Ta Wuienyilia

Yehowa Gbɔa Agbe Amesiwo Wobɔbɔ Ðe Anyi ƒe Gbɔgbɔ

Yesaya 57:1-21

 1. Kakaɖedzinamenya kae Yehowa gblɔ, eye biabia kawoe eƒe nyawo fɔ ɖe te?

“ALE ame gã, si ɖo kpo, eli tegbee, eye eƒe ŋkɔ nye kɔkɔe la, gblɔ esi: Mele dzi kple kɔkɔeƒe la, mele amesi wogbã gudugudu, kple amesi ƒe gbɔgbɔ wobɔbɔ ɖe anyi la gbɔ, ne magbɔ agbe amesiwo wobɔbɔ ɖe anyi la ƒe gbɔgbɔ, eye magbɔ agbe amesiwo wogbã gudugudu la ƒe dzi.” (Yesaya 57:15) Nya mae nyagblɔɖila Yesaya ŋlɔ le ƒe alafa enyilia D.M.Ŋ. me. Nukae nɔ dzɔdzɔm le Yuda si na gbedasi sia fa akɔ na ame ŋutɔ? Aleke nya siawo siwo tso gbɔgbɔ me kpena ɖe Kristotɔwo ŋu egbeae? Yesaya ta 57 lia me dzodzro akpe ɖe mía ŋu míaɖo biabia mawo ŋu.

‘Mi Ŋutsuwo, Mite Va’

 2. (a) Edze abe ɣeyiɣi ka ŋue Yesaya ta 57 lia me nyawo ku ɖo ene? (b) Nɔnɔme ka mee ame dzɔdzɔewo nɔ le Yesaya ƒe ŋkekea me?

² Edze abe Yesaya ŋutɔ ƒe ŋkekea ŋue Yesaya ƒe nyagblɔɖia ƒe akpa sia ku ɖo ene. Bu alesi gbegbe vɔ̃ɖinyenye xɔ aƒe ɖi ɣemaɣii ŋu kpɔ: “Ame dzɔdzɔe kuna, eye medea dzigbɔ na ame aɖeke o, woɖea mawumemewo ɖa, ke ame aɖeke medzea sii be, vɔ̃ɖiwɔwɔ nu woɖea ame dzɔdzɔe ɖa le o. Amesiwo ƒe zɔzɔme to mɔ ɖeka la, woayi ɖe ŋutifafa me, eye woagbɔ ɖe eme le wo mlɔƒewo.” (Yesaya 57:1, 2) Ne ame dzɔdzɔe dze anyi la, meka ame aɖeke o. Ame aɖeke meléa ŋku ɖe eƒe ku kpo la ŋu o. Eƒe alɔ̃dɔdɔ le ku me na wòkpɔa ŋutifafa, evona tsoa ame mavɔ̃mawuwo ƒe fuwɔame me, eye wòsina le dzɔgbevɔ̃e nu. Mawu ƒe dukɔa ƒe nɔnɔme gblẽ wòwɔ nublanui ale gbegbe. Gake aleke gbegbe wòade dzi ƒo na amesiwo yia edzi wɔa nuteƒee be woanya be menye ɖeko Yehowa kpɔa nusi le edzi yim ko o ke ado alɔ yewo hã!

 3. Aleke Yehowa ƒo nu na Yuda ƒe dzidzime vɔ̃ɖi lae, eye nukatae?

³ Yehowa ɖe gbe na Yuda ƒe dzidzime vɔ̃ɖi la be: “Mi nyɔnu dzosala ƒe viwo, mi ŋutsu ahasitɔ kple gbolo ƒe dzidzimeviwo, mite va!” (Yesaya 57:3) Alesi woyɔ wo ŋukpetɔe be wonye dzosala ƒe viwo kple ahasitɔ kple gbolo ƒe dzidzimeviwo la sɔ na wo nyuie. Trɔ̃subɔsubɔ kple gbɔgbɔyɔyɔ kpakple gbɔdɔdɔ ƒe agbegbegblẽnɔnɔ nuwɔna nyɔŋuwoe nye alakpasubɔsubɔ si me wova ge ɖo la me nuwɔnawo dometɔ aɖewo. Eyata Yehowa bia nuvɔ̃wɔla siawo be: “Ameka ŋu miele fefem le, ameka ŋu mieke nu ɖo baa, eye miedo aɖe ɖe go biɖaa ɖo? Ðe menye godzelawo ƒe dzidzimeviwo kple alakpaviwo mienye, amesiwo ƒe lãme le fiefiẽm ɖe legbawo ŋu le ati damawo katã te, mi amesiwo wu mia viwo ɖe balimewo le agakpetowo te la oa?”—Yesaya 57:4, 5.

