Ta Blaeve Vɔ Enelia

Yehowa Wɔ Ŋkɔ Nyui aɖe na Eɖokui

Yesaya 63:1-14

1, 2. (a) Aleke ‘Yehowa ƒe ŋkekea’ ƒe vava le vevie na Kristotɔwoe? (b) Nya si le vevie wu ka ŋue Yehowa ƒe ŋkekea ƒe vava ku ɖo?

KRISTOTƆWO le ‘Yehowa ƒe ŋkekea ƒe vava lalam eye wòle susu me na wo vevie’ ƒe akpe eve kloe enye sia. (Petro II, 3:12; Tito 2:13) Gɔmesese le eŋu be wole didim vevie be ŋkeke ma nava. Elabena ŋkeke mae anye woƒe gbɔdzɔekpɔkpɔ tso blibomademade ƒe nugbegblẽwo me ƒe gɔmedzedze. (Romatɔwo 8:22) Eyae ahe nɔnɔme sesẽ siwo me tom wole le ‘ɣeyiɣi vɔ̃’ siawo me hã ava nuwuwui.—Timoteo II, 3:1.

² Gake togbɔ be Yehowa ƒe ŋkekea ahe gbɔdzɔe vɛ na ame dzɔdzɔewo hã la, anye tsɔtsrɔ̃ na “amesiwo menya Mawu o kple amesiwo meɖoa to mía Aƒetɔ Yesu Kristo ƒe nyanyui la o.” (Tesalonikatɔwo II, 1:7, 8) Esia nye nya si ŋu wòle be míade ŋugble le vevie. Ðe Mawu atsrɔ̃ ame vɔ̃ɖiwo ŋutɔŋutɔ le eƒe amewo ɖeɖe tso fukpekpe me ko taa? Yesaya ƒe ta 63 lia ɖee fia be eku ɖe nya aɖe si le vevie sã wu ŋu, si nye Mawu ƒe ŋkɔ ŋutikɔkɔ.

Aʋadziɖula la Le Azɔli Dzi

3, 4. (a) Nɔnɔme ka ŋue nyagblɔɖi si le Yesaya ta 63 lia la ku ɖo? (b) Amekae Yesaya kpɔ wòle azɔli dzi ɖo ta Yerusalem, eye amekae agbalẽnyalawo gblɔ be ame ma nye?

³ Míexlẽ nu tso ablɔɖenana Yudatɔwo tso aboyo me le Babilon kple wo kpɔkplɔ va wo denyigba dzi ŋu le Yesaya ta 62 lia me. Biabia si afɔ ɖe te godoo enye be: Ðe wòle be Yudatɔwo ƒe ame susɔe siwo wokplɔ va wo dee navɔ̃ be dukɔ bubu siwo nye futɔwo agava gblẽ nua? Ŋutega si Yesaya kpɔ la kpe ɖe wo ŋu woɖe woƒe vɔvɔ̃a ɖa. Nyagblɔɖia dze egɔme be: “Amekae nye esi tso Edom gbɔna, eye wòle awu dzĩwo me tso Bozra, amesi tsɔ eƒe awuwo ɖo atsyɔ̃e, eye wòle yiyim le eƒe ŋusẽ geɖe la me?”—Yesaya 63:1a.

⁴ Yesaya kpɔ aʋakalẽtɔ sesẽ aɖe si ɖu aʋa dzi eye wòle azɔli dzi ɖo ta Yerusalem. Awu dzeani si wòdo fia be ɖoƒe kɔkɔtɔ kekeakee wòle. Afisi Bozra, si nye Edom-dugã si xɔ ŋkɔ wu, le ye wòtso gbɔna, si fia be eɖu aʋa gã aɖe si wòwɔ kple futɔwo ƒe dukɔ ma la dzi. Amekae nye aʋakalẽtɔ sia? Agbalẽnyala aɖewo gblɔ be Yesu Kristo ye. Ame bubuwo xɔe se be eyae nye Yudatɔwo ƒe aʋakplɔla Judas Maccabaeus. Gake aʋakalẽtɔ la ŋutɔ gblɔ amesi wònye esi wòɖo nya si wobia la ŋu be: “Nyee nye amesi ƒoa nu ɖe eteƒe, eye xɔname bɔ ɖe asinye.”—Yesaya 63:1b.

