 16:6) Apostolo Petro gblɔ na ameha siwo va ƒo ƒu le Yerusalem le ƒe 33 M.Ŋ. ƒe Pentekosteŋkekea dzi la be: “[David kpɔ] Kristo la ƒe tsitretsitsi la do ŋgɔ, eye wòƒo nu tso eŋu, be womegblẽe ɖe Hades [tsiẽƒe] o, eye eƒe ŋutilã hã mekpɔ nyunyɔ o.” (Dɔw. 2:29-31) Mawu meɖe mɔ be Via lɔlɔ̃a ƒe amegbetɔŋutilã la nyunyɔ o. Gawu la, egbɔ agbe Yesu le gbɔgbɔ me nukutɔe.—1 Pet. 3:18.
20. Aleke nyagblɔɖi si ku ɖe Mesia la ƒe dziɖuɖu ŋu va emee?
20 Abe ale si wogblɔe ɖi ene la, Mawu ŋutɔ ɖee gblɔ be ye Vie Yesu nye. (Mixlẽ Psalmo 2:7; Mateo 3:17.) Gakpe ɖe ŋu la, amehawo do Yesu kple Fiaɖuƒe si gbɔna la ɖe dzi, eye míawo hã míeƒoa nu tso Yesu kple eƒe dziɖuɖu si ahe yayrawo avae la ŋu dzidzɔtɔe. (Mar. 11:7-10) Eteƒe madidi o, Yesu atsrɔ̃ eƒe futɔwo ne ‘eho yi le nyateƒenya la kple nya dzɔdzɔe, si wote ɖe to la ta!’ (Ps. 2:8, 9; 45:2-7) Ɣemaɣi la, eƒe dziɖuɖua ahe ŋutifafa kple nudzedziname ava anyigba blibo la katã dzi. (Ps. 72:1, 3, 12, 16; Yes. 9:5, 6) Mɔnukpɔkpɔ gã kae nye esi wònye be míaɖe gbeƒã nyateƒenya siawo abe Yehowa, ame si ƒe Vi malɔ̃nugbɔa dze fiaɖuɖu gɔme le dziƒo abe Mesia Fiaɖuƒea ƒe Fia ene la, ƒe Ðasefowo ene!
Aleke Nàɖo Wo Ŋui?
• Aleke wofia Yesu yome mɔ hegblẽe ɖii?
• Nu siwo yi edzi le Yesu Kristo hehe ɖe ati ŋu me la ŋuti nyagblɔɖi aɖewo ɖe?
• Nu ka tae nèka ɖe edzi be Yesu ye nye Mesia si ŋugbe wodo la?
[Nɔnɔmetata ŋu nya si le axa 13]
Nyagblɔɖi kae va eme esime Yesu ge ɖe Yerusalem abe fia ene?
[Nɔnɔmetata ŋu nya si le axa 15]
Yesu ku ɖe míaƒe nu vɔ̃wo ta, gake fifia, ele dzi ɖum abe Mesia Fiaɖuƒea ƒe Fia ene