 4. Nuka ƒe fɔɖiɖie le ame vɔ̃ɖi siwo le Yuda dzi?

⁴ Ame vɔ̃ɖi siwo nɔ Yuda wɔa woƒe trɔ̃subɔsubɔnuwɔna vloawo le gaglãgbe tsɔ nɔa ‘fefemee.’ Woɖua fewu le Mawu ƒe nyagblɔɖila siwo wòdɔ be woava ɖɔ wo ɖo la ŋu, eye wodoa aɖe ɖa ŋumakpemakpe kple bubumadeameŋutɔe. Togbɔ be Abraham ƒe dzidzimeviwoe wonye hã, woƒe aglãdzenuwɔnawo na wozu vi dzegowo kple alakpa ƒe dzidzimeviwo. (Yesaya 1:4; 30:9; Yohanes 8:39, 44) Woƒe lãme fiẽna ɖe trɔ̃subɔsubɔ ŋu le ati gã siwo le gbedzi te. Eye ŋutasesẽ ƒe subɔsubɔ kae nye si wònye! Wowua woa ŋutɔwo ƒe viwo gɔ̃ hã, abe dukɔ siwo ƒe ŋunyɔnuwɔwɔwo na Yehowa nya wo ɖa le anyigba la dzi ene!—Fiawo I, 14:23; Fiawo II, 16:3, 4; Yesaya 1:29.

Tsiƒoƒoɖi na Kpewo

5, 6. (a) Nukae Yudatɔwo tia be yewoawɔ ɖe tadedeagu na Yehowa teƒe? (b) Aleke Yuda ƒe trɔ̃subɔsubɔ dzena gaglãa hebɔe?

⁵ Kpɔ alesi gbegbe Yudatɔwo nyrɔ wo ɖokui ɖe trɔ̃subɔsubɔ mee ɖa: “Ètia bali me kpe zɔzrɔ̃ewo na ɖokuiwò, woawoe nye wò gome; èƒo tsi ɖe anyi na wo, eye nèɖe dza na wo, ɖe mazi kpi akpɔ nusiawoa?” (Yesaya 57:6) Yudatɔwo nye dukɔ si Mawu bla nu kpli, ke hã le esi teƒe be woasubɔe la, wofɔ kpewo tso tɔʋuwo me tsɔ wɔ mawuwoe. Dawid gblɔ be Yehowa tɔ yenye, gake nuvɔ̃wɔla siawo ya tia legba siwo nye kpe siwo me agbe mele o eye woƒoa aha ɖi na wo. (Psalmo 16:5; Xabakuk 2:19) Akɔfafa kae Yehowa ate ŋu akpɔ le dukɔ si ŋu eƒe ŋkɔ le ƒe nutovowɔwɔ le tadedeagu me alea me?

⁶ Yuda wɔa trɔ̃subɔsubɔnuwo le afisiafi—le ati gãwo te, le tɔsisiwo ƒe baliwo me, togbɛwo dzi, kple woƒe duwo me. Gake Yehowa kpɔ wo katã, eye Eto Yesaya dzi klo nu le woƒe nɔnɔme gblẽkua dzi be: “Ètu mlɔwòƒe ɖe to, si kɔ bobobo la dzi, eye nèyi edzi, be nawu vɔsalã. Ètsɔ wò ŋkuɖodzinu ɖo wò ʋɔtruwo kple ʋɔtrutiwo godo.” (Yesaya 57:7, 8a) Yuda ɖoa gbɔgbɔ me makɔmakɔnyenye ƒe aba ɖe kɔkɔƒewo, eye afimae wòsaa vɔ na dutamawuwo le.a Wowɔ legbawo ɖe ʋɔtruwo kple ʋɔtrutiwo megbe le amewo ƒe aƒewo gɔ̃ hã me.