 5. Amekae nye aʋakalẽtɔ si Yesaya kpɔ, eye nukata nèɖo eŋu nenema?

⁵ Ðikeke mele eme o be Yehowa Mawu ŋutɔe nye aʋakalẽtɔ sia. Wogblɔ le eŋu le teƒe bubuwo be “ŋusẽ geɖe” le esi eye be ‘egblɔ nusi le eteƒe.’ (Yesaya 40:26; 45:19, 23) Aʋakalẽtɔ la ƒe awu dzeaniawo na míeɖo ŋku hakpala la ƒe nyawo dzi be: “Yehowa, nye Mawu, èlolo ŋutɔ, ètaa gãnyenye kple atsyɔ̃ɖoɖo.” (Psalmo 104:1) Togbɔ be Yehowa nye lɔlɔ̃ Mawu hã la, Biblia ɖee fia be ewɔa nu abe aʋakalẽtɔ ene ne ehiã.—Yesaya 34:2; Yohanes I, 4:16.

 6. Nukata Yehowa va wɔ aʋa le Edom trɔ gbɔna?

⁶ Gake nukatae Yehowa va wɔ aʋa le Edom trɔ gbɔna? Edomtɔwo, amesiwo lé fuléle si dze egɔme tso wo tɔgbui Esau dzi la me ɖe asi la nye Mawu ƒe dukɔ si wòbla nu kplii ƒe futɔwo tso blema ke. (Mose I, 25:24-34; Mose IV, 20:14-21) Alesi gbegbe Edom lé fu Yudae la dze ƒã vevietɔ le Yerusalem tsrɔ̃ɣi, esime Edomtɔwo de dzi ƒo na Babilon-srafowo. (Psalmo 137:7) Yehowa bu fuléle sia be enye nuvɔ̃ si wowɔ ɖe ye ŋutɔ ŋu. Eyata mewɔ nuku be eɖoe be yeaɖe yeƒe hlɔ̃biabiayi la ɖe Edom dzi o!—Yesaya 34:5-15; Yeremya 49:7-22.

 7. (a) Aleke nya si wogblɔ ɖi ɖe Edom ŋu va emee gbã? (b) Nukae Edom tsi tre ɖi na?

⁷ Eyata ŋutega si Yesaya kpɔ la de dzi ƒo na Yudatɔ siwo gbɔ va Yerusalem la ŋutɔ. Ena kakaɖedzi wo be woanɔ dedie le woƒe nɔƒe yeyea. Le nyateƒe me, va ɖo nyagblɔɖila Maleaxi ƒe ŋkekeawo me la, Mawu tsɔ Edom ƒe “towo wɔ gbegbee, eye eƒe domenyinu zu gbedadaƒo na amegãxiwo.” (Maleaxi 1:3) Ðe esia fia be va ɖo Maleaxi ƒe ŋkekea me la, Yesaya ƒe nyagblɔɖia va eme bliboea? Ao, elabena togbɔ be Edom zu aƒedo hã la, woɖoe be yewoagatsoe, eye Maleaxi yi edzi yɔ Edom be enye “nu vɔ̃ɖi wɔwɔ ƒe anyigba” kple “dukɔ, si ŋu Yehowa do dziku ɖo ɖikaa.”a (Maleaxi 1:4, 5) Gake le nyagblɔɖi me la, menye Esau ƒe dzidzimeviwo koe Edom tsi tre ɖi na o. Etsi tre ɖi na dukɔ siwo katã ɖee fia be yewonye Yehowa subɔlawo ƒe futɔwo. Dukɔ siwo le Kristodukɔa me koŋue xɔ ŋkɔ le go sia me. Nukae adzɔ ɖe míaƒe ŋkekea me Edomtɔ siawo dzi?

Weinfiaƒe La

8, 9. (a) Dɔ ka wɔmee aʋakalẽtɔ si Yesaya kpɔ la nɔ? (b) Ɣekaɣie wofanya nu le weinfianu la me, eye aleke wofanyae?