 7. Nɔnɔme kae nɔ Yuda si ɖe eƒe agbegbegblẽnɔnɔ ƒe tadedeagua ŋu?

⁷ Ðewohĩ alesi Yuda nyrɔ eɖokui ɖe tadedeagu makɔmakɔ mee la awɔ nuku na ame aɖewo. Ðe ŋusẽ aɖe si tri akɔ wue zi wo dzi wogbugbɔ le Yehowa yomea? Ŋuɖoɖoa enye ao. Ðe woɖonɛ koŋ tsɔa didi vevie wɔnɛ. Yehowa gblɔ be: “Ètrɔ ʋu le yonyeme, [èklo] nu le wò aba ŋu, ède edzi, eye nèkekee ɖe nu, eye mia kple wo miebla asi; wo mlɔƒe dze ŋuwò, eye nèɖe ŋku ɖe ama.” (Yesaya 57:8b) Yuda bla nu kple eƒe alakpamawuwo, eye elɔ̃ ƒomedodo manɔsenu si le wo kpli wo dome la. Vevietɔ elɔ̃a gbɔdɔdɔ ƒe agbegbegblẽnɔnɔ nuwɔna—anɔ eme be wozãa ŋutsu ƒe vidzinu ƒe nɔnɔmewo hã—siwo bɔ ɖe mawu siawo subɔsubɔ me!

 8. Fia ka ƒe dziɖuɣi koŋue trɔ̃subɔsubɔ bɔ ɖe Yuda?

⁸ Alesi woɖɔ ŋutasesẽ ƒe trɔ̃subɔsubɔ si me agbe bliba nɔnɔ bɔ ɖoe la sɔ ɖe nusi míenya le Yuda-fia vɔ̃ɖi geɖe ŋu la nu. Le kpɔɖeŋu me, Manase wɔ trɔ̃subɔƒewo, ɖi vɔsamlekpuiwo na Baal, eye wòɖi alakpasubɔsubɔ ƒe vɔsamlekpuiwo ɖe gbedoxɔa ƒe xɔxɔnu eve. Ena viaŋutsuwo to dzo me, esa dzo, eka afa, eye wòdo gbɔgbɔyɔyɔnuwɔnawo ɖe ŋgɔ. Fia Manase tsɔ ati kɔkɔe si wòwɔ hã ɖo Yehowa ƒe gbedoxɔa me.b Eble Yuda wowɔ “nu vɔ̃ɖi wu dukɔ, siwo Yehowa tsrɔ̃ ɖa.” (Fiawo II, 21:2-9) Ame aɖewo xɔe se be Manase ye na wowu Yesaya, togbɔ be Manase ƒe ŋkɔ medze le Yesaya 1:1 o hã.

‘Ènɔ Wò Amewo Ðoɖo Ða Dzi’

 9. Nukata Yuda ɖoa eƒe ame ɖe “didiƒe ke”?

⁹ Nuvɔ̃ si Yuda wɔ la yi ŋgɔ wu alakpamawuwo subɔsubɔ ko. Yehowa gblɔ to Yesaya dzi be: “Ètsɔ ami yi [Melex, “NW”] gbɔe, eye nèɖo atike ʋeʋẽe asi fũ; èɖo wò amewo ɖe didiƒe ke, eye nèbɔbɔ ta wòɖatɔ tsieƒe ke.” (Yesaya 57:9) Yuda-fiaɖuƒe mawɔnuteƒe la yi “Melex,” si nye “fia” le Hebrigbe me—anye dutadziɖuɖu aɖe ƒe fia—gbɔ hetsɔ nunana dzeani xɔasi, siwo wotsɔ ami kple atike ʋeʋẽe wɔ kpɔɖeŋu na la yi nɛ. Yuda dɔa ame ɖona ɖe didiƒewo. Nukata? Be woava ƒo nu na Trɔ̃subɔdukɔwo be woawɔ dunyahenubablawo kpli ye. Eɖoa ŋu ɖe dutafiawo ŋu le esi wòtrɔ megbe de Yehowa ta.

10. (a) Nubabla kae Fia Axaz wɔ kple Asiria-fia? (b) Mɔ ka nue Yuda ‘bɔbɔ ta wòɖatɔ tsieƒe ke’?

¹⁰ Esia ƒe kpɔɖeŋu ɖekae nye nusi dzɔ le Fia Axaz ƒe ŋkekeawo me. Esi nubabla si Israel wɔ kple Siria do vɔvɔ̃ na Yuda-fia mawɔnuteƒe ma ta la, edɔ amewo be woava gblɔ na Asiria-fia Tiglat-Pileser III be: “Wò dɔla kple viwò menye, va, ne naɖem tso Aram-fia kple Israel-fia, amesiwo tso ɖe ŋunye la si me.” Axaz ɖo zãnu si nye klosalo kple sika ɖe Asiria-fia la, eye fia la wɔ ɖe eƒe biabiaa dzi heva dze Siria dzi gblẽe. (Fiawo II, 16:7-9) Yuda bɔbɔ ɖo ta ɖe “tsieƒe ƒe gogloeƒe ke” le eƒe nuwɔwɔ kple Trɔ̃subɔdukɔwo me. (An American Translation) Eƒe nuwɔna mawo ana wòaku, alo maganye dukɔ nɔɖokuisi si si fia le o.

11. Aleke Yuda ble eɖokui hesusu be yele dedie?

¹¹ Yehowa yi edzi ƒo nu na Yuda be: “Ne wò mɔ didi la te ɖeɖi ŋuwò hã la, mègblɔna be, yeadzudzɔ o; agbe gale ŋuwò, eyata nu mete ŋuwò o.” (Yesaya 57:10) Ẽ, dukɔa ku kutri vevie le eƒe xɔsegbenuwɔnawo me, eye mekpɔe dze sii be yeƒe agbagbadzedzewo katã nye dzodzro o. Ke boŋ eble eɖokui hesusu be yele ŋusẽ kpɔm. Ebu be agbe le ye ŋu eye yele lãmesẽ me. Bometsitsi kae nye si!

12. Kristodukɔa me ƒe nɔnɔme kawoe sɔ kple esiwo nɔ Yuda?

¹² Habɔbɔ aɖe li egbea si ƒe nuwɔna ɖi Yuda si nɔ anyi le Yesaya ƒe ŋkekea me la tɔ. Kristodukɔa zãa Yesu ƒe ŋkɔ gake eblaa nu kple dukɔwo eye wòtsɔ legbawo yɔ eƒe tadeaguƒewo fũ. Woƒe hametɔwo ɖoa trɔ̃subɔsubɔ ƒe nɔnɔmewɔwɔwo ɖe woa ŋutɔwo ƒe aƒewo me. Kristodukɔa tsɔ eƒe sɔhɛwo sa vɔe le dukɔwo ƒe aʋawɔwɔwo me. Aleke gbegbee nusiawo katã aku dzi na Mawu vavã la enye si, amesi de se na Kristotɔwo be: “Misi le trɔ̃subɔsubɔ la nu!” (Korintotɔwo I, 10:14) Esi Kristodukɔa ƒo eɖokui ɖe dunyahehe me la, ena ‘wòwɔ ahasi kple anyigba dzi fiawo.’ (Nyaɖeɖefia 17:1, 2) Le nyateƒe me la, enye Dukɔ Ƒoƒuawo dzi dela vevi aɖe. Nukae le mawusubɔsubɔ me gbolo sia lalam? Nya kae Yehowa gblɔ na Yuda mawɔnuteƒe si nye blematɔ si nɔ anyi tɔgbe, vevietɔ eƒe fiadu Yerusalem si tsi tre ɖi nɛ la?

‘Wò Nu Gbogboawo Maxɔ Na Wò O’

13. Aleke Yuda va zu ‘alakpatɔe,’ eye aleke wòbu Yehowa ƒe dzigbɔɖii?

¹³ Yehowa bia be: “Amekae le ŋɔ dzim na wò, eye ameka vɔ̃m nèle, be nèzu alakpatɔ?” Nyabiabia nyui aɖee nye ma! Mawuvɔvɔ̃ akuaku aɖeke mele Yuda me na Yehowa o. Anye ne womava zu alakpatɔwo ƒe dukɔ kple alakpamawuwo subɔlawo o. Yehowa yi edzi gblɔ be: “Mèɖo ŋku dzinye o, eye nya mede dzigbɔ na wò [o?] Esi mezi kpi eteƒe didi la, menye eyatae nègbem vɔvɔ̃ ɖo oa?” (Yesaya 57:11) Yehowa zi kpi eye mehe to na Yuda enumake o. Ðe Yuda kpɔ ŋudzedze ɖe esia ŋua? Ao, ke boŋ ebu Mawu ƒe dzigbɔɖi be enye ɖekematsɔleme. Vɔvɔ̃ aɖeke meganɔ wo me na eyama o.