⁸ Yesaya bia aʋakalẽtɔ si trɔ tso aʋa gbɔna la be: “Nukaŋuti wò awuwo biã, eye wò avɔwo le abe weinfiãla tɔ ene?” Yehowa ɖo eŋu be: “Nye ɖeɖee fanya wein kple afɔ, eye dukɔwo dometɔ aɖeke mekpe ɖe ŋunye o. Ale menyã avuzi le wo dzi le nye dɔmedzoe me, eye mefanya wo le nye dziku me, eye woƒe ʋu hlẽ ɖe nye awuwo ŋu, eye nye avɔwo katã me gblẽ.”—Yesaya 63:2, 3.

⁹ Nya siawo siwo ana míakpɔ nudzɔdzɔa le susu me la fia ame gbogbo aɖewo wuwu. Kpɔe ɖa, Mawu ƒe awu dzeaniawo ke hã biã, abe weinfiala ƒe awuwo ene! Weinfianu nye kpɔɖeŋu si sɔ nyuie na nɔnɔme si me Yehowa Mawu ƒe futɔwo anɔ ne etso be yeatsrɔ̃ wo. Ɣekaɣie woafanya nu le weinfianu sia me? Yoel kple apostolo Yohanes ƒe nyagblɔɖiwo hã ƒo nu tso kpɔɖeŋu weinfianu aɖe ŋu. Woafanya nu le weinfianu si ŋu nyagblɔɖi mawo ƒo nu tsoe la me ne Yehowa fanya eƒe futɔwo hetsrɔ̃ wo le Harmagedon me. (Yoel 4:13; Nyaɖeɖefia 14:18-20; 16:16) Ɣeyiɣi sia ke mee woazã weinfianu si ŋu Yesaya ƒo nu tsoe le nyagblɔɖi me la le.

10. Nukata Yehowa gblɔ be ye ɖeɖee fanya nu le weinfianu la me?

¹⁰ Gake nukatae Yehowa gblɔ be ye ɖeɖee fanya nu le weinfianu sia me, eye dukɔwo dometɔ aɖeke mekpe ɖe ye ŋu o? Ðe menye Yesu Kristo si nye Mawu teƒenɔla lae axɔ ŋgɔ afanya nu le weinfianu la me oa? (Nyaɖeɖefia 19:11-16) Ẽ, gake amegbetɔwo ŋue Yehowa le nu ƒom le menye gbɔgbɔmenuwɔwɔwoe o. Ele gbɔgblɔm be amegbetɔ aɖeke mate ŋu aɖe Satana—yomedzelawo ɖa le anyigba dzi o. (Yesaya 59:15, 16) Wogblẽe ɖe Mawu Ŋusẽkatãtɔ la si me be wòayi edzi afanya wo le eƒe dziku me, vaseɖe esime wogbã gudugudu.

11. (a) Nukata Yehowa ahe ‘hlɔ̃biaŋkeke’ vɛ? (b) Amekawoe nye ‘amesiwo woxɔ na’ le blema, eye woawoe nye amekawo egbea?

¹¹ Yehowa yi edzi ɖe nusita eya ŋutɔ wɔ dɔ sia la me be: “Meɖo nye hlɔ̃biagbe ɖe ta me, eye [amesiwo mexɔ na, “NW”] ƒe ƒe la ɖo.” (Yesaya 63:4)b Yehowa koe kpɔ mɔ abia hlɔ̃ amesiwo gblẽa nu le eƒe amewo ŋu. (Mose V, 32:35) Le blema la, Yudatɔ siwo kpe fu le Babilontɔwo ƒe asi mee nye ‘amesiwo woxɔ na.’ (Yesaya 35:10; 43:1; 48:20) Le míaƒe ɣeyiɣia me la, woawoe nye amesiamina susɔeawo. (Nyaɖeɖefia 12:17) Woxɔ na wo tso alakpasubɔsubɔ ƒe aboyo me, abe wo tɔ blematɔwo ke ene. Eye abe Yudatɔ mawo ke ene la, woti amesiaminawo, kple woƒe zɔhɛ ‘alẽ bubuawo’ yome eye wotsi tre ɖe wo ŋu. (Yohanes 10:16) Eyata Yesaya ƒe nyagblɔɖia na kakaɖedzi Kristotɔ siwo li egbea be Mawu ade asi nyawo me akpe ɖe wo ŋu le Eƒe ɣeyiɣi ɖoɖi dzi.