14, 15. Nya kae Yehowa gblɔ le Yuda ƒe nuwɔnawo kple eƒe “nu gbogboawo” ŋu?

¹⁴ Gake ɣeyiɣi si Mawu atsɔ agbɔ dzi blewu la nu ava yi. Ɣeyiɣi ma nɔ susu me na Yehowa esi wògblɔ be: “Maɖe wò dzɔdzɔenyenye afia; ke wò dɔwɔwɔwo maxɔ na wò o. Èdo ɣli be, wò [nu, “NW”] gbogboawo naxɔ na wò, ke ya lɔ wo katã ɖe nu, eye ƒuƒu kplɔ wo dzoe.” (Yesaya 57:12, 13a) Yehowa aklo nu le Yuda ƒe alakpadzɔdzɔenyenyea dzi. Eƒe alakpanuwɔnawo maɖe vi aɖeke o. Eƒe “nu gbogboawo,” siwo nye eƒe legba gbogboawo, maxɔ nɛ o. Ne afɔku dzɔ la, ƒuƒu dzro ko akplɔ mawu siwo ŋu wòɖoa ŋu ɖo la dzoe.

¹⁵ Yehowa ƒe nyawo va eme le ƒe 607 D.M.Ŋ. me. Ɣemaɣie Babilon-fia Nebukadnezar tsrɔ̃ Yerusalem, tɔ dzo eƒe gbedoxɔa, eye wòkplɔ dukɔa me tɔ akpa gãtɔ yi aboyo mee. “Ale woɖe aboyo Yuda tso eƒe anyigba dzi enye si.”—Fiawo II, 25:1-21.

16. Nukae le Kristodukɔa kple “Babilon gã” la ƒe akpa susɔea lalam?

¹⁶ Nenema ke Kristodukɔa ƒe legba gbogboawo maxɔ nɛ le Yehowa ƒe dzikudogbe o. (Yesaya 2:19-22; Tesalonikatɔwo II, 1:6-10) Woatsrɔ̃ Kristodukɔa akpe ɖe “Babilon gã”—alakpasubɔsubɔ ƒe xexemefiaɖuƒe—la ƒe akpa susɔea ŋu. Kpɔɖeŋulã wɔadã dzĩ la kple eƒe dzo ewoawo ‘agblẽ Babilon Gã la ahaɖe amamae, eye woaɖu eƒe ŋutilã ahatɔ dzoe wòafia keŋkeŋ.’ (Nyaɖeɖefia 17:3, 16, 17) Aleke gbegbe dzi dzɔa mí enye si be míewɔ ɖe sededea dzi, esi gblɔ be: “Mi amesiwo katã nye nye dukɔ la, mido go tso me, bene miagade ha kplii le eƒe nuvɔ̃wo me o, eye bena miagaxɔ eƒe fuwɔame ƒe ɖeke o”! (Nyaɖeɖefia 18:4, 5) Megadzɔ gbeɖe be míatrɔ yi egbɔ alo agava zɔ eƒe mɔwo dzi o.

“Amesi Sim Tso la, Anyi Anyigba ƒe Dome”

17. Ŋugbe kae wodo na ‘amesi si Yehowa tso,’ eye ɣekaɣie esia va eme?

¹⁷ Ke Yesaya ƒe nyagblɔɖia me nya siwo kplɔe ɖo ya ɖe? “Amesi sim tso la, anyi anyigba ƒe dome, eye wòaxɔ nye to kɔkɔe la wòanye etɔ.” (Yesaya 57:13b) Amekawoe Yehowa le nu ƒom na azɔ? Ekpɔ nusi adzɔ le afɔku si gbɔna la megbe hegblɔ eƒe amewo ƒe ablɔɖekpɔkpɔ tso Babilon kple tadedeagu dzadzɛ gbugbɔɖoanyi le eƒe to kɔkɔe si nye Yerusalem la dzi ɖi. (Yesaya 66:20; Daniel 9:16) Dzideƒotsoƒe kae nye si esia anye na Yudatɔ wɔnuteƒe ɖesiaɖe! Yehowa gblɔ hã be: “Wògblɔ be: Mita mɔ, mita mɔ, mikplɔ mɔwo dzi; miɖe nukikliwo katã ɖa le mɔ me na nye dukɔ!” (Yesaya 57:14) Ne ɣeyiɣia de be Mawu naɖe eƒe amewo la, woata mɔa eye woaɖe mɔxenuwo katã ɖa le edzi.—Kronika II, 36:22, 23.

18. Aleke woƒo nu tso Yehowa ƒe ɖoƒe kɔkɔ ŋui, ke hã ɖetsɔleme kae wòɖena fiana lɔlɔ̃tɔe?

¹⁸ Ɣeyiɣi sia mee nyagblɔɖila Yesaya gblɔ nya siwo míeyɔ le gɔmedzedzea me la be: “Ale ame gã, si ɖo kpo, eli tegbee, eye eƒe ŋkɔ nye kɔkɔe la, gblɔ esi: Mele dzi kple kɔkɔeƒe la, mele amesi wogbã gudugudu, kple amesi ƒe gbɔgbɔ wobɔbɔ ɖe anyi la gbɔ, ne magbɔ agbe amesiwo wobɔbɔ ɖe anyi la ƒe gbɔgbɔ, eye magbɔ agbe amesiwo wogbã gudugudu la ƒe dzi.” (Yesaya 57:15) Dziƒo ƒe kɔkɔƒe kekeakee Yehowa ƒe fiazikpui le. Ame aɖeke ƒe ɖoƒe mekɔ alo de dzi wu etɔ o. Aleke gbegbe wòfaa akɔ na amee nye si be enɔa afima kpɔa nusianu—menye ame vɔ̃ɖiwo ƒe nuvɔ̃wo ko o ke amesiwo dzea agbagba be yewoasubɔe ƒe nu dzɔdzɔe wɔwɔwo hã! (Psalmo 102:20; 103:6) Tsɔ kpe ɖe eŋu la, esea amesiwo wote ɖe anyi ƒe hũɖeɖewo eye wòdoa ŋusẽ amesiwo ƒe dzi wogbã gudugudu. Nya siawo aʋã Yudatɔ dzimetrɔlawo ƒe dzi godoo le blema. Woʋãa míaƒe dzi egbea hã.

19. Ɣekaɣie Yehowa ƒe dɔmedzoe nu fana?

¹⁹ Nya siwo Yehowa gagblɔ la hã faa akɔ na ame, si nye be: “Nyemanɔ dzre hem godogodo o, eye nyemanɔ dɔmedzoe dom ɖaa o; elabena nu ava te gbɔgbɔ ŋu le ŋkunye me kple luʋɔ, siwo mewɔ la ŋu.” (Yesaya 57:16) Ne ɖe Yehowa ƒe dɔmedzoe nɔa anyi ɖaa eye enu mefana o la, anye ne Mawu ƒe nuwɔwɔ aɖeke makpɔtɔ o. Gake dzidzɔtɔe la, Mawu ƒe dziku nɔa anyi ɣeyiɣi kpui aɖe ko. Ne eɖo eƒe taɖodzinu gbɔ la, eƒe dzi fana. Gbɔgbɔmenugɔmesese sia kpena ɖe mía ŋu be míakpɔ ŋudzedze deto ɖe Yehowa ƒe lɔlɔ̃ na eƒe nuwɔwɔwo ŋu.

20. (a) Aleke Yehowa wɔa nu kple nuvɔ̃wɔla matrɔdzimee? (b) Mɔ ka nue Yehowa faa akɔ na amesi se veve ɖe nuvɔ̃ ta le?

²⁰ Wokɔ nya bubuwo me na mí esi Yehowa yi eƒe nyaa dzi. Gbã la, egblɔ be: “Le eƒe ŋubiabia ƒe vodada ta medo dɔmedzoe, eye meƒoe ɖo, medo dɔmedzoe, eye meɣla ɖokuinye, tete wòdze go helé eƒe tamesusu ƒe mɔ tsɔ.” (Yesaya 57:17) Edze ƒã be vodada siwo ŋubiabiã na wowɔ la naa Mawu ƒe dziku hona. Zi alesi amea kpɔtɔ nye godzela la, Yehowa ƒe dɔmedzoe nu mefana o. Gake nukae dzɔna ne godzela la xɔ amehehe? Ekema Yehowa ɖea alesi eƒe lɔlɔ̃ kple dɔmetɔtrɔ ʋãnɛ wòwɔa nui la fiana: “Mekpɔ eƒe mɔwo, mayɔ dɔe, makplɔe, eye mafa akɔ na eya kple eƒe nuxalawo.” (Yesaya 57:18) Ne Yehowa he to na ame vɔ la, eyɔa dɔ amesi se veve ɖe nuvɔ̃ ta hefaa akɔ na eya kple amesiwo le nu xam kplii. Esia tae Yudatɔwo te ŋu trɔ yi wo de le ƒe 537 D.M.Ŋ. me. Enye nyateƒe be Yuda megava zu fiaɖuƒe nɔɖokuisi si ƒe fia nye Dawid ƒe dzidzimevi gbeɖe ya o. Ke hã wogbugbɔ Yerusalem-gbedoxɔa tu, eye wogaɖo tadedeagu vavãtɔ anyi.