12, 13. (a) Mɔ ka nue kpeɖeŋutɔ aɖeke meli na Yehowa le o? (b) Aleke Yehowa ƒe alɔ hea xɔname vɛ, eye aleke eƒe dziku kpena ɖe eŋui?

¹² Yehowa yi edzi be: “Metsa ŋku, ke ame aɖeke mexɔ nam o; eye nye mo wɔ yaa be, xɔnametɔ aɖeke meli o; tete nye abɔ xɔ nam, eye nye dziku kpe ɖe ŋunye. Mefanya dukɔwo le nye dɔmedzoe me, meto wo nyanyanya le nye dziku me, eye mena woƒe ʋu ɖuɖu ɖe anyigba.”—Yesaya 63:5, 6.

¹³ Amegbetɔ kpekpeɖeŋunala aɖeke mate ŋu axɔ kafukafu ɖe Yehowa ƒe hlɔ̃biaŋkeke gã la ta o. Eye Yehowa mehiã amegbetɔ ƒe kpekpeɖeŋu aɖeke le eƒe lɔlɔ̃nu wɔwɔ ade goe me o.c Eƒe ŋusẽ triakɔ ƒe alɔ la ɖeɖe ate ŋu awɔ dɔ ma. (Psalmo 44:4; 98:1; Yeremya 27:5) Azɔ hã eƒe dziku kpena ɖe eŋu. Le mɔ ka nu? Eyae nye be Mawu ƒe dziku menye seselelãme si dzi mete ŋu ɖuna o, ke boŋ enye dɔmedzoe si sɔ. Esi Yehowa tua eƒe nuwɔnawo ɖe gɔmeɖose dzɔdzɔewo dzi ɣesiaɣi ta la, eƒe dziku kpena ɖe eŋu heʋãnɛ wònaa eƒe futɔwo ƒe ‘ʋu ɖuɖuna ɖe anyigba’ tsɔ ɖia gbɔ wo heɖua wo dzii.—Psalmo 75:9; Yesaya 25:10; 26:5.

Mawu ƒe Amenuveve

14. Ŋkuɖodzinya siwo sɔ kawoe Yesaya gblɔ azɔ?

¹⁴ Le blema la, mexɔ ɣeyiɣi aɖeke hafi Yudatɔwo dzudzɔ ŋudzedzekpɔkpɔ ɖe nusiwo Yehowa wɔ na wo ŋu o. Eyata esɔ be Yesaya ɖo ŋku nusita Yehowa wɔ nusiawo la dzi na wo. Yesaya gblɔ be: “Makafu Yehowa ƒe amenuveve kple Yehowa ƒe ŋkɔxɔxɔ le nusiwo katã Yehowa wɔ na mí la nu kpakple eƒe dɔmenyo gbogbo, siwo wòwɔ na Israel ƒe aƒe la le eƒe nublanuikpɔkpɔ kple eƒe amenuveve geɖe la nu. Egblɔ be: Vavã, nye dukɔ wonye, vi, siwo [medaa] alakpa o la wonye, eye wòzu xɔnametɔ na wo. Esi woxaxa wo ɖo [la, ete ɖe edzi. Eye eya ŋutɔ ƒe dɔla, “NW”] xɔ na wo; eɖe wo le eƒe lɔlɔ̃ kple eƒe tufafa ta, eye wòkɔ wo hetsɔ wo le blema ŋkekewo katã me.”—Yesaya 63:7-9.

15. Aleke Yehowa ve Abraham ƒe dzidzimeviwo nui le Egipte eye nukatae?

¹⁵ Kpɔɖeŋu ɖedzesi kae nye si Yehowa ɖo le amenuveve, alo nuteƒewɔwɔ ƒe lɔlɔ̃, ɖeɖefia me! (Psalmo 36:8; 62:13) Ƒomedodo kplikplikpli si me lɔlɔ̃ nɔ nɔ Yehowa kple Abraham dome. (Mixa 7:20) Edo ŋugbe na blemafofo ma be eƒe dzidzimevi dzie anyigba dzi dukɔwo katã ayra wo ɖokui toe. (Mose I, 22:17, 18) Yehowa lé ŋugbedodo ma me ɖe asi hewɔ dɔmenyonu geɖe na Israel ƒe aƒea. Eƒe nuwɔna nuteƒewɔwɔtɔe dometɔ si ɖe dzesie nye alesi wòɖe Abraham ƒe dzidzimeviwo tso kluvinyenye me le Egipte.—Mose II, 14:30.

16. (a) Nukpɔsusu kae nɔ Yehowa si esi wòbla nu kple Israel? (b) Aleke Mawu wɔa nu ɖe eƒe amewo ŋui?

¹⁶ Esi Israel ʋu le afima vɔ megbe la, Yehowa kplɔ wo va Sinai-toa gbɔ eye wòdo ŋugbe sia na wo be: “Ne miaɖo to nye gbe, eye mialé nye nubabla me ɖe asi la, ekema mianye tɔnye koŋ . . . Eye mianye nunɔlawo ƒe fiaɖuƒe kple dukɔ kɔkɔe nam!” (Mose II, 19:5, 6) Ðe Yehowa tsɔ nya sia ble wo nuia? Ao, elabena Yesaya ɖee fia be Yehowa gblɔ na eɖokui be: “Vavã, nye dukɔ wonye, vi, siwo medaa alakpa o la wonye.” Agbalẽnyala aɖe gblɔ be: “Nya ‘vavã’ la menye fiagã ƒe sedede alo nunyanyadoŋgɔ o: enye mɔkpɔkpɔ kple kakaɖedzi si tso lɔlɔ̃ me.” Ẽ, Yehowa wɔ eƒe nubabla la le anukwareɖiɖi me, eye edii ŋutɔŋutɔ be nu nadze edzi na eƒe dukɔa. Togbɔ be gbɔdzɔgbɔdzɔ siwo dze gaglãa nɔ wo ŋu hã la, eɖee fia be yeka ɖe wo dzi. Aleke gbegbe wònyoe nye si be míade ta agu na Mawu si kana ɖe esubɔlawo dzi alea! Hamemegã siwo li egbea doa ŋusẽ amesiwo wotsɔ de woƒe dzikpɔkpɔ te la ŋutɔ ne woɖee fia nenema ke be yewoka ɖe edzi be nɔnɔme nyuiwo le Mawu ƒe amewo si.—Tesalonikatɔwo II, 3:4; Hebritɔwo 6:9, 10.

17. (a) Nukae Yehowa wɔ tsɔ ɖe eƒe lɔlɔ̃ na Israel-viwo fia? (b) Kakaɖedzi kae ate ŋu anɔ mía si egbea?

¹⁷ Gake hakpala la gblɔ le Israel-viwo ŋu be: “Woƒe ŋku dzo le Mawu, woƒe xɔnametɔ la dzi, amesi wɔ nu gãwo le Egipte.” (Psalmo 106:21) Woƒe tomaɖomaɖo kple kɔlialia ƒe nɔnɔmea kplɔ wo de afɔku me zi geɖe. (Mose V, 9:6) Ðe Yehowa dzudzɔ wo nu vevea? Nya si Yesaya gblɔ boŋue nye be “esi woxaxa wo ɖo la, ete ɖe edzi.” Aleke gbegbe Yehowa sea veve ɖe ame nu enye si! Abe alesi wòle le vifofo lɔ̃ame ɖesiaɖe gome ene la, eve Mawu esi wòkpɔ viawo wonɔ fu kpem, togbɔ be woa ŋutɔwo ƒe bometsitsi tae wonɔ fua kpem ɖo hã. Abe alesi wogblɔe ɖi ene eye le eƒe lɔlɔ̃ ɖeɖefia me la, edɔ “eya ŋutɔ ƒe dɔla,” si anye Yesu le eƒe anyinɔnɔ do ŋgɔ na amegbetɔzuzu me, ɖa be wòakplɔ wo ayi Ŋugbedodonyigba la dzi. (Mose II, 23:20) Alea wòdzɔe be Yehowa kɔ dukɔ la kpa, “abe alesi ŋutsu [kpaa] viae ene.” (Mose V, 1:31; Psalmo 106:10) Egbea míate ŋu aka ɖe edzi be Yehowa nya míaƒe fukpekpewo nenema ke eye be esea veve ɖe mía nu ne míeɖo nɔnɔme sesẽwo me. Míate ŋu atsɔ kakaɖedzi ‘atsɔ míaƒe dzimaɖiwo katã ada ɖe eyama dzi, elabena etsɔ ɖe le eme na mí.’—Petro I, 5:7.