21. (a) Aleke Yehowa do ŋusẽ Kristotɔ amesiaminawo ƒe gbɔgbɔ le ƒe 1919 mee? (b) Nɔnɔme kae wòle be mía dometɔ ɖesiaɖe natu ɖo?

²¹ Yehowa, ‘Amegã si Ðo Kpo’ ɖee fia le ƒe 1919 me be yetsɔ ɖe le amesiamina susɔeawo hã ƒe nyonyo me. Woƒe vevesese ɖe nuvɔ̃ ta kple ɖokuibɔbɔ wɔe be Mawu gã, Yehowa, kpɔ woƒe fukpekpe heɖe wo tso Babilontɔwo ƒe aboyo me. Eɖe mɔxenuwo katã ɖa, eye wòkplɔ wo yi ablɔɖe mee ale be woate ŋu atsɔ tadedeagu dzadzɛ ana eyama. Alea wòdzɔe be nya siwo Yehowa gblɔ to Yesaya dzi va eme ɣemaɣii. Eye nyateƒenya matrɔmatrɔ siwo ka mía dometɔ ɖesiaɖe la le nya mawo me. Amesiwo bɔbɔa wo ɖokui ƒe tadedeagu koe dzea Yehowa ŋu. Eye ne Mawu subɔla aɖe wɔ nuvɔ̃ la, ele be wòalɔ̃ ɖe eƒe vodada dzi kaba, wòaxɔ mokaka, ahaɖɔ eƒe mɔwo ɖo. Mígaŋlɔe be gbeɖe o be Yehowa yɔa dɔ ɖokuibɔbɔlawo hefaa akɔ na wo gake “tsia tre ɖe dadalawo ŋuti.”— Yakobo 4:6.

‘Ŋutifafa na Didiƒe Kple Kpuiƒe Nɔlawo’

22. Etsɔme kae Yehowa gblɔ ɖi na (a) dzimetrɔlawo? (b) ame vɔ̃ɖiwo?

²² Yehowa de vovototo amesiwo trɔa dzime kple amesiwo nɔa woƒe mɔ vɔ̃wo dzi ƒe etsɔme dome esi wògblɔ be: “[Mawɔ] nuyiwo ƒe kutsetse. . . . Ŋutifafa, ŋutifafa mana didiƒe nɔlawo kple kpuiƒe nɔlawo, eye mayɔ dɔ wo. Ke ame vɔ̃ɖiwo le abe atsiaƒu dzeagbo ene, elabena mate ŋu anɔ anyi kpoo o, eye eƒe tsiwo le bà kple gbeɖuɖɔ ɖem ɖe go. . . . Ŋutifafa aɖeke meli na ame vɔ̃ɖiwo o.”—Yesaya 57:19-21.

23. Nukae nye nuyiwo ƒe kutsetse, eye mɔ ka nue Yehowa ‘awɔ’ kutsetse sia le?

²³ Nuyiwo ƒe kutsetse la nye kafukafuvɔsa si wotsɔna naa Mawu—si nye eŋkɔ me ʋuʋu le gaglãgbe. (Hebritɔwo 13:15) Aleke Yehowa ‘awɔ’ nyameʋuʋu le dutoƒo siae? Hafi ame aɖe natsɔ kafukafuvɔsa ana la, gbã ele be wòasrɔ̃ nu tso Mawu ŋu eye wòaxɔ edzi ase. Xɔse—si nye Mawu ƒe gbɔgbɔ ƒe kutsetse la—ʋãa amea be wòagblɔ nya si wòse la na ame bubuwo. Ne míagblɔe le mɔ bubu nu la, eʋua eme le dutoƒo. (Romatɔwo 10:13-15; Galatiatɔwo 5:22) Ele be míaɖo ŋku edzi hã be Yehowa koŋue dea dɔ asi na esubɔlawo be woagblɔ yeƒe kafukafu afia. Eye Yehowae naa ablɔɖe eƒe amewo, si na wònya wɔna be woatsɔ kafukafuvɔsa siawo ana. (Petro I, 2:9) Eyata míate ŋu agblɔ le Yehowa ŋu wòasɔ be eyae wɔ nuyiwo ƒe kutsetse sia.