Mawu Va Zu Futɔ

18. Nukata Yehowa va zu eƒe dukɔa ƒe futɔ?

¹⁸ Gake mele be míatsɔe be Mawu nye dɔmenyotɔ xoxo ta míawɔ nu alesi dze mía ŋui gbeɖe o. Yesaya yi edzi be: “Woawo dze aglã ɖe eŋu, eye wodo dziku na eƒe gbɔgbɔ kɔkɔe la; tete wòtrɔ zu futɔ na wo, eye eya ŋutɔ wɔ avu kpli wo.” (Yesaya 63:10) Yehowa xlɔ̃ nu wo be togbɔ be Mawu nublanuikpɔla kple dɔmenyotɔ yenye hã la, ‘yemegbea tohehe o.’ (Mose II, 34:6, 7) Israel-viwo wɔ nusi dze na tohehe esi wodze aglã enuenu. Mose ɖo ŋku edzi na wo be: “Megaŋlɔ alesi nèdo dɔmedzoe na Yehowa, wò Mawu, le gbedzi la be o! Miesẽ to ɖe Yehowa ŋu, tso gbesigbe ke mieʋu tso Egipte, vaseɖe esime mieva teƒe sia.” (Mose V, 9:7) Wodo dziku na Mawu ƒe gbɔgbɔ, alo wɔ nusi vee, esi wotsi tre ɖe eƒe ŋusẽkpɔɖeamedzi nyuia ŋu. (Efesotɔwo 4:30) Wozi Yehowa dzi wòzu woƒe futɔ.—Mose III, 26:17; Mose V, 28:63.

19, 20. Nukawo dzie Yudatɔwo ɖo ŋkui, eye nukatae?

¹⁹ Esi Yudatɔwo nɔ fu kpem la, eʋã wo dometɔ aɖewo wode ŋugble le alesi nuwo nɔ tsã ŋu. Yesaya gblɔ be: “Tete [Wòɖo, “NW”] ŋku Mose dzi le blema ŋkekewo me be: Afika amesi kplɔ wo tso atsiaƒu hekpe ɖe eƒe lãha ƒe kplɔla ŋu la le? Afika amesi na eƒe gbɔgbɔ kɔkɔe nɔ wo dome la le? Amesi na eƒe atsyɔ̃dabɔ to Mose ƒe nuɖusi dzi, eye wòmã tsi la me ɖe eve le wo ŋgɔ, be wòade ŋkɔ mavɔ eɖokui ŋu? Eya amesi na woto tɔ gɔme womekli nu o, abe alesi sɔa toa gbegbee ene? Yehowa ƒe gbɔgbɔ kplɔ wo yi gbɔɖemeƒe, abe alesi lã yia bali me ene.”—Yesaya 63:11-14a.

²⁰ Ẽ, fukpekpe si do tso Yudatɔwo ƒe tomaɖomaɖo me na ŋkeke si Yehowa nye woƒe Ðela ke menye woƒe futɔ o la dzro wo. Woɖo ŋku alesi wo “kplɔla” siwo nye Mose kple Aron kplɔ wo to Ƒudzĩa me dedie la dzi. (Psalmo 77:21; Yesaya 51:10) Woɖo ŋku ɣeyiɣi si me womewɔ nu wòve Mawu ƒe gbɔgbɔ o, ke boŋ wòkplɔ wo to mɔfiame si wona Mose kple ame tsitsi bubu siwo gbɔgbɔa tia dzi la dzi. (Mose IV, 11:16, 17) Woɖo ŋku edzi hã be yewokpɔe be Yehowa zã eƒe ŋusẽ ƒe “atsyɔ̃dabɔ” tsɔ kpe ɖe yewo ŋu to Mose dzi! Emegbe Mawu ɖe wo tso gbedzi gã dziŋɔ la hekplɔ wo yi anyigba si dzi notsi kple anyitsi bɔ ɖo la dzi—wònye gbɔɖemeƒe na wo. (Mose V, 1:19; Yosua 5:6; 22:4) Gake azɔ Israel-viwo le fu kpem le esi wobu ƒomedodo nyui si nɔ wo kple Mawu dome ta!

‘Ewɔ Ŋkɔ Nyui aɖe na Eɖokui’

21. (a) Mɔnukpɔkpɔ gã kae ate ŋu asu Israel si le Mawu ƒe ŋkɔ ŋuti hafi? (b) Susu ka koŋ tae Mawu na ablɔɖe Abraham ƒe dzidzimeviwo tso Egipte?

²¹ Ke hã ŋutilãmenu siwo Israel-viwo bu la meɖi naneke o ne wotsɔe sɔ kple mɔkpɔkpɔ si wotsɔ ƒu gbe, si nye gomekpɔkpɔ le Mawu ƒe ŋkɔ kafukafu me. Mose do ŋugbe na Israel-viwo be: “Ne èlé Yehowa, wò Mawu ƒe seawo me ɖe asi, eye nèzɔ eƒe mɔwo dzi la, ekema Yehowa aɖo wò nanye eƒe dukɔ kɔkɔe, abe alesi wòka atam na wò ene. Eye anyigba dzi dukɔwo katã akpɔe bena, Yehowa ƒe ŋkɔ le ŋuwò, eye woavɔ̃ wò.” (Mose V, 28:9, 10) Esime Yehowa wɔ nu tsɔ ʋli Abraham ƒe dzidzimeviwo ta eye wòɖe wo tso kluvinyenye me le Egipte la, menye esi wòana woavo alo agbe navivi na wo ko tae o. Nane si le vevie wu sã tae wòwɔe ɖo—eƒe ŋkɔa tae. Ẽ, enɔ egbɔ kpɔm be ‘woaɖe gbeƒã’ yeƒe ŋkɔ “le anyigba blibo la katã dzi.” (Mose II, 9:16) Eye esi Mawu ɖe nublanuikpɔkpɔ fia le Israel ƒe aglãdzedze le gbeadzi megbe la, menye eƒe seselelãme koe ʋãe wòwɔ nenema o. Yehowa ŋutɔ gblɔ be: ‘Mewɔe le nye ŋkɔ ta, ne magado gui le dukɔwo ŋkume o.’—Xezekiel 20:8-10.

22. (a) Nukata Mawu agawɔ avu ɖe eƒe amewo ta le etsɔme? (b) Mɔ kawo nue míaƒe lɔlɔ̃ na Mawu ƒe ŋkɔa kpɔa ŋusẽ ɖe míaƒe nuwɔnawo dzi le?

²² Nya sẽŋu kawoe nye si Yesaya tsɔ ƒo nyagblɔɖia ta azɔ! Egblɔ be: “Ale nèkplɔ wò dukɔ la, be nade ŋkɔ gã ɖokuiwò ŋu.” (Yesaya 63:14b) Fifia nusita Yehowa wɔa avu ɖe eƒe amewo ta ŋusẽtɔe la dze ƒã. Ewɔnɛ be wòatsɔ awɔ ŋkɔ gãe na eɖokui. Eyata Yesaya ƒe nyagblɔɖia nye ŋkuɖodzinu vevi aɖe na mí be enye mɔnukpɔkpɔ xɔasi kple agbanɔamedzi gã be Yehowa ƒe ŋkɔ nanɔ mía ŋu. Kristotɔ vavãtɔ siwo li egbea lɔ̃ Yehowa ƒe ŋkɔ wu woa ŋutɔwo ƒe agbe. (Yesaya 56:6; Hebritɔwo 6:10) Nusianu si ate ŋu ahe vlodoame va ŋkɔ kɔkɔe ma dzi la wɔwɔ nyɔa ŋu na wo. Wowɔa nu wòsɔna ɖe Mawu ƒe lɔlɔ̃ nuteƒewɔwɔtɔe nu to alesi woyia edzi wɔa nuteƒe nɛ me. Eye esi wolɔ̃ Yehowa ƒe ŋkɔ nyui la ta la, wole mɔ kpɔm vevie na ŋkeke si wòafanya eƒe futɔwo le eƒe dɔmedzoe weinfianu la me—menye le esi wòaɖe vi na wo ko ta o ke boŋ le esi wòanye kafukafu na Mawu ƒe ŋkɔ si wolɔ̃ hã ta.—Mateo 6:9.

[Etenuŋɔŋlɔwo]

[Nɔnɔmetata si le axa 359]

Yehowa nɔ mɔ kpɔm na nu nyuiwo na eƒe dukɔa