24. (a) Amekawoe va le Mawu ƒe ŋutifafa me, eye nukae do tso eme na wo? (b) Amekawoe ŋutifafa meli na o, nukae dona tso eme na wo?

²⁴ Nuyiwo ƒe kutsetse dodzidzɔname kae nye si Yudatɔawo anya tsɔ na esime wotrɔ yina ɖe wo denyigba dzi henɔ kafukafuhawo dzim na Yehowa! Dzi adzɔ wo be yewole Mawu ƒe ŋutifafa me, woɖale “didiƒe”—afisi didi tso Yuda gbɔ hele lalam be yewoatrɔ ayi—loo alo le “kpuiƒe”—heɖo wo denyigba dzi xoxo o. Gake aleke nuwo ato vovo sã na nuvɔ̃ɖiwɔlawoe nye si! Ŋutifafa aɖeke meli na amesiame si gbea Yehowa ƒe tohehe xɔxɔ kple ame vɔ̃ɖiwo o, ameka ke woɖanye alo afika ke woɖale o. Esi wole fiefiem abe atsiaƒu dzeagbo ene la, menye nuyiwo ƒe kutsetse woɖena fiana o, ke boŋ woyia edzi ɖea “bà kple gbeɖuɖɔ,” si fia nu makɔmakɔ ɖesiaɖe la ɖe go.

25. Aleke ame geɖe siwo le didiƒe kple kpuiƒe wɔ va le ŋutifafa kpɔm?

²⁵ Egbea hã Yehowa subɔla siwo le afisiafi gblɔa Mawu Fiaɖuƒea ŋuti nyanyuia. Kristotɔ siwo le didiƒe kple kpuiƒe le dukɔ siwo wu 230 me tsɔa woƒe nuyiwo ƒe kutsetse nana, eye woɖea gbeƒã Mawu vavã ɖeka kolia la ƒe kafukafunyawo. Wosea woƒe kafukafuhawo le “anyigba ƒe mlɔenu.” (Yesaya 42:10-12) Amesiwo sea woƒe nyawo hewɔna ɖe edzi la le Mawu ƒe Nya, Biblia, me nyateƒea xɔm. Ŋutifafa si tso “ŋutifafa Mawu” la subɔsubɔ me la va le amesiawo si sum.—Romatɔwo 16:20.

26. (a) Nukae le ame vɔ̃ɖiwo lalam? (b) Ŋugbe nyui kae wodo na ame fafawo, eye nukae wòle be wòanye míaƒe tameɖoɖo kplikpaa?

²⁶ Nyateƒee, ame vɔ̃ɖiwo meɖoa to Fiaɖuƒegbedasia o. Gake eteƒe madidi o, womagaɖe mɔ na wo be woagblẽ ame dzɔdzɔewo ƒe ŋutifafa me o. Yehowa do ŋugbe be: “Ekpɔtɔ vie ko ame vɔ̃ɖi la maganɔ anyi o.” Amesiwo si Yehowa tso anyi anyigba la dome le mɔ dodzidzɔname aɖe nu. “Ame ɖihiãwo anyi anyigba la dome, eye dzi adzɔ wo ɖe ŋutifafa gbogbo la ŋuti.” (Psalmo 37:10, 11, 29) Teƒe dzeani kae nye si míaƒe anyigba la azu ɣemaɣi! Neva eme be mí katã míaɖoe kplikpaa be míana Mawu ƒe ŋutifafa nage le mía si gbeɖe o, ale be míate ŋu adzi Mawu ƒe kafukafuhawo ayi ɖe mavɔmavɔ me.

[Etenuŋɔŋlɔwo]

[Nɔnɔmetata si le axa 263]

Yuda wɔ agbegbegblẽnɔnɔ ƒe tadedeagu me nuwo le ati dama ɖesiaɖe te

[Nɔnɔmetata si le axa 267]

Yuda tu vɔsamlekpuiwo ɖe anyigba la dzi katã

[Nɔnɔmetata si le axa 275]

‘Mawɔ nuyiwo ƒe kutsetse’